जिल्ह्यातील ग्रामपंचायत निवडणुकीसाठी दाखल करण्यात आलेल्या नामनिर्देशन पत्रांची सोमवारी छाननी करण्यात आली. अत्यंत चुरशीने होत असलेल्या यानिवडणुकांसाठी अनेकांनी विरोधकांना पहिल्याच टप्प्यात रोखण्यासाठी छाननीवेळी आक्षेप घेत रोखण्याचा प्रयत्न केला. नव्याने राबविण्यात आलेल्या पद्धतीमुळे अनेकांचा गोंधळ उडत होता. तर बँक पासबुक, आधार कार्ड, ऑनलाइन पद्धतीतील चुका आदींवरी आक्षेप घेतले. मात्र, संभवित चुका लक्षात घेवून अर्ज ग्राह्य माणण्यात आले.
गडहिंग्लजमध्ये २४ अर्ज अवैध
गडहिंग्लज : तालुक्यात ४८ पंचवार्षिक तर दोन ग्रामपंचायतींची पोटनिवडणुका होत आहे. यासाठी विक्रमी १७२५ अर्ज दाखल झाले. निवडणूक निर्णय अधिकारी तथा तहसीलदार हणमंतराव पाटील यांच्या अध्यक्षतेखाली अर्जांची छाननी करण्यात आली. यामध्ये २४ अर्ज अवैध तर १७०१ अर्ज वैध ठरले आहेत. बुधवारी (दि.१५) माघारीची मुदत असून त्यानंतर नेमके चित्र स्पष्ट होईल. दरम्यान तालुक्यातील दुगूनवाडी, इदरगुच्ची, शिंदेवाडी, मुंगुरवाडी या चार ग्रामपंचायती बिनविरोध झाल्या आहेत. छाननीत बुगडीकट्टी, कानडेवाडी (प्रत्येकी ३), तेरणी, दुंडगे, हसूरचंपू, मानवाड, चिंचेवाडी (प्रत्येकी २), मुत्नाळ, मासेवाडी, नौकुड, इंचनाळ, बेळगुंदी, हनिमनाळ, हेब्बाळजलद्याळ व चन्नेकुपी येथील प्रत्येकी एक अर्ज अवैध घोषित करण्यात आला. अर्जांच्या अपात्रेसाठी दोनपेक्षा जास्त अपत्य, जात वैधता प्रमाणपत्राची अनुपलब्धता, वयाची अट पूर्ण नसणे तसेच आरक्षित जागेवर चुकीचा अर्ज भरणे आदी गोष्टी कारणीभूत ठरल्या. निवडणूक निरीक्षक म्हणून उपजिल्हाधिकारी शंकरराव भोसले उपस्थित होते.
शाहूवाडीत ११ अर्ज अवैध
शाहूवाडी : शाहूवाडी तालुक्यातील ३६ ग्रामपंचायती आणि सात ग्रामपंचायतींच्या पोटनिवडणुकांसाठी अर्ज छाननी दरम्यान ११ अर्ज अवैध ठरले. अर्ज छाननी दरम्यान काही उमेदवारांनी जातीच्या दाखल्याचे टोकण जोडले नव्हते तर काही उमेदवारांचे आधार कार्ड, बँक खाते, जातपडताळणी दाखला, शैक्षणिक पात्रतेची कागदपत्रे, प्रतिज्ञापत्रे या बाबींची पूर्तता न केल्याने हे अर्ज अवैध ठरले. त्यामुळे निवडणुकीसाठी ७२१ अर्ज शिल्लक राहिले. सात पोटनिवडणुकीसाठी असलेले आठही अर्ज वैध राहिले. तालुक्यातील गजापूर-विशाळगड, सावर्डे बुद्रुक, सोंडोली, कांडवण, मोळावडे, जाम्बुर, पणुद्रे- म्हाळसवडे, बुरंबाळ, पेंडाखळे, थेरगाव-सैदापूर, मानोली, शिंपे, नांदारी, नांदगाव, परळे निनाई-वाकोली, सोनुर्ले, परळी, वारूळ, शित्तूर तर्फ मलकापूर, शित्तूर वारुण, वडगाव, ओकोली, पाटणे, गिरगाव, पेरीड-गाडेवाडी, नेर्ले, शिराळे तर्फ मलकापूर, परळे-मुटकलवाडी, शिरगाव, सवते, गोन्डोली, आंबा-चाळणवाडी-तळवडे, वाडीचरण, थावडे, सोनवडे या ग्रामपंचायतींच्या निवडणुका होत आहेत.
चंदगडमध्ये १०१२ अर्ज शिल्लक
चंदगड : तालुक्यामध्ये ३९ ग्रामपंचायतीसाठी १०३८ अर्ज दाखल झाले होते. त्यापैकी छाननीमध्ये आज २६ अर्ज अवैध ठरले. छाननीनंतर १०१२ अर्ज शिल्लक राहिले. पोटनिडणुकीसाठी एकही अर्ज अवैध ठरला नसल्याची माहीती निवडणूक निर्णय अधिकारी तथा तहसीलदार आप्पासाहेब समिंदर यांनी दिली.
गावनिहाय शिल्लक राहिलेले अर्ज असे, आसगाव ३१ , नागवे २७, पुंद्रा ३२, इब्राहिमपूर ३४, कानडी १९, केरवडे ३०, मुगळी ९, बोजुर्डी २२, बागिलगे १९, दाटे ३५, मांडेदुर्ग ४१, ढोलगवाडी ६, म्हाळेवाडी ८, किणी ३१, घुलेलवाडी १८, तावरेवाडी २४, धुमडेवाडी १५, मलतवाडी ४६, बसर्गे २५, कालकुंद्री ६१, दिंडलकोप १४, राजगोळी बु. ४१, होसूर २०, किटवाड १०, कोवाड ५२, करेकुंडी १७, शिनोळी खुर्द ४७, कौलगे २१, देवरवाडी २५, माडवळे २६, बुक्कीहाळ ६, हजगोळी २९, तुडये ३२, सुरुते १४, सुंडी १४, पाटणे १६, नांदवडे ३३, कळसगादे १३, हलकर्णी ४५. आमरोळी गावासाठी एकमेव अर्ज दाखल झाला असून तो वैध ठरला आहे.
राधानगरीत २२ अर्ज अवैध
राधानगरी : ग्रामपंचायत निवडणुकीसाठी तालुक्यातील विविध गावातून दाखल झालेल्या एकूण ६८७ उमेदवारी अर्जापैकी आजच्या छाननी प्रक्रियेत २२ उमेद्वारांचे उमेदवारी अर्ज अवैध ठरले असून उर्वरित ६६५ अर्ज वैध ठरले आहेत. अशी माहिती तहसीलदार शिवाजीराव शिंदे यांनी दिली. या टप्प्यात तालुक्यातील संवेदनशील असलेल्या पनोरी,तळाशी,गुडाळ् नरतवडे, आणाजे, चाफोडी, मल्लेवाड़ी, हेळेवादी आदी प्रमुख गावासह २० गावातील निवडणूक प्रक्रिया सध्या सुरु आहे. त्यासाठी संबधित गावातून एकूण १३६ जागांसाठी तब्बल ६८७ उमेदवारी अर्ज दाखल झाले होते. यापैकी २२ उमेदवारांचे उमेदवारी अर्ज सबळ पुराव्याअभावी निवडणूक निर्णय अधिकाऱ्यांनी अवैध ठरविले. चाफोडी तर्फ ऐनघोल या गावातील प्रत्येकी एक-एक अर्ज अवैध ठरला आहे. यावेळी स्थानिक नेते आणि कार्यकर्ते मोठ्या प्रमाणात उपस्थित होते.
शिरोळमध्ये २८ अर्ज अवैध
जयसिंगपूर : शिरोळ तालुक्यातील ३३ ग्रामपंचायतीच्या निवडणुकीसाठी दाखल झालेल्या उमेदवारी अर्जांची सोमवारी छाननी करण्यात आली. या छाननीत १७ गावातील २८ उमेदवारांचे अर्ज अवैध ठरले. तर १८४८ उमेदवारांचे अर्ज वैध ठरल्याने त्यांनी सुटकेचा निश्वास सोडला. जांभळीच्या ललिता अर्जुन कोळी यांचे जातीचे प्रमाणपत्र नसल्याने त्यांचा अर्ज अवैध ठरला. त्याठिकाणी माधुरी नितीन देवकारे यांचा एकमेव अर्ज असल्याने त्यांच्या सरपंचपदाचा मार्ग मोकळा झाला आहे. यामुळे जांभळी ग्रामपंचायतीच्या निवडणुकीत गणपतराव पाटील गटाला मोठा हादरा बसला आहे.
शिरोळ पंचायत समिती सभागृह आणि महसूल भवन येथे सकाळी ११ वाजता उमेदवारी अर्जांची छाननी सुरू करण्यात आली. ही छाननी सायंकाळी सहा वाजेपर्यंत सुरू होती. छाननी प्रक्रियेवेळी अनेक उमेदवारांनी आपल्या सोबत वकील आणले होते. काही गावातील उमेदवारांनी आपल्या प्रतिस्पर्धी उमेदवारांच्या अर्जावर आक्षेप घेतल्यामुळे या ठिकाणची छाननी उशिरापर्यंत सुरू होती. उमेदवारांच्या वयाचा दाखला, तसेच उमेदवार वापरत असलेले शौचालय, जातीचे प्रमाणपत्र, उमेदवारांचे अपत्य उमेदवारांची शासकीय येणेबाकी, या निकषावर १७ गावातील २८ उमेदवारांचे अर्ज अपात्र ठरले.
आजऱ्यात १० अर्ज अवैध
आजरा तालुक्यातील २० ग्रामपंचायतीसाठी अर्ज सादर केलेल्या उमेदवारांपैकी १० जणांचे अर्ज अवैध ठरले. त्यामुळे २० ग्रामपंचायतींसाठी आता एकूण ४९७ अर्ज शिल्लक राहिले आहेत. आजरा तहसील कार्यलयामध्ये झालेल्या छाननीमध्ये होनेवाडी १, गवसे १, वाटंगी १, जाधेवाडी १, खोराटवाडी २, हाळोली-मेढेवाडीव दर्डेवाडी ग्रुप ग्रामपंयाचायत १, कासारकांडगाव १ व बेलेवाडीच्या २ उमेदवारांचे अर्ज अवैध ठरले. अर्ज सादर करण्याच्या मुदतीत ५०७ अर्ज दाखल झाले होते.
पन्हाळ्यात एक ग्रामपंचायत बिनविरोध
पन्हाळा तालुक्यातील निवडणुक लागलेल्या ४१ ग्रामपंचायतीसाठी एकूण १६१७ उमेदवारी अर्ज दाखल झाले होते. त्यापैकी छाननीत ३५ अर्ज अवैध ठरल्याने आता एकूण ३७५ जागांसाठी १५८२ उमेदवारी अर्ज शिल्लक आहेत. बुधवारी होणाऱ्या माघारीनंतरच लढतीचे चित्र स्पष्ट होणार आहे. तालुक्यातील वारनूळ ही ग्रामपंचायत बिनविरोध झाली असून आणखी तीन ते चार ग्रामपंचायती बिनविरोध होण्याची शक्यता आहे. माजनाळ, पुशिरे, उत्रे, सातवे, आपटी येथे प्रत्येकी एक, हारपवडे, निवडे, आवळी, कणेरी, तिरपण येथे प्रत्येकी दोन, नणुंद्रे, कळे येथे तीन तर पोहाळे येथे चार आणि सातार्डे, नावली येथे प्रत्येकी पाच अर्ज अवैध ठरले.
मोबाइल अॅप डाउनलोड करा आणि राहा अपडेट
