महावीर कॉलेजच्या आवारात पूर्ववैमनस्यातून सदर बाजारातील तरूणांनी महेश उमेश लोखंडे (वय २१, रा. कनाननगर) या युवकाला बेदम मारहाण केली. मंगळवारी सकाळी साडेदहाच्या सुमारास झालेल्या घटनेने परिसरात घबराटीचे व तणावाचे वातावरण निर्माण झाले होते.
मंगळवारी सकाळी महेश लोखंडे व सदर बाजार परिसरातील तरूणांनी मोटारसायकल पार्क करण्यावरून वाद झाला. महेशने रागाने का बघतोस, असा जाब विचारल्यावर सदर बाजार परिसरातील तरूणांनी महेशला मारहाण करण्यास सुरूवात केली. महेश सुटका करून घेत मोटारसायकलवरून कनाननगर येथील घराकडे पळून गेला. कनाननगर येथील तरूणांनी महेशच्या घराकडे मोर्चा वळवत घरास घुसून त्याला लाथाबुक्क्यांनी बेदम मारहाण केली. तसेच त्याच्या मोटारसायकलची तोडफोड केली. या घटनेने परिसरात घबराट पसरली. महेश लोखंडेला सीपीआरमध्ये उपचारासाठी दाखल करण्यात आले. ही माहिती कळताच कनाननगर परिसरातील लोखंडेच्या समर्थकांनी गर्दी केली. मारामारीसंबधीत तक्रार न आल्याने शाहूपुरी पोलिस ठाण्यात रात्री उशिरापर्यंत नोंद झालेली नव्हती.
एप्रिल महिन्यात सदर बाजार येथे राष्ट्रपुरूषाच्या जयंतीनिमित्त लावण्यात आलेल्या फ्लेक्स बोर्डवरून वाद झाला होता. फ्लेक्स बोर्डवर महेश लोखंडेची प्रतिमा होती. त्यामुळे काही तरूणांनी हा फलक फाडला होता. त्यामुळे सदर बाजार परिसरातील एका गटाचा लोखंडेवर राग होता. चार महिन्यानंतर या वादाचे पडसाद पुन्हा उमटल्याची शक्यता व्यक्त केली जात आहे.
मोबाइल अॅप डाउनलोड करा आणि राहा अपडेट
