अल्पसंख्याक मराठी भाषा फाउंडेशन वर्ग २०१५-१६ करिता ८ वी व १० वी उर्दू या वर्गाची विद्यार्थी पटसंख्येची अट शिथिल करावी, या मागणीसाठी दि मोहामेडन एज्युकेशन सोसायटीच्यावतीने शिक्षण उपसंचालक एम.के.गोंधळी यांना निवेदन देण्यात आले.
यासंबंधी सोसायटीचे अध्यक्ष गणी आजरेकर म्हणाले, 'अल्पसंख्याक मराठी भाषा फाउंडेशन वर्गांतर्गत इयत्ता ८ वी ते १० वी उर्दू माध्यम या वर्गासाठी मुख्य मराठी, पदवीधर किंवा पदव्युत्तर पदवीधारक पात्र शैक्षणिक अर्हता असलेल्या शिक्षकांची नेमणूक करण्यात येत होती. त्यांना २०११-१२ पासून जुलै ते मार्च महिन्याकरिता महिन्याला तीन हजार ए‌कत्रित मानधन देण्यात येत होते. त्यावेळेस ८ ते १० वी या तीन वर्गाच्या ए‌कत्रित पटसंख्येबाबत कोणतीही अट नव्हती. त्यामुळे अल्पसंख्याक शाळेतील मराठी फाउंडेशन शिक्षक नियुक्तीमुळे सरकारच्या या योजनेची उद्दिष्ट्ये साध्य होण्यास मदत होत होती. मात्र सरकारच्या २७ एप्रिलच्या आदेशानुसार योजनेचा लाभ घेता येणार नाही. या शैक्षणिक वर्षामध्ये या आदेशानुसार मानधन पाच हजार रूपये करण्यात आले, पण विद्यार्थी संख्या ८ वी ते १० वी करिता १८० ते २०० पर्यंत एक शिक्षक नियुक्त करता येईल असे निर्देश देण्यात आले आहे.'
अल्पसंख्यांक विद्यार्थ्यांना शिक्षणाच्या प्रवाहात आणून त्यांना विकासामध्ये किंवा प्रगतीमध्ये सहभागी करून घेणे हा सरकारचा मूळ उद्देशच या पटसंख्येच्या जाचक अटीमुळे बाजूला गेला आहे. हा आदेश रद्द करून पूर्वीप्रमणेच आदेश जारी करावा, शिक्षक नियुक्ती करण्याचे आदेशही द्यावेत, अशी मागणी करण्यात आली. शिष्टमंडळात सोसायटीच्या सदस्यांचा समावेश होता.
मोबाइल अॅप डाउनलोड करा आणि राहा अपडेट
