प्रशस्त जागा आणि रस्ते असलेल्या फुलेवाडी प्रभागात दर्जेदार क्रीडा मैदानाची आवश्यकता आहे. रिंगरोडवरुन फुलेवाडी दत्त मंदिराकडे प्रवेश करीत असलेला रस्ता वर्षानुवर्षे तसाच आहे. युवकांसाठी व्यायामशाळेचे साहित्य नाही. अयोध्या कॉलनी ते फुलेवाडी जकात नाका रोडवर जाण्यासाठी मात्र जीव मुठीत घेऊनच प्रवास करावा लागत आहे.
सन १९४६ मध्ये फुलेवाडी सहकारी सोसायटीच्या माध्यमातून या ठिकाणी प्रशस्त प्लॉट पाडण्यात आले. प्रभागात उच्च आणि मध्यमवर्गीय वस्ती आहे. फुलेवाडी क्रीडा मंडळ अनेक स्पर्धेत भाग घेते. फुटबॉलची आवड असलेले सुमारे दोनशे खेळाडू परिसरात आहेत. मात्र या प्रभागात विस्तारित जागा असूनही खेळाडूंसाठी दर्जेदार मैदान उपलब्ध नाही. फुलेवाडी रिंग रोड ते फुलेवाडी सहावा स्टॉप पर्यंत प्रत्येक गल्लीत रस्ते मोठे आहेत. मात्र शेळके कॉलनी परिसरातील गटर्स आणि रस्ते झालेले नाहीत. फुलेवाडी पाचवा बस स्टॉप येथे महिलांच्यासाठी नियोजन सभागृहाची मागणी होती. मात्र तीही अद्याप पूर्ण झालेली नाही. दत्त मंदिर परिसरात चांगले सभागृह बांधले आहे. मात्र अद्याप या सभागृहात स्वच्छतागृहत, पाण्याची सुविधा नसल्याने याचा उपयोग केला जात नाही. सुमारे पाच हजार चौरस फूटाचे सभागृह आहे. फुलेवाडी मधील गल्ली क्रमांक एक ते सहा पर्यंत प्रत्येक ठिकाणी कचरा उठाव करण्यासाठी कचरा कोंडाळे आहेत. मात्र त्यातील कचरा वेळेवर उठाव केला जात नाही. परिसरातील बहुतांशी ठिकाणी औषध फवारणी केली जात नाही.
परिसरातील दत्त मंदिर आणि दर्जेदार बाग आहे. यंग सीनिअर्सची या ठिकाणी मोठी गर्दी होते. नगरसेवक सर्जेराव पाटील यांनी सुमारे दोनशे ट्रक माती टाकून उत्तम बाग तयार केली आहे. या बागेची निगाही राखली जाते. फुलेवाडी दूध डेअरीसमोर भाजी मंडईसाठी नियोजन केले आहे. मात्र या ठिकाणी भाजी विक्रेते बसत नाही. फुलेवाडी जकात नाका येथून क्रांतीसिंह नाना पाटील नगर रोडकडे जाणाऱ्या रस्त्यावर काही विक्रेते बसतात. फुलेवाडी जकात नाका ते अयोध्या कॉलनीपर्यंतचा रस्ताही अद्याप झालेला नाही. फुलेवाडी पहिला बसस्टॉपपासून ते सहाव्या बसस्टॉप पर्यंत काही ठिकाणी अतिक्रमणे झाली आहेत.
'प्रभागात सुमारे दहा कोटींची कामे केली आहे. रस्ता, पाण्याची कोणतीही कमतरता नाही. चांगल्या शाळा, मंदिरे, बागांची निगा राखली आहे. प्रत्येक रहिवाशांचे काम सोडविण्याचा प्रयत्न केला आहे. प्रभागाच्या विकासासाठी काही ठिकाणी स्वनिधीही खर्च केला आहे. काही ठिकाणी मात्र केवळ विरोधासाठी विरोध म्हणून विकासकामे करु दिली नाहीत. भाजी मंडईसाठी फुलेवाडी दूध डेअरीच्या ठिकाणी व्यवस्था केली आहे. यंग सीनिअर्स, युवक, महिलांसाठी विशेष उपक्रमही राबविले असून प्रत्येक कॉलनीत जाऊन समस्या तातडीने सोडविल्या आहेत.
- सर्जेराव पाटील, नगरसेवक
'प्रभागात बहुतांशी विकासकामे पूर्ण झाली आहेत. काही विकासकामांसाठी अधिक निधी मिळाला नसल्याने कामे होऊ शकली नाहीत. उत्कृष्ट बाग, शाळा आणि रस्ता चांगला आहे. मात्र खेळांडूच्यासाठी मैदान उपलब्ध नाही. कोणत्याही प्रभागात नगरसेवक सर्वच कामे परिपूर्ण करणे शक्य नाही. फुलेवाडी ते क्रांतीसिंह नाना पाटील रिंगरोडवरील अयोध्या कॉलनीपर्यंतचा अपुरा रस्ताही तातडीने पूर्ण करण्याची गरज आहे.
- प्रकाश घाटगे, रहिवाशी
मोबाइल अॅप डाउनलोड करा आणि राहा अपडेट
