म. टा. प्रतिनिधी, कोल्हापूर
शेतकऱ्यांच्या खात्यावर २० जूनपर्यंत एफआरपीचे पैसे जमा झाले नाही तर २२ जून रोजी साखर आयुक्त कार्यालयावर मोर्चा काढणार असल्याचा इशारा स्वाभिमानी शेतकरी संघटनेचे नेते खासदार राजू शेट्टी यांनी गुरुवारी दिला. मोर्चासाठी पुण्याकडे जाताना पोलिसांनी आम्हाला अडविण्याचा प्रयत्न केला तर रस्त्यातच बेमुदत उपोषण सुरू करू, असेही शेट्टी यानी म्हटले आहे. मोर्चाच्या नियोजनासाठी सर्किट हाउस येथे स्वाभिमानी शेतकरी संघटनेच्या कार्यकर्त्यांची बैठक आयोजित केली होती. त्यावेळी शेट्टी बोलत होते.
शेतकऱ्यांनी बँकेकडून घेतलेले पीककर्ज ३० जूनपर्यंत फेडले नाही तर नवीन कर्ज मिळणार नाही. त्यामुळे अतिरिक्त कर्जाचा भार पडेल, असे सांगून शेट्टी म्हणाले, 'साखर कारखान्यांकडून शेतकऱ्यांना पैसे मिळाले नाहीत. केंद्राचे पॅकेजही अद्याप मिळालेले नाही. त्यातच वेळेत पैसे न भरल्यास शेतकऱ्यांना नवीन कर्ज त मिळणार नाहीच. शिवाय अतिरिक्त व्याजही भरावे लागणार आहे. अगोदरच कर्जबाजारी असलेल्या शेतकऱ्यांना आम्ही अजून कर्जबाजारी करू इच्छित नाही. त्यामुळे एफआरपीचे पैसे दिले नाहीत तर आंदोलन होणारच आहे. मुख्यमंत्री देवेंद्र फडणवीस शुक्रवारी कोल्हापुरात येत आहेत. त्यांच्यासोबत सकारात्मक चर्चा झाली तर ठीक अन्यथा आंदोलन होणारच.'
साखर कारखान्यांसाठी सरकारने अनेक सवलती दिल्या आहेत. खरेदी करात सूट, मळी आणि इथेनॉलच्या दरांमध्ये झालेली वाढ, वीजनिर्मिती यामुळे कारखान्यांना जादाचे पैसे मिळत आहेत. त्याबरोबरच सरकारने तत्काळ पैसे उपलब्ध करून शेतकऱ्यांना द्यावेत. तरीही कारखाने एफआरपी देत नसतील तर कारखान्यांवर कारवाईची भूमिकाही सरकारने घेतली पाहिजे, असे शेट्टी यांनी स्पष्ट केले.
'मड्याच्या टाळूवरचे लोणी...'
जिल्हा बँकेने शेतकऱ्यांना दिलेल्या कर्जातून ५ टक्के रक्कम कापून घेण्याचा निर्णय घेतला आहे. 'मड्याच्या टाळूवरील लोणी खाण्या'चा हा प्रकार आहे. बँकेची एवढी काळजी होती तर संचालक मंडळ सत्तेवर आल्यानंतर ३९२ कोटींच्या ठेवी का काढल्या? याचाही संचालकांनी विचार करावा, असा सल्ला शेट्टी यांनी दिला.
............
सरकार आम्हाला कधी तुरूंगात टाकते याची आम्ही वाट पाहताहोत, असा टोला राष्ट्रवादीचे अध्यक्ष शरद पवार यांनी लगावला होता. हा संदर्भ देत शेट्टी यांनी ज्यांनी चुकीचे काम केले आहे त्यांनी तुरूंगात जाण्याची मानसिक तयारी करावी असा टोला पवारांचे नाव न घेता मारला. गैरप्रकार करणाऱ्यांना तुरूंगात टाकण्याचे आश्वासन महायुतीने प्रचारादरम्यान दिले होते. त्यामुळे ज्यांनी चुकीचे काम केले आहे, त्या सर्वांनी तुरूंगात जाण्याची तयारी ठेवली पाहिजे. तुरूंगात गेल्यामुळे आत्मचिंतन करायला वेळ मिळतो, आत्मचरित्र लिहीता येते. मुख्यमंत्री देवेंद्र फडणवीस यांनीही गैरप्रकार करणाऱ्यांना पाठीशी घालू नये. त्यामुळे वचन पाळणारे सरकार अशी प्रतिमा तयार होईल, असा सल्ला शेट्टी यांनी दिला.
मोबाइल अॅप डाउनलोड करा आणि राहा अपडेट
