'जत तालुक्यातील बेचाळीस गावांना कर्नाटकात जाण्यासाठी नाहरकत दाखला द्यावा,' अशी मागणी पाणी संघर्ष समितीचे अध्यक्ष सुनील पोतदार यांनी थेट शिवसेनेचे पक्षप्रमुख उद्धव ठाकरे यांच्याकडे केली आहे. या मागणीमुळे जत तालुक्यातील पाणी प्रश्न पुन्हा ऐरणीवर आला आहे. बुधवारी जत तालुक्यातील उमदी ते सांगली अशी पदयात्रा काढण्यात येणार आहे. यामध्ये खासदार संजय पाटील, आमदार विलासराव जगताप सहभागी होणार असल्याने या अनोख्या आंदोलनाकडे जिल्ह्याचे लक्ष लागले आहे.
जत तालुक्याच्या पूर्व भागातील बेचाळीस गावे म्हैसाळ उपसा सिंचन योजनेपासून वंचित आहेत. सरकारच्या अन्य योजनाही या गावांपासून चार हात दूरच असल्याचे चित्र आहे. केंद्रीय गृहमंत्री राजनाथसिंह यांनी विधानसभेच्या वेळी पाणीप्रश्न सोडविण्याचे आश्वासन दिले होते. उद्धव ठाकरे यांनीही जतचा दौरा करून संबधित गावांतील लोकांची भेट घेतली होती. शिवाय त्यावेळच्या दुष्काळात चारा छावण्या सुरू करून दिलासा दिला होता. सेना-भाजप सत्तेवर आल्यानंतर पाण्याचा प्रश्न मार्गी लागेल, असे वाटल्याने पाणी संघर्ष समिती भाजप उमेदवाराच्या प्रचारात सक्रीय झाली होती. परंतु, अद्यापही या गावांना न्याय मिळत नाही. त्यामुळे आता आम्हाला कर्नाटकात जाण्यासाठी परवानगी द्यावी, असे पत्र समितीच्या वतीने उद्धव ठाकरे यांना देण्यात आले आहे. शिवाय बुधवारी उमदी ते सांगली या पदयात्रेत जनतेने सहभागी व्हावे, असे आवाहन पोतदार यांनी केले आहे.
मोबाइल अॅप डाउनलोड करा आणि राहा अपडेट
