आजची पत्रकारिता मिशनकडून कमिशनकडे

June 14, 2015, 12:10 pm

≪ Previous: कोयना परिसरात मान्सूनची हजेरी

म. टा. वृत्तसेवा, सोलापूर

'विचारांची दिशा देणारी पत्रकारिता आज सौम्य होत चालली आहे. आजची पत्रकारिता मिशनकडून कमिशनकडे चालली आहे. याचा विचार करण्याची गरज आहे,' अशी खंत उत्तर प्रदेशचे राज्यपाल राम नाईक यांनी व्यक्त केली. रविवारी सोलापूर जिल्हा पत्रकार संघाच्या हीरक महोत्सवी वर्षानिमित्त विजापूर रोडवरील पत्रकार भवनात बसविण्यात आलेल्या पत्रमहर्षी रंगाअण्णा वैद्य यांच्या पुतळ्याचे अनावरण राज्यपाल नाईक यांच्या हस्ते करण्यात आले. या वेळी ते बोलत होते. पालकमंत्री विजयकुमार देशमुख कार्यक्रमाच्या अध्यस्थानी होते.

राज्यपाल नाईक म्हणाले, 'पूर्वीच्या काळात समाजात जागृती निर्माण करण्याचे काम वृत्तपत्रांनी केले. पत्रकारितेला एक वेगळे महत्व होते. केसरीत लोकमान्य टिळक काय म्हणतात याची लोक वाट पहात होते. परंतु, आज विचारांची दिशा देणारी ही पत्रकारिता सौम्य होत चालली आहे. लोक अग्रलेख किती वाचतात, असा प्रश्न निर्माण झाला आहे. पत्रकारिता म्हणून असलेल्या साधनाचा उपयोग विकासासाठी केला पाहिजे. या शिवाय भ्रष्टाचारही बाहेर काढण्यासाठी झाला पाहिजे. परंतु, आज असे होताना दिसत नाही. सकारात्मक बातम्यांऐवजी नकारात्मक बातम्यांना प्राधान्य दिले जात आहे. समाजापुढे काय द्यायचे आणि काय नाही, याचा विवेक पत्रकारांपुढे असायला पाहिजे, आज तो दिसून येत नाही. शोध पत्रकारितेचा सुद्धा ऱ्हास होत चालला आहे. पत्रकारांची नजर शोधक असली पाहिजे. पत्रकारांनी सत्य, प्रामाणिकपणा आणि विश्वासार्हता तीन बाबींना समोर ठेवून पत्रकारिता केल्यास खऱ्या अर्थाने पत्रकारितेला अर्थ प्राप्त होईल.' हीरक महोत्सवी वर्षानिमित्त काढण्यात आलेल्या स्मरणिकेचे प्रकाशनही नाईक यांच्या हस्ते करण्यात आले.

Latest Images