म. टा. प्रतिनिधी, कोल्हापूर
पंचगंगा तालीम प्रभागातील पंचगंगा नदीमध्ये परीट घाटामुळे होणाऱ्या प्रदूषणाकडे दुर्लक्ष झाले आहे. तसेच शहरी व ग्रामिण भागाचा आधार असलेल्या पंचगंगा हॉस्पिटलचे विस्तारीकरण व आधुनिकीकरणाकडे दुर्लक्ष झाले. गटर, रस्ते, पिण्याचे पाणी या सुविधाची कमालीची सुधारणा झाली असली तरी २० टक्क्याहून अधिक भागात रस्ते, गटरची कामे झालेली नाहीत.
पंचगंगा नदीजवळ सर्वात जुनी वस्ती असलेला हा भाग आहे. शंकराचार्य मठ, मस्कुती तलाव, ललितकुमार भिशी, धनवडे गल्ली, सोमेश्वर गल्ली, अवधूत गल्ली, गवंडी मस्जिद, शिंदे पॅसेज, केसापूर पेठ, कागदी गल्ली, शाहू हायस्कूल, भोई गल्ली, जामदार क्लब, गायकवाड या भागांचा प्रभागात समावेश होतो. हा भाग सखल भागात असल्याने पाणी मुबलक आहे. जैन मठ, अवधूत गल्ली परिसरात थोडा कमी दाबाने पाणीपुरवठा होत असला तरी पाणी मात्र मुबलक आहे. गवंडी मोहल्ला, शिंदे पॅसेजमध्ये डांबरीकरण झालेले नाही. या परिसरात कोंडाळ्यातील कचऱ्याचा उठावही नियमित होत नाही. भोई गल्ली, जामदार क्लब, गायकवाड वाडा या छोट्या रस्त्यांवर डांबरीकरण झालेले नाही.
पंचगंगा नदी प्रदूषण रोखण्यासाठी महानगरपालिकेकडून प्रयत्न केले जात असले तरी स्थानिकांकडून सहकार्य मिळत नाही. पंचगंगा तालमीकडून आलेल्या मोठ्या गटारीचे पाणी परीट घाटामार्गे सांडपाणी थेट नदीत मिसळते. परीट घाटाजवळ म्हशी नियमित धुतल्या जातात. सोमवारी नदीला परड्या सोडल्या जातात. यामुळे नदीचे प्रदूषण मोठ्या प्रमाणात होत आहे. परीट घाटावर कपडे धुतले जातात. नदी प्रदूषण होऊ नये, म्हणून महानगरपालिकेकडून कोणतेही प्रयत्न केले जात नाही. एक महिन्यापूर्वी आरोग्य अधिकाऱ्यांनी परीट घाटावर कपडे धुण्यास व म्हशी धुण्यास बंदी घातली होती. पण स्थानिक नगरसेवक प्रकाश गवंडी यांनी विरोध केला होता. कपडे व म्हशी धुण्याची सोय करावी मग बंदी आणावी अशी मागणी केली होती. पंचगंगा ब्राह्मण घाट ते शंकराचार्य मठ हा परिसर हागणदारी मुक्त करण्यासाठी तात्पुरते शौचालय करण्याची गरज आहे. तसेच महिलांना स्नान करण्यासाठी कायमस्वरूपी बाथरूमची गरज आहे. या परिसरातील ग. गो. जाधव शाळेची रंगरंगोटी करण्यात आली आहे पण शाळेच्या बाहेरील दोन खोल्या अडगळीत पडल्या आहेत. मस्कुती तलाव परिसरातील शाळेसाठी भुख्ंड आरक्षित करण्यात आला आहे.
पंचगंगा हॉस्पिटलकडे दुर्लक्ष
पंचगंगा हॉस्पिटलमध्ये परिसरातील व ग्रामिण भागातील गरीब कुटुंबातील महिला प्रसुतीसाठी येतात. या हॉस्पिटलमध्ये दिवसेदिवस गर्दी वाढत आहे पण त्याप्रमाणात सुविधा नसल्याने कमी पायाभूत सुविधा असतानाही प्रसती केल्या जातात. हॉस्पिटलचे विस्तारीकरण व आधुनिकीकरण करण्याकडे मात्र दुर्लक्ष आहे. हॉस्पिटलमध्ये लिफ्टची सोय करण्याची मागणी केली जात आहे. दोन वर्षापूर्वी डागडुजी करण्यात आली पण हॉस्पिटलचा विस्तार करण्याची दृष्टी प्रशासन व नेतृत्वाला दाखवता आलेली नाही.
प्रभागातील ८० टक्के रस्ते व गटरांचे काम पूर्ण केले आहे. त्यासाठी प्रयत्न करत आहे. पंचगंगा प्रदूषणमुक्त झाली पाहिजे, या मताचा मी आहे पण कपडे धुण्यासाठी व म्हशी धुण्याची सोय महानगरपालिकेने करून दिली पाहिजे.
- प्रकाश गवंडी, नगरसेवक
प्रभागात रस्ते, गटर, स्ट्रीट लाइट, स्वच्छता ही कामे अतिशय चांगली झाली आहेत. पण उठावदार काम झालेले नाही. पहिली तीन वर्षे रस्ते अतिशय खराब होते. केलेले रस्ते कोणत्या दर्जाचे आहेत, हे पावसाळ्यानंतरच स्पष्ट होणार आहे.
- रोहित बुचडे, नागरिक
मोबाइल अॅप डाउनलोड करा आणि राहा अपडेट
