रस्ते विकास प्रकल्पाच्या मूल्यांकनाच्या पहिल्या टप्प्यात झालेल्या चुका, नोबेल कंपनीकडे असलेली अपुरी साधनसामग्री आणि मनुष्यबळाची कमतरता यामुळे रस्त्यांच्या मोजमापासह सर्वेक्षणाचे काम लांबणार आहे. राज्य सरकारने ३१ मेपूर्वी टोलबाबत निर्णय घेण्याची घोषणा केली असली तरी सर्व्हे आणि मूल्यांकनाचे काम अजून तीन आठवडे चालण्याची शक्यता आहे. मात्र, उपलब्ध कालावधी, सर्व्हे करावयाचे रस्ते आणि परत त्याची असोसिएशन ऑफ आर्किटेक्ट इंजिनीअर्सतर्फे सुरू असलेली फेरतपासणी यामुळे सरकारने टोलबाबत केलेली वेळेचे गणित चुकणार असे सूत्रांकडून समजते. मुदतीत काम होणार नसल्याने प्रकल्पाचे सर्व्हे करणाऱ्या नोबेल कंपनीला मुदतवाढ देण्याच्या हालचाली सुरू आहेत.
यासंदर्भात मूल्यांकनासाठी नियुक्त समितीचे सदस्य, आर्किटेक्ट असोसिएशनचे पदाधिकारी राजेंद्र सावंत म्हणाले, 'पुणे येथील नोबेल इंटरेस्ट कंपनीने रस्ते प्रकल्पाचे सर्व्हे आणि मूल्यांकनाचे काम २१ एप्रिलला सुरू केले. कंपनीला एका महिन्याच्या आता अहवाल देण्याच्या सूचना केल्या होत्या. मात्र कंपनीने पहिले वीस दिवसात केलेल्या सर्व्हेच्या कामात असंख्य चुका आणि मोजमापात विसंगती आढळली. यामुळे तो वीस दिवसाचा कालावधी वाया गेला. ८ मे रोजी पुणे येथे रस्ते विकास महामंडळाचे अधिकारी, मूल्यांकन समिती सदस्यांची बैठक झाली. या बैठकीत 'नोबेल'ने केलेल्या मोजमापाविषयी आक्षेप घेतल्याने पुर्न सर्व्हेचा निर्णय झाला. 'नोबेल'ने पुर्न सर्व्हे सुरू केला आहे. 'नोबेल'ने यापूर्वी एकाच रस्त्याचा सर्व्हे करून अहवाल दिला आहे. रविवारी सायंकाळपर्यंत दुसऱ्या रस्त्याचा अहवाल मिळाला नाही. तेरा दिवसांत इतर रस्त्यांचे मोजमाप आणि फेरतपासणी पूर्ण होण्याची शक्यता कमी आहे.'
आर्किटेक्ट असोसिएशनची टीम
नोबेल कंपनीकडून पुर्न सर्व्हे अंतर्गत प्रत्येक रस्त्याचे मोजमाप, लांबी रुंदी घेतली जात आहे. शुक्रवारपर्यंत चार मशिनच्या आधारे काम सुरू होते. सर्व्हेत रस्त्यांचे प्रत्येकी दहा मीटर अंतरावर मोजमाप, गटर्स, फूटपाथची रूंदी, रस्त्याचा प्रकार या बाबींचा समावेश आहे. नोबेलकडून अहवाल आल्यानंतर असोसिएशन ऑफ आर्किटेक्टस असोसिएशकडून त्या सर्व्हेची फेर तपासणी केली जाते. असोसिएशनने याकरिता २५ आर्किटेक्ट व न्यू पॉलिटेक्निक कॉलेजच्या १५ विद्यार्थ्यांच्या मिळून वेगवेगळ्या टीम केल्या आहेत. असोसिएशने एका रस्त्याच्या मोजमापाला क्लीन चीट दिली आहे.
मोबाइल अॅप डाउनलोड करा आणि राहा अपडेट
