वापरलेल्या इंजेक्शन सिरिंज, औषधाच्या बाटल्या असा मोठ्या प्रमाणातील जैववैद्यकीय कचरा जयंती नाल्यामध्ये टाकला असल्याचे आढळून आले. जयंती नाल्यातील प्रदूषण वाढविण्याच्या प्रकाराने महाराष्ट्र प्रदूषण नियंत्रण मंडळाच्या अधिकाऱ्यांबरोबर महापालिकेच्या अधिकाऱ्यांनीही तत्काळ भेट दिली.
जयंती नाल्याच्या प्रवाहातच मोठ्या प्रमाणावरील सिरिंज, औषधाच्या बाटल्या तसेच काही बँडेज असा जैववैद्यकीय कचरा टाकल्याचे काही जागरुक नागरिकांना आढळून आले. त्यानंतर मंडळाच्या व महापालिकेच्या अधिकाऱ्यांना त्याची कल्पना दिल्यावर आरोग्याधिकारी डॉ. दिलीप पाटील व मंडळाचे उपप्रादेशिक अधिकारी मनीष होळकर घटनास्थळी आले. जयंती नाल्याचे सांडपाणी अडवल्यामुळे पात्र कोरडे आहे. पण एखादा मोठा पाऊस झाल्यास नाला ओसंडून वाहिल्यास त्यातून हा कचरा पाण्यातून थेट नदीत जाण्याची शक्यता आहे. त्यामुळे हा कचरा काढून घेण्याचा आदेश होळकर यांनी महापालिकेला दिला.
त्यानंतर डॉ. पाटील यांनी नेचर इन नीड या संस्थेला तत्काळ बोलवून हा कचरा उठवण्याचे आदेश दिले. त्यानुसार तातडीने त्या कंपनीच्या कर्मचाऱ्यांनीही सिरिंज व बाटल्या गोळा केल्या. नाल्यात पाणी असण्याच्या शक्यतेने हा कचरा नाल्यावरील पुलावर थांबून सिरिंज, बाटल्या असलेले बॉक्स खाली फेकले आहेत. पण नाल्यात पाणी नसल्याने ते वाहून गेले नाही हे सुदैवच ठरले. शहरात अनेक ठिकाणी जैववैद्यकीय कचरा अशाच पद्धतीने अंधारामध्ये फेकून दिला जात असल्याचे वारंवार घडत आहे. नाल्यातील हा प्रकार म्हणजे इतर नागरिकांच्या जिवाशी खेळण्याचाच हा प्रकार असल्याने प्रजासत्ताक सामाजिक सेवा संस्थेचे अध्यक्ष दिलीप देसाई यांनी सांगितले. याबाबत शहरातील हॉस्पिटलना जैववैद्यकीय कचरा संबंधित कंत्राटदार कंपनीकडेच देण्याबाबतच्या सूचना प्रशासनाने देण्याचीही मागणी केली आहे.
मोबाइल अॅप डाउनलोड करा आणि राहा अपडेट