सांगली जिल्हा मध्यवर्ती सहकारी बँकेच्या निवडणुकीत माजी मंत्री जयंत पाटील यांच्या नेतृत्वाखाली शेतकरी सहकारी पॅनेलने १५ जागा जिंकून स्पष्ट बहुमताची सत्ता मिळवली. परंतु, या पॅनेलची आवस्था गड आला पण सिंह गेला अशी झाली. सहा जागा जिंकताना पतंगराव कदमांच्या रयत आघाडीने माजी मंत्री मदन पाटील, आमदार विलासराव जगताप यांचे चिरंजीव मनोज जगताप यांचा पराभव केला. मदन पाटील यांचा चुलत भाऊ विशाल पाटील यानेच पराभव केला. याच दोन जागांच्या निकालाकडे संपूर्ण जिल्ह्याचे लक्ष लागले होते.
सांगली जिल्हा मध्यवर्ती बँकेच्या मतमोजणीला गुरुवारी सकाळी निवडणूक निर्णय अधिकारी भाऊसाहेब गलांडे यांच्या नेतृत्वाखाली सुरुवात झाली. पहिला निकाल जाहीर झाला आणि विशाल पाटील समर्थकांनी जल्लोष केला. विशाल पाटील यांना ३५ आणि मदन पाटील यांना ३१ मते मिळाली. दुसरा निकाल जत अ गटाचा झाला आणि काँग्रेसचे विक्रम सावंत यांनी भाजप आमदाराचे चिरंजीव मनोज जगताप यांचा पराभव केल्याचे जाहीर होताच जल्लोषात भर पडत गेली. दोन खात्रीच्या जागांवर पराभव झाल्याने जयंत पाटील आघाडीला काळजीने घेरले. सर्वपक्षीय आघाडी करण्याचे बारगळल्यानंतर समोर आलेल्या परिस्थितीमुळे या दोन निकालांकडेच संपूर्ण जिल्ह्याचे लक्ष वेधले होते. शिवाय वाळवा तालुक्यातीलच काँग्रेसचे सी. बी. पाटील यांनी क-४ गटातून जयंत पाटील आघाडीच्या विष्णू माने यांचा पराभव केला. त्या नंतरचा तिसरा निकाल गणपती सगरे (कवठेमहांकाळ) यांच्या रूपाने निकाल जयंत पाटील यांच्या गटाकडे गेला.
जतचे आमदार विलासराव जगताप यांनी कदम गटांवर टोकाचा आरोप केला. डॉ. पतंगराव कदम यांच्यामुळेच बँकेचे संचालक मंडळ बरखास्त झाले आहे. त्यामुळे त्यांना आघाडीत घेऊ नये. असे जगतापांनी जाहीर केल्याने सर्वपक्षीय आघाडीत बिघाडी होणार हे स्पष्ट झाले होते. कदम गटानेही जगतापांना आघाडीत स्थान नको, असा आग्रह धरला होता. काँग्रेसचे जिल्हाध्यक्ष मोहनराव कदम यांनी काँग्रेस समर्थकांना उमेदवारी अर्ज मागे घेण्यास सांगितले होते. परंतु, उमेदवारी माघारीला केवळ १५ मिनिटांचा अवधी उरला असताना जयंत पाटील यांनी काँग्रेसला न विचारता परस्पर आपल्या आघाडीची घोषणा केली. त्यांनी काँग्रेसचे तुल्यबळ नेते माजी मंत्री मदन पाटील यांना आपल्याकडे ओढून मोठी खळबळ उडवून दिली.
जयंत पाटील आघाडीने पंधरा जागा जिंकून बँकेची सत्ता काबीज केली. परंतु या विजयाबाबत आघाडीत उत्साह मात्र दिसत नव्हता. कारण ज्यांच्यासाठी आघाडीत बिघाड करुन रणनिती आखली. तेच मोहरे या निवडणुकीत पराभूत झाले.
राष्ट्रवादीचीच सरशी; काँग्रेसला दोन जागा
सातारा जिल्हा मध्यवर्ती सहकारी बँकेच्या पंचवार्षिक निवडणुकीत राष्ट्रवादी काँग्रेसनेच पुन्हा बाजी मारत २१ पैकी १९ जागा जिंकल्या. या विजयाने राष्ट्रवादीने बँकेवरील आपले वर्चस्व सिद्ध केले आहे. दोन जागांवर काँग्रेसचे उमेदवार विजयी झाले आहेत. सात जागा यापूर्वीच बिनविरोध झाल्या होत्या. त्या ठिकाणी राष्ट्रवादीनेच बाजी मारली होती. खासदार उदयनराजे भोसले, आमदार शिवेंद्रसिंहराजे भोसले, प्रभाकर घार्गे, राजेंद्र राजपुरे, माजी खासदार लक्ष्मणराव पाटील यांच्यासह दिग्गजांची बँकेवर बिनविरोध वर्णी लागली होती. परंतु, उर्वरित १४ जागांसाठी निवडणूक लागली होती. त्यामध्ये विरोधक प्रबळ नसल्याने पुन्हा राष्ट्रवादीच जिंकणार अशी जिल्हावासीयांची खात्री होती. विलासराव उंडाळकर यांनी ८७ मते मिळवून व आमदार जयकुमार गोरे यांनी ३८ मते मिळवत विजय संपादन करत काँग्रेसचेही आव्हान जिवंत ठेवले आहे. उर्वरित सर्व जागा राष्ट्रवादीने जिंकून सहकारातील आपला दबदबा कायम राखला आहे. अनुसूचित जाती-जमाती मतदारसंघांतून शेतकरी विकास पॅनेलच्या प्रकाश बडेकर यांनी विजय संपादन केला. नागरी बँका व पतपेढ्या मतदासंघात एकूण ४४३ मतांपैकी ४४० जणांनी मतदान केले. त्यापैकी चार मते बाद ठरली. उर्वरित वैध ४३६ मतांपैकी शेतकरी विकास पॅनेलच्या राजेश वाठारकर यांना २७९ तर विरोधातील अपक्ष प्रभाकर साबळे यांना १५७ मते मिळाली. यामध्ये वाठारकर यांनी अपेक्षेप्रमाणे विजय मिळवला. कृषी व प्रक्रिया मतदासंघात एकूण ३० मतांपैकी सर्वच्या सर्व मते शेतकरी विकासच्या दादाराजे खर्डेकर यांनी घेऊन विरोधी राष्ट्रवादीच्याच बंडखोर आमदार बाळासाहेब पाटील यांचा दारुण पराभव केला. महिला राखीव मतदारसंघात एकूण २२७० मतांपैकी २१५२ मतदान झाले. त्यापैकी शेतकरी विकासच्या दोन उमेदवार सुरेखा पाटील व कांचन साळुंखे यांच्यात मुख्य लढत झाली. या ठिकाणी सुरेखा पाटील यांनी १७३५ मते घेत विजय मिळवला. खंडाळा मतदारसंघात दत्तानाना ढमाळ यांच्या विजयाने पक्ष संघटनेची ताकद मोठी असते हे अधोरेखित झाले आहे. फलटण मतदारसंघात रामराजे नाईक-निंबाळकर विजयी झाले. प्रथामिक कृषी पतपुरवठा मतदारसंघात शशिकांत शिंदेंनी विजय मिळवला. कुरश पतपुरवठा संघात नितीन पाटील यांनी विजय मिळवला. इतर मागास मतदारसंघातून प्रदीप विधाते यांनी विजय मिळवला. भटक्या विमुक्त जाती-जमातींमधून अर्जुनराव खाडे यांनी विजय मिळवला.
सकाळी सव्वा अकरा वाजता हे निकाल जाहीर झाले. निकाल जाहीर झाल्यावर गुलालाची उधळण करत व फटाक्यां आतिषबाजी करत कार्यंकर्त्यानी जल्लोष केला.
मोबाइल अॅप डाउनलोड करा आणि राहा अपडेट
