कोल्हापूर जिल्हा मध्यवर्ती (केडीसीसी) बँकेसाठी भुदरगड तालुक्यात चुरशीने मतदान झाले. मात्र निकाल एकतर्फीच लागला. या निवडणुकीतून के. पी. पाटील यांच्या गटाअंतर्गत काही धुसफूस आहे का याचा अंदाज विरोधकांनी घेतला. तर कोणतीही निवडणूक आणि कोणताही विरोधक सहज घ्यायचा नाही, याचा धडा माजी आमदार के. पी. पाटील यांनी घेतल्याचे निकाला नंतर स्पष्ट झाले.
विधानसभा निवडणुकीत आमदार प्रकाश आबिटकर यांनी विजय मिळविल्यानंतर भुदरगड तालुक्यात के. पी. पाटील यांचे विरोधक आमदार आबिटकर यांच्या नेतृत्त्वाखाली एकत्र येत होते. त्यातच बिद्री साखर कारखान्याच्या १४ हजार सभासदांचा निकाल उच्च न्यायालयाने के. पी. पाटील यांच्या सतारूढ गटाच्या विरोधात दिला होता. त्यामुळे विरोधकांच्यात तालुक्यात के. पी. पाटील यांची राजकीय मांड पुन्हा बसू द्यायची नाही अशी व्यूहरचना होती. त्याचबरोबर के. पी. पाटील गटात अंतर्गत धुसपूस सुरू असल्याचे बोलले जात होते. याचा फायदा घेण्यासाठी जिल्हा बँकेच्या निवडणुकीत आपण ६० चा आकडा गाठणार नाही याची कल्पना असतानासुद्धा निवडणूक बिनविरोध होऊ दिली नाही.
के. पी. पाटील यांचे एकेकाळचे सहकारी माजी सभापती नंदकुमार ढेंगे यांनी निवडणूक लढविली. २०६ ठरावधारकांच्या पैकी केवळ ३४ मते विरोधी नंदकुमार ढेंगे यांना मिळाली. तर १७१ मते माजी आमदार के. पी. पाटील यांनी घेऊन विक्रमी विजय मिळविला.
आमदार प्रकाश आबिटकर, माजी आमदार दिनकरराव जाधव, मधुकर देसाई, बी. एस. देसाई हे मातब्बर एका बाजूला असतानाही ढेंगे यांना ५० चा आकडा गाठता आला नाही. माजी आमदार के. पी. पाटील यांनी निवडणूक कार्यक्रम लागल्यापासून गावागावात संपर्क वाढविला होता व ठराव आपल्याच कार्यकर्त्याला कसा मिळेल याची व्यूहरचना केली होती.
किमान १४० ठरावाची बांधणी त्यांनी निवडणुकीपूर्वीच करून ठेवली होती. त्यात माजी आमदार बजरंग देसाई यांनी आपले ठराव के. पी. पाटील यांना दिले. तर विरोधक केवळ निवडणूक लढवायची या इराद्यात होते. उमेदवार कोण असणार या बद्दलसुद्धा ठोस तयारी नव्हती. विरोधी उमेदवारी जाहीर होण्यापूर्वीच माजी आमदार के. पी. पाटील यांनी आपले ठरावधारक नजरकैदेत ठेवले होते. या विजयामुळे के. पी. पाटील यांच्या गटात उत्साहाचे वातावरण पसरले आहे. तर विरोधकांना विधानसभेनंतर गोकुळ आणि जिल्हा बँकेत चांगलीच चपराक बसली आहे. आता बिद्रीचे मैदान जवळच आहे. त्यात पुन्हा के. पी. पाटील, आमदार आबिटकर आमने - सामने येणार आहेत.
मोबाइल अॅप डाउनलोड करा आणि राहा अपडेट
