HIVचे वाढते प्रमाण चिंताजनक

April 28, 2015, 12:26 pm

≫ Next: करनूरमध्ये गव्याचा धुडगूस

≪ Previous: फुटबॉल राड्यात पोलिस कर्मचारी

$

0

0

दीपक शिंदे, कोल्हापूर

नवजात बालकांतील एचआयव्ही रोखण्यात डॉक्टरच सहकार्य करीत नसल्याचे वास्तव असून, अनेक नावाजलेल्या डॉक्टरांचाही त्यात समावेश आहे. स्त्रीतज्ज्ञ म्हणून प्रसिद्ध असलेल्या डॉक्टरांकडून एचआयव्ही पेशंटच्या तपासणीबाबतची माहिती ठेवण्याबाबत सहकार्य मिळत नाही. त्यामुळे पॉझिटिव्ह गर्भवतींवर उपचार करणे अशक्य होते. एचआयव्हीबाधीत नवजात मुलांच्या संख्येत या प्रकारामुळे वाढ होण्याची भीती आहे.

एचआयव्ही-एड्स तपासणीसाठी सरकारकडून संबंधित हॉस्पिटल्सना मोफत औषधे दिली जातात. कोल्हापुरात पावणेदोनशेवर अधिक प्रसुतीगृहे आहेत. या केंद्रांत प्रत्येक गर्भवतीची एचआयव्ही चाचणी केली जाते. पण, या तपासणीची माहिती एड्स नियंत्रण कक्षाला देणे अपेक्षित असते. मात्र, ती देण्यास डॉक्टरच उत्सुक नसतात. त्यामुळे काही मुलांना मातेपासूनच एचआयव्हीची लागण होते. ते टाळण्यासाठी डॉक्टरांची भूमिका महत्त्वाची ठरते.

शहरातील डॉक्टरांकडून योग्य माहिती मिळत नसल्यामुळे जिल्ह्यात एचआयव्हीची लागण झालेल्या मुलांची संख्या जवळपास दोन हजारांपर्यंत पोहचली आहे. मानसिकदृष्ट्या खचलेल्या या मुलांचे मनोबल वाढविण्याचा कार्यक्रम जिल्हा एड्स प्रतिबंधक संस्थेकडून केला जात आहे. काही संस्थांच्या माध्यमातून कार्यशाळांचे आयोजन करून अशा मुलांचे मनोबल वाढविले जाते. डॉक्टरांचे सहकार्य मिळाले तर ही संख्या कमी करण्यास मदत होईल. एड्स नियंत्रण संस्था आणि प्रयास या संस्थेच्या वतीने पालकांपासून मुलांना होणारे एचआयव्ही संक्रमण रोखण्यासाठीचा कार्यक्रम एप्रिल २०१३पासून राबविण्यात येत आहे. जिल्ह्यातील सर्व प्रसूती रुग्णालयांना जिल्हा एड्स नियंत्रण कक्षाच्या माध्यमातून एचआयव्ही तपासणीसाठी मोफत औषधे दिली जातात. डॉक्टर या औषधांचे पैसेही रुग्णाकडून आकारतात, पण रेकॉर्ड ठेवण्यास नकार देतात. त्याचवेळी शहरातील १७ आणि जिल्ह्यातील ५६ हॉस्पिटल्स रेकॉर्ड ठेवत असल्यामुळे आत्तापर्यंत ७ ते ८ महिलांना झालेली एचआयव्हीची लागण समोर आली आहे. त्यासाठी वीस हजार महिलांची तपासणी करण्यात आली. आत्तापर्यंत डॉक्टरांनी केवळ सहकार्य न केल्यामुळेच एचआयव्ही लागण झालेल्या मुलांचे प्रमाण वाढू लागले आहे, ही बाब खूपच गंभीर आहे.

खासगी रुग्णालयात येणाऱ्या रुग्णांना दर्जेदार सुविधांची आवश्यकता असते. त्यांची माहिती आम्ही दुसऱ्या संस्थेला द्यायला सुरुवात केली तर त्यांचा विश्वास उडेल. - डॉ. मिलिंद पिशवीकर, अध्यक्ष, प्रसूती आणि स्त्रीरोग संघटना

आम्हाला केवळ प्राथमिक माहिती हवी असते. त्यामुळे नवीन जन्माला येणाऱ्या बालकांना एचआयव्हीमुक्त करण्याची काळजी घेतली जाऊ शकते. - दीपा शिपूरकर, कार्यक्रम अधिकारी, जिल्हा एड्स नियंत्रण विभाग

मोबाइल अॅप डाउनलोड करा आणि राहा अपडेट

---

करनूरमध्ये गव्याचा धुडगूस

April 28, 2015, 12:05 pm

≫ Next: मधमाशांचा वऱ्हाडावर हल्ला

≪ Previous: HIVचे वाढते प्रमाण चिंताजनक

$

0

0

म. टा. वृत्तसेवा, कागल

करनूर (ता. कागल) येथील एका केळीच्या बागेत मंगळवारी सकाळी ग्रामस्थांना गव्याचे दर्शन झाले. त्याला पाहण्यासाठी ग्रामस्थांनी मोठी गर्दी केली होती. गव्याने केळीचे व ऊस शेतीचे मोठे नुकसान केले आहे. यावेळी पळून जात असताना गव्याच्या धक्क्याने तिघेजण जखमी झाले. त्यामुळे या परिसरात घबराटीचे वातावरण निर्माण झाले आहे.

मंगळवारी सकाळी सातच्या सुमारास शेळीसाठी वैरण आणण्यासाठी जाणाऱ्या बबन धनगर याला विजय माने यांच्या केळीच्या बागेत गव्याचे दर्शन झाले. त्याचवेळी शेजारच्या माळावर क्रिकेट खेळणाऱ्या मुलांनीही हा गवा पाहिला. तेथून ही घटना गावभर पसरली. त्यामुळे मोठ्या संख्येने तरुण जमले. त्यांनी केळीच्या बागेला चहूबाजूंनी वेढा घालत गव्याला हुसकावून लावण्याचा प्रयत्न केला. काहींनी दगडफेक केली. तरुणांच्या हुल्लडबाजीने तो सैरभैर झाला होता. मात्र पळून जाण्यासाठी त्याला मार्ग मिळत नव्हता. त्यामुळे तो बागेतच इकडे तिकडे फिरत राहिला. पळून जाताना गव्याच्या धक्क्याने सुनील घाटगे, बळीराम इंगळे व मनोज इंगळे हे किरकोळ जखमी झाले. गव्याने विजय माने यांच्या केळीच्या बागेचे व आण्णासो डुग्गे व अतुल कलानी यांच्या ऊस शेतीचे नुकसान केले. कागल पोलिस ठाण्याचे उपनिरीक्षक दिपक वाकचौरे व के. डी. शिंदे यांनी जमावाला शांत करण्याचा प्रयत्न केला.

परिमंडल वनाधिकारी एन. एस. डवर व वनसंरक्षक आर. एस. रसाळ हे आपले सहकारी सुरेश चरापले, रवी पोवार, संजय माने, शंकर पसारे, बाबासो जगदाळे, गजानन मगदूम यांच्यासह हजर झाले. त्यांनी ग्रामस्थांनी गव्याला घाबरवू नये असे आवाहन केले. हा गवा लगतच्या कर्नाटक भागातील ऊसशेतात पसार झाला. दरम्यान, तीन चार दिवसांपूर्वी येथून जवळच असणाऱ्या कर्नाटकातील आडी बेनाडी परिसरात गव्यांचा कळप दिसून आल्याचे समजते.

मोबाइल अॅप डाउनलोड करा आणि राहा अपडेट

मधमाशांचा वऱ्हाडावर हल्ला

April 28, 2015, 12:06 pm

≫ Next: गौण खनिजाची बेसुमार लूट

≪ Previous: करनूरमध्ये गव्याचा धुडगूस

$

0

0

म. टा. वृत्तसेवा , चंदगड

दुपारी बाराची वेळ. वऱ्हाडी मंडळी लग्नासाठी नटून-थटून आलेली. लग्न मंडपात येऊन एकमेकांच्या भेटी व गप्पाटप्पा सुरु होत्या. साडेबाराची लग्नाची वेळ जवळ आलेली. सर्वजण लग्नामंडपात हजर राहून नवरा व नवरीकडे बघत होते. याचवेळी डोक्यावर काहीतरी घोंघावत असल्याचे जाणवले. बघतात तर शेजारील झाडावर बसलेल्या तीन मधाच्या पोळ्यातील मधमाशांनी वऱ्हाडी मंडळीवर हल्ला चढवलेला. मधमाशा बघेल त्या दंश करत सुटलेल्या, त्यामुळे लोक मिळेल त्या वाटेने सैरावैरा पळत सुटलेले. ही घटना आहे चंदगड येथील एका लग्नसमारंभातील.

चंदगडमधील बेंजामिन धुपदाळे यांचा मुलगा भास्कर आणि उचगाव (कोल्हापूर) येथील मुलीच्या विवाह समारंभासाठी दोन्हीकडील वऱ्हाडी मंडळी चंदगड येथे आली होती. चंदगड येथील महाविद्यालयाच्या क्रिडांगणावर लग्न समारंभाची जय्यत तयारी सुरु होती. याचवेळी लग्नमंडपासून बाजूला व महाविद्यालयाच्या प्रवेशद्वारावर एकमेकांना लागून असलेल्या झाडांवर तीन मधमाशांची पोळी बसली होती. लग्नाची वेळ जवळ आली असताना काहीतरी घोंघावण्याचा आवाज येवू लागला. अचानकपणे मधमाशांनी वऱ्हाडी मंडळींवर हल्लाबोल केला.

बघता-बघता सर्व लोक आपला बचाव करण्यासाठी मिळेल त्याने तोंड झाकून घेत लग्नमंडपातून पळ काढू लागले. काहीजण मिळेल त्या रस्त्याने चोहोबाजूंनी पळत सुटले. कोणी पदर डोक्यावर घेवून तोंड झाकून घेतले तर काहींनी फेटा काढून तोंडाला गुंडाळला. प्रत्येकजण मधमाशांच्या हल्यापासून वाचण्यासाठी प्रयत्न करत होता. नवरा-नवरीलाही तातडीने सुरक्षित स्थळी हलविण्यात आले. प्रत्येकजण मिळेल त्याचा आसरा घेत होते. लग्न महाविद्यालयाच्या क्रीडांगणावर असल्याने लोक सैरावैरा धावत होते. क्षणभर कोणाला काहीच समजेना. मात्र काही वेळाने मधमाशांनी हल्ला केल्याचे सर्वांच्या लक्षात आले. या घटनेमुळे लग्नाची वेळ टळून गेल्यानंतरही लोक विवाहस्थळी आले नाहीत. सुमारे दोन तासानंतर लोक हळू-हळू लग्नमंडपात जमा झाल्यानंतर लग्न उरकरण्यात आले.

मधमाशांच्या या हल्यात खुद्द मुलाचे वडील बेंजामिन धुपदाळे यांना उपाचारासाठी दवाखान्यात न्यावे लागले. त्यांच्यासह चंदगड, गोवा, कोल्हापूर येथील शंभरहून अधिक वऱ्हाडी मंडळीही जखमी झाली आहेत. जखमी झालेल्या मंडळींना मधमाशांनी चावा घेतलेल्या शरारीच्या भागांना सूज आल्याने अनेकांनी घराबाहेर व लग्नाच्या कार्यक्रमात येण्याचे टाळले.

लग्नानंतरही हल्ला

लग्नानंतरही मधमाशांनी पुन्हा हल्ला चढविल्याने अनेकांची त्रेधातिरपीट उडाली. काहींनी भोजनाचा आस्वाद घेतला तर काहींनी पाण्यावर समाधान मानले. दुपारी साडेतीनंतर काही वऱ्हांडी मंडळींनी भोजन केले. उन्हाचा कडाका कमी होत असताना मधमाशाही माघारी परतल्या.

मोबाइल अॅप डाउनलोड करा आणि राहा अपडेट

गौण खनिजाची बेसुमार लूट

April 29, 2015, 1:13 pm

≫ Next: ऊसतोड मुकादमाकडून फसवणूक

≪ Previous: मधमाशांचा वऱ्हाडावर हल्ला

$

0

0

म. टा. वृत्तसेवा, जयसिंगपूर

शिरोळ तालु्क्यात गौण खनिजाची बेसुमार लूट सुरू असून महसूल विभागाने मात्र याबाबत गांधारीची भूमिका घेतली आहे. अब्दुललाट येथे विनापरवाना मुरूम उत्खनन करण्यात येत आहे. त्याचबरोबरच चिंचवाड येथे बेकायदेशीर वाळू उपसा सुरू असताना महसूल विभाग गप्प का? आणखी किती दिवस ही लूट सुरू राहणार? गावपातळीवर तलाठी, कोतवालांचे या उत्खननाकडे जाणिवपूर्वक दुर्लक्ष का होत आहे, असा प्रश्न उपस्थित होत आहे.

अब्दुललाट येथे विनापरवाना मुरूम उत्खनन सुरू आहे. मंगळवारी मुरूम वाहतूक करणारा ट्रॅ्क्टर उलटला. या अपघातात चालक सचिन सुरेश वराळे (वय २९, रा.अब्दुललाट) हा जागीच ठार झाला. वडगिरे मळ्याजवळ झालेल्या या अपघातामुळे पुन्हा एकदा बेकायदेशीर मुरूम उत्खननाचा विषय ऐरणीवर आला आहे. राजरोसपणे मुरूम उत्खनन करून येथे वाहतूक सुरू आहे. याबाबत तक्रार करूनही शिरोळ महसूल विभागाकडून कारवाई होत नाही. यामुळे ग्रामस्थांतून संताप व्यक्त होत आहे. मंगळवारी सकाळी आठ वाजण्याच सुमारास मुरूम वाहतूक करीत असताना ट्रॅक्टर उलटला. यावेळी ट्रॅक्टर आणि ट्रेलरच्यामध्ये चिरडल्याने सचिन वराळे हा ठार झाला. सचिनच्या मृत्यूनंतर तरी आता महसूल विभागाला जाग येणार का, असा प्रश्न ग्रामस्थांतून उपस्थित होत आहे.

शिरोळ तालु्क्यातील चिंचवाड येथेही बेकायदेशीर वाळू उपसा सुरू आहे. कोणताही परवाना न घेता तीन यांत्रिक बोटींच्या सहाय्याने कृष्णा नदीच्या पात्रातून वाळू उपसा करण्यात येत आहे. वाळूची बेसुमार लूट सुरू असताना महसूल विभागाकडून मात्र याकडे दुर्लक्ष होत आहे. अर्जुनवाड येथेही यांत्रिक बोटीव्दारे वाळू उपसा सुरू असल्याने ग्रामस्थांनी तक्रारी केल्या. मात्र यानंतरही महसूल विभागाने कोणतीही कारवाई केली नाही. सरकारी मालमत्तेची लूट सुरू असताना महसूल विभागाची केवळ बघ्याची भूमिका चर्चेची ठरत आहे. गावपातळीवर तलाठी आणि कोतवाल हे महसूल विभागाचे प्रतिनिधी असतात. अब्दुललाट येथे मुरूम उत्खनन तसेच चिंचवाड व अर्जुनवाड हद्दीत सुरू असणारा वाळू उपसा तलाठी आणि कोतवालांना कसा दिसत नाही. ग्रामस्थांनी तक्रारी केल्यानंतरही कारवाई का होत नाही असाही प्रश्न निर्माण होत आहे.

वाळू तस्कारांच्या मुस्क्या आवळा

गेल्यावर्षी शिरोळचे तहसीलदार सचिन गिरी यांनी बेकायदेशीर वाळू उपशाविरूध्द मोहीम उघडली होती. विनापरवाना वाळू आवट्यांवर छापे टाकून यांत्रिक बोटीही जप्त केल्या होत्या. जेसीबीने आवट्या उद्ध्वस्त करण्यात आल्यामुळे वाळू तस्करांचे धाबे दणाणले होते. आता कारवाईच होत नसल्याने गौण खनिजाची बेसुमार लूट सुरू असून मुरूम आणि वाळू तस्कारांच्या मुस्क्या आवळाव्यात अशी मागणी लोकांतून होत आहे.

मोबाइल अॅप डाउनलोड करा आणि राहा अपडेट

ऊसतोड मुकादमाकडून फसवणूक

April 29, 2015, 1:15 pm

≫ Next: भ्रष्ट संचालकांना निवडणूकबंदी करा

≪ Previous: गौण खनिजाची बेसुमार लूट

$

0

0

म. टा. वृतसेवा, गारगोटी

निपाणी - टाकळी (ता. माजलगाव, जी. बीड) येथील ऊसतोड मुकादम सीताराम लक्ष्मण माने याने राजन शामराव पाटील (रा. हेदवडे) या ट्रक व्यावसायिकाची तीन लाख पन्नास हजाराची फसवणूक केल्याची तक्रार पाटील यांनी भुदरगड पोलिसात दिली आहे. फसवणूक करणाऱ्या मुकादमाला गारगोटी पोलिसांनी त्याच्या राहत्या गावातून अटक केली.

पोलिसांतून मिळालेली माहिती अशी, बीड जिल्ह्यातील निपाणी - टाकळी येथील सीताराम माने हे ऊसतोडणीसाठी मजूर पुरविण्याचे काम करतात. त्यांनी हेदवडे येथील राजन पाटील यांच्या ट्रकवर ऊसतोडणीसाठी मजूर पाठवितो असे सांगून पाटील यांच्याकडून तीन लाख पन्नास हजार रुपये अॅडव्हान्स म्हणून घेतले होते. पण, भोसले यांनी मागील हंगामात कामगार पुरविले नाहीत व त्यानंतर दिलेले पैसे पाटील यांनी परत मागितले असता आजउद्या करून एक वर्ष उडवाउडवीची उतरे दिली. पाटील यांना आपली पुरती फसवणूक झाल्याचे लक्षात आल्यानंतर त्यांनी भुदरगड पोलिसांत तक्रार दाखल केली. पोलिस निरीक्षक बन्सी बारवकर यांच्या नेतृत्वाखाली पथकातील बी. एस. कुंभार, संजय मेटील यांनी निपाणी - टाकळी येथून सीताराम भोसले याला अटक केली. त्याला बुधवारी गारगोटी न्यायालयात हजर केले असता तीन दिवसांची पोलिस कोठडी सुनावण्यात आली.

मोबाइल अॅप डाउनलोड करा आणि राहा अपडेट

भ्रष्ट संचालकांना निवडणूकबंदी करा

April 29, 2015, 1:16 pm

≫ Next: अतिक्रमण उतरवले

≪ Previous: ऊसतोड मुकादमाकडून फसवणूक

$

0

0

म. टा. प्रतिनिधी, कोल्हापूर

कोल्हापूर कृषी उत्पन्न बाजार समितीच्या आर्थिक नुकसनीमध्ये दोषी ठरलेल्या आजी-माजी संचालकांना निवडणूक लढवण्यास अपात्र ठरवावे आणि समितीमधील अतिक्रमण करणाऱ्या घटकांना पाठिशी घालणाऱ्या बांधकाम विभागातील अधिकाऱ्यांना निलंबित करावे, अशी मागणी शिवसेना शिष्टमंडळाच्यावतीने समितीचे प्रशासक रंजन लाखे यांच्याकडे निवेदनाद्वारे केली. टेंबलाईवाडी येथील समितीच्या आवारातील लाखो रुपये किंमतीच्या मुरुमाची परस्पर विक्री केली आहे, त्याचीही चौकशी करण्याची मागणी केली.

निवेदनात म्हटले आहे, शेतकऱ्यांच्या हितासाठी स्थापन झालेल्या बाजार समितीमध्ये संचालकांच्या अनागोंदी कारभारामुळे शेतकऱ्यांचे हित बाजूला पडले आहे. शेतकऱ्यांना पायाभूत सुविधा देण्याऐवजी अतिक्रण करुन स्थापन केलेल्या इतर व्यावसायिकांना सुविधा पुरवल्या जात आहेत. अतिक्रमणाकडे बांधकाम विभागातील अधिकारी संजय कुलकर्णी व जयवंत पाटील जाणीवपूर्वक दुर्लक्ष करत आहेत. यामुळे समितीमध्ये अनेक ठिकाणी अतिक्रमण करुन व्यवसाय सुरू केले आहेत. या दोन्ही अधिकाऱ्यांची खातेनिहाय चौकशी करुन निलंबित करावे. काँग्रेस, राष्ट्रवादीच्या संचालकांनी समितीमध्ये भ्रष्टाचार करुन समितीचे कोट्यवधी रुपयांचे आर्थिक नुकसान केले आहे. आर्थिक नुकसानीस जबाबदार असलेल्या संचालकांची स्वतंत्र अधिकाऱ्यांमार्फत चौकशी झाली आहे. चौकशीमध्ये दोषी आढळलेल्या संचालकांची लवादामार्फत आर्थिक जबाबदारी निश्चित करण्याचे कामही सुरू आहे. अशा सर्व संचालकांना आगामी निवडणुकीसाठी अपात्र ठरवावे. शिष्टमंडळाचे नेतृत्व जिल्हाप्रमुख संजय पवार यांनी केले. यावेळी विजय देवणे, जिल्हा परिषद सदस्य बाजीराव पाटील, पंचायत समिती सदस्य तानाजी आंग्रे, दिलीप पाटील-कावणेकर आदी उपस्थित होते. प्रशासनाच्यावतीने उपसचिव मोहन सालपे, विजय नायकल, जयवंत पाटील, संजय कुलकर्णी उपस्थित होते.

बांधकाम विभागातील अधिकाऱ्यांची चौकशी करण्याची मागणी जिल्हा निबंधकांकडे यापूर्वीच केली आहे. त्यांचा अहवाल प्राप्त होताच चौकशी सुरू होईल. आंदोलकांनी केलेल्या मागणीचा अहवाल प्रधान सचिवांकडे पाठवला जाईल.

- रंजन लाखे, प्रशासक, बाजार समिती

मोबाइल अॅप डाउनलोड करा आणि राहा अपडेट

अतिक्रमण उतरवले

April 29, 2015, 1:17 pm

≫ Next: खराब तोट्यांमुळे पाणी वाया

≪ Previous: भ्रष्ट संचालकांना निवडणूकबंदी करा

$

0

0

म. टा. प्रतिनिधी, कोल्हापूर

भवानी मंडप परिसरातील अंलकार हॉटेलच्या पहिल्या मजल्यावर करण्यात आलेल्या बेकायदेशीर बांधकामावर महापालिका प्रशासनाने कारवाई केली. हॉटेल व्यवस्थापनाला बांधकाम काढून घेण्यासंदर्भात दोनदा नोटीसा पाठविल्या होत्या. मात्र हॉटेलकडून त्याला कसलाही प्रतिसाद न मिळाल्याने महापालिका प्रशासनाने, बुधवारी हॉटेलच्या पहिल्या म​जल्यावरील बांधकाम उतरवले. या मोहिमेत ३५ हून अधिक कर्मचारी सहभागी झाले होते. कारवाईदरम्यान पोलिस बंदोबस्त मागविला होता.

उमेश पै यांच्या मालकीच्या अंलकार हॉटेलच्या पहिल्या मजल्यावर पत्र्याचे शेड उभारण्यात येत होते. महापालिकेकडून या संदर्भात कसलीही परवानगी घेण्यात आली नव्हती. महापालिकेने मार्च आणि एप्रिल महिन्यात दोनदा नोटीसा पाठविल्या होत्या. त्यालाही संबंधिताकडून उत्तर मिळाले नाही. बेकायदेशीर बांधकाम विरोधात कारवाईचे हत्यार उगारल्याचे शिवाजी मार्केट विभागीय कार्यालयातील प्रभारी उप शहर अभियंता एस. के. पाटील, कनिष्ठ अभियंता हेमंत जाधव यांनी सांगितले.

हॉटेलच्या पहिल्या मजल्यावरील ६.६० मीटर ते ६.८५ मीटर या मापाचे पत्र्याच्या शेडचे बांधकाम उतरविण्यात आले. तसेच स्लायडिंगच्या खिडक्या काढण्यात आल्या. बुधवारी दिवसभर कारवाई सुरू होती. या मोहिमेत पवडी विभाग, अतिक्रमण विभाग व विद्युत विभागातील कर्मचाऱ्यांनी सहभाग घेतला.

मोबाइल अॅप डाउनलोड करा आणि राहा अपडेट

खराब तोट्यांमुळे पाणी वाया

April 29, 2015, 1:18 pm

≫ Next: फरशीवर उष्णतारोधक लेपाची चाचणी

≪ Previous: अतिक्रमण उतरवले

$

0

0

म. टा. प्रतिनिधी, कोल्हापूर

कोल्हापूरमध्ये पाण्याची टंचाई नसल्याने लोकांना पाण्याचे महत्व कळत नाही. त्यामुळे अजूनही पाण्याचा मोठ्या प्रमाणावर अपव्यय होत असतो. रस्त्यावर फुटलेल्या जलवाहिन्यांचा प्रकार असू देत किंवा तोट्या नसलेली नळ कनेक्शन्स. कितीही पाणी वापरा, नको असलेले रस्त्यावर सोडून द्या असाच प्रकार सुरू असतो. त्यामुळे सकाळच्या वेळेस बाहेर पडला तर अनेक ठिकाणी रस्त्यांवर पाणी आलेले दिसते. हे पाणी वाया जाऊ नये यासाठी त्याचा योग्य वापर हा एकच मार्ग आहे. शहरातील काही नागरिक पाण्याचा जपून आपण करतात. त्यांच्या या प्रयत्नात आपणही सहभागी झाले पाहिजे. तरच पाणी बचाव मोहिमेला यश येणार आहे.

पावसाळ्यास अजून अवधी असल्याने आतापासूनच पाण्याची टंचाई भासू लागली आहे. पावसाच्या पाण्यावर अवलंबून न राहता एरवीही असलेल्या पाण्याचा काटकसरीने वापर व्हावयास हवा. आर. के. नगर परिसरात श्रीधर वष्ट यांनी पाणी बचाव मोहिमेसाठी प्रयत्न केला आहे. वष्ट म्हणाले, 'आर. के. नगरात मुळातच पाणी एक-दोन दिवसाआड येत असल्याने पाणी जपूनच वापरावे लागते. आदल्या दिवशीचे पाणी फेकून न देता ते झाडांना घातले जाते. घरातील इतर खर्चाचे पाणी म्हणजेच आंघोळीचे, धुणी-भांडी, बेसिनमधील पाणी वा इतर पाणी एका चेंबरमध्ये साठवून ते आम्ही उपसून झाडांना घालतो. त्यामुळे त्याचा पुनर्वापर होतो. घरातील किरकोळ वाटणाऱ्या बाबी म्हणजे दाढी करताना, टूथब्रशने दात घासताना, हात धुताना बेसिनचा नळ ज्या त्या वेळेसच वापरला जातो. तसेच गळणारे नळ वेळीच बदलले जातात. त्यामधून थेंब थेंब पाण्याची बचत होते. दुचाकी, चारचाकी वाहने धुताना पाइपचा वापर न करता बादलीमधून पाणी घेऊन गाड्यांची स्वच्छता केली जाते. स्वतःबरोबरच इतरांनाही पिण्यासाठी पाणी देताना सुरुवातीला अर्धा पेला पाणी देतो व गरज लागल्यासच पुन्हा पाणी देतो. त्यामुळे पाणी वाया जात नाही. उन्हाळ्याच्या दिवसात आंघोळीसाठी जास्त गरम पाणी न घेता थोडेसे कोमट पाणी घेतल्यामुळे पुन्हा गार पाणी घालावयास लागत नाही व पाण्याची एकप्रकारे बचतच होते. अशा बारीकसारीक गोष्टी लक्षात ठेवून प्रत्येकाने आचरणात आणल्यास घराघरातून पाण्याची बचत होण्यास मदत होईल.

इच्छाशक्तीची गरज

पाणी वाचविण्यासाठी प्रत्येकाचा प्रयत्न मोलाचा ठरतो. याबाबतचा लहानात लहान प्रयत्नदेखील महत्त्वपूर्ण ठरू शकतो. पाणी वाचविण्याची खरी सुरूवात ही स्वतःपासूनच होण्याची गरज असते. यासाठी आवश्यकता असते ती केवळ इच्छाशक्तीची. ही इच्छाशक्ती प्रत्येकाने बाळगल्यास मोठ्याप्रमाणावर पाणी बचत होऊ शकेल.

मोबाइल अॅप डाउनलोड करा आणि राहा अपडेट

---

फरशीवर उष्णतारोधक लेपाची चाचणी

April 29, 2015, 1:21 pm

≫ Next: ‘भुताटकी’ने घेतला हकनाक बळी

≪ Previous: खराब तोट्यांमुळे पाणी वाया

$

0

0

म. टा. प्रतिनिधी, कोल्हापूर

करवीर निवासिनी अंबाबाई मंदिर परिसरातील फरशीचे चटके भाविकांना बसू नयेत यासाठी पश्चिम महाराष्ट्र देवस्थान व्यवस्थापन समितीने फरशीवर उष्णतारोधक लेप लावण्याचा निर्णय घेतला आहे. बुधवारी उष्णतारोधक लेपाची चाचणी घेतली.

चाचणीच्या निष्कर्षानंतर मंदिर परिसरातील सर्व फरशीवर लेप लावण्यात येणार आहे. मंदिराच्या आवारात दहा वर्षांपूर्वी उष्णतारोधक कांचीपुरम फरशी बसवण्यात आली आहे. ही फरशी उष्णतारोधक असल्याचा दावा करण्यात आला होता, परंतु उन्हाळ्यात फरशीचे चटके भाविकांना बसत आहेत. देवस्थान समितीने आवारात कापडी मंडप उभारला आहे. तसेच मॅट अंथरण्यात आले आहे. सध्या मॅटिंग अपुरे पडू लागले आहे. इंजिनीअर सुरेश देशपांडे यांच्या मार्गदर्शनाखाली चाचणी घेण्यात आली.

मोबाइल अॅप डाउनलोड करा आणि राहा अपडेट

‘भुताटकी’ने घेतला हकनाक बळी

April 29, 2015, 1:22 pm

≫ Next: पुन्हा पारंपरिक लढत

≪ Previous: फरशीवर उष्णतारोधक लेपाची चाचणी

$

0

0

म. टा. प्रतिनिधी, कोल्हापूर

आजारी असलेल्या महिलेला अंधश्रद्धेपोटी प्रार्थनास्थळात उपचारासाठी नेण्यात आले. तेथे या महिलेला उपचारासाठी तातडीने दवाखान्यात नेण्याचा सल्ला दिला. परंतु नातेवाइकांकडून चर्चेतच वेळ गेल्याने त्या महिलेचा मृत्यू झाला. अनुसया कांत भालेराव (वय ४५, रा. राजेंद्रनगर) असे या महिलेचे नाव आहे. ही घटना बुधवारी सकाळी साडेआठच्या सुमारास घडली.

याबाबत माहिती अशी ः अनुसया भालेराव गवंडी मजूर होत्या. प्रकृती बिघडल्याने गेल्या आठवड्यात त्यांना सीपीआरमध्ये दाखल केले. डॉक्टरांनी त्यांच्यावर उपचार करून २५ एप्रिलला डिस्चार्च दिला. दरम्यान, घरी आल्यावर त्या विचित्र हावभाव करू लागल्याने भुताटकीने पछाडल्याची नातेवाइकांची समजूत झाली होती. मंगळवारी रात्री त्यांची प्रकृती बिघडली. त्यामुळे त्यांना एका प्रार्थनास्थळात नेण्याचा सल्ला शेजारी व नातेवाइकांनी दिल्यावर सकाळी त्यांना तेथे नेण्यात आले. तेथे अंगारा लावून त्यांना उपचारासाठी चांगल्या हॉस्पिटलमध्ये नेण्याचा सल्ला दिला, पण गरीब परिस्थितीमुळे कोणत्या हॉस्पिटलमध्ये न्यायचे याबाबत नातेवाइकांत एकमत होत नव्हते.

दरम्यान, या परिसरातील गीता जाधव-कसबेकर यांना ही माहिती समजल्यावर त्यांनी अनुसया यांच्या नातेवाइकांशी चर्चा करून सीपीआरमध्ये उपचारास दाखल करण्याचा सल्ला दिला; पण ते त्यासाठी तयार नव्हते. त्यामुळे जाधव यांनी अंधश्रद्धा निर्मूलन समितीच्या कार्यकर्त्या सीमा पाटील यांच्याशी संपर्क साधून घटनेची माहिती दिली. पाटील यांनी डॉ. डी. वाय. पाटील हॉस्पिटलच्या डॉ. वैशाली गायकवाड यांच्याशी संपर्क साधल्यावर अनुसया यांना उपचारास दाखल करण्याची तयारी दर्शवली. त्यानंतर अनुसया यांना डी. वाय. पाटील हॉस्पिटलमध्ये दाखल केले, पण बेडवरच त्यांना शेवटची उचकी आली व त्यांचा मृत्यू झाला. त्यानंतर मृतदेह सीपीआरमध्ये आणला. सीपीआर पोलिस चौकीत त्यांच्या मृत्यूची नोंद करण्यात आली. त्यानंतर डॉक्टरांनी पोस्टमार्टेम करू, असे सांगितल्यावर नातेवाईकांनी पोस्टमार्टेमसाठी नकार दिला. त्यामुळे अनुसया यांच्या नातेवाइकांनी 'अंनिस'च्या सीमा पाटील, अरुण पाटील, रमेश वडणगेकर यांच्याशी वाद झाला. अजूनही लोक पेशंटला उपचारासाठी डॉक्टरऐवजी अन्यत्र घेऊन जातात यासाठी अंनिसचे सदस्य प्रबोधन करणार असल्याचे सीमा पाटील यांनी सांगितले.

मोबाइल अॅप डाउनलोड करा आणि राहा अपडेट

पुन्हा पारंपरिक लढत

April 29, 2015, 1:23 pm

≫ Next: विद्यापीठासह कॉलेज कॅम्पसमध्येही हिरवाई

≪ Previous: ‘भुताटकी’ने घेतला हकनाक बळी

$

0

0

म. टा. वृत्तसेवा, कागल

जिल्हा बँकेसाठी कागल तालुक्यात पुन्हा एकदा आमदार हसन मुश्रीफ विरुद्ध संजय घाटगे अशी पारंपारिक लढतच पहायला मिळणार आहे.परंतु यावेळेला 'मार्केटिंग' मधून निवडणूकीत असलेले प्रा. संजय मंडलिक हे आमदार मुश्रीफ यांच्या बाजूला आहेत. तालुक्यातील सर्वच गट एका बाजूला आणि संजय घाटगे गट एका बाजूला अशी स्थिती आहे. तरी राजे समरजितसिंह घाटगे गटाने आपली भूमिका अद्याप स्पष्ट केलेली नाही. पारंपरिक प्रतिस्पर्धी एकत्र आल्याने कार्यकर्त्यांमध्ये मात्र संभ्रम निर्माण झाला आहे. कागलमध्ये साहजिकच विकास सेवा संस्थेच्या ठराव आणि मतदारांना मोठे महत्त्व प्राप्त झाले आहे.'गोकुळ' ला एकत्र असणारे मंडलिक व घाटगे जिल्हा बँकेच्या निमीत्ताने एकमेकाच्या विरोधात ठाकले आहेत.

विकास सेवा संस्था गटातून स्वत: हसन मुश्रीफ निवडणूकीच्या रिंगणात आहेत. तर त्यांच्या विरोधात संजय घाटगे गटाचे कट्टर कार्यकर्ते पंचायत समितीचे माजी सभापती दत्तोपंत वालावलकर लढत देत आहेत. बँकेच्या हितासाठी सर्वसमावेशक पॅनेल अशी घोषणा करीत मुश्रीफ कामाला लागले आहेत. तर विरोधी गोटात कमालीची शांतता आहे. तालुक्यात सेवा संस्थांचे १५९ ठराव आहेत. यामध्ये आमदार हसन मुश्रीफ यांचे सर्वाधिक ७७ ठराव आहेत. प्रा.संजय मंडलिक ४, संजय घाटगे २५ तर राजे गटाचे १७ ठराव आहेत. मार्केटिंगच्या संस्था संजय मंडलिक व मुश्रीफ यांच्या मिळून १०५ च्या दरम्यान आहेत. जिल्ह्यात ५५० संस्थापैकी ७० ते ८० टक्के संस्था ह्या राष्ट्रवादीच्याच असल्याचा दावा असल्याने साहजिकच त्याचा मोठा फायदा संजय मंडलिकांना होवू शकतो. तर संजय घाटगे व राजे गटाच्या प्रत्येकी तीनच मार्केटिंगच्या संस्था आहेत.

मोबाइल अॅप डाउनलोड करा आणि राहा अपडेट

विद्यापीठासह कॉलेज कॅम्पसमध्येही हिरवाई

April 29, 2015, 1:26 pm

≫ Next: ट्रॅफिक पोलिसांची शिट्टीला सुट्टी

≪ Previous: पुन्हा पारंपरिक लढत

$

0

0

सचिन यादव, कोल्हापूर

'एक रस्ता, एक झाड' या यशस्वी उपक्रमानंतर शिवाजी विद्यापीठाने आता 'एक विद्यार्थी, एक झाड' हा उपक्रम हाती घेतला असून, त्या अंतर्गत विद्यापीठ कॅम्पसबरोबरच कोल्हापूर, सांगली, सातारा जिल्ह्यातील कॉलेजेसचा कॅम्पस हिरवाईने नटलेला दिसणार आहे.

शिवाजी विद्यापीठाचा लूक बदलण्यासाठी कॅम्पस ब्युटिफिकेशन समितीचा आराखडा अंतिम टप्प्यात आहे. त्यानुसार कोणतेही रोप कोणत्याही ठिकाणी न लावता विद्यापीठ परिसरात लावण्यात येणाऱ्या रोपांचीही रचना करण्यात आली आहे. विद्यापीठातील प्रत्येक ठिकाणची भौगोलिक रचना, जमिनीचा प्रकार, उपलब्ध पाण्याची सुविधा, विद्यार्थी हॉस्टेल, मुख्य रस्ता आणि विविध अधिविभागांत विशिष्ट प्रकारची रोपे लावण्यात येणार आहेत. सध्या विद्यापीठाकडे ६०० रोपे तयार आहेत. यापूर्वी २००७ मध्ये विद्यापीठाने 'एक रस्ता, एक झाड' हा उपक्रम राबविला होता. यात रस्त्याच्या कडेला गुलमोहरची रोपे लावली होती. दोन क्रमांक इमारत ते मुख्य इमारतीपर्यंत चाफा, मुख्य इमारत ते परीक्षा भवन र्यंत कांचन वृक्ष, परीक्षा भवन ते गेट क्रमांक चारपर्यंत रस्त्याच्या आतील बाजूस शिरीष आणि बाहेरील बाजूस गुलमोहरच्या वृक्षांनी सौदर्यांत भर घातली. नव्या आराखड्यात झाडांची जुनी रचना बदलून नवा लूक देण्यात येणार आहे. वड, पिंपळ, चिंच, आवळा, गुलमोहर, बहावा, शिरीष, सिल्व्हर ओक, करंज आदी प्रकारची रोपे लावण्यात येणार आहे. या रोपांचे संरक्षण आणि संवर्धनाची जबाबदारीही निश्चित करण्यात आली असून, त्याबाबत विद्यापीठाने अनुदान आयोगाला दरवर्षी अहवाल द्यावा लागणार आहे.

या उपक्रमात शिवाजी विद्यापीठाचा कॅम्पस आणि तीन जिल्ह्यांतील कॉलेजमध्ये राष्ट्रीय सेवा योजनेच्या विद्यार्थ्यांसह विद्यापीठाचा उद्यान विभाग, पर्यावरण शास्त्र विभाग, वनस्पतीशास्त्र विभागाचाही सहभाग आहे. पर्यावरणाची आवड निर्माण होण्यासाठी या उपक्रमात प्रत्येक विद्यार्थ्यांना सहभागी करून घेतले जाणार आहे. रोपांसाठी होणारा खर्च हा विद्यापीठाच्या स्वनिधीतून केला जाणार आहे. प्रत्येक विद्यार्थ्याला रोप लागवडीचे प्रशिक्षण आणि पर्यावरणाचे महत्त्व पटवून दिले जाणार आहे.

पर्यावरणशास्त्र हायटेक

गेल्या वर्षापासून शिवाजी विद्यापीठातील वृक्षगणनेतून परिसराच्या कार्बन ग्रहण क्षमतेचे मापन करण्यात आले. चार फूटांपेक्षा उंच आणि दहा सेंटीमीटरपेक्षा अधिक परिघ असलेल्या झाडांची गणना झाली. गूगल अर्थ आणि विद्यापीठाचा नकाशा यांच्या सहाय्याने परिसराचे ४६ विभाग केले. सौदर्यं वाढविणारे आणि अधिकाधिक कार्बन शोषून घेणारे रोपे लावण्यात येणार असल्याचे पर्यावरण शास्त्र विभागप्रमुख डॉ. पी. डी. राऊत यांनी सांगितले.

मोबाइल अॅप डाउनलोड करा आणि राहा अपडेट

ट्रॅफिक पोलिसांची शिट्टीला सुट्टी

April 29, 2015, 1:19 pm

≫ Next: सहकार वाचविण्यासाठीच एकत्र

≪ Previous: विद्यापीठासह कॉलेज कॅम्पसमध्येही हिरवाई

$

0

0

म. टा. प्रतिनिधी, कोल्हापूर

ट्रॅफिक पोलिसांची शिट्टी वाजली की एक काळ वाहनधारकाच्या छातीत धडकी भरायची; पण आज उच्च दर्जाचे सिग्नल, क्रेन अशा पायाभूत सुविधा उपलब्ध असून ट्रॅफिक पोलिसांचा धाक कमी झाला आहे. झेब्रा क्रॉसिंगवर वाहने उभारणे, ​ट्रिपल सीट, सिग्नल तोडणे, फॅन्सी नंबर असे वाहतुकीचे नियम वाहनधारक पायदळी तुडवत असतानाही ट्रॅफिक पोलिस निष्क्रिय झाले आहेत.

शहराचा झपाट्याने विस्तार झाला असून, वाहनांची संख्या दुप्पट झाली आहे. कोल्हापूर शहर व्यापारी केंद्र बनू लागल्याने अवजड वाहनांची वाहतूक मोठ्या संख्येने होत आहे. रस्ते विकास प्रकल्पावेळी बहुतांश ट्रॅफिक सिग्नल काढून टाकल्याने पोलिसांना किल्ला लढवावा लागायचा. गेल्या दोन वर्षांत शहरातील प्रमुख रस्ते व चौकांत ट्रॅफिक सिग्नल उभारले आहेत. पोलिसांना पायाभूत सुविधाही पुरवल्या जात आहेत; पण सिग्नलजवळ पोलिस मात्र निष्क्रिय बनत चालले आहेत.

वाहनधारक झेब्रा क्रॉसिंगवर वाहने उभी करत असताना पोलिस वाहनधारकांना समज देत नाहीत. सिग्नल सुरू होण्यापूर्वी वाहने सुसाट वेगाने निघून जातात. सर्वांत कळस म्हणजे सिग्नलवर रेड लाइट असताना सिग्नल तोडून पोलिसांना बाय बाय करत वाहने निघून जात असतात. अनेक चौकांत ट्रिपल सीट प्रवास करणारे मोटारसायकलस्वार सिग्नलची वाट पाहत असतात. मालवाहतूक करणारी वाहने रस्ता अडवून मालाची ने-आण करतात.

ट्रॅफिक पोलिस फक्त नो पार्किंगमधील दुचाकींवर कारवाई करण्याचे काम करतात. दिवसभरात शेकडो वाहनचालक वाहतुकीचे नियम तोडत असताना पोलिस कारवाई करत नाहीत. दर महिन्याच्या दहा तारखेपर्यंत वडाप व मालवाहतूक करणारी वाहने, विद्यार्थी वाहतूक करणाऱ्या वाहनांवर कारवाई करून दंडाची बेगमी केली केली जाते. गर्दीच्या गजबलेल्या चौकाची जबाबदारी महिला पोलिस व वयोवृद्ध पोलिसांना दिली जाते. अनेक ठिकाणी पोलिस गप्पा मारत बसलेले असतात. सध्या उन्हाळ्याचे दिवस असल्याने पोलिस सावलीचा कोपरा धरून वाहतूक तोडणाऱ्या वाहनांकडे हताशपणे पाहत असतात. बहुतांश वाहतूक पोलिसांनी शिट्टीला जवळजवळ सुट्टीच दिली आहे.

ज्येष्ठ नेते कॉम्रेड गोविंदराव पानसरे यांची हत्या झाल्यानंतर व चेन स्नॅचिंगच्या पार्श्वभूमीवर फॅन्सी नंबरप्लेट व विना नंबरप्लेट वाहनांवर कारवाई करण्याचे आदेश विशेष पोलिस महानिरीक्षक व पोलिस अधीक्षकांनी देऊनही या आदेशांना केराची टोपली दाखवली गेली. सहा महिन्यांतून एकदा फिल्मिंग काच असलेल्या मोटारींवर कारवाई करण्याची आठवण येते. पोलिस निरीक्षक, सहायक पोलिस निरीक्षक व उपनिरीक्षक सिग्नल असलेल्या चौकाला भेट देण्याचे टाळतात. त्यामुळे शहरातील वाहतूक व्यवस्थेचा खेळखंडोबा झाला आहे.

मोबाइल अॅप डाउनलोड करा आणि राहा अपडेट

सहकार वाचविण्यासाठीच एकत्र

April 29, 2015, 1:24 pm

≫ Next: फुटबॉल राड्यातील पोलिस निलंबित

≪ Previous: ट्रॅफिक पोलिसांची शिट्टीला सुट्टी

$

0

0

म. टा. प्रतिनिधी, कोल्हापूर

सहकारी चळवळ टिकवण्यासाठी गटातटाचे राजकारण बाजूला ठेवून एकत्र यावे लागेल. कोल्हापूर जिल्हा मध्यवर्ती सहकारी बँकेच्या (केडीसीसी) निवडणुकीत काँग्रेस, राष्ट्रवादी काँग्रेस, जनसुराज्य आणि मित्रपक्ष ही गरज ओळखूनच एकत्र आले आहेत, असे प्रतिपादन माजी खासदार कल्लाप्पाण्णा आवाडे यांनी बुधवारी येथे केले. काँग्रेस, राष्ट्रवादी काँग्रेस, जनसुराज्य आणि मित्रपक्षप्रणित छत्रपती शाहू शेतकरी विकास आघाडीच्या प्रचार शुभारंभ प्रसंगी ते बोलत होते. लाइन बझार येथील महासैनिक दरबार हॉलमध्ये झालेल्या प्रचार शुभारंभ ‌मेळाव्यात ते बोलत होते.

आवाडे म्हणाले, 'केडीसीसी बँक जिल्ह्यातील प्रत्येक माणसाशी निगडीत आहे. साखर कारखाने, सुतगिरणी, बचतगट, पतपेढ्या यांना पतपुरवठा केडीसीसीच्यावतीने होतो. ग्रामीण विकासात आणि ग्रामीण रोजगार निर्मितीसाठी कर्जपुरवठा केला आहे. त्यामुळे केडीसीसी बँकेला गतवैभव मिळवून देणे क्रमप्राप्त आहे. पक्ष कोणताही असला तरी सर्व नेते सहकाराच्या विचाराचेच आहेत. आपण एकत्र नाही आलो तर चळवळ वाचवणे कठीण जाणार आहे.'

राष्ट्रवादीचे नेते हसन मुश्रीफ म्हणाले, 'अजून दोन वर्षे निवडणूक लागू नये, अशी आमची इच्छा होती. एनपीएची तरतूद आल्यामुळेच बँक अडचणीत आली. निवडणूक लागल्यानंतर जर दोन पॅनल झाले असते तर आरोपप्रत्यातरोपांचा परिणाम ठेवीदारांवर होवून बँक अधिकच अडचणीत आली असती. केडीसीसी बँकही शेतकऱ्यांची अर्थवाहिनी असल्याने बँकेला गतवैभव मिळवून देणे आवश्यक आहे.'

काँग्रेसचे नेते माजी आमदार पी. एन. पाटील म्हणाले, 'बँकेवर सत्ता आल्यानंतर विनाकारण कोणालही कर्ज ‌दिले जाणार नाही, तसेच दिलेल्या कर्जाची वसुलीही तातडीने केली जाणार आहे. पण जे गरजू आहेत, त्यांना कर्ज उपलब्ध करून दिले जाणार आहे. आमच्या आघाडीचे सर्व उमेदवार निवडून येतील. बँक अडचणीत आहे, असा चुकीचा समज आहे.'

प्रा. संजय मंडलिक म्हणाले, 'मी सहकारातील कार्यकर्ता आहे. काही चांगले होत असताना खोडा घालणे योग्य होणार नाही म्हणून मी या पॅनलमध्ये आहे. शिवसेना आणि भारतीय जनता पक्षाच्या पॅनलमध्ये शिवसेनेचे एकच आमदार आहेत. तांत्रिकदृष्ट्या उभे राहिलेले हे मोडके पॅनल असून निव्वळ विरोधासाठी विरोध म्हणून हे पॅनल उभे करण्यात आले आहे.'

माजी आमदार के. पी. पाटील यांनी ही निवडणूक ऐतिहासिक असल्याचे सांगितले. माजी खासदार निवेदिता माने, आमदार संध्यादेवी कुपेकर, माजी खासदार जयवंतराव आवळे, प्रा. जयंत पाटील, ए. वाय. पाटील यांची भाषणे झाली. यावेळी गजानन देसाई, निवृत्ती सातपुते या उमेदवारांना माघार घेतली. बाळासाहेब खाडे यांनी आभार मानले. यावेळी आघाडीचे सर्व उमेदवार उपस्थित होते. महत्त्वाच्या नेत्यांची अनुपस्थितीत या आघाडीतील नेते माजी मंत्री सतेज पाटील, माजी मंत्री विनय कोरे, आमदार महादेवराव महाडिक, खासदार धनंजय महा‌डिक या मेळाव्याला अनुपस्थित होते.

मंडलिक माझे नेते

मुश्रीफ आणि दिवगंत माजी खासदार सदाशिवराव मंडलिक यांच्यात टोकाचे मतभेद झाले होते. आजच्या भाषणात मुश्रीफ यांनी सदाशिवराव मंडलिक यांचा उल्लेख माझे नेते असा केला. ते म्हणाले, 'सदाशिवराव मंडलिक यांनी गेली अनेक वर्षे केडीसीसीचे नेतृत्व केले होते. त्यांचा जागेवर त्यांचा मुलगा निवडणून येत आहे याचा मला मनस्वी आनंद आहे.' राष्ट्रवादीच्या सर्वच नेत्यांनी त्यांच्या भाषणात प्रा. संजय मंडलिक यांचा आदराने उल्लेख करत मुश्रीफ आणि मंडलिक गटाच्या मनोमिलनाचे संकेत दिले.

मोबाइल अॅप डाउनलोड करा आणि राहा अपडेट

फुटबॉल राड्यातील पोलिस निलंबित

April 29, 2015, 1:28 pm

≫ Next: एसटी वाहतूक आज विस्कळित

≪ Previous: सहकार वाचविण्यासाठीच एकत्र

$

0

0

कोल्हापूर : फुटबॉल राड्यात सहभागी पोलिस कर्मचारी रोहित शेखर ठोंबरे याला निलंबित करण्यात आले. तो पाटाकडील तालीम मंडळाचा समर्थक आहे. मुस्लिम बोर्डिंग चषक फुटबॉल स्पर्धेत पाटाकडील व दिलबहार मंडळ समर्थकांत झालेल्या राड्यात ठोंबरे सहभागी होता. पोलिस अधीक्षक डॉ. मनोजकुमार शर्मा यांनी त्याच्या निलंबनाचे आदेश दिले. पोलिसांनी या गुन्ह्यात दोन्हीकडील ३५ समर्थकांना अटक केली आहे. कोर्टाने सर्व संशयितांची बुधवारी जामिनावर मुक्तता केली. ठोंबरे जामीनावर मुक्त झाल्यानंतर गुरुवारी दुपारी त्याच्या निलंबनाचा आदेश बजावण्यात आला. दरम्यान, जामिनावर सुटका झालेल्या समर्थकांवर प्रतिबंधात्मक कारवाई करण्यात येणार असल्याचे जुना राजवाडा पोलिस ठाण्याचे निरीक्षक डी. एन. मोहिते यांनी सांगितले.

मोबाइल अॅप डाउनलोड करा आणि राहा अपडेट

---

एसटी वाहतूक आज विस्कळित

April 29, 2015, 1:29 pm

≫ Next: प्रभागफुटीचे भूत मानगुटीवर

≪ Previous: फुटबॉल राड्यातील पोलिस निलंबित

$

0

0

म. टा. प्रतिनिधी, कोल्हापूर

केंद्र सरकारच्या प्रस्तावित रोड सेफ्टी विधेयकाला विरोध करण्यासाठी गुरुवारी पुकारलेल्या वाहतूक बंदला एसटी महामंडळाकडील मोठ्या कामगार संघटनेच्या सभासदांचा पाठिंबा आहे. संघटनेचे जवळपास चार हजार सभासद आहेत. त्यामुळे जिल्ह्यातील जवळपास ७० टक्के वाहतूक विस्कळित होण्याची शक्यता आहे. मात्र, या बंदमध्ये केएमटी, रिक्षा संघटना सहभागी होणार नसल्याने प्रवाशांच्यादृष्टीने दिलासा आहे.

केंद्र सरकारने खासगी वाहनांना प्रवासी वाहतुकीची मुभा देणारे व वाहतूक नियमभंगासाठी जबर शिक्षा व दंड सुचवलेले 'रस्ता वाहतूक व सुरक्षा विधेयक २०१४' तयार केले आहे. एसटीसह ५४ राज्य परिवहन सेवांची, रिक्षा व टॅक्सीसारख्या परिवहन वाहनांची मृत्यूघंटा असल्याने या विधेयकाला विरोध करण्यासाठी वाहतूक संघटनांनी देशव्यापी वाहतूक बंद पुकारला आहे. एसटी महामंडळाकडील संघटना, रिक्षा, टॅक्सी संघटना यामध्ये मोठ्या प्रमाणात सहभागी होतील, अशी अपेक्षा होती. महामंडळाकडील कामगार संघटनेकडील सभासद या आंदोलनाला पाठिंबा देणार आहेत. त्यामुळे रात्री बारानंतर बंदचा परिणाम जाणवणार आहे.

महामंडळाकडील राष्ट्रीय एसटी कामगार काँग्रेस व महाराष्ट्र एसटी कर्मचारी काँग्रेसने विधेयकाला विरोध जाहीर केले, परंतु बंदमध्ये सहभागी होणार नसल्याची भूमिका घेतली. सध्या एसटी अडचणीत आहे. प्रवाशांनीही सुटीसाठी आगाऊ आरक्षण केले आहे. उन्हाळ्यात प्रवाशांना त्रास होऊ नये, गैरसोय होऊ नये यासाठी प्रतिकात्मक आंदोलनाचा मार्ग अवलंबला जाणार असल्याचे सांगितले आहे.

जिल्हा ऑटो रिक्षा संघर्ष समितीनेही बंदमध्ये सहभागी न होण्याचा निर्णय घेतला आहे. रिक्षाचालकांना हे दोन महिनेच व्यवसायाचे आहेत. अशावेळी आर्थिक नुकसान होऊ नये म्हणून सर्व रिक्षा संघटनांनी रिक्षा बंद न ठेवता केंद्र सरकारचा निषेध करण्याचा निर्णय घेतला असल्याचे समितीने कळवले आहे. तर, केएमटीच्या संघटनांकडे याबाबतची काहीच विचारणा झालेली नाही, असे संघटनेचे निशिकांत सरनाईक यांनी सांगितले. खासगी आराम बस संघटनाही यामध्ये सहभागी होणार नसल्याचे सतीशचंद्र कांबळे यांनी सांगितले.

मोबाइल अॅप डाउनलोड करा आणि राहा अपडेट

प्रभागफुटीचे भूत मानगुटीवर

April 29, 2015, 1:28 pm

≫ Next: चंबळ खोऱ्यात महाराष्ट्राचा दरारा

≪ Previous: एसटी वाहतूक आज विस्कळित

$

0

0

म. टा. प्रतिनिधी, कोल्हापूर

महापालिकेच्या आगामी निवडणुकीसाठी प्रशासकीय पातळीवर हालचाली सुरू झाल्या आहेत. निवडणुकीसाठी प्रत्येक प्रभागाची रचना बदलणार असल्याने नगरसेवकांच्या डोकेदुखीत भर पडली आहे. बदललेला प्रभाग आणि प्रचारासाठी कमी ‌वेळ मिळणार असल्याने वेळेचे गणित आखताना इच्छुकांसह विद्यमान नगरसेवकांचीही धांदल उडणार आहे. प्रशासकीय पातळीवर प्रगणक गट तयार करण्यात आले आहेत. एका प्रभागात दहा ते अकरा गटाचा समावेश असेल. एका प्रगणक गटात सहाशे लोकसंख्येचा समावेश आहे.

पालिकेची निवडणूक ऑक्टोबरमध्ये २०११ च्या लोकसंख्येनुसार होणार आहे. राज्य निवडणूक आयोगाने निवडणुकीत अत्याधुनिक तंत्रज्ञानाचा अवलंब करताना प्रभाग रचना ऑनलाइन पद्धतीने करण्यात येणार आहे. इ-मॅपिंगद्वारे प्रभाग रचना करताना भौगोलिक अडथळे आले, तर रचनेत बदल होणार आहे. ही रचना करताना स्थानिक पातळीवर प्रशासनापासून पदाधिकारी-नगरसेवकांपर्यंत कुणालाच हस्तक्षेप करता येणार नाही. जूननंतर प्रभागरचना निश्चित होईल. त्यानंतर निवडणुकीस तीन महिन्यांचा कालावधी असणार आहे. नवीन प्रभागात प्रत्येक मतदारापर्यंत पोहचण्यासाठी विद्यमान नगरसेवकांसह इच्छुकांनाही मोठी कसरत करावी लागणार आहे. इ-मॅपिंगद्वारे प्रभाग निश्चिती होणार असल्यामुळे प्रभाग नेमका कसा असणार आणि कोणत्या भागाचा समावेश होणार यासंबंधी अंदाज बांधणे कठीण होत आहे. त्यामुळे विद्यमान नगरसेवकांची पंचाईत झाली आहे.

मतदारयादी अपडेट करण्याचे काम सुरू

निवडणूक आयोगाकडून सध्या मतदारयादी अपडेट करण्याचे काम सुरू आहे. ऑक्टोबर २०१४ मध्ये विधानसभा निवडणूक झाली होती. विधानसभा निवडणुकीसाठीची मतदारयादी सध्या उपलब्ध आहे. त्यानंतर निवडणूक विभागाने एक जानेवारी २०१५ रोजी मतदारयादी अपडेट केली आहे. निवडणूक विभागाकडून सध्या मतदार नोंदणी सुरू असून, महापालिका निवडणुकीसाठी जून किंवा जुलैपर्यंतची यादी ग्राह्य धरली जाणार आहे.

मोबाइल अॅप डाउनलोड करा आणि राहा अपडेट

चंबळ खोऱ्यात महाराष्ट्राचा दरारा

April 30, 2015, 12:26 pm

≫ Next: नेतृत्व उभारण्याचे आव्हान

≪ Previous: प्रभागफुटीचे भूत मानगुटीवर

$

0

0

उदयसिंग पाटील, कोल्हापूर

चंबळच्या खोऱ्यामधील डाकूंची दहशत व त्यांच्या उच्छादाने भल्याभल्यांना जेरीस आणले होते. दिवसेंदिवस शिरजोर होत चाललेल्या डाकूंच्या टोळ्यांना वेसण घालण्याचे दूर, त्यांचा उच्छाद कमी करण्याच्या प्रयत्नांना यश मिळत नव्हते. दुसरीकडे जनतेमध्ये यंत्रणेवरील विश्वास दिवसेंदिवस झपाटयाने कमी होत होता. या कोंडीमध्ये भिंडच्या पोलीस अधीक्षकपदाचा कार्यभार निरंजन वायंगणकर यांनी स्वीकारला. मूळचे कोल्हापूरचे असल्याने दिलदारपणा व कुणी अंगावर आला तर मात्र त्याला शिंगावर घेण्याचा धडाकेबाजपणा अंगात भिणलेला. कोल्हापूरच्या या रांगड्या अधिकाऱ्याने कुख्यात डाकू जगजीवन परिहार, राकेश या टोळ्यांसह २८ डाकूंना कोल्हापूरचे पाणी दाखवत यमसदनी धाडले. त्यांच्या या कर्तृत्वाचा प्रेसिडेंट पोलिस मेडल फॉर गैलेंट्री देऊन सन्मान केला आहे.

१९९९ साली आयपीएस झालेले वायंगणकर यांचे संपूर्ण शिक्षण कोल्हापुरात झाले. त्यांचे मूळचे केडर मणिपूर होते. पण लग्नानंतर त्यांनी केलेल्या विनंतीनुसार वायंगणकर दाम्पत्याला मध्यप्रदेश केडर मिळाले. पोलिस अधीक्षक म्हणून त्यांची पहिली नेमणूक मंडला जिल्ह्यात झाली. हा जिल्हा नक्षलवादी कारवायांमुळे फार संवेदनशील आहे. या कालावधीमध्ये त्यांनी सतत केलेल्या नक्षलींच्याविरोधात कारवाईंमुळे त्यांना पंतप्रधानांच्या विशेष सेवा पदकाने सन्मानित करण्यात आले. मंडला जिल्ह्यापाठोपाठ त्यांची नेमणूक झाली ती डाकूंनी भरलेले चंबळ खोरे असलेल्या भिंड जिल्ह्याच्या अधीक्षकपदी. डाकूंची दहशत, अपहरण करुन पैसे उकळण्याच्या प्रकरणांना अक्षरशः ऊत आला होता. त्यावेळी जगजीवन परिहारच्या टोळीचा मोठा दबदबा होता. त्याच्यावर सरकारने साडेसात लाख रुपयांचे रिवॉर्ड ठेवले होते. २००७ मध्ये भिंड, मोरेना व ग्वाल्हेर या तीन जिल्ह्याच्या पोलिस दलांनी संयुक्तपणे मोहीम राबवली. सात दिवस चाललेल्या मोहिमेत वायंगणकर यांनी महत्त्वाची भूमिका बजावली व परिहार टोळीचा खातमा केला होता. याबद्दल त्यांना प्रेसिडेंट पोलिस मेडल फॉर गैलेंट्री देण्यात आले होते. या टोळीबरोबरच स्वतंत्रपणे राबवलेल्या मोहिमांमध्ये त्यांच्या नावावर २८ डाकूंचे एन्काऊंटर नोंद आहेत. त्यामध्ये परिहार याचा काका, राकेश टोळीतील सदस्यांचा समावेश आहे. जाणवण्याइतपत सामाजिक दरी असलेल्या भिंडमध्ये शांतता तसेच पोलिस यंत्रणेबाबत विश्वास निर्माण करण्याचे काम भिंड पोलिस अधीक्षक म्हणून त्यांनी केले होते.

२००९ साली त्यांची गुना जिल्हा पोलिस अधीक्षकपदी नेमणूक झाली. त्यावेळी विधानसभा निवडणुकीचे जोरदार वारे होते. निवडणुकीनंतर त्यांचा मोठा कार अपघात झाला. त्यामध्ये त्यांचा ड्रायव्हर व बंदूकधारी शिपाई ठार झाला. वायंगणकरही गंभीर जखमी झाले होते. जवळपास १२ दिवस बेशुद्धावस्थेत असलेल्या वायंगणकर यांनी त्यांच्यातील लढा देण्याच्या प्रवृत्तीने या शारीरिक परिस्थितीवरही मात केली. या संकटातून ते ठणठणीत बरे झाले. त्यांचे केडर जरी मध्य प्रदेश असले तरी प्रतिनियुक्तीवर महाराष्ट्र पोलिस अकॅडमीच्या जॉइंट डायरेक्टरपदाचा ते कार्यभार सांभाळत आहेत. त्यानंतर पुन्हा मध्य प्रदेशात रुजू होणार आहेत.

लाखो भाविकांचे श्रद्धास्थान असलेली अंबाबाई व ताकदीचा कस पाहणारी कुस्ती अशा कोल्हापूरमध्ये मी घडलो. कोल्हापूरच्या माणसांमध्ये दिलदारपणा जसा आहे तसेच कुणी आव्हान दिले तर पाठीमागे हटत नाही. या दोन गुणांना सोबत घेऊन मी काम केले. त्या कामाच्या पद्धतीमुळे जिथे ​जिथे काम केले, तेथील नागरिकांमध्ये पोलिस यंत्रणेबाबत विश्वास निर्माण करण्याचे काम झाले. - निरंजन वायंगणकर, जॉइंट डायरेक्टर, पोलिस अकॅडमी, नाशिक

मोबाइल अॅप डाउनलोड करा आणि राहा अपडेट

नेतृत्व उभारण्याचे आव्हान

April 30, 2015, 11:48 am

≫ Next: असंघटितांना विमा कवच

≪ Previous: चंबळ खोऱ्यात महाराष्ट्राचा दरारा

$

0

0

म. टा. प्रतिनिधी, कोल्हापूर

कामगार आणि शेतकरी संघटना आणि परिवर्तनवादी चळवळीत कोल्हापूरचे मोठे योगदान आहे. राज्यपातळीवर कामगार संघटनांचे नेतृत्व कोल्हापूरने दिले आहे. त्र्यं. सि. कारखानीस, नार्वेकर गुरुजी, संतराम पाटील, हिंदूराव साळोखे, संभाजीराव चव्हाण, प्रा. एन. डी. पाटील असे कामगारांच्या प्रश्नांवर आणि हक्कांसाठी लढा देणारे नेते कोल्हापूरने राज्याला दिले. पण कॉम्रेड गोविंदराव पानसरे यांच्या खुनामुळे जिल्ह्यातील कामगार चळवळींना नवीन नेतृत्व उभे करण्याचे आव्हान निर्माण केले आहे. एका बाजूने विविध पातळ्यांवर कामगारांच्या हक्कावर गदा येत असताना कामगार संघटनांपुढे सर्वसमावेशक नेतृत्व उभे करण्याचे आव्हान निर्माण झाले आहे.

कोल्हापुरातील कामगार संघटनांवर डाव्या विचारांच्या संघटनांची पकड जास्त आहे. त्याच बरोबर राष्ट्रीय स्वयंसवेक संघाची 'मजदूर संघ', काँग्रेस आणि राष्ट्रवादी काँग्रेस, शिवसेना, महाराष्ट्र नवनिर्माण सेना, तसेच स्थानिक पातळीवरील काही गटांच्या कामगार संघटना कार्यरत आहेत. कोल्हापुरातील कामगार संघटनांनी गेल्या दोन दशकांत कारखाने आणि बँका असा परिघ ओलांडत मोलकरीण, बांधकाम कामगार, अंगणवाडी सेविका, ऊसतोडणी मजूर अशा कामगारांसाठीही काम करत आपला असंघटीत क्षेत्रातही परिघ विस्तारला, ही बाब वाखाण्याजोगीच आहे. यामध्ये भारतीय कम्युनिस्ट पक्ष, लालनिशाण पक्ष, मार्क्सवादी कम्युनिस्ट पक्ष यांचे कष्ट नक्कीच दखलपात्र आहेत. विशेषत: मोलकरीण आणि अंगणवाडी सेविकांना त्यांचे हक्क मिळवून देण्यात कोल्हापुरातून मोठे लढे उभे राहिले. त्याची दखल सरकारनेही घेतली. रेशन धान्याच्या हक्कासाठी मोठे लढेही कोल्हापुरातच उभे राहिले.

भूतकाळाचा विचार केला तर उद्योग मोडकळीस न आणता कामगारांच्या हक्कासाठी उभारलेले लढे हे कोल्हापूरच्या कामगार संघटनांचे वैशिष्ट्यच म्हणावे लागेल. पानसरे यांनी ९० च्या दशकात कोल्हापुरातील एक मोठा उद्योग समूह अडचणीत असताना कामगारांना कमी पगार घेऊन जास्त काम करण्यास सांगून कारखाना अडचणीतून बाहेर काढण्यात मदत केली होती. कामगार आणि सर्वसमान्य कष्टकारी कार्यकर्ते आणि नेत्यांची वैचारिक जडणघडण होण्यासाठी कार्यरत असलेल्या श्रमिक प्रतिष्ठानसारख्या संघटना येथे आहेत. कामगार संघटना आणि त्यांच्या नेतृत्वाने कोल्हापुरातील विविध सामाजिक आणि नागरी हक्कांवरील अंदोलानात मोलाची भागिदारी केली आहे. टोलविरोधी आंदोलन हे याचे अलीकडचे मोठे उदहारण देता येईल. पण सध्यांची राजकीय आणि आर्थिक स्थिती कामगार, शेतकरी, कष्टकरी जनतेच्या हक्कांविरोधात आणि अधिकारांविरोधात असतानाच कामगार संघटनांपुढील आव्हाने कैकपटीने वाढली आहेत.

ध्वजवंदन

महाराष्ट्र राज्य स्थापनेच्या ५५ व्या वर्धापन दिनानिमित्त ध्वजवंदनाचा मुख्य कार्यक्रम शुक्रवारी (१ मे ) सकाळी ठीक आठ वाजता छत्रपती शाहू स्टेडियमवर होणार आहे. पालकमंत्री चंद्रकांत पाटील यांच्या हस्ते ध्वजारोहण केले जाणार आहे. या समारंभास जास्तीत जास्त नागरिकांना उपस्थित राहता यावे, म्हणून सकाळी सव्वा सात ते नऊ या दरम्यान कोणत्याही सरकारी अथवा निमसरकारी कार्यालयांनी ध्वजारोहणाचा कार्यक्रम आयोजित करु नये. ज्यांना असा स्वतंत्र ध्वजारोहणाचा कार्यक्रम आयोजित करायचा आहे, त्यांनी यावेळेपूर्वी किंवा नंतर करावा, असे आवाहन जिल्हाधिकारी डॉ. सैनी यांनी केले आहे. १ मे रोजीच्या ज्या ठिकाणी दरवर्षी प्रजासत्ताक दिनी राष्ट्रध्वज उभारला जातो, अशा सर्व सरकारी इमारतींवर, किल्ल्यांवर तसेच ऐतिहासिक महत्त्वाच्या ठिकाणी राष्ट्रध्वज उभारण्यात यावेत, अशी सूचनाही डॉ. सैनी यांनी केली आहे.

मोबाइल अॅप डाउनलोड करा आणि राहा अपडेट

असंघटितांना विमा कवच

April 30, 2015, 11:49 am

≫ Next: श्रोत्यांसाठी संगीतकक्ष

≪ Previous: नेतृत्व उभारण्याचे आव्हान

$

0

0

म. टा. प्र‌‌तिनिधी, कोल्हापूर

कामगार मंत्रालयातर्फे असंघटित क्षेत्रातील कर्मचाऱ्यांसाठी तीन नव्या योजना राबविण्याचा विचार करीत आहे. 'राष्ट्रीय स्वास्थ्य विमा योचना', 'आम आदमी विमा योजना' आणि 'इंदिरा गांधी नॅशनल ओल्ड पेन्शन योजना' या त्या योजना आहेत. या तिन्ही योजना 'स्मार्ट कार्ड'शी जोडण्यात येणार आहेत. या शिवाय असंघटित क्षेत्राच्या सामाजिक सुरक्षेच्या योजनेचीही लवकरच घोषणा होण्याची शक्यता आहे.

राज्य कामगार विमा योजना योजना

कामगार आणि त्यांची कुटुंबे यांच्या आरोग्यरक्षणासाठी व औषधोपचारासाठी ही योजना चालवण्यात येते. यात कामगार, मालक, सरकार या तिघांची वर्गणी असते. ठरावीक वेतनपातळी असणऱ्या सर्व कारखान्यांत ही योजना सक्तीची आहे. काही कारखान्यांत वेतन जास्त असल्याने कामगारांसाठी स्वतंत्र योजना आहेत

घरेलू कामगार कल्याण मंडळातर्फे राबविण्यात येणाऱ्या कल्याणकारी योजनाही मोठ्या प्रमाणात आहेत. अपघात घडल्यास लाभार्थींना तात्काळ सहाय्य पुरविणे, लाभार्थींच्या मुलांच्या शिक्षणासाठी आर्थिक सहाय्य देणे, लाभार्थींच्या अथवा त्यांच्यावर अवलंबून असलेल्या व्यक्तीच्या आजारावर उपचार करण्यासाठी वैदयकीय खर्चाची तरतूद करणे, महिला लाभार्थींकरिता प्रसूती लाभाची तरतूद करणे, लाभार्थीचा मृत्यू झाल्यावर कायदेशीर वारसाला अंत्यविधीच्या खर्चासाठी रक्कम प्रदान करणे, आदी योजनांचा यामध्ये समावेश आहे.

मोबाइल अॅप डाउनलोड करा आणि राहा अपडेट