वाई तालुक्यातील ओझर्डे येथील पद्मावती देवीच्या वार्षिक यात्रेत बुधवारी रात्री बारा वाजता शोभेच्या दारुगोळ्यांचा स्फोट झाला. स्फोटानंतर लागलेल्या आगीत सात जण जखमी झाले. त्यापैकी दोन चिमुरड्या मुली गंभीर आहे.
त्याचबरोबर आग विझवणारे पंधरा जण जखमी झाले आहेत. या प्रकरणी इस्लामपूर (जि. सांगली) येथील वामन आमले व त्यांच्या दोन साथीदारांना भुईंज पोलिसांनी ताब्यात घेतले असून, त्यांच्यावर गुन्हा दाखल केला आहे. दरम्यान, मांढरदेव, पालींनंतर या यात्रेत दुर्घटना घडल्याने जिल्ह्यातील यात्रा धोक्याच्या वळणावरच असल्याचे मानले जात आहे. बुधवारी यात्रेचा पहिला दिवस होता. रात्री १२ वाजता छबिन्यावेळी शोभेची दारू उडवण्याचे काम मूळचे कवठेएकंद येथील व सध्या इस्लामपूर यल्लमा चौक येथे वास्तव्यास असणारे विक्रम भिकोबा आमले व त्याचे कामगार सावकर रामचंद्र पाटील (रा. साखराळे ता. वाळवा जि. सांगली) व मारुती भाऊ सुतार (रा. बेघरवस्ती इसलामपूर) हे करत होते. यात्रेवेळी वामन आमले यांनी आणलेला दारू गोळा पोत्यात भरून यात्रेत मांडलेल्या खेळण्याच्या दुकानाजवळ ठेवला होता. छबिण्याला सुरुवात होताच वामन आमले याने शोभेची दारू उडवण्याचे काम सुरू केले. त्याचीच ठिणगी दारू गोळ्याच्या पोत्यावर पडल्याने स्फोट झाला.
मांडलेली खेळण्याची दुकाने जळून खाक झाली. तसेच त्याच दुकानात कॉटखाली झोपलेल्या गीता रामदास पवार (वय ५) पूजा रामदास पवार (वय ९) व खेळणी विक्री करणारे रेखा अनिल पवार (वय २) अनिल सायबू पवार (वय २५) सुरेखा अनिल पवार (वय २२) आणि ओझर्डेचे ग्रामस्थ रवींद्र बाळासाहेब पिसाळ (वय ३०), चंदर उत्तम पिसाळ हे जखमी झाले. त्यानंतर अवघ्या काही क्षणातच दुसरी दुकाने ही आगीने वेढली गेली. स्थानिक ग्रामस्थांनी आटोकाट प्रयत्न करून आग आटोक्यात आणली. या सगळ्या धावपळीत दारुकाम करणारा वामन आमले पळून गेला. ओझर्डे ग्रामस्थांनी भुईंज पोलिस स्टेशनचे गुन्हे प्रकटीकरण शाखेचे सहायक पोलिस निरीक्षक राजेंद्र कदम व सचिन ससाणे यांना घेऊन त्याच्या गावी इस्लामपूर येथे जाऊन त्याला ताब्यात घेतले.
मोबाइल अॅप डाउनलोड करा आणि राहा अपडेट