येथील के. व्ही. पालनकर सराफी दुकानावरील दरोड्याला ३६ तास उलटून गेले तरी तपासात कोणतीही प्रगती झालेली नाही. केवळ तपास सुरु आहे, अशी मोघम उत्तरे पोलिसांकडून मिळत आहेत. दाते मळा येथील पालनकर यांच्या सराफी दुकानावर शनिवारी पहाटेच्या सुमारास धाडसी दरोडा टाकण्यात आला. सुरक्षा रक्षकाला बंदूक व चाकूचा धाक दाखवून चोरट्यांनी संपूर्ण दुकान साफ केले. दरोड्यानंतर तब्बल तीन तासानंतर पोलिसांनी या प्रकरणाचा तपास सुरु केल्याने कोणत्याही प्रकारचे धागे दोरे त्यांच्या हाती लागले नाहीत. कमलाकर पालनकर यांनी शनिवारी दुपारनंतर गावभाग पोलिस ठाण्यात रितसर फिर्याद दाखल केली. त्यानंतर पोलिसांनी तपासाची सूत्रे हाती घेतली. सुमारे पाच कोटींच्या दरोडा प्रकरणाचा तपास सहाय्यक पोलिस निरिक्षक प्रज्ञा देशमुख यांच्याकडे सोपविण्यात आला आहे. तर दरोड्याप्रकरणी काहीजणांची पोलिसांनी चौकशी केल्याचे समजते. मात्र अधिकृत माहिती मिळू शकली नाही. पालनकर यांच्या दुकानातील कामगारांचा जबाब पोलिसांनी नोंदवून घेतला असून त्यांच्यावर करडी नजर राहणार आहे. एक कामगार गेल्या काही दिवसांपासून सुटीवर आहे. तो परराज्यात गेल्याने त्याच्याशीही पोलिसांनी संपर्क केल्याचे समजते. दरम्यान, दरोडा प्रकरणातील तपासासाठी पोलिसांची पथके कर्नाटक राज्यात रवाना करण्यात आली होती. या पथकाच्या हाती महत्वाचे काहीच न लागल्यामुळे ते माघारी परतले आहेत.
मोबाइल अॅप डाउनलोड करा आणि राहा अपडेट