म. टा. वृत्तसेवा, कुपवाड
तासगाव-कवठेमहांकाळ विधानसभा मतदार संघाच्या पोटनिवडणुकीसाठी मंगळवारी उमेदवारी अर्ज दाखल करण्याच्या अखेरच्या दिवशी १९ जणांनी २२ उमेदवारी अर्ज दाखल केले. राष्ट्रवादीच्या अधिकृत उमेदवार सुमन रावसाहेब पाटील यांचा उमेदवारी अर्ज दाखल करण्यासाठी भाजप वगळता सर्व राजकीय पक्षांचे पदाधिकारी उपस्थित होते. दरम्यान, दिवंगत आर. आर. पाटील यांच्या पत्नी सुमन पाटील यांच्या विरोधात कोणाताही राजकीय पक्ष निवडणुकीत उतरला नसला तरी अपक्षांची संख्या अधिक आहे. त्यामध्ये भाजप नेत्यांच्या कट्टर समर्थकांचा समावेश असल्याने ही निवडणूक बिनविरोध होण्याची शक्यता कमी असल्याच्या चर्चेने जोर धरला आहे.
माजी गृहमंत्री आर. आर. पाटील यांच्या अकाली निधनामुळे रिक्त झालेल्या तासगाव-कवठेमहांकाळ विधानसभा मतदारसंघाची निवडणूक लागली आहे. उमेदवारी अर्ज दाखल करण्याच्या मंगळवारच्या अखेरच्या दिवशीच इच्छुकांची उमेदवारी अर्ज दाखल करण्यासाठी झुंबड उडाली. यामध्ये केवळ तासगाव, कवठेमहांकाळ, मिरज बरोबरच मुंबई, सातारा, सांगोला, मंगळवेढा आदी ठिकाणाहून इच्छुक धावत आले होते. राष्ट्रवादीच्या उमेदवार सुमन पाटील यांचा उमेदवारी अर्ज दाखल करण्यासाठी दोन्ही तालुक्यातील प्रमुख कार्यकर्ते मंगळवारी सकाळपासूनच तासगावात एकत्र येत होते. दुपारी राष्ट्रवादीचे प्रदेशाध्यक्ष सुनील तटकरे, माजी मंत्री दिलीप वळसे-पाटील, मदन पाटील, वसंत डावखरे, शिवसेनेचे आमदार अनिल बाबर, आमदार दीपक शिंदे, माजी आमदार प्रकाश शेंडगे, काँग्रेसचे जिल्हाध्यक्ष मोहनराव कदम, राष्ट्रवादीचे जिल्हाध्यक्ष विलासराव शिंदे, काँग्रेसच्या शैलजा प्रकाशबापू पाटील, यांच्या उपस्थितीत उमेदवारी अर्ज दाखल केला. तासगावच्या मार्केट यार्डातून उमेदवारी अर्ज भरण्यासाठी रॅली काढण्यात आली. अत्यंत शांतपणे, कोणत्याही घोषणा न देता सुमन पाटील, आर. आर. पाटील यांची कन्या स्मिता, चिरंजीव रोहित हे सर्व नेत्यांबरोबर रॅलीत अग्रभागी होते. अर्ज दाखल केल्यानंतर तटकरे यांनी सर्वच पक्षांच्या पदाधिकाऱ्यांचे, कार्यकर्त्यांचे आभार मानले.
दरम्यान, अपक्षांमध्ये स्वप्नील दिलीप पाटील (सावर्डे) यांचा उमेदवारी अर्ज दाखल करण्यासाठी कवठेमहांकाळचे सरपंच सुनील माळी, ज्येष्ठ कार्यकर्ते दिनकर झांबरे उपस्थित होते. भाजपच्या काही कार्यकर्त्यांनी अखेरपर्यंत ही निवडणूक पक्षाने लढवावी, असा आग्रह धरला होता. शिवाय पक्ष उमेदवार देणार नसेल तर अपक्ष म्हणून रिंगणात उतरण्याचा निर्धार केला होता. त्यामुळे ही निवडणूक बिनविरोध होईल, असे सध्यातरी दिसत नाही. २५ मार्च रोजी अर्जांची छाननी होणार असून, २७ मार्चपर्यंत उमेदवारी अर्ज मागे घेण्याची मुदत आहे. अर्ज माघारीनंतरच या निवडणुकीचे नेमके चित्र समोर येणार आहे.
राज्यभरातून अपक्ष अर्ज दाखल
अपक्ष म्हणून स्वप्नील पाटील, संजय विलास बाबर (सांगोला), भारत दिगंबर गडहीरे (सांगोला), आनंदराव ज्ञानू पवार (तासगाव), अलंकृता अभिजीत आवाडे (सातारा), सुभाष वसंत अष्टेकर (तासगाव), विजयकुमार आप्पासो सगरे (कवठेमहांकाळ), नानासाहेब आनंदराव शिंदे (जरंडी), विक्रातसिंह माणिकराव पाटील (अंजनी), रावसाहेब शिवाजी पाटील (मणेराजुरी), किशोर दिनकर उनउने (सावळज), सतीश भूपाल सनदी (मालगाव), गुलाब शंकर माने (आगळगाव), सरिता रामचंद्र लांडगे (मणेराजुरी)आदींनी अर्ज भरले.
अनामत रक्कम उद्या भरतो...
मंगळवेढ्याहून उमेदवारी अर्ज घेऊन आलेल्या एकाला उमेदवारी अर्जाबरोबर अनामत रक्कम भरायची असते हेही ठाऊक नव्हते. अर्ज देताना हे त्याच्या लक्षात आले. त्यामुळे तेथून तो परत फिरला. काही वेळाने पुन्हा येवून अधिकाऱ्यांना म्हणाला, 'नुसता अर्ज घेऊन ठेवा की, अनामत रक्कम उद्याला आणून भरतो,' अशा हौशी अपक्ष इच्छुकही पहावयास मिळाला.
मोबाइल अॅप डाउनलोड करा आणि राहा अपडेट
