Quantcast
Channel: Maharashtra Times
Viewing all 37216 articles
Browse latest View live

कोल्हापूरच्या महापौरांवर कारवाई?

0
0


म. टा. प्रतिनिधी, कोल्हापूर

महापौर तृप्ती माळवी यांच्यावर कारवाई करण्याचा ठराव केल्यानंतर महापालिकेतील काँग्रेस व राष्ट्रवादी काँग्रेसच्या पदाधिकाऱ्यांनी आता त्यादृष्टीने कारवाईसाठी राज्य सरकारकडे पाठपुरावा सुरू केला आहे. त्याकरिता तातडीने मुख्यमंत्र्यांची भेट घेण्यात येणार आहे. शनिवारी पदाधिकाऱ्यांनी पालकमंत्री चंद्रकांत पाटील यांच्याकडे महापौरांवर कारवाईची मागणी केली. पंतप्रधान नरेंद्र मोदी यांच्या स्वच्छ कारभाराच्या आश्वासनाची आठवणही करून दिली. मंत्री पाटील यांनी ठरावाची प्रत घेऊन मुंबईला या, मुख्यमंत्र्यांना आदेश काढण्याची विनंती करू असे आश्वासन दिले आहे.

लाचखोरीच्या प्रकरणाने नैतिक अधःपतनाच्या मुद्द्यावर माळवी यांच्या नगरसेवकपदावर कारवाई करण्याचा ठराव शुक्रवारी झालेल्या सभेत करण्यात आला. हा ठराव आता पुढील कार्यवाहीसाठी राज्य सरकारकडे पाठवावा लागणार आहे. त्याबाबतची प्रक्रिया कशी होणार याबाबत अजून अनिश्चितता असताना स्थायी सभापती आदिल फरास, सभागृह नेते चंद्रकांत घाटगे, परिवहन सभापती अजित पोवार, गटनेते शारंगधर देशमुख, राजू लाटकर, लीला धुमाळ, इंद्रजित सलगर, परिक्षित पन्हाळकर, संजय मोहिते यांनी पालकमंत्री पाटील यांची जिल्हाधिकारी कार्यालयात भेट घेतली.

यावेळी महापौरांसारख्या मानाच्या पदावर राहून लाच घेणारी व्यक्ती त्या पदावर राहू नये असे वाटते. पंतप्रधान नरेंद्र मोदी यांनी स्वच्छ प्रशासनाचे व भ्रष्टाचारमुक्त भारताचे आश्वासन दिले आहे. त्यानुसार राज्य सरकारने महापालिकेने केलेल्या ठरावानुसार त्यांचे पद रद्द करावे, अशी मागणी केली. त्याबाबत पाटील यांनी हा ठराव घेऊन मुंबईला या. पदाधिकारी व स्थानिक आमदार राजेश क्षीरसागर यांच्यासोबत मुख्यमंत्र्यांना भेटू. तसेच त्यांच्याकडून त्यावर आदेश देण्याची विनंती करू असे आश्वासन दिले. त्यामुळे पदाधिकारी मंगळवारी किंवा बुधवारी याबाबत मुख्यमंत्र्यांना भेटण्यासाठी जाणार आहेत.

ठरावाला अडथळा येण्याची शक्यता

महापौरांबाबतच्या ठरावाला न्यायालयात आव्हान दिले जाण्याची शक्यता आहे. सभेत मंजूर झालेल्या ठरावावर महापौरांना पुढील सभेपर्यंत स्वाक्षरी करावी लागते. मात्र ठरावाला न्यायालयात आव्हान देण्याचा व स्वाक्षरीचा काही संबंध नाही. ठराव राज्य सरकारकडे पाठवला जात असताना न्यायालयीन कार्यवाहीची माहिती नमूद करुन तो पाठवला जातो. त्यामुळे हा ठराव अडकण्याची शक्यता कमी आहे. दुसरीकडे काँग्रेस व राष्ट्रवादी या दोन्ही आघाड्यांनी नगरसेवकांना सभेसाठी उपस्थित राहण्याबरोबरच ठरावाच्या बाजूने मतदान करण्यासाठी व्हिप जारी केला होता. त्यानुसार मृदुला पुरेकर, दिगंबर फराकटे, सर्जेराव पाटील, निशिकांत मेथे हे सदस्य दोन्ही आघाड्यांशी संलग्न आहेत. त्यांच्याकडून जर समाधानकारक उत्तर न मिळाल्यास गटनेते त्यांच्यावर कारवाईबाबतची तक्रार करू शकतात. विभागीय आयुक्तांकडे केल्या जाणाऱ्या या तक्रारीनुसार दोन्ही बाजूंच्या सुनावणी घेतल्या जातात. त्यासाठी वकील व तारखांची प्रक्रिया असल्याने बराच वेळ जातो. पण विभागीय आयुक्तांना सहा महिन्यांत या तक्रारीवर निर्णय घेण्याचे बंधन आहे.

मोबाइल अॅप डाउनलोड करा आणि राहा अपडेट


हद्दवाढीचा गोंधळ सुरुच!

0
0


म. टा. प्रतिनिधी, कोल्हापूर

यापूर्वी तीनवेळा प्रस्ताव पाठवूनही राजकीय कारणांसाठी रखडलेल्या शहराच्या हद्दवाढीसाठी आता पाच गावांचा समावेश असलेला प्रस्ताव नव्याने पाठविण्याची सूचना पालकमंत्री चंद्रकांत पाटील यांनी महापालिकेच्या शिष्टमंडळाला शनिवारी केली. राज्य सरकारने हद्दवाढ फेटाळल्याच्या पार्श्वभूमीवर पालिका पदाधिकाऱ्यांनी शनिवारी पाटील यांची भेट घेऊन हद्दवाढ आवश्यक असल्याचे सांगितले.

महापालिकेतील स्थायी समितीचे सभापती आदिल फरास, काँग्रेसचे गटनेते शारंगधर देशमुख, राष्ट्रवादीचे गटनेते राजू लाटकर, सभागृह नेते चंद्रकांत घाटगे, परिवहन सभापती अजित पोवार, महिला व बालकल्याण स​भापती लीला धुमाळ यांच्यासह नगरसेवकांनी पालकमंत्री पाटील यांची भेट घेतली.

'जादा गावे, दोन औद्योगिक वसाहतींसह हद्दवाढ मंजूर होणे अशक्य आहे. त्यामुळे शहराच्या हद्दीलगतच्या पाच गावांचा समावेश असलेला नवा प्रस्ताव तयार करावा,' असे पाटील यांनी सुचवले. त्यामुळे हद्दवाढीची गाडी ४२ गावांच्या प्रस्तावावरून घसरून आता पाच गावांवर येऊन ठेपली आहे. १७ गावांच्या प्रस्तावावर निर्णयासाठी १३ वर्षे प्रतीक्षा करावी लागली. आता नव्या प्रस्तावासाठी किती कालावधी लागेल हे सांगता येणे अशक्य आहे.

कोल्हापूर महापालिका स्थापन झाल्यापासून आजतागायत हद्दवाढ झालेली नाही. शहरालगतच्या ४२ गावांसह हद्दवाढ करण्याबाबत राज्य सरकारने १९९२ साली प्रथम प्राथमिक अधिसूचना काढली. मात्र, त्याला सर्व गावांतून विरोध झाला. शहरवासीयांनी हद्दवाढीबाबत कोर्टात दाद मागितली. येथील निर्णय राजकीयदृष्ट्या अडचणीचा ठरणार असे दिसू लागल्यानंतर सरकारने अधिसूचनाच रद्द केली. त्यानंतर २००२ मध्येही १४ गावांचा समावेश करून नवीन प्रस्ताव सरकारकडे सादर केला होता. सरकारने निर्णय घेत हा प्रस्ताव रद्द केला. त्यामुळे पुन्हा हद्दवाढ रखडली आहे.

याबाबत पालकमंत्री म्हणाले, 'हद्दवाढीच्या प्रस्तावाला गावांनी विरोध केल्याने प्रस्ताव रद्द करण्याचा निर्णय घेण्यात आला. एमआयडीसी तसेच दूरची गावे घेतल्यास विरोध होऊन प्रस्ताव कधीच मंजूर होऊ शकणार नाही. ते टाळण्यासाठी प्रस्तावात शहरालगतची पाच गावे घ्यावीत. तो मंजूर होण्यासाठी मी प्रयत्न करेन, पण त्याआधी महापालिकेच्या पदाधिकाऱ्यांनी या गावांमध्ये जाऊन सुविधांबाबत ग्रामस्थांना समजून सांगावे. जेणेकरून त्यांचा विरोध कमी करता येईल.'

पाच गावांसह हद्दवाढ अव्यवहार्य?

पालकमंत्र्यांच्या या आश्वासनामुळे हद्दवाढीच्या आशा पुन्हा पल्लवित झाल्या आहेत. कळंबा, पाचगाव, मोरेवाडी, उचगाव, उजळाईवाडी, सरनोबतवाडी अशा गावांचा हा प्रस्ताव तयार करता येऊ शकतो. पण, एमआयडीसी वगळून हद्दवाढ झाल्यास त्याला काहीच अर्थ राहणार नाही. कराचे उत्पन्न नसल्यास केवळ मोठी गावे घेऊन पोसण्याचा प्रकार होऊ शकतो.

मोबाइल अॅप डाउनलोड करा आणि राहा अपडेट

कोल्हापूरकर आहेत श्रीमंत

0
0

महेश पाटील, कोल्हापूर

कोल्हापूर जिल्ह्याचे दरडोई उत्पन्न राज्याच्या दरडोई उत्पन्नापेक्षा अधिक असल्याचे आर्थिक पाहणी अहवालातून स्पष्ट झाले आहे. यंदा जिल्ह्याचे दरडोई उत्पन्न गेल्या वर्षीच्या तुलनेत १८,११६ रुपयांनी वाढून १,१९,७३८ रुपये झाले आहे. राज्याचे दरडोई उत्पन्न १,१७,०७१ रुपये आहे. शहरांमध्ये मुंबई, ठाणे, पुणे, नागपूर या शहरांपाठोपाठ कोल्हापूरने स्थान राखले आहे.

पाच वर्षे कोल्हापूर जिल्ह्याचे दरडोई उत्पन्न सातत्याने वाढतेच आहे. राज्याला मंदी आणि प्रतिकूल हवामानाचा तडाखा बसल्याचा परिणाम दरडोई उत्पन्नावर झाला आहे. मंदीचे सावट दूर होत असल्याने राज्याच्या आर्थिक वाढीचा वेग वाढल्याचे अहवालात दिसून येते. गेल्या वर्षी कोल्हापूर जिल्ह्याचे दरडोई उत्पन्न १,०१, ६२२ रुपये होते. ते यंदा १, १९, ७३८ रुपये झाले. मुख्याने कृषी आणि औद्योगिक या दोन मुख्य क्षेत्रांच्या जोरावर कोल्हापूरचा विकास सातत्यपूर्ण असल्याचे दिसून येत आहे. मात्र, त्यात आणखी वाढ होण्याची अपेक्षा असल्याचे तज्ज्ञांचे मत आहे.

राज्याचे २०१३-१४ चे दरडोई उत्पन्न १,०३, ९११ रुपयांवरून १, १७, ०९१ रुपयांवर पोहोचले आहे. त्यातही औद्योगिक आणि सेवा क्षेत्राचा वाटा ८८.७ टक्के तर कृषी आणि संलग्न क्षेत्रांचा वाटा ११.३ टक्के इतका आहे. राज्याच्या उत्पन्नात ५.७ टक्के वाढ झाली आहे. राज्याच्या उत्पन्नात मुंबई (२२.१ टक्के), ठाणे (१३.३) पुणे (११.४) या तीन प्रमुख शहरांचा एकत्रित वाटा ४६.८ टक्के आहे. देशाची आर्थिक राजधानी असलेली मुंबई आजही पहिल्या क्रमांकावर आहे. राज्याच्या उत्पन्नापेक्षा दरडोई उत्पन्न जास्त असलेल्या जिल्ह्यांत पुणे, रायगड, नागपूर आणि ठाणे यांच्यासह यंदा कोल्हापूरचाही समावेश झाला आहे. ऊस उत्पादक जिल्हा असलेल्या कोल्हापूरमध्ये सेवा आणि उद्योग क्षेत्राचेही जाळे विस्तारले आहे. कृषी क्षेत्रासह ऑटोमोबाइल, कापड उद्योग, मॅन्युफॅक्चरिंग क्षेत्रातील वाढीमुळे दरडोई उत्पन्नातील वाढ टिकून आहे.

मोबाइल अॅप डाउनलोड करा आणि राहा अपडेट

बँकिंगसाठी मोबाइल व्हॅन

0
0

म. टा. वृत्तसेवा, कुपवाड

अद्यापही ज्या ठिकाणी बँकिंग व्यवस्था पोचलेली नाही, अशा ठिकाणी मोबाइल बँकिंग, एटीएम सुविधा देण्यासाठी सांगली जिल्हा मध्यवर्ती सहकारी बँकेची व्हॅन सज्ज झाली आहे. अशी व्हॅन तयार करणारी सांगली जिल्हा बँक ही पश्चिम महाराष्ट्रातील पहिली बँक असल्याची माहिती प्रशासक शैलेश कोतमिरे यांनी शुक्रवारी दिली.

केंद्र सरकारच्या अर्थिक समावेशीकरण योजनेत अर्थिकदृष्ट्या दुर्बल घटकांची बचत खाती उघडणे, त्यांना कर्जाची सुविधा, विमा सेवा, आधुनिक तंत्रप्रणालीची बँकिंग सुविधा उपलब्ध करून देणे या बाबींचा समावेश आहे. हाच उद्देश ठेवून सांगली बँकेने मोबाईल बँकिंग सुविधा देणारी व्हॅन सेवेत दाखल केली आहे. ही व्हॅन गावोगावी जाणार असून, प्रत्येक आठवड्याचे वेळापत्रक तयार करण्यात आले आहे. वातानुकुलीत असलेल्या या व्हॅनमध्ये नियमित बँकिंग व्यवहारासाठी काऊंटरची व्यवस्था आहे. पैसे काढणे, पैसे भरणे, रक्कम वर्ग करता येणार आहेत. या मशिनची ऑपरेटिंग सिस्टिम ही प्रामुख्याने कार्ड स्वाईप करुन किंवा बायोमेट्रीक फिंगर प्रेसद्वारे चालवली जाणार आहे. याचा फायदा ग्रामीण भागातील अल्पशिक्षित, अशिक्षित लोकांना अधिक होणार आहे. व्हॅनमधील बँकिंग सॉप्टवेअर मुख्यालयातील सर्व्हशी जोडलेले असणार आहे. विकास संस्था, सहकारी संस्थांच्या सभासद, संचालकांना, कर्मचाऱ्यांना प्रत्यक्ष जागेवर जावून प्रशिक्षण देण्याबरोबरच मेळावे, ग्रामसभा, अर्थिक मेळावे घेण्यासाठीची सुविधाही या व्हॅनमध्ये उपलब्ध आहे. गाडीच्या सुरक्षेसाठी जीपीएस तंत्राचा वापर करण्यात आला असून, सीसीटिव्ही कॅमेरेही बसविण्यात आले आहेत.

मोबाइल अॅप डाउनलोड करा आणि राहा अपडेट

साताऱ्यात हापूस ६५० रुपये डझन

0
0

म. टा. वृत्तसेवा, सातारा

वर्षभरापासून फळांच्या राजाची आतुरतेने वाट पाहणाऱ्या शौकिनांची इच्छा आज पूर्ण झाली. साताऱ्याच्या बाजारात कोकणच्या राजाचे ६०० बॉक्स दाखल झाले आहेत. साडेपाचशे ते साडेसहाशे रुपये डझन दराने हापूस विकला जात आहे. हापूसचा भाव सर्वसामान्यांच्या आवाक्यात येण्यासाठी मात्र एप्रिलच्या पहिल्या आठवड्यापर्यंत वाट पाहवी लागणार आहे. कोकणातील पहिला आंबा मुंबईच्या बाजारपेठेत पाठवला जातो. सुरुवातीला आंब्याचा भाव कडक असल्याने साताऱ्यातील काही व्यापारी किरकोळ स्वरूपात मुंबईत खरेदी करून साताऱ्यात आंबा आणतात; परंतु खऱ्या अर्थाने पाडव्याच्या मुहूर्तावर कोकणातून आंब्याची आवक सुरू होते.

सीझनचा पहिला आंबा खाणाऱ्या शौकिनांच्या आज हापूसच्या बॉक्सवर अक्षरश: उड्या पडल्या. कृषी उत्पन्न बाजार समितीमधील आंब्याचे ठोक व्यापारी फारुख व इरफान बागवान यांच्याकडे देवगड व वेंगुर्ला येथून हापूसचे ६०० बॉक्स दाखल झाले. एक व दोन डझनच्या बॉक्सच्या किमती अनुक्रमे ५५० ते ६५० व ९०० ते १२०० इतकी होती. सुरुवातीला फळांची आवक कमी असल्याने दर काहीसा कडक आहे. बेंगळुरू व कर्नाटकातून फळाची आवक वाढल्यानंतर साधारण एप्रिलच्या पहिल्या आठवड्यात हापूसचा दर आवाक्यात येईल, असे असलम बागवान यांनी सांगितले.

उत्पादन घटले

मध्यंतरी थंडीत झालेल्या चढउतारामुळे मोहरावर परिणाम झाला होता. त्यातच अवकाळी पावसामुळे फळाचे मोठे नुकसान झाले. त्यामुळे गेल्या वर्षीच्या तुलनेत ३० टक्केच आंब्याचे पीक मिळेल, असे कोकणातील शेतकऱ्यांचे म्हणणे आहे.

मोबाइल अॅप डाउनलोड करा आणि राहा अपडेट

माणगंगा होणार बारमाही

0
0

म. टा. वृत्तसेवा, सातारा

पावसाळा वगळता इतरवेळी कोरडी असणारी माणगंगा नदी जलयुक्त शिवार योजनेमुळे बारमाही वाहती होणार आहे. या नदीच्या पुनरुज्जीवनाचा प्रकल्प हाती घेण्यात आलेला आहे. ३२ नवीन बंधाऱ्यांसह जुन्या बंधाऱ्यांची भक्कम दुरुस्ती केली जाणार आहे.

माणगंगा नदी पावसाळ्यातील काही दिवस वगळता वर्षभर कोरडीच असते. या नदीला वाहते केल्यास माण तालुक्यातील अर्थकारणाला चालना मिळेल. तसेच येथील दुष्काळ कायमस्वरूपी मिटण्यास मदत होईल, या उद्देशाने माणगंगा नदी पुनरुज्जीवन प्रकल्प हाती घेण्यात आला. या प्रकल्पासाठी स्थानिक तज्ज्ञांची समिती स्थापन करण्यात आली आहे. प्रकल्पासाठी मोठ्या कंपन्यांकडून (सीएसआर) निधी मिळविण्याचे प्रयत्न जिल्हा प्रशासनाने सुरू केले आहेत. त्यानुसार जिल्ह्यातील तीन ते चार कंपन्यांकडून मदत मिळण्याची शक्यता आहे. दरम्यान, राज्य सरकारने जिल्ह्यात जलयुक्त शिवार अभियान राबविण्यास सुरवात केली आहे. या अभियानाचा आधार माणगंगा पुनरुज्जीवन प्रकल्पाला मिळाला आहे. या अभियानातून माणगंगा नदीत ३२ नवीन बंधारे बांधले जाणार आहेत, तसेच १३ जुन्या बंधाऱ्यांची दुरुस्ती होईल. यातून पावसाळ्यात वाहून जाणारे पाणी बंधाऱ्यात आडेल आणि माणगंगा नदी बारमाही वाहती होईल. माणगंगा वाहती झाल्यास एकूणच माण तालुक्यामया अर्थकारणाला चालना मिळणार असून, निसर्ग संपदा, पाणीटंचाई आणि गेली अनेक वर्षे पडीक असलेली शेती पुन्हा हिरवीगार होण्यास मदत होणार आहे. माण तालुक्याच्या आर्थिक विकासाला या नदीच्या पुनरुज्जीवनामुळे चालना मिळणार आहे.

अशी आहे माणगंगा नदी

एकूण लांबी ४३ किलोमीटर

उगमस्थान कुळकजाई (ता. माण)

संगम ठिकाण : सरकोळी

एकूण सिमेंट साखळी बंधारे ४२

नवीन होणारे बंधारे ३२

जुन्या १३ बंधाऱ्यांची दुरुस्ती

मोबाइल अॅप डाउनलोड करा आणि राहा अपडेट

‘जीएम’ बियाण्यांच्या चाचण्या थांबविणार नाही

0
0

म. टा. वृत्तसेवा, कुपवाड

जी. एम. बियाण्यांच्या (जणूक बदलेल्या बियाण्यांच्या) चाचण्या कोणत्याही परिस्थितीत थांबवल्या जाणार नाहीत, असे स्पष्ट आश्वासन केंद्रीय पर्यावरण, जंगल आणि वातावरण बदल मंत्री प्रकाश जावडेकर यांनी शरद जोशी प्रणीत शेतकरी संघटनेच्या शिष्टमंडळास दिले. शेतकरी संघटनेचे प्रमुख कार्यकर्ते अजित नरदे, प्रा. डॉ. मानवेंद्र वाचोळे व संजय पानसे यांनी नुकतीच जावडेकर यांची भेट घेऊन जी. एम. बियाण्यांच्या चाचण्यांबाबत सविस्तर चर्चा केली त्यावेळी हे आश्वासन देण्यात आले.

केंद्रीय पर्यावरण मंत्रालयाने मंत्री जावडेकर व शेतकरी संघटनेच्या या शिष्टमंडळाची खास भेट घडवून आणली. स्वदेशी जागरण मंच व भारतीय किसान सभा यांनी जी. एम. पिकाबाबत उपस्थित केलेल्या आक्षेपांवर शेतकरी संघटना व तज्ज्ञांनी सविस्तर उत्तरे मंत्री जावडेकर यांनी यावेळी जाणून घेतली. या बाबत जावडेकर यांनी समाधान व्यक्त करीत कोणत्याही परिस्थित जी. एम. बियाण्यांच्या तपासण्या थांबवल्या जाणार नाहीत, असे आश्वासन दिले.

सांगली, पुणे व जळगाव येथे झालेल्या कृषी प्रदर्शनातही शेतकरी संघटनेचे खास स्टॉल उभारून जी. एम. पिकाबाबत शेतकऱ्यांची मते जाणून घेतली. ही माहितीही जावडेकर यांना देण्यात आली. या प्रदर्शनात या बाबत आपली मते मांडताना ९९ टक्केश शेतकऱ्यांनी जी. एम. पिकाबाबत पाठिंबा व्यक्त केल्याचा दावा केला. शंका व्यक्त केलेल्या एक टक्का शेतकऱ्यांशीही चर्चा केल्यानंतर बहुतेक शेतकऱ्यांनी जी. एम. तंत्रज्ञान हवे या बाबतच्या निवेदनावर सह्या केल्या आहेत.

हजारो शेतकऱ्यांच्या सह्यांचे जी. एम. च्या मागणीचे निवेदनही यावेळी मंत्री जावडेकर यांना देण्यात आले. सांगली शेतकरी संघटनेच्या कार्यालयात आयोजित बैठकीत ही माहिती देण्यात आली. शेतकरी संघटनेचे अजित नरदे, युवा आघाडी प्रदेशाध्यक्ष संजय कोले, जिल्हाध्यक्ष शितल राजोबा, रावसाहेब दळवी, आण्णा पाटील यांच्यासह शेतकरी संघटनेचे पदाधिकारी या वेळी उपस्थित होते.

मोबाइल अॅप डाउनलोड करा आणि राहा अपडेट

१५० कोटींच्या वसुलीचे आदेश

0
0

म. टा. वृत्तसेवा, सांगली

सांगली जिल्ह्यातील २८ औद्योगिक व १० प्रक्रिया सहकारी संस्थांकडे १५० कोटी रुपयांहून अधिक थकबाकी आहे. ती कायदेशीर मार्गाने वसूल करा, असा आदेश विभागीय सहकारी निबंधक राजेंद्रकुमार दराडे यांनी दिले आहेत. सहकार खात्याच्या आढावा बैठकीत बोलताना अधिकाऱ्यांना त्यांनी हा आदेश दिला.

या १५० कोटीत शेअर्स, तसेच अर्थसहाय्याचा अंतर्भाव आहे. यातील काही संस्था प्रत्यक्षात सुरू आहेत. तर काही कागदोपत्रीच सुरू असल्याचे दाखविण्यात आले आहे. विशेष म्हणजे बहुतांशी संस्था या काँग्रेस-राष्ट्रवादी पक्षाच्या कार्यकर्त्यांच्याच आहेत.

दराडे म्हणाले, 'वास्तविक सरकारने चांगल्या हेतूने या विविध संस्थांना अर्थसहाय्य दिले आहे. पण, दुर्दैवाने त्यात अपप्रवृत्ती शिरल्याने सर्व संस्था व सदर योजना बदनाम झाली आहे. पण, यापुढे स्वस्थ बसून चालणार नाही. वसुलीसाठी कडक कारवाईची पावले उचलायलाच हवीत. म्हणून सर्व अधिकार व कायदा वापरून ही थकबाकी वसूल करा.'

मोबाइल अॅप डाउनलोड करा आणि राहा अपडेट


शहीद सूरज मोहिते अनंतात विलीन

0
0

म. टा. वृत्तसेवा, सातारा

'शहीद जवान सुरज माहिते अमर रहे.., जब तक सुरज-चांद रहेगा... सुरज तेरा नाम अमर रहेगा.., भारत माता की जय.., वंदे मातरम्.., पाकिस्तान मुर्दाबाद.., या गगभेदी घोषणांमध्ये हजारोंच्या उपस्थितीत शहीद जवान सूरज सर्जेराव मोहिते यांच्यावर वाईत कृष्णाकाठावर सरकारी इतमामात अंत्यसंस्कार करण्यात आले.

जवान सूरज मोहिते जम्मू-काश्मीरमध्ये झालेल्या दहशतवादी हल्यात शहीद झाले होते. मागील दोन दिवस त्यांच्या कुटुंबीय, वाई तालुक्यातील नागरीक पार्थिवाच्या प्रतिक्षेत होते. दरम्यान पार्थिव रविवारी सकाळी दहा वाजता त्यांच्या मूळ गावी गणेशवाडी (सरताळे ता. जावली) येथे आणण्यात आले. तिथे ग्रामस्थांनी अंत्यदर्शन घेतल्यानतंर सकाळी बारा वाजता सिद्धनाथवाडीच्या निवासस्थानी यांचे पार्थिव आणले.

येथील राहत्याघरी पार्थिव दर्शनासाठी ठेवण्यात आले. आई , बहीण, भाऊ, चुलते व नातेवाईकांचा आक्रोश हृदय पिळवटून टाकणारा होता. आईच्या आक्रोशाने उपस्थित जनसमुदायाचे मन हेलावून गेले. त्यानंतर नागरिकांनी अंतदर्शन घेतले. त्यानंतर अंत्ययात्रेसाठी फुलांनी सजविलेल्या रथातून दुपारी अंत्ययात्रा काढली. त्यानंतर कृष्णाकाठावर अंत्यविधी करण्यात आले. मोठा भाऊ जीवन सर्जेराव मोहिते यांनी अग्नि दिला. केंद्रीय राखीव पोलिस दलाच्या वतीने बंदुकीच्या फैरी झाडून सूरजला सलामी देण्यात आली. त्यानंतर सातारा जिल्हा पोलिस दलाच्या वतीने फैरी झाडून सलामी देण्यात आली. या वेळी सीआरपीएफच्या पुणे रेंजचे डी. आय. जी. सुशिलकुमार पर्थ, डेप्युटी कंमाडर तरूणकुमार सोलंकी, असि. कंमाडर दिनेश चंद्रा यांच्यासह जिल्ह्याचे पालकमंत्री विजय शिवतारे, आमदार मकरंद पाटील, आमदार देवयानी फरांदे, जिल्हाधिकारी अश्विन मुद्गल, प्रमुख अधीक्षक डॉ. अभिनव देशमुख, वाईचे प्रांतांधिकारी रवींद्र खेबुडकर आदींनी श्रद्धाजंली वाहिली.

पंचवीस हजार नागरिक उपस्थित

सूरज मोहिते पाकिस्तान सीमेवर दहशतवाद्यांनी घडवून आणलेल्या बॉबस्फोटामध्ये शुक्रवारी हुतात्मा झाला होता. अंत्यविधीसाठी पंचवीस हजार नागरीक उपस्थित होते. वाई शहरातून अंत्ययात्रा काढताना सर्व चौकात पार्थिवावर पुष्पवृष्टी करण्यात आली. वाईत नागरीकांनी उस्फृर्तपणे बंद पाळला. प्रत्येक चौकात श्रद्धांजलीचे प्लेक्स लावण्यात आले होते. येथील खरात कुटुंबीयांनी मोहिते यांचे सर्व पाहुण्यांची व्यवस्था आणि अंत्यविधीचे नियोजन केले.

मोबाइल अॅप डाउनलोड करा आणि राहा अपडेट

पडताळणीचे ‘वारे’ जैसे थे

0
0

म. टा. प्रतिनिधी, कोल्हापूर

विभागीय जाती प्रमाणपत्र पडताळणी कार्यालयाचे उपायुक्त सुनील वारे यांना निलंबित करण्यात आले. अधिकारी निलंबित झाले असले तरी प्रलंबित प्रकरणे जैसे थे आहेत. तीन हजारांहून अधिक प्रकरणे प्रलंबित आहे. या वर्षीही विद्यार्थ्यांना प्रमाणपत्रासाठी टांगती तलवार आहे. कार्यालयातील अन्य काही अधिकारी, लिपिक, पंटर आणि प्रमाणपत्र मिळवून देणाऱ्या विविध संघटनाच्या टोळ्यांचा बंदोबस्तही आवश्यक आहे. सारे कार्यालय सीसीटिव्हीच्या नजरेखाली असूनही लाच दिल्याशिवाय प्रमाणपत्र मिळत नसल्याचा अनुभव अनेकांना आहे.

लाचलुचपत विभागाच्या जाळ्यात 'सापडला तर चोर... नाहीतर संन्यासी' अशी स्थिती या कार्यालयात आहे. कार्यालयीन कामकाजात बेजबाबदारपणा असा ठपका ठेवत सामाजिक न्याय व विशेष सहाय्य विभागाने निलंबनाची कारवाई केली. वारें यांच्यासह काही अधिकारी, लिपिक, शिपाई, रोजंदारी कर्मचारी यांच्याबाबतही उमेदवारांनी तक्रारी केल्या आहेत. वारेंवर झालेल्या कारवाई सोबत या भ्रष्टाचाराला खतपाणी घालणाऱ्या या घटकांवर कारवाई अपेक्षित आहे. येत्या शैक्षणिक वर्षात विद्यार्थ्यांच्यासाठी कास्ट व्हॅलिडिटी अत्यावश्यक आहे. प्रमाणपत्र नसल्याने अनेक विद्यार्थ्यांचे शैक्षणिक नुकसान झाले आहे. कोल्हापूर, सांगली आणि सातारा या तीन जिल्ह्यातील माहे डिसेंबर २०१४ पर्यंत तीन हजार प्रकरणे प्रलंबित आहेत. यात एक हजार प्रकरणे विद्यार्थ्यांची आहेत. तीन हजार प्रकरणांचा दक्षता पथकाने अहवाल दिला आहे. मात्र अजूनही समितीने निर्णय दिलेला नाही. सेवा प्रकारातील प्रकरणांच्या पूर्ततेसाठी अनेकदा उमेदवारांना हेलपाटे मारावे लागतात. तीन महिन्यापूर्वी दक्षता पथकाचे पोलिस निरीक्षक दिलीप बामणेला लाचलुचपत प्रतिबंधक विभागाने ताब्यात घेतले. त्यालाही विभागाने निलंबित केले.

बोगस दाखल्यांच्या तक्रारी

समितीकडून बोगस दाखले दिले जात असल्याची तक्रार काही उमेदवारांनी पोलिसांत दाखल केली होती. त्यानुसार अध्यक्ष, सदस्य सचिव आणि सदस्यांची चौकशी सुरु झाली. त्यांच्या सहीचे नमुनेही घेण्यात आले. प्रमाणपत्रे मिळवून देण्यात कार्यालयातील काही अधिकारी आणि कर्मचारी यांचा सहभाग आहे. बार्टीचे अध्यक्ष डॉ. डी. आर. परिहार यांनी वारे यांना यापूर्वीही निलंबित केले होते. कार्यालयातील काहींच्या कामकाजाबाबत अजूनही तक्रारी आहेत, या तक्रारींची शहानिशा करुन सामाजिक न्याय व विशेष सहाय्य विभागाकडून कारवाईची गरज आहे.

पण काम होणार का?

कार्यालयातील अनेक अधिकारी, कर्मचारी यांची बदली किंवा निलंबित केले जातात. मात्र प्रलंबित प्रकरणांचा आकडा वाढतच आहे. मार्च अखेर तीन हजार प्रकरणे प्रलंबित आहेत. दक्षता पथकाने अहवाल देऊनही अनेकांना सुनावणीची पत्रे दिलेले नाहीत. कार्यालयातील काही लिपिकांच्याकडून सुनावणीची पत्रे देण्यासाठी टाळाटाळ केली जात आहे. तर समितीचे अध्यक्ष, सदस्य सचिव आणि सदस्य तीनही अधिकार्यांनी आठवड्यातील किमान चार दिवस पूर्णवेळ कामकाज करण्याची गरज आहे.

ऑनलाइन यंत्रणेचे तीन-तेरा

भ्रष्टाचार रोखण्यासाठी उमेदवारांच्याकडून जात प्रमाणपत्रासाठी ऑनलाइन अर्ज मागविण्यात आले. मात्र या अर्जात अनेक चुका असल्याचे एसएमएस उमेदवारांना पाठविण्यात आले. अर्जाची तपासणी, अपुरी कागदपत्रे, दक्षता पथकाचा अहवाल आदी टप्प्यावर लुबाडणूक केली जात असल्याच्या तक्रारी उमेदवारांनी बार्टीकडे केल्या आहेत.

मोबाइल अॅप डाउनलोड करा आणि राहा अपडेट

भाजीपाल्याच्या दरात वाढ

0
0

म. टा. प्रतिनिधी, कोल्हापूर

उन्हाची तीव्रता वाढू लागल्याने सर्वच फळांची आवक आणि मागणीमध्ये प्रचंड वाढ झाली आहे. द्राक्षे, कलिंगड, पपई, चिकू व टरबूजच्या स्टॉल्समुळे आठवडी बाजारपेठांना बहर आला आहे. सोलापूर, मिरज, बेळगाव व नगर जिल्ह्यातून तैवानी पपईची मोठ्या प्रमाणात आवक झाली आहे. पपईच्या स्टॉल्समुळे आठवडा बाजारपेठांसह शहरातील मुख्य चौकांना पिवळाधम्मक रंग आला आहे. फळांची मागणी वाढली असली, तरी दर सर्वसामान्यांच्या आवाक्यात आहेत. मात्र भाजीपाल्याचे भाव या आठवड्यातही वधारलेलेच आहेत.

मार्चच्या पहिल्या आठवड्यापासून उन्हाच्या झळा वाढल्या आहेत. उन्हाच्या तीव्रतेपासून सुटका करण्यासाठी नागरिक विविध मार्गाचा अवलंब करत आहेत. डॉक्टरांच्या सल्ल्यानुसार या कालावधीत फळाचे सेवन जास्त केले जात आहे. याच हंगामात विविध फळांची आवक जास्त होत असते.

यामुळे द्राक्षे, कलिंगड, पपई, टरबूज, बहरातील संत्री आणि मोसंबी खरेदीसाठी ग्राहकांची गर्दी होत आहे. साधारणत: पपईची आवक एप्रिल-मे या कालावधीत मोठ्या प्रमाणात होत असते. मात्र यावर्षी मार्चच्या पहिल्या आठवड्यापासून पपईची आवक होऊ लागली आहे.

कोल्हापूर शेती उत्पन्न बाजार समितीमध्ये दररोज ११३ ते १२० बॉक्स पपईची आवक होत असून सरासरी ५० ते १५० रुपयांचा

भाव मिळत आहे. मात्र, किरकोळ बाजारात एका पपईचा दर ४० ते ५० रुपयांपर्यंत गेला आहे.

भाज्यांच्या दरात वाढच

गेल्या आठवड्यापासून फळभाज्यांची आणि भाजीपाल्यांची आवक स्थिर असूनही दरात वाढ झाली आहे. त्यामुळे वांगी, टोमॅटोचा अपवाद वगळता सर्वच भाजीपाल्याच्या दरात वाढच झाली आहे. दोडका, भेंडी, गवार, काकडी, मिरचीचा दर सरासरी ५० ते ६० रुपये किलोपर्यंत पोहोचला आहे. तर पोकळा, मेथी, चाकवत, पालकच्या दोन जुडी सरासरी १५ ते २० रुपयांपर्यंत पोहोचला आहे.



फळे (दर प्रतिकिलो, रुपयांत)

संत्री - ३०

द्राक्षे - ५०

सफरचंद - १२०

मोसंबी - ३०

चिकू - ४०

भाजीपाला

वांगी - २०

दोडका - ५०

भेंडी - ५०

गवार - ८०

मिरची - ५०

टोमॅटो - १५

डाळी...

तुरडाळ - ९०

मसूरडाळ - ७५

मूगडाळ - १२०

डाळींचे दर वाढले

सर्वच डाळींच्या दरामध्ये सरासरी दोन ते पाच रुपयांची वाढ झाली आहे. दरात जरी वाढ झाली असली तरी मागणीमध्ये फारशी वाढ झालेली नाही. भाजीपाल्यांची आवक जास्त असल्याने कडधान्ये व डाळी खरेदी करण्याकडे ग्राहकांचा फारसा कल दिसत नाही. अवकाळी पाऊस आणि बदलत्या हवामानाचा परिणाम झाल्याने धान्य उत्पादनाला फटका बसला आहे. त्यातून दरवाढ होत असल्याचे दिसून येते.

मोबाइल अॅप डाउनलोड करा आणि राहा अपडेट

शिक्षण आमच्या हक्काचे पण...

0
0

शांताराम पाटील, गारगोटी

सर्व शिक्षा अभियान अंतर्गत समाजातील प्रत्येक घटकापर्यंत शिक्षण पोहचावे यासाठी केंद्र आणि राज्य सरकार कोट्यवधी रुपये खर्ची घालत आहे. मात्र साखर हंगाम सुरु झाल्यापासून केवळ कोल्हापूर जिल्ह्यात परजिल्ह्यातून ऊस तोडणीसाठी आलेल्या ऊसतोड कामगारांची हजारो मुले शिक्षणाच्या प्रवाहापासून दूर राहिली आहेत. त्यामुळे कोयत्याच्या पोटी जन्माला आलेल्या दुसऱ्या पिढीने हातात कोयताच घ्यायचा काय असा प्रश्न उपस्थित होत आहे. या मुलांच्या शिक्षणाबद्दल सरकारसह या मुलांचे पालक देखील उदासीन असल्याचे चित्र आहे.

कोल्हापूर जिल्हा हा राज्यातील सधन जिल्हा म्हणून ओळखला जातो. या जिल्ह्यात ऊस हे प्रमुख पिक आहे. त्यामुळे एकट्या कोल्हापूर जिल्ह्यात सहकार आणि खासगी तत्वावरील २१ साखर कारखाने कार्यरत आहेत. या कारखान्यांचा हंगाम आक्टोंबर ते एप्रिल या महिन्यांच्या दरम्यान असतो. या काळात जिल्ह्यातील कारखान्यांना ऊस पुरवठा करण्यासाठी बीड, उस्मानाबाद, नगर आदी जिल्ह्यांसह विदर्भ, मराठवाड्यातून मोठ्या प्रमाणात ऊसतोड कामगार दाखल होतात. जिल्ह्यातील प्रत्येक साखर कारखान्याला त्या कारखान्याच्या गाळप क्षमतेनुसार ऊस पुरवठा करण्यासाठी २०० ते १००० कुटुंबे कारखाना कार्यक्षेत्रात दाखल होतात. सरासरी एका कारखान्याला ६०० कुटुंबे धरल्यास १२००० ते १५००० कुटुंबे जिल्ह्यात ऊस तोडण्यासाठी येतात. प्रत्येक कुटुंबात शाळा योग्य अशी दोन ते तीन मुले आढळून येतात. तर १८ ते २३ वयोगटातील एखाद - दुसरा युवक सुध्दा हातात कोयता घेऊन आढळतो. शिक्षण योग्य मुलांची संख्या या ऊसतोड कामगारांच्या कुटुंबात पाहिल्यास सुमारे ३० ते ३५ हजार मुले एकट्या कोल्हापूर जिल्ह्यात या साखर हंगामाच्या काळात शिक्षणापासून दूर राहिल्याचे विदारक चित्र आहे.

यापूर्वी या ऊसतोड कामगारांच्या मुलांना शिक्षणाच्या प्रवाहात आणण्यासाठी साखर शाळांच्या सारखा अभिनव प्रयोग सरकारने केला मात्र या साखर शाळा सुध्दा आता बंद झाल्या आहेत. या मुलांच्या पालकांना सुध्दा पोटापाण्याच्या पलिकडे जावून मुलांच्या शिक्षणाची काळजी असल्याचे दिसत नाही. या मुलांना आपण भविष्यात त्यांना हातात कोयता धरण्यासाठीच जन्माला घातल्याची मानसिकता दिसत आहे. शिक्षणाच्या प्रवाहात मुले यावीत यासाठी सरकार मध्यान्ह भोजन, शाळेच्या ठिकाणी मुलांना पोहचण्यासाठी मोफत एसटी पास, सायकली, मोफत वह्या - पुस्तके आदी उपक्रम राबवत आहे. पण, ऊसतोड कामगारांची मुले शिक्षण प्रवाहात यावीत यासाठी काहीच उपाययोजना करताना दिसत नाही.

सरकारने या उसतोड कामगारांच्या मुलांना शिक्षण प्रवाहात आणण्यासाठी मुलांच्या पालकांचे प्रबोधन करणे व या मुलांच्या शिक्षणासाठी ठोस आराखडा तयार करण्याची गरज आहे. अन्यथा प्रत्येक वर्षी शिक्षण प्रवाहाबाहेर राहणाऱ्या मुलांच्या संख्येत वाढच होताना दिसेल.

आरोग्याचा प्रश्न

उसतोड कामगारांचा दिवस पहाटे पाच वाजता सुरु होतो व उस वाहतूक करणाऱ्या वाहनाच्या वेळेवर मावळतो. या काळात मुले उसाच्या पालात खेळताना आढळून येतात. त्यांच्या अंगावर मळकट कपडे किंवा अंगावर कपडेच नसल्याचेच चित्र असते. पालकांना यांच्या खाण्यापिण्याकडे सुध्दा लक्ष देण्यास वेळ नसतो. त्यामुळे या मुलांची आंघोळ व आजारपण तर दूरचीच गोष्ट. परिणामी या पालकांच्या दुर्लक्षामुळे मुलांच्या आरोग्याचा प्रश्न देखील गंभीर असल्याचे दिसते.

मोबाइल अॅप डाउनलोड करा आणि राहा अपडेट

पाटणे फाट्यावर व्यवहार सुरळीत

0
0

म. टा. वृत्तसेवा चंदगड

हलकर्णी (ता. चंदगड) एमआयडीसीतील एव्हीएच कंपनीला तालुक्यातील जनतेचा तीव्र विरोध आहे. याला न जुमानता कंपनीने उत्पादन सुरु ठेवल्याने लोकांना भावना तीव्र झाल्याने संतप्त जमावाकडून ७ मार्च रोजी कंपनीची व कार्यालयाची मोडतोड करुन जाळपोळ केली. त्यानंतर चार दिवस पाटणे फाट्यावरील व्यवहार बंद होते. त्यानंतर व्यवहार सुरु झाले.

मात्र घटनेला आज तब्बल सोळा दिवस उलटले तरी पाटणे फाटा व एव्हीएच कंपनीच्या परिसरातील बंदोबस्त मात्र कायम आहे. जाळपोळीची आग विझली, मात्र लोकांच्या मनातील धग कायम असल्याने पुन्हा अशी घटना होवू नये यासाठी पोलिस बंदोबस्त कायम आहे.

गेल्या तीन वर्षापासून एव्हीएच कंपनीच्या विरोधात जनआंदोलन कृती समितीच्या वतीने वेळोवेळी आंदोलने, मोर्चे, सुरुच आहेत. मात्र कंपनीकडून त्याला प्रतिसाद मिळाला नाही. त्यामुळे लोकांच्या मनात अंसतोष खदखदत होता. फेब्रुवारीच्या शेवटच्या आठवड्यात कंपनीला `कंन्सेट टू ऑपरेट` या तत्वावर कंपनीला उत्पादनाला परवानगी देण्यात आली. त्यावेळी लोक खडबडून जागे झाले. शांततेच्या मार्गाने सरकारकडे आपल्या भावना कळविण्यासाठी मोर्चे, आंदोलने, कँडल मार्च, भजन, गुलाबपुष्प असे अनेक मार्ग अवलंबिले. मात्र सरकारी पातळीवर केवळ आश्वासनांच्या पलिकडे जावून प्रत्यक्ष कृती होत नसल्याने प्रदूषण नियंत्रण मंडळाचे अधिकारी तपासणीसाठी आल्याचे निमित्त झाले.

यावेळी लोकभावना तीव्र होवून संतप्त जमावाने एव्हीएचची व कार्यालयाची तोडफोड करुन जाळपोळ केली. यावेळी आंदोलक व पोलिसांमध्येही झटापट झाली. यावेळी पोलिस कुमक कमी पडल्याने जमावाला शांत करता आले नाही. कंपनी विरोधात लोकांच्या भावना तीव्र आहेत. हे लक्षात घेवून असा प्रकार पुन्हा होवू नये, यासाठी खबरदारी म्हणून पोलिस बंदोबस्त कायम ठेवण्यात आला आहे. घटनास्थळी राज्य राखीव पोलिस दल, दंगल नियंत्रण पथक व पोलिस बंदोबस्त आहे.

मोबाइल अॅप डाउनलोड करा आणि राहा अपडेट

परप्रांतीय युवकाचा इचलकरंजीत खून

0
0

म. टा. वृत्तसेवा, इचलकरंजी

हातकणंगले तालुक्यातील कबनूरनजीक रुई रस्त्यावर लक्ष्मी मंदिराजवळ एका परप्रांतीय युवकाचा खून करण्यात आल्याचा प्रकार उघडकीस आला. शनिवारी मध्यरात्रीच्या सुमारास ही घटना घडली. राजकुमार रामपाल सरोजा (वय २५, रा.लक्ष्मीमाळ, घोगरे मळा, कबनूर) असे त्याचे नाव आहे. याप्रकरणी शिवाजीनगर पोलिस ठाण्यात नोंद झाली आहे.

राजकुमार सरोजा हा मूळचा उत्तर प्रदेश येथील सुनाहार या गावचा रहिवाशी आहे. तो तीन वर्षांपासून घुगरे मळा येथील मुसाक खान यांच्या ग्रेनाईड कारखान्यात काम करीत होता. कारखान्यानजीकच एका खोलीत तो राहण्यास होता. शनिवारी रात्री तो ऊरुस पाहण्यासाठी गेला होता. मध्यरात्रीच्या सुमारास कबनूर-रुई रस्त्यावर रस्त्याकडेला रक्ताच्या थारोळ्यात त्याचा मृतदेह पडल्याचे आढळून आले. ही माहिती शिवाजीनगर पोलिसांना दिल्यानंतर पोलिसांनी घटनास्थळी येऊन पाहणी केली. त्याच्या डोक्यात दगड घातल्यामुळे तो जागीच गतप्राण झाल्याचे निदर्शनास आले. रविवारी(ता.२२) दुपारी राजकुमार याचा मृतदेह शिवाजीनगर पोलिसांनी नातेवाईकांच्या ताब्यात दिला.

मोबाइल अॅप डाउनलोड करा आणि राहा अपडेट

टोलनाके उद्या बंद पाडणार

0
0

म. टा. प्रतिनिधी, कोल्हापूर

आश्वासने दिलेल्या सरकारला जाग आणण्याबरोबरच टोलमुक्त महाराष्ट्रासाठी राष्ट्रवादी युवक काँग्रेसच्यावतीने मंगळवारी (२४ मार्च) शहरातील सर्व टोल नाके बंद करण्यात येणार आहेत. आंदोलन रोखण्याचा प्रयत्न केल्यास जशास तसे उत्तर दिले जाईल, असा इशारा राष्ट्रवादी युवक काँग्रेसच्या शहर व ग्रामीणमधील प्रमुख कार्यकर्त्यांच्या रविवारी झालेल्या बैठकीत देण्यात आला. अध्यक्षस्थानी शहर अध्यक्ष आदिल फरास होते.

केंद्र व राज्य सरकारने आतापर्यंत कोणतेही आश्वासन पूर्ण केलेले नाही. सरकारला जाग आणण्यासाठी प्रदेश युवकचे अध्यक्ष उमेश पाटील यांच्या नेतृत्वाखाली मंगळवारी सकाळी अकरा ते दुपारी दोन पर्यंत एकाचवेळी राज्यात सर्व टोल नाके बंद पाडण्यात येणार आहेत. याबाबत फरास यांनी सांगितले की, 'येथील टोलच्या प्रश्नावर साडेचार वर्षे आंदोलन सुरू आहे. जनतेची भावना तीव्र आहे. लोकसभा व विधानसभा निवडणुकीत भाजपच्या नेत्यांनी सत्तेवर आल्यानंतर १०० दिवसात टोल रद्द करु अशी घोषणा केली होती. कोल्हापूरच नव्हे राज्य टोलमुक्त करु असे आश्वासन दिले होते. त्याबाबत जाग आणण्यासाठी हे आंदोलन करण्यात येणार आहे. काँग्रेस व राष्ट्रवादी सत्तेवर असताना ज्या पद्धतीने टोल नाके आंदोलन केली. त्याप्रमाणे आयआरबीचे टोल नाके बंद पाडण्यासाठी सर्व कार्यकर्त्यांनी ताकदीने उतरण्याची गरज आहे.'

जिल्हा कार्याध्यक्ष प्रदिप पाटील यांनी तालुक्यातील अध्यक्ष, पदाधिकारी व कार्यकर्त्यांनी आयआरबीचे टोल नाके बंद करण्यासाठी शहरात येण्याचे आवाहन केले. तसेच शिये टोल नाक्याची जबाबदारी घेत असल्याचे सांगितले. युवक सरचिटणीस अमित डोंगरसाने यांनी आर. के. नगर, फुलेवाडी टोल नाक्याची युवराज साळोखे, अमित पाटील, योगेश इंगवले यांनी जबाबदारी घेतली. वाशी येथे जाफर मलबारी, हंबीरराव पाटील, सुनिल परीट थांबणार आहेत. तर कळंबा नाक्यावर नितिन मस्के आंदोलन करणार आहेत.

मोबाइल अॅप डाउनलोड करा आणि राहा अपडेट


यूपीएससीत आशेचा किरण

0
0

सचिन यादव, कोल्हापूर

राज्य सरकारने प्री-आयएएस सेंटरच्या कोल्हापूर आणि नागपूर केंद्राला वीस कोटींची तरतूद केली आहे. या तरतुदीमुळे कोल्हापूरच्या सेंटरमध्ये अन्य सोयी सुविधांसह विद्यार्थी प्रवेश क्षमता ८० वरुन १०० होण्याची शक्यता आहे. क्षमता वाढल्यास विद्यार्थ्यांची निवासाची व्यवस्था होण्यासाठी सेंटरला नव्याने प्रस्ताव दाखल करण्याच्या हालचाली सुरु केल्या आहेत. भरघोस निधी मिळाल्याने यूपीएससीत मराठी टक्का आणखी वाढणार आहे. शंभर क्षमता झाल्यास मुंबईनंतरचे दुसरे सेंटर कोल्हापूर ठरणार आहे.

राज्य सरकारने कोल्हापूर आणि नागपूर येथील भारतीय प्रशासकीय सेवा पूर्व प्रशिक्षण केंद्राचे बळकटीकरण करण्याचा निर्णय घेतला. यावर्षी सुमारे वीस कोटी रुपयांची तरतूद करण्यात आली. यूपीएससीची पूर्व परीक्षा उत्तीर्ण होणाऱ्या महाराष्ट्रातील उमेदवारांना मुख्य परीक्षा आणि मुलाखत पूर्व प्रशिक्षणासाठी अर्थसहाय्यही देण्याचा निर्णय घेण्यात आला. प्रत्येक जिल्हा मुख्यालयाच्या ठिकाणी संदर्भ ग्रंथासह अद्यावयत अभ्यासिका स्थापन करण्यात येणार आहे. राजाराम कॉलेज परिसर कॅम्पसमधील प्री-आयएएस सेंटरमध्ये सध्या ७६ विद्यार्थी यूपीएससीचा अभ्यास करीत आहेत. यात ३२ मुली आणि ४४ मुले आहेत. लेक्चर हॉल, कंम्प्युटर, रिडिंग हॉलची सुविधा आहे. सुमारे नऊ हजार पुस्तके ग्रंथालयात उपलब्ध आहेत. एन्ट्रन्स परीक्षा घेऊन प्री-आयएएस सेंटरमध्ये प्रवेश निश्चित केला जातो. दरवर्षी या केंद्रात प्रवेश मिळविण्यासाठी दोन हजार विद्यार्थी एन्ट्रस देतात. या वर्षी ८० वरुन १०० प्रवेश संख्या झाल्यास अधिकाधिक उमेदवारांना लाभ मिळणार आहे. शिक्षण घेत असलेल्या विद्यार्थ्यांना प्रति महिना दोन हजार रुपये विद्यावेतन दिले जाते. निधी मिळाल्यास विद्यावेतनातही वाढ शक्य आहे.

निधी मंजूर झाल्याने केंद्रात निवासाच्या व्यवस्थेसाठी अतिरिक्त मजला शक्य आहे. केंद्रात आणखी दर्जेदार सुविधा आणि अध्यापनाचा दर्जा, ग्रुप डिस्कशन वाढल्यास पूर्व परीक्षा, मुख्य परीक्षा, मुलाखत या तीनही टप्प्यापर्यंतचा लाभ विद्यार्थ्यांना होऊ शकतो. दरवर्षी यूपीएसएसीत झेंडा फडविणाऱ्या मराठी मुलांचा टक्का आणखीन वाढणार आहे.

वीस विद्यार्थी क्षमता वाढीचा प्रस्ताव दिला आहे. सध्या केंद्रात ७६ विद्यार्थ्यांची निवासाची आणि प्रशिक्षणाची सुविधा उपलब्ध आहे. राज्य सरकारने केलेल्या तरतूदीच्या विनियोगाची कोणतेही आदेश अद्याप नाहीत. अत्याधुनिक आणि वाढीव सुविधांसाठी आग्रही आहोत. आदेश मिळाल्यानंतर तातडीने सुविधांची कार्यवाही केली जाईल.

सुनेत्रा महाराज-पाटील, संचालिका, प्री-आयएएस सेंटर

केंद्र विद्यार्थी क्षमता

मुंबई १००

कोल्हापूर ८०

नागपूर ८०

औरंगाबाद ८०

नाशिक ७०

अमरावती ७०

मोबाइल अॅप डाउनलोड करा आणि राहा अपडेट

संघाच्या मुख्यालयावर मोर्चा

0
0

म. टा. प्रतिनिधी, कोल्हापूर

कॉम्रेड शहीद गोविंदराव पानसरे आणि नरेंद्र दाभालेकर यांच्या हत्येचे मास्टर माइंड पकडण्यासाठी सर्व पुरोगामी संघटनाच्या वतीने आठ एप्रिल रोजी नागपुरात राष्ट्रीय स्वयंसेवक संघाच्या मुख्यालयावर मोर्चा काढण्यात येणार आहे. मुख्यमंत्री देवेंद्र फडवणीस यांच्या घरावरही मोर्चा काढून सुस्त सरकारला जाग आणण्याचे काम केले जाईल. मंगळवारी (ता. २४ मार्च) सनातन प्रभात संस्थेच्या कार्यालयावर मोर्चा काढण्याचा निर्धार समता परिषदेत करण्यात आला. भारतीय कम्युनिस्ट पक्षातर्फे रविवारी राजर्षी शाहू स्मारक भवनात समता परिषदे झाली. सहिष्णू, धर्मनिरपेक्ष, लोकशाहीवादी व्यक्ती, संघटना, पक्षांनी सहभागी होण्याचे आवाहन करण्यात आले. परिषदेच्या अध्यक्षस्थानी तानाजी ठोंबरे होते.

अंधश्रद्धा निर्मूलन समितीचे कार्याध्यक्ष अविनाश पाटील म्हणाले, 'नरेंद्र दाभोलकर आणि अॅड गोविंदराव पानसरे यांनी विवेकवाद प्रत्येकांत निर्माण करण्याचा प्रयत्न केला. नव्या पिढीने परिवर्तनवादी आणि पुरोगामी विचार पुढे नेण्याची गरज आहे. विवेकवादी विचार रुजण्यासाठी रचनात्मक कृती कार्यक्रमाची गरज आहे. गट-तट विसरुन सर्वच पुरोगामी संघटनांनी एकत्र येऊन जातीय शक्तीच्या विरोधात लढा दिला पाहिजे.

अजित अभ्यंकर म्हणाले, 'पानसरे आणि दाभोलकर यांच्या खुनाचा अद्याप तपास लागलेला नाही. निष्क्रिय सरकारला तपास करण्यात अनेक अडथळे येत आहेत. या पाठीमागे एक विशेष यंत्रणा कार्यरत असल्याचा संशय व्यक्त होत आहे.'

अध्यक्ष तानाजी ठोंबरे म्हणाले, 'भांडवल आणि मनुवादाच्या विरोधात लढण्याची वेळ आली आहे. विचारांचे हत्यार घेऊन जातीयवादी सरकारशी लढा देण्याची गरज आहे. सरकारला मारेकरी दिसत नाहीत. पानसरेंच्या खूनाप्रकरणी पोलिस महासंचालकांना जबाबदार धरले पाहिजे. धर्माचा आधार घेऊन राष्ट्रीय स्वयंसेवक संघ सर्वसामान्याची फसवणूक करीत आहे. तरुणांनी वेळीच शहाणे होण्याची गरज आहे.'

स्मिता पानसरे म्हणाल्या, 'पुरोगामी चळवळीचा लढा हा पुढे तीव्रपणे सुरू ठेवला पाहिजे. यात तरुण पिढीचा सहभाग महत्वाचा आहे.'

यावेळी डॉ. भारत पाटणकर, उदय नारकर, सुनील स्वामी, व्यंकाप्पा भोसले, शेतकरी कामगार पक्षाचे भारत पाटील, जनता दलाचे शिवाजीराव परुळेकर, धनाजी गुरव यांनी मनोगत व्यक्त केले. अनिल चव्हाण यांनी सूत्रसंचालन केले. परिषेदच्या ठिकाणी मोठा पोलिस बंदोबस्तही ठेवण्यात आला.

पालकमंत्र्यांवर टिकेची झोड

ज्येष्ठ साहित्यिक बाबूराव गुरव आणि अध्यक्ष तानाजी ठोंबरे यांनी भाषणात पालकमंत्री चंद्रकांत पाटील यांच्यावर टिकेची झोड उठवली. ते म्हणाले, 'पानसरे यांचा खून इस्टेटीसाठी, ट्रेड युनियनच्या वादातून झाल्याचे पालकमंत्री चंद्रकांत पाटील सांगतात. मुख्यमंत्री देंव्रेद फडवणीस यांच्या विचारांमध्ये मंत्री पाटील यांनी सूर मिसळायला नको होता. पाटील यांना किमान पानसरे यांच्या विचारांची उंची समजायला हवी होती. जातीयवादी शक्तींच्या शेळ्यांना शिंगे आली आहेत. ही लवकरच काढली जातील', असा टोलाही दोघांनी लगाविला. कॉम्रेड अतुल दिघे म्हणाले, 'पुरोगामींचा वारसा सांगणाऱ्या रामदास आठवलेंनी जातीयवादी शक्तींची पालखी सोडावी. खासदार राजू शेट्टी यांनीही मनुवादी विचार सोडावेत.'

मोबाइल अॅप डाउनलोड करा आणि राहा अपडेट

कर्नल नलवडेंना युद्धसेवा पदक

0
0


म. टा. प्रतिनिधी, कोल्हापूर

कोल्हापूरचे कर्नल मिलन नलवडे यांना लष्करातील मानाचे युद्धसेवा पदक उधमपूर येथे झालेल्या एका शानदार समारंभात आर्मी नॉर्दन कमांडचे कमांडर जनरल डी. एन. हुडा यांचे हस्ते प्रदान करण्यात आले. नलवडे कुटुंब हे हनीमनाळ (ता. गडहिंग्लज) असून मिलन यांचे आजोबा व वडील हे सैन्यदलात होते.

मीलन यांचे शिक्षण सेवंथ डे अॅडवांटिस्ट स्कूल येथे झाले. नॅशनल डिफेन्स अकॅडमी येथे तीन वर्षाच्या खडतर प्रशिक्षणानंतर भारतीय सैन्य दलात प्रथम क्रमांकाने स्वोर्ड ऑफ ऑनर आणि गोल्ड मेडल ही दोन्ही पथके एकत्रित १९९६ मध्ये पटकावली. कर्नल नलवडे यांनी नऊ पॅरा कमांडोंमध्ये सेवारत असताना जखमी अवस्थेत कारगिल युध्दात अतिरेक्यांनी बंदी केलेल्या कैद्यांची सुटका केली.

याबद्दल त्यांना दोनवेळा सेना मेडल देऊन गौरव केला आहे. त्यांची अफ्रिकेत पाठवलेल्या शांतीसेनेत युनोतर्फे नेमणूक झाली होती. मिलन यांचे वडील कर्नल विनायक नलवडे हे १९९१ निवृत्त झाले असून मिलनच्या योगदानाबद्दल त्यांना सार्थ अभिमान आहे. नलवडे कुटुंबीयांनी लढवय्या परंपरा अबाधित ठेवली आहे.

मोबाइल अॅप डाउनलोड करा आणि राहा अपडेट

मनपात भ्रष्टाचार जोरात

0
0


म. टा. प्रतिनिधी, कोल्हापूर

नगरसेवक पदावर कार्यरत असताना सदस्यांना महापालिकेच्या कुठल्याही कामाचा ठेका घेता येत नाही. प्रकल्पात भागीदार बनता येत नाही. मात्र कायद्यातील पळवाटा शोधत महापालिकेतील अनेक सदस्यांनी 'मैं नही तो तू सही'च्या वृत्तीने जवळच्या लोकांना कामे मिळवून दिली आहेत. यामध्ये नगरसेवकासहित आजी-माजी पदाधिकाऱ्यांचा देखील समावेश आहे. कधी कायदेशीर बाबींना बगल देत, तर कधी सर्व नियमांना धाब्यावर बसवित त्यांनी बगलबच्च्यांना ठेका मिळवून दिला आहे. प्रकल्पाचा ठेका दुसऱ्याच्या नावे, आणि त्यामध्ये वाटा नगरसेवकांचा ही वस्तुस्थिती आहे.

महापालिकेच्या मान्यतेने शहरात विविध प्रकल्प सुरू आहेत. राज्य आणि केंद्र सरकारच्या निधीसह महापालिकेनेही या प्रकल्पात स्व हिस्सा गुं​तविला आहे. स्टार्म वॉटर, जैव वैद्यकीय कचरा, पार्किंग, बोटिंग, विद्युत दिव्यांची देखभाल आणि दुरुस्ती, रस्ते निर्मिती अशा कामांचा यामध्ये समावेश आहे. पार्किंग प्रकरणात महापालिकेला ६० लाखाचा फटका बसला आहे. रितसर निविदा न काढता पार्किंगचा ठेका दिला. महापालिकेच्या नावानी बोगस तिकीटे छापून पे अँड पार्किंगमधून पैसे हडपल्याचा प्रकार ताजा आहे. ठेकेदार कंपनीचा पत्ता लागत नाही अशी स्थिती आहे.

शहरातील विद्युत दिव्यांची देखभाल आणि दुरुस्तीसाठी पुण्यातील कंपनीला ठेका दिला होता. मात्र कंपनीचे काम पहिल्यापासूनच वादग्रस्त ठरले. कंपनीने महापालिकेचा कुठलाही करार पाळला नाही. नियमानुसार काम केले नाही. आघाडीतील एका स्थायी सदस्याशी या कंपनीचा संबंध असल्याची चर्चा महापालिका चौकात केली जाते. दोनच दिवसापूर्वी उद्घाटन झालेल्या आणि कार्यक्रम पत्रिकेवरून मानापमान नाट्य घडलेल्या बोटिंगचा ठेका सुध्दा काँग्रेसच्या नगरसेवकांशी संबंधित व्यक्तीला दिला आहे. नाव दुसऱ्याचे, मालकी नगरसेवकाची असा प्रकार यामध्ये घडला आहे.

स्टॉर्म वॉटर प्रकल्पाशी तर माजी महापौरांच्या पतीचे नाव जोडले जाते. नगरोत्थान योजनेतंर्गत शहरात रस्त्याची कामे सुरू आहेत. त्यापैकी एका ठेकेदार कंपनी एका नगरसेवकांशी संबंधित आहे. नगरसेवकपदाचा वापर करायचा, यंत्रणेवर वचक ठेवायचे आणि झटपट कामे करून घ्यायची अशी पध्दत या मंडळीची आहे. शहरातील जैव वैद्यकीय कचरा ठेका प्रकरणात अनेक नगरसेवक एकत्र आले. काही कारभाऱ्यांनी पूर्वीच्या कंपनीचा ठेका रद्द करायला लावला. आणि मर्जीतील कार्यकर्त्याना जैव वैद्यकीय कचरा उठावाचा ठेका मिळवून दिला. महापालिकेच्या शाळेत ई लर्निंग प्रोजेक्ट राबविण्याचे ठरले. शिक्षण मंडळाने निविदा प्रक्रिया राबवण्याचा निर्णय घेतला. अंतिमत : एलईडी प्रोजेक्टर पुरविण्याचा ठेका नगरसेवकाच्या बंधूराजाला मिळाला. एलईडी प्रोजेक्टर मुदतीत उपब्लध पुरवावेत यावरून शिक्षण मंडळ आ​णि ठेकेदारात वाद निर्माण झाला. मात्र ठेका रद्द करण्या व्यतिरिक्त दुसरी कुठली कारवाई झाली नाही.

मोबाइल अॅप डाउनलोड करा आणि राहा अपडेट

राज्यात कोल्हापूर पॅटर्न

0
0


म. टा. वृतसेवा, गारगोटी

चौथी आणि सातवी शिष्यवृत्ती परीक्षा रविवारी (ता. २२) संपूर्ण राज्यात पार पडत आहेत. या परीक्षेत होणारे गैरप्रकार रोखण्यासाठी कोल्हापूर जिल्ह्याच्या पेपर वाटप धोरणानुसार संपूर्ण राज्यातील प्रत्येक जिल्ह्यात त्याच दिवशी पेपर परीक्षा केंद्रावर देण्यात यावेत, अशी विद्यार्थी, शिक्षक, पालक यांच्याकडून मागणी होत होती. याची दखल घेत १३ मार्चच्या 'मटा' च्या मध्ये 'कोल्हापूर पॅटर्नच तारेल' अशी बातमी प्रसिध्द झाली. या बातमीची दखल घेऊन महाराष्ट्र राज्य परीक्षा परिषदेने परीक्षेदिवशीच पेपर सबंधित केंद्रावर पोहचविण्याचे आदेश सर्व जिल्हा परिषदेचे शिक्षणाधिकारी (प्राथमिक), महानगरपालिका व सर्व गटशिक्षणाधिकारी यांना पत्राद्वारे दिले आहेत.

विद्यार्थ्यांच्या आयुष्यातील महत्वाची वर्षे म्हणून चौथी व सातवीची वर्षे ओळखली जातात. या लहान वयात मुलांची शिक्षणातील अभिरुची लक्षात यावी यासाठी शिष्यवृत्ती परीक्षा सुरु केल्या आहेत. मात्र या परीक्षांमध्ये अनेक गैरप्रकार होत असल्याचा आरोप शिक्षक व पालकांचा होता. यात पेपर वाटप धोरणात विसंगतपणा दिसून येत होता. कोल्हापूर जिल्ह्यात येथील प्रशासनाच्या धोरणानुसार परीक्षा दिवशीच पेपर परीक्षा केंद्रावर पोहचविले जात होते. मात्र राज्याच्या इतर जिल्ह्यातील प्रशासन मात्र दोन दिवस अगोदर पेपर केंद्रावर पाठवत होते. या विरोधात कोल्हापूर जिल्ह्याच्या पेपर वाटप धोरणानुसार त्याच दिवशी पेपर इतर जिल्ह्यातही देण्यात यावेत व परीक्षेत होणारे गैरप्रकार टाळावेत अशी मागणी पालक, शिक्षकांमधून होत होती. या संदर्भात 'मटा' मध्ये बातमी प्रसिध्द झाल्यानंतर या वृताची दखल घेत महाराष्ट्र राज्य परीक्षा परिषदेचे आयुक्त व्ही. बी. पायमल यांनी सर्व जिल्हा परिषद शिक्षणाधिकारी, गटशिक्षणाधिकारी याना शिष्यवृत्ती परीक्षेच्या प्रश्नपत्रिका परीक्षेदिवशीच सकाळी केंद्र संचालकाना द्याव्यात, प्रश्न व उत्तरपत्रिकांचा हिशोब काटेकोर केंद्र संचालकांच्याकडून घ्यावा, भरारी पथकाने प्रत्येक केंद्रास भेट द्यावी आदींसह स्मार्टफोन वापरणे, पर्यवेक्षकांची सही आदी सूचना देण्यात आल्या आले. या सूचनांमुळे परीक्षेतील अनेक गैरप्रकार टळतील, असे पालक व शिक्षकांचे म्हणणे आहे.

मोबाइल अॅप डाउनलोड करा आणि राहा अपडेट

Viewing all 37216 articles
Browse latest View live




Latest Images