लायसन्ससह अन्य परवान्यांचे काम थंडावले
म. टा. प्रतिनिधी, कोल्हापूर
दोन महिन्यांच्या ६१ हजार १८९ वीज बिलाच्या थकबाकीमुळे महावितरणने मंगळवारी आरटीओ कार्यालयाचे वीज कनेक्शन तोडले. यामुळे आरटीओ कार्यालयाचे बहुतांश कामकाज ठप्प झाले. कार्यालयाचे ९५ टक्क्यापर्यंत कम्प्युटरायझेशन झालेले असल्याने वीज कनेक्शन पूर्ववत झाल्याशिवाय हे कामकाज सुरु होणार नाही. परिणामी कर भरणा, नवीन वाहनांचे रजिस्ट्रेशन, लायसन्स, अनेक वाहनांचे पासिंग अशा महत्वाच्या कामांवर मोठा परिणाम होणार आहे.
आरटीओ कार्यालयाचे जानेवारी व फेब्रुवारी या दोन महिन्यांचे ६१ हजाराचे वीज बिल होते. त्याबाबत महावितरणने आरटीओ कार्यालयाला ४ मार्च रोजी पैसे भरण्याबाबत नोटीस दिली होती. त्याला आरटीओ कार्यालयाने गेल्या आठवड्यात उत्तर देऊन मुदतवाढ मिळावी म्हणून मागणी केली होती. या पार्श्वभूमीवर मंगळवारी सकाळी अचानक महावितरणने वीज कनेक्शन तोडले. वीज पुरवठा बंद झाल्याने कार्यालयातील कम्प्युटराईज्ड यंत्रणा बंद पडली. सध्या कार्यालयातील ९५ टक्के काम कम्प्युटरवर चालते. कार्यालयाचा जनरेटर आहे. पण त्यावर इतक्या सर्व कम्प्युटरचा लोड घेता येत नाही. त्यामुळे ऑनलाइन यंत्रणेपासून लर्निंग लायसन्सच्या कम्प्युटराईज्ड परीक्षांवर परिणाम झाला. जनरेटरवर काही वेळ त्या यंत्रणा सुरु करण्यात आल्या. दरम्यान, यामुळे बुधवारी आरटीओ कार्यालयात कामासाठी येणार असलेल्या नागरिकांचा खोळंबा होणार आहे.
मुख्य कार्यालयाकडून निधी न आल्याने दोन महिन्यांचे बिल थकले होते. थकबाकीबाबत नोटीस आल्यानंतर ही वस्तुस्थिती मांडून मुदत वाढवून मिळावी म्हणून ११ मार्च रोजी पत्र दिले होते. पण त्याबाबत काहीच चर्चा न करता मंगळवारी थेट कारवाई केली आहे. - लक्ष्मण दराडे, प्रादेशिक परिवहन अधिकारी
मोबाइल अॅप डाउनलोड करा आणि राहा अपडेट