'जगात अन्नधान्याच्या उत्पादनासाठी परागीभवनाच्या प्रक्रियेचे महत्त्व आहे. कीटकांच्या माध्यमातून परागीभवन होत असल्याने कीटक नसते तर मानवाचे अस्तित्वच धोक्यात आले असते,' असे प्रतिपादन राष्ट्रसंत तुकडोजी महाराज नागपूर विद्यापीठातील ज्येष्ठ प्राणिशास्त्रज्ञ डॉ. ए. एम. खुरद यांनी केले.
शिवाजी विद्यापीठाच्या समान संधी कक्षातर्फे आयोजित 'डॉ. आप्पासाहेब तानसेन वरुटे स्मृती व्याख्यानमालेत' 'कीटकांचे अद्भुत विश्व' या विषयावर ते बोलत होते. अध्यक्षस्थानी प्र-कुलगुरू डॉ. अशोक भोईटे होते. शिक्षणशास्त्र अधिविभाग सभागृहात व्याख्यान झाले.
डॉ. खुरद म्हणाले, 'पृथ्वीतलावर सुमारे १.७५ सजीव आहेत. त्यामध्ये १.४ दशलक्ष प्राणी असून, यात सुमारे एक दशलक्ष निव्वळ कीटक आहेत. मानवाची लोकसंख्या साधारणतः सहा ते सात दशलक्षांच्या दरम्यान आहे. कीटकांची संख्या मात्र सरासरी एकरी ४० दशलक्ष इतकी प्रचंड आहे. केवळ एक टक्का कीटक उपद्रवी असतात. मधमाश्या, रेशीमकीडे, लाख अळ्या यांची मानवाला मदत होते. परागीभवन अधिक गतीने कीटकांमार्फतच होते. त्यामुळे कीटकांचे मानवजातीवरील उपकार मोठे आहेत.'
डॉ. एम.एस. पद्मिनी यांनी स्वागत केले. डॉ. प्रतिभा पाटणकर यांनी प्रास्ताविक केले. डॉ. सुप्रिया पाटील यांनी सूत्रसंचालन केले. कुलसचिव डॉ. डी.व्ही. मुळे यांनी आभार मानले.
म. टा. प्रतिनिधी, कोल्हापूर
