म. टा. प्रतिनिधी, कोल्हापूर

भारतीय सण आणि निसर्ग यांचे नाते अधिक दृढ करत महिलांनी संक्रांतीनिमित्त होणाऱ्या हळदीकुंकू समारंभात देण्यात येणारे वाण पर्यावरणपूरक बनवले आहे. यंदा संक्रांतीचे वाण देण्यासाठी महिलांकडून पर्यावरणाला हानी न पोहोचवणाऱ्या वस्तूंना पसंती दिली जात असून महिलांच्या मागणीनुसारच बाजारपेठेत वाण म्हणून प्लास्टिकच्या साहित्याला फाटा दिल्याचे दिसून येत आहे. रोप, कुंडी, कापडी पिशव्या, कागदी लगद्याच्या वस्तू, दागिने, कापडी पर्स अशा वस्तूंची देवाणघेवाण कोल्हापुरात संक्रातीच्या निमित्ताने इकोफ्रेंडली गोडवा पसरवत आहे.

जानेवारी महिन्यात संक्रांतीपासून फेब्रुवारी महिन्यातील रथसप्तमीपर्यंत महिला संक्रातींच्या हळदीकुंकू समारंभाचे आयोजन करतात. यानिमित्ताने एकमेकींना वाण देण्याची पद्धत आहे. आजपर्यंत वाण देण्यासाठी गृहोपयोगी वस्तूंमध्ये स्टील, प्लास्टीकच्या वस्तू खरेदी केल्या जात होत्या. मात्र गेल्या काही वर्षात कोल्हापुरात पर्यावरण जागृती चळवळीला वेग आला आहे. यामध्ये महिलांचा सहभागही वाढत आहे. याच पर्यावरणपूरक मोहिमेचा समावेश कोल्हापुरातील महिलांनी व्यक्तिगत तसेच सामूहिक हळदीकुंकू समारंभात वाण म्हणून पर्यावरणपूरक वस्तू देण्याचे पाऊल उचलले आहे. यंदा हा ट्रेंड चांगलाच लोकप्रिय झाला आहे.

यावर्षी कोल्हापुरातील नर्सरी व्यावसायिकांकडे तुळशी, कोरपड यासह औषधी वनस्पतींची रोपे, तसेच फुलझाडांची रोपे यासाठी मोठ्या संख्येने मागणी नोंदवली जात आहे. अनेक महिला किचन गार्डनिंग, टेरेस गार्डनिंग करत आहेत. त्यामुळे वाण देण्यासाठी विविध आकाराच्या कुंड्याही वाण देण्यासाठी निवडल्या जात आहेत. रोपांसोबत झाडांच्या बियांची पाकिटे, गार्डनिंगसाठी खतांची पॅकेटस यंदा संक्रातवाणच्या यादीत समाविष्ट झाले आहेत. मागणीनुसार शंभर ते दोनशे रोपे देण्यासाठी नर्सरीमध्ये लगबग सुरू झाली आहेत.

प्लास्टिक पिशव्यांना पर्यायी कापडी पिशव्यांमध्ये प्रचंड वैविध्य आले आहे. वाण म्हणून देण्यासाठी अशा पिशव्या मोठ्या संख्येने विकत घेण्यासाठी महिला बचतगटांना काम मिळाले आहे. यामुळे गरजू महिलांना रोजगार मिळाला आहे. छोटी घडी होणाऱ्या पिशव्यांना पसंती मिळत आहे. तसेच भाज्यांसाठी कप्पे असलेल्या कापडी पिशव्यांचीही निवड वाण देण्यासाठी केली जात आहे. पेपरक्विलिंग हा सध्याचा कलात्मक प्रकार संक्रातीच्या वाण यादीत आला आहे. यामध्ये तयार होणाऱ्या दागिन्यांचे सेट संक्रातीच्या वाण संस्कृतीला पर्यावरणपूरक टच देत आहेत. अशा प्रकारचे दागिने बनवणाऱ्या महिलांना सध्या प्रचंड ऑर्डर आहे. कागदाच्या लगद्यापासून बनवलेले कॅसेरोल, पॉट, मूर्ती, वॉलहँगिंग, तोरण वाण म्हणून देताना पर्यावरण जपण्याचा संदेशही दिला जात आहे.

मी यावर्षी संक्रातीचे वाण म्हणून कोरफडीचे रोप कुंडीसह देणार आहे. कोरफडचे औषधी गुण लक्षात घेऊन मी या वाणाची निवड केली आहे. यामुळे हे वाण केवळ एक वस्तू न होता उपयुक्त वनस्पती होईल.

- राधिका कंग्राळकर, नागाळा पार्क

मी कागदापासून वेगवेगळ्या वस्तू बनवते. या वस्तू वाण म्हणून देण्यासाठी उपयुक्त असून यामुळे पर्यावरणाला हानी होत नाही. घर सजावटीसाठी या वस्तू खूप छान असल्यामुळे महिलांकडून विचारणा होत आहे.

- माला पाथरे, कलाकार

लोगो : पृथ्वीरक्षण

म. टा. वृत्तसेवा, गारगोटी

शेतात उसाचा पाला काढत असताना आत लपून बसलेल्या गव्याने अचानक हल्ला केल्याने एरंडपे (ता. भुदरगड) येथील शंकर गणपती बिदरकर (वय ६०) हे गंभीर जखमी झाले. त्यांना उपचारासाठी कोल्हापूरच्या सीपीआर रुग्णालयात दाखल करण्यात आले आहे.

शंकर बिदरकर हे सायकांळच्या म्हारकी नावाच्या शेतात उसाचा पाला काढत असताना शेतात लपून बसलेल्या गव्याने अचानक त्यांच्यावर हल्ला केला. या हल्ल्यात बिदरकर यांच्या डाव्या बरगडीमध्ये शिंग घुसल्याने ते गंभीर जखमी झाले. त्यांनी आरडाओरड केल्यानंतर शेतात काम करणाऱ्या शेतकऱ्यांनी त्यांना वनविभागाचे वनरक्षक अंगज यांच्या गाडीतून गारगोटी रुग्णालयात दाखल केले. तेथे प्राथमिक उपचारानंतर त्यांना पुढील उपचारासाठी सीपीआरमध्ये दाखल करण्यात आले आहे.

प्रकाश कारंडे, निपाणी

सीमाप्रश्न आणि मराठी भाषेविषयी कर्नाटक सरकारचा कोडगेपणा अधिकच ठळक होत चालला आहे. लागोपाठच्या दोन घटनांनी ही बाब ठळक होत आहे. रविवारी इदलगोंड येथे डॉ. श्रीपाल सबनीस यांच्या अध्यक्षतेखाली होणाऱ्या संमेलनासाठी जाणाऱ्या सबनीस यांच्यासह मराठी भाषिकांना रोखण्यात आले. आता निपाणीत १८, १९ जानेवारीला होणाऱ्या मराठी साहित्य संमेलनालाही परवानगी नाकारण्यात आली. बेळगाव जिल्हा पोलिस अधीक्षक लक्ष्मण निम्बर्गी आणि जिल्हाधिकारी एस. आर. बोमनहाळे यांनी संयोजकांना तसे स्पष्टपणे सांगितले आहे.

महाराष्ट्रातील लोक कर्नाटकात येऊन भाषिक तणाव वाढवतात. संमेलन घ्यायचे असेल तर महाराष्ट्राच्या हद्दीत घ्या अन्यथा कर्नाटकातील विचारवंतांना बोलवा, असा अजब सल्लाही संमेलनाचे स्वागताध्यक्ष प्रा. डॉ. अच्युत माने यांना देण्यात आला. त्यामुळे संताप व्यक्त होत आहे.

निपाणीत गेल्या सात वर्षांपासून मराठी साहित्य संमेलन भरवण्यात येते. 'पानिपतकार' विश्वास पाटील यांच्या अध्यक्षतेखाली यंदा ते १८ आणि १९ जानेवारीला राजा शिवछत्रपती सांस्कृतिक भवनात नियोजित आहे. केंद्रीय राज्यमंत्री रामदास आठवले उद्घाटक आहेत. मराठी साहित्य रसिक मंडळातर्फे हे संमेलन होत आहे. साहित्यिक आणि मान्यवरांना त्याची आमंत्रणेही गेली आहे. संमेलन सर्व भाषिकांसाठी असल्याचे संयोजक व मंडळाचे अध्यक्ष प्रा. अच्युत माने यांनी आधीच स्पष्ट केले आहे. संमेलनाची संपूर्ण तयारी झाली आहे. अशा परिस्थितीत सोमवारी अचानक महाराष्ट्रातील विचारवंत कर्नाटकात आणून संमेलन केल्यास आम्ही खपवून घेणार नाही, असा इशारा देत संमेलनाला परवानगी नाकारण्यात आली. जिल्हा पोलिस अधीक्षक निम्बर्गी यांच्यासोबत बेळगावात आयोजकांसोबत बैठक झाली. महिला आणि बाल कल्याण मंत्री निपाणीच्या शशिकला जोल्ले यांच्यासमोरच निम्बर्गी यांच्याशी संयोजकांची खडाजंगी झाली. परवानगी पाहिजे असेल तर निपाणी मंडल पोलिस निरीक्षक संतोष सत्यनायक यांना भेटण्याचा सल्ला देण्यात आला. त्यांना भेटायला गेल्यावर पोलिस प्रमुखांना भेटण्याचा सल्ला देण्यात आला.

.. .. ..

संमेलन होणारच

महाराष्ट्र एकीकरण समिती आणि संमेलन संयोजकांनी रात्रीचा दिवस करून तयारी अंतिम टप्प्यात आणली आहे. परंतु ऐनवेळी परवानगी नाकारल्याने यावर तोडगा म्हणून निपाणीपासून एक किलोमीटरील अंतरावर अर्जुननगर येथील देवचंद कॉलेज येथे किंवा येथील माळावर संमेलन ठरलेल्यावेळी घेण्याचा निर्धार करण्यात आला आहे.

.. .. ..

कोट.. ...

संमेलनाची तयारी पूर्ण झाली आहे. परंतु, जिल्हा पोलिस अधीक्षक व जिल्हाधिकाऱ्यांनी ऐनवेळी संमेलनाला परवानगी नाकारली आहे. ही घटना निषेधार्ह असून मराठीची सरळसरळ गळचेपी आहे.

प्रा. डॉ. अच्युत माने, संमेलनाचे स्वागताध्यक्ष

.. .. ..

सिंगल फोटो

Satish.ghatage@timesgroup.com

Tweet: satishgMT

कोल्हापूर

गोकुळच्या निवडणुकीत सत्ताधारी संचालक मंडळाची मदार आमदार पी.एन. पाटील यांच्यावर असताना विरोधी गटाकडून त्यांना आपल्या बाजूने खेचण्यासाठी जोरदार मोर्चेबांधणी सुरू आहे. पी.एन. पाटील यांचा कौल निर्णायक ठरणार असल्याने त्यांच्या भूमिकेला महत्व प्राप्त झाले आहे.

गोकुळ निवडणुकीच्या अनुषंगाने सत्ताधारी संचालक मंडळाकडून जोरदार प्रयत्न सुरू आहेत. संचालक मंडळाकडून जास्तीत जास्त ठराव गोळा केले जात असताना विरोधी आमदार सतेज पाटील गटाकडूनही जोरदार मोर्चेबांधणी सुरू आहे. गोकुळचे नेतृत्व माजी आमदार महादेवराव महाडिक आणि पी.एन. पाटील करत आहेत. लोकसभा आणि विधानसभा निवडणुकीतील दारुण पराभवानंतर महाडिक गटाची शेवटची मदार गोकुळवर टिकून आहे. तर महाडिक गटाकडून गोकुळ आपल्या ताब्यात घेण्यासाठी सतेज पाटील यांनी जोरदार प्रयत्न सुरू केले आहेत. यापूर्वी गोकुळच्या निवडणूकीत महादेवराव महाडिक यांचा शब्द अंतिम असायचा. पण गेल्या पाच वर्षात जिल्ह्यातील राजकारणात पुलाखालून बरेच पाणी वाहून गेल्याने महाडिक यांनी गोकुळच्या निवडणुकीत पी.एन. यांचे नेतृत्व जवळजवळ मान्य केले आहे.

महाडिक गटाविरोधात लोकसभा आणि विधानसभा निवडणुकीत आमदार हसन मुश्रीफ, सतेज पाटील आणि खासदार संजय मंडलिक यांनी जोरदार मोर्चेबांधणी करत विजयश्री खेचून आणली. त्यांचा फॉर्म्युला यशस्वी ठरला असल्याने गोकुळच्या निवडणुकीतही या त्रिमूर्तीकडून प्रबळ पॅनेल उभारणीसाठी आखणी केली जात आहे. विधानसभा निवडणूकीत भाजप शिवसेना महायुतीच्या विरोधात काँग्रेस राष्ट्रवादी एकत्र आल्याने जिल्ह्याच्या राजकारणातून भाजप सत्तेतून हद्दपार झाला तर शिवसेनेच्या पाच आमदारांचा पराभव झाला असून एकमेव आमदार निवडून आला आहे. राज्यात शिवसेना, राष्ट्रवादी आणि काँग्रेस महाआघाडीची सत्ता स्थापन झाल्याने जिल्हा परिषदेत महाआघाडीची सत्ता स्थापन झाली आहे. हाच फॉर्म्युला कायम ठेवत जिल्हा बँक आणि गोकुळची निवडणूक लढवण्याची रणनिती आखली जात आहे.

जिल्हा बँकेची निवडणूक बिनविरोध करावी, असे आवाहन केल्यानंतर गोकुळची निवडणूकही बिनविरोध करावी अशी मागणी पी.एन. पाटील गटाकडून होत आहे. पी.एन आणि मुश्रीफांची मुंबईत एक बैठक झाली असून पुढील आठवड्यात दुसरी बैठक होणार आहे. पण मुश्रीफ यांनी गोकुळच्या निवडणूकीत सतेज पाटील आणि पी.एन. यांना एकत्र घेऊन निवडणूक लढण्याची घोषणा केली आहे. त्यामुळे पी.एन. पाटील यांचे गोकुळच्या निवडणुकीत महत्व वाढले आहे. गोकुळचे सर्वाधिक मतदार करवीर आणि राधानगरी तालुक्यात असून पी.एन. यांची भूमिका या निवडणुकीत महत्वाची ठरणार आहे. त्यांच्या गटाचे पाच संचालक आहेत. राज्याच्या मंत्रिमंडळात पी.एन. यांना स्थान मिळाले नसल्याने ते महाडिक गटाकडे झुकले आहेत. पी.एन. हे सत्ताधारी गटासोबतच राहणार असे महाडिक गट छातीठोकपणे सांगत असले तरी या निवडणुकीत उलथापालथ होण्याची शक्यता आहे. गोकुळचे संचालक होण्यासाठी अनेकजण इच्छुक असल्याने निवडणूक बिनविरोध न होता गेल्यावेळप्रमाणेच महाडिक विरुद्ध सतेज पाटील गटात होण्याची शक्यता आहे. त्यामुळे आमदार पी.एन. पाटील आपल्या बाजूने असावेत यासाठी दोन्ही गटांकडून प्रयत्न केले जात आहे.

...

दोन्ही गट पैरा फेडणार?

विधानसभा निवडणुकीत गट तट विसरुन काँग्रेस एकत्र राहिल्याने जिल्ह्यात चार आमदार निवडून आले. पी.एन., सतेज पाटील, मुश्रीफांनी एकमेकांच्या विधानसभा क्षेत्रात सभा घेतल्या. पी.एन. पाटील गटाच्या संचालकांनी थेट कोल्हापूर दक्षिणमध्ये भाजपचे अमल महाडिक यांच्याविरोधात करवीर तालुक्यातील दूध संस्थांच्या प्रतिनिधींची बैठक घेतली होती. तर दुसरीकडे सतेज पाटील गटाने करवीरमध्ये पी.एन. यांच्या मागे ताकद लावली होती. गगनबावडा तालुक्यात सतेज पाटील गटाच्या दोन्ही जिल्हा परिषद सदस्यांनी पी.एन. यांच्या पारड्यात वजन टाकले होते. त्यामुळे गोकुळच्या निवडणुकीत दोन्ही गट एकमेकांच्या विरोधात लढले तर पैरा फेडण्यासाठी पी.एन आणि सतेज पाटील गटाची एकमेकाला मदत होण्याची शक्यता आहे.

म. टा. प्रतिनिधी, कोल्हापूर

'जिल्हा परिषदेच्या मालकीच्या प्राथमिक शाळेतील शिक्षकांची ऑनलाइन बदली प्रक्रिया रद्द करण्यात येईल,' अशी ग्वाही ग्रामविकासमंत्री हसन मुश्रीफ यांनी कोल्हापुरात दिली. विविध शिक्षक संघटनांच्या पदाधिकाऱ्यांनी त्यांची सर्किट हाऊस येथे भेट घेऊन ऑनलाइन बदली प्रक्रिया रद्द करण्याची मागणी केली.

गेल्या दोन वर्षांपासून राज्यस्तरावरुन जिल्हा परिषदेच्या मालकीच्या प्राथमिक शाळेतील शिक्षकांच्या बदल्या ऑनलाइन पद्धतीने सुरू आहेत. मात्र ऑनलाइन बदली प्रक्रियेस शिक्षकांचा विरोध आहे. विविध शिक्षक संघटनेच्या नेत्यांनी संयुक्तपणे मुश्रीफ यांची भेट घेऊन मागण्यांचे निवेदन दिले. शिक्षक संघाचे राज्याध्यक्ष राजाराम वरुटे, पुरोगामी शिक्षक संघटनेचे राज्याध्यक्ष प्रसाद पाटील, प्राथमिक शिक्षक बँकेचे अध्यक्ष नामदेव रेपे, संभाजी बापट, शिक्षक सेवा संघाचे जिल्हाध्यक्ष दीपक जगदाळे, जयप्रकाश मिरजकर, आनंदा सावर्डेकर आदींच्या नेतृत्वाखालील शिष्टमंडळाने त्यांच्याकडे प्राथमिक शिक्षकांच्या विविध मागण्यांची सोडवणूक करावी, अशी मागणी केली.

यामध्ये 'ऑनलाइन बदली प्रक्रिया रद्द करावी, शिक्षकांच्या बदलीचे अधिकार जिल्हा परिषदेला द्यावेत, एकदा बदली झाल्यास पुन्हा तीन वर्षे बदली करु नये, ज्या शिक्षकांच्या गैरसोयीत बदल्या झाल्या आहेत त्यांना बदली प्रक्रियेत प्राधान्य द्यावे, आपसी बदल्यांना परवानगी मिळावी, पती, पत्नी शिक्षकांची बदली ३० किलोमीटरच्या आत करावी,'अशा मागण्या करण्यात आल्या. शिष्टमंडळात दिलीप पाटील, साहेब शेख, जी. एस. पाटील, अरुण पाटील, राजेंद्र पाटील, बाजीराव कांबळे, रावसाहेब सुतार, प्रशांत पोतदार आदींचा समावेश होता.

म. टा. प्रतिनिधी, कोल्हापूर

नोकरभरती प्रक्रियेत पुनर्वसन कायद्याचा भंग केल्याप्रकरणी जिल्हा दूध उत्पादक संघाच्या (गोकुळ) ताराबाई पार्कातील मुख्य कार्यालय आणि गोकुळ शिरगावमधील दुग्ध प्रक्रिया प्रकल्पाची वीज आणि पाणीपुरवठा तोडण्याचे आदेश अप्पर जिल्हाधिकारी नंदकुमार काटकर यांनी दिले. १ फेब्रुवारी २०२० पासून ही कारवाई करावी, असे आदेशात म्हटले आहे.

गोकुळमध्ये वर्ग तीन आणि चारच्या नोकरभरती प्रक्रियेत प्रकल्पग्रस्त बेरोजगारांना त्यांच्या टक्केवारीनुसार सामावून घेतलेले नाही. त्यामुळे पुनर्वसन कायद्याचा भंग झाला आहे. त्यामुळे ही कारवाई करण्याचा आदेश महावितरण, जलसंपदा आणि महाराष्ट्र औद्योगिक विभागाच्या अधिकाऱ्यांना दिले. या आदेशाची अंमलबजावणी झाल्यास ग्राहकांना दूध विक्री, संकलन आणि वितरणावर परिणाम होणार आहे.

सरकारी, स्थानिक स्वराज्य संस्था, सरकार मदतीच्या संस्था, सहकारी संस्था, साखर कारखाने, सूत गिरण्यांत वर्ग तीन आणि चारच्या एकूण पदांमध्ये पाच टक्के जागेवर प्रकल्पग्रस्त बेरोजगारांना संधी देणे पुनर्वसन कायद्यानुसार बंधनकारक आहे. त्याची अंमलबजावणी करण्यासंबंधीची नोटीस अप्पर जिल्हाधिकाऱ्यांनी दिली होती. या नोटिसीविरोधात गोकुळने हायकोर्टात याचिका दाखल केली. मात्र ती फेटाळली आहे.

.. .. . .

'गोकुळ'चा युक्तिवाद अमान्य

कोणत्याही प्रकारच्या वर्ग तीन, चार भरतीसंबंधी नवा निर्णय घेतलेला नाही. भविष्यात भरती करण्याचा निर्णय झाल्यास पुनर्वसन कायद्यानुसार पाच टक्के कोटा प्रकल्पग्रस्त बेरोजगारांना आरक्षित ठेवून भरतीप्रक्रिया राबवली जाईल. यामुळे कारवाई करू नये, असा युक्तिवाद गोकुळतर्फे करण्यात आला होता. मात्र तो अमान्य करून संघाची वीज आणि पाणी कनेक्शन तोडण्याच्या कारवाईचा आदेश देण्यात आला.

.. .. ..

माहिती देण्यास टाळाटाळ

'गोकुळ'मधील कर्मचाऱ्यांची संख्या, त्यापैकी प्रकल्पग्रस्तांच्या पाच टक्के कोट्यातून नोकरी दिलेल्यांची संख्या देण्याचे आदेश प्रशासनाने दिले होते. वारंवार संधी देऊनही गोकुळच्या कार्यकारी संचालकांनी माहिती देण्यास टाळाटाळ केली. यामुळे कायद्यानुसार प्रकल्पग्रस्तांना पाच टक्याप्रमाणे नोकरी दिली नसल्याचे प्रशासनाच्या निदर्शनास आले.

.. .. ..

गोकुळने पुनर्वसन कायद्याचा भंग केला आहे. नोकरभरतीत पाच टक्के प्रकल्पग्रस्तांना सामावून घेतले नसल्याचे समोर आले आहे. त्यामुळे गोकुळचे वीज, पाणी तोडण्याचे आदेश दिले आहेत.

नंदकुमार काटकर, अप्पर जिल्हाधिकारी

.. .. ..

कोट

प्रशासनाने गोकुळसंबंधी काढलेला आदेश अद्याप मिळालेला नाही. आदेश मिळाल्यानंतर कायदेशीर सल्ला घेऊन पुढील कार्यवाही करू.

रवींद्र आपटे, अध्यक्ष, गोकुळ

.. ..

जि.प. लोगो

म. टा. प्रतिनिधी, कोल्हापूर

जिल्हा परिषदेचे अध्यक्ष बजरंग पाटील यांनी बोलाविलेल्या पहिल्याच आढावा बैठकीवरुन महाविकास आघाडीत वादंग निर्माण झाले. महाविकास आघाडीत सामील कोणत्याच घटकाला बैठकीविषयी पूर्वकल्पना न दिल्यामुळे संबंधितांनी नाराजी व्यक्त केली. उपाध्यक्ष सतीश पाटील, पक्षप्रतोद उमेश आपटे, गटनेते युवराज पाटील, शिवसेनेचे गटनेते हंबीरराव पाटील यांच्यापैकी कोणालाही आढावा बैठकीविषयी कळविले नाही. अन्य पदाधिकाऱ्यांना डावलून अध्यक्षांनी घेतलेली बैठक चर्चेची ठरली.

अध्यक्षांच्या नावावर आणखी कोणी कारभार करणार असेल तर तो खपवून घेणार नाही, अशा भावना जि.प.तील अन्य पदाधिकाऱ्यांनी व्यक्त केल्या. सध्या महाविकास आघाडीचे सदस्य कोकण सहलीवर आहेत. विविध समिती सभापतिपदासाठी १६ जानेवारी रोजी निवडणूक होत आहे. महाविकास आघाडीच्या नेत्यांनी सदस्यांना सहलीवर पाठविले आहे. दुसरीकडे अध्यक्षपदाची सूत्रे हाती घेतल्यानंतर अध्यक्ष पाटील यांनी सोमवारी, सर्व विभागप्रमुखांची बैठक घेतली.

बैठकीत विविध योजनांचा आढावा घेतला. जिल्हा नियोजन समितीकडून उपलब्ध निधी, केंद्र व राज्य सरकारच्या योजना आणि सद्यस्थिती याविषयी माहिती घेतली. मुख्य कार्यकारी अधिकारी अमन मित्तल यांच्यासोबत विविध योजनेविषयी चर्चा केली. याप्रसंगी त्यांनी, 'जिल्हा परिषदेत अधिकाऱ्यांनी परस्पर कामकाज करू नये, सदस्यांना सामावून घ्या. सदस्य हे ग्रामीण भागाचे प्रतिनिधीत्व करतात, त्याचे भान ठेवा' अशा कानपिचक्या अधिकाऱ्यांना दिल्या.

....

पदाधिकाऱ्यांना कल्पना द्यायला हवी

दिल्ली येथे स्वच्छता दर्पण पुरस्कार वितरण सोहळा झाला. देशातील दहा अव्वल जिल्ह्यांमध्ये कोल्हापूरचा समावेश असल्यामुळे स्वच्छता दर्पण देऊन जिल्हा परिषदेचा सन्मान झाला. मात्र या पुरस्कार सोहळ्याविषयी पदाधिकाऱ्यांना कोणतीही कल्पना दिली नाही. पुरस्कार सोहळ्याची माहिती वर्तमानपत्रातून समजली. हा प्रकार योग्य नाही, अशा शब्दांत अध्यक्ष पाटील यांनी नापसंती व्यक्त केली. सीईओ मित्तल यांनी यासंबंधी सर्व अधिकाऱ्यांना सूचना करू, असे सांगितले.

....

मुश्रीफांनी घेतली

सीईओंकडून माहिती

विशेष घटक योजनेतून जिल्ह्यातील विविध गावांना वॉटर एटीएम मंजूर केले आहेत. जिल्हा परिषद सदस्यांना कल्पना न देता परस्पर काही गावांत वॉटर एटीएम मंजूर करण्याचा प्रकार घडला आहे. जिल्हा परिषदेच्या सर्वसाधारण सभेत हा विषय गाजला होता. स्थानिक राजकारणामुळे ठिकठिकाणी वॉटर एटीएम सुरू नाहीत. मात्र ठेकेदाराला बहुतांश रक्कम दिली आहे. महाविकास आघाडी सत्तेवर आल्यानंतर भाजप आघाडीच्या कालावधीतील हा विषय पुन्हा ऐरणीवर आला आहे. मुश्रीफ यांनी वॉटर एटीएमप्रश्नी सीईओ मित्तल यांच्याकडे विचारणा केली.

म. टा. वृत्तसेवा, कागल

सरकारने थकबाकी कर्जदारांना जाहीर केलेल्या कर्जमाफीमुळे सर्वसामान्य व प्रामाणिक कर्जदार शेतकरी वंचित राहत असल्याने दोन लाखांची केलेली कर्जमाफी ही चुकीची आहे. सरसकट कर्जमाफी करावी; अन्यथा सेवा संस्था सुरू करू देणार नाही, अशी भूमिका गलगले (ता. कागल) येथील सोसायटीच्या कर्जदार शेतकऱ्यांनी व्यक्त केली आहे. राम विकास सेवा संस्था व दत्त विकास सेवा संस्था यांना यावेळी टाळे ठोकण्यात आले. संस्थेचे सचिव बाळकृष्ण बांबरे, बशीर नदाफ यांना यासंदर्भातील निवेदन देण्यात आले.

सरकारच्या यापूर्वी झालेल्या कर्जमाफीमध्ये नियमित कर्जफेड करणारा शेतकरी वंचित राहिल्याने सर्वसामान्य शेतकऱ्यांमध्ये तीव्र संताप व्यक्त होत आहे. त्यामुळे सरकारने ताबडतोब सरसकट कर्जमाफी करावी अशी मागणी सेवा संस्थांचे पदाधिकारी, सभासद, कर्जदारांमधून जोर धरत आहे. जोपर्यंत शासन सरसकट कर्जमाफी जाहीर करून न्याय देत नाही, तोपर्यंत सेवा संस्थांची कुलूपे न उघडण्याची भूमिका सभासदांनी घेतली आहे.

यावेळी डी. पी. पाटील, काका पाटील, मारुती मगदूम, दामू बांबरे, बाळासाहेब पाटील, आबासो पाटील, मनोहर पाटील, आनंदा देशमुख, अभय कुलकर्णी, गणपती जाधव, आश्रम पठाण, साताप्पा कांबळे, शिवाजी स्वामी, चंद्रकांत पाटील, सर्जेराव घोरपडे, युवराज पाटील, सागर मांगले, चंद्रकांत पाटील आदी उपस्थित होते.

फोटो ओळी

गलगले (ता. कागल) येथील सेवा संस्थांना टाळे ठोकताना कर्जदार शेतकरी.

म. टा. प्रतिनिधी, कोल्हापूर

'सोनिया गांधी यांच्या नावाने शपथ घेणाऱ्या मुलाबद्दल हिंदूहृदयसम्राट बाळासाहेब ठाकरे यांना काय वाटत असेल?' अशा शब्दांत भाजप प्रदेशाध्यक्ष चंद्रकांत पाटील यांनी मुख्यमंत्री उद्धव ठाकरे यांच्यावर टीका केली. मंत्र्यांच्या गाडीचे टायर बदलण्यापूर्वी हे सरकार बदलेल, असा विश्वासही त्यांनी व्यक्त केला. भाजप महानगरअध्यक्ष निवड प्रक्रियेवेळी उपस्थित कार्यकर्त्यांना मार्गदर्शन करताना त्यांनी मुख्यमंत्री ठाकरे, राष्ट्रवादीचे अध्यक्ष शरद पवार यांच्यावर टीका केली.

विधानसभा निवडणुकीत भाजप आणि शिवसेनेने एकत्रित निवडणूक लढवून बहुमत मिळवले होते, याकडे लक्ष वेधत प्रदेशाध्यक्ष पाटील यांनी शिवसेना, काँग्रेस, राष्ट्रवादीने अनैतिक युती करुन सरकार स्थापन केल्याची टीका केली. ते म्हणाले, 'एकत्रित निवडणूक लढवताना शिवसेनेने युतीला मतदान मागितले होते. युतीचा जाहीरनामा प्रसिद्ध केला होता. पंतप्रधान नरेंद्र मोदींच्या नावे मते मागितली होती. पण निवडणुकीनंतर ज्यांच्या विरोधात मते मागितली त्यांच्याबरोबर सत्ता स्थापन केली.' ठाकरे जरी मुख्यमंत्री असले तरी शरद पवारच निर्णय घेतात, असा दावा पाटील यांनी केला. माजी मुख्यमंत्री पृथ्वीराज चव्हाण यांना सुट्टी द्यायची, भास्कर जाधव, तानाजी सावंत यांना मंत्रिमंडळात घ्यायचे नाही. सर्वाधिक निधी असणारी खाती राष्ट्रवादीकडे तर कमी निधी असणारी खाती शिवसेना आणि काँग्रेसला दिली आहेत, याकडे त्यांनी लक्ष वेधले.

राज्याच्या निवडणुकीत शरद पवारांना आजअखेर कधीही शंभर आमदार निवडून आणता आले नाहीत, अशी टीका त्यांनी केली. भाजपने २०१४ मध्ये १२१ तर २०१९ मध्ये १०५ आमदार निवडून आणले आहेत. रात्रीनंतर दिवस येत असतो. त्यामुळे राज्यात पुन्हा भाजपचे सरकार येणार आहे. भाजप कार्यकर्त्यांनी सरकारच्या विरोधात रस्त्यांवर संघर्ष करावा, असे आवाहनही पाटील यांनी केले.

...

चौकटी आहेत...

म. टा. प्रतिनिधी, कोल्हापूर

भाजप महानगर अध्यक्षपदी राहुल चिकाडे यांची निवड करण्यात आली. निवडणुकीसाठी एकच अर्ज आल्याने चिकोडे यांची निवड झाल्याची घोषणा निवडणूक अधिकारी अॅड भरत पाटील यांनी केली. त्यांच्या निवडीबद्दल प्रदेशाध्यक्ष चंद्रकांत पाटील, प्रदेश निवडणूक अधिकारी माजी आमदार सुरेश हाळवकर, माजी खासदार धनंजय महाडिक, पश्चिम महाराष्ट्र देवस्थान समिती अध्यक्ष महेश जाधव यांनी अभिनंदनपर भाषणे करुन शुभेच्छा दिल्या.

महानगर अध्यक्षपदासाठी चिकोडे यांचे नाव उत्तरेश्वर मंडल अध्यक्ष भरत काळे यांनी सुचवले तर लक्ष्मीपुरी मंडल अध्यक्ष विवेक कुलकर्णी यांनी अनुमोदन दिले. अध्यक्ष निवडीनंतर चिकोडे यांना प्रदेशाध्यक्ष पाटील यांनी पुष्पहार घालून अभिनंदन केले. सत्काराला उत्तर देताना नुतन अध्यक्ष चिकोडे यांनी आगामी महानगरपालिका निवडणुकीत पदाधिकारी आणि कार्यकर्त्यांच्या मदतीने भाजपचा झेंडा फडकवण्याचा विश्वास व्यक्त केला. 'राज्यातील महाआघाडीचे सरकार थोडेच दिवस सत्तेवर राहणार असून या सरकारच्याविरोधात रस्त्यावर उतरुन संघर्ष केला जाईल. त्यासाठी कार्यकर्त्यांनी साथ द्यावी', असे आवाहन केले.

दरम्यान, आज, मंगळवारी ग्रामीण जिल्हाध्यक्षपदाची निवड होणार असून शाहू साखर कारखान्याचे अध्यक्ष समरजीत घाटगे यांची या पदावर निवड होण्याची शक्यता आहे. यावेळी सरचिटणीस विजय जाधव, अशोक देसाई, सुभाष रामुगडे, दिलीप मैत्राणी, महानगरपालिका विरोधी पक्षनेता विजय सूर्यवंशी यांच्यासह नगरसेवक, पदाधिकारी, कार्यकर्ते उपस्थित होते.

....

ढासळलेले घरही उभे राहील

विधानसभा निवडणुकीत भाजपचा पराभव झाला असला तरी खचून जायचे नाही, असे सांगून पाटील यांनी कार्यकर्त्यांना प्रोत्साहित केले. भाजपचे घर ढासळले असले तरी माजी खासदार धनंजय महाडिक, आमदार विनय कोरे, प्रकाश आवाडे निश्चयापासून न ढळल्याबद्दल त्यांनी कौतुक केले. यापुढे सर्वांच्या सहकार्याने सर्व निवडणूका चढवण्याचा निश्चय त्यांनी केला.

...

महाडिकांकडून मोर्चाची घोषणा

राज्य सरकारची कर्जमाफी फसवी असून सरसकट कर्जमाफीसाठी २६ जानेवरीनंतर राज्य सरकारच्या विरोधात शेतकऱ्यांचा मोर्चा काढण्याची घोषणा प्रदेश उपाध्यक्ष माजी खासदार धनंजय महाडिक यांनी केली. महाडिकांची फौज लढणारी असून खासदार नसतानाही बाजारात आपली जास्त किंमत असल्याचा दावा त्यांनी केला.

...

दादांचे प्रेम कमी पडल्याने पराभव

प्रदेशाध्यक्ष पाटील यांनी थोडे प्रेम दिले असते तर माझा पराभव झाला नसता, अशी खंत माजी आमदार सुरेश हाळवणकर यांनी व्यक्त केली. पाटील यांनी कोल्हापूरला भरभरुन दिले पण इचलकरंजीकडे थोडे लक्ष द्यायला हवे होते, असे मतही त्यांनी व्यक्त केले.

...

म. टा. प्रतिनिधी, कोल्हापूर

नर्सरी बागेतील राजर्षी शाहू समाधीस्थळाच्या लोकार्पण सोहळ्याला गुरुवारपासून (ता. १६) सुरुवात होणार आहे. रविवारी (ता. १९) मुख्य कार्यक्रमापूर्वी चार दिवस विविध कार्यक्रमाचे आयोजन केले आहे. शहरवासियांना सोहळ्याची माहिती होण्यासाठी संपूर्ण शहरात होर्डिंग्ज लावण्याचा निर्णय स्थायी समिती सभागृहात पदाधिकारी व समाधी समितीच्या झालेल्या आढावा बैठकीत घेण्यात आला. त्यानंतर सर्वांनी समाधीस्थळाची पाहणी केली. महापौर अॅड. सूरमंजिरी लाटकर व आयुक्त डॉ. मल्लिनाथ कलशेट्टी यांच्या प्रमुख उपस्थितीत सोमवारी आढावा बैठक पार पडली.

महापौर अॅड. लाटकर म्हणाल्या, 'चार दिवसांमध्ये विविध कार्यक्रमाचे नियोजन केले आहे. त्याची जबाबदारी प्रत्येक विभागप्रमुखांवर दिली आहे. त्याप्रमाणे कामकाजाला सुरुवात करुन लोकार्पण सोहळा लोकत्सव साजरा करुया. त्यासाठी तालीम संस्था, युवक मंडळे व नागरिकांनी सहभागी व्हावे.'

आयुक्त डॉ. कलशेट्टी म्हणाले, 'समाधीस्थळी मंडप उभारणीचे काम सुरू आहे. शहरवासियांना कार्यक्रमाची माहिती होण्यासाठी परवानगीनुसार होर्डिंग्ज लावावेत. त्यावर कोणत्याही व्यक्ती, संघटना यांची नावे न छापता केवळ राजर्षी शाहू महाराजंचे फलक लावावेत.'

बैठकीस उपमहापौर संजय मोहिते, स्थायी समिती सभापती शारंगधर देशमुख, विरोधी पक्षनेता विजय सूर्यवंशी, नगरसेवक भूपाल शेटे, प्रा. जयंत पाटील, डॉ. संदीप नेजदार, इश्वर परमार, जय पटकारे, अतिरिक्त आयुक्त नितीन देसाई, सहाय्यक आयुक्त संजय सरनाईक, शहर अभियंता नेत्रदीप सरनोबत, वसंतराव मुळीक, इतिहास अभ्यासक इंद्रजित सावंत उपस्थित होते. बैठकीनंतर पदाधिकाऱ्यांनी समाधीस्थळाची पाहणी केली.

म. टा. प्रतिनिधी, कोल्हापूर

महापालिकेच्या घरफाळा विभागातील गैरव्यवहार प्रकरणाची तपासणी करण्यासाठी चौकशी समितीने सोमवारी सर्व कागदपत्रे ताब्यात घेतली. त्याचबरोबर ऑनलाइन डाटामध्ये कोणताही बदल करता येवू नये, यासाठी लिंक बंद करण्यात आल्या. या गैरव्यवहारामुळे संस्थेची बदनामी होत असल्याचे कारण पुढे करत प्रकरणाची माहिती माध्यमापर्यंत पोहोचू न देण्यासाठी यंत्रणा अधिक कार्यन्वित झाली आहे.

घरफाळा विभागात अधिकारी व कर्मचाऱ्यांनी संगनमताने गैरव्यवहार केल्याच्या अनेक तक्रारी दाखल झाल्या आहेत. कॉमन मॅन संघटनेचे अॅड. बाबा इंदुलकर, शिवसेना जिल्हाप्रमुख संजय पवार, दिलीप पाटील, समीर पठाण आदींचा तक्रारदारांमध्ये समावेश आहे. त्यांच्या सततच्या पाठपुराव्यामुळे आयुक्त डॉ. कलशेट्टी यांनी चौकशी समितीची स्थापना केली. समितीमध्ये अतिरिक्त आयुक्त नितीन देसाई, मुख्य लेखापाल संजय सरनाईक, लेखा परिक्षक धनंजय आंधळे यांचा समावेश आहे.

प्रथम या प्रकरणामध्ये सत्यता नसल्याचा भासवण्याचा प्रयत्न केला जात होता. पण तक्रारदारांनी पाठपुरवा केल्यानंतर त्यामधील सत्यता असल्याचे निदर्शनास आणून दिले आहे. तक्रारदारांनी दिलेल्या तक्रारीमध्ये मिळकतीमधील आकडेवारीत तफावत आढळत असली, तरी त्याची सखोल चौकशी करण्याचा निर्णय घेतला आहे. तक्रारीमध्ये नमूद केलेल्या मिळकतीसह संपूर्ण डाटा समितीने ताब्यात घेतला आहे. मिळकतींचे हस्तलिखित असेसमेंट ताब्यात घेतले असून असेसमेंट कोणी केले, मिळकतीचा प्रत्यक्ष वापर याची तपासणी केली जाणार आहे. चौकशीमध्ये गैरव्यवहार निष्पन्न झाल्यास संबंधित अधिकारी व कर्मचाऱ्यांवर जबाबदारी निश्चित करुन फौजदारी स्वरुपाच गुन्हा दाखल केला जाणार आहे, असे वरिष्ठ अधिकाऱ्यांनी सांगितले.

म. टा. वृतसेवा, गगनबावडा

उसाचे वाडे घेऊन येत असताना गव्याने केलेल्या हल्ल्यात बाजारभोगाव (ता. पन्हाळा) येथील युवक गंभीर जखमी झाला. आदिश प्रकाश घोडके (वय २२) असे त्याचे नाव आहे. त्याच्यावर कोल्हापुरातील सीपीआर रुग्णालयात उपचार सुरू असून त्याची प्रकृती चिंताजनक आहे. सकाळी सव्वानऊच्या सुमारास ही घटना घडली. त्यामुळे परिसरातील शेतकऱ्यांत भीतीचे वातावरण आहे.

याबाबत अधिक माहिती अशी, आदिश हा जनावरांसाठी उसाचे वाडे आणायला शिवाजी पाटील यांच्या मळा नावाच्या शेतात गेला होता. तेथे डी. वाय. पाटील साखर कारखान्याची ऊस तोड सुरू आहे. तेथून पायवाटेने वाड्याचा भारा डोक्यावरून घरी घेऊन येत असताना फाडे नावाच्या शेताजवळ पिल्लासह दबा धरून बसलेल्या गव्याच्या मादीने आदिशवर हल्ला केला. हल्ल्यात आदिशच्या उजव्या मांडीत एक शिंग घुसले तर दुसरे शिंग छातीत घुसल्याने तो गंभीर जखमी झाला. त्याचा आरडाओरडा ऐकून ऊस तोडणी करणाऱ्या उमेश पाटील, संग्राम काटकर, शिवाजी पाटील यांनी घटनास्थळी धाव घेतली. रक्तबंबाळ अवस्थेत त्याला बाजारभोगावला प्राथमिक आरोग्य केंद्रात उपचारासाठी आणले. पण, येथे डॉक्टर किंवा आरोग्यसेवक नसल्याने रुग्णवाहिकेतून सीपीआरमध्ये व तेथून खासगी हॉस्पिटलमध्ये हलविण्यात आले. त्याच्यावर तातडीने शस्त्रक्रिया करण्यात आली. दरम्यान, वनपाल सदाशिव देसाई व वनरक्षक कुंडलिक कांबळे यांनी घटनेचा पंचनामा केला.

कोल्हापूर

'निवडणूक आयोगाकडून मजबूत लोकशाहीसाठी 'निवडणूक साक्षरता' हा विषय देण्यात आला असून २५ जानेवारी रोजी राष्ट्रीय मतदार दिनानिमित्त मतदारांमध्ये जागृती करावी ', असे आदेश जिल्हाधिकारी दौलत देसाई यांनी दिले.

जिल्हाधिकारी कार्यालयातील राजर्षी शाहू महाराज सभागृहात राष्ट्रीय मतदार दिवस साजरा करण्यासंदर्भात बैठक झाली. त्यावेळी ते बोलत होते. बैठकीत उपजिल्हा निवडणूक अधिकारी सतीश धुमाळ यांनी यावेळी संगणकीय सादरीकरण करुन सविस्तर माहिती दिली.

जिल्हाधिकारी देसाई म्हणाले, 'विविध विभागांनी राष्ट्रीय मतदार दिनानिमित्त नवीन मतदारांमध्ये जनजागृती करण्यासाठी उपक्रम हाती घ्यावेत. नुकत्याच झालेल्या निवडणुकीमध्ये मतदान केलेल्या नव मतदार ते ज्येष्ठ मतदार अशा निवडक मतदारांना बोलावून त्यांचा सन्मान करा. विशेषत: तृतीयपंथी, दिव्यांग अशा मतदारांनाही निमंत्रित करुन त्यांचाही सन्मान करण्याची सूचना केली.' यावेळी तहसीलदार अर्चना शेटे, शीतल मुळे-भांबरे, सुनीता नेर्लीकर आदी उपस्थित होते.

कोल्हापूर टाइम्स टीम

शहर वाहतूक नियंत्रण शाखा, शाळा, महाविद्यालये, अनेक संस्थांच्या वतीने ३१व्या रस्ता सुरक्षा सप्ताहानिमित्त मंगळवारी सकाळी रस्ता सुरक्षा अभियान फेरी काढण्यात आली. महापौर सूरमंजिरी लाटकर यांच्या हस्ते भवानी मंडप येथे फेरीचे उद्घाटन झाले. फेरीत एक हजारांहून अधिक आरएसपीचे विद्यार्थी सहभागी झाले.

वाहतुकीचे नियम पाळा, अपघात टाळा, डोक्यावर हेल्मेट घाला, सिग्नल तोडू नका, वेगाची नशा, जीवनाची दुर्दशा, असा आशयाचे फलक विद्यार्थ्यांच्या हाती होती. भवानी मंडळ येथे सकाळी आठ वाजता महापौर लाटकर यांच्या हस्ते फेरीचे हिरवा झेंडा दाखवून उद्घाटन झाले. भवानी मंडप ते दसरा चौक या मार्गावर फेरी झाली. शाहीर दिलीप सावंत यांनी पोवाड्यातून वाहतूकीच्या नियमांची जनजागृती केली. नागरिकांनी त्यांच्या पोवाड्याला उत्स्फूर्त दाद दिली.

छत्रपती राजश्री शाहू हायस्कूल, भाई माधवरावजी बागल हायस्कूल, महाराष्ट्र हायस्कूल, जुना बुधवार हायस्कूल, न्यू हायस्कूल, साई हायस्कूल, वसंतराव जयवंतराव देशमुख इंग्लिश मीडियम स्कूल, शा. कृ. पंत वालावलकर हायस्कूल, छत्रपती राजाराम हायस्कूल कसबा बावडा, प्रिन्सेस उषाराजे गर्ल्स हायस्कूल, जीवन कल्याण हायस्कूल कसबा बावडा, प्रायव्हेट हायस्कूल, विद्यापीठ हायस्कूल, कोल्हापूर हायस्कूल आणि अल्फान्सो हायस्कूल बँड पथक असे एकूण ९२२ आरएसपीचे विद्यार्थी आणि २७ शिक्षक सहभागी झाले. रॅलीदरम्यान विद्यार्थ्यांनी वाहतूक नियमांच्या प्रबोधनापर घोषणा दिल्या. या वेळी ॲस्टर आधार हॉस्पिटलचे मोहसीन मुश्रीफ, आयशा राऊत, आर. एस पीचे विभागीय समादेशक शिवाजी साळवी, शहर वाहतूक शाखेचे पोलिस निरीक्षक वसंत बाबर आदी उपस्थित होते.

कोल्हापूर टाइम्स टीम

महापालिका प्रशासनाने केलेल्या सर्वेक्षणामध्ये शहरात ४ हजार १०९ फेरीवाले असल्याचे स्पष्ट झाले आहे. या सर्वांना कागदपत्रे सादर करण्याचे आदेश इस्टेट विभागाने दिले. मात्र ठराविक मुदतीत ३ हजार ३५६ जणांनी कागदपत्रे दिली असून उर्वरित ७४४ फेरीवाले बोगस असल्याचे स्पष्ट झाले आहे. मुदतवाढीनंतर कागदपत्रे सादर केलेल्या फेरीवाल्यांसह यादी अपलोड करुन अंतिम यादी प्रशासन तयार करणार आहे. त्यानंतर फेरीवाला झोन तयार करण्याची प्रक्रिया सुरू होणार आहे.

रहदारीचे रस्ते, महत्त्वाचे चौक, फूटपाथ यांसह मिळेल त्याठिकाणी फेरीवाल्यांनी ठाण मांडलेले असते. त्यामुळे वाहतुकीचा पुरता बोजवारा उडतो. शहरातील अरुंद रस्ते, बेशिस्त पार्किंग त्यामध्ये फेरीवाल्यांचा अडथळा असल्याने संपूर्ण वाहतूक व्यवस्थाच कोलमंडून पडते. यातून मार्ग काढण्यासाठी केंद्रीय फेरीवाला धोरणानुसार त्यांचे सर्वेक्षण करण्याचा निर्णय घेतला. त्यासाठी ऑल इंडिया इन्स्टिट्युट ऑफ लोकल सेल्फ इंडियाच्यावतीने जानेवारी २०१९ पासून सर्व्हे करण्यास सुरुवात झाली. पण सर्व्हे करताना आवश्यक कागदपत्रांसाठी फेरीवाल्यांकडून मोठ्या प्रमाणात अडचणी आल्या.

जानेवारी ते जुलैअखेर झालेल्या सर्व्हेमध्ये शहरात ४,१०९ फेरीवाले असल्याचे स्पष्ट झाले. त्यांना रेशन कार्ड व आधार कार्ड देण्याची सूचना केली. मात्र जुलैपासून तीन डिसेंबरपर्यंत यापैकी केवळ २,९०० फेरीवाल्यांनी कागदपत्रे सादर केली. जुजबी कागदपत्रे असताना तब्बल १,२०० जणांनी दिली नाहीत. त्यामुळे अतिक्रमण निर्मूलन मोहीम राबवण्यास अडथळा निर्माण होऊ लागला. परिणामी स्थायी समितीमध्ये मुदतवाढ देण्याचा निर्णय घेतला. पण मुदतीमध्येही आवश्यक कागदपत्रे न दिल्यास त्यांच्यावर कारवाई करण्याचे आदेश दिले.

त्यानंतर यापैकी ४३५ जणांनी आपले रेशनकार्ड व आधार कार्ड दिले. पण अद्याप ७४४ जणांनी अशी कागदपत्रे न दिल्याने ते बोगस ठरण्याची शक्यता आहे. प्राप्त झालेल्या कागदपत्रांनुसार फेरीवाल्यांची अंतिम यादी तयार करण्याची प्रक्रिया सुरू करण्यात येणार आहे. सर्व याद्या अपलोड झाल्यानंतर अंतिम यादी तयार केली जाईल. त्यानंतर फेरीवाला झोन तयार करण्याची प्रक्रिया सुरू होईल. झोन तयार होवून जागा निश्चित झाल्यानंतर शहरातील वाहतूक कोंडी निकालात निघण्याची शक्यता आहे.

कोट

कागदपत्रे सादर करण्यासाठी मुदतवाढ दिल्यानंतर ४३५ फेरीवाल्यांनी दिली आहेत. त्याची पडताळणी करुन सर्वांची यादी अपलोड केली जाईल. त्यानंतर अंतिम यादी तयार होऊन फेरीवाला झोन तयार करण्याची प्रक्रिया सुरू करण्यात येईल.

- प्रमोद बराले, इस्टेट अधिकारी

सतत मोबाइल फोनमधील गेम्समध्ये हरवलेल्या मुलांची संख्या झपाट्याने वाढत आहे. नोकरदार पालक, विभक्त कुटुंब पद्धती, मैदानी खेळांपासून दुरावा, कुटुंबातील संवादाचा अभाव अशा अनेक कारणांमुळे मोबाइल गेम्समध्येच तासनतास मग्न असलेली मुलं ही सध्याची गंभीर सामाजिक समस्या बनली आहे. पाच वर्षांपासून वीस वर्षांपर्यंतच्या मुलांभोवती ऑनलाइन गेम्स व सोशल मीडियाचा विळखा घट्ट होत आहे. यामधून मुलांमध्ये एकलकोंडेपणा वाढण्याचा धोका अभ्यासकांकडून वर्तवला जात आहे. या महत्त्वाच्या विषयाचा वेध घेणारी मालिका आजपासून.

Anuradha.kadam@timesgroup.com

Tweet@AunradhakadamMT

कोल्हापूर : ज्या वयात दम लागेपर्यंत खेळायचे, घाम गळून कडाडून भूक लागेपर्यंत हुंदडायचे, मैदानावरच्या खेळांपासून ते बैठ्या खेळापर्यंत चुरशीचा अनुभव घ्यायचा, हार जीत यापलीकडे जात खिलाडूवृत्तीची बीजे अंगी भिनवायची अशा वयातील मुलांचे बालपण मोबाइल गेम्सच्या विळख्यात पूर्णपणे करकचून गेले आहे. मोबाइल फोनमधील सात इंच स्क्रीनच्या खेळात अडकलेल्या मुलांची ऑनलाइन गेम्समधील आभासी जिंकण्यासाठी लागणारी स्पर्धा त्यांना मानसिक एकलकोंडेपणाच्या गर्तेत ढकलत आहे.

मोबाइल गेम्सवर तासनतास गढून गेलेली शालेय व महाविद्यालयीन वयातील मुलं ही आजच्या प्रत्येक घरातील पालकांच्या काळजीचे कारण बनली आहेत. मोबाइलवर खेळले जाणारे ऑनलाइन गेम्समधील वेग आणि त्यातील जिंकण्याचा आनंद मुलांच्या आकर्षणचा केंद्रबिंदू आहे. सध्या मोबाइलवर दहा ते पंधरा प्रकारचे गेम्स वयाच्या पाच ते १९ वर्षे वयाच्या मुलांना आकर्षित करणारे आहेत. यामध्ये पझल्स, आर्केड गेम, अॅडव्हेंचर अॅक्शन, बोर्ड गेम आणि बॅटल रॉयलचा समावेश आहे. 'पोकेमॉन गो' या गेमने सर्वांना अक्षरश: वेड लावले होते. कँडी क्रश, क्वाइन मास्टर आणि आता पब्जीच्या विळख्यात तरुणाई गुरफटली आहे. त्यातून मुलांना यातून बाहेर काढण्यासाठी सामाजिक स्तरावर प्रयत्न होण्याची गरजही व्यक्त केली जात आहे.

सतत हे गेम्स खेळणाऱ्या मुलांच्या डोळ्यावर, मनावर व मानेवर येणारा ताण तर धोकादायक आहेच पण या गेम्समध्ये जिंकण्यासाठी जो टेम्पो दिला जातो त्यातून त्यांच्यात आक्रमकपणा वाढत असल्याची निरीक्षणे मनोविकार व मानसिक आरोग्यतज्ज्ञांकडून अधोरेखित होत आहेत. पब्जी, ब्ल्यू व्हेल्स या सारख्या खेळांमध्ये अवास्तव धाडस करण्याचे आव्हान दिले जात असल्याने त्यातून अवाजवी पाऊल उचलण्याचे प्रकार मुलांमध्ये वाढत आहेत. या खेळांमध्ये अयशस्वी झाल्यास त्यातून मुलांमध्ये नैराश्य येत आहे. या नैराश्यातून आत्महत्येपर्यंतचे टोकाचे पाऊल उचलणाऱ्या मुलांची वाढती संख्या हा सामाजिक प्रश्न ऐरणीवर आला आहे. मोबाइल गेम्स खेळणाऱ्या मुलांची मानसिक स्थिती असंतुलित होत असल्याच्या निरीक्षणावरही शिक्कामोर्तब होणाऱ्या घटना विचार करायला भाग पाडणाऱ्या आहेत.

कोट

सतत मोबाइल फोनमधील गेम खेळण्यात व्यस्त असलेल्या मुलांमध्ये मानसिक कमकुवतपणा येण्याची शक्यता जास्त आहे. फोनमधील लहरींचा मेंदू व हृदयावरही परिणाम होतो. हे एक व्यसन असून ते मिळाले नाही तर मानसिक संतुलन हरवल्याने मुलांचा मनावरीलताबा सुटतो. काल्पनिक व वास्तव जग यातील फरक न कळल्याने मुलं नैराश्याच्या खाईत जातात. यातून जीवन संपवण्यापर्यंतचा विचार मनात येतो. व्यक्तीगत खेळापेक्षा सामूहिक खेळातील अपयश अधिक धोकादायक आहे.

- प्रा. अनिल घस्ते, मानसशास्त्र अभ्यासक

पॉइंटर

काय आहेत धोके

- सतत गेम्स खेळल्याने आक्रमकपणा वाढ

- नकार पचवण्याची क्षमता कमी

- स्वभावातील उद्धटपणात वाढ

- अवास्तव धाडस करण्याची चुकीची मानसिकता

- शारीरfक व मानसिक ताणामुळे चिडचिड

- विचार प्रक्रिया थंडावल्याने बौद्धिक अक्षमता

- कुटुंबापासून अलिप्त राहिल्याने असंवेदनशीलतेत वाढ

कोल्हापूर टाइम्स टीम

शहरात गेल्या आठ महिन्यांपासून रस्त्यावर एलईडी दिवे बसवण्याबरोबरच त्यांच्या देखभालीची जबाबदारी खासगी कंपनीकडे दिली गेली आहे. त्यामुळे महानगरपालिकेच्या विद्युत विभागातील ६८ अधिकारी व कर्मचाऱ्यांना कामच शिल्लक उरले नसल्याची स्थिती आहे. या अधिकारी, कर्मचाऱ्यांवर दर महिन्याला किमान १५ लाख रुपयांचा खर्च वेतनापोटी करावा लागत आहे. या व्यतिरिक्त महापालिकेने केलेल्या करारानुसार खासगी कंपनीलाही विविध कामांपोटी कोट्यवधी रुपये द्यावे लागणार आहेत. महापालिकेची आर्थिक स्थिती चिंताजनक असताना एकाच विभागावरील दुहेरी खर्चाच्या अनागोंदी कारभाराबाबत आश्चर्य व्यक्त होत आहे.

महानगरपालिकेच्यावतीने शहरातील रस्त्यांवरील दिव्यांची देखभाल, बंद-सुरू करणे, नवीन दिवे बसवणे अशी कामे केली जात होती. याशिवाय महापालिकेच्या शाळा, कार्यालये, हॉस्पिटल, उद्यानांमधील वीजपुरवठ्याबाबतचे प्रश्नही हाताळले जात होते. त्यासाठी बूम व साधनांसह अधिकारी व कर्मचारी नियुक्त केले आहेत. आता रस्त्यांवर एलईडी दिवे बसवण्याचे काम ईईएसएल कंपनीला देण्यात आले आहे. आठ महिन्यांपासून या कंपनीकडून हे काम सुरू असून त्यातून जुने दिवे बदलून एलईडी लावणे, ते खराब झाल्यास बदलण्याचे काम केले जात आहे.

महापालिकेच्या विद्युत विभागाकडून हे महत्वाचे काम केले जात नाही. त्यामुळे या कर्मचाऱ्यांना इतर ठिकाणी, ज्यावेळी गरज लागेल त्यावेळी कामाला बोलवले जात आहे. पण इतरवेळी या कर्मचाऱ्यांना काम नसल्याची परिस्थिती आहे. प्रत्येकाला महिन्याला सरासरी २० हजार रुपये पगार पकडल्यास किमान १५ लाख रुपये खर्च होतात.

खासगी कंपनीकडून दिवे बदलण्याचे काम सुरू आहे, त्यांना गरज भासल्यास भाग दाखवण्याचे काम या विभागाकडून केले जात आहे. शहरात २२ हजारावर दिवे बदलले आहेत. आणखी काही दिवे बसवण्याचे काम शिल्लक आहे. या कंपनीला करारानुसार देखभालीसाठी महापालिका स्वतंत्र पैसे मोजणार आहे. तसेच त्यांनी केलेल्या वीज बचतीबाबतही काही पैसे द्यावे लागणार आहेत याची चर्चा महापालिकेच्या सर्वसाधारण सभेत नगरसेवकांनी केली.

त्याबाबत प्रशासनाकडून काहीच उत्तर दिले गेले नाही. कामासाठी पैसे दिल्यास काहीच हरकत नाही. पण, एका कामासाठी दुहेरी खर्च करण्याचा प्रकार महापालिकेत होत असल्याकडे लक्ष वेधुनही त्यावर मार्ग काढण्यात आलेला नाही. सध्या महापालिकेच्या विविध विभागांकडून अपेक्षित असलेले उत्पन्न कमी झाले आहे. अशा परिस्थितीत आर्थिक स्थितीचा डोलारा सांभाळण्याची गरज असताना दुहेरी खर्च करुन पैशाची उधळपट्टीचाच हा प्रकार आहे.

रस्त्यांवरील दिव्यांच्या कामाव्यतिरिक्त महापालिकेच्या विविध इमारती व कार्यालयांकडील वीजेच्या तक्रारी सोडवण्याचे काम महापालिकेच्या विद्युत विभागातील कर्मचारी करत आहेत. कंपनीचे काम पूर्ण झाल्यानंतर या कर्मचाऱ्यांमधील काही कर्मचारी इतर विभागांकडे वर्ग करावे लागणार आहेत.

- नेत्रदीप सरनोबत, शहर अभियंता

विद्युत विभागातील कर्मचारी

४

कनिष्ठ अभियंता

४

क्लार्क

१

स्टोअर इनचार्ज

५

सुपरवायझर

२४

वायरमन

३०

शिडी कामगार