म. टा. प्रतिनिधी, कोल्हापूर

'केंद्र आणि राज्य सरकारच्या शेतकरीविरोधी धोरणांविरोधात विविध संघटनांनी बुध‌वारी (ता. ८) देशव्यापी ग्रामीण भारत बंदची हाक दिली आहे. या बंदमध्ये अखिल भारतीय किसान संघर्ष समितीअंतर्गत २६५ शेतकरी संघटना सहभागी होणार आहेत. या दिवशी ग्रामीण भागात रास्ता रोको आंदोलन करण्यात येणार आहे. शेतकऱ्यांना मदत करण्याऐवजी केंद्र सरकार केवळ जाहिरातबाजी करत आहे' असा आरोप स्वाभिमानी शेतकरी संघटनेचे प्रमुख, माजी खासदार राजू शेट्टी यांनी केला. राज्य सरकारकडे सरसकट कर्जमाफीसाठी आग्रह धरणार असल्याचेही त्यांनी स्पष्ट केले. दसरा चौकातील राजर्षी शाहू स्मारक भवनात देशव्यापी बंदबाबत आयोजित मेळाव्यात ते बोलत होते.

माजी खासदार शेट्टी म्हणाले, 'पंतप्रधान किसान योजनेंतर्गत शेतकऱ्यांना दोन हजार रुपये दिले जात आहे. केंद्र सरकार १४ हजार कोटी रुपये दिल्याचे जाहीर करत दोन हजार कोटी रुपये वाटप केल्याची जाहिरात दाखवत आहे. साखर आयातीबाबतचे धोरण फसल्यानंतर कांद्याबाबतही केंद्राने असेच चुकीचे धोरण घेतले. त्यामुळे प्रथम ऊस उत्पादक व आता कांदा उत्पादकांचे नुकसान झाले. केंद्राच्या या धोरणाविरोधात देशव्यापी बंदची हाक दिली असून देशभरातील सर्व शेतकरी संघटना यात सहभागी होणार आहेत.'

'विधानसभा निवडणुकीनंतर, मुख्यमंत्री होण्यापूर्वी उद्धव ठाकरे यांनी बांधावर जाऊन सात-बारा कोरा करण्याचे आश्वासन दिले. शेतकऱ्यांना चिंतामुक्त करण्याची ग्वाही दिली होती. मात्र नागरपूर अधिवेशनादरम्यान घाईगडबडीत घेतलेल्या निर्णयामुळे प्रामाणिक शेतकरी कर्जमाफीपासून वंचित राहणार आहे. कर्ज थकीत राहू नये यासाठी शेतकरी फिरवाफिरवी करतात. असे शेतकरी कर्जमाफीपासून वंचित राहणार आहेत. महापूर आणि नंतरच्या अ‌वकाळी पावसामुळे शेतकऱ्यांचे प्रचंड नुकसान झाले. त्यांनाही कर्जमाफी मिळाली पाहिजे. सात-बारा कोरा आणि वीज माफी या संघटनेच्या प्रमुख मागण्या असून त्यासाठी संघर्षाची तयारी ठेवली आहे. शिवारच मोकळं पडल्यावर शिवथाळी आणणार कोठून?' असा टोलाही शेट्टी यांनी लगावला.

प्रा. जालंदर पाटील म्हणाले, 'केंद्र व राज्य सरकारने एकूण तिनवेळा केलेल्या कर्जमाफीमध्ये प्रामाणिक शेतकऱ्यांवर नेहमीच अन्याय झाला. भाजप सरकारने ३४ हजार कोटींची कर्जमाफी जाहीर केली. प्रत्यक्षात १७ हजार कोटी रुपये वाटले. नवीन आलेल्या सरकारनेही तोच कित्ता गिरवला आहे. शेतकरी दागिने विकून वर्षाला कर्जाची परतफेड करतो. अशा शेतकऱ्यांना महात्मा फुले कर्जमाफी योजनेचा कोणताही लाभ होणार नाही.'

सागर शंभुशेटे यांनी मायक्रो फायनान्स कंपन्यांने दिलेले कर्ज माफ करण्याची मागणी केली. तर सागर कोंडेकर यांनी राजकीय हस्तक्षेपामुळे सहकारी संस्था डबघाईला आल्याचे सांगितले.

यावेळी सतीश काकडे, स्वाभिनामी पक्षाचे जिल्हाध्यक्ष वैभव कांबळे, राजेंद्र गड्डान्नावर, माजी जिल्हा परिषद सदस्य सुरेश कांबळे, जयकुमार कोले, रमेश भोजकर, अजित पवार, स्वाभिमानी संघटनचे जिल्हाध्यक्ष जनादर्शन पाटील, विक्रम पाटील आदी उपस्थित होते.

म. टा. प्रतिनिधी, कोल्हापूर

अंशदायी पेन्शन योजना रद्द करुन जुनी पेन्शन योजना लागू करा या मागणीसह अन्य मागण्यांसाठी बुधवारी (ता. ८) होणाऱ्या देशव्यापी संपात केंद्र व राज्य कर्मचारी, निमसरकारी, कर्मचारी, शिक्षक आणि शिक्षकेत्तर कर्मचारी सहभागी होणार आहेत. कर्मचारी संघटनेचे समन्वयक अनिल लवेकर यांनी पत्रकार परिषदेत ही माहिती दिली.

लवेकर म्हणाले, 'बुधवारी सकाळी दहा वाजता सर्व कर्मचारी टाऊन हॉल उद्यानात एकत्र येणार आहेत. त्यानंतर दुपारी बारा वाजता शहरातील प्रमुख मार्गावरुन मोर्चा काढून तो बिंदू चौकात विसर्जित होणार आहे. खासगीकरण आणि कंत्राटीकरण धोरण रद्द करा, सेवेतील कंत्राटी कर्मचाऱ्यांना कायम करा, विविध संवर्गातील वेतन त्रुटी दूर करा, सातव्या वेतन आयोगाचा खंड प्रकाशित करा, सर्व रिक्त पदे त्वरीत भरा, अनुकंपा भरती विनाअट सुरू करा, पाच दिवसांचा आठवडा करा, सेवानिवृत्तीचे वय ६० करा, महिला कर्मचाऱ्यांना केंद्र सरकारच्या निर्देशानुसार बालसंगोपन रजा मंजूर करा, पवित्र पोर्टल पद्धत बंद करा, शिक्षकांना अशैक्षणिक कामे देऊ नका या मागण्यासाठी संप करण्यात येत आहे.'

पत्रकार परिषदेला मध्यवर्ती संघटनेचे अध्यक्ष वसंत डावरे, संजय क्षीरसागर, सतीश ढेकळे, अनिल खोत, कॉ दिलीप पवार उपस्थित होते.

कामगार संघटना कृती समितीचे आवाहन

सरकारची बेकारी वाढवणारी धोरणे आणि कामगार कायद्यावरील हल्ल्याच्या विरोधात कामगारांनी संपात सहभागी व्हावे, असे आवाहन कामगार संघटना संयुक्त कृती समितीने केले. या संपात भारतीय मजदूर संघाचा समावेश नाही. मात्र आयटक, सीटू, एक्टू व इतर सर्व कामगार संघटनांना संपात सहभागी होणार आहेत, असे पत्रक संघटनेने प्रसिद्ध केले आहे.

अंगणवाडी कर्मचारी मोर्चाने येणार

देशव्यापी संपात अंगणवाडी कर्मचारी सहभागी होणार असून महावीर उद्यानातून जिल्हा परिषदेवर मोर्चा काढण्यात येणार आहे. मोर्चात अंगणवाडी सेविका, मदतनीसांनी सहभागी व्हावे, असे आवाहन जिल्हा अंगणवाडी कर्मचारी संघाचे अध्यक्ष अतुल दिघे, सचिव सुवर्णा तळेकर यांनी केले आहे.

शालेय पोषण आहार संघटनेचा पाठिंबा

जिल्हा शालेय पोषण आहार कामगार संघटनेने देशव्यापी संपाला पाठिंबा दिला असून त्यादिवशी कामबंद आंदोलन करुन कामगार सहभागी होणार आहेत. त्यादिवशी पोषण आहाराचे काम बंद राहणार आहे, असे पत्रक जिल्हा परिषदेला देण्यात आले आहे. मोर्चात ठेकेदार, स्वयंपाकी, मदतनीसांनी सहभागी व्हावे, असे आवाहन जिल्हाध्यक्ष प्राचार्य ए. बी. पाटील यांनी केले आहे.

म. टा. प्रतिनिधी, कोल्हापूर

स्वाभिमानी शेतकरी संघटनेच्या कोल्हापूर जिल्हाध्यक्षपदी जनार्दन पाटील तर पक्षाच्या अध्यक्षपदी वैभव कांबळे यांची घोषणा शनिवारी झालेल्या संघटनेच्या मेळाव्यात केली. भगवान काटे यांनी भाजप प्रवेश केल्यामुळे रिक्त झालेल्या जागेवर पाटील यांची निवड झाली. कार्याध्यक्षपदी रमेश भोजकर यांनी नियुक्ती करण्यात आली. नवीन पदाधिकाऱ्यांची घोषणा संघटनेचे संस्थापक अध्यक्ष माजी खासदार राजू शेट्टी यांनी केली.

सोलापूर येथे झालेल्या मेळाव्यामध्ये राज्य व जिल्हा कार्यकारिणी बरखास्त केली होती. मात्र यापुढे कार्यकारिणी बरखास्त केली जाणार नाही. ती दोन वर्षासाठी किंवा नवीन निवड होईपर्यंत असेल. त्यानुसार जिल्हाध्यक्षपदी परिते येथील पाटील यांची निवड करण्यात आली. तर पक्षाच्या जिल्हाध्यक्षपदी पारगावच्या कांबळे यांची निवड झाली. संघटनेच्या युवा पदाधिकाऱ्यांनी संघटना बांधणी उत्कृष्ट केल्याने युवाध्यक्ष अजित पवार आणि सागर संभूशेटे यांना मुदतवाड देण्यात आली. त्याचवेळी संघटनेमध्ये नव्याने कार्याध्यक्षपद निर्माण केली असून भोजकर यांना संधी देण्यात आली. 'पक्ष आणि संघटना एकाच गाडीची दोन चाके आहेत. मात्र संघटना अराजकीय असून येथे प्रथम चळवळीला प्राधान्य दिले जात आहे. तर पक्ष राजकीय भूमिकेवर चालतो. नवीन पदाधिकारी जिल्ह्यात फिरल्यानंतर कार्यकारिणीची घोषणा करतील', असे शेट्टी यांनी सांगितले.

म. टा. प्रतिनिधी, कोल्हापूर

'महापालिकेच्या शहर पाणीपुरवठा विभागाकडून शहराच्या पाणी पुरवठ्याचे योग्य नियोजन केले जात नाही. पाणी मिळत नसताना नागरिकांना बिले भरावी लागतात. काही कर्मचारी पिण्याच्या पाण्याची समस्या उद्भवल्यानंतर परस्पर टँकरमधील पाण्याची विक्री करतात. त्याची नोंद मात्र नगरसेवकांच्या नावावर टाकतात' असा आरोप स्थायी समिती सभापती शारंगधर देशमुख यांनी दिला. शाखा अभियंत्यांनी सर्वत्र सुरळीत पाणी पुरवठा होत असल्याचे स्पष्ट करावे, आम्ही तत्काळ राजीनामा देतो' असे आव्हानही त्यांनी दिले.

अपुऱ्या पाणी पुरवठ्याबाबत शनिवारी अधिकाऱ्यांसोबत बैठक घेण्यात आली. आयुक्त डॉ. मल्लिनाथ कलशेट्टी, प्रभारी जलअभियंता भास्कर कुंभार व सर्व शाखा अभियंता उपस्थित होते. यावेळी सर्वच नगरसेवकांनी अधिकाऱ्यांना धारेवर धरत समस्यांच्या पाढा वाचला.

सभापती देशमुख म्हणाले, 'सदस्य नागरिकांच्या सोयीसाठी टँकरची मागणी करतात. पण, काही कर्मचारी टँकरची परस्पर विल्हेवाट लावतात. त्याची बिले मात्र निवडणुकीदरम्यान एनओसीच्या माध्यमातून भरून घेतली जातात. ज्या अधिकाऱ्यांनी टँकरची बिले वसूल केली, त्यांना पुढील बैठकीत रेकॉर्डसह उपस्थित ठेवा. भागात आठ-आठ दिवस पाणी येत नाही, मग बिले कशी पाठवता?'

दीपा मगदूम म्हणाल्या, 'बालिंगा पंपिंग हाऊस आठवड्यातून पाच वेळा बंद पडते. यावर अवलंबून असणाऱ्या प्रभागात पाणी न आल्याने नागरिकांच्या रोषाला नगरसेवकांना सामोरे जावे लागते. कर्मचारी अपुरे आहेत ही कारणे सदस्यांना सांगायची नाहीत. तो प्रशासनाचा प्रश्न आहे. त्यांनी तो सोडावावा.'

गटनेते सत्यजित कदम म्हणाले, 'कदमवाडी प्रभागात तीन वर्षांपासून एक दिवसाआड पाणी येते. पंपिंग बंद पडल्यानंतर तर तीन-तीन दिवस पाणी येत नाही. टँकरची मागणी केल्यानंतर सदस्यांच्या नावे बिले टाकली जातात.'

बैठकीत गीता गुरव, पूजा नाईकनवरे, माधुरी लाड, प्रतीक्षा पाटील, प्रतिज्ञा उत्तूरे यांनी प्रभागातील अपुऱ्या पाण्याच्या समस्या मांडल्या.

याबाबत आयुक्त डॉ. कलशेट्टी म्हणाले, 'शिंगणापूर बंधारा दुरुस्तीच्या निविदेला प्रतिसाद मिळालेला नाही. जलअभियंत्यांचा पदभार शाखा अभियंता कुंभार यांच्याकडे दिला आहे. कर्मचाऱ्यांनी स्वत: प्रत्यक्ष पाहणी करावी. त्यांनी चोवीस तास फोन सुरू ठेवला पाहिजे. शहराच्या २५ टक्के भागात अपुऱ्या पाण्याची समस्या आहे. त्याची तातडीने निर्गत करावी. सर्वच सूचना आयुक्तांनी करायच्या हे बरोबर नाही.'

बैठकीस उपमहापौर संजय मोहिते, परिवहन समिती सभापती अभिजित चव्हाण, नगरसेवक राजाराम गायकवाड, सचिन पाटील, संदीप कवाळे, अतिरिक्त आयुक्त नितीन देसाई, उपायुक्त धनंजय आंधळे, सहायक आयुक्त संजय सरनाईक, शाखा अभियंता रामनाथ गायकवाड, राजेंद्र हुजरे, अक्षय आटकर, गुंजन भारंबे, अभिलाषा दळवी, राजेंद्र पाटील, मिलींद पाटील आदी उपस्थित होते.

म. टा. प्रतिनिधी, कोल्हापूर

'शहरातील ४,५०० फेरीवाल्यांनी महापालिकेच्या इस्टेट विभागाकडे कागदपत्रे सादर केली आहेत. मात्र अद्याप १२०० फेरीवाल्यांनी कागदपत्रे दिलेली नाहीत. त्यांनी शुक्रवारपर्यंत (ता. १०) कागदपत्रे सादर करावीत. जे कागदपत्रे देणार नाहीत, त्यांना अतिक्रमण निर्मुलन मोहिमेच्या माध्यमातून हटविण्यात येणार आहे' असा महत्त्वपूर्ण निर्णय शनिवारी झालेल्या स्थायी समितीच्या सभेत घेण्यात आला. सभेत बंदिस्त पार्किंगवरुन प्रशासनाला पुन्हा धारेवर धरण्यात आले.

सभेत वाहतुकीला अडथळा ठरणाऱ्या वाहनांवर कारवाई करण्याचा मुद्दा उपस्थित झाला. चारही विभागीय कार्यालयांच्यावतीने बंदिस्त पार्किंगची माहिती देण्यासाठी बैठक बोलवण्याची मागणी सदस्यांनी केली. 'अतिक्रमण विभागातील कर्मचाऱ्यांचा उपयोग रस्ते पॅचवर्क करण्यासाठी केला जात आहे. जेथे कारवाई सुरू असते, तेथील वाहने हटविली जात आहेत. अतिक्रमण निर्मुलनाची कारवाई करताना वाहतुकीला अडथळा ठरणाऱ्या फेरीवाल्यांना हटवण्यात येणार आहे. अधिकृत फेरीवाल्यांवर कारवाई होऊ नये, यासाठी कागदपत्रे सादर करण्याची सूचना केली आहे. त्यानुसार ४२०० जणांनी कागदपत्रे दिली आहेत. उर्वरीत १२०० जणांनी अद्याप काहीच केलेले नाही. त्यांना शुक्रवारपर्यंत मुदत दिली आहे. त्यानंतर त्यांच्यावर कारवाई केली जाईल' असे प्रशासनाच्यावतीने स्पष्ट करण्यात आले.

खरमाती प्रभागातच टाकली जाते. त्यासाठी जागा निश्चित करण्याची मागणी सदस्यांनी केली. पूजा नाईकनवरे म्हणाल्या, 'शहरातील मोकाट कुत्र्यांचा नागरिकांना मोठ्या प्रमाणात त्रास होत आहे. त्याचा बंदोबस्त करावा.' यावर 'दररोज १५ मोकाट कुत्र्यांचे निर्बिजीकरण केले जाते. त्यासाठी तीन सेंटर असून आणखी एक सेंटर वाढवण्यात येणार आहे' असे आरोग्य विभागाच्यावतीने सांगितले.

'प्रभागातील सफाई कर्मचारी निवृत्त अथवा मृत झाल्यास त्यांच्या जागी वारस कर्मचारी मिळण्यासाठी तीन ते चार महिने प्रतीक्षा करावी लागते. त्यामुळे सफाई कर्मचाऱ्यांची संख्या अपुरी पडते. कर्मचारी निवृत्त होण्यापूर्वी वारसाहक्काने नेमणूक होण्यासाठी कार्यवाही सुरू करावी' अशी मागणी सदस्यांनी केली. 'प्रशासनाकडून वारसाहक्काने नेमणुकीसाठी तीन महिने आधी प्रक्रिया सुरू केली जाते. पण अनुसूचित जाती प्रवर्गाच्या वारसाची नेमणूक करताना जातीचा दाखल सादर करणे बंधनकारक आहे. अनेक कर्मचाऱ्यांकडून जातीचा दाखल मुदतीत मिळत नसल्याने नेमणुकीला विलंब होतो' असे प्रशासनाने स्पष्ट केले.

'मल्टिस्पेशालिस्ट हॉस्पिटल्सचे पार्किंग खुले असल्याशिवाय त्यांना बांधकाम परवानगी देऊ नये. त्यासाठी बांधकाम नियमात दुरुस्ती करावी' अशी मागणी राजाराम गायकवाड यांनी केली.

वेध 'स्थायी' निवडीचे

महाराष्ट्र महानगरपालिका अधिनियम कलम २० (४) मधील तरतुदीनुसार स्थायी समितीच्या आठ सदस्यांचा कार्यकाळ या महिन्यात संपणार आहे. संजय मोहिते, सत्यजित कदम, दीपा मगदूम, सविता घोरपडे, प्रतीक्षा पाटील, प्रतिज्ञा उत्तूरे, भाग्यश्री शेटके, गीता गुरव यांचा यात समावेश आहे. या जागी नवीन सदस्यांची नियुक्ती झाल्यानंतर सभापती निवड होईल. फेब्रुवारी महिन्याच्या पहिल्या आठवड्यात निवडीची शक्यता आहे.

म. टा. प्रतिनिधी, कोल्हापूर

महाविकास आघाडीच्या विजयाच्या घोषणा, काँग्रेस व राष्ट्रवादी काँग्रेसच्या कार्यकर्त्यांची गर्दी आणि शुभेच्छांचा वर्षाव अशा उत्साही वातावरणात जिल्हा परिषदेचे नूतन अध्यक्ष बजरंग पाटील व उपाध्यक्ष सतीश पाटील यांनी कार्यालय प्रवेश केला. नूतन पदाधिकाऱ्यांच्या स्वागत सोहळ्यासाठी अध्यक्ष व उपाध्यक्षांच्या दालनाची सजावट केली होती.

खासदार संजय मंडलिक व आमदार ऋतुराज पाटील, राष्ट्रवादी युवक काँग्रेसचे प्रदेश उपाध्यक्ष नवीद मुश्रीफ यांच्या हस्ते फित कापून अध्यक्ष व उपाध्यक्षांनी कार्यालयात प्रवेश केला. कार्यकर्त्यांनी महाविकास आघाडीचा विजय असो, अशा घोषणा देत जिल्हा परिषद दणाणून सोडली. नूतन पदाधिकाऱ्यांना शुभेच्छा देण्यासाठी त्यांच्या मतदारसंघातील व गावांतील समर्थकांनी गर्दी केली होती. यामुळे जिल्हा परिषदेचा परिसर गजबजला होता.

पक्षप्रतोद उमेश आपटे, सदस्य सुभाष सातपुते, युवराज पाटील, हंबीरराव पाटील, भगवान पाटील, सदस्या स्वरुपाराणी जाधव, जिल्हा परिषदेचे माजी उपाध्यक्ष शशिकांत खोत, अॅड. सुरेश कुराडे, 'स्वाभिमानी'चे राजेश पाटील, अर्जुन आबिटकर प्रमुख उपस्थित होते. भाजपचे सदस्य प्रसाद खोबरे, आवाडे गटाचे कार्यकर्ते राजू मगदूम यांनीही नूतन पदाधिकाऱ्यांना शुभेच्छा दिल्या.

००००

म. टा. प्रतिनिधी, कोल्हापूर

'सद्याद्रीची गिरीशिखरे जैवविविधतेच्या दृष्टीने महत्त्वाची आहेत. सह्याद्रीमुळेच छत्रपती शिवाजी महाराजांचे स्वराज्य शत्रूला तोंड दऊ शकले. महाराष्ट्राची संस्कृती टिकवणाऱ्या सह्याद्रीनेच स्वराज्य घडवले,'असे प्रतिपादन श्रीमंत शाहू महाराज यांनी केले. डॉ. अमर अडके लिखित 'सह्याद्रीच्या गिरीशिखरांवरून' या पुस्तक प्रकाशनाच्या कार्यक्रमात ते बोलत होते. शनिवारी सायंकाळी धैर्यप्रसाद हॉल येथे या पुस्तकाचे प्रकाशन झाले.

महाराष्ट्रातील गडकोटांची वस्तुस्थिती, त्यांचा इतिहास, संस्कृती, निसर्ग, जीवसृष्टी यांची माहिती आणि महती सांगणारे 'सह्याद्रीच्या गिरीशिखरांवरून' हे पुस्तक दुर्ग भटकंती करणारे इतिहासप्रेमी डॉ. अमर अडके यांनी लिहिले. गेल्या ४० वर्षांतील गडकोटांच्या भ्रमंतीचा इतिहास त्यांनी या पुस्तकातून मांडला आहे. अक्षर दालनने हे पुस्तक प्रकाशित केले. श्रीमंत शाहू महाराज, ज्येष्ठ इतिहास संशोधक डॉ. जयसिंगराव पवार, गिर्यारोहक आनंद पाळंदे आदींच्या हस्ते या पुस्तकाचे प्रकाशन झाले.

यावेळी कार्यक्रमाचे अध्यक्ष श्रीमंत शाहू महाराज म्हणाले, 'महाराष्ट्राच्या जडणघडणीत सह्याद्रीचे मोठे योगदान आहे. सह्याद्रीमुळेच शिवाजी महाराजांचे स्वराज्य निर्माण झाले. सह्याद्रीच्या उंच गिरीशिखरांनीच शत्रूला तोंड दिले. स्वराज्याचा खरा इतिहास सह्याद्रीमध्ये दडला आहे. अलीकडे इतिहासाकडे दुर्लक्ष होत आहे. इतिहासाचा अभ्यास करून त्याचा भविष्यासाठी उपयोग करणे गरजेचे आहे. इतिहास प्रेरणा देणारा, शिकवणारा, उत्साहित करणारा आहे. भविष्यातील आव्हाने पेलण्यासाठी त्यातून बोध घेता आला पाहिजे.'

प्रमुख वक्ते डॉ. जयसिंगराव पवार म्हणाले, 'गडकिल्ले हे सह्याद्रीचे अध्यात्म आहे. गड पाहण्यापेक्षा तो अनुभवता आला पाहिजे. गड अनुभवणाऱ्या व्यक्तीने हे पुस्तक लिहिल्याने नवी माहिती उजेडात आली. गडांचा इतिहास, संस्कृती, भूगोल सर्वकाही या पुस्तकात सामावले आहे. मराठीपणाचा धागा घट्टपणे जपणारी गिरीशिखरे या पुस्तकातून अनुवता येतील.'

गिर्यारोहक आनंद पाळंदे, तानाजी मालुसरे यांचे वंशज शीतल मालुसरे यांनी मनोगत व्यक्त केले. डॉ. अमर अडके यांनी प्रास्ताविकातून पुस्तक लेखनामागील प्रेरणा स्पष्ट केली. कार्यक्रमासाठी रायबा मालुसरे, अक्षर दालनच्या श्रेया जोशी, मैत्रेय प्रतिष्ठानचे विश्वनाथ भोसले, नीलराजे बावडेकर अमात्य, रवींद्र जोशी आदी उपस्थित होते. रितेश मोरे यांनी आभार मानले.

म. टा. प्रतिनिधी, कोल्हापूर

एखादा गुन्हा अथवा अपघाताच्या घटनास्थळावर तत्काळ पोहोचून गुन्ह्यांचे भौतिक पुरावे गोळा करणे सोयीचे होण्यासाठी जिल्हा पोलिस दलाच्या ताफ्यात ६ इन्व्हेस्टिगेशन आय-बाइक दाखल झाल्या. पोलिस रेझिंग डे सप्ताहानिमित्त जिल्हा सरकारी वकील ॲड. विवेक शुक्ल यांच्या हस्ते हिरवा ध्वज दाखवून या बाइक पोलिस सेवेत दाखल करण्याचा समारंभ झाला. अलंकार हॉल परिसरात शनिवारी हा कार्यक्रम पार पडला.

गंभीर गुन्ह्याच्या तपासात भौतिक पुरावे गोळा करणे हा अत्यंत महत्वाचा भाग असतो. हा पुरावा घटनास्थळावरून शक्य तेवढ्या वेगाने शास्त्रीय पध्दतीने गोळा करावा लागतो. पोलिस अधीक्षक डॉ. अभिनव देशमुख यांच्या संकल्पनेतून आय-बाइकची संकल्पना कार्यान्वित करण्यात आली. गुन्हेगारांकडून आधुनिक तंत्रज्ञानाचा वापर अधिक केला जात आहे. दोषसिद्धीचे प्रमाणही समाधानकारक नाही. गुन्ह्यातील प्रत्यक्ष साक्षीदार व इतर साक्षीदार यांच्या साक्षी पुराव्यावर अवलंबून राहिल्यास दोषसिद्धीस फारसे यश मिळत नाही. कोर्टासमोर ऐन वेळी साक्षीदार फितूर होण्याची शक्यता आहे. तपास कामात गुन्हा सिद्ध होण्यासाठी वैयक्तिक साक्षीदारांसह घटनास्थळावरील भौतिक पुरावे महत्वाचे ठरतात. यापूर्वी जिल्ह्यासाठी एकच इन्व्हेस्टिगेशन व्हॅन होती. मात्र आता ६ आय-बाइक उपलब्ध झाल्या आहेत. त्यासाठी पोलिसांचे प्रशिक्षणही पूर्ण झाले आहे अशी माहिती यावेळी देण्यात आली.

यावेळी पोलिस अधीक्षक डॉ. अभिनव देशमुख, अप्पर पोलिस अधीक्षक तिरुपती काकडे, श्रीनिवास घाटगे उपस्थित होते.

म. टा. प्रतिनिधी, कोल्हापूर

कार्यकर्त्यांची मर्जी सांभाळण्यासाठी आणि जादा सदस्यांना पदाची संधी देण्याच्या कारणाखाली महापालिकेतील पदांच्या विभागणीचा खेळखंडोबा जिल्हा परिषदेतही सुरू होण्याची चिन्हे आहेत. महाविकास आघाडीतील अनेक सदस्यांची चार समित्यांच्या सभापतिपदी वर्णी लागावी म्हणून आठ-आठ महिन्यासाठी पद विभागणीचा निर्णय नेत्यांनी घेतल्याचे वृत्त आहे. १६ जानेवारी रोजी समिती सभापतिपदाच्या निवडी होणार आहेत. पदे चार आणि इच्छुक चौदा अशी सध्या स्थिती आहे.

जिल्हा परिषदेत भाजप व मित्रपक्ष आघाडीच्या विरोधात काँग्रेस, राष्ट्रवादी काँग्रेस, शिवसेना,स्वाभिमानी शेतकरी संघटना, चंदगड विकास आघाडी, शाहू विकास आघाडी, ताराराणी विकास आघाडी व अपक्ष यांची महाविकास आघाडी आकाराला आली. महाविकास आघाडीने अध्यक्ष व उपाध्यक्षपदाच्या निवडणुकीत भाजपला पराभूत सत्तेतून हद्दपार केले. चार समिती सभापतिपदापैकी तीन पदे शिवसेनेला आणि एक पद अपक्ष, शाहू विकास आघाडी व स्वाभिमानी शेतकरी संघटना यांच्यासाठी एक पद असे सूत्रे ठरले आहे.

शिवसेनेचे दहा सदस्य आहेत. त्यापैकी अंबरिश घाटगे हे गेली अडीच वर्षे भाजप आघाडीत सत्तेत सहभागी होते. त्यांना वगळून आता नऊ जणांपैकी कोणाकोणाला संधी द्यायची याविषयी सेनेत चर्चा सुरू आहे. खासदार संजय मंडलिक, आमदार प्रकाश आबिटकर, माजी आमदार सत्यजित पाटील उल्हास पाटील, सुजित मिणचेकर आणि चंद्रदीप नरके गटाच्या सदस्यांचा समावेश आहे. नरके गटाचे तीन सदस्य गेली अडीच वर्षे भाजपसोबत होते. त्यांच्या गटाला उपाध्यक्षपद मिळाले होते. नव्या सत्ता समीकरणात त्यांच्या गटाला कितपत संधी मिळणार याविषयी साशंकता आहे. सत्तेसाठी जमवाजमव करताना नेते मंडळींनी अनेकांना शब्द दिला आहे. त्यामुळे उर्वरित दोन वर्षाच्या कालावधीत आठ-आठ महिन्यासाठी पदांची विभागणी करण्याचे ठरल्याचे सदस्यांचे म्हणणे आहे.

बांधकाम, शिक्षण समितीवर अनेकांचा डोळा

माजी आमदार सत्यजित पाटील गटाचे दोन सदस्य आहेत. या गटाचे सदस्य हंबीरराव पाटील आणि मिणचेकर गटाचे सदस्य प्रविण यादव यांच्यामध्ये चुरस असेल. समाजकल्याण समितीच्या सभापतिपदासाठी उल्हास पाटील गटाच्या स्वाती सासने, नरके गटाच्या मनीषा कुरणे, कोमल मिसाळ यांची नावे घेतली जात आहेत. महिला व बालकल्याण समिती सभापतिपदासाठी वंदना जाधव, शिवानी भोसले यांची नावे चर्चेत आहेत. स्वाभिमानी शेतकरी संघटनेचा शिक्षण समिती सभापतिपदासाठी प्रयत्न सुरू आहे. संघटनेच्या सदस्या पद्माराणी पाटील यांचे नाव शिक्षणसाठी चर्चेत आहे. शिवसेनेचा एक गट शिक्षण समितीसाठी प्रयत्नशील आहे. अपक्ष सदस्या रसिका पाटील यांना कोणते पद मिळणार याविषयी जिल्हा परिषदेत चर्चा सुरू आहे.

'पी. एन.' गटाला स्थान मिळणार?

आमदार पी. एन. पाटील गटाचे चार सदस्य आहेत. मंत्रीपदाच्या हुलकावणीनंतर गटामध्ये नाराजीनाट्य रंगले. दरम्यान अध्यक्ष व उपाध्यक्षपदाच्या निवडीत पी. एन. गटाच्या सदस्यांनी काँग्रेस, राष्ट्रवादीच्या उमेदवारांच्या बाजूने मतदान केले. गटाचे सदस्य सुभाष सातपुते यांचा समाजकल्याण समिती सभापतिपदीपदासाठी दावा होता. मुळात एससी प्रवर्गासाठी अध्यक्षपद जाहीर होईल म्हणून त्यांनी तयारी केली होती. अध्यक्षपदाचे आरक्षण ओबीसी प्रवर्गासाठी घोषित झाल्याने ते मागे पडले. सत्तेच्या नव्या समीकरणात सातपुते यांना समिती सभापतिपदी संधी मिळणार का? पी. एन. गटाला किती संधी मिळेल याची उत्सुकता आहे.

म. टा. प्रतिनिधी, कोल्हापूर

'भारतीय नागरिकत्व कायद्यामध्ये दुरुस्ती करून भाजपने त्याचे स्वरुप बदलले आहे. केंद्रीय गृहमंत्री अमित शहा यांनी नॅशनल रजिस्टर ऑफ सिटीझनशिप हे देशामध्ये लागू करणार असल्याची घोषणा केली. पण पंतप्रधान नरेंद्र मोदी 'एनआरसी' पूर्ण देशात लागू होणार नाही असे विधान केले आहे. त्यानंतर सरकारने नॅशनल पॉप्युलेशन रजिस्टरची (एनपीआर) कार्यवाही सुरू करण्याची घोषणा केली आहे. सरकारची कृती राज्यघटनेच्या विरोधात असल्याने त्याच्याविरोधात जिल्ह्यातील डावे पक्ष एकवटले आहेत. त्यांनी या कायद्याविरोधातील लढा तीव्र करण्याचा निर्धार शनिवारी झालेल्या बैठकीत करण्यात आला.

डाव्या विचारांच्या पक्षांची शनिवारी बिंदू चौकातील भारतीय कम्युनिस्ट पक्षाच्या कार्यालयात व्यापक बैठक झाली. बैठकीच्या अध्यक्षस्थानी शेतकरी कामगार पक्षाचे कोल्हापूर शहर चिटणीस भाई बाबूराव कदम होते. यावेळी चंद्रकांत यादव म्हणाले, 'भारतीय नागरिकत्व कायद्याविरोधात देशातील जनता आंदोलने करून निषेध नोंदवत आहेत. देशातील सर्व जाती-धर्मामध्ये एकोपा टिकवून त्यांचे नेतृत्व करण्याचे काम डाव्या आघाडीने केले आहे. देशामध्ये या कायद्याविरोधात अराजक माजले आहे. त्यामुळे सर्व जनतेला सनदशीर मार्गाने लढा उभारून देणे हे आपले कर्तव्य आहे. त्याचप्रमाणे कोल्हापुरातील सर्व जातीधर्मातील लोकांमध्ये एकजूट घडवून आंदोलन डाव्या आघाडीने यशस्वीरीत्या उभारले आहे.'

भाकपचे राज्य सेक्रेटरी नामदेव गावडे यांनी देशातील जनतेमध्ये, विविध धर्मियांत भांडणे लावायचा प्रयत्न भाजप सरकार करत आहे, असा आरोप केला. ते म्हणाले, 'सर्वसामान्यांचे प्रश्न सोडवण्याऐवजी जनतेला धार्मिक हिंसाचारामध्ये गुंतवून ठेवण्याचे काम सरकार खूप हुशारीने करत आहे. त्यामुळे शांतता प्रस्थापित करून आंदोलने हिंसाचाराच्या दिशेने जाऊ नयेत यासाठी प्रयत्न करणे हे आपले कर्तव्य आहे.'

जिल्हा सेक्रेटरी सतीश्चंद्र कांबळे यांनी कायद्याच्या विरोधात लोकजागृती केली जाईल, असे सांगितले. अध्यक्षस्थानावरून बाबूराव कदम म्हणाले, 'कायद्याविरोधात जनतेने आपल्या मनातील असंतोष व उद्रेक आंदोलनांमधून केंद्र सरकारला दाखवून दिला आहे. जिल्ह्यात कायद्याविरोधात जनतेमध्ये प्रबोधनासाठी जनजागृती मोहीम राबविली जात आहे. मात्र सत्तारुढ भाजप या कायद्याच्या विरोधात आंदोलने करणारी जनता देशद्रोही आहे, असे भासवण्याचा प्रयत्न करीत आहे. संविधानानुसार जनतेत जनजागृतीबाबत भर दिला जाईल.'

कायद्याची भूमिका योग्य तऱ्हेने जनतेसमोर जाण्यासाठी हुमायून मुरसल यांनी पुस्तकाचे लेखन करावे असा निर्णय घेण्यात आला. जिल्ह्यात सभा, बैठका, निदर्शने अशा प्रकारच्या आंदोलनांचा निर्णय घेण्यात आला. बैठकीला मुरसल, रघुनाथ कांबळे, अनिल चव्हाण, स्नेहल कांबळे, स्वाती क्षीरसागर, शुभांगी पाटील, रमेश वडणगेकर, डॉ. इरफान नाईकवडी, रवी जाधव, जावेद तांबोळी, आरती रेडेकर, प्रशांत आंबी आदी कार्यकर्ते उपस्थित होते.

म. टा. प्रतिनिधी, कोल्हापूर

मध्यप्रदेश काँग्रेस सेवादलाने स्वातंत्र्यवीर सावरकर यांच्याबद्दल आक्षेपार्ह व निंदनीय लेख प्रसिद्ध केल्याबद्दल भाजपच्यावतीने शनिवारी शिवाजी चौकात काँग्रेस पक्षाविरोधात जोरदार निदर्शने करण्यात आली. यावेळी 'काँग्रेस पक्षाचा धिक्कार असो', 'वीर सावरकर अमर रहे', 'भारत माता की जय', अशा घोषणा देण्यात आल्या. काँग्रेस विरोधातील निषेधाचे फलक यावेळी दाखविण्यात आले.

भाजप सरचिटणीस अशोक देसाई यांनी मध्यप्रदेश काँग्रेस सेवादलाने स्वातंत्र्यवीर सावरकर यांच्याविषयी अतिशय वाईट मजकूर प्रसिद्ध केल्याबद्दल निषेध केला. जिल्हाध्यक्ष राहुल चिकोडे म्हणाले, 'भारतासाठी अनेक राष्ट्रपुरुषांनी त्याग, बलिदान दिले आहे. त्यात सावरकरांचे नाव अग्रक्रमाने घ्यावे लागेल. अशा राष्ट्रभक्ताबद्दल काँग्रेस सेवादलाच्या शिबिरात वाटलेल्या पुस्तकात आक्षेपार्ह विधाने मांडली गेली आहेत. ही अतिशय निंदनीय बाब आहे.'

पश्चिम महाराष्ट्र देवस्थान समितीचे अध्यक्ष महेश जाधव म्हणाले, 'सावरकरांनी देशाच्या स्वातंत्र्यासाठी संपूर्ण आयुष्य वेचले. काळ्या पाण्याची शिक्षा भोगत असताना वाघाचे काळीज असल्याचे धैर्य दाखवून समुद्रात उडी घेतली. त्यांच्याबद्दल अशा पद्धतीने खालच्या पातळीवर जाऊन केलेले लिखाण निषेधार्ह आहे.' भाजपचे प्रदेश उपाध्यक्ष धनंजय महाडिक म्हणाले, 'मध्यप्रदेश काँग्रेस सेवादलाच्या वतीने घडलेला प्रकार अतिशय निंदनीय आहे. मध्यप्रदेशचे मुख्यमंत्री व राहुल गांधी यांनी या प्रकारची जाहीर माफी मागावी.'

याप्रसंगी सरचिटणीस दिलीप मेत्राणी, नगरसेक विजय खाडे, अॅड. संपतराव पवार, गणेश देसाई, चंद्रकांत घाटगे, मामा कोळवणकर, विद्या बनछोडे, प्रज्ञा मालंडकर, आदींसह कार्यकर्ते उपस्थित होते.

००००००

म. टा. प्रतिनिधी, कोल्हापूर

महिलांसह बालकांवरील होणाऱ्या अन्यायाविरोधात जलदगतीने न्याय मिळावा, यासाठी महिला व बालन्यायालयाची संख्या एक हजारापर्यंत वाढवण्यात येणार आहे. सध्या महिला, बालन्यायालयाची संख्या ५५० इतकी आहे. ती येत्या तीन महिन्यात एक हजारापर्यंत वाढवण्यात येईल. राज्य महिला आयोगाच्या अध्यक्षा विजया रहाटकर यांनी शनिवारी ही माहिती दिली.

मंगळवारी पेठेतील बालकल्याण संकुलात शनिवारी 'महिला आयोग आपल्या दारी' या उपक्रमासाठी कोल्हापुरात आल्या होत्या. या उपक्रमानंतर त्यांनी पत्रकारांशी संवाद साधला. त्या म्हणाल्या, 'पोलिस प्रशासन आणि सामाजिक कार्यकर्त्यांच्या सामूहिक प्रयत्नामुळे महिलांकडून अत्याचाराविरोधात दाद मागण्यासाठी नोंदणीचे प्रमाण वाढत चालले आहे. 'महिला आयोग आपल्या दारी', या उपक्रमांतर्गत सामोपचारासाठी २४ कुटुंबीय आले होते. यापैकी २२ प्रकरणांत तत्काळ तडजोड झाली. विभक्त होऊ पाहणारी जोडपी पुन्हा एकत्र राहण्यास तयार झाली. केंद्र सरकारने बालकांच्या शोषणाविरोधात अत्यंत कडक कायदे केले आहे. गुन्हा सिद्ध झाल्यास आरोपीला फाशीची शिक्षा सुनावली जाते.'

महिला अत्याचारसंदर्भात पोलिसांनी दोन महिन्यात चार्जशीट दाखल करणे आणि न्यायालयाने दोन महिन्यात निकाल देणे आणि या निकालाविरोधात अपील केल्यास त्यावरही दोन महिन्यात निकाल देणे अपेक्षित आहे, असे सांगून रहाटकर म्हणाल्या की, या पातळीवर कोल्हापूर जिल्ह्याने कामात गती घेतली आहे. त्यासह डिजिटल साक्षरता अभियानांतर्गत महिलांच्या सक्षमीकरणासाठी महिला आयोग कार्यरत आहे. गाव आणि तालुका पातळीपर्यंत महिलांसाठी डिजिटल साक्षरता अभियान राबविण्यात येत आहे. राज्यात एक हजार महिलांपर्यंत पोहचण्याचे नियोजन आहे. महिला अत्याचार प्रबोधनाबाबतच्या ऑनलाइन अभ्यासक्रमालाही मोठा प्रतिसाद लाभत आहे. दरम्यान शनिवारी तीन पथकांच्यामाध्यमातून आलेल्या सामोपचाराच्या खटल्यात समुपदेशन करण्यात आले.

यावेळी सदस्या रोहिणी नायडू, जिल्हा पोलिस अधीक्षक डॉ. अभिनव देशमुख, पोलिस उपअधीक्षक प्रेरणा कट्टे आणि पद्मा पाटील, जिल्हाधिकारी कार्यालयाच्या सदस्या संगीता नेर्लीकर, बी. जी. काटकर आदी उपस्थित होते.

.. . .. ..

म. टा. प्रतिनिधी, कोल्हापूर

करवीरनिवासिनी श्री अंबाबाई मंदिर तीर्थक्षेत्र आराखडा, थेट पाइपलाइन योजना, शाहू मिलमध्ये राजर्षी शाहूंचे आंतरराष्ट्रीय स्मारक, सर्किट बेंचसह बहुउद्देशीय सभागृह आणि धामणीसह इतर सिंचन प्रकल्पांना प्राधान्य देणार आहे' असे नूतन मंत्री हसन मुश्रीफ आणि राज्यमंत्री सतेज पाटील यांनी सांगितले. जिल्ह्याच्या रखडलेल्या सर्व प्रश्नांना गती देण्यासाठी लवकरच आढावा बैठक घेणार आहे असेही त्यांनी स्पष्ट केले.

मंत्री मुश्रीफ आणि पाटील यांनी शनिवारी सायंकाळी 'महाराष्ट्र टाइम्स'च्या कार्यालयास सदिच्छा भेट दिली. यावेळी त्यांनी जिल्ह्यातील रखडलेल्या प्रश्नांना गती देण्याबरोबरच जिल्ह्यात विविध प्रकल्पांच्या माध्यमातून मोठी गुंतवणूक व्हावी यासाठी पाठपुरावा करणार असल्याचे स्पष्ट केले.

मंत्री मुश्रीफ म्हणाले, 'तीर्थक्षेत्र आराखडा मंजूर झाला. मात्र पाच वर्षात केवळ आठ कोटींचा निधी मिळाला. शहराच्या विकासाच्या दृष्टीने अतिशय महत्वाचा प्रकल्प असूनही त्याला निधी दिला गेला नाही हे दुर्दैव आहे. त्यामुळे या प्रकल्पासाठी तातडीने अधिकाधिक निधी देण्यासाठी पाठपुरावा करण्यात येईल. शहरातील रस्त्यांची अवस्था सुधारण्यासाठी निधी दिला जाईल. शहरात एकही मोठे सभागृह नाही. तीन ते चार हजार प्रेक्षक बसतील या पद्धतीचे भव्य सभागृह बेलबाग येथील महापालिकेच्या जागेवर उभारण्यात येईल. बंद पडलेल्या शाहू मिलमध्ये राजर्षी शाहू महाराजांचे आंतरराष्ट्रीय स्मारक व्हावे ही कोल्हापूरकरांची इच्छा आहे. त्यासाठी निश्चितपणे प्रयत्न करण्यात येईल.'

मंत्री मुश्रीफ म्हणाले, 'गेल्या पाच वर्षांत तत्कालीन सरकारने कृष्णा लवादानुसार आपल्या वाट्याचे एक थेंबही पाणी अडवले नाही. यापुढे सिंचन प्रकल्पांच्या कामांना गती देण्यात येईल. यामुळे या प्रकल्पांचा खर्च वाढत निघाला आहे. धामणीसह अनेक प्रकल्पांना गती मिळालेली नाही. प्रकल्पाचा खर्च आणखी वाढू नये म्हणून तातडीने या प्रकल्पाला गती देण्यात येईल. त्याचबरोबर जिल्ह्यातील उचंगी, सर्फनाला, आंबेओहोळ या प्रकल्पांना निधी देत अधिकाधिक पाणी अडविले जाईल.'

मंत्री सतेज पाटील यांनी थेट पाइपलाइन योजनेचे काम तातडीने पूर्ण करण्यासाठी प्रयत्न करणार असल्याचे सांगितले. ते म्हणाले, 'साडेचारशे कोटींचा हा प्रकल्प असूनही तत्कालीन सरकारने महापालिकेकडे यासाठी स्वतंत्र अधिकारी दिला नाही. त्यामुळे कामावर लक्ष देणारा जबाबदार अधिकारीच नाही. आता मात्र या प्रकल्पासाठी स्वतंत्र अधिकारी नियुक्त करण्यात येईल. महापालिकेत उपायुक्त व सहाय्यक आयुक्त ही पदे रिक्त आहेत. ती तातडीने भरण्यात येतील. तीर्थक्षेत्र आराखड्याचा आढावा घेण्यासाठी तातडीने बैठक आयोजित केली जाईल. कचरा प्रकल्पाचा प्रश्नही प्रलंबित आहे. त्यावर मार्ग काढण्यासाठी संबंधितांशी चर्चा केली जाईल.'

गुंतवणुकीला प्राधान्य

'उद्योगातील मंदी दूर होण्याबरोबरच जिल्ह्यात एखाद्या प्रकल्पाच्या माध्यमातून मोठी गुंतवणूक वाढावी यासाठी प्रयत्न करणार आहे. उद्योगात मंदी आहे. वीजेचे दर परवडत नसल्याने उद्योग इतर राज्यात जात आहेत. त्यामुळे वीजदर कमी करण्याबरोबरच उद्योजकांना अधिकाधिक सोयी व सुविधा देण्याचा आमचा प्रयत्न राहील. शेतकरी कर्जमाफी योजनेत काही त्रुटी आहेत. प्रामाणिकपणे कर्ज भरणाऱ्या शेतकऱ्यांना त्याचा लाभ व्हावा यासाठी पाठपुरावा करण्यात येईल,' असे मंत्री मुश्रीफ आणि पाटील यांनी सांगितले.

कोल्हापूर पाकिस्तानात आहे का?

'जिल्ह्यातील रस्ते खराब आहेत. बांधकाम खाते चंद्रकांत पाटील यांच्याकडे होते. त्यामुळे गावागावांना जोडणारे सर्व रस्ते तरी चांगले व्हावेत ही अपेक्षा होती. पण तसे झाले नाही. इचलकरंजी शहरातील रस्त्यासाठी सुरेश हाळवणकर यांनी शंभर कोटींचा निधी मंजूर करून घेतला. पण कोल्हापूर शहरासाठी निधी मिळाला नाही. मग, कोल्हापूर शहर पाकिस्तानमध्ये आहे का?' असा सवाल करून मुश्रीफ म्हणाले, भाजप सरकारने हा भेदभाव कशासाठी केला? हेच कळत नाही.'

म. टा. प्रतिनिधी, कोल्हापूर

इतर शहरांतील मटणाच्या वाढीव दरांमुळे व बकऱ्यांच्या वाढलेल्या किंमतींमुळे विक्रीमध्ये तफावत निर्माण होत असल्याने रविवारी शहरातील सर्वच मटण विक्रेत्यांनी दुकाने बंद ठेवली. दर रविवारी तांबड्या पांढऱ्या रश्श्यावर ताव मारणाऱ्या खवय्यांचा मटण दुकाने बंद असल्याने चांगलाच हिरमोड झाला. बंदमुळे या व्यवसायातील एक दिवसाची सुमारे दीड कोटींची उलाढाल ठप्प झाली.

मटण विक्रेत्यांच्या मनमानी दरामुळे शहरात ग्राहक आणि विक्रेते यांच्यामध्ये चांगलाच वाद निर्माण झाला होता. जिल्हाधिकारी दौलत देसाई यांनी विशेष समितीची नेमणूक करुन समितीने ठरवलेल्या दरानुसार मटण विक्री करण्याचे आदेश दिले. त्यानुसार प्रतिकिलो ४८० रुपयांनी मटण विक्रीस सुरुवात झाली. पण विक्रीदरम्यान अन्न व औषध प्रशासन विभाग आणि वजनमापे विभागाने तपासणी करण्यास सुरुवात केली. महापालिकेच्या कत्तलखान्यातून बकरी कापून घेतली असताना, तपासणी सुरू केल्याने विक्रेत्यांनी नाराजी व्यक्त केली. शिक्का मारुन घेतले मटण असताना या छापामारीमुळे ऐन ३१ डिसेंबर रोजी लक्ष्मीपुरी मटण मार्केटमध्ये विक्रेते व अधिकारी यांच्यामध्ये चांगलाच संघर्ष उफाळून आला.

हा संघर्ष कमी होत असतानाच पुणे व सोलापूर येथील मटणाचा दर ६०० रुपये झाला. त्यामुळे जिवंत बकरी कोल्हापूरऐवजी बाहेरील मार्केटमध्ये विक्री करण्यास सुरुवात केली. त्यामुळे विक्रेत्यांना बकऱ्यांची टंचाई जाणवू लागली. त्यातच जिवंत बकरी आणि मटण दरामधील तफावत वाढत असल्याने बुधवारपासून मटण दुकाने बंद ठेवण्याचा निर्णय घेतला. त्याचा परिणाम रविवारी मोठ्या प्रमाणात दिसून आला. दर रविवारी एक टन चिकन, तीन टन मटण आणि ५० हजार किलो माशांची विक्री होते. या व्यवसायातून केवळ रविवारी दीड कोटीपर्यंत उलाढाल होते. पण शहरातील बहुतांशी दुकाने बंद असल्याने सुटी दिवशी पांढऱ्या-तांबड्या रश्श्यावर ताव मारणाऱ्या खवय्यांचा चांगलाच हिरमोड झाला. प्रमुख मटण मार्केटमधील विक्री बंद असली, तरी कसबा बावडा व राजारामपुरी संयुक्त मटण विक्री केंद्राने महापालिकेच्या कत्तलखान्यातून बकरी शिक्का मारुन घेतली.

....

चौकट

कत्तलखान्याचा परवाना प्रतीक्षेत

मटण दरावरुन वाद निर्माण झाल्यानंतर विक्रेत्यांनी महापालिकेचा कत्तलखाना बंद असल्याने मटण शिक्कामारुन मिळत नसल्याच्या तक्रारी केल्या. अन्न व औषध प्रशासनाने कत्तलखान्याबाबत दुरुस्ती करुनच सुरू करण्याची सूचना केली. दुरुस्ती करुन प्रशासनाने ३० डिसेंबर रोजी परवान्यासाठी ऑनलाइन अर्ज केला. पण आठ दिवसांनंतरही परवान्याबाबत निर्णय झालेला नाही. 'दुरुस्तीनंतरही अन्न व औषध प्रशासनाने काही सूचना केल्यास त्यानुसार अंमलबजावणी करण्यासाठी अर्ज करण्यापूर्वीच तयारी केली आहे,' अशी माहिती पशुवैद्यकीय अधिकारी डॉ. विजय पाटील यांनी दिली.

फोटो अर्जुन

..............

बाजारभाव .. . लोगो

म. टा. प्रतिनिधी, कोल्हापूर

गेल्या दीड महिन्यात शंभरी पार केलेल्या कांद्याच्या दरात आता घसरण होत आहे. तसेच पालेभाज्यांची आवक मोठ्या प्रमाणात झाल्यामुळे पाच रुपयाला मेथी, पालक, चाकवत, करडा, पोकळा, शेपू आणि कोथिंबीरची पेंडी मिळत आहे. सफरचंदाच्या दरात किलोमागे दहा ते पंधरा रुपयांनी वाढ झाल्याचे विक्रेत्यांनी सांगितले.

सरत्या वर्षात कांद्याच्या वाढलेल्या दराने ग्राहकांच्या डोळ्यांत पाणी आणले होते. घरातील स्वयंपाकासह लहानसहान हॉटेल, खानावळ आणि मेसमध्येही कांद्यांचा वापर कमी झाला होता. चांगल्या प्रतीचा कांदा प्रतिकिलो १०० रुपयांपर्यंत पोहचला होता. या आठवड्यात मात्र कांद्याच्या दरात घसरण झाली आहे. रविवारच्या बाजारात कांदा प्रतिकिलो ३० ते ७० रुपये या दराने उपलब्ध होता.

या आठवड्यात पालेभाज्यांची आवक मोठ्या प्रमाणात झाली. यामुळे पालेभाज्या स्वस्त झाल्या आहेत, असे विक्रेत्यांनी सांगितले. पाच रुपये दराने विविध प्रकारच्या पालेभाज्यांच्या पेंढीची विक्री करण्यात आली. मेथी, पालक, चाकवत, करडा, पोकळा, कोथिंबीरची आवक वाढल्याने पाच रुपयाला एक पेंढी असा दर होता. टोमॅटो, काकडी, गाजर, वांगी, बटाटा, दोडका या भाज्यांच्या दरातही चढउतार होते. गवारीचा दर प्रतिकिलो ६० ते ७० रुपये या दरम्यान होता.

.....

पालेभाज्यांचे अन्य दर प्रतिकिलो

टोमॅटो २५ ते ३०

दोडका ४० ते ५०

वांगी ३० ते ४०

काकडी ३५ ते ४०

गाजर ३० ते ४०

गवारी ६० ते ७०

ढब्बू मिरची ६०

मिरची ६०

वाटाणा ४०

कांदा ३० ते ७०

बटाटा ३०

...

सरफचंदाच्या दरात वाढ

सफरचंदांची आवक कमी झाल्यामुळे प्रतिकिलो दहा ते पंधरा रुपयांनी वाढ झाली आहे. सफरचंदाचा दर १०० ते १२० रुपयापर्यंत पोहचला आहे. डाळींब, बोर, द्राक्षांची आवक वाढत असल्यामुळे दर स्थिर आहेत. बोरे वीस रुपये किलोपासून उपलब्ध आहेत. डाळींबाची प्रतिकिलो ६० ते ७० रुपये दराने विक्री सुरू आहे.

फोटो आहे.

........

पुरोगामी शिक्षक संघटनेतर्फे 'क्रांतिज्योती सावित्रीची लेक पुरस्कार' वितरण

म. टा. प्रतिनिधी, कोल्हापूर

'प्रशासन लोकाभिमुख होवून समाजातील प्रत्येक घटकास सेवा मिळण्यासाठी महिला अधिकारी उठावदार कामगिरी करत आहेत. त्यांच्या कार्याची पुरोगामी शिक्षक संघटनेने घेतलेली दखल प्रेरणादायी व पुढील कार्यासाठी उर्मी देणारी ठरेल,' असे गौरवोद्गार जि.प. चे मुख्य कार्यकारी अधिकारी अमन मित्तल यांनी काढले.

महाराष्ट्र पुरोगामी प्राथमिक शिक्षक संघटनेतर्फे 'क्रांतिज्योती सावित्रीची लेक' पुरस्कार वितरण सोहळा झाला. मित्तल यांच्या हस्ते पुरस्कार वितरण झाले. माजी सहायक शिक्षण संचालक संपत गायकवाड कार्यक्रमाच्या अध्यक्षस्थानी होते. कळंबा येथील बापूसो साळोखे सभागृह येथे कार्यक्रम झाला. समन्वय समितीचे मोहन भोसले, होमिओपॅथिक असोसिएशनचे डॉ. संदीप पाटील यांची प्रमुख उपस्थित होती.

संपत गायकवाड म्हणाले, 'आपण समाजाचे काही तरी देणे लागतो या भावनेतून महिला अधिकारी विविध पदांवर काम करत आहेत. कर्तव्यभावनेतून त्या आपल्या पदास न्याय देत आहेत.'

पुरोगामी शिक्षक संघटनेचे राज्याध्यक्ष प्रसाद पाटील म्हणाले, 'पुरोगामी शिक्षक संघटना नेहमीच आदर्शवत काम करणाऱ्या शिक्षकांच्या पाठीशी राहिली आहे. आता शिक्षण क्षेत्रातील कर्तव्य तत्पर महिला अधिकाऱ्यांचा सन्मान करुन त्यांना प्रेरणा देण्याचे काम केले आहे.' डॉ. संदीप पाटील यांचे 'महिलांचे आरोग्य' या विषयावर व्याख्यान झाले. नकुशी देवकर यांनी 'मी सावित्री बोलतेय' ही नाट्यछटा सादर केली.

संघटनेच्या सरचिटणीस शारदा वाडकर यांनी स्वागत केले. महिला जिल्हाध्यक्षा गीता कोरवी यांनी प्रास्ताविक केले. अशोक खाडे व अनघा कानकेकर यांनी सूत्रसंचालन केले. जिल्हाध्यक्ष एस. के. पाटील यांनी आभार मानले. कार्यक्रमाला संघटनेचे राज्य पदाधिकारी रंगराव वाडकर, प्रमिला माने, मालती राजमाने, शंकर पवार, सुनील पोवार, आनंदराव जाधव, शिक्षण विस्तार अधिकारी विश्वास सुतार आदी उपस्थित होते.

................

पुरस्काराचे मानकरी

ग्रामसेवक प्रशिक्षण संस्थेच्या प्राचार्या सुषमा देसाई, एसएससी बोर्डातील उपसचिव सुवर्णा सावंत, शालेय पोषण आहार लेखाधिकारी वर्षा परीट, अधीक्षक वसुंधरा कदम, प्रभारी उपशिक्षणाधिकारी जयश्री जाधव, प्रभारी गटशिक्षणाधिकारी सुमन सुभेदार (चंदगड), शिक्षण विस्तार अधिकारी भारती कोळी (करवीर), तारामती गायकवाड (राधानगरी),भारती शिंदे (भुदरगड), सारिका कासोटे (कागल), नम्रता गुरसाळे (हातकणंगले), रत्नप्रभा दबडे (शिरोळ), केंद्रप्रमुख संजीवनी कांबळे (राधानगरी), सुनीता किणेकर (कागल), शीलप्रभा करपे (करवीर), उपक्रमशील शिक्षिका प्रतिभा चौगले, डाटा ऑपरेटर शीतल पाटील (भुदरगड) यांना पुरस्कारांनी सन्मानित केले.

........

ओळी

महाराष्ट्र पुरोगामी प्राथमिक शिक्षक संघटनेतर्फे सीईओ अमन मित्तल यांच्या हस्ते आणि माजी सहाय्यक शिक्षण संचालक संपत गायकवाड व संघटनेचे राज्याध्यक्ष प्रसाद पाटील यांच्या प्रमुख उपस्थितीमध्ये क्रांतिज्योती सावित्रीची लेक पुरस्काराचे वितरण झाले.

जिल्हा परिषद लोगो वापरावा

........

म. टा. प्रतिनिधी, कोल्हापूर

काँग्रेस, राष्ट्रवादी आणि शिवसेनेच्या नेत्यांनी इतर घटक पक्षांची मोट बांधत जिल्हा परिषदेतील भारतीय जनता पक्षाची सत्ता काबीज केली. मात्र पद विभागणीचा फॉर्म्युला ठरविताना शिवसेनेला झुकते माप दिल्यामुळे दोन्ही काँग्रेसमध्ये धुसफूस सुरू आहे. शिवाय अध्यक्ष व उपाध्यक्षपदाच्या निवडीत काँग्रेसचे नेते राज्यमंत्री सतेज पाटील आणि राष्ट्रवादीचे नेते ग्रामविकास मंत्री हसन मुश्रीफ यांनी अनुक्रमे कारखाना कार्यक्षेत्र व विधानसभा मतदारसंघातील सदस्यांची पदांवर वर्णी लावली, अशी कुजबुजही दोन्ही काँग्रेसमध्ये सुरू झाली आहे. 'पहिल्यांदा मतदारसंघ, बाकीचे नंतर'हे सूत्र नेत्यांनी अवलंबिले असल्याची चर्चा सदस्यांत आहे.

दुसरीकडे गगनबावड्यासारख्या दुर्गम भागातील व काँग्रेस पक्षासोबत गेली चार दशके एकनिष्ठ असलेल्या ज्येष्ठ सदस्य बजरंग पाटील यांना जिल्हा परिषद अध्यक्षपदी संधी मिळाली, यामुळे त्या भागाच्या विकासाला चालना मिळेल तसेच काँग्रेसनिष्ठ कार्यकर्त्याचा सन्मान झाला अशा भावनाही कार्यकर्त्यांत आहेत. उपाध्यक्षपदी सतीश पाटील यांच्यासारख्या धडाडीच्या कार्यकर्त्याला संधी मिळाल्याच्या भावनाही राष्ट्रवादीतून उमटत आहेत. मात्र काँग्रेस (१४) आणि राष्ट्रवादी काँग्रेसचे (११) मिळून २५ सदस्य असताना जिल्हा परिषदेच्या सत्तेच्या समीकरणात अध्यक्ष व उपाध्यक्षपद ही दोनच पदे वाट्याला आल्यामुळे सदस्यांत नाराजीचा सूर उमटण्यास सुरुवात झाली आहे. याउलट शिवसेनेचे दहा सदस्य आणि पदे मात्र तीन याकडे अनेकजण लक्ष वेधत आहेत.

अध्यक्षपद, नागरिकांचा मागास प्रवर्गासाठी आरक्षित झाल्यानंतर संबंधित सदस्यांच्या अपेक्षा उंचावल्या होत्या. काँग्रेसकडून सदस्य बजरंग पाटील, पांडूरंग भादिंगरे यांची नावे आघाडीवर होती. पाटील हे राज्यमंत्री सतेज पाटील यांचे समर्थक म्हणून ओळखले जातात. तर भादिंगरे हे काँग्रेसचे प्रदेश उपाध्यक्ष आमदार पी. एन. पाटील यांच्या गटाचे समजले जातात. मंत्रिपदाच्या हुलकावणीनंतर पी. एन. पाटील गटाचा स्वतंत्र मेळावा झाला. गोवा येथे सहलीवर गेलेले सदस्य परतले. पी. एन. गट नाराज झाल्यामुळे दोन्ही काँग्रेस व शिवसेनेच्या नेत्यांनी बहुमतासाठी विविध आघाड्या व शिवसेनेला सोबत घेतले.

दरम्यान, प्रत्यक्ष निवडीत पी. एन. गटाचे चारही सदस्य दोन्ही काँग्रेसच्या उमेदवारांसोबत राहिले. या गटाकडून एका पदासाठी दावा करण्यात आला आहे. सदस्य सुभाष सातपुते यांचे नाव समाजकल्याण समिती सभापतिपदासाठी चर्चेत आहे. दुसरीकडे राष्ट्रवादीमध्ये उपाध्यक्षपदासाठी सतीश पाटील व जयवंत शिंपी यांच्यामध्ये रस्सीखेच होती. शिंपींसह अन्य इच्छुक सदस्यांना संधी कोठे मिळणार हे अनुत्तरित आहे. दरम्यान, शिवसेनेला तीन पदे आणि अन्य घटकांना एक पद या फॉर्म्युलामुळे काँग्रेस व राष्ट्रवादीला केवळ एक,एक पदावर समाधान मानावे लागणार आहे. जास्त संख्या असूनही दोन्ही काँग्रेसच्या सदस्यांच्या पदरात फार काही पडणार नाही याकडे काहीजण लक्ष वेधत आहेत.

...

शिवसेनेत पदासाठी रस्सीखेच

१६ जानेवारी रोजी समिती सभापतिपदाच्या निवडी आहेत. शिवसेनेच्या दहा सदस्यांतही पहिल्यांदा संधी कोणाला मिळणार यावरुन रस्सीखेच आहे. माजी आमदार चंद्रदीप नरके व माजी आमदार संजय घाटगे यांचा गट गेली अडीच वर्षे भाजपसोबत सत्तेत होता. त्या गटाला पुन्हा पद देण्यास शिवसेनेतील इतर गटाचा अंतर्गत विरोध आहे. आमदार प्रकाश आबिटकर, माजी आमदार सत्यजित पाटील, सुजित मिणचेकर, उल्हास पाटील गटाच्या सदस्यांची समिती सभापतिपदी वर्णी लागावी यासाठी प्रयत्न सुरू आहेत. स्वाभिमानी शेतकरी संघटनेने शिक्षण समितीवर दावा केला आहे.

म. टा. प्रतिनिधी, कोल्हापूर

कोल्हापूर जिल्हा माध्यमिक शिक्षक सहकारी पतसंस्थेविषयी ज्या संचालक व सभासदांनी माहिती मागवली आहे त्यांना तत्काळ उपलब्ध करुन द्यावी, असा लेखी आदेश जिल्हा उपनिबंधक अमर शिंदे यांनी 'कोजिमाशी'चे मुख्य कार्यकारी अधिकारी अरविंद पाटील यांना काढला आहे. तसेच त्या संबंधीचा अहवाल जिल्हा उपनिबंधक कार्यालयाला सादर करावा. सभासद व संचालकांनी पतसंस्थेविषयी विचारलेली माहिती देणे महाराष्ट्र सहकारी संस्था अधिनियम १९६० मधील कलम ३२ नुसार बंधनकारक असल्याचे म्हटले आहे.

'कोजिमाशि'चे संचालक समीर घोरपडे व संदीप पाटील यांनी सीईओ पाटील यांच्या विरोधात तक्रार केली होती. सीईओ पाटील हे पक्षपातीपणा करत आहेत. सत्ताधारी आघाडीच्या कारभाऱ्यांच्या हातचे ते बाहुले बनले आहेत. दोघांमध्ये संगनमत असून संचालकांचे अधिकार डावलत आहेत. सीईओंकडून मागितलेली माहिती मिळत नाही,' असेही निवेदनात म्हटले होते. २०१५ पासून आजपर्यंतच्या चेअरमन निवडीचा इतिवृत्तांत, मदतनिधी, दिवाळी भेट खरेदी पावत्या, सुवर्ण महोत्सवी भेट वस्तू खरेदी पावत्यांसह नऊ प्रकारची माहिती मागितली होती.

या संदर्भात सीईओ पाटील म्हणाले, 'त्या दोन्ही संचालकांनी प्रत्यक्ष संस्थेत येऊन कागदपत्रे बघितली आहेत. त्यांना जी कागदपत्रे आवश्यक होती, त्या विषयासंदर्भातील अंतिम बिले अजून तयार नव्हती. म्हणून संबंधित बिले त्यांना दाखविता आली नाहीत. शिवाय त्यांनी २०१५ पासून माहिती मागितली आहे, त्यासाठी पाच, सहा दिवसांचा कालावधी लागेल. सीईओ म्हणून निपक्षपातीपणे काम करत आहे. कोणत्याही संचालकांच्या अधिकाराला बाधा येईल असे काम केलेले नाही. '

म. टा. प्रतिनिधी, कोल्हापूर

भारतीय बौद्ध महासभा, कोल्हापूर जिल्हा शाखा आणि ग्रामशाखा माणगांव यांच्या संयुक्त विद्यमाने २१ व २२ मार्च २०२० रोजी 'बौद्ध धम्म परिषद' आयोजित केली आहे. माणगांव परिषदेच्या शतक महोत्सवानिमित्त धम्म परिषद भरविली आहे. या कालावधीत माणगांव येथे विविध कार्यक्रम होणार आहेत, अशी माहिती बौद्ध महासभेचे जिल्हाध्यक्ष एस. पी. दिक्षित यांनी दिली.

दिक्षित म्हणाले, 'भारतरत्न डॉ. आंबेडकर यांनी १९५४ मध्ये भारतीय बौद्ध महासभेची स्थापना केली. सध्या २५ राज्यात महासभा कार्यरत आहे. माणगांव परिषदेचे यंदा शताब्दी महोत्सव वर्ष आहे. यानिमित्त राजर्षी शाहू महाराज, डॉ. बाबासाहेब आंबेडकर व आप्पासाहेब पाटील यांच्या परिवारातील सदस्यांचा बौद्ध धम्म परिषदेत सत्कार करण्यात येणार आहे. त्यांना १००० समता सैनिकांच्यावतीने मानवंदना दिली जाईल. पाच जानेवारीपासून धम्मरथाचे आयोजन केले आहे. तसेच १०० गावांमध्ये महिला उपासिका शिबिरे होणार आहेत. '

श्रीमंत शाहू महाराज छत्रपती यांच्या हस्ते २१ मार्च रोजी परिषदेचे उद्घाटन होणार आहे. यावेळी बौद्ध महासभेचे राष्ट्रीय कार्याध्यक्ष भिमराव आंबेडकर यांची प्रमुख उपस्थिती असेल. परिषदेच्या पहिल्या दिवशी अधिवेशन, दुसऱ्या दिवशी खुले अधिवेशन, ठराव वाचन करण्यात येणार आहे. पत्रकार परिषदेला चैत्यभूमी मुंबईचे सदस्य भदंत धम्मप्रिय, महासभेचे जिल्हा सरचिटणीस अरविंद कांबळे, एस. आर. कांबळे, नंदकुमार शिंगे आदी उपस्थित होते.