म. टा. प्रतिनिधी, कोल्हापूर मटण दरवाढीवरून गेले काही दिवस सुरू असलेल्या वादावर तोडगा काढण्याच्या हालचाली सुरू आहेत. मटण विक्रेते आणि विविध संस्था व मंडळाच्या प्रमुख पदाधिकाऱ्यांची मंगळवारी (ता. १०) बैठक होण्याची शक्यता आहे. ग्राहक व विक्रेते या दोघांनाही परवडेल या पद्धतीने मटण दर निश्चित होण्याची शक्यता आहे. दरम्यान मटण दरवाढीच्या विरोधात श्री शिवाजी तरुण मंडळ व विविध तालीम संस्थांच्या पदाधिकाऱ्यांनी पुकारलेल्या मटण विक्री बंदला प्रतिसाद मिळाला. शिवाजी पेठ, उत्तरेश्वर पेठ, फुलेवाडी, रिंगरोड, सानेगुरुजी वसाहत परिसरातील २० हून अधिक मटणाची दुकाने बंद राहिली. दरम्यान शिवाजी तरुण मंडळाचे अध्यक्ष सुजित चव्हाण, उपाध्यक्ष अजित राऊत, अजित खराडे, संजय कुऱ्हाडे, सुहास साळोखे, संजय पडवळ, शरद नागवेकर, सुरेश जरग, जयकुमार शिंदे, तुकाराम इंगवले यांनी सकाळी शिवाजी पेठ परिसरात दुचाकीवरुन रॅली काढून मटण विक्रीची दुकाने बंद ठेवण्याचे आवाहन केले. विक्रेत्यांनी आवाहनाला प्रतिसाद देऊन दुकाने बंद केली. मटण विक्रेत्यांनी ४५० रुपये दराने मटण विक्री करावी, अन्यथा दुकाने बंद करू, असा इशारा शिवाजी पेठेतील मंडळांनी दोन दिवसांपूर्वी शिवाजी मंदिर येथे झालेल्या बैठकीत दिला होता. दुसरीकडे विक्रेत्यांनी ५४० रुपये दराने मटण विक्रीचा निर्णय घेतला. दरावरून वाद निर्माण होऊ नये म्हणून खाटीक समाजाचे जिल्हाध्यक्ष विजय कांबळे व शिवाजी तरुण मंडळाचे सुजित चव्हाण यांच्यामध्ये फोनवरून चर्चा झाली. मटण विक्रेते व ग्राहकांना परवडेल, असा सन्मानजनक दर ठरविण्याबाबत दोन दिवसांत बैठक घेण्याचे ठरले आहे. राजारामपुरीतील मंडळाची सोमवारी बैठक होणार आहे. त्या बैठकीनंतर मटण विक्रेत्यांचे प्रतिनिधी, विविध तालीम मंडळाचे पदाधिकारी व कृती समिती अशी संयुक्त बैठक मंगळवारी होणार आहे. राजारामपुरीत आज बैठक मटण दरवाढीला विरोध करण्यासाठी राजारामपुरी परिसरातील विविध मंडळाच्या पदाधिकाऱ्यांची सोमवारी (ता. ९) सायंकाळी ६.३० वाजता राजारामपुरी तालीम मंडळासमोर बैठक होणार आहे. मटण दरवाढ विरोधी कृती समितीचे अॅड. बाबा इंदूलकर यांनी यासंदर्भात माहिती दिली. कृती समितीच्या पुढाकारातून रविवारी परवडणाऱ्या दरात मटण विक्री करण्यात आली. १०० किलो मटण विक्री झाल्याचे त्यांनी सांगितले.
मोबाइल अॅप डाउनलोड करा आणि राहा अपडेट