लोगो : प्रयोगशील शेतकरी ०००० एंट्रो.... पारंपरिक शेतीला फाटा देत जिल्ह्यातील अनेक शेतकऱ्यांनी आधुनिक शेतीची कास धरत उसाबरोबर भात, भुईमूग, सोयाबीन, भाजीपालासारख्या कमी कालावधीच्या पिकांतून प्रगती साधता येत असल्याचे स्वकष्टातून दाखवून दिले आहे. अशा उपक्रमशील शेतकऱ्यांची दखल राज्य सरकारकडून घेतली जाते. विधानसभा निवडणुकीची आचारसंहिता जाहीर होण्याच्या केवळ एक दिवस अगोदर २०१७-१८ कृषी पुरस्कार जाहीर करण्यात आले. वसंतराव नाईक कृषिभूषण पुरस्कार कसबा सांगाव येथील सुरेश मगदूम, शेतीनिष्ठ पुरस्कार चाफोडी येथील कुंडलिक पाटील व शेतीमित्र पुरस्कार मोहन पाटील या जिल्ह्यातील तीन शेतकऱ्यांचा जाहीर झाला आहे. तर इतर पुरस्कारांमध्ये नऊ शेतकऱ्यांनी स्थान मिळवले आहे. अशा प्रयोगशील शेतकऱ्यांचा आढावा आजपासून. ००००० फोटो दोन Maruti.Patil@timesgroup.com tweet: @MarutipatilMT कोल्हापूर : कसबा सांगाव (ता. कागल) येथील सुरेश मगदूम म्हणजे आधुनिक शेतीची कास धरणारे व्यक्तिमत्त्व. कोरडवाहू पिकांपासून बागायत पिकांचे हमखास उत्पन्न घेणारे शेतकरी म्हणून त्यांची ओळख. सोयाबीन, भात, भुईमूग, झेंडू, केळी, भाजीपाला व ऊस अशी सर्वच पिके यांच्या शेतात घेतली जातात. काळम्मावाडी धरण आणि कॅनॉलला पाणी येण्यापूर्वी भात, ज्वारी, तंबाखू यांसारख्या पिकांतून त्यांनी प्रगती साधली. काळम्मावाडी धरणाचे पाणी कागल तालुक्यात फिरू लागल्यानंतर मगदूम यांच्या शेतातील पिके बदलून गेली. पारंपरिक शेतीला आधुनिकतेची जोड देताना एकाचवेळी विविध पिके घेण्याचा हातखंडा निर्माण केला. बाजारातील एखाद्या पिकाचे दर ढासळल्यास इतर पिकांमुळे शेतीवर विपरित परिणाम होऊ नये, याची विशेष काळजी घेतली. शेतीला सेंद्रीय खते मुबलक प्रमाणात मिळण्यासाठी दुग्ध उत्पादनाला सुरुवात केली. त्याचा प्रचंड फायदा त्यांना झाला. शेतीसोबत दुग्ध उत्पादनाचा जोड व्यवसाय करताना त्यांनी आर्थिक प्रगती साधली. ऊस उत्पादनातून दीड ते पावणे दोन वर्षांत उत्पन्न मिळत असल्याने सोयाबीनसारख्या नगदी पिकावर लक्ष केंद्रित केले. त्यांनी एकरी १५ क्विंटल उत्पादन घेतले. त्याची दखल पंचायत समिती व जिल्हापातळीवर घेण्यात आली. त्यानंतर केवळ सोयाबीन उत्पादनाचा राज्यस्तरावरील पुरस्कार २००९ व २०११ मध्ये मिळाला. त्यासाठी ते सातत्याने नवनवीन गोष्टी शिकण्यावर भर देतात. कृषी विद्यापीठ व कृषी विभागाच्या मार्गदर्शनानुसार पिकांमध्ये बदल करतात. त्यांच्या शेतात नारळ, चिकू, हापूस, केशर फळ पिकेही घेतली जातात. १९७५ पासून त्यांनी शेतीमध्ये सुरू केलेले प्रयोग अव्याहतपणे सुरू आहेत. या प्रयोगाच्या माध्यमातूनच त्यांनी एकदा वसंतराव नाईक शेतीनिष्ठ व आता कृषिभूषण पुरस्कार मिळवला आहे. त्यांचे प्रयोग युवा शेतकऱ्यांना प्रेरणादायी आहेत. ०००० कोट खतांचा केवळ वारेमाप वापर केल्याने उत्पादनात वाढ होणार नाही. योग्य खतांची मात्रा देण्यासाठी माती परीक्षण करण्याची आवश्यकता आहे. सेंद्रीय खतांचा वापर केल्याशिवाय रासायनिक खतांची मात्रा लागू होणार नाही. हमखास उत्पन्नवाढीसाठी पाणी आणि खतांचे योग्य व्यवस्थापन अनिवार्य आहे. सुरेश मगदूम, कृषिभूषण पुरस्कार विजेते ००००० सामाजिक कार्यातही अग्रेसर शेतीला मुबलक पाणी देण्यासाठी सामुदायिक नळ पाणीपुरवठा योजना उभारण्याचा मगदूम यांनी निर्धार केला. दहा शेतकऱ्यांना एकत्र करत सुमारे पाच कि.मी.वरून योजना सुरू केली. प्रत्येकी २५ लाख रुपये खर्च करून त्यांनी योजनेला गती दिली. योजनेच्या माध्यमातून बारमाही पाणी मिळू लागल्याने त्यांच्यासह इतर शेतकऱ्यांचीही आर्थिक प्रगती झाली. ०००
मोबाइल अॅप डाउनलोड करा आणि राहा अपडेट
