लोगो : मटा अजेंडा शिरोळ अजय जाधव,जयसिंगपूर कृष्णा, पंचगंगा, वारणा, दूधगंगा या बारमाही वाहणाऱ्या चार नद्यांमुळे शिरोळ तालुका समृद्ध झाला आहे. मात्र, येथे दरवर्षी उन्हाळ्यात पाणी टंचाई आणि पावसाळ्यात महापुराचे संकट उभे ठाकते. नद्यांच्या प्रदुषणाचा प्रश्न गंभीर आहे. अनेक गावांच्या पाणी योजना रखडल्या आहेत. त्यामुळे शुद्ध पाणी मिळणार कधी? असा प्रश्न आहे. तालुक्यात सुमारे २० हजार एकरहून अधिक शेतजमीन क्षारपड आहे. या जमिनीच्या सुधारणेसाठी उपाययोजना करण्याबरोबरच जयसिंगपूर, उदगाव येथील वाहतुकीच्या कोंडीवर कायमस्वरुपी उपाययोजना, महिला व तरुणांच्या हाताला काम देण्यासाठी उद्योगांची उभारणी असे अनेक प्रश्न आहेत. शिरोळ तालुक्याच्या सर्वांगिण विकासासाठी आराखडा तयार करून नूतन अपक्ष आमदार राजेंद्र पाटील-यड्रावकर यांना निधी खेचून आणावा लागणार आहे. शिरोळ मतदारसंघात जयसिंगपूर, कुरुंदवाड, शिरोळ या तीन शहरासह एकूण ५५ गावांचा समावेश आहे. गेल्या १५ वर्षात या मतदारसंघात दिग्गजांच्या सहभागामुळे लढती लक्षवेधी ठरल्या. काँग्रेसचा बालेकिल्ला म्हणून ओळखल्या जाणाऱ्या या मतदारसंघात २००४ साली मतदारांनी 'एक नोट, एक व्होट' देऊन स्वाभिमानी शेतकरी संघटनेच्या राजू शेट्टी यांना विजयी केले. २००९ साली काँग्रेसच्या सा. रे. पाटील यांना मतदारांनी संधी दिली. २०१४ साली शिवसेनेच्या उल्हास पाटील यांचा भगवा फडकाविला तर यावेळच्या निवडणुकीत अपक्ष उमेदवार राजेंद्र पाटील यांना कौल देवून त्यांचे आमदारकीचे गेल्या अनेक वर्षांचे स्वप्न सत्यात उतरविले. निवडणुकीत बाजी मारणारे आमदार राजेंद्र पाटील हे गेल्या १५ वर्षांपासून विधानसभेत प्रतिनिधीत्व करण्याची संधी मिळावी यासाठी झुंज देत होते. त्याचबरोबर विविध माध्यमातून ते सामाजिक कार्यातही कार्यरत होते. शिरोळ तालुक्याच्या सर्वांगिण विकासाची ग्वाही देत ते निवडणुकीत विजयी झाले आहेत. जयसिंगपूर व शिरोळ येथील नगरपालिकांचे नेतृत्व यड्रावकर यांच्याकडे आहे. त्यामुळे या दोन शहरांबरोबरच कुरुंदवाड शहराचा विकास साधण्याचे आव्हान त्यांच्यासमोर आहे. तालुक्यातील क्षारपड जमिनीचा प्रश्न, पंचगंगा नदीचे प्रदुषण, गावोगावच्या रखडलेल्या पाणीयोजना, पर्यटन विकासाला चालना देण्याबरोबरच रस्ते, जयसिंगपुरातील वाहतुकीची कोंडी टाळण्यासाठी पुरेशा लांबीच्या उड्डाणपुलाची उभारणी होणे गरजेचे आहे. या प्रश्‍नांची सोडवणूक त्यांना करावी लागणार आहे. शिरोळ तालुक्याला दरवर्षी चार नद्यांमुळे पुराचा प्रचंड तडाखा बसतो. हे संकट टाळण्यासाठीच्या उपाययोजनांवर भर देणे गरजेचे आहे. पावसाळ्यात अशी स्थिती असली तरी उन्हाळ्यात वेगळाच प्रश्न डोके वर काढतो. अनेक गावांना पाणी टंचाईचा प्रश्न भेडसावतो. त्याचबरोबर नदीच्या प्रदुषणामुळे पिण्याच्या पाण्याचा प्रश्न गंभीर बनतो. अनेक गावामध्ये पाणी योजनांवर जलशुध्दीकरण केंद्रे नाहीत. परिणामी कोणत्याही प्रक्रियेशिवाय पाणी नागरिकांना प्यावे लागते. त्यामुळे नागरिकांना शुद्ध पाणी उपलब्ध करून देण्यासाठीही काम करावे लागणार आहे. तालुक्याला नुकतेच महापुराचे संकट येऊन गेले. महापुरानंतर अजूनही घरे कोसळत आहेत. त्यामुळे नुकसान झालेल्या पूरग्रस्तांचे पंचनामे करून त्यांच्यापर्यंत सरकारी मदत पोहचविण्यासाठी प्रयत्न गरजेचे आहेत. शाळांची अवस्था बिकट शिरोळ तालुक्यात महापुराच्या तडाख्यात जिल्हा परिषदेच्या शाळा पाण्याखाली गेल्या. दगड, मातीने बांधलेल्या अनेक शाळांच्या भिंती कोसळल्या, तर काही शाळांच्या भिंतींना तडे गेले. यापैकी काही शाळा शाहूकालीन तर काही शाळा त्यापूर्वीच्या आहेत. महापुरानंतर शाळांची अवस्था दयनिय आहे. या शाळामध्ये बसून विद्यार्थ्यांना ज्ञानार्जन करावे लागते. या शाळांची डागडुजी गरजेची आहे. महापुरानंतर कोसळताहेत घरे शिरोळ तालुक्यात आलेल्या महापुरामुळे ५५ पैकी ४३ गावांना फटका बसला. अनेक गावांना बेटाचे स्वरूप आले. महापुरात घरे कोसळली, त्यांचे पंचनामे झाले. मात्र, आता उन्हाच्या तडाख्यामुळे मातीच्या घराच्या भिंती ढासळू लागल्या आहेत. यामुळे नागरिक चिंताग्रस्त आहेत. नियोजनातून विकास हवा गेल्या पाच वर्षांत मी मतदारसंघात ४५० कोटी रुपयांचा विकासनिधी आणला. नृसिंहवाडी येथील कन्यागत महापर्व काळाच्या निमित्ताने शिरोळ तालुक्यातील विकासकामे मार्गी लागावीत या हेतुने अधिकाधिक निधीसाठी आग्रह धरला. निधीसाठी प्रसंगी 'मातोश्री'वर ठाण मांडले. भरीव निधीतून महाराष्ट्र आणि कर्नाटक या दोन राज्यांस जोडणारे रस्ते, तालुक्यातील अंतर्गत रस्ते, कृष्णा नदीकाठचे घाट, शिरोळ, कुरुंदवाड, नृसिंहवाडी येथील बसस्थानकांची कामे मार्गी लागली. राजापूर हा शिरोळ तालुक्यातील महत्वाचा बंधारा आहे. या बंधाऱ्याच्या दुरूस्तीसाठी प्राधान्य दिले. उन्हाळ्यात तालुक्यात पाणीटंचाई निर्माण झाल्यानंतर प्रसंगी स्वतः धरणांचे बरगे काढले. धरणातून पाणी सोडण्यास पाटबंधारे विभागास भाग पाडले. यापुढील काळात विद्यमान आमदारांनी मंजूर विकासकामांना चालना द्यावी. पंचगंगा नदी प्रदूषण, क्षारपड जमिनींची सुधारणा या प्रश्‍नांना प्राधान्य देण्याबरोबरच महापुराच्या संकटातून कायमस्वरूपी मार्ग निघण्यासाठी प्रयत्न व्हायला हवेत. -उल्हास पाटील, माजी आमदार सर्वांगिण विकासासाठी प्रयत्न शिरोळ तालुक्याचा सर्वांगिण विकास हाच माझा अजेंडा आहे. नियोजनबध्द आराखडा करून तालुक्याच्या विकासासाठी त्याचा पाठपुरावा करू. लोकप्रतिनिधी नसताना, गेल्या ५५ वर्षांपासून विकासकामांचा वारसा आम्ही जपला आहे. विविध संस्थांच्या माध्यमातून, कामांच्या माध्यमातून १५ हजारहून अधिक बेरोजगारांच्या हाताला काम दिले आहे. सामान्य जनतेला मोफत औषधोपचार मिळावेत यासाठी सुसज्ज रूग्णालयाची उभारणी, जयसिंगपूर शहरातील झोपडपट्टीवासीयांचा प्रश्न सोडविण्याबरोबरच सामान्य शेतकऱ्यांना आधुनिक शेतीकडे नेण्यासाठी प्रयत्नशील राहणार आहे. क्षारपड जमीन सुधारणेसाठी यापुर्वी काम केले आहे. यापुढेही क्षारपड जमीन, पंचगंगा नदी प्रदूषण हे प्रश्न मार्गी लावण्यासाठी विधानसभेत अधिक ताकदीने कार्यरत राहू. तालुक्यातील बेरोजगारीचा प्रश्न सोडविण्यासाठी उद्योगांना चालना देण्यात येईल. जयसिंगपूर शहरात छत्रपती शिवाजी महाराज यांचा अश्‍वारूढ पुतळा व डॉ. बाबासाहेब आंबेडकर यांचा पुतळा उभारण्यात यावा अशी जनतेची मागणी आहे. त्याचा पाठपुरावाही करण्यात येईल. कुरूंदवाड शहराच्या पाणी योजनेच्या रखडलेल्या कामास चालना देणार आहे. - राजेंद्र पाटील, आमदार दृष्टिक्षेपात शिरोळ एकूण मतदार- ३,१२,७३२ झालेले मतदान - २,२५,७०६ मतदानाची टक्केवारी - ७४.४१ मतदार संघातील गावे - ५५ मतदारसंघातील महत्वाचे प्रश्न - पंचगंगा नदीचे प्रदूषण रोखणे - महापुराचे संकट टाळण्यासाठी कायमस्वरूपी उपाययोजना - सुमारे २० हजार एकर शेतजमीन क्षारपडमुक्त करणे - गावांच्या पिण्याचा व शेतीच्या पाण्याचा प्रश्न - रोजगाराची संधी उपलब्ध करण्याची गरज - मतदारसंघात पर्यटनवाढीसाठी प्रयत्नांची गरज - तालुक्यातील ग्रामीण भागातील रस्त्यांची दुरावस्था - सामान्य जनतेसाठी अल्पदरात आरोग्यसेवा हवी - शेतीमालावर प्रक्रिया उद्योगांची उभारणी गरजेची - जयसिंगपूर येथे वाहतुकीची कोंडी टाळण्यासाठी उपाययोजना हवी
मोबाइल अॅप डाउनलोड करा आणि राहा अपडेट
