म. टा. वृत्तसेवा, कसबा बावडा

डेंगीच्या भीतीखाली असणाऱ्या कसबा बावडा परिसरात सोमवारपासून महापालिकेने औषध आणि धूर फवारणीची मोहीम सुरू केली. डेंगीमुळे या परिसरातील सर्व हॉस्पिटल्स रुग्णांनी हाऊसफुल्ल झाली आहेत. गेल्या तीन महिन्यांत सीपीआरच्या प्रयोगशाळेत ६०हून अधिक डेंगीचे रुग्ण आढळले आहेत. घरोघरी तापाचे रुग्ण आढळत असल्याने कसबा बावडा परिसरासह शहरात सर्वत्र मोहीम राबविण्यात येत असल्याची माहिती महापालिकेचे आरोग्यधिकारी डॉ. दिलीप पाटील यांनी 'महाराष्ट्र टाइम्स'शी बोलताना दिली.

यंदा शहरात जानेवारी महिन्यापासून डेंगीचे ६०० रुग्ण आढळले असून त्यापैकी तिघांचा मृत्यू झाला. गेल्यावर्षी डेंगी झालेल्या रुग्णांची संख्या १३५० होती. तर वर्षभरात ११ जणांचा मृत्यू झाला होता. यंदाही कसबा बावड्यात गेल्या काही महिन्यांपासून तापाच्या रुग्णाच्या संख्येत मोठ्या प्रमाणात वाढ झाल्याचे दिसून आले. त्यात बरेच रुग्ण हे डेंगी पॉझिटिव्ह आढळून आले होते. त्यामुळे या भागात महापालिकेने स्वछता मोहीम राबविण्याती मागणी करण्यात आली होती. वातावरण बदल आणि अवेळी होत असलेल्या जोरदार पावसाने जागोजागी पाण्याची डबकी तयार झाली आहेत. त्यातच कचरा कुजल्याने डासांची उत्पत्ती मोठ्या प्रमाणात झाली आहे.

त्यामुळे महापालिकेने आता औषध फवारणीच्या मोहिमेबरोबर नागरिकांत जनजागृती सुरू केली आहे. जेथे पाणी साठवले आहे, अशा ठिकाणाची पाहणी आरोग्य विभागाचे पथक करणार आहे. घराच्या परिसरात डासांच्या अळ्या आढळल्यास महापालिकेतर्फे कारवाई करण्यात येणार आहे. गेल्यावर्षीच्या तुलनेत यावर्षी डेंगीचे पॉझिटिव्ह रुग्ण कमी आढळले आहेत. मात्र तापाचे रुग्ण मोठ्या प्रमाणात आहेत. सर्दी, घसा खवखवणे, कफ याचा त्रास मोठ्या प्रमाणात होत असल्याचे दिसून येत आहे. त्यामुळे रुग्ण त्रासून गेले आहेत.

आयुक्तांनी आजच बैठक घेऊन डेंगीबाबतची दक्षता, औषध फवारणी करण्यासंदर्भात सूचना दिल्या आहेत. कसबा बावडा परिसरात तापाचे रुग्ण जास्त प्रमाणात आढळल्याने येथे औषध, धूर फवारणी करण्यात येत आहे. त्यानंतर अन्य भागातही फवारणी होईल. गेल्यावर्षीच्या तुलनेत यावर्षी डेंगी पॉझिटिव्ह रुग्ण कमी आहेत. आम्ही जनजागृती मोहीम राबवित आहोत. त्यासाठी लोकांचे सहकार्य अपेक्षित आहे.

- डॉ. दिलीप पाटील, आरोग्यधिकारी

फोटो ओळ

कसबा बावडा परिसरात महापालिकेने सोमवारी औषध फवारणी सुरू केली. (फोटो : राहूल मगदूम)

फोटो आहे

......

भूमिका - शहरातील सर्वच रस्त्यांना अतिक्रमणधारकांनी विळखा घातला आहे. कशाही पद्धतीने लावलेल्या हातगाड्या, केबिन्स आणि विक्रेत्यांनी रस्त्यांवर ठाण मांडले असल्याने पादचाऱ्यांना चालणेही मुश्कील बनले आहे. शहरातील या स्थितीला राजाश्रय मिळत असला, तरी अनेकवेळा महासभा व स्थायी समितीमध्ये अतिक्रमण कारवाई करण्याची मागणी केली जाते. त्यानंतर अतिक्रमण विभाग कारवाईसाठी सरसावतो. पण कारवाईदरम्यान अनेकजण फोन करुन अभय देण्याची मागणी करतात. त्यामुळे कारवाईमध्ये सातत्य नसलेला विभाग धडाक्यात कारवाई करत नाही. त्याचा फायदा अतिक्रमणधारक घेतात. शहरातील ही स्थिती पूर्णपणे हटवायची असेल, तर कारवाईमध्ये सातत्य राखण्याबरोबरच वरिष्ठ अधिकाऱ्यांनीही त्यांच्या पाठिशी राहिले पाहिजे. तरच शहरातील रस्ते अतिक्रमणमुक्त होतील.

.....

म. टा. प्रतिनिधी, कोल्हापूर

महापालिकेच्या अतिक्रमण निर्मूलन विभागाने राजारामपुरी खाऊ गल्ली आणि परिसरात सोमवारी सायंकाळी अतिक्रमण हटाव मोहीम राबवली. मोठ्या पथकासह केलेल्या कारवाईमध्ये अधिकृत आणि अनधिकृत अशा ५१ केबिन्स काढून टाकल्या. तर चार केबिन्स जप्त केल्या. कारवाई केलेल्या ठिकाणी मंगळवारी पट्टे मारुन बायोमेट्रिक कार्ड व कागदपत्रांची तपासणी करुन केबिन लावण्यात येणार आहे.

शुक्रवारी (ता.२) झालेल्या स्थायी समितीमध्ये शहरात अतिक्रमण निर्मूलन मोहीम राबवण्याची सूचना केली होती. त्यानुसार सोमवारी सायंकाळी एक जेसीबी, डंपर व अतिक्रमण विभागाची गाडी आणि ४० कर्मचारी अशी महापालिकेची यंत्रणा राजारामपुरी पहिल्या गल्लीमध्ये दाखल झाली. नगररचना विभागाच्या कार्यालयाशेजारील केबिन्स हटवण्यात आल्या. काही विक्रेत्यांनी स्वत:हून केबिन काढून घेण्यासाठी वेळ देण्याची मागणी केली. पण कागदपत्रे दाखवल्याशिवाय केबिन देणार नसल्याचे अधिकाऱ्यांनी सांगितल्यानंतर त्यांचा विरोध मावळला. त्यानंतर खाऊ गल्लीतील केबिनवर अतिक्रमण विभागाच्या कर्मचाऱ्यांनी हातोडा मारला. येथील ३० केबिन ताब्यात घेतल्या. केबिन काढताना सर्व विक्रेत एकत्र जमा झाले, पण एकाही विक्रेत्याने कारवाईला विरोध केला नाही. जप्त केलेल्या केबिन डंपर व ट्रकमधून वर्कशॉपकडे पाठवण्यात आल्या.

अनेक केबिनधारकांनी बायोमेट्रिक कार्ड असल्याचे सांगितले. पण अधिकाऱ्यांनी सर्व कागदपत्रे मंगळवारी इस्टेट विभागाकडे दाखवल्यानंतर केबिन परत करणार असल्याचे सांगितले. दरम्यान, कारवाई झालेल्या ठिकाणी पट्टे मारल्यानंतर केवळ बायोमेट्रिक कार्डधारकांना केबिन लावण्याची परवानगी ठराविक वेळेसाठी देण्यात येणार असल्याचे महापालिका अधिकाऱ्यांनी सांगितले.

शहर अभियंता नेत्रदीप सरनोबत यांच्या प्रमुख उपस्थितीत कारवाईला सुरुवात झाली. यावेळी अतिक्रमण विभागप्रमुख पंडित पोवार, उपशहर अभियंता आर. के. जाधव, पद्मल पाटील, नगररचनाकार नारायण भोसले, मिलिंद जाधव, चंद्रकांत खांडकेर यांच्यासह अतिक्रमण, विद्युत व इस्टेट विभागाचे ४० कर्मचारी सहभागी झाले.

......

चौकट

बनावट कागदपत्रे देवून केबिन

महापालिकेच्या इस्टेट विभागाच्यावतीने यापूर्वी केबिनधारकांना बायोमेट्रिक कार्ड दिली आहेत. पण व्यवसाय परवानाचे कार्ड देताना त्यावर ठिकाणाचा उल्लेख नसल्याने एकाच विक्रेत्यांकडून दोन-दोन ठिकाणी केबिन लावल्या असल्याचे कारवाई दरम्यान निदर्शनास आले. तसेच काही केबिनधारकांनी कायदेशीर असलेली केबिनची विक्री करुन दुसरी अनधिकृत केबिन बनावट कागदपत्रे तयार करुन लावली असल्याने केबिनची संख्या वाढली असल्याचेही एका वरिष्ठ अधिकाऱ्यांने सांगितले.

....

विभागप्रमुख संतापले

खाऊ गल्लीतील केबिन ताब्यात घेताना एक केबिनधारक पथकाला विरोध करु लागला. त्याने विभागप्रमुख पंडित पोवार यांच्याकडे आपला फोन दिला. संबंधित व्यक्तीने केबिन ताब्यात घेवू नका, अशी विनंती केली. त्यावेळी पोवार यांनी कागदपत्रे दाखवण्याची मागणी केली. तशी कागदपत्रे नसल्याने पोवार चांगलेच संतापले. त्यांचा संताप पाहून केबिनधारकाने धूम ठोकली.

मालिका ... लोगो भाग २

Bhimgonda.Desai@timesgroup.com

Tweet : @bhimgondaMT

कोल्हापूर

शेती, इतर मालमत्ता खरेदी विक्रीनंतर आणि वारसा नोंदी, बँकेचा बोजा चढवणे, कमी करण्यासंबंधी फेरफारची प्रक्रिया ऑनलाइन केली जात आहे. भ्रष्टाचार टाळण्यासाठी ही प्रक्रिया कार्यान्वित केली. मात्र यातूनही अपवाद वगळता बहुतांश कोतवाल, तलाठी, सर्कल रॅकेट तयार करून डल्ला मारत आहेत. फेरफारसाठी डायरी घालतानाच अर्थपूर्ण व्यवहार होत असल्याच्या तक्रारी आहेत. यामुळे 'फेरफार ऑनलाइन आणि खाबुगिरी ऑफलाइन' असे चित्र आहे.

शेती, प्लॉट खरेदी केल्यानंतर नोंदणी विभागाकडून दस्त ऑनलाईन फेरफारसाठी तलाठ्याकडे विहित नमुन्यातील अर्ज भरून द्यावा लागतो. अर्ज देतानाच अनेक तलाठी डायरी घालणे आणि सर्कलकडून मंजूर करून घेण्याची सुपारी घेतात. तलाठी, सर्कलची टक्केवारी ठरून रक्कम निश्चित होते. हा व्यवहार ठरवण्यात दलाल, खासगी उमेदवार, खरेदी विक्रीवेळी असलेले मध्यस्थ, काही नोटरी चालक आघाडीवर दिसतात. व्यवहार ठरल्यानंतरच संबंधित तलाठी फेरफारचा प्रस्ताव स्वीकारतात. व्यवहाराला प्रतिसाद न देणाऱ्यांना तलाठी वेळेवर भेटत नाहीत, मोबाइल रिसीव्ह करत नाहीत. तरीही वरिष्ठांना भेटून तलाठ्याकडे डायरी घालण्यासाठी अर्ज दिल्यानंतर प्रस्ताव अनेक दिवस कक्षातच धूळ खात पडून असतो. फेरफारसाठी ऑनलाईन डायरी घातल्यानंतर पंधरा दिवसांनंतर सर्कल मंजूर करत नाहीत, अशा तक्रारी आहेत. यामुळे पैसे घ्या पण काम करा अशी मालमत्ताधारकांची मानसिकता बनते आहे.

आतापर्यंत जिल्ह्यात २ लाख ८० हजार ६४ अर्ज ऑनलाइन फेरफारसाठी अपलोड झाले होते. त्यापैकी सर्कलने २ लाख ७४ हजार १८० डायरी मंजूर केले. उर्वरित डायरी मंजुरीविना प्रलंबित आहेत. अनेक प्रलंबित डायऱ्या पैसे न देणाऱ्यांच्या आहेत. मंजूर एकूण डायऱ्यांपैकी निम्म्याजणांकडून कमीत कमी एक हजार रूपयांचा जरी ढपला पाडला तरी ती रक्कम कोटींच्या घरात जाते. या कोटींच्या रकमेवर डल्ला मारण्यात चाणाक्ष असलेले तलाठी, सर्कलांची मालमत्ता डोळे दिपवणारी दिसते. कोटींची बंगला, इतर बेनामी संपत्ती, अलिशान गाडी त्यांच्या दिमतीत असते.

........

कोट

'तीन महिन्यांपासून अपवाद वगळता जिल्ह्यात कुठेही गावचावडीवर तलाठी आणि सर्कल आलेले नाहीत. ते काम असणाऱ्यांनाच निर्जनस्थळी बोलावून पैसे वसूल करत आहेत. कोतवाल, तलाठी, सर्कल, तहसीलदार, प्रांत कार्यालय असे रॅकेट तयार झाले आहे. जमिनीची वर्गवारी आणि सत्ता प्रकारानुसार फेरफार परवान्यासाठी हजारो रुपये उकळले जात आहे. पैसे न दिल्यास विविध त्रुटी काढल्या जातात. डायरी घालण्यात टाळाटाळ करतात. डायरी मंजूर करत नाहीत. याकडे तहसीलदार, प्रांताधिकारी दुर्लक्ष करीत आहेत.

धनाजी चुडमुंगे, अध्यक्ष, अकुंश संघटना

.....

दोन लाखांवर फेरफार

आतार्यंत जिल्ह्यात झालेल्या फेरफारीच्या नोंदीची संख्या तालुकानिहाय अशी : शाहूवाडी :१२४९१, आजरा :१०९१८, गडहिंग्लज : १९९८३, चंदगड :११४८९, पन्हाळा :१७५७५, हातकणंगले : ४६२७४, शिरोळ : ३२४२३, करवीर : ५५७५७, गगनबावडा :५४४७, राधानगरी : १७३५९, कागल : २५२५६, भुदरगड :१९२०८.

.......

चौकट

फेरफार केंद्र भ्रष्टाचाराचे अड्डे

जिल्हाधिकारी कार्यालय आणि सर्व तालुक्याच्या ठिकाणी स्वतंत्र संगणक कक्ष आहे. येथे करारावर नियुक्त केलेल्या खासगी ऑपरेटरतर्फे फेरफारची ऑनलाइन प्रक्रिया राबवली जाते. यासाठी तलाठी पहिल्यांदा फेरफारसाठी डायरी घालतात. यासाठी पैसे वसुली करण्यासाठी कक्ष आणि परिसरातच दलाल, उमेदवार कार्यरत असतात. ते मालमत्तेचा प्रकार, एकूण क्षेत्र किती आहे यानुसार लाचेचे दर ठरवतात. तो कमीत कमी हजारात असतो. मागणी केलेली लाच देण्यास नकार दिल्यास खरेदी केलेल्या मालमत्तेसंबंधी तक्रार आल्यास खरेदी डायरी रद्द होऊ शकते, अशी भीती घातली जाते. यामुळे संबंधितांची लाच देण्याची मानसिकता तयार होते. एखाद्याने लाच देण्यास नकार दिल्यास, त्याच्या मालमत्तेसंबंधी तक्रारदार शोधून काढला जातो आणि डायरी मंजूर करण्यास विलंब लावला जातो, असे आरोपही अनेकांकडून होत आहेत.

म. टा. प्रतिनिधी, कोल्हापूर

परतीच्या पावसामुळे पुढे गेलेला हंगाम, घटलेले उसाचे उत्पादन, ऊस पळवापळवीची भीती, गोदामात दोन वर्षे शिल्लक असलेली साखर आणि कर्जाच्या व्याजाचे वाढते आकडे या मुळे जिल्ह्यातील यंदाच्या हंगामात साखर कारखानदारांचा कस लागणार आहे.

गेली दोन वर्षे साखर उद्योग आर्थिक संकटातून जात आहे. केंद्र सरकार आणि राज्य सरकारकडून मिळणाऱ्या मदतीच्या जोरावर हा उद्योग चालवला जात आहे. गतवर्षी केंद्र सरकारने साखरेची प्रतिक्विंटल किंमत ३१०० रुपये केल्यानंतर उद्योगाला थोडा दिला मिळाला असला तरी साखरेचा उठाव न झाल्याने गोदामात साखर शिल्लक आहे. यंदा कोल्हापूर विभागातील कोल्हापूर आणि सांगली जिल्ह्याला महापुराचा मोठा तडाखा बसला. नागरी वस्तीबरोबर ऊस शेतीला मोठा फटका बसला. नदीकाठचा ऊस पाण्यात बुडाल्याने मोठे नुकसान झाल्याने ऊस उत्पादन मोठ्या प्रमाणात घटले आहे.

महापुरातून कोल्हापूर जिल्हा सावरत असताना ऑक्टोबर महिन्यात परतीच्या पावसाने पुन्हा उचल खाल्याने त्याचा परिणाम ऊस हंगामावर होत आहे. दरवर्षी एक नोव्हेंबरला ऊस हंगाम सुरू होतो. पण पावसामुळे शेतात पाणी असल्याने ऊस वाहतुकीला अडथळा ठरणार आहे. त्यामुळे साखर कारखान्यांची धुराडी शेवटच्या आठवड्यात पेटण्याची शक्यता आहे. दराचा तिढा सुटून एक डिसेंबरला कोल्हापूर विभागातील सर्व कारखाने सुरू होण्याची शक्यता आहे. कारखान्यांना महापुरातील बुडालेला ऊस गाळप करण्याचे नियोजन करावे लागणार आहे. बुडीत उसाच्या गाळपाला विलंब झाला तर कर्नाटकातील कारखान्याकडून ऊस पळवापळवीची भीती व्यक्त केली जात आहे. महापूर, अतिवृष्टी यामुळे उतारा कमी होण्याची शक्यता असल्याने त्याचा फटका ऊस उत्पादक आणि कारखानदारांनाही बसणार आहे.

\B

एफआरपी द्यावीच लागेल\B

गेले दोन वर्षे जिल्ह्यातील सर्व कारखाने कर्ज काढून ऊस उत्पादकांना एफआरपी देत आहेत. कायद्यानुसार एकरकमी एफआरपी द्यावी लागते. पण गतवर्षी आर्थिक संकटात सापडलेल्या कारखान्यांनी एफआरपीचे तुकडे केले होते. दोन ते तीन हप्त्यांत कारखान्यांनी एफआरपी दिल्याने उत्पादकांना मोठा फटका बसला. जिल्ह्यातील काही कारखान्यांनी नऊ ते दहा महिन्यांनी एफआरपी दिली. स्वाभिमानी शेतकरी संघटनेने २३ नोव्हेंबर रोजी ऊस परिषद जाहीर केली आहे. यंदा संघटना एकरकमी एफआरपीवर ठाम आहे. त्यामुळे कारखान्यांच्या अडचणीत वाढ होणार आहे. एफआरपी देण्यासाठी १४ टक्के व्याजाने कारखान्यांनी कर्ज काढले असून त्यांच्या कर्जाचे आकडे फुगत चालले आहेत. साखरेला बाजारात मागणी वाढल्यास यंदा साखर उद्योग तग राहू शकेल अन्यथा काही कारखाने पुन्हा कर्जाच्या गर्तेत जाण्याची शक्यता आहे. त्यामुळे यंदाच्या हंगामात कारखानदारांचा कस लागणार आहे.

मिलिंद पांगिरेकर, गारगोटी

सध्या सुरू असलेल्या परतीच्या पावसाचा परिणाम शेती व्यवसाया बरोबरच मधुमक्षिका पालन व्यवसायावर झाला असून भुदरगड तालुक्यातील पाटगाव येथील मधुमक्षिका पालन व्यवसाय मोठ्या आरिष्टात सापडला आहे. जोरदार पावसामुळे मधमाश्या मृत झाल्याने हा व्यवसायच उद्ध्वस्थ झाला आहे. यावर उपाययोजना करून मार्गदर्शन करून व्यवसायास बळ द्यावे, अशी मागणी मध उत्पादकांकडून होत आहे.

भुदरगड तालुक्याच्या पश्चिमेस असलेल्या पाटगाव येथे शेती बरोबर शेतीपूरक व्यवसाय म्हणून मधुमक्षिका पालन व्यवसाय मोठ्या प्रमाणावर केला जातो. पाटगाव येथे मिळणारा मधास राज्यात सर्वत्र मागणी असते. गेल्या अनेक वर्षांपासून मधुमक्षिका पालन व्यवसाय केला जातो. यावर्षी पाऊस लांबला तर परतीच्या पावसाने मोठ्या प्रमाणावर नुकसान केले आहे. सततच्या पावसामुळे पाटगावच्या सातेरी वसाहतीतील मधमाश्या मृत झाल्याने हा व्यवसाय अडचणीत सापडला आहे.

मधुमक्षिका पालन व्यवसाय करणारे व्यावसायिक मधाच्या पेट्या जंगल हद्द व शेजारील मोठ्या फळांच्या झाडांस लाऊन ठेवतात. या व्यवसायास महत्त्वपूर्ण असलेली राणीमाशी अन्य मधमाशांच्या साहाय्याने या पेट्यांमध्ये मध संकलित करतात. पण पावसामुळे सध्या या पेटीमधील मधमाशा मृत झाल्याचे आढळून येत असून या माशा मृत झाल्याने यावर्षी मध जमा करणे अडचणीचे ठरणार आहे.

पाटगाव परिसरातील मधास मोठी मागणी असते मात्र यावर्षी सुप्रसिद्ध औषधी मधाचा यावर्षी तुटवडा जाणवणार आहे. या व्यवसायावर अवलंबून असणाऱ्या शेतकऱ्यांचे मोठे आर्थिक नुकसान होणार आहे. तर हा व्यवसायच कोलमडण्याची भीती निर्माण झाली आहे.

याबाबत मध व्यवसायिकांना विचारले असता मधमाश्यांनी पावसाळ्यात आपल्या उदरनिर्वाहासाठी साठवलेला मध संपल्यानंतर पुन्हा मध गोळा करण्याचा प्रयत्न केला पण १५ दिवसांहून अधिक काळ एकसारखा कोसळत असलेल्या अवकाळी पावसामुळे मधमाशांना अन्न गोळा करण्यासाठी त्यांच्या पोळ्यातून बाहेर पडणेच शक्यच झाले नाही. मध आणि परागकणांची आवक थांबली, मधमाशांनी मे महिन्यात पावसाळा सुरू होण्यापुर्वी जमा करून ठेवलेला मधाचा साठा पावसाळ्यातच संपला. नवीन जन्माला आलेल्या माश्यांना आणि पोळ्यांतील लहान पिलांना खाद्य कमी पडले. उपासमारीमुळे आधी पिलावळी नंतर शिशु अवस्थेतील माश्या मृत पावल्या. त्यानंतर प्रौढ माशा पण मरण पावल्या. येथील जवळपास ५० टक्क्यापेक्षा जास्त मधुमक्षिका वसाहती नाश पावल्या आहेत. त्यातूनही पेट्यांमध्ये शिल्लक असलेल्या माश्यांना साखरेच्या पाकाचे कृत्रीम खाद्य देऊन वाचवण्याचा काहींनी प्रयत्न केला.

परतीच्या पावसाने अनेक दिवस मुक्काम ठोकल्याने मधमाशी व तिच्या कुटुंबाला उपजीविकेसाठी अन्नाचा तुटवडा निर्माण झाल्याने मधमाशांवर मृत्यू ओढवला. मधमाशांच्या मृत्यूबाबत व्यावसायिकांनी चिंता व्यक्त करून प्रशासनाने मध व्यवसायिकांना योग्य मार्गदर्शन करून असे पुन्हा संकट येऊ नये यासाठी प्रयत्न होणे गरजेचे आहे.

परतीचा पाऊस लांबल्याने उपासमारीमुळे मधमाश्यांचा मृत्यू झाला. यमुळे हा व्यवसाय अडचणीत आला आहे. खादी व ग्रामोद्योग मंडळाने या गंभीर बाबीची वेळीच दखल घ्यावी, या मृत अवस्थेतील मधमाशांची पाहणी करून मधमाशा मरण्याची नेमकी कारणे शोधून यावरील योग्य ती उपाययोजने बाबत मार्गदर्शन करण्याची गरज आहे.

सचिन देसाई, मध व्यवसायिक, पाटगाव

कोल्हापूर : निवृत्त कर्मचारी ईपीएस ९५ राष्ट्रीय समन्वय समितीच्या वतीने दिल्ली येथील जतंर मंतर येथे पाच डिसेंबर रोजी आंदोलन होणार आहे. समितीचे समन्वयक दिलीप पाटील यांनी पत्रकाद्वारे ही माहिती दिली. देशात पेन्शनरांच्या विविध संघटना असून त्यांचेही आंदोलन वेगवेगळ्या तारखेला होणार आहे. तथापी निवृत्त कर्मचारी ईपीएस ९५ राष्ट्रीय समन्वय समिती ही राष्ट्रीय पातळीवर काम करणारी संघटना असून देशातील २६ पेक्षा अधिक राज्यातील पेन्शनर या संघटनेत काम करतात. प्रत्येक वर्षी अधिवेशन कार्यकाळात या संघटनेचे आंदोलन असते. यावर्षी पाच डिसेंबर रोजी दिल्ली येथे आंदोलन होणार आहे.

समन्वय समितीचे राष्ट्रीय सदस्य शिवाजी देसावळे, शिवाजी सावंत, जिल्हा पेन्शनर संघटनेचे अध्यक्ष शामराव मोरे, सचिव ए. बी. पाटील, साखर कामगार युनियनचे सचिव सुभाष गुरव, साखर कामगार सभेचे अध्यक्ष आनंदराव अबिटकर, साखर कामगार समन्वय समितीचे कार्याध्यक्ष मधुकर पवार, वारणा साखर कामगार युनियनचे उपाध्यक्ष महादेव बच्चे आदी पदाधिकारी आंदोलनाची तयारी करत आहेत.

फोटो आहे

म. टा. प्रतिनिधी, कोल्हापूर

निवडणुकीला अवघा एक वर्षाचा कालावधी राहिलेल्या महापालिकेमध्ये निधीचा ठणठणाट दिसू लागला आहे. राज्य सरकारकडून निधीसाठी लागत असलेला विलंब आणि उत्पन्नाचे स्रोत मर्यादित राहिल्याने शहरातील अनेक विकासकामे ठप्प झाली आहेत. रस्त्यांच्या दुरुस्तीसाठीही निधी अपुरा पडत असल्याने कार्यकाळ संपण्यास काही दिवसांचा अवधी असलेल्या महापौर माधवी गवंडी यांनी शिष्टमंडळासह सोमवारी जिल्हाधिकाऱ्यांची भेट घेतली. महापालिकेची आर्थिक स्थिती ठीक नसल्याने रस्ता दुरुस्तीसाठी निधी देण्याची मागणी त्यांनी केली. या निवेदनामुळे एकप्रकारे महापालिकेच्या आर्थिक मर्यादाच स्पष्ट झाल्या आहेत.

शहरातील बहुतांशी रस्त्यांची अवस्था अत्यंत दयनीय झाली आहे. गेल्या तीन वर्षांत प्रमुख एकाही मार्गाचे डांबरीकरण करण्यात आलेले नाही. विशेषत: जुलै महिन्यापासून झालेल्या अतिवृष्टीमुळे खड्ड्यात रस्ता शोधण्याची वेळ आली आहे. संततधार पावसात मुरुम टाकून अनेकदा तात्पुरती मलमपट्टी करण्याचा प्रयत्न केला. पण तो सपशेल फोल ठरला असला, तरी त्यावरही लाखो रुपयांचा निधी खर्ची पडला. अपवाद सोडला तर सर्वच रस्त्यांची अशी स्थिती झाल्याने पॅचवर्क करणेही महापालिकेच्या आवाक्याबाहेर गेले आहे.

नवीन व जुन्या रस्त्यांची डागडुजी करण्यासाठी महापालिका प्रशासनाने राज्य सरकारकडे तीन वर्षांपूर्वी सुमारे १७६ कोटींचा प्रस्ताव पाठवला आहे. प्रस्तावावर अद्याप कोणताही निर्णय झालेला नसताना अतिवृष्टी व महापुरामुळे त्यामध्ये आणखी भर पडली आहे. त्याबाबतचा अहवाल राज्य सरकारला पाठवून २३० कोटींचा प्रस्तावही दिला आहे. महापालिकेकडे उत्पन्नाचे कोणतेही नवे स्रोत नसल्याने तिजोरीत ठणठणाट निर्माण झाला आहे. पडलेले खड्डे बुजवण्याची क्षमता महापालिकेची नसल्याने अखेर महापौर गवंडी यांच्या नेतृत्वाखालील नगरसेवकांच्या शिष्टमंडळाने जिल्हाधिकारी दौलत देसाई यांची भेट घेवून निधी देण्याची मागणी केली.

निवेदनात म्हटले आहे, 'अतिवृष्टी व महापुराचा फटका महापालिकेच्या ८१ पैकी ३३ प्रभागांना बसला आहे. पुराचे पाणी आणि अतिवृष्टीमुळे सुमारे २९९.७७ किमीच्या रस्त्यांची अत्यंत दयनीय अवस्था झाली आहे. रस्त्यांच्या दुरुस्तीसाठी कोट्यवधी रुपयांचा खर्च येणार आहे. राज्य सरकारकडे नगरोत्थानमधील रस्त्यांसाठी यापूर्वीच निधी मागितला आहे. पण अद्याप तो मिळालेला नाही. दुरुस्तीसाठी लागणारा निधी महापालिकेची आर्थिक स्थिती पाहता स्व:निधी किंवा बजेटमधून करणे अशक्य बनले आहे. शहरात येणाऱ्या पर्यटकांचा व स्थानिक नागरिकांचा विचार करता दुरुस्तीसाठी लागणारा निधी राज्य सरकारकडून त्वरीत उपलब्ध करुन द्यावा.'

यावेळी स्थायी समिती सभापती शारंगधर देशमुख म्हणाले, 'रस्त्यांच्या दुरुस्तीसाठी ३७४ कोटींची आवश्यकता आहे. सर्वच रस्ते पॅचवर्क न करण्याच्या स्थितीत गेले आहेत. खराब रस्त्यांबाबत नागरिकांमध्ये रोष निर्माण झाला आहे.'

जिल्हाधिकारी देसाई यांनी, 'रस्ते दुरुस्तीसाठी परिपूर्ण अहवाल आयुक्तांद्वारे तयार करुन पाठवा. निधीसाठी स्वत: पाठपुरावा करु,' असे आश्वासन दिले.

यावेळी उपमहापौर भूपाल शेटे, सभागृह नेता दिलीप पोवार, नगरसेवक संजय मोहिते, अशोक जाधव, प्रतापसिंह जाधव, तौफिक मुल्लाणी, जय पटकारे, माजी नगरसेवक मधुकर रामाणे, प्रकाश गवंडी, शिवानंद बनछोडे, संजय लाड आदी उपस्थित होते.

...

चौकट

कृती समितीचे आयुक्तांना निवेदन

शहरातील खराब रस्त्यांबाबत सोमवारी सायंकाळी कोल्हापूर शहर व जिल्हा नागरी कृती समितीने आुयक्त डॉ. मल्लिनाथ कलशेट्टी यांना निवेदन दिले. खराब रस्त्यांचा सर्व्हे केला का, दुरुस्तीसाठी निधी उपलब्ध आहे का, नसल्यास सरकारकडे मागणी केली का? त्याची माहिती देण्याची मागणी केली. यावेळी अशोक पोवार, रमेश मोरे, संभाजीराव जगदाळे, शंकर काटाळे, कादर मलबारी आदींचा समावेश होता.

म. टा. वृत्तसेवा, गारगोटी

मेघोली (ता.भुदरगड) येथील ग्रामपंचायतीने भूमिहीनाच्या घरांसह जनावरांचा गोठा व उभ्या पिकावर जेसीबीचा नांगर फिरवून त्यांचा संसार उद्ध्वस्त केल्याची खळबळजनक घटना घडली. भूमिहीनांच्या दहा एकर शेतातील नाचणा, भात पीक व गवतावरही डोझर फिरवून हातातोंडाशी आलेल्या पिकांचे मोठे नुकसान केले. सरपंच व उपसरपंचांच्या अविचारी कारनाम्यामुळे भुमिहीन कुटूंबांचा संसार उघड्यावर पडला आहे. यास कारणीभूत असलेल्या सरपंच व उपसरपंचावर गुन्हा दाखल करावा अशी मागणी पाटील कुटूंबीयांनी केली आहे.

मेघोली (ता.भुदरगड) येथील भूमिहीन असलेल्या तानाजी दत्तू पाटील व बळवंत दत्तू पाटील गेल्या १५ ते २० वर्षांपासून गट नं. १९७ अ मधील ३३ एकर जमीनीपैकी १० एकर जमीन कसत आहेत. तानाजीचे वडील भूमिहीन होते. त्यांच्या निधनानंतर ग्रामस्थांनी या कुटूंबीयांची परवड विचारात घेऊन श्रीमती इंदूबाई पाटील यांना गायरान जमीन कसावयास दिली होती. अशाच प्रकारे या गावामध्ये ६० एकर जमीन इतर शेतकऱ्यांनाही कसावयास दिली आहे. तानाजी व त्यांचा भाऊ बळवंत यांनी आपल्या कब्जातील जमीन कसावयास मिळावी, अशी जिल्हाधिकाऱ्यांकडे मागणीही केली आहे.

सरपंच संगीता राऊळ, उपसरपंच मेघा राऊळ व ग्रामसेविका अनिता देसाई यांनी राजकीय सुडबुद्धीने त्यांच्या घरावर जेसीबीच्या सहाय्याने संसार उद्ध्वस्थ केल्याचा आरोप तानाजी व बळवंत पाटील यांनी केला आहे. ग्रामपंचायतीने जनावरांचा गोठाही पाडला. दहा एकरातील नाचणी, भात पीक व गवतावरही डोझर फिरवून हातातोंडाशी आलेल्या पिकाचे मोठे नुकसान केले आहे. जंगलाशेजारी असलेल्या या शेतात बिबट्यासारख्या हिंस्त्र प्राण्यांचा वावर असतो. यापर्वूी भूमिहीन शेतकऱ्यांची बकरीही बिबट्यांनी मारल्याची उदाहरणे घडलेली आहेत. अशा बिकट परिस्थितीत १५ जनावारे कुठे बांधायची याची विवंचना या शेतकऱ्यांना लागली आहे.

७० वर्षांच्या वृद्धेचा आक्रोश

संसार उद्ध्वस्त झालेला पाहून ७० वर्षाच्या वृद्ध महिला इंदूमती पाटील धाय मोकलून रडत होत्या. या घटनेमुळे त्या पूर्णपणे खचल्या असून अशीच अवस्था त्यांच्या कुटुंबाची झाली आहे. हातातोंडाला आलेली पिके उद्ध्वस्त केल्यामुळे वर्षभराच्या पोटगीच करायच काय? जनावरांना कुठे बांधायचे? याची विवंचना त्यांना लागली आहे.

अतिक्रमण काढण्याबाबत गटविकास अधिकारी यांच्याकडून रीतसर परवानगी घेतली आहे. गायरान जमिनीमधील अतिक्रमण काढण्याची कायदेशीर कारवाई केली आहे.

संगीता राऊळ, सरपंच, मेघोली

कोल्हापूर

महापालिकेच्या शिवाजी मार्केट विभागीय कार्यालयाच्यावतीने फोर्ड कॉर्नर ते टायटन शोरुमपर्यंतच्या रस्त्यावर आरसीसी चॅनल बांधणीस सुरुवात होणार आहेत. चॅनल बांधणीस मंगळवार(ता. ५) सुरुवात होणार असल्याने हा मार्ग १५ डिसेंबरपर्यंत वाहतुकीसाठी बंद ठेवण्यात येणार आहे. तब्बल ४१ दिवस हा मार्ग बंद राहणार असल्याने परिसरातील इतर मार्गांवर वाहतुकीचा ताण येणार आहे.

फोर्ड कॉर्नर ते टायटन शोरुमपर्यंतच्या रस्त्यावर आरसीसी चॅनल बांधण्यात येणार आहे. मंगळवारपासून कामाला सुरुवात होणार असली, तरी काम पूर्ण होण्यास तब्बल ४१ दिवसांचा कालावधी लागणार आहे. काम सुरू असलेल्या कालावधीत संपूर्ण मार्ग वाहतुकीसाठी बंद ठेवण्यात येणार आहे. त्यामुळे या मार्गावरील वाहतूक अन्य मार्गाकडे वळवण्यात आली आहे. फोर्ड कॉर्नरवरुन जाणाऱ्या वाहनधारकांनी अयोध्या चित्रमंदिर ते दसरा चौक व संभाजी पूल ते व्हिनस कॉर्नर व टायटन शोरुम मार्गाचा अवलंब करण्याचे आवाहन महापालिकेच्यावतीने केले आहे.

Appasaheb.mali@timesgroup.com

Tweet:Appasaheb_MT

कोल्हापूर : पंचगंगा नदी प्रदूषणमुक्तीसाठी पुन्हा एकदा कारणमीमांसा आणि उपाययोजना आखण्यासाठी अभ्यास सुरू झाला आहे. नदीकाठावरील १७४ गावातील सांडपाण्यासह अन्य कोणकोणत्या घटकामुळे पंचगंगा प्रदूषित होते यासंबंधीची माहिती संकलित केली जात आहे. हायकोर्टाच्या आदेशानुसार उपाययोजना करण्यासंदर्भात एका समितीची स्थापना केली आहे. येत्या आठवडाभरात संपूर्ण डाटा संकलित होण्याची शक्यता आहे.

माहिती उपलब्ध झाल्यावर जिल्हा परिषद, संबंधित नगरपालिकेतील अधिकारी, समिती सदस्य आणि महाराष्ट्र प्रदूषण नियंत्रण मंडळाच्या अधिकाऱ्यांची संयुक्त बैठक होणार आहे. त्या बैठकीत सर्व्हेक्षणातून सामोरे आलेल्या माहितीच्या आधारे कोणत्या उपाययोजना आखता येतील, कशा पद्धतीने प्रदूषणास आळा घालता येतील यासंबंधी आराखडा तयार केला जाणार आहे. पंचगंगा नदी प्रदूषणाची समस्या गंभीर बनली आहे. गेल्या वीस वर्षांत प्रदूषणाची तीव्रता वाढली. इचलकरंजीमध्ये २०१२ मध्ये काविळीची साथ उद्भवली होती.

इचलकरंजीतील सामाजिक कार्यकर्त्यांनी पंचगंगा नदी प्रदूषणप्रश्नी हायकोर्टात याचिका दाखल केली होती. हायकोर्टाने महापालिका, जिल्हा परिषद, नगरपालिकेला प्रभावी उपाययोजना आखण्याचे आदेश दिले आहेत. महाराष्ट्र प्रदूषण नियंत्रण मंडळाला प्रदूषणास कारणीभूत घटकांवर कडक कारवाई करण्याच्या सूचना आहेत. पंचगंगा नदीच्या काठावर १७४ गावे आहेत. याशिवाय तीन औद्योगिक वसाहती, साखर कारखाने आहेत.

पंचगंगा नदी पदूषणमुक्तीसाठी जिल्हा परिषदेने १२९ कोटींचा आराखडा तयार केला. तो केंद्र सरकारकडे पाठविला होता. मात्र निधी काही मिळाला नाही. सरकारच्या सूचनेनुसार पूर्वीच्या आराखड्यात दुरुस्ती करण्यात आली. नव्याने ९७ कोटी रुपयांचा आराखडा तयार केला. प्रशासनाकडून निधी मिळवण्यासाठी पाठपुरावा सुरू आहे. मात्र निधी न मिळाल्यामुळे उपाययोजनांच्या अंमलबजावणीत मर्यादा आल्या. दरम्यान हायकोर्टाने नदी प्रदूषण रोखण्यासाठी प्रभावी उपाययोजना आखण्याचे आदेश महापालिका, जिल्हा परिषद, नगरपालिकांना दिले आहेत.

'नमामि पंचगंगा'संकल्पनाही मागे

नदीकाठावरील १७४ गावांतील डाटा संकलन, प्रदूषणास कारणीभूत घटक, कचरा निर्मिती व विल्हेवाट, औद्योगिक वसाहतीमधून निर्माण होणारे सांडपाणी, गावातील लहानसहान व्यावसायिक, हॉटेल, सर्व्हिसिंग सेंटरमधील सांडपाणी निर्गतीकरणाची व्यवस्था संबंधी गावपातळीवरील माहिती गोळा केली जात आहे. जिल्हा परिषदेचे मुख्य कार्यकारी अधिकारी अमन मित्तल यांनी जुलै महिन्यात गटविकास अधिकाऱ्यांची बैठक घेतली होती. त्या बैठकीत गावनिहाय ११ मुद्यांची माहिती पाठविण्याची सूचना केली होती. महापुराच्या कालावधीत या कामाकडे दुर्लक्ष झाले होते. आता जि. प. प्रशासनाने नव्याने माहिती संकलित करण्यास सुरुवात केली आहे. जिल्हा परिषदेने गाजावाजा केलेल्या 'नमामि पंचगंगा'संकल्पनाही मागे पडल्याचे चित्र आहे.

नदी प्रदूषणाची प्रमुख कारणे

नदीकाठावरील १७४ गावांतून बाहेर पडणारे सांडपाणी

साखर कारखान्यांची मळी

औद्योगिक कारखान्यातील रसायनयुक्त सांडपाणी

जनावरे, कपडे धुणे नदी प्रदूषणास कारणीभूत असल्याचा अहवाल

पंचगंगा नदी प्रदूषणास कारणीभूत घटकांची माहिती संकलित केली जात आहे. नदीकाठावरील गावे, सांडपाणी व्यतिरिक्त आणखी कोणते घटक जबाबदार आहेत, सांडपाणी मिसळण्याचे ठिकाण, कचरा निर्मिती आणि त्याची विल्हेवाट, वैद्यकीय कचऱ्याची निर्गतीकरण अशा सर्व बाबींची माहिती घेतली जाईल. सात ते आठ नोव्हेंबरपर्यंत माहिती उपलब्ध होण्याची शक्यता आहे.

प्रियदर्शिनी मोरे, उपमुख्य कार्यकारी अधिकारी, स्वच्छता व पाणी पुरवठा विभाग

म. टा. प्रतिनिधी, कोल्हापूर

पक्षातंर्गत ठरलेल्या फॉर्म्युलानुसार शनिवारी महापौर माधवी गवंडी आपल्या पदाच्या राजीनामा देण्याची शक्यता आहे. महापालिकेची तहकूब सभा बोलवण्यासाठी स्थायी समिती सदस्य प्रशासनाला बुध‌वारी पत्र देणार आहेत. त्यानंतर दोन ते तीन दिवसांत सभेचे आयोजन करण्याचा नियम असल्याने शनिवारी विशेष सभा बोलवली जाईल. सभेत गवंडी आपल्या पदाचा राजीनामा सादर करतील. गवंडी यांच्या राजीनाम्यानंतर राष्ट्रवादीच्या नगरसेविका अॅड. सुरमंजिरी लाटकर यांची महापौरपदी निवड निश्चित मानली जात असू्न त्यांना सव्वा महिन्याऐवजी सहा महिन्यांचा कालावधी मिळणार आहे. विधानसभा निवडणूक आचारसंहितेमुळे महापौर गवंडी यांचा राजीनामा लांबणीवर पडला होता. त्यांना राजीनामा देण्याचे आदेश राष्ट्रवादी काँग्रेसचे आमदार हसन मुश्रीफ यांनी दिले आहेत. त्यानुसार गवंडी यांनी राजीनामा देण्याची तयारी दर्शवली आहे. राजीनाम्यासाठी सभा बोलवण्याची आवश्यकता असल्याने, स्थायी समिती सदस्य सभा बोलवण्यासाठी प्रशासनाला बुध‌वारी पत्र देणार आहेत.

म. टा. प्रतिनिधी, कोल्हापूर

राष्ट्रवादी काँग्रेस पक्षांतर्गत ठरल्यानुसार महापौर माधवी गवंडी यांच्या राजीनामा देण्यावर सोमवारी शिक्कामोर्तब झाले. शहराध्यक्ष आर. के. पोवार यांनी गवंडी दाम्पत्याची भेट घेतली. भेटीदरम्यान आमदार हसन मुश्रीफ यांनी दूरध्वनीद्वारे राजीनामा देण्याची सूचना केली. त्यानुसार गवंडी यांनी राजीनामा देत असल्याचे सांगितले. गवंडी यांच्या राजीनाम्यानंतर रिक्त होणाऱ्या पदावर अॅड. सुरमंजिरी लाटकर यांची निवड निश्चित मानली जात असली, तरी पक्षातंर्गत नाराजी दूर करताना त्यांना प्रयत्नांची पराकाष्ठा करावी लागेल.

नाट्यमय घडामोडींनंतर महापौरपदी वर्णी लागलेल्या गवंडी विशेष सभेत सोमवारी (ता.११) राजीनामा सादर करणार आहेत. गवंडी यांच्या राजीनाम्यामुळे रिक्त झालेल्या पदावर राष्ट्रवादीकडून अॅड. लाटकर एकमेव इच्छुक असल्याने त्यांची वर्णी निश्चित मानली जात आहे. लाटकर यांच्यासमोर आव्हान निर्माण करण्यासाठी त्यांचे पारंपरिक विरोधक स्मिता माने भाजप-ताराराणी आघाडीच्या उमेदवार असणार आहेत. माने यांना माजी खासदार धनंजय महाडिक यांची रसद मिळणार असल्याने निवडणूक अटीतटीची होण्याची शक्यता आहे.

गवंडी यांची दोन महिन्यांसाठी निवड झाली होती. पण निवडणूक आचारसंहितेमुळे त्यांचा राजीनामा लांबणीवर पडला. त्यांचा राजीनामा घेतल्यानंतर राष्ट्रवादी काँग्रेसकडे डिसेंबर २०१९ पर्यंत कार्यकाळ असल्याने केवळ सव्वा महिन्याचा कालावधी अॅड. लाटकर यांना मिळण्याची शक्यता होती. मात्र अॅड. लाटकर यांचे पती व माजी नगरसेवक राजू लाटकर यांनी कोल्हापूर उत्तर व दक्षिण विधानसभा मतदारसंघात काँग्रेसच्या उमेदवारांसाठी सक्रिय प्रचार यंत्रणा राबवल्याने राष्ट्रवादीबरोबर काँग्रेस नेतृत्वाचाही त्यांनी विश्वास संपादन केला आहे. त्यामुळे त्यांना सहा महिन्याचा कालावधी देण्यात येणार असल्याचे समजते. अॅड. लाटकर यांचा महापौरपदाचा कार्यकाळ वाढण्याचे संकेत मिळत असले, तरी त्यांना प्रथम पक्षातंर्गत व भाजप-ताराराणीचे आव्हान मोडीत काढावे लागणार आहे.

जवान संभाजी भोसले

यांच्यावर अंत्यसंस्कार

सातारा :

तारगाव (ता. कोरेगाव) येथील संभाजी केशवराव भोसले (वय ४१) सीमा सुरक्षा दलात कार्यरत होते. त्रिपुरा येथील पानीसागर या ठिकाणी कर्तव्य बजावत असताना शनिवारी, २ नोव्हेंबर रोजी पहाटे दोन वाजण्याच्या दरम्यान गोळी लागून मृत्यू झाला होता. आज सकाळी साडेअकरा वाजण्याच्या दरम्यान त्यांचे पार्थिव तारगाव येथे दाखल झाले. त्यांचे मोठे बंधू शहाजी व संभाजी यांच्या मुली तनुजा (वय १३) व अपर्णा (वय, ९) यांनी हजारो लोकांच्या साक्षीने येथील कृष्णा नदीकाठावर संभाजी यांच्या पार्थिवास अग्नी दिला.

तारगाव येथील संभाजी भोसले १९९९मध्ये सीमा सुरक्षा दलात भरती झाले होते. काही दिवसांपूर्वी दीपावलीच्या सुट्टीसाठी ते घरी आले होते. काही दिवसांतच ते निवृत्त होणार होते, त्या संबंधित लागणारी सर्व कागदपत्रे जमा करून ३० ऑक्टोबर रोजी कामावर हजर झाले होते. २ रोजी रात्री बंदोबस्त करीत असताना गोळी लागून मृत्यू झाल्याची बातमी गावात कळली होती. संभाजी भोसले यांच्या अंतिम दर्शनासाठी परिसरातील गावातील अनेकांनी गर्दी केली होती. पार्थिव प्रथम घरी नेण्यात आले. पत्नी अलका व आई यांनी तिरंगा ध्वजात लपेटलेले पार्थिव पाहताच मोठा आक्रोश केला. रहिमतपूर पोलिस स्टेशनच्या वतीने हवेत फैरी झाडून त्यांना मानवंदना देण्यात आली. सीमा सुरक्षा दलाच्या वतीने ही मानवंदना देण्यात आली. संभाजी यांच्या पश्चात वडील, आई, पत्नी, मुली तनुजा व अपर्णा तसेच दोन भाऊ असा परिवार आहे.

शेतकऱ्याची आत्महत्या

कराड :

मरळी (ता. पाटण) येथील ४५ वर्षीय शेतकरी अनिल रघुनाथ पाटील यांनी कर्जबाजारीपणाला कंटाळून सोमवारी सकाळच्या सुमारास काळवट नावाच्या शिवारात लिंबाच्या झाडाला गळफास लावून आत्महत्या केली. याची फिर्याद अनिकेत उत्तम पाटील यांनी पाटण पोलिसात दिली आहे. दरम्यान, राज्यात सर्वत्र परतीच्या पावसाने हाहाकार माजवल्याने शेतकऱ्यांचे अतोनात नुकसान झाले आहे. तर दुसरीकडे सरकारच स्थापन न झाल्याने शेतकऱ्यांच्या नुकसान भरपाईबाबत प्रश्नचिन्ह निर्माण झाल्याने पाटण तालुक्यातील कर्जामुळे आत्महत्या केलेला हा पहिला बळी गेला आहे. या घटनेमुळे शेतकऱ्यांमध्ये सरकार विरोधात प्रचंड संताप निर्माण झाला आहे.

कोल्हापूर: अतिवृष्टी, महापूर आणि परतीच्या पावसामुळे नुकसान झालेल्या शेतकऱ्यांना हेक्टरी २५ हजार रूपये द्यावेत, जिल्हा ओला दुष्काळ म्हणून जाहीर करावा, आदी मागण्यांचे निवेदन शिवसेनेतर्फे जिल्हाधिकारी दौलत देसाई यांना देण्यात आले.

निवेदनात म्हटले आहे, ऑगस्ट महिन्यातील महापुरामुळे शेतकऱ्यांचे प्रचंड नुकसान झाले. त्यानंतर होत असलेल्या पावसाने सर्वच खरीप पिकांना मोठा फटका बसला आहे. यामुळे नुकसानग्रस्त शेतकऱ्यांना हेक्टरी २५ हजार रूपये द्यावेत, गळीत हंगाम सुरू झाल्यानंतर पूरग्रस्त भागातील ऊस प्राधान्याने तोडावे, गेल्या हंगामातील अंतिम आणि आताच्या हंगामातील दर जाहीर करूनच कारखाने सुरू करावेत, अन्यथा सर्व साखर कारखान्यांविरेाधात तीव्र आंदोनल केले जाईल. यावेळी खासदार धैर्यशील माने, जिल्हा प्रमुख मुरलीधर जाधव, मधुकर पाटील, नामदेव गिरी, साताप्पा भवान, बाजीराव पाटील, रवींद्र माने आदी उपस्थित होते.

म. टा. प्रतिनिधी, कोल्हापूर

प्रादेशिक व्यापक आर्थिक भागिदारी योजनेचा करार (आरसीईपी) रद्द करावा, या मागणीसाठी सोमवारी स्वाभिमानी शेतकरी संघटनेतर्फे येथील जिल्हाधिकारी कार्यालयासमोर जोरदार निदर्शने करण्यात आली. मागण्यांचे निवेदन जिल्हाधिकारी दौलत देसाई यांना देण्यात आले.

निवेदनात म्हटले आहे, असा करार झाल्यास दुग्ध व्यावसायिक देशोधडीला लागणार आहे. १६ देशांतून शून्य टक्के आयातशुल्क आकारुन अनेक वस्तू भारतात येणार आहेत. दुग्ध व्यवसायासंदर्भात न्यूझीलंड, ॲास्ट्रेलिया देशांशी उपपदार्थाबाबत करार केला जात आहे. वस्त्रोद्योगाबाबत चीन, बांग्लादेश, ॲटोमोबाईल क्षेत्रात जपानशी करार केला जात आहे. यामुळे देशातील उद्योग अडचणीत येणार आहे. असलेले उद्योग बंद पडण्याचा धोका आहे. बेरोजगारी वाढणार आहे. यावेळी प्रदेशाध्यक्ष प्रा. जालिंदर पाटील, सागर शंभूशेटे, जनार्दन पाटील, आदिनाथ हेमगिरे, वैभव कांबळे, इंद्रजित भारमल आदी उपस्थित होते.

दरम्यान, विधानसभा निवडणूक काळात जनार्दन पाटील यांना हद्दपारीची नोटीस देण्यात आली होती. हेतुपुरस्कर ही नोटीस काढल्याचे प्रा. पाटील यांनी जिल्हाधिकारी देसाई यांच्या निदर्शनास आणून दिले. यावर जिल्हाधिकारी देसाई यांनी या प्रकरणाची माहीती घेतो, असे आश्वासन दिले. शिष्टमंडळातील अनेक शेतकऱ्यांनी पुरामुळे नुकसान झालेल्या शेतकऱ्यांना भरपाई मिळाली नाही. यामुळे शेतकरी प्रचंड आर्थिक कोंडीत आहे, असे गाऱ्हाणेही मांडले.

म. टा. प्रतिनिधी, कोल्हापूर

'दहा वर्षांत कोल्हापूर शहर विकासात मागे राहिले. कोल्हापूरच्या जनतेने विकासाला कौल दिला असून मतदारांचे आभार मानताना त्यांच्या सूचना, समस्या समजावून घेऊन कोल्हापूर शहराच्या विकासासाठी कटिबद्ध राहीन, 'असे प्रतिपादन कोल्हापूरचे नुतन आमदार चंद्रकांत जाधव यांनी केले. आमदार जाधव यांचा आज वाढदिवस विविध उपक्रमांनी साजरा झाला. मंगळवार पेठ कैलासगड स्वारी मंदिराजवळ वाढदिवसानिमित्त आयोजित कार्यक्रमात ते बोलत होते. श्रीमंत शाहू छत्रपती अध्यक्षस्थानी होते.

शाहू महाराजांच्या हस्ते चंद्रकांत जाधव यांचा सत्कार करण्यात आला. कोल्हापूरच्या जनतेने निवडून दिले असल्याने यापुढे शहराच्या विकासासाठी योगदान द्यावे, अशी सूचना महाराजांनी यावेळी दिली. शहरातील विविध तालमी, मंडळांच्या कार्यकर्त्यांनी शुभेच्छा दिल्या.

सकाळच्या सत्रात सम्राटनगर येथील जिव्हेश्वर हॉल येथे औद्योगिक, व्यापारी, उद्योजक संघटनांनी आमदार जाधव यांचा वाढदिवस साजरा केला. यावेळी आमदार सतेज पाटील, चेंबर ऑफ कॉमर्सचे अध्यक्ष संजय शेटे, उद्योगपती सतीश घाटगे, मोहन मुल्हेरकर, सचिन शिरगावकर, लक्ष्मीदास पटेल, प्रदीप कापडिया, उदय दुधाने, अतुल आरवाडे,अजित आजरी, प्रकाश चरणे यांच्या उपस्थितीत शैक्षणिक साहित्य भेट देण्यात आले.

सावली केअर सेंटर, अंधशाळा, अनाथ आश्रमात वाढदिवसानिमित्त फळे वाटण्यात आली. महापौर माधवी गवंडी यांच्या उपस्थितीत प्रभागातील रस्ते कामाचा शुभारंभ करण्यात आला. राजारामपुरी विकास मंचच्यावतीने पांजरपोळ येथे एक ट्रक चारा देण्यात आला.

आमदार जाधव यांच्या वाढदिवसानिमित्त खासबाग येथील राधाकृष्ण सत्कार्य संवर्धन मंडळाच्यावतीने रक्तदान शिबिर आयोजित केले होते. १०० हून अधिक कार्यकर्त्यांनी रक्तदान केले. महालक्ष्मी नगर, मंगेशनगर येथील मंडळाने म्हशीच्या शर्यतीचे आयोजन केले होते. बक्षीस वितरण आमदार ऋतुराज पाटील आणि आमदार जाधव यांच्या हस्ते झाले.

म. टा. वृत्तसेवा, गगनबावडा

कळे (ता. पन्हाळा ) बाजारपेठेतील प्रियांका ज्वेलर्स या सराफी दुकान फोडून चोरट्यांनी सुमारे १७५ ग्रॅम सोने व ४ ते ५ किलो चांदीचे दागिने व ऐंशी हजार रुपयांची रोखड असा ८ लाख ६५ हजारांचा ऐवज लंपास केला. मध्यवस्तीत घडलेल्या धाडसी चोरच्या घटनेने परिसरात खळबळ उडाली आहे.

कळे-बाजारभोगाव मार्गावर मुख्य बाजारपेठेत यशवंत बँकेसमोर अरुण पाटील यांचे प्रियांका टॉवर हे व्यापारी संकुल आहे. त्याच्या तळमजल्यावर श्री. पाटील यांचेच प्रियांका ज्वेलर्स हे सराफी दुकान आहे व इतर दुकान गाळे आहेत. ते कुंटुबासह पहिल्या मजल्यावर राहतात. रविवारी साप्ताहिक सुट्टी असल्याने शनिवारी रात्री दुकान व घर बंद करून त्यांच्या मूळ गावी कळंबा येथे घरी गेले होते. रविवारी मध्यरात्री चोरट्यांनी प्रथमतः मुख्य प्रवेशद्वाराचे कुलूप कटावणीच्या साहाय्याने तोडले. त्यानंतर त्यांनी जिन्यावरून पहिल्या मजल्यावर प्रवेश केला. पाटील राहत असलेल्या खोल्यांच्या दरवाजांचे कुलूप कटावणीने तोडून देवघर ,बेडरूममधील साहित्य विस्कटून देव्हाऱ्यातील सोने-चांदीच्या मूर्ती लांबविल्या. त्यानंतर घराच्या पाठीमागील बाजूने घरातून दुकानात जाणाऱ्या जिन्याच्या दरवाजाचे कुलूप तोडून थेट दुकानात प्रवेश केला. दुकानातील ड्रॉवर व कपाटे उघडून त्यातील सोन्याचांदीचे दागिने लांबविले. जिन्याखाली असलेली स्ट्रॉंगरूम फोडण्याचा प्रयत्न केला मात्र तो असफल झाला. सीसीटीव्हीचा डिव्हीआर तोडून काढून घेऊन गेले

दरम्यान, सोमवारी सकाळी येथील कापड व्यावसायिक जितू पुरोहित हे दुकान उघडण्यासाठी आले असता सराफी दुकान फोडल्याचा प्रकार निदर्शनास आला. त्यांनी दुकानाचे मालक पाटील यांना याबाबत फोनवरून कळविले. त्यांनी कळे पोलीसांना कल्पना दिली. सहाय्यक पोलिस निरीक्षक श्रीकांत इंगवले सहकाऱ्यांसह तात्काळ घटनास्थळी दाखल झाले. त्यांनी ठसेतज्ज्ञांना पाचारण करून ठसे घेतले.

चोरटा सीसीटीव्हीत कैद

मध्यरात्री २.११ वाजता साधारण एका चोरट्याने दुकानात प्रवेश केल्याचे सीसीटीव्हीमध्ये दिसून येत आहे. साधारण पावणे सहा फूट उंचीचा, तोंडाला पूर्ण मास्क लावलेला, हातामध्ये मोजे, अंगावर जॅकेट व हातात कटावणी असणारा चोरटा सी.सी.टी.व्ही फुटेजमध्ये एक कैद झाला आहे. त्यानंतर चोरट्याने सी.सी. टी.व्ही.चा डी. व्ही.आर.काढला त्यामुळे चोरटा एकटाच होता की अन्य साथीदार होते हे समजू शकत नाही. मात्र त्यांनी एकापाठोपाठ एक सात दरवाजांची कडी कोयंडे उचकटून कुलपे तोडून धाडसी चोरी केल्याने त्यांची संख्या जास्त असण्याची शक्यता आहे.

Sachin.Yadav@timesgroup.com

Tweet : sachinyadavMT

कोल्हापूर : जत, मिरजसह कर्नाटकातून मोठ्या प्रमाणात गांजा विक्रीसाठी कोल्हापुरात आणला जातो. तस्कर दर महिन्याला एक हजार किलोहून अधिक गांजा एजंटांना पुरवितात. गांजा विक्रीचा प्रवास कर्नाटक व्हाया मिरज ते कोल्हापूर असा सुरू आहे. विक्रेतेही हायटेक झाले असून गांजाची देवाण-घेवाण मोबाइलवरून माहिती देऊन केली जाते.

गांजा तस्करीसाठी सांकेतिक भाषा वापरली जाते. गांजासाठी 'हरा माला' चरससाठी 'काला माल', स्थानिक मालाला 'इधरका' तर अन्य राज्यांतून आयात केलेल्या गांजाला 'उधरका' असा कोडवर्ड वापरला जातो. गांजा ओढणाऱ्या तरुणांवर पोलिसांनी कारवाई केली. मात्र, त्यांच्या मूळ रॅकेटपर्यंत पोहोचले जात नाही. गेल्यावर्षी रेल्वे पोलिस आणि शाहूपुरी पोलिसांनी रेल्वेस्थानकाच्या आवारात एका पिशवीतून सुमारे सहा किलो गांजा जप्त केला. कर्नाटकातून ठरविक रेल्वेतून गांजा थेट मिरजेत पोहोचतो. तेथून तो कोल्हापूरसह पश्चिम महाराष्ट्रात पुरविला जातो. तस्करीचा संशय येऊ नये, म्हणून एसटी, रेल्वेतून वाहतूक केली जाते. साध्या पिशवीतून गांजा आणला जातो. कावळा नाका, लक्ष्मीपुरी, शाहूपुरी, राजारामपुरी या ठिकाणच्या रॅकेटमध्ये कार्यरत असलेल्या विक्रेत्यांना दिला जातो. काही वेळात गांजा देऊन तस्कर रेल्वे आणि एसटीने पुन्हा परत जातात. तस्करांकडून विक्रीसाठी सांकेतिक भाषा वापरली जाते.

कोल्हापूर आणि सांगली जिल्ह्यातील गांजाला 'इधरका' असे संबोधित जात आहे. कर्नाटकासह काही प्रमाणांत जत तालुक्यातून गांजा आणला जातो. दहा ग्रॅम वजनाची पुडीची विक्री सुरू होते. ५०० ते १००० रुपये दराने विक्री केली जाते. त्यासाठी विशिष्ट 'कोडवर्ड' रॅकेटकडून वापरला जातो. गांजा आल्याची माहिती हक्काच्या ग्राहकांना मोबाइलवरुन दिली जाते.

सकाळी दहा वाजल्यापासून एक रिक्षा शहरातील गांधी मैदान, शास्त्रीनगर, राजारामपुरी, पंचगंगा नदी परिसर, शेंडा पार्क, मोरेवाडी परिसरात फिरते. राजारामपुरीत परिसरातील एका टोळीकडे गांजा दिला जातो. टोळीत काही अल्पवयीन मुलांचा समावेश आहेत. सराईत गुन्ह्यांतून सुटलेल्या गुन्हेगारांनी गांजा विक्रीचे जाळे निर्माण केले आहे. कोल्हापुरात विक्रीसाठी आणलेला गांजा काही तस्कर गोव्याकडे पाठवतात. गगनबावडा, राधानगरी आणि आंबोली घाट परिसरातही गांजाचा पुरवठा केला जात आहे. कर्नाटक, महाराष्ट्रासह कोकणातही गांजा विक्रीसाठी पाठविण्याचे रॅकेट कार्यरत झाले आहे. आयसोलेशन हॉस्पिटल, गांधी मैदान, रिंग रोड, राजारामपुरी, शाहूपुरी, रंकाळा परिसर, पंचगंगा स्मशानभूमी, पंचगंगा पुलाखाली नेहमीच गांजा विक्री सुरू असते.

मिरजेत गांजाचा अड्डाच

मिरजेतील गणेश तलाव, आरग-बेडग रस्ता परिसरातील वीटभट्ट्या, पंढरपूर रस्त्यांवरील हॉटेल्स, ढाबे, दिंडी वेस, मालगाव रस्ता, सुभाषनगर या परिसरात गांजा विक्री सुरू असल्याचे पोलिस तपासात उघड झाले आहे. मिरजही गांजा विक्रीचे मुख्य केंद्र असून तेथून गांजा कोल्हापुरात आणला जात आहे.

तरुणांचा सहभाग

झटपट पैसा मिळत असल्याने गांजाची तस्करी करण्यासाठी तरुणांचा मोठा सहभाग आहे. कारागृहातून बाहेर पडलेल्या सराईत गुंडांनी गांजाविक्रीचे रॅकेट सक्रिय केले आहे. यात तरुणांना पैशाचे मोठे आमिष दाखवून अंमली पदार्थ विक्रीच्या जाळ्यात ओढले जात आहे. काही गांजा ओढणाऱ्या तरुणांना पोलिसांनी समज दिली आहे.

(उत्तरार्ध)

कोल्हापूर टाइम्स टीम

'ज्ञानामुळे मनुष्याचा विकास होतो, सकारात्मक दृष्टिकोन वाढीस लागतो. स्वत:सह संपूर्ण समाजाची उन्नती साधण्याची ताकत ज्ञानामध्ये आहे. ज्ञान, वाचन आणि चिंतन या माध्यमातून सत्याचा शोध लागतो' असा सूर वीरशैव लिंगायत समाजातर्फे आयोजित चर्चासत्रात उमटला. म्हैशाळकर महास्वामींच्या प्रमुख उपस्थितीमध्ये विविध विषयावर चर्चा करण्यात आली. वीरशैव लिंगायत समाज, अक्कमहादेवी महिला मंडळ, संत शिरोमणी मन्मथ माऊली भक्त मंडळ, वीरशैव सिद्धांतामृत मासिक यांच्या संयुक्त विद्यमाने आयोजित कार्यक्रमात ते बोलत होते. अक्कमहादेवी मंटप येथे कार्यक्रम झाला. दिवसभरात वेगवेगळ्या विषयावर चर्चासत्रे झाली.

म्हैशाळकर महास्वामी म्हणाले, 'स्त्री पुरुष समानतेचा आविष्कार वीरशैव धर्मात अनादीकालापासून स्पष्टपणे दिसून येतो. वीरशैव धर्मांत महिलांना सामाजिक, शैक्षणिक, धार्मिक क्षेत्रात समसमान स्थान दिले आहे.'

वीरशैव को-ऑपरेटिव्ह बँकेचे उपाध्यक्ष राजेंद्र लकडे यांनी ज्ञानाचे महत्व पटवून दिले. महात्मा बसवेश्वर व लिंगायत चळवळ याविषयावरील चर्चासत्रात तज्ज्ञांनी सहभाग घेतला. वीरशैव शब्दाची उत्पत्ती, महिलांचे सामाजिक स्थान, साहित्य आणि सांस्कृतिक परंपरा अशा विविध विषयांवर ऊहापोह झाला. चर्चेत बी. एस. स्वामी, शांतीतीर्थ स्वामी, प्रा. उमाकांत शेटे, डॉ. शोभा कराळे, मीनाक्षी हिरेमठ, विजय स्वामी, शशिकांत दुर्गुळे, अपर्णा जिरवणकर, शिवशंकर उपासे, राजा शिरगुप्पे यांनी सहभाग घेतला. वसंतराव सांगवडेकर यांनी प्रास्ताविक केले. राजू वाली यांनी स्वागत केले. सुमन वडगावकर यांनी आभार मानले. वीरशैव बँकेचे अध्यक्ष महादेव साखरे, समाजाचे अध्यक्ष सुनील गाताडे, नानासाहेब नवरे, राजशेखर तंबाखे, चंद्रशेखर बटकडली आदी उपस्थित होते.