जिल्हाधिकारी दौलत देसाई यांचे आदेश म. टा. प्रतिनिधी, कोल्हापूर पुणे विभाग पदवीधर मतदारसंघातील मतदार नोंदणी प्राधान्याने पूर्ण करण्याचे आदेश जिल्हाधिकारी दौलत देसाई यांनी दिले आहेत. शुक्रवारी जिल्हाधिकारी कार्यालयात झालेल्या बैठकीत त्यांनी सर्व कार्यालयीन प्रमुखांची बैठक घेतली. जिल्हाधिकरी देसाई यांनी सर्व कार्यालय प्रमुखांनी आपल्या कार्यालयातील पदवीधर मतदार नोंदणी जास्तीत जास्त प्राधान्याने पूर्ण करावीत. पाच नोव्हेंबर रोजी त्याबाबत पूर्णत्वाचे प्रमाणपत्र सादर करावेत, अशा सूचनाही दिल्या. उपजिल्हा निवडणूक अधिकारी सतीश धुमाळ यांनी सुरुवातीला संगणकीय सादरीकरण करुन सविस्तर माहिती दिली. ते म्हणाले,' कार्यालय प्रमुखांनी सेवापुस्तकांची साक्षांकित प्रत सोबत जोडावी. तसेच एकत्रित मतदार नोंदणीबाबत पत्र द्यावे. सहा नोव्हेंबर ही मतदार नोंदणीची अंतिम तारीख आहे. ३१ ऑक्टोबर २०१६ पर्यंत प्राप्त पदवीधराला नोंदणी करता येणार आहे. तसेच एक नोव्हेंबर २०१३ ते एक नोव्हेंबर २०१९ या कालावधीत शिक्षण म्हणून तीन वर्षे सेवा केलेल्या शिक्षकाची शिक्षक मतदार संघात नोंदणी करण्यात येईल.' जिल्हाधिकारी देसाई म्हणाले, 'सर्व कार्यालय प्रमुखांनी जास्तीतजास्त मतदार नोंदणी करावी. सर्व मतदारांचे एकत्र अर्ज कार्यालय प्रमुखांच्या पत्रासह संबंधित तहसीलदार, प्रांताधिकारी, गट विकास अधिकारी, महापालिका उपायुक्त तसेच जिल्हाधिकारी कार्यालयात दाखल करु शकतात. या कामास कार्यालय प्रमुखांनी प्राधान्य द्यावे.' या बैठकीला महापालिका आयुक्त डॉ. मल्लिनाथ कलशेट्टी, पालकमंत्र्यांचे विशेष कार्य अधिकारी बाळासाहेब यादव, उपमुख्य कार्यकारी अधिकारी सोमनाथ रसाळ, प्रियदर्शनी मोरे, उपजिल्हाधिकारी श्रावण क्षीरसागर, प्रांताधिकारी वैभव नावडकर, तहसीलदार अर्चना शेटे आदी उपस्थित होते.
मोबाइल अॅप डाउनलोड करा आणि राहा अपडेट
