कोल्हापूर टाइम्स टीम
'निवडणुकीमध्ये जिल्ह्यातील सर्व दहाही जागा जिंकण्यासाठी महायुती प्रयत्नशील आहे. मात्र, काही मतदारसंघात भाजप-सेनेच्या नेत्यांनी बंडखोरी केली आहे. अजूनही वेळ गेलेली नाही. त्यांनी महायुतीच्या उमेदवारांच्या प्रचारात सहभागी व्हावे. महायुतीशी द्रोह कदापी सहन केला जाणार नाही' असा पुन्हा इशारा भाजपचे प्रदेशाध्यक्ष, मंत्री चंद्रकांत पाटील यांनी रविवारी दिली. 'पराभवाची छाया दिसत असल्याने शरद पवार हे हातवारे करीत खालच्या पातळीवर टीका करीत आहेत' असा टोलाही त्यांनी लगावला. तपोवन मैदानावर महायुतीच्या उमेदवारांसाठी आयोजित जाहीर प्रचार सभेत ते बोलत होते.
कलम ३७० व ३५ 'अ' वरुन त्यांनी शरद पवार यांच्यावर जोरदार टीका केली. ते म्हणाले, 'लोकसभा आणि राज्यसभेत कायदा केला जात असताना पवार दोन्ही सभागृहात अनुपस्थित होते. त्यांची कन्या व खासदार सप्रिया सुळे यांनी थातूर-मातूर शब्दात विरोध केला. पवार हे ३७० कलम रद्द करण्याची आवश्यकता नसल्याचे सांगत होते. मात्र, आता तेच समर्थन करू लागले आहेत. घेतलेला निर्णय राष्ट्रहिताचा असल्याचे त्यांना उशीरा लक्षात आले. मुख्यमंत्री देवेंद्र फडणवीस यांनी समोर पैलवानच नसल्याचे सांगितले होते. त्यामुळे पराभव समोर दिसू लागल्याने हातवारे करत पवार खालच्या पातळीवर टीका करीत आहेत. भाजप टार्गेट करीत असल्याचा आरोप पवार करतात. पण तुम्हीच तेवढे शिल्लक राहिला आहात हे त्यांनी लक्षात घ्यावे. ते प्रचाराच्या निमित्ताने विकासाच्या मुद्यावर न बोलता जातीयवाद पसरवत आहेत' असा आरोपही त्यांनी केला.
प्रदेशाध्यक्ष पाटील म्हणाले, 'काँग्रेसने जिल्ह्यावर टोलचे भूत बसवले. टोल हटविण्यासाठी जनआंदोलन उभे राहिले. त्याची दखल घेत युती सरकारने प्रकल्पाची पूर्ण रक्कम भागवली. विमानसेवा सुरू करण्याबरोबरच अंबाबाई तीर्थक्षेत्र विकास आराखड्यासाठी ८८ कोटींचा निधी मंजूर केला. देश, राज्य आणि जिल्ह्याच्या हिताचे निर्णय केंद्र व राज्य सरकारने घेतल्याने सर्वत्र अनुकूल वातावरण आहे. नुकत्याच झालेल्या सर्व्हेमधून २२० पेक्षा अधिक जागा मिळणार असल्याचे दिसले आहे. त्यामुळे युतीच्या बंडखोरांनी तातडीने सुधारणा करावी. महायुतीबरोबर केलेला द्रोह सहन केला जाणार नाही.'
आमदार सुरेश हाळवणकर म्हणाले, 'मुख्यमंत्री देवेंद्र फडणवीस यांच्यावर भ्रष्टाचाराचा एकही आरोप नाही. त्यामुळे विरोधकांकडून ईडीची चौकशी लावली जात असल्याचा आरोप करून इव्हीएमवर शंका घेतली जात आहे. काँग्रेस, राष्ट्रवादीकडे उमेदवारी घेण्यासाठी उमेदवारच नसल्याने 'अबकी बार २२० के पार' निश्चित आहे. एखादं बेणं निवडून आलं तरी त्याला सभागृहात तोंड उघडण्याची संधीही मिळणार नाही.'
आमदार डॉ. सुजीत मिणचेकर म्हणाले, 'मतदारसंघात विरोधक शोधूनही सापडत नाहीत. 'मेक इन इंडिया', 'स्टार्टअप इंडिया'च्या माध्यमातून युतीने सरकारने उद्योगाचे जाळे विस्तारले. माणगाव येथे बाबासाहेब आंबेडकर राष्ट्रीय स्मारकांसाठी अडीच कोटीचा निधी दिला. तरी विरोधकांना विकास दिसत नाही. नुकत्याच आलेल्या महापुरामध्ये युतीचे कार्यकर्ते मदतीला धावून आले. त्यावेळी काँग्रेस-राष्ट्रवादीचे कार्यकर्ते कोठे होते?
सभेस गोकुळचे संचालक बाबा देसाई, शिवसेनेचे उमेदवार संजय घाटगे, राजेश क्षीरसागर, प्रकाश अबिटकर, उल्हास पाटील, संग्रामसिंह कुपेकर, पश्चिम महाराष्ट्र देवस्थान समितीचे अध्यक्ष महेश जाधव, हिंदुराव शेळके, आशोक देसाई आदी उपस्थित होते. महानगर अध्यक्ष राहुल चिकोडे यांनी स्वागत केले. आमदार अमल महाडिक यांनी प्रास्ताविक केले. विजय जाधव यांनी सूत्रसंचालन केले.
गोकुळ, महादेवराव महाडिकांवर टीका का?
'दक्षिणमध्ये आमदार अमल महाडिक यांनी ११५० कोटींची विकासकामे केली. त्यामुळे विरोधकांकडे मुद्दे नसल्याने जिल्हा दूध संघ (गोकुळ) व महादेवराव महाडिक यांच्या टीका केली जात आहे. द्वेषाचे राजकारण करणारे सूर्याजी पिसाळ वृत्तीने ग्रासलेले मनोरुग्ण आहेत' अशा शब्दात प्रदेश उपाध्यक्ष व माजी खासदार धनंजय महाडिक यांनी आमदार सतेज पाटील यांच्यावर टीका केली.
सरकारच्या शिवस्मारक, बाबासाहेब आंबेडकर स्मारक, उज्ज्वल गॅस योजना, कृषी सन्मान कर्जमाफी योजना आदी कामांचा आढावा घेताना महाडिक म्हणाले, 'आमदार महाडिक यांनी रस्ते, गटर या पायाभूत सुविधांबरोबर २३ हजार एलईडी दिव्यांनी मतदारसंघ उजळून काढला आहे. विकासाचे कोणतेही मुद्दे नसल्याने केवळ द्वेषातून महाडिक कुटुंबीयांवर टीका केली जात आहे. आम्हाला संपविण्याची भाषा करणाऱ्यांनी टोलचे भूत जिल्ह्याच्या मानेवर बसवून त्यात ढपला पाडला. थेट पाइपलाइनद्वारे स्वच्छ पाणी नातवंडाना तरी मिळेल का? अशी स्थिती आहे. गर्भगळीत काँग्रेसकडे उमेदवार नसताना, ज्यांनी पक्ष संपवला त्यांच्या हाती जिल्ह्याची सूत्रे दिली आहेत. २०१४मध्ये त्यांना स्टार प्रचारक केल्यानंतर जिल्ह्यात काँग्रेस भुईसपाट झाली. जेथे त्यांनी सभा घेतल्या तेथील उमेदवारांचाही पराभव झाला. लोकसभा निवडणुकीत शरद पवार यांनी चारवेळा समजूत काढूनही त्यांनी आघाडीविरोधात काम केले. तेच आज आघाडीच्या विजयासाठी प्रयत्न करीत आहेत ' असा टोला माजी खासदार महाडिक यांनी लगावला.
दोन्ही खासदारांसह नरके, पाटील अनुपस्थित
सभेला जिल्ह्यातील महायुतीचे दहापैकी आठ उमेदवार उपस्थित होते. सेनेचे खासदार धैर्यशील माने, संजय मंडलिक या दोघांसह करवीरचे उमेदवार आमदार चंद्रदीप नरके व पन्हाळ्याचे आमदार सत्यजित पाटील अनुपस्थित होते. त्यांच्या गैरहजेरीची चर्चा सभास्थळी सुरू होती.
बंटी अन् बबली
'माजी गृहाराज्यमंत्र्यांची राजकारणात बंटी अशी ओळख आहे. मुख्यमंत्र्यांसमवेत वावरताना बंटीसोबत 'बबली' (राजीव सातव) होता. त्यांना सत्तेचा माज आला होता. अमल महाडिक यांनी सत्तेचा माज उतरवून पाच वर्षांत विकासकामांचा डोंगर उभारला' असा टोला आमदार हाळवणकर यांनी सतेज पाटील यांचे नाव न घेता लगावला. 'धनंजय महाडिक यांची थोडी राजकीय दिशा चुकली. अन्यथा ते विक्रमी मतांनी निवडून आले असते' असेही ते म्हणाले. 'सुप्रिया सुळेंनी आयकर विभागाला सादर केलेल्या विवरणपत्रात वांग्याच्या उत्पन्नातून १५० कोटी रुपये मिळाल्याचे नमूद केले आहे. माजी गृहमंत्री चिदंबरम यांनी शेतीचे १००० कोटींचे उत्पन्न दाखवले आहे. या गोष्टींची चौकशी सुरू असताना ईडीच्या माध्यमातून सामान्यांमध्ये संभ्रम निर्माण केला जात आहे' असा आरोप हाळवणकर यांनी केला.
