म. टा. प्रतिनिधी, कोल्हापूर

शहर आणि परिसरात गुरुवारी पावसाच्या जोरदार सरी कोसळल्या. दुपारी साडेतीन वाजण्याच्या सुमारास पावसाच्या मोठ्या सरींना प्रारंभ होताच लहानसहान व्यावसायिकांची त्रेधातिरपीट उडाली. अंबाबाई मंदिर परिसर, टेंबलाई टेकडी येथे ललिता पंचमी सोहळ्यानिमित्त दर्शनासाठी गर्दी केलेल्या भाविकांची पावसामुळे तारांबळ उडाली. मंदिर परिसरातील सांस्कृतिक कार्यक्रमही काही वेळ रद्द करण्यात आले. नवरात्र उत्सवाची गर्दी कॅश करण्यासाठी फेरीवाले, लहानसहान व्यावसायिक विक्रेत्यांनी स्टॉलची उभारणी केली होती. मात्र त्यांना पावसाचा फटका बसला.

रेणुका मंदिरालगतच्या रस्त्यावरील पुलानजीक सायंकाळी पाच वाजण्याच्या सुमारास झाड कोसळण्याची घटना घडली. यामुळे या रस्त्यावरील वाहतूक काही वेळ खोळंबली. सुदैवाने याप्रसंगी झाडाखालून कसल्याही प्रकारची वाहतूक सुरू नव्हती. अचानक झाड कोसळल्यामुळे ओढ्याच्या पलिकडील वाहनधारक व नागरिकांत घबराट पसरली. रस्त्याच्या दोन्ही बाजूला खोदाई केल्याने झाडे उन्मळून पडण्याचा धोका निर्माण झाल्याचे प्रत्यक्षदर्शी नागरिकांनी सांगितले. झाड कोसळल्यानंतर या भागातील विद्युत पुरवठाही तासभर खंडीत झाला होता. अग्निशमन दलाच्या जवानांनी रस्त्यावर कोसळलेले झाड हटविले.

दरम्यान, गेले दोन दिवस उकाडा जाणवत होता. सकाळपासून उष्मा वाढला होता. दुपारनंतर ढगांची गर्दी होऊन पावसाळी वातावरण तयार झाले. साडेतीन वाजण्याच्या सुमारास सरी कोसळायला सुरुवात झाली. जवळपास तासभर पाऊस झाला. शहरातील सखल भागात पाणी साचले. ऑगस्ट महिन्यातील अतिवृष्टीमुळे शहरातील बहुतांश रस्ते खराब झाले आहेत. महापालिकेने मुरुम टाकून खड्ड्यांचे पॅचवर्क केले आहे. मात्र पावसामुळे रस्त्यावर चिखल निर्माण होवून दुचाकी घसरण्याचे प्रकार घडले.

म. टा. प्रतिनिधी, कोल्हापूर

विधानसभा निवडणुकीच्या प्रचारासाठी राष्ट्रवादी काँग्रेसचे राष्ट्रीय अध्यक्ष शरद पवार हे आज, शुक्रवारी कोल्हापूर जिल्हा दौऱ्यावर येत आहेत. राधानगरी भुदरगड मतदारसंघातील पक्षाचे उमेदवार माजी आमदार के. पी. पाटील यांच्या प्रचारासाठी त्यांची मुदाळ येथे दुपारी साडेतीन वाजता प्रचार सभा होणार आहे. विधानसभा निवडणुकीच्या धामधुमीत त्यांचा दौरा हा आघाडीसाठी महत्वाचा ठरणारा आहे.

पवारांच्या या दौऱ्यात जिल्ह्यातील विधानसभा मतदारसंघातील विजयासाठी रणनिती आखली जाईल. या दौऱ्यात ते जिल्ह्यातील दोन्ही काँग्रेसच्या नेते मंडळीसोबत चर्चा करणार आहेत. शिवाय ते प्रत्येक मतदारसंघाचा आढावा घेणार असल्याचे वृत्त आहे. पवार हे शुक्रवारी रात्री हॉटेल पंचशील येथे मुक्कामाला आहेत. या ठिकाणी ते जिल्ह्यातील नेत्यांशी चर्चा करणार असल्याचे वृत्त आहे. दरम्यान, पवार हे शुक्रवारी दुपारी अडीच वाजण्याच्या सुमारास हेलिकॉप्टरने मजले येथे पोहचतील. तेथून ते के. पी. पाटील यांच्या प्रचारासाठी मुदाळकडे रवाना होतील. मुदाळ येथील परशराम बाळाजी पाटील हायस्कूलच्या मैदानावर त्यांची सभा होणार आहे. सभा आटोपून सायंकाळी पावणे सात वाजता हॉटेल पंचशील येथे दाखल होतील. शनिवारी (ता. ५) सकाळी दहा वाजता ते मजले येथून हेलिकॉप्टरने पुढील कार्यक्रमासाठी रवाना होणार आहेत.

म. टा. प्रतिनिधी, कोल्हापूर

भाजपचे ज्येष्ठ नेते आणि पश्चिम महाराष्ट्र देवस्थान समितीचे सदस्य सुभाष बाबूभाई वोरा (वय ७३) यांचे बुधवारी मध्यरात्री निधन झाले. त्यांच्या पश्चात मुलगा, मुलगी, बहीण असा परिवार आहे. आज गुरुवारी सकाळी पंचगंगा स्मशानभूमीत अंत्यसंस्कार करण्यात आले. रक्षा विसर्जन शनिवारी (ता.५) सकाळी नऊ वाजता होणार आहे. त्याच दिवशी सायंकाळी पाच वाजता करवीर नगर वाचन मंदिर येथे शोकसभेचे आयोजन करण्यात आले आहे.

गेले महिनाभर वोरा यांच्यावर खासगी हॉस्पिटलमध्ये उपचार सुरू होते. काल मध्यरात्री त्यांची प्राणज्योत मालवली. गुरुवारी सकाळी पंचगंगा स्मशानभूमीत अंत्यसंस्कार करण्यात आले. यावेळी आमदार सतेज पाटील, पश्चिम महाराष्ट्र देवस्थान समितीचे अध्यक्ष महेश जाधव, भाजप गटनेते नगरसेवक विजय सूर्यवंशी, सत्यजित कदम, संभाजी जाधव, विजय खाडे, अजित ठाणेकर, टी. एस. कुलकर्णी, स्वरुप महाडिक, ऋतुराज क्षीरसागर, शिवसेना जिल्हा प्रमुख संजय पवार, अनिरुद्ध कोल्हापुरे, भाजप सरचिटणीस विजय जाधव, सुभाष रामुगडे, कॉ. दिलीप पवार, रघू कांबळे यांच्यासह सर्व पक्ष, संघटनाचे पदाधिकारी यावेळी उपस्थित होते.

वोरा यांचा जन्म चार सप्टेंबर १९४६ मध्ये झाला. त्यांनी राष्ट्रीय स्वयंसेवक संघामध्ये विविध जबाबदारी पार पाडल्यावर जनसंघाची जबाबदारी त्यांच्यावर देण्यात आली. आणीबाणीत त्यांनी तुरुंगवासही भोगला. त्यानंतर महानगरपालिकेत भाजपचे एकमेव नगरसेवक होते. महानगरपालिकेत स्थायी समिती सभापतिपद भूषवताना त्यांनी मोफत अंत्यसंस्कार उपक्रमाची सुरुवात करत त्याची अंमलबजावणीही केली. आजही ही योजना कायम आहे. महानगरपालिकेत दोनवेळा ते भाजपचे नगरसेवक होते. १९८० मध्ये विधानसभेची तसेच इचलकरंजी लोकसभा मतदार संघातूनही निवडणूक लढवली होती. भाजप महानगर अध्यक्षपदही त्यांनी सांभाळले. शिवसेना-भाजप युतीच्या सत्तेच्या काळात ते राज्य परिवहन समितीवर होते. प्रदेश कार्यकारिणीवही त्यांना संधी दिली होती. राजकारणात सध्या सक्रीय नसले तरी कोल्हापूर जनशक्ती संघटनेच्या माध्यमातून शहरातील अनेक प्रश्नांवर त्यांनी आवाज उठवला.

माजी महापौरांच्या

मुलीची आत्महत्या

म. टा. प्रतिनिधी, जळगाव

जळगाव महापालिकेचे माजी महापौर अशोक सपकाळे यांच्या तरुण विवाहीत मुलीने भुसावळ राहत्या घरात गळफास घेवून आत्महत्य केल्याची घटना गुरुवारी सकाळी ११ वाजता घडली. नयना जितेंद्र सपकाळे (२५) असे मृत विवाहीतेचे नाव आहे. मृत्यूपूर्वी लिहलेल्या चिठ्ठीत आत्महत्येस कुणालाही जबाबदार धरु नये व माझे नाशिक येथील कारागृहात असलेले वडील अशोक सपकाळे यांना सुट्टी देण्यात यावी, असे म्हटले आहे. नयना हिचा सहा वर्षापूर्वी जितेंद्र जयराम सपकाळे यांच्याशी विवाह झाला होता.

नांदेड : मूकबधीर अल्पवयीन मुलीवर अत्याचार करणाऱ्या एका आरोपीला दहा वर्षे सक्तमजुरी व पाच हजार रुपये दंडाची शिक्षा ठोठावली. याच प्रकरणातील अन्य दोन आरोपी अल्पवयीन असल्याने त्यांच्यावर स्वतंत्र खटला चालविण्याचे आदेश प्रमुख जिल्हा न्यायाधीश दीपक ढोलकिया यांनी दिले.

शहराच्या लालवाडी परिसरात राहणारी एक मूकबधीर अल्पवयीन मुलगी ५ सप्टेंबर ११ रोजी घरी टीव्ही बघत होती. रात्री ती घराबाहेर गेली असता याच परिसरात राहणाऱ्या शेख तौफिक शेख रऊफ, जावेद पठाण करीम पठाण व अब्दुल सलीम अब्दुल रशीद या तिघांनी तिला जबरदस्तीने दुचाकीवर श्रावस्तीनगर परिसरात नेले आणि तिघांनी तेथे तिच्यावर अत्याचार केला. रात्री ८.३० वाजता तिला पारसनगर रस्त्यावर आरोपींनी आणून सोडले. तेव्हा ती रडत-रडत घरी आली आणि घडला प्रकार तिने खाणाखुनाने आई व नातेवाईकांना सांगितला. त्यानंतर पीडितेच्या आईने दिलेल्या तक्रारीवरुन शिवाजीनगर पोलिसांनी उपरोक्त तिघांविरुद्ध अत्याचार करणे, संगनमत करणे, अनुसुचित जाती अत्याचार प्रतिबंधक कायद्यान्वये गुन्हा दाखल केला. घटनेचे गांभीर्य लक्षात घेऊन तत्कालीन पोलिस उपाधीक्षक लक्ष्मीकांत पाटील यांनी तिघांच्या मुसक्या आवळल्या.

स्वत: पाटील यांनी या प्रकरणाचा तपास करून न्यायालयात दोषारोपपत्र दाखल केले. न्यायालयाने या प्रकरणात एकूण १२ साक्षीदारांच्या साक्षी नोंदविल्या. त्यानंतर दोन्ही बाजूने युक्तिवाद झाला. सरकारी पक्षाने केलेला युक्तिवाद व उपलब्ध पुराव्या आधारे प्रमुख जिल्हा न्यायाधीश दीपक ढोलकिया यांनी शेख तौफीक शेख रऊफ याला दहा वर्षे सक्तमजुरी व पाच हजार रुपये दंडाची शिक्षा सुनावली. उर्वरित दोन आरोपी अल्पवयीन असल्याने त्यांच्यावर स्वतंत्र खटला चालविण्याचे आदेश त्यांनी दिले. अत्यंत गुंतागुंतीच्या या प्रकरणात सरकार पक्षाची बाजू सहाय्यक सरकारी वकील संजय लाठकर यांनी मांडली.

आमदार जयंत पाटील यांचे प्रतिपादन

म. टा. प्रतिनिधी, बीड

पाच वर्षांच्या सत्तेच्या काळात युती सरकारने शेतकऱ्यांना कर्जमाफी व युवकांना रोजगार न देता फक्त भुलथापा मारून फसवले. शरद पवार यांनी यापूर्वी ७२ हजार कोटीची कर्जमाफी देवून खरी कर्जमाफी काय असते ते दाखवून दिले आहे. राज्यात आघाडी सरकार आल्यास शेतकऱ्यांना पहिल्याच कॅबिनेटमध्ये संपूर्ण सरसकट कर्जमाफी देण्यात येईल, असे आश्वासन राष्ट्रवादी काँग्रेस पार्टीचे प्रदेशाध्यक्ष जयंत पाटील यांनी दिले.

राष्ट्रवादी काँग्रेस, काँग्रेस आघाडीचे गेवराई विधानसभेचे उमेदवार विजयसिंह पंडित यांच्या प्रचारार्थ कृष्णाई येथे पदाधिकाऱ्यांशी संवाद साधताना ते बोलत होते. यावेळी व्यासपीठावर माजीमंत्री शिवाजीराव (दादा) पंडित, प्रदेश सरचिटणीस अमोल मिटकरी, राष्ट्रवादी युवक काँग्रेसचे प्रदेशाध्यक्ष महेबुब शेख, प्रदेश सरचिटणीस अमरसिंह पंडित, पिपल्स रिपब्लिकन पार्टीचे अनिल तुरूकमारे, शेतकरी संघटनेचे श्रीनिवास भोसले, विजयसिंह पंडित यांची उपस्थिती होती.

गेवराई विधानसभेसाठी राष्ट्रवादी काँग्रेस, काँग्रेस व मित्र पक्ष आघाडीचे उमेदवार विजयसिंह पंडित यांनी गुरुवारी उमेदवारी अर्ज तहसील कार्यालयात दाखल केला. त्यानंतर कृष्णाई येथे जमलेल्या हजारो मतदारांना संबोधित करताना जयंत पाटील म्हणाले, 'आता भाजप व सेनेची उलटी गिनती चालू झाली असून त्यांच्या काही मंत्र्यांनाच उमेदवारी दिली गेली नाही तर काही प्रमुख नेत्यांवर सुरक्षित मतदार संघ शोधण्याची दुर्दैवी वेळ आली आहे. या सरकारची खोटी नियत राज्यातील तरुणांना समजली आहे. त्यामुळेच आज सर्वाधिक तरुणांचा लोंढा राष्ट्रवादी काँग्रेस पक्षात येत असून हे तरुणच विजयसिंह पंडित यांच्या विजयाचे शिलेदार बनतील.'

राष्ट्रवादी काँग्रेस पार्टीचे प्रदेश सरचिटणीस अमरसिंह पंडित म्हणाले, 'दुष्काळ, शेतीप्रश्‍न, शेतकऱ्यांच्या आत्महत्या, बेरोजगारी, भाव वाढ, शेत मालाला भाव नाही या ज्वलंत प्रश्‍नांवर शासन काहीच उपाययोजना न करता भावनेचे राजकारण करून नागरिकांचे डोके भडकवित आहे. विद्यमान आमदार तर आमदार फंड संपला तरी फक्त उद्घाटन करून लोकांना वेड्यात काढण्याचा धंदा करीत आहेत. त्यांची ही पूर्ती फसवेगिरी मतदार आता ओळखून चुकला आहे.'

बीड : परळी विधानसभा मतदारसंघासाठी राष्ट्रवादी काँग्रेस-काँग्रेस व मित्र पक्षांच्या आघाडीचे उमेदवार धनंजय मुंडे व भाजप-शिवसेना महायुतीच्या उमेदवार पंकजा मुंडे यांनी मोठे शक्तिप्रदर्शन करीत गुरुवारी उमेदवारी अर्ज दाखल केले. गुरुवारी सकाळी धनंजय मुंडे यांनी परळी येथे प्रभु वैद्यनाथाचे दर्शन घेतले. त्यानंतर जन्मगाव नाथरा येथे ग्रामदैवताचे दर्शन व गावातील ज्येष्ठ मंडळींचे आशीर्वाद घेतले. त्यानंतर त्यांनी तहसिल कार्यालयात जावून उमेदवारी अर्जाचे चार संच दाखल केले. पालकमंत्री पंकजा मुंडे यांनी गुरुवारी विजयी संकल्प रॅली काढून उमेदवारी अर्ज दाखल केला. वैद्यनाथ मंदिर आणि त्यानंतर गोपीनाथ गडावर जाऊन लोकनेते गोपीनाथ मुंडे यांच्या समाधीचे दर्शन घेतले. त्यानंतर छत्रपती शिवाजी महाराज यांच्या पुतळ्यास पुष्पहार अर्पण करून रॅलीला सुरवात झाली. राणी लक्ष्मीबाई टॉवर चौकात आली व याठिकाणी रॅलीचे रूपांतर सभेत झाले. दुग्धविकास मंत्री महादेव जानकर, खासदार डॉ. प्रीतम मुंडे, यशश्री मुंडे, केशवराव आंधळे, देविदास राठोड, गोविंदराव केंद्रे, फुलचंद कराड उपस्थित होते. बीड जिल्ह्यात गुरुवारी सहा विधानसभा मतदारसंघांत ६४ उमेदवारांकडून एकूण ९० अर्ज दाखल करण्यात आले. गेवराई मतदारसंघातील १७ उमेदवारांची २२ नामनिर्देशन पत्रे, माजलगाव १२ उमेदवारांची १८ अर्ज, बीडमध्ये नऊ उमेदवारांचे ११ अर्ज, आष्टीमध्ये सहा उमेदवारांचे ९ अर्ज दाखल केले.

म. टा. प्रतिनिधी, लातूर

माझ्या राजकारणाच्या १७ वर्षांत १२ वर्ष प्रकर्षाने दुष्काळ जाणवला. हाच मुद्दा दृष्टीक्षेपात ठेवून लातुर जिल्हा दुष्काळमुक्त करण्याचा मानस आहे. या निवडणुकीचे मुख्य ध्येय दुष्काळमुक्ती असेल. त्यासाठी कृष्णा खोऱ्याचे पाणी लातूरच्या मांजरा, तेरणा नदीत आणून त्या बारमाही वाहत्या करणार असल्याचे आश्वासन गुरुवारी उमेदवारी अर्ज दाखल करण्यापुर्वी आयोजित जनआशिर्वाद सभेस संबोधित करताना पालकमंत्री संभाजी पाटील-निलंगेकरांनी दिले.

यावेळी झालेल्या सभेस खासदार सुधाकर श्रंगारे, माजी खासदार रुपाताई पाटील-निलंगेकर, जिल्हाध्यक्ष नागनाथ निडवदे, विधानसभा प्रभारी सुधीर काडादी, युवानेते अरविंद पाटील-निलंगेकर, ज्येष्ठ नेते हावगीराव पाटील, प्रेरणा पाटील-निलंगेकर, जिल्हा परिषदेचे जिल्हाध्यक्ष मिलींद लातुरे, उपाध्यक्ष रामचंद्र तिरुके, देवणीचे तालुकाध्यक्ष प्रशांत पाटील, शिरुर अनंतपाळचे तालुकाध्यक्ष प्रकाश कोरे, सभापती बजरंग जाधव, समाजकल्याण सभापती तथा तालुकाध्यक्ष संजय दोरवे, भगवानराव पाटील-तळेगावकर, सभापती अजित माने, सत्यवान कांबळे, नगराध्यक्ष बाळासाहेब शिंगाडे, माजी उपसभापती तुकाराम पाटील, शिवसेनेचे विनोद आर्य, ईश्वर पाटील, दत्ता मोहोळकर, रासपाचे जिल्हाध्यक्ष दादाराव करपे, रिपाईचे अंकुश ढेरे, सैनिक कल्याण मंडळाचे प्रदेशाध्यक्ष अशोक भांगे आदीची उपस्थिती होती.

नांदेड : पंधरा लाखांच्या खंडणीची मागणी करून साडे चार लाख रुपये स्वीकारणाऱ्या एका दाम्पत्याला गुरुवारी न्यायालयाने जन्मठेपेची शिक्षा सुनावली. न्या. के. एन. गौतम यांनी या प्रकरणाचा निकाल देताना दोन आरोपींची सबळ पुराव्या अभावी निर्दोष मुक्तता केली. एकूण सहा पैकी एका आरोपीचा मृत्यू झाला तर एक आरोपी अजूनही फरार आहे.

वसमतमध्ये राहणाऱ्या व नांदेडात शिकण्यासाठी आलेल्या एका शालेय विद्यार्थीनीचे अपहरण झाले होते. २४ एप्रिल २००५ रोजी ही घटना घडली होती. तत्पूर्वी १७ एप्रिल रोजी या मुलीच्या वडिलांना एकाने १५ लाख रुपयांची खंडणी मागितली होती. पैसे न दिल्यास मुलीचे अपहरण करण्यात येईल असे धमकावले होते. कोणी तरी खोडसाळपणा केला असेल म्हणून त्यांनी दुर्लक्ष केले. परंतु, २४ एप्रिल रोजी मुलीचे अपहरण झाल्यानंतर तिच्या सोबत मित्राने भाग्यनगर पोलिस ठाणे गाठले. तेथे तक्रार दिल्यानंतर पोलिसांनी पाळत ठेवली. त्यानंतर १५ लाखांची तडजोड साडे चार लाखांवर आली.

मुलीच्या वडिलाने आरोपींची मागणी मान्य करत पोलिसांच्या मदतीने हैदराबादचा चारमिनार भाग गाठला. २७ एप्रिल रोजी पोलिसांनी सापळा रचून साडे चार लाखांची खंडणी स्वीकारल्यानंतर आरोपींना झडप घालून पकडले. तसेच अपहृत मुलीची सुटका केली. या प्रकरणी भाग्यनगर पोलिसांनी मोहम्मद सय्यद शिबिबी, शाहीन बेगम मोहम्मद सय्यद, मोहम्मद जमील मो. रफीक, शेख खाजा शेख रऊफ, शेख बाबर व अजमत बेग यांच्याविरुद्ध गुन्हा दाखल केला. तत्कालीन उपनिरीक्षक मोहम्मद गियासोद्दीन, संतोष चव्हाण यांनी प्रकरणाचा तपास करून न्यायालयात दोषारोपपत्र दाखल केले.

न्यायालयाने या प्रकरणात १३ साक्षीदार तपासले. गुरुवारी या प्रकरणाचा निकाल देताना न्या. के. ए. गौतम यांनी मोहम्मद सय्यद व त्याची पत्नी शाहीन बेगम या दाम्पत्याला जन्मठेपेची शिक्षा ठोठावली. तसेच मोहम्मद जमील, शेख खाजा या दोघांची निर्दोष मुक्तता केली. या प्रकरणातील शेख बाबर हा जामीनावर सुटल्यानंतर फरार झाला तर खटल्यादरम्यान अजमत बेग यांचा मृत्यू झाला. या प्रकरणात सरकार पक्षाची बाजू एम. ए. बत्तुला-डांगे यांनी मांडली.

उस्मानाबाद : शारदीय नवरात्र महोत्सवातील पाचव्या माळेनिमित्त महंत व भोपे पुजाऱ्यांनी तुळजाभवानीची मुरली अलंकार महापूजा मांडली होती. या आगळ्यावेगळ्या पुजेचे हजारो भाविकांनी दर्शन घेऊन 'आई राजा उदो उदो'चा जयघोष केला. शारदीय नवरात्रात तुळजाभवानी दर्शनासाठी पाचव्या माळेपासून मोठ्या प्रमाणावर भाविक चालत येतात व आपल्या नवसाची पूर्तता करतात. यामुळे बुधवारी सायंकाळपासून हजारो भाविक शहरातील चारी रस्त्यांनी देवी दर्शनासाठी तुळजापूर नगरीत दाखल होत होते. त्यामुळे रात्री मोठ्या प्रमाणावर भाविकांची गर्दी झाली.

यामुळे संपूर्ण मंदिर परिसर व शहरातील मुख्य रस्ते देवी भाविकांच्या गर्दीने फुलून गेले होते. यामुळे व्यापारी, फेरीवाले व हॉटेलवाले यांचा व्यवसाय तेजीत होताना दिसत होता. देवीचा प्रसाद घेण्यासाठी मंदिरात लाडूसाठी तर बाहेर प्रासादिक भांडार दुकानात चिरमुरे, फुटाणे प्रसाद घेण्यासाठी भाविकांची मोठी गर्दी होती.

वाढती गर्दी पाहून एसटी महामंडळाने सोलापूर, लातूर, बार्शी, उस्मानाबाद तसेच शेजारच्या परराज्यात जाण्यासाठी जादा बसची मोठ्या प्रमाणावर व्यवस्था केली होती. शहरात भाविकांना त्रास होऊ नये म्हणून शहराबाहेरील वाहनतळावर सर्व खासगी वाहने थांबविण्यात आली होती. त्यामुळे शहरात दुचाकींची संख्या मोठ्या प्रमाणात दिसून येत होती. नगर परिषदेच्या वतीने देवी भाविकासाठी प्रथमोपचार केंद्र, पाणीपोई, विसावा कक्ष, फिरते शौचालय, भव्य दर्शन मंडप, स्क्रीन आधीची व्यवस्था केली आहे. सुरक्षेच्या नावाखाली पोलिसांचा अतिरेक होत असून याचा फटका देवी भाविका बरोबरच स्थानिक लोकांनाही मोठ्या प्रमाणात बसत आहे. यामुळे हा उत्सव शारदीय की शासकीय नवरात्र महोत्सव अशी चर्चा पुजारी वर्गात होत आहे.

फोटो ओळी...

शारदीय नवरात्र महोत्सवातील पाचव्या माळेनिमित्त गुरुवारी तुळजाभवानीची मुरली अलंकार महापूजा मांडली होती.

कोल्हापूर: 'पर्यटन क्षेत्रात रोजगाराच्या मोठ्या संधी उपलब्ध आहेत. कृषी, धार्मिक, किल्ले, जलपर्यटन अशा विविध क्षेत्रात मोठ्या प्रमाणात करिअर करता येते,'असे मत प्रा. डॉ. सी. पी. कुरणे यांनी व्यक्त केले. गोपाळ कृष्ण गोखले कॉलेजमध्ये जागतिक पर्यटन दिनाचे औचित्य साधून भूगोल, इतिहास व बी व्होक विभागातर्फे कार्यक्रमाचे आयोजन केले होते. प्रा. आर. आर. एच. पाटील कार्यक्रमाच्या अध्यक्षस्थानी होते. याप्रसंगी प्रा. एन. सी. फडणीस यांनी मनोगत व्यक्त केले. प्रास्ताविक प्रा. एस. के. पाटील यांनी केले. विवेकानंद पाटील यांनी आभार मानले. कार्यक्रमाला प्रभारी प्राचार्य पी. के. पाटील, प्रा. एस. ए. मेणशी, प्रा. नीलेश सुस्वरे, प्रा. डी. के. डाके आदी उपस्थित होते.

कोल्हापूर: राज्यातील महावितरण, महापारेषण व महानिर्मिती या तीन कंपन्यातील सभासद असलेल्या महाराष्ट्र राज्य विद्युत मंडळ अधिकारी संघटनेच्या राज्य अध्यक्षपदी विकास आढे यांची बिनविरोध निवड झाली. आढे हे महावितरणमध्ये नाशिक परिमंडळचे जनसंपर्क अधिकारी म्हणून कार्यरत आहेत. नाशिक येथे आयोजित अधिकारी संघटनेच्या केंद्रीय कार्यकारिणीच्या बैठकीत निवडीवर शिक्कामोर्तब झाले. याप्रसंगी संघटनेचे माजी अध्यक्ष सतीश तळणीकर, सरचिटणीस डी. आर. शिंदे, संघटन सचिव प्रवीण बागुल, संघटनेचे मार्गदर्शक गुलाबराव मानेकर यांची उपस्थिती होती.

Satish.ghatage@timesgroup.com

Tweet:satishgMT

कोल्हापूर: आपत्कालीन सेवांसाठी असणाऱ्या मुख्य मार्गावर अतिक्रमणाचे अडथळे, पाण्याचा अभाव, फायर बॉल हाताळण्यासाठी यंत्रणा, प्रशिक्षण नाही, बेशिस्त पार्किंग यामुळे अंबाबाई मंदिर आणि मंदिर परिसरात आपत्ती व्यवस्थापनाकडे दुर्लक्ष असल्याचे चित्र पहायला मिळते. मंगळवारी रात्री सलामी देण्यासाठी उडवण्यात आलेल्या तोफेच्या गोळा लागून तरुण जखमी झाल्याने मंदिर परिसरातील आपत्ती व्यवस्थानातील त्रुटी समोर येत आहेत.

नवरात्रोत्सवात अंबाबाईच्या दर्शनासाठी मोठ्या प्रमाणात भाविक येत आहेत. पश्चिम महाराष्ट्र देवस्थान व्यवस्थापन समिती, पोलिस प्रशासन, महानगरपालिका यांच्याकडून सुविधा पुरवल्या जात आहेत. पण या सुविधा पुरवताना आपत्ती व्यवस्थापनास मदत होण्याऱ्या सुविधेकडे दुर्लक्ष झाले आहे. मंदिराच्या सुरक्षिततेसाठी चारही दरवाजावर मेटल डिटेक्टर उभारण्यात आले आहेत. भाविकांसाठी दर्शन रांगाची सोय करण्यात आली. गर्दीवर नियंत्रण ठेवण्यासाठी दोन ठिकाणी मुखदर्शनासाठी सोय केली आहे.

उत्सवाच्या पार्श्वभूमीवर मंदिरातील सर्व ठिकाणी फायर ऑडिट केल्याचा दावा देवस्थान समितीकडून केला जात आहे. पण आजही महाद्वार, घाटी दरवाजा येथे वायर लोंबकळत आहेत. मंदिराच्या आवारात अनेक ठिकाणी भाविकांच्या सोयीसाठी दर्शन रांग, सांस्कृतिक कार्यक्रम, देवस्थान समितीचे कार्यालयासमोर मंडप उभारण्यात आले आहेत. आग लागल्यास ती विझवण्यासाठी १८ ठिकाणी फायर बॉलचे स्टँड उभारण्यात आले आहेत. पण फायर बॉल हाताळण्याचे प्रशिक्षण कर्मचाऱ्यांना दिलेले नाही. फायर बॉल कुठे बसवले आहेत, याची माहिती अनेक कर्मचाऱ्यांना माहीत नसल्याचे चित्र पहायला मिळाले. पाण्याची सोय नसल्याने उत्सवकाळातही भाड्याने टँकर आणावा लागत आहे. आग विझवण्यासाठी अत्यावश्यक वाळू, पाणी आणि अन्य अग्निशमन करणारे साहित्य आणि यंत्रणा येथे दिसत नाही. मंदिराच्या बाहेर दक्षिण दरवाजासमोर फक्त भाविकांना सूचना देण्यासाठी स्पीकरची सोय आहे. पण मंदिरात ध्वनिक्षेपक सुविधा असूनही प्रशासनाकडून कोणतीही सूचना दिली जात नाही.

मंदिरात जर आपत्ती घडली तर अग्निशमन दल व रुग्णवाहिकेसाठी एकमेव घाटी दरवाजा उपलब्ध आहे. घाटी दरवाजाकडे येणारे सर्व मार्ग पोलिस प्रशासन आणि महानगरपलिकेने बंद केले आहेत. वसंत मेडिकल ते जोतिबा रोडवर दोन्ही बाजूला फूल आणि पूजा साहित्य विक्री करणाऱ्यांनी अतिक्रमण केले असल्याने या मार्गावरुन आपत्तीकाळात वाहने कशी आणणार असा प्रश्न उपस्थित केला जात आहे. गुजरीतून जोतिबा रोडकडे येणाऱ्या एका रस्त्यांवर मंडप तर दुसऱ्या रस्त्यांवर दुचाकी पार्किंग करण्यात आले आहे. घाटी दरवाजा तर फूल व्यावसायिकांनी व्यापला असल्याने गर्दीवर नियंत्रण ठेवताना पोलिस प्रशासनाला अनेक समस्यांना तोंड द्यावे लागले. घाटी दरवाजासमोर लोखंडी बॅरिकेटस् उभारल्याने बाहेर पडणाऱ्या भाविकांना चिंचोळ्या मार्गातून रस्त्यांवर यावे लागते.

अंबाबाई मंदिर परिसरात वाहनांना बंदी घालण्यात आली असून मंदिराकडे येणारे रस्ते बॅरिकेटस लावून बंद करण्यात आले आहेत. शिवाजी चौक आणि ताराबाई रोडजवळ रिक्षा स्टॉप करण्यात आला आहे. उत्सव काळात रोज रात्री पालखी सोहळा असल्याने जोतिबा रोडवर अर्धा ते पाऊस नागरिक उभे असतात. तसेच शिवाजी रोड ते वसंत मेडिकल, ताराबाई रोड, बालगोपाल तालीम परिसरात वाहनांच्या दुहेरी पार्किंग केले जात आहे. त्यामुळे आपत्ती काळात रुग्णवाहिकेला रस्ता उपलब्ध करून देताना समस्या निर्माण होऊ शकतात.

आपत्ती व्यवस्थापनाच्या सूचनेनुसार दक्षिण दरवाजाजवळ अग्निशमन दलाचा बंब, १०८ रुग्णवाहिका, महानगरपालिकेची रुग्णवाहिका २४ तास उपलब्ध ठेवण्यात आली आहे. तसेच मंदिराच्या बाहेर आणि आत मणकर्णिका कुंड परिसरात वैद्यकीय कक्ष स्थापन करण्यात आला आहे. चेंगराचेंगरी, आग यांसारख्या आपत्ती काळात पाच मिनिटांत सर्व रस्ते उपलब्ध करून देण्याची सूचना पोलिस प्रशासनाला दिली आहे. मंदिराच्या आवारात पाणी उपलब्ध करण्यासाठी नळ जोडणी करण्यास सांगितले आहे.

प्रसाद संकपाळ, जिल्हा आपत्ती व्यवस्थापन अधिकारी

सूचना देऊनही अपघात

उत्सवापूर्वी मंदिरात सलामी देण्याच्या तोफेच्या सुरक्षेवरून देवस्थान प्रशासनाला सूचना देण्यात आल्या होत्या. तोफेचा गोळा दहा मिटर दूर उडतो. तोफेच्या दोन्ही बाजूला नागरिकांच्या सुरक्षिततेसाठी बॅरिकेटस् लावण्यास सांगितले होते. पण तरुणाच्या उत्साहामुळे तो जखमी झाला. त्यामुळे बुधवारी रात्री तोफेची सलामी देताना परिसर रिकामी करून तोफ उडवण्यात आली.

कोल्हापूर टाइम्स टीम

विधानसभेसाठी जिल्ह्यातील सर्वच पक्षांच्या उमेदवारांची यादी निश्चित झाली आहे. उमेदवारांच्या दुसऱ्या फळीतील कार्यकर्ते कामाला लागले असून प्रचार यंत्रणा सक्रीय झाली आहे. गावोगावी बलाबल असणाऱ्या प्रमुख कार्यकर्त्यांना गाठले जात असून एकगठ्ठा मते मिळतील अशाच स्थानिक नेत्याला आपल्याकडे खेचण्यात येत आहे. एकंदरीत राजकीय 'जोडण्या' लावण्याचे काम वेगाने सुरू आहे.

गेल्या दहा वर्षांत प्रचाराच्या पद्धतीत आमूलाग्र बदल झाले. निवडणुकीत मोठ्या प्रमाणात तंत्रज्ञानाचा वापर उमेदवारांकडून केला जातो. मात्र, नव्या बदलांसोबत प्रत्यक्ष वैयक्तिक भेटीगाठीवर भर दिला जात आहे. गटाची, पक्षाची बांधणी करताना अनाहूत भेटी महत्त्वाच्या ठरतात. जिल्ह्यात सहकाराचे जाळे विस्तारलेले आहे. सहकारी साखर कारखाने, पतसंस्था त्याला जोडून दुधसंस्था राजकीय नेत्यांच्या ताब्यात आहेत. सहकारातून राजकीय करिअरला सुरुवात करणाऱ्यांची संख्या मोठी आहे. गावोगावी संस्थांचे जाळे विणताना एकगठ्ठा मतदान आणि आपल्या गटाचे प्राबल्य राहील याकडे नेतृत्वाकडून जाणीवपूर्वक लक्ष दिले जाते. यासाठी विधानसभेचे आराखडे बनवताना मतदार संघातील किती ग्रामपंचायती, सहकारी संस्था, सोयासायट्या, प्रमुख मातब्बर मंडळी आपल्या बाजूला आहेत याचा प्रामुख्याने विचार होतो. यासाठी प्रसंगी प्राथमिक स्तरावर पॅनेल लढवताना काहीवेळा नेतृवाकडून तडजोडी होतात. गावात 'होल्ड' राहावा यासाठी प्रयत्नशील असलेल्या व्यक्तीलाच तालुका पातळीवरील नेतृत्व जवळ करते. अगदी एखाद्याचे अडकलेले काम मार्गी लावतानाही गावच्या प्रमुखाचा सल्ला नेत्यांकडून घेतला जातो. यासाठी कुठे कोण सक्षम, कुणाचे वर्चस्व आहे याकडे बारकाईने लक्ष ठेवून विधानसभेची गोळाबेरीज केली जात आहे.

साम, दाम, दंड, भेद वापरण्याची नीती

आजकाल पद्धतशीर प्रचाराला महत्त्व दिले जाते. अल्पावधीत निर्णायक ठरणाऱ्या मतांची बेजमी करण्यावर अधिक भर दिला जातो. आचारसंहिता सुरू झाली की गावपातळीवरील नाराजांना गळाला लावण्यासाठी दुसरी फळी काम करते. सक्षम गट फोडण्याची व्यूहरचना आखली जाते आहे. यात गटप्रमुखाला मोठ्या पदाचे आमिष दाखवून पुनर्वसन करण्याची हमी दिले जाते. साम, दाम, दंड भेद अशी आयुधे वापरून त्याला आपल्याकडे वळवण्यावर भर दिला जात आहे. गावातील सक्षम गटप्रमुखाकडे सहकारी सोसायटी, इतर महत्त्वाच्या संस्था असल्याने सर्वसामान्य जनता गट प्रमुखाचे ऐकण्यावर भर देते. अडीनडीला गावातील प्रमुखच उपयोगी पडणार असल्याने त्यांचा शब्द सहसा डावलला जात नाही. एकंदरीतच निवडणुकीत फोडाफोडीच्या राजकारणाला ऊत आला आहे. प्रमुख मासे गळाला लागली की विजयाची खात्री आहे असा विश्वास रणांगणात उतरलेल्या उमेदवारांना असतो. त्यामुळे काहीही करा पण 'जोडण्या लावा' असा आदेश कार्यकर्त्यांना देण्यात आला आहे.