कोल्हापूर टाइम्स टीम

महाराष्ट्र टाइम्स आणि माधवबाग क्लिनिकतर्फे आयोजित मोफत आरोग्य तपासणी शिबिरास शुक्रवारी पहिल्याच दिवशी चांगला प्रतिसाद मिळाला. ताराबाई पार्कातील धैर्यप्रसाद सांस्कृतिक हॉलसमोरील माधव क्लिनिक आणि सानेगुरूजी वसाहत रोडवरील क्रशर चौकातील माधवबाग क्लिनिकमध्ये तपासणी करण्यात आली. २९ सप्टेंबरपर्यंत शिबिर असणार आहे.

सध्याच्या धावपळीच्या युगात ताणतणावाचे जीवनक्रम वाढते आहे. यामुळे अनेकजणांना आरोग्याच्या समस्यांना सामोरे जावे लागत आहे. दरम्यान, २९ सप्टेंबर जागतिक हृदयदिन म्हणून साजरा केला जातो. या दिनानिमित्त गरजूंना आरोग्य विषयक नेमक्या टिप्स मिळाव्यात, आरोग्याच्या तक्रारींचे निरसण करण्यासाठी 'मटा' आणि माधवबाग यांनी 'सेव्ह माय हार्ट' संकल्पना राबवत आहे. याचाच एक भाग म्हणून शिबिर होत आहे. पहिल्याच दिवशी दोन्ही ठिकाणच्या आरोग्य तपासणीसाठी गर्दी झाली होती.

शिबिरात बॉडी मास इंडेक्स, हृदय तपासणी, हृदयाचे ठोके, रक्तदाब, रक्तातील ऑक्सिजनच्या प्रमाणाची तपासणी करण्यात आली. गरज असलेल्या रुग्णांची ईसीजीही मोफत तपासणी केली जात आहे. याशिवाय रक्तवाहिन्यातील अडथळे, ब्लॉकेजेस, मधुमेह, लठ्ठपणा, कोलेस्ट्रॉल, अँजिओग्राफी, अँजिओप्लास्टी संदर्भात मार्गदर्शन आणि सल्ला दिला जात आहे. आवाहन केल्यानुसार अनेक रूग्णांनी जुने रिपोर्टस आणि औषधे घेऊन आल्याचे दिसत होते. डॉ. विजय बांगर, डॉ. स्मिता पाटील यांचे पथक तपासणी करीत आहे.

येथे नाव नोंदवा

शिबिर २९ सप्टेंबरपर्यंत आहे. शिबिराचा लाभ घेण्यासाठी नाव नोंदणी करणे आवश्यक आहे. यासाठी ताराबाई पार्कातील माधवबाग क्लिनिकसाठी ८०५५८४६७७७ व क्रशर चौकातील माधवबाग क्लिनिकसाठी ९७३०६०७३९१ या क्रमांकावर संपर्क साधावा.

'मटा'ने पुढाकार घेऊन आयोजित केलेल्या आरोग्य तपासणीचा उपक्रम चांगला आहे. तपासणी उत्कृष्टपणे केली जात आहे. आरोग्यसंबंधी मार्गदर्शनही केले. यामुळे वैद्यकीय ज्ञान मिळाले.

विलास घोलप, उचगाव, रुग्ण

म. टा. प्रतिनिधी, कोल्हापूर

'महापालिका कर्मचारी संघाचे दिवंगत अध्यक्ष रमेश देसाई यांनी भ्रष्ट कारभार केला असून त्यांची कारकीर्द एक काळा इतिहास आहे. अशा व्यक्तीचे नाव कोल्हापूर महापालिकेच्या सेवकांच्या पतसंस्थेला देऊ नये. विरोध झुगारुन संस्थेचा नामविस्ताराचा निर्णय घेतल्यास आंदोलन करू. प्रसंगी न्यायालयीन लढा देऊ.' असा इशारा संस्थेचे सभासद सुरेश सूर्यवंशी व चंद्रकांत रामाणे यांनी पत्रकार बैठकीत दिला.

सूर्यवंशी म्हणाले, 'विजयसिंह हराळे यांनी कर्मचाऱ्यांच्या गरजा भागवण्यासाठी क्रेडिट सोसायटीची स्थापना केली. त्यानंतर सोसायटीचे रुपांतर पतसंस्थेत झाले. संस्था स्थापन झाली, त्यावेळी देसाई अ‌वघ्या दोन वर्षांचे होते. त्यांचे पतसंस्थेच्या विकासात कोणतेही योगदान नाही. देसाई यांच्याप्रमाणेच विद्यमान संचालक मंडळ हुकूमशाही व दडपशाहीचा कारभार करत आहे. एकमुखी निर्णय घेण्यासाठी सभासदांपर्यंत रविवारी (ता.२९) होणाऱ्या सभेचा अहवाल पाठवण्यात आलेला नाही. हराळे यांच्या निधनानंतर संस्थेला त्यांचे नाव देण्याचा प्रस्ताव आला होता. पण व्यक्तीस्तोम टाळण्यासाठी संस्थेऐवजी सभागृहाला नाव दिले. मग देसाई यांच्या नावासाठी अट्टाहास का? देसाई यांनी संस्थेच्या आर्थिक नुकसानीबरोबर महापालिकेचीही वेळोवेळी बदनामी केली आहे. विविध कारणांने त्याचे दोनवेळा निलंबन केले आहे. संस्थेचे बोगस रेकॉर्ड तयार करून आर्थिक नुकसान केल्याप्रकरणी संस्थेवर प्रशासकाची नियुक्ती केली होती. अशा भ्रष्ट कारभार असणाऱ्या व्यक्तीचे नाव देण्यास आमचा नेहमीच विरोध असेल. सभेत जर ठराव झाला तर नामफलकावर हराळे यांच्या नावाचा फलक लावला जाईल.' असा इशारा सूर्यवंशी यांनी दिला. यावेळी रवींद आयरे उपस्थित होते.

महापालिका लोगो

कोल्हापूर टाइम्स टीम

आचारसंहितेचा विकासकामावर परिणाम होऊ नये, यासाठी तातडीने घेतलेल्या निर्णयामुळे साडेचार कोटीच्या विकासकामाचा मार्ग मोकळा झाला आहे. आचारसंहिता लागू असली, तरी वर्कऑर्डर निघाल्यामुळे विविध विकासकामे सूरू राहणार आहेत. मुख्य रस्ते, क्रॉसड्रेन, गटर, चॅनल, पॅसेज काँक्रिट व पॅचवर्कची कामे आचरसंहितेच्या काळातही सुरू राहणार आहेत.

लोकसभा निवडणुकीच्या आचारसंहितेनंतर जेमतेम तीन महिन्याच्यानंतर विधानसभा निवडणुकीची आचारसंहिता लागणार असल्याने महापालिकेच्या विकासकामावर परिणाम होण्याची शक्यता निर्माण झाली होती. तसेच जून-जुलैमधील पावसाचाही परिणाम होणार होता. तसेच चार विभागीय कार्यालयात प्रलंबित फाइल असल्याने विकासकामाना ब्रेक लागण्याची शक्यता होती. यातून मार्ग काढण्यासाठी आचारसंहिता जाहीर होण्यापूर्वी विशेष कँप घेऊन १७३ फायली निर्गत केल्या होत्या. कँपनंतर तातडीने ९३ कामांच्या वर्क ऑर्डर काढण्यात आल्या.

कँपनंतर ८० कामाच्या निविदा प्रसिद्ध करण्यात आल्या. निविदा प्रसिद्ध केलेल्या सर्व कामांच्या वर्क ऑर्डर आचारसंहिता जाहीर होण्यापूर्वी काढण्यात आल्या आहेत. त्यानुसार शहरात साडेचार कोटींच्या विकासकामांना सुरुवात होणार आहे. मुख्य रस्ते, क्रॉसड्रेन, गटर, चॅनल बांधणे, पॅसेज क्राँक्रिट, रस्ते पॅचवर्क, रिटेनिंग वॉल बांधणे, ड्रेनेज व पाइप लाइन टाकणे, हायमास्ट दिवे बसवणे, सार्वजनिक बांधकाम, औद्योगिक वसाहतीमध्ये पायाभूत सुविधा देण्याबाबतच्या कामांना सुरुवात होणार आहे.

कोल्हापूर टाइम्स टीम

विविध प्रकारच्या कलागुणांच्या सादरीकरणासाठी कोल्हापुरातील हौशी लोकांसाठी हक्काचा मंच उपलब्ध करुन देण्यासाठी 'महाराष्ट्र टाइम्स कल्चर क्लब' व सेकंड होम या संस्थेने पुढाकार घेतला आहे. लेखन, गायन, वादन, संगीत, नाट्य, नृत्य, अभिनय, स्टँड अप कॉमेडी या कलाप्रकाराची आवड असणाऱ्या व ते सादर करू इच्छिणाऱ्या हौशी नागरिकांसाठी 'क्रिएटिव्ह क्लब'च्या माध्यमातून सुवर्णसंधी मिळणार आहे. 'मटा कल्चर क्लब' आणि 'सेकंड होम'च्या या संयुक्त उपक्रमाला रविवारपासून (ता. २२) सुरूवात होईल.

दर रविवारी सायंकाळी सात ते आठ या वेळेत क्रिएटिव्ह क्लबचे व्यासपीठ उपलब्ध असणार आहे. आपल्या कलेची साधना वाढवून इतरांच्या कलेचा आस्वाद घेता येईल. या क्लबच्या माध्यमातून एकच छताखाली अनेक कलांचा आस्वाद घेण्याबरोबरच कलाक्षेत्रातील हौशी लोकांबरोबर कलेच्या अभिसरणाची संधी मिळणार आहे. विविध करमणुकीच्या कार्यक्रमांचा यात समावेश असेल. यामध्ये हौशी कलाकार व कलाप्रेमींनी मोठ्या संख्येने सहभागी व्हावे असे आवाहन 'सेकंड होम'च्या संचालिका अपूर्वा नानिवडेकर-सिंग यांनी केले आहे.

क्रिएटिव्ह क्लबसाठीच्या नोंदणीसाठी व अधिक माहितीसाठी ९९२१०३३२०० या नंबरवर संपर्क साधावा असे आवाहन संस्थांनी केले आहे. कोल्हापुरातील विविध क्षेत्रातील कलागुणांची आवड जोपासणाऱ्या नागरिकांना कलागुण सादर करण्यासाठी हक्काचे व्यासपीठ ठरणार आहे.

कोल्हापूर टाइम्स टीम

ग्रंथालयाच्या अभ्यासिकेपासून कँटीनमधील कॉफी टेबलवर आणि अधिविभागाबाहेरील व्हरांड्यापासून ते कॅम्पसमधल्या कोणत्याही कोपऱ्यावर दिसेल त्या विद्यार्थ्यांला शिवाजी विद्यापीठाच्यावतीने ऑन दि स्पॉट कौशल्य विकासाचे धडे देण्यात आले. 'असेल तेथे... दिसेल त्याला कौशल्य प्रशिक्षण' या अभिनव उपक्रमांतर्गत नेमण्यात आलेल्या प्रशिक्षकांच्या दहा टीमसदस्यांनी गुरूवारी दिवसभरात ३४५० विद्यार्थी व ६७ पालकांना सॉफ्ट स्किलचे सहजसोप्या शैलीत प्रशिक्षण दिले. संवादकौशल्य कसे वाढवावे, नोकरीसाठी मुलाखतीची तयारी कशी करावी, व्यक्तीमत्व विकास कसा करावा यासह सॉफ्टस्किलचा चालताबोलता वर्गच या निमित्ताने विद्यापीठाच्या कॅम्पसमध्ये भरला.

उपक्रमाच्या उदघाटनप्रसंगी बोलताना शिवाजी विद्यापीठाचे प्र कुलगुरू डॉ. डी. टी. शिर्के म्हणाले, 'असेल तिथे, दिसेल त्याला' कौशल्य प्रशिक्षण हा अत्यंत अभिनव स्वरुपाचा उपक्रम असून दर आठवड्याला विद्यापीठात तो सातत्याने राबविला गेल्यास अनेक विद्यार्थ्यांना त्याचा लाभ होईल"

कुलसचिव डॉ. विलास नांदवडेकर म्हणाले, 'विद्यार्थ्यांना पारंपरिक शिक्षणाच्या बरोबरीने विविध कौशल्ये ज्ञात असावीत, यादृष्टीने विद्यापीठाने गेल्या काही वर्षांत सातत्याने कौशल्यविषयक उपक्रम राबविले आहेत. त्याचे अत्यंत सकारात्मक परिणामही दिसून येत आहेत. या केंद्राकडून भावी काळातही विद्यार्थ्यांसाठी असे नवनवीन उपक्रम राबविण्याचा मानस आहे.'

यावेळी प्र-कुलगुरू डॉ. शिर्के यांच्या हस्ते प्रशिक्षकांना पुस्तक भेट देऊन शुभेच्छा देण्यात आल्या. अधिसभा सदस्य पंकज मेहता, मराठी अधिविभाग प्रमुख डॉ. रणधीर शिंदे, डॉ. के. व्ही. मारुलकर, डॉ. केबी. पाटील, डॉ. गजानन राशिनकर, एम.व्ही. चव्हाण, शिवप्रसाद शेटे, विजयकुमार मुत्नाळे, विजय तिवारी, शिवप्रसाद बेकनाळकर, लिटॉन आदींसह १५ प्रशिक्षक उपस्थित होते. विद्यापीठाची मुख्य इमारत, ग्रंथालय, कँटीन, विविध अधिविभागांचा आवार, मुलांचे व मुलींचे वसतिगृह येथे पहिल्या टप्प्यात हा उपक्रम राबवण्यात आला.

कोट

विद्यापीठाच्या या परिसरात विद्यार्थी, पालक, कर्मचारी, शिक्षक अगर नागरिक असा चार किंवा अधिक जणांचा समूह असेल, त्याला जाग्यावर प्रशिक्षण दिले जाणार आहे. त्यासाठी इन्फोसिसच्या माध्यमातून 'ट्रेन द ट्रेनर्स' कार्यशाळेतून प्रशिक्षण घेतलेले प्रशिक्षक ही कौशल्ये प्रदान करणार आहेत. प्राथमिक स्तरावर सॉफ्ट स्कील प्रदान करण्यात येणार आहेत.

- डॉ. ए. एम. गुरव, केंद्र समन्वयक

अनौपचारिकरित्या पण सखोल मार्गदर्शनामुळे ऑन दि स्पॉट कौशल्य विकास उपक्रमाचा खूप फायदा झाला. रिझ्यूम कसा बनवायचा हे माहिती नसल्यामुळे विद्यार्थ्यांचा गोंधळ उडतो. पण अशा छोट्या छोट्या गोष्टीही या कौशल्य प्रशिक्षणात सांगण्यात आल्या. वर्गातील अभ्यासक्रमाच्या पलीकडे जाऊन दिलेल्या या कौशल्यविकासाच्या धड्यांमुळे भविष्यात व्यक्तीमत्त्व विकास करण्यास निश्चित मदत होईल.

- सुदर्शन डुणुंग, विद्यार्थी, एम. कॉम.

कोल्हापूर टाइम्स टीम शिवाजी विद्यापीठाने एम.एस्सी साठी वैद्यकीय माहिती व्यवस्थापन शास्त्रामधील पदव्युत्तर अभ्यासक्रम सुरू करून विद्यार्थ्यांसाठी अद्ययावत आणि कालसुसंगत शिक्षण व प्रशिक्षण उपलब्ध करण्याच्या दृष्टीने नवे दालन खुले केले आहे. महत्त्वाचे म्हणजे आंतरराष्ट्रीय सहकार्यातून चालविला जाणारा हा विद्यापीठातील पहिलाच अभ्यासक्रम आहे. येत्या ३० सप्टेंबरपर्यंत या अभ्यासक्रमासाठी अर्ज करण्याची मुदत आहे. वैद्यकीय माहिती व्यवस्थापन शास्त्र (मेडिकल इन्फॉर्मेशन मॅनेजमेंट) ही जागतिक स्तरावरील हेल्थकेअर उद्योगाच्या दृष्टीने उदयास आलेली एक अतिशय महत्त्वाची विज्ञानशाखा आहे. तिचे महत्त्व लक्षात घेऊन शिवाजी विद्यापीठाच्या जैवरसायनशास्त्र अधिविभागाने जर्मनीस्थित हॉश्चुल हॅनोव्हर युनिव्हर्सिटी ऑफ अप्लाईड सायन्सेस अँड आर्ट्स या विद्यापीठाच्या संयुक्त विद्यमाने या विषयाचा एम.एस्सीसाठी दोन वर्षांचा अभ्यासक्रम या वर्षीपासून शिवाजी विद्यापीठात विद्यार्थ्यांसाठी उपलब्ध केला आहे. या अभ्यासक्रमांतर्गत अखेरच्या चौथ्या सत्रामध्ये दोन विद्यापीठांमध्ये स्टुडंट्स एक्स्चेंज उपक्रम राबविण्यात येणार असल्याने येथील विद्यार्थ्यांना जर्मनीतील विद्यापीठात जाऊन आंतरराष्ट्रीय स्तरावरील या क्षेत्रातील नवनवीन प्रवाहांचा वेध घेता येणे शक्य होणार आहे. या कालावधीतील विद्यार्थ्यांची तेथील निवास व भोजन व्यवस्था संबंधित विद्यापीठ करणार आहे. त्यासाठी वेगळे शैक्षणिक शुल्क नसेल. या अभ्यासक्रमाचे महत्त्व व वैशिष्ट्ये सांगताना जैवरसायनशास्त्र अधिविभागाचे प्रमुख डॉ. के.डी. सोनवणे म्हणाले, 'हेल्थकेअर क्षेत्रात ड्रग सिन्थेसिसपासून एनिमल अगर ह्युमन टेस्टिंगपर्यंत आणि तेथून अंतिम मान्यतेपर्यंतचा एक मोठा टप्पा असतो. त्यातल्या विविध टप्प्यांवर या विद्यार्थ्यांना काम करण्याची संधी असते. पोस्ट क्लिनिकल अभ्यास व संशोधन, क्लिनिकल रिसर्च करणाऱ्या संस्था, औषध कंपन्या, मल्टिस्पेशालिटी हॉस्पिटल्स, टेलिमेडिसीन आदी अनेकविध क्षेत्रांत संधी उपलब्ध आहेत. ड्रग रेग्युलेटरी अफेअर्स, क्लिनिकल को-ऑर्डिनेटर, क्लिनिकल डाटा असोसिएट्स, क्लिनिकल रिसर्चर, मेडिकल राईटिंग, कॅपिटल सीआरएफ डेव्हलपर तसेच संशोधक म्हणून या क्षेत्रात विद्यार्थ्यांना रोजगाराच्या संधी उपलब्ध होत आहेत. झायडस, साव्हा, सिंजेन, एरिस लाइफ सायन्सेस, कॅक्टस, कॉग्निझंट, टाटा इएलएक्सआय, एस्ट्रा झेनिका, मर्क फार्मा, सिप्ला आदींसारख्या प्रख्यात हेल्थकेअर कंपन्यांसह वैद्यकीय हॉस्पिटल्समध्येही अनेक नवनवीन रोजगार संधी निर्माण होत आहेत. असा आहे अभ्यासक्रम इन्फॉर्मेशन टेक्नॉलॉजी इन हेल्थ सायन्सेस, एपिडिमियॉलॉजी, मेडिकल इन्फॉर्मेटिक्स, जर्मन लँग्वेज ए-१, क्लिनिकल डेटा मॅनेजमेंट, क्लिनिकल क्वालिटी मॅनेजमेंट, क्लिनिकल रिसर्च, ड्रग डिस्कव्हरी, हॉस्पिटल मॅनेजमेंट, एथिक्स इन क्लिनिकल रिसर्च, क्लिनिकल ट्रायल प्रोटोकॉल, केस रिपोर्ट फॉर्मेट (सीआरएफ), ड्रग अप्रूव्हल प्रोसेस, नर्सिंग इन्फॉर्मेटिक्स, फार्मसी इन्फॉर्मेशन सिस्टिम, टोटल क्वालिटी मॅनेजमेंट (टीक्यूएम), क्वालिटी एश्योरन्स, फार्मेको व्हिजिलन्स (पीव्ही), फार्मेको व्हिजिलन्स ग्लोबल परस्पेक्टिव्ह, ग्लोबल ऑडिट, ड्रग रेग्युलेटरी ऑथोरिटी, गाइडलाइन्स फॉर फार्मास्युटिकल्स- न्युट्रास्युटिकल्स अँड कॉस्मेटिक्स, गाइडलाइन्स फॉर हर्बल अँड अल्टरनेटिव्ह मेडिसीन, प्रोसेस ऑफ नॅशनल अॅक्रिडिटेशन बोर्ड ऑफ हॉस्पिटल्स अॅन्ड हेल्थकेअर प्रोफेशनल्स (एन.ए.बी.एच.), डेटा अॅक्विझिशन, क्लिनिकल डेटा मॅनेजमेंट (सीडीएम), कलेक्शन इंटिग्रेशन अॅन्ड अव्हेलॅबिलिटी ऑफ डेटा, व्हेरिफिकेशन, व्हॅलिडेशन अँड क्वालिटी कंट्रोल, हॉस्पिटल इन्फॉर्मेशन सिस्टीम (एचआयएस), पेशंट रिपोर्टेड सिस्टिम्स (पीआरएस), पब्लिक हेल्थ अँड एचआयएस, प्रायव्हेट हॉस्पिटल्स अँड एचआयएस इत्यादी अत्याधुनिक हेल्थकेअर विषयांचा या अभ्यासक्रमात समावेश आहे. हेल्थ केअर इंडस्ट्री आता इन्फॉर्मेटिक्स, आयटी आधारित काम करणारी आहे. या डाटा ड्रिव्हन उद्योगाला माहिती तंत्रज्ञानाच्या ज्ञानाबरोबरच हेल्थकेअर विश्लेषणाचे ज्ञान असणारे मनुष्यबळही आवश्यक आहे. भारत सरकारने 'आयुष्मान भारत' हा अत्यंत महत्त्वाकांक्षी प्रकल्प चालविलेला आहे. तो संपूर्णतः इन्फोर्मेटिक्स आधारित आहे. त्यासाठी सरकारला मोठ्या प्रमाणात मनुष्यबळ लागणार आहे. त्याचप्रमाणे भारतीय हॉस्पिटलना आवश्यक असणाऱ्या एन.ए.बी.एच. (नॅशनल अॅक्रिडिटेशन बोर्ड ऑफ हॉस्पिटल्स अॅन्ड हेल्थकेअर प्रोफेशनल्स) या अॅक्रिडिटेशनसाठी मोठ्या प्रमाणात डाटा द्यावा लागतो. त्यासाठी या प्रशिक्षित मनुष्यबळाची मोठी गरज भासते. तिथेही या विद्यार्थ्यांना मोठी संधी असेल. डॉ. अतुल कापडी, सदस्य अभ्यास मंडळ उपसमिती

फोटो

म. टा. प्रतिनिधी, कोल्हापूर

जिल्ह्यात विधानसभेसाठी पहिल्या दिवशी शुक्रवारी ८७ जणांनी १३७ उमेदवारी अर्ज नेले. मात्र १० विधानसभा मतदारसंघांत दिवसभर एकही अर्ज दाखल झाला नाही. यामुळे निवडणूक निर्णय अधिकारी कक्षात शुकशुकाट राहिला. दरम्यान, अर्ज दाखल करण्याची अंतिम मुदत चार ऑक्टोबर असली तरी सार्वजनिक सुट्टी वगळता उमेदवारांना अर्ज दाखल करण्यासाठी तीनच दिवस मिळणार आहेत. यामुळे शेवटच्या दोन दिवसांत अर्ज दाखल करण्यासाठी मोठी गर्दी होणार आहे. या पार्श्वभूमीवर प्रशासनाने तयारी केली आहे.

अर्ज दाखल करून घेण्याची प्रक्रिया सुरू झाली आहे. मात्र उद्या चौथा शनिवार, रविवार आणि २ ऑक्टोबर रोजी गांधी जयंती असल्याने सार्वजनिक सुट्टी आहे. यामुळे अर्ज भरण्यासाठी १, ३ व ४ ऑक्टोबर असे तीनच दिवस मिळणार आहेत. अजून भाजप, शिवसेनेची युती जाहीर झालेली नाही. यामुळे उमेदवार निश्चित झालेले नाही. काँग्रेस, राष्ट्रवादीचेही असेच चित्र आहे. यामुळे इच्छुक उमेदवारांनी अर्ज भरण्यांकडे पाठ फिरवल्याचे दिसत आहे. उमेदवार निश्चित झाल्यानंतर मात्र अर्ज भरण्यासाठी गर्दी होणार आहे. विद्यमानांसह पक्षाची उमेदवारी मिळालेले उमेदवार शेवटच्या टप्प्यातच अर्ज दाखल करणार आहेत. त्यामुळे पहिल्या दिवशी उमेदवारीची पाटी कोरीच राहिली. इच्छूक केवळ अर्ज घेऊन गेले आहेत. यामध्ये चंदगड १२, राधानगरी १०, कागल ५, दक्षिण ४, करवीर ५, उत्तर ६, शाहूवाडी १३, हातकणंगले ३५, इचलकरंजी १६, शिरोळ १२ अशा ८७ जणांचा समावेश आहे.

...

बसस्थानक, रेल्वे स्टेशन

परिसरात निर्बंध नाहीत

आचारसंहितेच्या कालावधीत रात्री ११ नंतर खानावळ, हॉटेल, बार, रेस्टॉरंट बंद ठेवण्याचे आदेश देण्यात आले आहेत. मात्र रात्री उशिरा येणारे प्रवाशी, पर्यटकांची गैरसोय टाळण्यासाठी बसस्थानक, रेल्वे स्टेशन, हॉस्पिटलचे कॅन्टिन, औद्योगिक परिसरातील उपहारगृहांवर निर्बंध आणलेले नाहीत. ते नेहमीप्रमाणे ११ नंतरही सुरू राहतील, असे अतिरिक्त जिल्हाधिकारी नंदकुमार काटकर यांनी पत्रकार परिषदेत सांगितले.

...

६५२ शस्त्रे जमा

'स्वसंरक्षणासाठी वापरण्यात येत असलेली १ हजार ११८ शस्त्रे जमा करण्याचे आदेश जिल्हाधिकारी दौलत देसाई यांनी दिले आहेत. त्याप्रमाणे आतापर्यंत ६५२ शस्त्रे जमा झाली आहेत. शस्त्रे जमा केलेल्यांना ती मतमोजणीनंतर परत दिली जाणार आहेत. कायदा, सुव्यवस्थेचा प्रश्न निर्माण होऊ नये, यासाठी आवश्यक त्या ठिकाणी पोलिस बंदोबस्त ठेवण्यात आले आहेत', असे अप्पर पोलिस अधीक्षक तिरूपती काकडे यांनी सांगितले.

...

चौकट येणार आहे ...

म. टा. प्रतिनिधी, कोल्हापूर

विधानसभा निवडणुकीत मतदानाची टक्केवारी वाढविण्यासाठी जिल्ह्यात विविध ठिकाणी शुक्रवारी मतदान जागृती रॅली काढण्यात आली. शाळा, महाविद्यालयांत मतदार जागृतीचे कार्यक्रम राबवण्यात आले. पथनाट्य, जनजागृती रॅली, संकल्प पत्र भरून घेणे, महिला, बचत गटांचे मेळावे यासह मतदान जागृतीपर रांगोळी आणि चित्रकला स्पर्धा, व्हीव्हीपॅटचे प्रात्यक्षिक, शाहिरी-पथनाट्य कार्यक्रमांचे आयोजन करण्यात आले.

हातकणंगले शिक्षण विभाग अंतर्गत भादोले, वाठार, पारगाव, नागाव, हेर्ले व सावर्डे या केंद्रातील सर्व मुख्याध्यापक यांनी संकल्प पत्र भरून घेऊन मतदानाची शपथ घेतली. राधानगरी तालुक्यातील धामोड येथील केंद्र शाळेतील विद्यार्थ्यांनी संकल्प पत्र भरून घेऊन मतदान जागृती रॅली काढली. करवीर तालुक्यातील वळीवडे, गगनबावडा तालुक्यातील आनंदी विद्यालयात व्हीव्हीपॅटचे प्रात्यक्षिक दाखविण्यात आले. 'वृध्द असो की जवान, सर्वांनी करा मतदान!' अशा घोषणा देत पाटपन्हाळा येथील द. रा. पाटील हायस्कूलच्या विद्यार्थींनींनी फेरी काढली. करवीर आणि शिरोळ मतदारसंघातही रांगोळी स्पर्धा, चित्रकला स्पर्धांच्या माध्यमातून जनजागृती करण्यात आली.

...

कोट

'विधानसभा निवडणुकीत अधिकाधिक मतदान व्हावे, मतदानाचा टक्का वाढावा, यासाठी निवडणूक आयोगाच्या सूचनेनुसार मतदान जागृतीसाठी विविध कार्यक्रम राबविले जात आहेत. त्यास चांगला प्रतिसाद मिळत आहे. कोल्हापूरकरांनी जागृतीच्या कामात स्वत:हून पुढाकार घ्यावा. यावेळी मतदान प्रक्रियेत सर्वांचाच विशेषत: महिला, युवा, दिव्यांग अशा मतदारांनी १०० टक्के सहभाग नोंदवावा.

दौलत देसाई, जिल्हाधिकारी

उदयनराजे भोसलेंनी

फुंकले प्रचाराचे रणशिंग

सातारा :

सातारा लोकसभा मतदारसंघाच्या पोटनिवडणुकीत भाजपचे उमेदवार उदयनराजे भोसले यांनी शुक्रवारी प्रचाराचे रणशिंग फुंकले. आपण एकत्रितपणे व जबाबदारीने काम करून ही लोकसभेची लढाई नक्की जिंकू. विधानसभेच्या लढाईसाठी सर्व कार्यकर्त्यांनी सज्ज रहावे, असे आवाहन उदयनराजे भोसले यांनी केले. येथील दैवज्ञ मंगल कार्यालयात भारतीय जनता पक्षाच्या वतीने तालुका प्रमुख, शक्ती केंद्र प्रमुख, पदाधिकारी यांचा मेळावा आयोजित करण्यात आला होता. या वेळी उदयनराजे बोलत होते.

उदयनराजे म्हणाले, 'लोकसभा निवडणुकीत मला तुम्हा सर्वांचे सहकार्य हवे आहे. नकळतपणे जर कुणाला काही बोललो असेल तर दिलगिरी व्यक्त करतो. मी छत्रपती घराण्यात जन्मलो, हे माझ्यासाठी मोठी गोष्ट आहे. खरे छत्रपती दोनच छत्रपती शिवाजी महाराज आणि संभाजी महाराज. या समाजकारणाच्या लढाईत मला तुमची साथ हवी आहे. खऱ्या अर्थाने ही निवडणूक तुमचीच आहे. लोकसभा व विधानसभा या दोन्ही निवडणुका जवाबदारीने व एकदिलाने लढू या.'

अतुल भोसले म्हणाले, 'उदयनराजे यांनी भाजपप्रवेश केल्याने सातारा जिल्ह्यात भाजपची ताकत प्रचंड वाढली आहे. त्यांच्यासाठी आपण राजकीय ताकत पणाला लावून त्यांना पुन्हा एकदा चांगल्या मताधिक्क्याने निवडून आणू.'

बार्शी-कुर्डूवाडी रस्त्यावर अपघात;

दोन प्रवाशी ठार; एक गंभीर जखमी

सोलापूर :

बार्शीहून कुर्डूवाडीकडे जाणाऱ्या मार्गावर एका हॉटेलसमोर उभ्या असलेल्या मालट्रकला पुण्याहून लातूरला जाणारी राज्य परिवहन महामंडळाच्या एसटी बसने (एम. एच. २० बीएल ३८२१) पाठीमागून जोराची धडक दिली. या धडकेत बसमधील दोघांचा जागीच मृत्यू तर एक जण गंभीर जखमी झाल्याची घटना शुक्रवारी पहाटेच्या सुमारास घडली. सुधाकर होळकर (रा. लातूर) व दिनेश कुमुटवार (रा़ केज) अशी अपघातात ठार झालेल्यांची नावे आहेत. सात जण जखमी झाले असून, त्यांना बार्शी येथील रुग्णालयात उपचारासाठी दाखल करण्यात आले आहे.

'आमदार प्रणिती शिंदेंनी

मोहोळमधून लढावे'

सोलापूर :

आगामी विधानसभा निवडणुकीत सोलापर शहर मध्य विधानसभा मतदारसंघात काँग्रेस पक्षाकडून मुस्लिम समाजाला उमेदवारी मिळावी. मोहोळ राखीव मतदारसंघ असल्याने तेथून आमदार प्रणिती शिंदे यांना उमेदवारी द्यावी, अशी आग्रही मागणी अखिल भारतीय काँग्रेस कमिटी व महाराष्ट्र प्रदेश काँग्रेस कमिटीकडे मुस्लिम समाजाने केली असल्याची माहिती ज्येष्ठ नेते यू. के. बेरिया यांनी शुक्रवारी पत्रकार परिषदेत दिली.

सोलापूर शहर मध्य मतदार संघामध्ये जवळपास एक लाखांपेक्षा अधिक मुस्लिम मतदार आहेत. मुस्लिम समाज हा सातत्याने काँग्रेसच्या पाठिशी उभा आहे. सोलापूर लोकसभा किंवा विधानसभेत मुस्लिम समाजाला प्रतिधित्व करण्याची संधी मिळाली नाही. त्यामुळे समाजातील उच्च शिक्षित व तळागळातील कार्यकत्यांमध्ये या विषयीची नाराजी आहे. तसेच शहरातील इतर समाजाला लोकसभा, विधानसभा व विधान परिषदेत संधी देण्यात आली आहे, अशी भावना आणि समाजाची व्यथा दिल्ली व मुंबई येथील पक्षश्रेष्ठींची भेट घेऊन सांगितली आहे. सोलापूर शहर मध्यमधून यंदा मुस्लिम समाजाला उमेदवारी मिळावी, अशी आग्रही मागणी केली आहे. ज्येष्ठ नेते सशीलकुमार शिंदे यांनाही या मागणीचे निवेदन देण्यात आले.

ग्रामस्थांनी रंगेहाथ पकडलेल्या

चंदन चोरट्यांना पोलिसांनी सोडले

कराड :

कराड दक्षिण विभागात गेल्या सहा महिन्यांपासून चंदन चोरट्यांनी धुमाकूळ घातला आहे. चंदन चोरटे सापडत नसल्याने शेतकरी वर्ग हतबल झाला आहे. बुधवारी रात्री उंडाळे येथील चंद्रकांत पाटील व महादेव पाटील यांच्या वस्तीत सहा चंदन चोरट्यांना चोरी करताना ग्रामस्थांनी रंगेहात पकडून पोलिसांच्या ताब्यात दिले. मात्र, पोलिसांनी संबंधित चंदन चोरट्यांवर कारवाई न करताच सोडून दिले.

उंडाळे (ता. कराड) बुधवारी रात्री चंद्रकांत पाटील व महादेव सावळा पाटील यांच्या जागेत असलेले चंदनाचे झाड अज्ञात चोरटे तोडत असताना ग्रामस्थांना आढळून आले. या वेळी जागा मालकासह ग्रामस्थाने संबंधित चोरट्यांना रंगेहात सापडले. ग्रामस्थांनी त्यांना दरडावून त्यांच्याकडून दोन धारदार कुऱ्हाडी एक फावडे दोन दुचाकी गाड्यांसह चोरट्यांना उंडाळे पोलिस दूर क्षेत्रात नेऊन पोलिसांच्या ताब्यात दिले. या वेळी चोरट्यांनी ग्रामस्थांनी आपणास मारहाण केली करत आमच्या गाड्या आपल्या ताब्यात घेतल्या आहेत, अशी उलटी तक्रार पोलिसांकडे केली. पोलिसांनी संबंधित घटनास्थळावर जाऊन नेमके काय घडले याची माहिती न घेताच कोणतीही कारवाई न करता चोरट्यांना मोकाट सोडले.

...

फोटो आहे

म. टा. प्रतिनिधी, कोल्हापूर

कळंबा रिंगरोड परिसरातील नंदनवन रेसिडेन्सी, श्रीमानयोगी नगर तसेच इंगवले कॉलनीमधील असुविधांबाबत रहिवाशांनी विधानसभा निवडणुकीच्या मतदानावर बहिष्कार टाकण्याचा निर्णय घेतला. त्यांच्या इशाऱ्यानंतर महापालिकेच्या स्थायी समितीमध्ये प्रशासनाला धारेवर धरण्यात आले आणि अवघ्या काही तासांत येथील रस्त्याच्या कामाला सुरुवात झाली. तसेच बंद पडलेल्या लाइटही सुरू झाल्या. याबरोबरच नियमित स्वच्छता करण्याचे आश्वासनही देण्यात आले.

कळंबा रिंगरोडपासून दक्षिण बाजूस नंदनवन रेसिडन्सी, श्रीमानयोगी नगर, इंगवले कॉलनी, आपटेनगरचा समावेश आहे. २००६ पासून या परिसरात सुमारे शंभर कुटुंबे राहतात. मात्र येथील नागरिकांना पाणीपुरवठा वगळता कोणत्याही सुविधा मिळत नाहीत. तसेच महापालिकेच्या विकास आराखड्यानुसार ४० फुटांचा मुख्य तर २० फुटांचे अंतर्गत रस्ते आहेत. एकूण ७५० मीटर रस्त्यांचे कधीही मजबुतीकरण झालेले नाही. रस्त्याच्या दोन्ही बाजूला झाडेझुडपे वाढलेली असल्याने रस्त्यांची रुंदीच कमी झाली आहे. तसेच गटर्स नसल्याने ड्रेनेजचे पाणी रस्त्यावरुनच वाहत आहे. साफसफाईचा बोजवारा उडालेला असतानाच औषध फवारणीही होत नाही. महापालिका प्रशासनाला अनेकवेळा निवेदने देवूनही दखल घेतली जात नसल्याने शुक्रवारी निदर्शने करत विधानसभा निवडणुकीच्या मतदानावर बहिष्कार टाकण्याचा निर्णय घेण्यात आला.

स्थायी समितीची सभा सुरू असताना झालेल्या या घटनेमुळे सभापती शारंगधर देशमुख यांनी अधिकाऱ्यांना चांगलेच धारेवर धरले. संबंधित अधिकाऱ्यांना घटनास्थळी जाण्याच्या सूचनाही केल्या. त्यानंतर तातडीने एक जेसीबीसह महापालिका यंत्रणा जागेवर पोहोचली. मुरुम टाकून रोलिंगही करुन देण्यात आले. रस्त्याचे काम सुरू असताना बंद पडलेल्या स्ट्रीट लाइटही सुरू करण्यात आल्या. त्याचबरोबर या परिसराची नियमित स्वच्छता करण्यासाठी सफाई कर्मचारी देण्याचे आश्वासन देण्यात आले. आंदोलनानंतर नागरिकांना काही सुविधा मिळाल्या असल्या, तरी आंदोलन मात्र मागे घेतलेले नाही. रस्त्यांच्या डांबरीकरणासाठी आंदोलन सुरू राहणार असल्याचे येथील रहिवाशांनी सांगितले.

यावेळी सचिन कुलकर्णी, मधुकर कुलकर्णी, प्रसाद मुळे, जयश्री पोवार, ओंकार पोवार, राजेश घोंगडे, अमृता सामंत, अनिकेत पाटील, अभिजित पाटील, विशाल शिरगावकर, संजय कुंभार आदी उपस्थित होते.

म. टा. प्रतिनिधी, कोल्हापूर

पूर रेषेमधील अवैध बांधकामे, पंचगंगा नदी प्रदूषण रोखण्यासाठी महापालिकेने केलेले उपाय आणि भविष्यात केल्या जाणाऱ्या उपाययोजनाबाबतचे प्रतिज्ञापत्र महापालिकेने राष्ट्रीय हरित लवादाकडे शुक्रवारी सादर केले. दिल्ली येथे लवादाच्या खंडपीठासमोर झालेल्या सुनावणीस उपस्थित राहत आयुक्त डॉ. मल्लिनाथ कलशेट्टी यांनी प्रतिज्ञापत्र दिले. करवीर उपविभागीय कार्यालयाने केलेल्या सर्व्हेमध्ये २५७ बांधकामे अवैध ठरवली आहेत. तसा उल्लेख प्रतिज्ञापत्रात केला आहे.

राज्य सरकारच्या जलसंपदा विभागाने २००५ मध्ये पूररेषा निश्चित केली. पूररेषा निश्चित केल्यानंतर बाधित क्षेत्रात मोठ्या प्रमाणात बांधकामे केली आहेत. बांधकामांना अटकाव करण्यास महापालिकेला अपयश आलेले असतानाच पंचगंगा प्रदूषणाबाबत गांभीर्य नसल्याने डिसेंबर २०१८ रोजी डॉ. बाळकृष्ण शेलार यांनी राष्ट्रीय हरित लवादाकडे राज्य सरकारविरोधात याचिका दाखल केली होती.

पाच एप्रिल २०१९ रोजी झालेल्या सुनावणीदरम्यान लवादाने महाराष्ट्र प्रदूषण नियंत्रण मंडळ व महापालिकेवर पूर रेषेमध्ये झालेल्या बांधकामाबाबत ताशेरे ओढले होते. तसेच लवादाने अतिरिक्त मुख्य सचिवांना पाणी प्रदूषित करणाऱ्या घटकांना अटकाव करण्याबरोबरच कायदेशीर कारवाई करुन पर्यावरणाचा ऱ्हास केल्याबद्दल आर्थिक नुकसान भरपाई घेण्याचे आदेश दिले होते. तसेच महापालिका आयुक्तांना पुढील सुनावणीस उपस्थित राहण्याचे आदेश दिले होते.

त्यानुसार दिल्ली येथे लवादाच्या खंडपीठासमोर शुक्रवारी प्रतिज्ञापत्र सादर केले. रेड व ब्ल्यू लाइनबाबत महापालिका प्रशासनाने सातत्याने जलसंपदा विभाग व प्रदूषण नियंत्रण मंडळाकडे पत्रव्यवहार केला आहे. बांधकाम परवाना देताना 'डी' क्लासनुसार देण्यात आला आहे. करवीर उपविभागीय कार्यालयाने केलेल्या सर्व्हेमध्ये २५७ बांधकामे अवैध असल्याचे अहवाल नमूद केले आहे. महापालिकेने मात्र गाईड लाइननुसार बांधकाम परवाने दिले आहेत. ६७ बांधकाम परवाने विकास नियंत्रण नियमानुसार दिले आहेत. तर ३३ बांधकाम परवाने गुंठेवारीमधून दिले आहेत. ५२ बांधकामे ओपन स्पेसमधील आहेत. २० अनधिकृत बांधकामांना '५३' नुसार नोटिसा दिल्या असून ४० बांधकामे प्रतिबंध क्षेत्राच्या बाहेर असल्याचे प्रतिज्ञापत्रात नमूद केले आहे.

पंचगंगा नदीचे प्रदूषण रोखण्यासाठी जयंती व दुधाळी नाल्यावर एसटीपी प्लांट सुरू केला आहे. २०२० पर्यंत अन्य नाले वळवण्यात येणार आहेत. तसेच पंचगंगा नदी प्रदूषण रोखण्यासाठी ८० लाख ६० हजारांचा निधी स्वतंत्ररित्या ठेवला आहे. महापालिकेने प्रतिज्ञापत्र सादर करण्यापूर्वी जिल्हा प्रशासन व प्रदूषण मंडळाने लवादाकडे प्रतिज्ञापत्र सादर केले आहे.

कोल्हापूर : महावितरणच्या सबस्टेशनमध्ये झालेला बिघाड सोमवारी (ता. ३० सप्टेंबर) दुरुस्त करण्यात येणार आहे. परिणामी बालिंगा पंपिग स्टेशन बंद राहणार असल्याने सोमवारपासून दोन दिवस पाणीपुरवठा बंद राहणार आहे. त्याचा परिणाम ए., बी., सी. आणि डी. वॉर्डवर होणार आहे. त्यामध्ये लक्षतीर्थ वसाहत, फुलेवाडी, सानेगरुजी, आपटेनगर, राजोपाध्येनगर, कणेरकरनगर, क्रांतिसिंह नाना पाटील नगर, शिवाजी पेठ, मंगळ‌ार पेठ, देवकर पाणंद, दुधाळी परिसर, गंगावेश, उत्तरेश्वर पेठ भागाचा समावेश आहे.

कोल्हापूर : महापालिकेच्या कर्मचारी पतसंस्थेचे नाव बदलण्याचे ठराव रविवारी (ता. २९) होणाऱ्या सभेत होणार आहे. मात्र संस्थेचे नाव बदलू नये, अशी मागणी संस्थेचे संस्थापक विजयसिंह हराळे यांच्या कुटुंबीयांनी केली आहे. यापूर्वी हराळे यांचे नाव देण्याचा मुद्दा समोर आला होता. पण व्यक्तिस्तोम नको म्हणून नाव देण्याचा निर्णय मागे घेतला. त्याचप्रमाणे कामगार नेते रमेश देसाई यांचे नाव न देता त्यांच्यानावे एखादा पुरस्कार द्यावा. त्याबाबतचे निवेदन हराळे कुटुंबाने अध्यक्ष व संचालक मंडळाला दिले आहे. सभेपूर्वी हराळे यांच्या कार्याची माहिती देणाऱ्या निवेदनाचे वाचन करावे असे आवाहन कुटुंबीयांनी केले आहे. निवेदनावर जीवन हराळे, जीतेंद्र हराळे, मानसिंगराव हराळे आदींच्या स्वाक्षऱ्या आहेत.

लोगो : जागतिक हृदयरोग दिन

Sachin.patil1@timesgroup.com

Tweet@sachinpMT

कोल्हापूर : जिल्ह्यात हृदय रुग्णांच्या संख्येत सातत्याने वाढ दर्शवते. रुग्णांमध्ये हार्ट अटॅकची लक्षणे दिसताच त्यानंतर दोन तासांचा कालावधी उपचारासाठी 'गोल्डन अवर' समजला जातो. रुग्ण दोन तासांत हॉस्पिटलमध्ये पोहचवल्यास तो वाचण्याची शक्यता ८० टक्क्यांनी वाढते. मात्र, जिल्ह्यात रुग्ण छातीत दुखू लागल्यानंतर हॉस्पिटलमध्ये पोहोचायला सरासरी १० ते १२ तासांचा कालावधी लागतो. केवळ १ टक्का रुग्ण हॉस्पिटलमध्ये वेळेवर पोहोचतात. तर ९९ टक्के रुग्ण वेळेवर पोहोचत नसल्याचे धक्कादायक निरीक्षण सीपीआरचे हृदयरोग विभागप्रमुख अक्षय बाफना यांनी नोंदवले आहे.

हृदयरोगाबाबत जनजागृतीसाठी दरवर्षी २९ सप्टेंबर रोजी जागतिक हृदयरोग दिन म्हणून जगभरात साजरा केला जातो. बदलत्या लाइफ स्टाइलमुळे हृदयरोग तिशीच्या आत पोहोचला आहे. शहरासह जिल्ह्याच्या ग्रामीण भागातही हृदयरोगाचे प्रमाण वाढत आहे. सीपीआरमध्ये दरवर्षी ३६ हजारांहून अधिकजण हृदयाबाबतच्या तक्रारी घेऊन येतात. यात तरुणाईचाही समावेश आहे.

हृदयविकाराचा झटका आल्यानंतर दोन तासांत उपचार मिळणे गरजेचे असते. कारण या काळात हृदयाला होणारा रक्तपुरवठा वेगाने खंडित होतो. त्यामुळे हृदय बंद पडण्याची शक्यता असते. जिल्ह्यातील हार्ट अटॅक आलेले केवळ १ टक्का लोक वेळेत हॉस्पिटलमध्ये पोहचतात असे डॉक्टरांचे निरीक्षण आहे.

रुग्ण उशिरा पोहोचण्यामागील कारणे

जिल्ह्याचा बहुतांश भाग दुर्गम आणि डोंगराळ आहे. अनेक वाड्या-वस्त्यांवरील रुग्णांना खांद्यावर घेऊन उपचारासाठी आणावे लागत असल्याची स्थिती आजही आहे. वाहतुकीच्या सुविधांचा अभाव असल्याने रुग्णांपर्यंत रुग्णवाहिका पोहोचायला वेळ लागतो. छातीतील दुखणे ऍसिडिटीमुळे आहे असे समजून त्याकडे दुर्लक्ष करून स्वतःच गोळ्या घेतल्या जातात. उपचाराकडे मुद्दाम दुर्लक्ष, आर्थिक अडचणी, डॉक्टरांची उपलब्धता नसणे यामुळे छातीत दुखण्याकडे दुर्लक्ष करून रुग्ण हॉस्पिटलमध्ये पोहोचण्याचा कालावधी वाढतो.

'स्पोक्स अँड हाफ पॅटर्न' हवा

हृदयरुग्णांसाठी तामिळनाडू व आंध्रात 'स्पोक्स अँड हाफ' पॅटर्न राबवला जातो. ज्याप्रमाणे सायकलच्या चाकाचा मधला भाग स्पोक्सने जोडलेला असतो, त्याप्रमाणे मध्यवर्ती जिल्हा रुग्णालयाला तालुका व प्राथमिक स्तरावरील रुग्णालये जोडली जातात. हार्ट अटॅक आल्यानंतर स्थानिक रुग्णालयाच्या मदतीने अतिजलद हालचाली करून १०८ रुग्णवाहिका रुग्णाला जिल्ह्याच्या ठिकाणी पोहोचवते. अशा पद्धतीची यंत्रणा राज्यात उभी करावी लागणार आहे.

हार्ट अटॅक व उपचारांचा कालावधी

कालावधी जीव वाचण्याची शक्यता

२ तास ८० ते ९० टक्के

३ ते १२ तास ५० ते ६० टक्के

१२ ते ४८ ३० टक्के

४८० तासानंतर २० टक्क्यांहून कमी

हृदयरोगाकडे गंभीरपणे पाहणे गरजेचे आहे. छातीत दुखायला लागल्यानंतर त्याकडे दुर्लक्ष करून स्वतः उपचार घेऊ नयेत. दुखण्याकडे झालेले दुर्लक्ष जीवावर बेतू शकते. हार्ट अटॅकची लक्षणे दिसताच त्वरित हृदयावरील उपचार सुविधा असणाऱ्या हॉस्पिटलमध्ये न्यावे.

- डॉ. अक्षय बाफना, हृदयरोग विभागप्रमुख, सीपीआर

०००

(मूळ कॉपी)

Sachin.patil1@timesgroup.com

Tweet@sachinpMT

कोल्हापूर : जिल्ह्यात हृदयरुग्णांच्या संख्येत सातत्याने वाढ दर्शवते. रुग्णामध्ये हार्ट अटॅकची लक्षणे दिसताच त्यानंतर दोन तासांचा कालावधी उपचारासाठी 'गोल्डन अवर' समजला जातो. दोन तासांच्या आत रुग्णाला हॉस्पिटलमध्ये पोहचवल्यास रुग्ण वाचण्याची शक्यता ८० टक्क्यांनी वाढते. मात्र, जिल्ह्यातील रुग्णाला छातीत दुखू लागल्यानंतर हॉस्पिटलमध्ये पोहचायला सरासरी १० ते १२ तासांचा कालावधी लागतो. केवळ १ टक्का रुग्ण हॉस्पिटलमध्ये वेळेवर पोहचतात तर ९९ टक्के रुग्ण वेळेवर पोहचत नसल्याचे धक्कादायक निरीक्षण सीपीआरचे हृदयरोग विभाग प्रमुख अक्षय बाफना यांनी नोंदवले आहे.

हृदयरोगाबाबत जनजागृती व्हावी या उद्देशाने दरवर्षी २९ सप्टेंबर जागतिक हृदयरोग दिन म्हणून जगभरात साजरा केला जातो. बदलत्या लाईफ स्टाईलमुळे हृदयरोग तिशीच्या आत पोहोचला आहे. शहरासह जिल्ह्याच्या ग्रामीण भागातही हृदयरोगाचे प्रमाण वाढत आहे. सीपीआरमध्ये वर्षाला ३६ हजाराहून अधिकजण हृदयाबाबतच्या तक्रारी घेऊन येतात. यात तरुणाईचा समावेश अधिक आहे. हार्ट अटॅक आल्यानंतर दोन तासांच्या आत उपचार मिळणे गरजेचे असते. कारण या काळात हृदयाला होणार रक्तपुरवठा वेगाने खंडित होतो. त्यामुळे हृदय बंद पडण्याची शक्यता असते. जिल्ह्यातील हार्ट अटॅक आलेले केवळ १ टक्का लोक वेळेत हॉस्पिटलमध्ये पोहचतात. हॉस्पिटलमध्ये पोहचायला जितका विलंब तितका रुग्णाच्या जीवाला धोका अधिक असतो.

रुग्ण उशिरा पोहोचण्यामागील कारणे

जिल्ह्याचा बहुतांश भाग दुर्गम आणि डोंगराळ आहे. अनेक वाड्यावस्त्यांवरील रुग्णांना खांद्यावर घेऊन उपचारासाठी आणावे लागत असल्याची स्थिती आजही आहे. वाहतुकीच्या सोयीसुविधांचा अभाव असल्याने रुग्णांपर्यंत रुग्णवाहिका पोहचायला वेळ लागतो. तसेच छातीतील दुखणे ऍसिडिटीमूळे आहे असे समजून त्याकडे दुर्लक्ष करून स्वतःच गोळ्या घेतल्या जातात. उपचाराकडे मुद्दाम दुर्लक्ष, आर्थिक अडचणी, डॉक्टरांची उपलब्धता नसणे यामुळे छातीत दुखण्याकडे दुर्लक्ष होवून रुग्ण हॉस्पिटलमध्ये पोहचण्याचा कालावधी वाढतो.

'स्पोक्स अँड हाफ पॅटर्न' हवा

हृदयरुग्णांसाठी तामिळनाडू व आंध्रात 'स्पोक्स अँड हाफ पॅटर्न राबवला जातो. ज्याप्रमाणे सायकलच्या चाकाचा मधला भाग स्पोक्सने जोडलेला असतो. त्याप्रमाणे मध्यवर्ती जिल्हा रुग्णालयाला तालुका व प्राथमिक स्तरावरील रुग्णालये जोडली जातात. हार्ट अटॅक आल्यानंतर स्थानिक रुग्णालयाच्या मदतीने अतिजलद हालचाल करून १०८ रुग्णवाहिका रुग्णाला जिल्ह्याच्या ठिकाणी पोहचवते. अशा पद्धतीची यंत्रणा राज्यात उभी करावी लागणार आहे.

हार्ट अटॅकनंतर पोहचण्या कालावधी व जीव वाचण्याची शक्यता

कालावधी जीव वाचण्याची शक्यता

२ तास ८० ते ९० टक्के

३ ते १२ तास ५० ते ६० टक्के

१२ ते ४८ ३० टक्के

४८० तासानंतर २० टक्क्याहून कमी

कोट :

हृदयरोगाकडे गंभीरपणे पाहणे गरजेचे आहे. छातीत दुखू लागल्यानंतर त्याकडे दुर्लक्ष करून स्वतः उपचार घेऊ नयेत. दुखण्याकडे झालेले दुर्लक्ष जीवावर बेतू शकते. हार्ट अटॅकची लक्षणे दिसताच त्वरित रुग्णाला हृदयावरील उपचार सुविधा असणाऱ्या हॉस्पिटलमध्ये न्यावे.

डॉ. अक्षय बाफना, हृदयरोग विभाग प्रमुख सीपीआर

म. टा. प्रतिनिधी, कोल्हापूर

स्वाभिमानी शेतकरी पक्षाच्या प्रदेशाध्यक्षपदी प्रा. जालिंधर पाटील यांची शुक्रवारी निवड करण्यात आली. निवडीची घोषणा पक्षाचे संस्थापक अध्यक्ष, माजी खासदार राजू शेट्टी यांनी सांगली येथे केली. प्रदेशाध्यक्ष रविकांत तुपकर यांनी राजीनामा दिल्याने रिक्त झालेल्या पदावर प्रा. पाटील यांची निवड करण्यात आली.

पक्षाचे प्रदेशाध्यक्ष तुपकर यांनी अचानक पदाचा राजीनामा दिला. तुपकर यांच्या राजीनाम्यामुळे संघटनेला मोठा धक्का मानला जात आहे. सदाभाऊ खोत यांच्यानंतर संघटेनेचा बुलंद आवाज अशी तुपकर यांची ओळख होती. त्यांनी राजीनामा दिल्याने या पदावर प्रा. पाटील यांची निवड झाली करण्यात आली. संघटनेच्या स्थापनेपासून ते शेट्टी यांच्यासोबत कार्यरत आहेत. राधानगरी तालुक्यात संघटनेची चांगली बांधणी करताना अभ्यासू व्यक्तिमत्त्व म्हणून संघटनेच्या माध्यमातून राज्यभर ओळख निर्माण झाली आहे. प्रा. पाटील यांच्याकडे जिल्हाध्यक्ष पदाबरोबर प्रदेशाध्यक्ष पदाचीही जबाबदारी देण्यात आली आहे. विधानसभा निवडणुकीनंतर नवीन जिल्हाध्यक्षपदाची निवड केली जाणार आहे.