कोल्हापूर टाइम्स टीम

केशवराव भोसले नाट्यगृहात दिवंगत दिग्दर्शक यशवंत भालकर यांचे स्मारक उभारण्यासाठी महापालिकेच्या सभेत सदस्य ठराव करण्यात आला आहे. तो हेरिटेज कमिटीस सादर करण्यात येईल, असे महापौर माधवी गवंडी यांनी सांगितले. भालकर स्मारकाच्या अनुषंगाने विचारविनिमय करण्यासाठी आयोजित समिती सदस्यांच्या बैठकीत त्यांनी माहिती दिली.

माजी महापौर सरीता मोरे यांनी भोसले नाट्यगृह येथे स्मारक करण्याचे नियोजन असून त्यासाठी बजेटमध्ये २५ लाखांची तरतूद केली असल्याचे सांगितले. समिती सदस्यांनी नाट्यगृहाजवळील खाऊ गल्लीतील कमानीजवळची जागेची पाहणी केली. पुन्हा याबाबत बैठक घेऊन जागा निश्चित करण्याचा निर्णय घेण्यात आला. विरोधी पक्षनेता विलास वास्कर, रिना कांबळे, शिक्षण सभापती श्रावण फडतारे, ईश्वर परमार, अतिरिक्त आयुक्त नितिन देसाई, शहर अभियंता नेत्रदीप सरनोबत, अखिल भारतीय मराठा चित्रपट महामंडळाचे सदस्य सतीश बीडकर, संग्राम भालकर, शिल्पकार किशोर पुरेकर उपस्थित होते.

कोल्हापूर : कलाप्रबोधिनी महाविद्यालय संस्थेच्या १७ व्या वर्धापनदिनानिमित्त महाविद्यालयातील गुणवंत विद्यार्थ्यांना शिष्यवृत्ती योजनेंतर्गत अक्षय घुले, सायली निकम, विराज पोवार यांना शिष्यवृत्ती प्रदान करण्यात आली. संस्थेचे चेअरमन विजय गजबर, व्यवस्थापकीय विश्वस्त प्राचार्या गिरीजा कुलकर्णी, माजी चेअरमन जयंत बेगमपुरे, केदार कुलकर्णी, प्रसाद निडसोशी, शिवराज घाटगे, दिप्ती सावंत यांच्या हस्ते कार्यक्रमाचे उदघाटन झाले. गणेश पाटील, आशुतोष पाटील, प्रसाद सुतार, पूरग्रस्त विद्यार्थ्यांना शैक्षणिक मदत देण्यात आली.

म. टा. प्रतिनिधी, कोल्हापूर

विधानसभा निवडणुकीची तयारी पूर्ण झाली असून जिल्हा प्रशासन सज्ज झाले आहे. या निवडणुकीसाठी २० हजार ७५५ दिव्यांग मतदारांची नोंद झाली असून मतदान करता यावे यासाठी बहुतांश मतदान केंद्रे तळमजल्यावर ठेवण्यात आली आहेत. आचारसंहिता काळात १० लाखांपेक्षा जास्त रोकड जवळ बाळगता येणार नाही, असे स्पष्ट केले आहे.

दिव्यांग मतदारापैकी ११ हजार, ७४९ मतदार अस्थिव्यंग ३ हजार २० नेत्रहीन तर ३ हजार ६० मतदार मूक आणि कर्णबधिर आहेत. लोकसभा निवडणुकीत पहिल्या मजल्यावर असलेले ६० मतदारसंघ विधानसभा निवडणुकीसाठी तळमजल्यावर आणले आहेत. दिव्यांग मतदारांसाठी रॅम्प, पाणी, वीज, फर्निचर, मार्गदर्शक फलक, वैद्यकीय सुविधा, मदत केंद्र, प्रसाधगृहे आदींची सुविधा देण्यात आली आहे.

१० लाखांपेक्षा जास्त रक्कम सोबत ठेवता येणार नाही

रकमेवर बंधने

दहा लाख रुपयांपेक्षा जास्त रक्कम ठेवता येणार नाही असे जिल्हा पोलिस अधीक्षक डॉ. अभिनव देशमुख यांनी सांगितले. आचारसंहितेच्या काळात एखाद्या व्यक्तीकडे १० लाखांपेक्षा जास्त रक्कम असेल तर त्यासोबत पुरावा म्हणून आवश्यक ती कागदपत्रे सोबत असणे बंधनकारक राहणार आहे. अन्यथा अशी संशयित रक्कम प्राप्तिकर विभागाकडे वर्ग करण्यात येणार आहे. पुरावे दिल्यानंतर संबधित रक्कम प्राप्तिकर विभागाकडून परत मिळणार आहे.

महिला हातळणार सखी मतदान केंद्र

जिल्ह्यात प्रत्येक मतदार संघात एक अशी एकूण दहा सखी मतदान केंद्रे राहणार आहेत. सखी मतदान केंद्रात महिला अधिकारी आणि महिला कर्मचारी काम करणार आहेत. हे मतदार संघ शहर आणि तालुक्याच्या ठिकाणी असणार आहेत.

उत्तर, दक्षिण, करवीरची मतमोजणी एकाच ठिकाणी

कोल्हापूर उत्तर, कोल्हापूर दक्षिण आणि करवीरची मतमोजणी राजाराम तलावाशेजारील सार्वजनिक बांधकाम विभागाच्या गोदामात होणार आहे. लोकसभा निवडणुकीत कोल्हापूर आणि हातकणंगले या दोन्ही मतदार संघाच्या मतमोजणी याच ठिकाणी झाल्या होता. अन्य सात मतदार संघातील मतमोजणी तालुक्याच्या ठिकाणी होणार आहेत.

सात मतदार संघांत तीन लाखांपेक्षा जास्त मतदान

विभानसभेच्या एकूण दहा मतदार संघापैकी सात मतदार संघात तीन लाखांपेक्षा जास्त मतदान आहे. सर्वाधिक मतदान तीन लाख २५ हजार ५३८ मतदार राधानगरी मतदार संघात आहेत. त्याखालोखाल कोल्हापूर दक्षिण, कागल, चंदगड, कागल, हातकणंगले, शिरोळ, करवीर मतदार संघात तीन लाखांपेक्षा जास्त मतदार आहेत.

जिल्ह्यातील मतदारांची संख्या

एकूण मतदार ३०,९०,६६०

पुरुष १५,८४,२७१

महिला १५,०६,३०८

इतर ८१

सैनिक ८६९५

दिव्यांग २०,७५५

००००००

एकूण मतदान केंद्रे ३३४०

एकूण कर्मचारी २०,०५८

Appasaheb.mali@timesgroup.com

Tweet:Appasaheb_MT

कोल्हापूर : ज्यांच्यावर मदार ठेवून युतीशी सामना करायचा अशी व्यूहरचना आखली होती, त्यापैकी काँग्रेसचे माजी जिल्हाध्यक्ष प्रकाश आवाडे यांनी पक्षाला राम राम केल्याने आणि चंदगडच्या आमदार संध्यादेवी कुपेकर यांनी निवडणुकीतून माघार घेतल्यामुळे आघाडीसमोरील अडचणी आणखी वाढल्या आहेत. आघाडीअंतर्गत वाद, काहीजणांची माघार यामुळे उमेदवारीचे त्रांगडे निर्माण झाले आहे. शिरोळ, हातकणंगले, राधानगरीत आघाडीधर्म पाळताना एकाला उमेदवारी दिल्यास बंडखोरीची शक्यता आहे.

जिल्ह्यावरील निसटलेली पकड मजबूत करण्यासाठी काँग्रेस, राष्ट्रवादी काँग्रेसने कंबर कसली आहे. स्वाभिमानी शेतकरी संघटनेसह अन्य मित्रपक्षांना सोबत घेण्याची कसरत, भारतीय जनता पक्ष व शिवसेनेचे आव्हान मोडीत काढण्यासाठी नेतेमंडळी रणनीती आखत आहे. करवीर, कोल्हापूर दक्षिण, कागल विधानसभा मतदारसंघातील उमेदवार निश्चित केले, मात्र अन्य मतदारसंघातील उमेदवारीचा गुंता वाढला आहे.

कागलमधून आमदार हसन मुश्रीफ, करवीरमधून काँग्रेसचे प्रदेश उपाध्यक्ष व माजी आमदार पी. एन. पाटील आणि कोल्हापूर दक्षिणमधून ऋतुराज पाटील यांच्या उमेदवारीवर शिक्कामोर्तब आहे. तिघांनीही प्रचाराला सुरुवात केली आहे. 'कोल्हापूर दक्षिण' आणि 'करवीर' या दोन्ही मतदारसंघात काँग्रेसची मंडळी सध्या हातात हात घालून कार्यरत आहेत. शिवाय नेते मंडळीपासून कार्यकर्त्यांत समन्वयाचे चित्र आहे, हे दोन्ही उमेदवारांसह काँग्रेससाठी सुचिन्ह आहे. या तीन विधानसभा मतदारसंघांव्यतिरिक्त अन्य सात ठिकाणी उमेदवारीचा गुंता निर्माण झाला आहे. भाजप, शिवसेनेच्या विरोधात सक्षम उमेदवार शोधताना कसोटी लागणार आहे. प्रत्येक मतदारसंघात इच्छुक आहेत, पण नेमके लढणार कोण याविषयी गोंधळाचे वातावरण आहे.

शाहूवाडीत उमेदवार नाही, राधानगरीत त्रांगडे

शाहूवाडी मतदारसंघात तर आघाडीकडे सद्यस्थितीत लढायला उमेदवार नाही, असे चित्र आहे. पक्षातर्फे हा मतदारसंघ लढविण्याची ईच्छाही नाही. कारण राष्ट्रवादीतर्फे सर्किट हाऊस येथे आयोजित उमेदवारांच्या मुलाखीप्रसंगीच प्रमुख नेते, शाहूवाडी मतदारसंघ जनसुराज्यला सोडण्यात येणार असल्याचे संकेत दिले होते. यामुळे या मतदारसंघात आघाडीच्या लढण्याच्या मर्यादा स्पष्ट झाल्या. राधानगरी भुदरगड मतदारसंघ राष्ट्रवादीला मिळणार निश्चित आहे. मात्र माजी आमदार के. पी. पाटील आणि जिल्हाध्यक्ष ए. वाय. पाटील यांच्यामध्ये रस्सीखेच सुरू झाल्यामुळे उमेदवारीचा निर्णय लांबणीवर पडत आहे.

चंदगडमध्ये बॅकफूटवर

कोल्हापूर उत्तरमधून आघाडीकडून लढण्यासाठी इच्छुक सरसावले आहेत. वसंतराव मुळीक, दौलत देसाई, सागर चव्हाण यांची नावे चर्चेत आहेत. मधुरिमाराजे छत्रपती यांच्या उमेदवारीच्या होकार नकारावर इतरांची आघाडीतील उमेदवारी अवलंबून आहे. चंदगडमधून आमदार संध्यादेवी कुपेकर यांची माघार, डॉ. नंदिनी बाभुळकर यांनी निवडणूक न लढविण्याचा घेतलेला निर्णय यामुळे राष्ट्रवादी बॅकफूटवर आहे.

आवाडेंमुळे काँग्रेससमोरील अडचणीत वाढ

प्रकाश आवाडे यांनी ताराराणी आघाडीच्या माध्यमातून इचलकरंजी, शिरोळ आणि हातकणंगले या तीन मतदारसंघातून लढविण्याची घोषणा केली आहे. आवाडे यांची ही भूमिका काँग्रेससाठी अडचणीची ठरणारी आहे. इचलकरंजीत आवाडे म्हणजे काँग्रेस, आणि काँग्रेस म्हटले की आवाडे असे समीकरण होते. कारखानदारी, बँका, शिक्षणसंस्था, सूतगिरण्या या माध्यमातून त्यांचे मोठे नेटवर्क आहे.ते आज काँग्रेसमधून बाहेर पडले तरी त्यांना मानणारा एक गट काँग्रेस अंतर्गत आहे. शिवाय वेगवेगळ्या संस्थेमुळे तीनही मतदारसंघात ते प्रभाव टिकवून आहेत. इचलकरंजी हे त्यांचे होमपीच, येथे त्यांनी यंदा 'निवडणूक जिंकायची'या इराद्याने राजकीय लढाई करत आहेत. काँग्रेस समोर येथे मोठे आव्हान आहे. येथे राहुल खंजिरे, पैलवान अमृता भोसले यांचे नाव काँग्रेसकडून चर्चेत आहे. दरम्यान आवाडे यांनी शिरोळ आणि हातकणंगले येथे उमेदवार मैदानात उतरविल्यास त्याचा फटकाही आघाडीच्या उमेदवाराला बसणार हे निश्चित आहे. हातकणंगले तर आवाडे आणि आवळे गटातील राजकारण सर्वश्रुत आहे.

समीकरणे बदलण्याची चिन्हे

हातकणंगलेत काँग्रेसकडून राजू आवळे तर शिरोळमध्ये राष्ट्रवादीकडून राजेंद्र पाटील-यड्रावकर यांची नावे चर्चेत आहेत. हातकणंगलेमधून काँग्रेसकडून आवळे प्रमुख दावेदार आहेत. दरम्यान आघाडीत सामील असलेल्या स्वाभिमानी शेतकरी संघटनेने या दोन्ही जागावर दावा केला आहे. शिरोळ तर स्वाभिमानीसाठी प्रतिष्ठेचा मतदारसंघ आहे. यामुळे येथील उमेदवारी कुणाला मिळणार आणि कोण बाजूला होणार यावर गणिते अवलंबून आहेत. स्वाभिमानीचे सावकार मादनाईक यांची शिरोळमधून तयारी सुरू आहे. दरम्यान संघटनेचे संस्थापक राजू शेट्टी यांचे नाव पुढे येऊ लागल्याने उमेदवारीचा प्रश्न आणखी गुंतागुंतीचा बनला आहे. आघाडी धर्मानुसार स्वाभिमानीला जागा सोडल्यास राष्ट्रवादीचे उमेदवार राजेंद्र पाटील हे स्वतंत्र लढण्याची शक्यता नाकारता येत नाही. यामुळे येथील समीकरणे बदलण्याची चिन्हे आहेत.

२०१४ मध्ये काँग्रेस-राष्ट्रवादीच्या उमेदवारांना मिळालेले मतदान

कागल : आमदार हसन मुश्रीफ (१,२३,६२६ विजयी), संतन बारदेस्कर (काँग्रेस १,०३५)

चंदगड : आमदार संध्यादेवी कुपेकर (५१,५९९ विजयी), भरमू पाटील (काँग्रेस २५,९६४)

कोल्हापूर उत्तर : सत्यजित कदम (काँग्रेस ४७,३१५), आर. के. पोवार (राष्ट्रवादी ९८८७)

कोल्हापूर दक्षिण : सतेज पाटील (काँग्रेस,९६,९६१ )

करवीर : पी. एन. पाटील (काँग्रेस १,०७,२८८)

इचकरंजी : प्रकाश आवाडे (काँग्रेस ७९,०३८), मदन कारंडे (राष्ट्रवादी १४,८११)

हातकणंगले : जयवंतराव आवळे (काँग्रेस ५९,७१७), दत्तायत्र घाटगे (राष्ट्रवादी, ३८५५)

शिरोळ : राजेंद्र पाटील यड्रावकर (राष्ट्रवादी ५०,७७६), सा. रे. पाटील (काँग्रेस ४८,०६६)

राधानगरी-भुदरगड : के. पी. पाटील (राष्ट्रवादी ९३,०७७)

शाहूवाडी-पन्हाळा : करण गायकवाड (काँग्रेस २१,४३३), बाबासाहेब पाटील-आसुर्लेकर (राष्ट्रवादी ४,६७१)

म. टा. प्रतिनिधी, कोल्हापूर

नवरात्रोत्सवाच्या पार्श्वभूमीवर करवीर निवासिनी अंबाबाई मंदिरात जोरदार तयारी सुरू झाली आहे. स्वच्छतेबरोबर दर्शन मंडपाची उभारणी सुरू असून मंगळवारी देवीच्या पारंपरिक दागिन्यांची स्वच्छता केली जाणार आहे. रविवारपासून (ता. २९) नवरात्रोत्सवास सुरुवात होणार आहे.

अंबाबाई मंदिरात जोरदार स्वच्छता मोहीम सुरू असून शिखरांची रंगरंगोटी पूर्ण झाली आहे. आज रविवारी गणपती चौक, सरस्वती चौक, महाकाली चौकाची स्वच्छता करण्यात आली. सरलष्कर भवन, भवानी मंडप शेतकरी बझार या ठिकाणी दर्शन मंडपाचे काम अंतिम टप्प्यात आले आहे. तसेच प्रदक्षिणा मार्गावरही मंडप घालण्यात येत आहे.

मंगळवारी गरूड मंडपात सराफ व्यावसायिकांकडून देवीच्या पारंपरिक दागिन्यांची स्वच्छता करून घेतली जाणार आहे. तसेच गुरुवारीही काही दागिन्यांची स्वच्छता केली जाणार असून बुधवारी (ता.२५) अंबाबाई मंदिराचा मुख्य गाभाऱ्याची स्वच्छता करण्यात येणार आहे. त्यामुळे यादिवशी दर्शन बंद राहणार आहे.

फायर ऑडिटचे काम सुरू असून वायरिंग दुरुस्तीचे काम करण्यात येत आहे. पुढील चार दिवसांत महाद्वार, घाटी दरवाजा, पूर्व दरवाजा, दक्षिण दरवाज्यांची स्वच्छता करण्यात येणार आहे. महाद्वार चौक ते महाद्वारातील अतिक्रमण हटवण्यात आले असून भाविकांना मंदिरात येण्यासाठी आणि बाहेर जाण्यासाठी मार्ग करण्यात येणार असून त्यासाठी बॅरिकेटस् घालण्यात येणार आहेत. तसेच चप्पल स्टँडची सोय करण्यात येणार आहे. उत्सवातील धार्मिक कार्यक्रम, पूजाविधी यांचे मराठी आणि इंगजी भाषेतील फलक लावण्यात येणार आहेत. घाटी दरवाजातील मनकर्णिका कुंड परिसरातील उद्यानात वैद्यकीय कक्ष आणि हिरकणी कक्षाची उभारणी केली जाणार आहे.

मंदिरातील देवस्थानच्या कर्मचाऱ्यांना ड्रेसकोड, ओळखपत्राची सक्ती केली जाणार आहे. तसेच ड्युटी काळात त्यांना मोबाइल वापरता येणार नाही. तसेच देवीच्या दिवसभरातील पूजा अर्चाची २० मिनिटांचा माहितीपट तयार करण्यात आला आहे. हा माहितीपट सोशल मीडियावर प्रसारित करण्यात येणार आहे. तसेच उत्सवकाळात मंदिर परिसरासह शहरात सात ठिकाणी लावल्या जाणाऱ्या एलईडीवर या माहितीपटाचे प्रसारण करण्यात आले आहे.

शुक्रवारी करणार घोरपडे घराणे पूजा

अदिलशाही, मुघलांच्या आक्रमणानंतर काही काळ मंदिरातील पूजा खंडित झाल्याचे दाखले देण्यात येतात. २६ सप्टेंबर, १७१५ रोजी सिद्धोजी घोरपडे यांच्या हस्ते अंबाबाई मूर्तीची प्रतिष्ठापना करण्यात आली. या घटनेला शुक्रवारी ३०४ वर्षे पूर्ण होत आहे. घोरपडे घराण्यातील नवव्या पिढीतील यशराज घोरपडे यांच्या हस्ते शुक्रवारी देवीची पूजा करण्यात येणार आहे. दरवर्षी २६ सप्टेंबरला देवस्थान समिती घोरपडे घराण्याकडून पूजा करण्याचा पायंडा पुन्हा सुरू करण्यासाठी प्रयत्नशील आहे.

कोल्हापूर टाइम्स टीम

'पुढील महिन्यापासून संपूर्ण शहर प्लास्टिकमुक्त करण्यात येणार आहे. प्लास्टिकविरोधी मोहीम तीव्र करताना प्रत्येक आरोग्य निरीक्षकांनी दररोज किमान पाच व्यावसायिकांवर प्रतिबंधात्मक कारवाई करावी. निश्चित केलेल्या कामाच्या ठिकाणी कर्मचाऱ्यांनी कामचुकारपणा केल्यास दंडात्मक कारवाई करावी.' अशी सूचना आयुक्त डॉ. मल्लिनाथ कलशेट्टी यांनी केले. अॅटो टिपरमधून गोळा करण्यात येणाऱ्या कचऱ्याची नोंद ठेवण्याचे आदेश आरोग्य विभागाच्या बैठकीत दिले.

आयुक्त कलशेट्टी म्हणाले, '१०४ अॅटो टिपरद्वारे पूर्ण क्षमतेने प्रभागातील ओला व सुका कचरा संकलत करणे, आयीसी टीमने कचऱ्याचे वर्गीकरण करण्यासाठी कृती आराखडा तयार करावा. स्वच्छ भारत मिशन जनजागृती करताना टिपर पूर्ण क्षमतेने कचरा भरुन वाहतूक करतात की नाही याच्या नोंदी आरोग्य निरीक्षकांनी ठेवाव्यात. प्लास्टिक प्रतिबंधक मोहीम राबवताना पूर्वपरवानगी शिवाय कोणत्याही कर्मचाऱ्यांची रजा मंजूर करण्यात येऊ नये. मटण-चिकन दुकानासमोर भटकी कुत्री अढळून आल्यास संबंधीत व्यवसायिकावर ५०० रुपयांचा दंड आकारावा. तसेच वॉर्डनिहाय दहा ठिकाणांच्या पाण्याचे नमुने तपासणीसाठी पाठवावेत. कचरा गोळा करण्यासाठी डस्टबीन ठेवावेत. त्यासाठी स्वतंत्र कर्मचाऱ्यांची नेमणूक करावी' अशी सूचना त्यांनी आरोग्याधिकारी यांनी केल्या.

मुख्य आरोग्य निरीक्षक जयवंत पवार, विभागीय आरोग्य निरिक्षक निखिल पाडळकर, आरोग्य निरीक्षक शिवाजी शिंदे, ऋषिकेश सरनाईक, मनोज लोट, शुभांगी पवार, अरविंद कांबळे, सुशांत कावडे, महेश भोसले उपस्थित होते.

म. टा. प्रतिनिधी, कोल्हापूर

शहरातील खराब रस्ते आणि नगररचना (टीपी) विभागातील भ्रष्ट साखळीचा पाढा शिवसेनेच्यावतीने आयुक्त डॉ. मल्लिनाथ कलशेट्टी यांच्यासमोर वाचण्यात आला. सामान्य नागरिकांची टीपीतील अधिकारी गळचेपी करत असल्याचे शिष्टमंडळाच्यावतीने निदर्शनास आणून देत मागण्यांचे निवेदन दिले. शिष्टमंडळाचे नेतृत्व आण्णासाहेब पाटील आर्थिक महामंडळाचे उपाध्यक्ष संजय पवार यांनी केले.

निवेदनात म्हटले आहे, 'शहरातील नेहमीच रस्त्यांची दुरवस्था झालेली दिसते. रस्ते खराब होण्यास अतिवृष्टीचे कारण पुढे केले जात असले, तरी त्याला भ्रष्ट अधिकारी जबाबदार आहेत. ठेकेदारांशी संगनमत करुन त्यांनी रस्त्यांची नेहमीच वाट लावली आहे. त्याचबरोबर टीपीमधील अधिकारी फाइलवर पैसे ठेवल्याशिवाय काम करत नाहीत. भ्रष्टाचार उघडून काढण्यासाठी पवडी व टीपीतील अधिकाऱ्यांची संपत्तीची चौकशी करुन त्याचा अहवाल संबंधीत विभागाला पाठवा. तसेच एकाच ठिकाणी ठाण मांडून असलेल्या अधिकाऱ्यांची बदली करा.'

यावेळी सेनेचे जिल्हाप्रमुख विजय देवणे, देवस्थान समितीचे सदस्य शिवाजीराव जाधव, शशिकांत बिडकर, सुजीत चव्हाण, अवधुत साळोखे, दिलीप देसाई, दिलीप जाधव, रणजीत आयरेकर आदी उपस्थित होते.

म. टा. प्रतिनिधी, कोल्हापूर

'हार, बुके व फेरीवाल्यांनी प्लास्टिकचा वापर टाळावा अन्यथा सरकारच्या निर्देशानुसार दंडात्मक कारवाई करणात येईल,' असा इशारा आयुक्त डॉ. मल्लिनाथ कलशेट्टी यांनी दिला. फुल विक्रेते व फेरीवाल्यांच्या संयुक्त बैठकीत त्यांनी हा इशारा दिला. 'अनेक फुल व फळे विक्रेते प्लास्टिक व नॉन व्होअन बॅगचा वापर करतात. प्लास्टिक पर्यावरणाला अत्यंत घातक असून त्यावर राज्य सरकारने निर्बंध आणले आहेत. त्याची कडक अंमलबजावणी करण्यात येणार आहे. विक्रेत्यांनी प्लास्टिकचा वापर केल्यास प्रथम पाच हजार नंतर दहा हजाराचा दंड करण्यात येईल. तसेच तिसऱ्यावेळी २५ हजारांचा दंड करताना गुन्हाही दाखल करण्यात येणार आहे.' असे आयुक्तांनी सांगितले. बैठकीस आरोग्याधिकरी डॉ. दिलीप पाटील, विभागीय आरोग्य निरिक्षक राहुल राजगोळकर, निखिल पाडळकर यांच्यासह अधिकारी व कर्मचारी उपस्थित होते.

म. टा. प्रतिनिधी, कोल्हापूर

बांधकाम परवाना, भोगवटा प्रमाणपत्रांसह अन्य परवानगींसाठी मिळकतदार महापालिकेच्या नगररचना (टीपी) विभागात फाइल दाखल करतात. पाच टेबलांवरून फाइल पुढे सरकताना सात विभागाचा 'ना हरकत' प्रमाणपत्रही लागते. मात्र, प्रत्येक टप्प्यावर फायलींवर 'वजन' ठेवल्याशिवाय ती पुढे सरकत नसल्याने अर्जदारांची प्रचंड पिळवणूक होते. नागरिकाच्या गरजेचा गैरफायदा घेऊन टीपी विभागातील हे भ्रष्टाचाराचे कुरण दिवसेंदिवस वाढतच आहे. वर्षानुवर्षे या विभागावर टीका होऊनही कारभारात बदल होत नाही.

बांधकाम परवाना, प्रारंभ प्रमाणपत्र, भोगवटा प्रमाणपत्र, जोता पातळी तपासणी, बांधकामाला मुदतवाढ, रेखांकन मंजुरी, टीडीआर जनरेशन किंवा युटिलायझेशन आदी परवानगीसाठी टीपी विभागात शहरवासियांना फाइल सादर करावी लागते. एकदा फाइल सादर झाली की तिचा प्रवास सर्वेअर, सहाय्यक अभियंता, सहरचनाकार, उपशहर रचनाकार, सहायक संचालक, उपायुक्त टेबलपर्यंत प्रवास सुरू होता. त्यामध्ये आता अतिरिक्त आयुक्तांच्या टेबलचीही भर पडली आहे. सर्व टेबलावरून प्रवास सुरू असताना फायर, ड्रेनेज, पाणीपुरवठा, आरोग्य, घरफाळा व गार्डन विभागाच्या 'ना हरकत' प्रमाणपत्र लागते. या सर्वात महत्त्वाची भूमिका असते ती रेकॉर्ड कीपरची. या सर्व टप्प्यांवर अर्जदाराची पिळवणूक केली जात आहे. त्याबाबतच्या अनेक तक्रारी महापालिका प्रशासनाकडे दाखल झाल्या आहेत. तसेच नगरसेवकांकडेही नेहमीच येत असतात. पण त्यावर कोणतीही उपाययोजना केल्याचे दिसून येत नाही.

रेकॉर्ड कीपरकडे फाइल सापडल्याशिवाय त्यापुढचा प्रवास सुरू होत नसल्याने प्रथम फाइल शोधताना अर्जदार 'नको ती परवानगी' या मानसिकतेपर्यंत पोहोचतो. छोट्या-छोट्या घराचे स्वप्न पहाणारे मिळकतदार तर टीपी कारभारासमोर अक्षरश: हतबल होतात. २०० रुपयांपासून मोठ्या रकमेची चिरीमिरी दिल्याशिवाय या विभागातील कोणतेही काम पुढे सरकत नाही. सामान्यांची अशी परवड होत असताना, बड्या मिळकतदारांच्या फायलींचा त्वरित निपटारा होतो. जेवढी चिरीमिरीचा आकडा मोठा तेवढा फायलीचा प्रवास वेगवान अशीच येथे स्थिती पहायला मिळते. नागरिकांच्या तक्रारीनंतर सभागृहात याविरोधात आवाज उठवला जातो. अधिकाऱ्यांना धारेवर धरले जाते. दोन-तीन दिवस कामात सुधारणाही होते, पण पुन्हा पहिले पाढे पच्चावन अशी स्थिती टीपीची बनते. येथील अधिकाऱ्यांपेक्षा कर्मचारीच अधिक बोकाळून गेले आहेत. अनेकजण आपली जबाबदारी झटकून देत असल्याने येथे भ्रष्टाचाराची एक साखळीच तयार झाली आहे. भ्रष्टाचाराची साखळी तोडण्यासाठी अनेकदा प्रयत्न झाले, पण त्याला अजिबात यश आलेले नाही. विशेष कँपच्या माध्यमातून शनिवारी १२६ फायलींचा निपटारा झालेला असला, तरी अद्याप अनेक फायली धूळखात पडलेल्या आहेत. भविष्यात या फायलींचा निपटारा करताना भ्रष्टाचार साखळीही मोडीत काढावी लागेल.

फायलींचा ढीग

महापालिकेच्या चार विभागीय कार्यालयाच्यावतीने २५० चौ. मी. पर्यंतच्या बांधकामांना परवानगी दिली जात होती. तत्कालीन आयुक्त पी. विजयशंकर यांनी यामध्ये बदल केला. विभागीय कार्यालयाचे अधिकार कमी करत फायलींचा त्वरित निपटरा करण्यासाठी एकाच ठिकाणी सुविधा निर्माण केली. ही सुविधा देताना अमृत योजनेतील निधी मिळल्यानंतर बांधकाम परवानगी देण्यासाठी 'एक खिडकी' योजना सुरू करण्याची अट घातली होती. त्यानुसार योजना सुरू केली, पण फायलींचा निपटरा होण्याऐवजी टीपीमध्ये फायलींचा ढीग साचत आहे. नागरिक विविध परवानगीसाठी पाच-पाच वर्षे हेलपाटे मारत असले, तरी त्यांच्या फाइल मिळत नसल्याचे शनिवारी झालेल्या कँपमध्ये स्पष्ट झाले.

आर्किटेक्टकडून एकही परवाना नाही

तत्कालीन आयुक्त डॉ. अभिजित चौधरी यांनी 'एक खिडकी' योजनेची प्रभावी अंमलबजावणी करताना ३०० चौ. मी. पर्यंतच्या बांधकाम परवाना देण्याचे अधिकार आर्किटेक्ट यांना दिले. परवानगी देताना अनेक अटी घातल्या गेल्या. या अटी शिथिल करण्यासाठी सभागृहात अनेकवेळा नगरसेवकांनी आवाज उठवला. कामाचे विकेंद्रीकरण करण्याची मागणी लावून धरली. पण त्यामध्ये अद्याप बदल झालेला नाही. परिणामी २०१७ नंतर आर्किटेक्टनी एकाही बांधकाम परवान्याला मंजुरी दिलेली नाही.

कोल्हापूर टाइम्स टीम कचरा कोंडाळे नाहीत आणि अॅटो टिपर येत नसल्याची सबब पुढे करत जीवबा नाना पार्कमध्ये प्लास्टिक, शिल्लक अन्न आणि अन्य कचरा थेट रस्त्यावरच टाकला जात आहे. रस्त्यावर टाकलेला कचरा उंचावरून येणाऱ्या सांडपाण्यामुळे थेट कळंबा तलावात मिसळण्याची शक्यता आहे. नागरिकांची यातून बेपर्वाई दिसून येत असताना महापालिकेसह कळंबा ग्रामपंचायनेही याकडे अक्षम्य दुर्लक्ष केले आहे. हा कचरा तलावात येण्याची शक्यता असल्याने पाणी प्रदूषणाचा धोका निर्माण झाला आहे. बापूराम नगर बीएड कॉलेजपासून जीवबा नाना जाधव पार्काची हद्द सुरू होते. या पार्कचा भाग असलेल्या नंदनवन पार्क व कृष्णकृपा अपार्टमेंटमध्ये सुमारे ३० ते ३५ कुटुंबे वास्तव्यास आहेत. येथे कचरा टाकण्यास कंटेनर नसल्याने आणि घरोघरी कचरा संकलन करणारी टीपर येत नसल्याने नागरिक बिनदिक्तपणे प्लास्टिक पिशव्या, घरातील शिल्लक अन्नपदार्थ रस्त्यावर टाकून देत आहेत. त्यामुळे उंचावरील या दोन्ही ठिकाणी कचऱ्याचा ढीग साचला आहे. त्यावरच पुन्हा कचरा टाकला जात आहे. कचऱ्याभोवती भटकी कुत्र्यांचा वावर वाढला असूना दुर्गंधीही मोठ्या प्रमाणात सुटली आहे. उंचावर टाकलेला कचरा मोठ्या पावसात थेट गटारीतून कळंबा तलावात येण्याची शक्यता आहे. उघड्यावर टाकलेल्या कचऱ्याची निर्गत महापालिका व कळंबा ग्रामपंचायतीने करायला हवी. मात्र, परिसरातील अपार्टमेंटधारकही याकडे गांभीर्याने लक्ष देत नसल्याचे दिसते. अपार्टमेंट बांधताना परवानगी घेताना कचऱ्याचे वर्गीकरण करण्याचे हमीपत्र घेतले जाते. महापालिका सातत्याने ओला व सुका कचरा वेगळा करण्याबरोबरच उघड्यावर कचरा टाकू नका असे आवाहन करते. पण अपार्टमेंट्स व नंदनवन पार्कातील काही कुटुंबांनी आवाहनाची पूर्णपणे वासलात लावली आहे. दोन्ही ठिकाणी महापालिकेच्या हद्दीत असली तरी कचरा कळंबा हद्दीतील रस्त्यावर टाकला जात आहे. याबाबत ग्रामपंचायतीने नागरिकांना अटकाव करण्याची आवश्यकता असताना पदाधिकारी त्याकडे साफ दुर्लक्ष करीत आहेत. दिवसेंदिवस कचरा रस्त्यावर टाकला जात असताना त्याकडे ग्रामपंचायत आणि महापालिका दोन्ही घटक दुर्लक्ष करत आहेत.

म. टा. प्रतिनिधी, कोल्हापूर

'विधानसभा निवडणुकीची प्रत्यक्षातील प्रक्रिया सुरू झाली आहे. निवडणूक कालावधीत कायदा आणि सुव्यवस्थेचा प्रश्न निर्माण होऊ नये, प्रक्रिया निपक्षपातीपणे पार पाडण्यासाठी स्वसंरक्षणाठी वापरत असलेले १११८ परवानाधारी शस्त्रे रविवारपासून जमा करून घ्यावीत', असा आदेश जिल्हाधिकारी दौलत देसाई यांनी जिल्हा पोलिस प्रशासनास दिला आहे. यासंबंधीचे पत्र जिल्हा पोलिस प्रमुख प्रमुख डॉ. अभिनव देशमुख यांनाही देण्यात आले आहे.

वन्य प्राण्यांकडून होणाऱ्या शेतीचे नुकसान टाळण्यासाठी डोंगरालगतच्या शेतकऱ्यांना बंदूक वापरण्याचा परवाना दिला जातो. याशिवाय विविध कारणांनी जिवाला धोका असलेल्या काही जणांनाही असा परवाना देण्यात आला आहे. अशा एकूण ७ हजार ३८१ जणांना बंदूक वापरण्याचा परवाना प्रशासनाने दिला आहे.

दरम्यान, विधानसभा निवडणूक काळात बंदूकीचा धाक दाखवून कायदा, सुव्यवस्थेचा प्रश्न निर्माण करण्याची शक्यता नाकारता येत नाही. म्हणून जिल्हाधिकारी, पोलिस अधीक्षक, अपर जिल्हाधिकारी, निवडणूक विभागाचे उपजिल्हाधिकारी यांच्या समितीने १११८ जणांकडून शस्त्रे जमा करून घेण्याचा निर्णय घेतला. संबंधितांना पोलिस ठाण्यातील पोलिसामार्फत गावच्या पोलिस पाटलांकडून निरोप पोहचवण्यात येत आहे. निरोप देऊनही बंदूक जमा न केल्यास पोलिस निरीक्षकांनी त्यांच्याविरोधात कायदेशीर करावी, असा आदेशही जिल्हाधिकारी देसाई यांनी दिला आहे.

...

चौकट

निकालानंतर ८ दिवसांनी

शस्त्रे परत मिळणार

पोलिस ठाण्यात जमा केलेली शस्त्रे निकाल जाहीर झाल्यानंतर एक आठवड्यानंतर परत देण्यात येणार आहे. निकालानंतर अनेक ठिकाणी तणाव असतो. यामुळे २२ सप्टेंबरपासून जमा केलेली शस्त्रे निकालानंतर वातावरण शांत झाल्यानंतर परत मिळणार आहेत. बंदूक जमा करण्याचा आदेश दिलेल्यांपैकी बहुतांशजण प्रत्यक्ष, अप्रत्यक्षपणे राजकीय पक्षांशी संबंधित आहेत.

कोल्हापूर

राष्ट्रीयीकृत बँकांच्या मनमानी विलिनीकरणामुळे मध्यम आणि सामान्य ग्राहकांची गैरसोय तर बड्या उद्योगपतींची सोय होत आहे. नोटबंदीनंतर सर्वच राष्ट्रीयीकृत बँका तोटा भरून काढण्यासाठी सर्व सेवांना पैसे आकारत आहेत. बँक कर्मचारी संघटनांतर्फे याला विरोध केला आहे. सरकार बँकांच्या विरोधी धोरण राबवून बड्या थकीत कर्जदारांच्या हिताचे निर्णय घेत आहे. याला विरोध करण्यासाठी सर्व राष्ट्रीयीकृत बँकांचे अधिकारी, कर्मचारी २२ ऑक्टोबरला एक दिवस संपावर जातील, अशी माहिती स्टेट बँक एम्पलॉईज फेडरेशन जनरल सेक्रेटरी देवीदास तुळजापूरकर यांनी रविवारी पत्रकार परिषदेत दिली.

म. टा. प्रतिनिधी,कोल्हापूर

विधानसभा निवडणुकीच्या आचारसंहिता लागल्यानंतर दुसऱ्याच दिवशी विविध पक्ष,लोकप्रतिनिधींची प्रचार, प्रसिद्धीचे फलक निवडणूक प्रशासनातर्फे हटवण्याची मोहीम राबविली. आचारसंहिता लागू झाल्याच्या दुसऱ्याच दिवशी शहर आणि जिल्ह्यातील सर्व मतदारसंघात व्यापक मोहीम राबवण्यात आली. त्यामध्ये फलक, भिंती, पोस्टर्स, बॅनर्स, इतर असे ११ हजार, २१९ प्रचार फलक हटवण्यात आले.

विकास कामांच्या ठिकाणी लोकप्रतिनिधींच्या नावांचा फलक असतो. जिल्हा परिषद, महानगरपालिकेसह सर्वच स्थानिक स्वराज्य संस्थेत त्यांची नावे असतात. पक्ष, उमेदवारांचे गुणगाण करणारे फलक, बॅनर्स लावलेले असतात. भिंतीवरही अप्रत्यक्षपणे प्रचार होईल, असे रंगकाम केले जाते. हे सर्व आदर्श आचारसंहितेच्या अंमलबजावणीमुळे हटवले जात आहे. स्थानिक स्वराज्य संस्थेच्या प्रशासनातर्फे ही कार्यवाही केली जात आहे. न काढण्यात येणाऱ्या फलकांवर कागद किंवा कापड लावले आहे. तात्पुरत्या स्वरुपाचे फलक उतरवण्यात आले आहेत. यामध्ये सार्वजनिक ठिकाणचे ८ हजार, ७४ आणि खासगी मालमत्तेवरील ३ हजार, १४५ ठिकाणचे फलक काढण्यात आले. आतापर्यंत असे सर्वाधिक फलक राधानगरी विधानसभा मतदारसंघात करण्यात आली.

मतदारसंघनिहाय हटवण्यात आलेले फलक

चंदगड : १४३२,राधानगरी : १८०८,कागल : ९९०,कोल्हापूर दक्षिण : ११६६,करवीर :१७६७,उत्तर : १९०,शाहूवाडी : ८००,हातकणंगले : ९२४,इचलकरंजी : १५८७, शिरोळ : ७५५.

म. टा. प्रतिनिधी, कोल्हापूर

सार्वजनिक सण समारंभांसाठी उभारण्यात येणाऱ्या मंडपांमुळे अनेकवेळा वाहतुकीचा प्रश्न निर्माण होतो. मंडप उभारणीसाठी नियम केले असले, तरी स्थानिक हस्तक्षेपामुळे त्याची अंमलबजावणी योग्यरितीने होत नाही. कोर्टाच्या आदेशानुसार नियमाची अंमलबाजवणी करण्यासाठी राज्य सरकारच्या नगरविकास खात्याने सर्व महापालिकांना गुरुवारी (ता. १९) निर्देश दिले आहेत. वाहतुकीला अडथळा ठरणाऱ्या मंडपावर कशी कारवाई करावी, याबाबतचे मार्गदर्शन परिपत्रकाद्वारे केले आहे.

सार्वजनिक गणेशोत्सव, नवरात्रोत्सव किंवा अन्य सण समारंभासाठी रस्त्यावरच मंडप उभारले जातात. मंडप उभारणीचे नियम असले, तरी त्याची ठोस अंमलबजावणी होत नसल्याचे अनेकदा स्पष्ट झाले आहे. रस्त्यांच्या रुंदीनुसार मंडप उभारणीचा नियम असला, तरी या नियमाचे उल्लंघन नेहमीच होत असते. त्यामुळे अॅब्युलन्स किंवा फायर फायटरची गाडी जाण्यास वाट नसते. याविरोधात मुंबई कोर्टात याचिका दाखल करण्यात आली होती. याचिकेवर निर्णय देताना मंडप उभारणीसंदर्भात नियमांची अंमलबजावणी करण्याचे आदेश दिले आहेत. त्यानुसार नगरविकास विभागाने सर्वच महापालिकेना परिपत्रकांद्वारे कारवाईचे निर्देश दिले आहेत.

सण समारंभांना संवेदनशील आणि भावनिकतेची जोड असल्याने कारवाई करताना नेहमीच कचुराई केली जाते. अनेकवेळा मानवी हस्तक्षेपही केला जातो. हस्तक्षेप टाळण्यासाठी संपूर्ण परवानगीची पद्धत ऑनलाइन करण्याबरोबरच एक महिना अगोदर परवानगीसाठी अर्ज देण्याचे अनिवार्य केले आहे. तसेच सणापूर्वी केवळ सात दिवस अगोदर अशी परवानगी द्यावी. त्यासाठी 'एक खिडकी' योजना सुरू करावी. मंडप उभारणीनंतर तहसीलदार दर्जाच्या अधिकाऱ्यांनी समक्ष पाहणी करावी. पाहणी दरम्यान नियमांचे उल्लंघन झाल्यास तत्काळ मंडपाची परवानगी रद्द करावी. त्यासाठी आवश्यकतेनुसार पोलिस बंदोबस्तही घ्यावा. या नव्या नियमावलीमुळे वाहतुकीला अडथळा ठरतील अशा मंडपांना अटकाव होण्याची शक्यता आहे.

अर्जदारावर सर्व जबाबदारी

मंडप उभारणीसाठी अर्ज करताना अर्जदाराची संपूर्ण माहिती पुराव्यासह सादर करावी लागणार आहेत. त्याचबरोबर ध्वनी प्रदूषण, अग्नी प्रतिबंधक योजना तसेच सार्वजनिक मालमत्तांचे नुकसान होणार नाही, याची हमी द्यावी लागणार आहे. तसेच सण समारंभानंतर निर्माण होणाऱ्या निर्माल्यामुळे प्रदूषण होणार नाही, याची खबरदारी घ्यावी लागणार आहे. यापैकी कोणत्याही एका नियमाचे उल्लंघन झाल्यास अर्जदारावर जबाबदारी निश्चित केली जाणार आहे.

म. टा. प्रतिनिधी, कोल्हापूर

'ग्लोबल वॉर्मिंग, पर्यावरणाचा होणारा ऱ्हास यामुळे वातावरणावर विपरीत परिणाम होत आहे. निसर्गसौंदर्याची मुक्त उधळण असलेल्या कोल्हापूरचे पर्यावरणीय सौंदर्य टिकवण्यासाठी गार्डन्स क्लब प्रयत्नशील आहे. आता 'ग्रीन कोल्हापूर'साठी आम्ही कटिबद्ध राहू,' असा संकल्प गार्डन क्लबच्या पदाधिकारी व सदस्यांनी रविवारी केला.

शिवाजी विद्यापीठातील लोकविकास केंद्राची मान्यता असलेल्या व गार्डन्स क्लबतर्फे चालविण्यात येणाऱ्या 'उद्यान विद्या व रोपवाटिका व्यवस्थापन या सर्टिफिकेट कोर्समध्ये (२०१८-१९) उत्तीर्ण झालेल्या २८ महिलांना प्रमाणपत्र वितरित करण्यात आले. राजारामपुरी नववी गल्ली येथील गार्डन्स क्लबच्या कार्यालयात कार्यक्रम झाला. 'महाराष्ट्र टाइम्स'चे निवासी संपादक विजय जाधव यांच्या हस्ते प्रमाणपत्र वितरित करण्यात आले. २३ सप्टेंबर हा पृथ्वी जल दिन म्हणून साजरा केला जातो. या दिनाच्या पूर्वसंध्येला आयोजित कार्यक्रमात क्लबच्या महिला सदस्यांनी पर्यावरण रक्षणाची शपथही घेतली.

गार्डन्स क्लबच्या अध्यक्षा कल्पना सावंत म्हणाल्या, 'क्लबमार्फत वर्षभर पर्यावरणपूरक उपक्रम साजरे केले जातात. झाडे लावा, झाडे जगवा हा उपक्रम क्लबने प्रत्यक्षात आचरणात आणला आहे. येत्या डिसेंबर महिन्यात फ्लॉवर शो आयोजित केला आहे. गार्डन्स क्लबचा फ्लॉवर शो हा शहरवासीयांच्या आकर्षणाचा आणि पर्यावरण जपा अशी शिकवण देतो.'

कोर्सच्या समन्वयक डॉ. धनश्री पाटील म्हणाल्या, 'पर्यावरणात होणारे प्रदूषण थांबविणे, जैवविविधता संवर्धन, कचरा व्यवस्थापन अशा विविध पातळींवर संस्था काम करते. पर्यावरणविषयक समस्येवर मात करण्यासाठी हरित सैनिकांची गरज आहे. ठिकठिकाणी अशा प्रकारच्या ग्रीन फोर्स तयार झाले तर या कामाला गती लाभेल.'

या अभ्यासक्रमासाठी क्लबमध्ये केंद्रप्रमुख म्हणून काम करणाऱ्या प्रा. डॉ. अंजली साळवी यांनी सर्टिफिकेट कोर्समध्ये उत्कृष्ट गुण संपादन केलेल्या मृणालिनी देसाई, शैलजा निकम यांना भेटवस्तू देऊन सत्कार केला. तसेच वयाच्या ७५ व्या वर्षी या अभ्यासक्रमात यश मिळवलेल्या शशिकला राणे यांचाही सत्कार झाला. याप्रसंगी निर्मल देसाई, शिल्पा नरके, श्वेता बुरगे, मृणालिनी देसाई, वसुंधरा तडसरे, आदींनी मनोगत व्यक्त केली. यशस्वी महिलांनी डोक्यावर पर्यावरण संवर्धनविषयक प्रबोधन करणाऱ्या कागदी टोप्या परिधान केल्या होत्या.

०००००

म. टा. प्रतिनिधी, कोल्हापूर

'निव्वळ स्वार्थासाठी पक्ष बदलणाऱ्या दलबदलूंना विधानसभा निवडणुकीत पाडा,' असे आवाहन ज्येष्ठ विचारवंत डॉ. एन. डी. पाटील यांनी राष्ट्रवादी काँग्रेस पक्षाचे राष्ट्रीय अध्यक्ष शरद पवार यांना केले. डॉ. पाटील हे सध्या प्रकृती अस्वस्थ्यामुळे एका खासगी रुग्णालयात दाखल आहेत. पवार यांनी रविवारी रात्री पाटील यांची भेट घेऊन त्यांच्या प्रकृतीची विचारपूस केली. डॉक्टरांनी पाटील यांची प्रकृती ठीक असल्याचे सांगितले. मात्र या वयातही पाटील यांनी राजकारणातील वाईट व दलबदलू प्रवृत्तीना नेस्तनाबूत करण्यासाठी मैदानात उतरून लढण्याचा निर्धार उपस्थितांना नवऊर्जा निर्माण करणारा ठरला.

जवळपास पाऊणतासाच्या भेटीत या दोन दिग्गज नेत्यांचा एकमेकाविषयीची आदराची भावना, सध्याच्या राजकीय धामधुमीतही वैयक्तिक नातेसंबंध जपण्याची, एकमेकांविषयीची काळजी घेण्याच्या वृत्तीमुळे उपस्थितही भारावून गेले. खोकला व धापेचा त्रास होत असल्यामुळे डॉ. पाटील यांच्यावर तीन दिवसापासून उपचार सुरू आहेत. पवार हे रविवारी सातारा दौऱ्यावर होते. कर्मवीर भाऊराव पाटील यांच्या जयंतीचा समारंभ आणि सातारा येथील राष्ट्रवादीची प्रचार रॅली आटोपून रात्री आठ वाजण्याच्या सुमारास पवार हे हॉस्पिटलमध्ये पोहचले.

पवार यांचे आगमन होताच पाटील यांनी नेहमीप्रमाणे कणखर आवाजात 'राज्यातील दलबदलूंना येत्या विधानसभा निवडणुकीत पाडा. दलबदलूंना पराभूत करणे हाच आपला फोकस आहे. मी डॉक्टरांना सांगितले आहे, मला लवकर बरे करा, संपूर्ण महाराष्ट्र पिंजून काढायचा आहे.' म्हणाले. पवार यांनी जवळपास अर्धा तास त्यांनी डॉ. पाटील व सरोज पाटील यांच्याशी गप्पा मारल्या. या कालावधीत पाटील यांनी पवार यांच्या ठिकठिकाणच्या सभेचा वृत्तांतही जाणून घेतला. कुठे कुठे सभा झाल्या, नागरिकांचा प्रतिसाद सातारा ते कोल्हापूर प्रवास कसा केला. विमानाने कोल्हापुरात आलात का?, मुंबईला कसे जाणार अशी चौकशी केली. या दोन नेत्यांमधील संवादादरम्यान एकमेकांविषयीची आपुलकी, जिव्हाळ्याचे नाते किती घट्ट आहेत याचे प्रत्यंतर याप्रसंगी आले.

डॉ. पाटील यांची प्रकृती उत्तम

पाटील यांच्या प्रकृतीविषयी माहिती देताना सरोज पाटील म्हणाल्या, 'पाटील यांना खोकला, धापेचा त्रास सुरू झाल्यामुळे त्यांच्यावर तीन दिवसांपासून उपचार सुरू आहेत. मात्र उपचार घेत असतानाही पाटील यांना महाराष्ट्राची काळजी लागली आहे. राजकारणातील वाईट प्रवृत्तीच्या विरोधात लढायचे आहे म्हणतात. डॉक्टरांना ते रोज म्हणतात, 'मला लवकर बरे करा, महाराष्ट्रभर प्रचार करायचा आहे. दलबदलूंना धडा शिकवायचे आहे', असे म्हणतात. लवकरच त्यांना डॉक्टर घरी सोडतील. '

एनडींना भाषण करायला सांगा, बरे होतील

या भेटीदरम्यान दोघांही नेत्यांतील मिश्किल वृत्तीचे दर्शनही घडले. पवार यांनी डॉक्टरांकडे डॉ. पाटील यांच्यावरील उपचाराची चौकशी केली. आणि त्यांच्याकडे पाहत 'एन. डी. यांना भाषण करायला सांगा, लगेच तब्बेत सुधारेल, प्रकृतीत सुधारणा होईल.' असे मिश्किलपणे म्हणताच उपस्थितांमध्ये हशा पिकला. पवार व एन. डी. यांच्या चेहऱ्यावरही हास्य फुलले. एन. डी. यांच्या पत्नी सरोज, कोल्हापूर जिल्हा इरिगेशन फेडरेशनचे अध्यक्ष विक्रांत पाटील, उद्योगपती व्ही. बी. पाटील, राष्ट्रवादीचे शहराध्यक्ष आर. के. पोवार, शाहू कॉलेजचे प्राचार्य सुरेश साळुंखे यांनाही हसू आवरता आले नाही.

म. टा. प्रतिनिधी, कोल्हापूर

'राज्याच्या विविध भागात आयोजित प्रचार सभांना चांगला प्रतिसाद मिळत आहे. तरुण मोठ्या संख्येने आकर्षित होत आहेत. वातावरण चांगले आहे. राज्यामध्ये निश्चित बदल घडेल,'असा विश्वास राष्ट्रवादी काँग्रेस पक्षाचे अध्यक्ष शरद पवार यांनी कोल्हापुरात बोलताना व्यक्त केला.

ज्येष्ठ विचारवंत प्रा. डॉ. एन. डी. पाटील यांच्या प्रकृतीची विचारपूस करण्यासाठी पवार हे रविवारी रात्री कोल्हापुरात पोहचले. दरम्यान, कदमवाडी परिसरातील खासगी हॉस्पिटल येथे त्यांची पत्रकारांनी भेट घेतली. यावेळी त्यांनी पत्रकारांशी अनौपचारिक संवाद साधला. राज्यातील प्रचार दौऱ्यांना मिळणारा मोठा प्रतिसाद, सातारा येथील जल्लोषी स्वागत या विषयी पवारांना विचारल्यावर ते म्हणाले, 'बीड, उस्मानाबाद, जालना, सोलापूर, सातारा या सर्वच ठिकाणी चांगला प्रतिसाद मिळाला. सर्वत्र आम्हाला चांगले वातावरण आहे. लोकांमध्ये भाजप सरकारविषयी रोष दिसत आहे. यामुळे राज्यामध्ये निश्चित बदल घडेल.' दरम्यान, हॉटेल पंचशील येथे पवार यांची जिल्ह्यातील काही नेत्यांनी भेट घेतली. सोमवारी सकाळी त्यांनी काहीजणांना भेटायला बोलाविले आहे. दरम्यान, काँग्रेस, राष्ट्रवादी काँग्रेस आघाडी व मित्रपक्षांची सोमवारी मुंबईत बैठक होणार आहे. त्या बैठकीला मी उपस्थित नसणार, पण मुंबई जाणार असल्याचेही त्यांनी सांगितले.

कोल्हापूर: कर्मवीर भाऊराव पाटील यांच्या जयंतीनिमित्त महापालिकेच्यावतीने रविवारी अभिवादन करण्यात आले. मध्यवर्ती बसस्थानकासमोरील कर्मवीर भाऊराव पाटील यांच्या पुतळयास आयुक्त डॉ. मल्लिनाथ कलशेट्टी यांच्या हस्ते पुष्पहार अर्पण केला. यावेळी त्यांनी राजर्षी छत्रपती शाहू कॉलेजच्या विद्यार्थ्यांना प्लास्टिकमुक्त कोल्हापूर व स्वच्छतेची शपथ दिली. यावेळी उपशहर अभियंता हर्षजित घाटगे, कनिष्ठ अभियंता मीरा नागिमे, अरविंद भोसले, दिलीप पोवार, प्राचार्य डॉ. एस. टी. साळुंखे, प्रा. आर. पी. देठे, व्ही. व्ही. किल्लेदार, एस. एस. साठे यांच्यासह शहरवासिय मोठ्या संख्येने उपस्थित होते.

म. टा. वृत्तसेवा, कुडित्रे

कोगे ( ता. करवीर) येथील कुमार कामगार केसरी, महाराष्ट्र केसरी ब्राँझ पदक विजेता युवा पैलवान विक्रम भगवान मोरे ( वय २५) याचा अंगावर झाडाची फांदी पडून मृत्यू झाला. रविवारी सकाळी साडेअकराच्या सुमारास ही घटना घडली.

रविवारी सकाळी विक्रम आपल्या मित्रासोबत देवस्थान मळी येथील शेतात झाडाच्या फांद्या तोडण्यास गेला होता. विक्रम झाडावर चढला होता. तर इतर चौघे मित्र फांदीला दोरी बांधून खाली थांबले होते. यावेळी अचानक फांदी तुटून ती थेट विक्रमच्या अंगावर येऊन पडली. विक्रम झाडावर दोन्ही फांद्यामध्ये खोडात बसल्याने त्याला हलता आले नाही. त्याला फांदीचा जोराचा मार लागल्यामुळे तो गंभीर जखमी झाला. यावेळी भेदरलेल्या मित्रांनी जखमी विक्रमला झाडावरून खाली उतरून तत्काळ सी. पी. आर. येथे उपचारसाठी दाखल केले, मात्र तत्पुर्वीच त्यांचा मृत्यू झाला.

शवविच्छेदनानंतर मृतदेह नातेवाईकांच्या ताब्यात देण्यात आला. गावात मृतदेह आणताच नातेवाईक, ग्रामस्थांनी हंबरडा फोडला. विक्रम हा नवोदित नामांकित मल्ल होता. तो कुमार कामगार केसरी, पट्टणकोडोली केसरी तसेच महाराष्ट्र केसरी कुस्ती स्पर्धेत ब्राँझ पदकाचा मानकरी होता. पुणे येथे झालेल्या महापौर चषक राज्यस्तरीय कुस्ती स्पर्धेत त्याने सुवर्ण पदक मिळविले होते. कुंभी कासारी साखर कारखान्याचा तीनवेळा मानधनधारक मल्ल होता. त्याच्या पश्चात आई, वडील, भाऊ, बहीण व चुलते असा परिवार आहे. रक्षाविसर्जन सोमवार (ता.२३) रोजी सकाळी १० वाजता आहे.

नेत्रदानाचा निर्णय

विक्रमच्या मृददेहाचे शवविच्छेदन करताना नातेवाईकांनी एकत्र येऊन अवयवदान करण्याचा निर्णय घेतला. पण रविवार सुट्टीचा दिवस असल्याने अपुऱ्या डॉक्टर उपलब्धतेमुळे नेत्रदान करून मृतदेह घरी नेण्यात आला. मोरे कुटुंबावर दुःखाचा डोंगर कोसळला असतानाही कुटुंबीयांनी घेतलेल्या नेत्रदानाच्या निर्णयाचे सर्वत्र कौतुक होत आहे.

कोल्हापूर टाइम्स टीम

नवरात्रोत्सवातील दांडिया नृत्यासाठी घागरा, चुनरी, टिपऱ्यांसह ऑक्साइड दागिन्यांची क्रेझ आली आहे. शहरातील प्रमुख बाजारपेठ दांडियासाठी आलेल्या अनेक वस्तू व साहित्याने कलरफूल झाली आहे. पारंपरिक पद्धतीने दांडिया खेळण्यासाठी तरुणाई खास गरबा नृत्यासाठी खरेदी करत आहे.

पाच दिवसांवर नवरात्रोत्सव आला आहे. रविवारी घटस्थापना असल्याने या दिवसापासूनच दसऱ्यापर्यंत रोज रात्री रास गरब्याचे फेर रंगणार आहेत. यावर्षीही गरब्यासाठी बाजारपेठेत वैविध्यपूर्ण ड्रेस, ज्वेलरी, सजवलेल्या दांडिया दाखल झाले आहे. मुलींच्या ड्रेसमध्ये घागरा चोलीला जास्त मागणी आहेत. यामध्ये बांधणी, कॉटन बेसवर आबलावर्क व जरदोजी वर्कसह लटकन, कुंदन लावलेल्या ओढण्यांसह असलेल्या घागऱ्याची खास खरेदी केली जात आहे. दरवर्षी लाल, पिवळा, गुलाबी, भगवा या रंगांची क्रेझ असते. यंदा या रंगांसोबत मरून, आयव्हरी आणि ब्लॅक कलरलाही मागणी वाढली आहे. घागऱ्यात यावर्षी रेड आणि ब्लॅक हे कॉम्बीनेशन इन फॅक्टर आहे. यामध्येही ए लाइन व अंब्रेला या दोन्ही स्टाइल फॉर्मात आहेत.

मुलांच्या ड्रेसमध्ये पारंपरिक राजस्थानी ड्रेसची चलती आहे. यामध्ये कुर्ता, धोती व फेटा असा सेट खास गरब्यासाठी खरेदी केला जात आहे. यामध्ये पिवळ्या रंगाच्या शेड्स जास्त खरेदी केल्या जात आहेत. मुलींच्या ज्वेलरीत कमरपट्टा, बिंदी, नथनी, बांगड्या, पायातील कडे या दागिन्यांची व्हरायटी लक्ष वेधून घेत आहे. व्हाइट मेटल, ऑक्साइड, मोती, कुंदन, खडे या प्रकारच्या हेवी ज्वेलरीचे सेट दुकानांमध्ये उपलब्ध आहेत. रंगबेरंगी बांगड्यांच्या शेकडो व्हरायटींनी बाजारपेठ फुलून गेली आहे. ज्वेलरीमध्येही आरसे जडवलेल्या दागिन्यांना मागणी आहे. तसेच यंदा फ्लॉवर ज्वेलरीचाही फंडा बाजारात आला आहे. मुलांच्या दागिन्यांमध्ये बाली, कडं यांची खरेदी जोरात सुरू झाली आहे. मुलं व मुली मोजडी यांचीदेखील हमखास खरेदी करत आहेत. यात सिल्कबेस मोजडीला डिमांड वाढला आहे.

सजवलेल्या दांडियांमध्ये घुंगरू लावलेल्या दांडियांनी बाजारपेठ सजली आहे. तसेच लाकडी रंगवलेल्या पारंपरिक दांडिया, स्टिलच्या दांडिया व जरीने सजवलेल्या दांडिया खरेदी करण्यासाठी गर्दी वाढू लागली आहे. महाद्वार रोड, राजारामपुरी, जोतिबा रोड, बाजारगेट या परिसरात दांडियासाठी फुललेल्या बाजारपेठेने नवरात्रौत्सवाची चाहूल गडद केली आहे.

सिंहवाहिनी दुर्गामूर्तींना मागणी

रास-दांडियासाठी पारंपरिक ड्रेस व ज्वेलरीने एकीकडे बाजारपेठ सजली असताना शहरातील कुंभारवाड्यात दुर्गामूर्तींवर अखेरचा हात फिरवला जात आहे. यावर्षी बहुतांशी मूर्ती या सिंहवाहिनी रुपातील आहे. कमळातील दुर्गामूर्ती, उभ्या मूर्तींही घडवण्यात आल्या आहेत. दुर्गा मूर्ती प्रतिष्ठापनेसाठी शहरातील सार्वजनिक मंडळांच्यावतीने मंडप उभारणीचे काम सुरू झाले आहे. पापाची तिकटी कुंभार गल्ली, शाहूपुरी कुंभार गल्ली, बापटकँप येथे मूर्ती रंगकाम अंतिम टप्प्यात आले आहे.