म. टा. प्रतिनिधी, कोल्हापूर
ढोलताशांच्या गजरात शहरातून निघालेल्या महाजनादेश यात्रेत मुख्यमंत्री देवेंद्र फडणवीस यांच्यावर चौकाचौकात कार्यकर्ते आणि नागरिकांकडून पुष्पवृष्टी करण्यात आली. कळंबा (ता.करवीर) येथे छोट्या जाहीर सभेत मुख्यमंत्र्यांना चांदीची गदा, छत्रपती शिवाजी महाराजांचा पुतळा भेट देण्यात आला. आचारसंहिता जाहीर होण्याच्या आधी महाजनादेश यात्रेद्वारे मुख्यमंत्र्यांनी भाजपचा प्रचाराचा नारळ फोडत विकासासाठी जनतेला पुन्हा सत्ता देण्याचे आवाहन केले.
महाजनादेश यात्रेचे सोमवारी रात्री जंगी स्वागत झाले होते. रात्री मुख्यमंत्री कोल्हापुरात मुक्कामाला होते. मंगळवारी सकाळी सात वाजता ते औरंगाबाद येथील हैद्राबाद मुक्तीसंग्राम दिनाच्या कार्यक्रमाला विमानाने गेले होते. औरंगाबाद येथील कार्यक्रम आटपून ते परत खास विमानाने कोल्हापुरात दहा वाजता आले. यावेळी विशेष पोलिस महानिरीक्षक डॉ. सुहास वारके, जिल्हाधिकारी दौलत देसाई, पोलिस अधीक्षक डॉ. अभिनव देशमुख, आयुक्त डॉ.मल्लिनाथ कलशेट्टी, म्हाडा पुणेचे अध्यक्ष समरजीत घाटगे, माजी आमदार भरमू पाटील आदी उपस्थित होते.
मध्यवर्ती बसस्थानक परिसरातील वटेश्वर मंदिराजवळ सकाळी सव्वा अकरा वाजता महाजनादेश यात्रेसाठी तयार करण्यात आलेल्या खास रथामध्ये मुख्यमंत्र्यांचे आगमन झाले. त्यांच्यासमवेत प्रदेशाध्यक्ष चंद्रकांत पाटील, आमदार अमल महाडिक, सुरेश हाळवणकर, पश्चिम महाराष्ट्र देवस्थान समितीचे अध्यक्ष महेश जाधव, प्रदेश उपाध्यक्ष माजी खासदार धनंजय महाडिक होते. ढोल ताशांच्या गजरात आणि भाजप आणि मुख्यमंत्र्यांच्या विजयाच्या घोषणा देत यात्रेची जल्लोषी वातावरणात सुरुवात झाली. मिरवणुकीच्या पुढे मोदी आणि फडणवीस यांची प्रतिमा असलेले टी शर्ट घातलेले कार्यकर्ते बाईकवरुन होते.
महाजनादेश यात्रेच्या मार्गावर नागरिकांची दुतर्फा गर्दी होती. पालकमंत्री पाटील हे माईकवरुन राज्य सरकारने कोल्हापुरात केलेल्या विमानतळ, अंबाबाई तीर्थक्षेत्र विकास आराखडा, कोल्हापूर वैभववाडी लोहमार्ग, नागपूर रत्नागिरी राष्ट्रीय महामार्ग, रिंगरोड या विकासकामांची माहिती देत होते. स्टेशन रोड, व्हिनस चौकासह दसरा चौकात यात्रेचे जंगी स्वागत करण्यात आले. दसरा चौकात मुख्यमंत्र्यावर महिलांनी पुष्पवृष्टी केली.
यात्रेच्या मार्गावरील वाहतूक थांबवली असल्याने यात्रा वेगाने पुढे सरकत होती. मुख्यमंत्र्यांच्या स्वागतासाठी ठिकठिकाणी कमानी उभारण्यात आल्या होत्या. बिंदू चौकात भाजप महानगर कार्यकारणीने यात्रेचे स्वागत केले. यावेळी 'देवस्थान' चे सदस्य राजू जाधव, नगरसेवक अजित ठाणेकर, सुरेश जरग यांच्यासह कार्यकर्त्यांनी भाजप आणि मुख्यमंत्र्यांच्या विजयाच्या घोषणा दिल्या. सामाजिक कार्यकर्ते प्रसाद जाधव यांनी मुख्यमंत्र्यांना शिवप्रतिमा भेट दिली. बिंदू चौकातून रॅली आझाद चौकात आली. कॉमर्स कॉलेजवळ कौन्सिल ऑफ एज्युकेशनच्या अध्यक्षा रजनी मगदूम यांनी मुख्यमंत्र्यांचे बुके देऊन स्वागत केले. उमा टॉकीज चौकात भाजपचे कार्यकर्ते आणि महिलांनी फुलांची वृष्टी केली.
सुभाष रोडवरुन यात्रा जाताना दुतर्फा उभारलेल्या नागरिकांना मुख्यमंत्री हात उंचावून अभिवादन करत होते. गोखले कॉलेजचे प्राध्यापक, कर्मचारी आणि विद्यार्थ्यांनी यात्रेवर पुष्पवृष्टी केली. रेणुका मंदिर चौकात भाजप कार्यकर्त्यांनी स्वागत केले. मेजर ध्यानचंद हॉकी स्टेडियम चौकात खेळाडूंनी हॉकी स्टिक उंचावून मुख्यमंत्र्यांचे स्वागत केले. माजी नगरसेवक विजय साळोखे , प्रशिक्षक मोहन भांडवले यांनी मुख्यमंत्र्यांना पुष्पगुच्छ दिला. हॉकी स्टेडियम ते संभाजीनगर पेट्रोल पंप मार्गावर गणेश देसाई, भाजप गटनेते नगरसेवक विजय सूर्यवंशी यांनी स्वागत कले.
संभाजीनगर चौकात महानगर सरचिटणीस माजी नगरसेवक सुभाष रामुगडे यांच्यासह कार्यकर्त्यांनी पुष्पवृष्टी केली. त्यानंतर महायात्रा वेगाने कळंब्याकडे रवाना झाली. त्या ठिकाणी मुख्यमंत्र्यांचे जंगी स्वागत करण्यात आले. भगवे फेटे परिधान केलेल्या कार्यकर्त्यांनी मुख्यमंत्र्यांच्या विजयाच्या घोषणा दिल्या.
...
यात्रेमुळे वाहतुकीची कोंडी
महाजनादेश यात्रेमुळे शहरात वाहतुकीची कोंडी झाली होती. ताराराणी चौकातून वाहतूक धैयप्रसाद मंगल कार्यालय, उड्डाण पुलाकडे वळवण्यात आली. त्यामुळे एसटी, केएमटी बसेस ताराबाई पार्कमधील दिसेल त्या रस्त्यांवरुन मार्गक्रमण करत मध्यवर्ती बसस्थानक परिसरात जात होत्या. यात्रेच्या मार्गावरील वाहतूक थांबवण्यात आल्याने वाहनांच्या रांगा लागल्या होत्या. कळंबा येथे झालेल्या छोट्या सभेमुळे कोल्हापूर गारगोटी मार्गावर दोन्ही बाजूला वाहनांच्या रांगा लागल्या होत्या.
...
विद्युत पुरवठा खंडीत
यात्रेसाठी उभारण्यात आलेल्या रथाची उंची मोठी असल्याने विद्युत तारांचा अडथळा येण्याची शक्यता गृहित धरुन मार्गावरील विद्युत पुरवठा खंडीत करण्यात आला होता. तसेच अनेक ठिकाणी विद्युत तारा उंचावण्यात आल्या होत्या. मार्गात येणाऱ्या झाडांच्या फांद्याही छाटण्यात आल्या होत्या. चौकाचौकात वीज मंडळाचे वायरमन आणि अधिकारी उपस्थित होते.
...
फलकावर महाडिकांचा फोटो
मुख्यमंत्र्यांच्या स्वागतासाठी चौकाचौकात फलक लावण्यात आले होते. फलकावर मुख्यमंत्र्यासह पालकमंत्र्यांचे फोटो होते. ध्यानचंद हॉकी स्टेडियम येथे लावण्यात आलेल्या फलकावर माजी आमदार महादेवराव महाडिक यांचा फोटो होता. नगरसेविका सविता घोरपडे आणि माजी नगरसेवक सतीश घोरपडेंनी हा फलक उभारला होता.
...
यात्रेकडे खासदार संभाजीराजेंची पाठ
महाजनादेश यात्रेकडे राज्यसभा खासदार संभाजीराजे यांनी पाठ फिरवली आहे. संभाजीराजे हे राज्यसभेवर नियुक्त असले तरी ते भाजपचे सहयोगी सदस्य आहेत. विधानसभा निवडणुकीसाठी मुख्यमंत्र्यांनी रणशिंग फुंकले असतानाही संभाजीराजे कोणत्याही कार्यक्रमात उपस्थित राहिले नसल्याबद्दल आश्चर्य व्यक्त केले जात आहे. दरम्यान, संभाजीराजे हे छत्रपती घराण्यातील असल्याने प्रचार,सभा यांचे बंधन त्यांच्यावर घातलेले नाही. त्यामुळे मुख्यमंत्र्यांच्या दौऱ्यात त्यांनी उपस्थित रहावे, असे पक्षाकडून कोणतेही बंधन नसल्याचे पदाधिकाऱ्यांनी सांगितले.
