म. टा. प्रतिनिधी, कोल्हापूर

श्री शाहू मार्केट यार्ड येथे आवक झालेल्या नवीन गुळाचे सौदे काढण्यात आले. सौद्यामध्ये सर्वात कमी दर प्रतिक्विंटल ३३०० रुपये तर सर्वोच्च दर ६५०१ रुपये मिळाला. कोल्हापूर आणि पुणे जिल्ह्यातून गूळ सौद्यासाठी आला होता.

कोल्हापूर शेती उत्पन्न बाजार समितीने गुरुवारी नवीन गुळाचा सौदा गौरी पूजनाच्या मुहूर्तावर काढण्यात आला. बी. के. अतितकर यांच्या अडत दुकानात कागल तालुक्यातील व्हनाळी गावातील तानाजी जाधव व सागर जाधव यांच्या तर भैरवनाथ अडत दुकानात पुणे जिल्ह्यातील हवेली तालुक्यातील कुंजीरवाडी येथील दत्तात्रय सावंत या उत्पादकांच्या गुळाची आवक झाली. सकाळी दहा वाजता जिल्हा उपनिबंधक अमर शिंदे यांच्या हस्ते आणि बाजार समितीचे सभापती बाबासाहेब लाड, उपसभापती संगीता पाटील यांच्या प्रमुख उपस्थितीत सौदा काढण्यात आला.

पहिल्याच सौद्यात व्यापारी अतुल शहा यांनी १० किलोचे ५१ रवे प्रतक्विंटल ६५०१ रुपये दर देऊन खरेदी केला. यावेळी समिती सदस्य कृष्णात पाटील, अमित कांबळे, सर्जेराव पाटील, नंदकुमार वळंजू, सदानंद कोरगांवकर, दशरथ माने, उदयसिंह पाटील, आशालता पाटील, शेखर येडगे, संजय जाधव, शशिकांत आडनाईक, नेताजी पाटील, बाबूराव खोत, किरण पाटील आदी उपस्थित होते. सचिव मोहन सालपे यांनी स्वागत केले तर नानासो पाटील यांनी प्रास्ताविक केले. सरदार पाटील यांनी आभार मानले.

म. टा. प्रतिनिधी, कोल्हापूर

कडकनाथ कोंबडी पालन व्यवसायाचे आमिष दाखवून सुमारे चार कोटींची फसवणूक करणाऱ्या महारयत अ‍ॅग्रो कंपनीच्या विरोधात बुधवारपर्यंत २३० अर्ज दाखल झाले आहेत. तालुका स्तरावरही एकत्र अर्ज गोळा करण्याचे काम सुरु आहे. त्यासह हातकणंगले, राधानगरी, मुरगूड, गारगोटी परिसरातील २५० गुंतवणूकदार शुक्रवारी (ता. ६) आर्थिक गुन्हे अन्वेषण शाखेकडे तक्रार करणार आहेत. फसवणुकीचा जिल्ह्यातील आकडा १४ कोटीपर्यंत जाण्याची शक्यता आहे.

शाहूपुरी पोलिसांनी हे प्रकरण आर्थिक गुन्हे अन्वेषण शाखेकडे वर्ग केले आहे. बुधवारी या कंपनीच्या विरोधात २३० अर्ज दाखल झाले आहेत. त्यासह फसवणुकीची व्याप्ती मोठी असल्याने गुंतवणूकदारांनी तालुकास्तरावर अर्ज गोळा करण्याचे काम सुरु केले आहे. मुख्य तक्रारदार विजय आमते यांच्याकडे हातकणंगले, राधानगरी, मुरगूड, गारगोटी परिसरातील २५० गुंतवणूकादारांनी तक्रार केल्या आहेत. यामध्ये तक्रारदारांचे गाव, नाव, प्रकल्प, गुंतवणूक केलेली रक्कम आणि फसवणूक झालेल्या रक्कमेचा डेटा एकत्रित केला आहे. या सर्वांच्या तक्रारी एकत्रित केल्या असून गुन्हे अन्वेषण शाखेकडे शुक्रवारी दुपारी जमा केल्या जाणार आहेत. त्यासाठी आर्थिक गुन्हे अन्वेषण शाखेच्या पोलिस उपअधीक्षक पद्मा कदम यांची भेट घेणार आहेत. महारयत अ‍ॅग्रो कंपनीचा अध्यक्ष संशयित सुधीर शंकर मोहिते आणि संदीप सुभाष मोहिते (दोघेही रा. इस्लामपूर, जि. सांगली) यांच्यावर शाहूपुरी पोलिस ठाण्यात फसवणुकीचा गुन्हा दाखल आहे.

...

कोल्हापूर पोलिस

घेणार लवकरच ताबा

कंपनीचा संचालक संशयित संदीप मोहिते व हणमंत शंकर जगदाळे (रा. अंबक-चिंचणी, ता. कडेगाव, जि. सांगली) यांना ११ सप्टेंबरपर्यंत पोलिस कोठडी सुनावली आहे. त्यांच्या पोलिस कोठडीत दोन दिवसांची वाढ झाली आहे. त्यांची पोलिस कोठडी संपल्यानंतर मोहितेचा ताबा घेण्यासाठी कोल्हापूर पोलिस इस्लामपूर कोर्टाकडे अर्ज करणार आहेत. संशयित ताब्यात मिळाल्यानंतर त्यांच्याकडे केल्या जाणाऱ्या चौकशीत गुंतवणूक केलेल्या रक्कमेचा तपशील कळेल, असे उपअधीक्षक पद्मा कदम यांनी सांगितले.

म. टा. प्रतिनिधी, कोल्हापूर

'फिक्स मानधन'साठी आशा कर्मचारी व गटप्रवर्तकांनी सलग तिसऱ्या दिवशी जिल्हा परिषदेसमोर धरणे आंदोलन केले. गुरुवारी भर पावसात आंदोलकांनी जिल्हा परिषदेच्या प्रवेशद्वारासमोर ठिय्या मारला. जोरदार घोषणेबाजी करत त्यांनी परिसर दणाणून सोडला. कोल्हापूर जिल्हा आशा वर्कर्स व गटप्रवर्तक युनियनच्या अध्यक्षा नेत्रदिपा पाटील, उज्ज्वला पाटील, संगीता पाटील आदींच्या नेतृत्वाखाली आंदोलन सुरू आहे. आशा कर्मचाऱ्यांना दरमहा १० हजार आणि गट प्रवर्तकांना १५ हजार रुपये मानधन मिळावे, ही प्रमुख मागणी आहे. गुरुवारी दुपारी १२ ते तीन या वेळेत आंदोलन झाले. आंदोलनात स्मिता कुलकर्णी, विमल अतिग्रे, मंदाकिनी कोडक, दीपा बुरुड, राधिका घाटगे, शर्मिला काशीद, पूनम माळी आदींचा समावेश होता. दरम्यान शुक्रवार ते रविवार या कालावधीत आंदोलन होणार नाही. सोमवारपासून (ता. ९) पुन्हा चक्री उपोषण सुरू राहील असे संघटनेने म्हटले आहे.

म. टा. प्रतिनिधी, कोल्हापूर

गणेशोत्सवामुळे सर्वत्र भक्तिमय वातावरण आहे. पावसाची रिपरिप कायम असूनही सार्वजनिक गणेशोत्सव मंडळाच्यावतीने सजीव देखावे आणि तांत्रिक देखाव्यांची तयारी सुरु आहे. काही सार्वजनिक मंडळांनी गणेशभक्तांसाठी देखावे खुले केले आहेत. यंदा प्रबोधनात्मक देखाव्यांवर भर दिला जात असून महापुरावर भाष्य करणारे देखावे साकारले आहेत.

आकर्षक आणि कलात्मक गणेशमूर्तींबरोबर सामाजिक संदेश देणारे देखावे सादर करण्याकडे सार्वजनिक मंडळांनी अधिक लक्ष दिले आहे. यंदा उद्भवलेल्या महापुराने सर्वाधिक नुकसान झाले. आपत्कालीन परिस्थितीत कोल्हापूरवासियांनी एकत्र येत महापुराचा केलेला सामना देखाव्यांच्या माध्यमातून सादर करण्यात आला आहे. तोरस्कर चौकातील गणेश नुक्कड मित्रमंडळाने 'पुन्हा नव्यानं कोल्हापूर उभा राहतंय'असा संदेश देणारा तांत्रिक देखावा साकारला आहे. याद्वारे पुरामुळे शहरात विविध भागात झालेले नुकसान दाखवण्यात आले आहे. यामध्ये बुधवार पेठ, पंचगंगा नदी परिसर, तावडे हॉटेल येथील महापुराची परिस्थिती दाखवण्यात आली आहे. पूरपरिस्थितीकडे छत्रीतून गणराया पाहत असल्याचे देखाव्यात दिसते.

शनिवार पेठेतील अष्टविनायक ग्रुपच्यावतीने 'पंचगंगा कोपली माणुसकी धावली'असे फलक लावून पूरपरिस्थितीत कोल्हापूरवासीयांनी दाखवलेल्या मनोधैर्याचा संदेश पोचवण्यात येत आहे. तोरस्कर चौकातील सोल्जर ग्रुप मित्र मंडळाच्या वतीने महाड येथे वाहून गेलेल्या सावित्री पुलाची प्रतिकृती, भारतीय जवानांचे मदत कार्य असा विषय घेऊन पुरातील आपत्ती व्यवस्थापनावर आधारित तांत्रिक देखावा उभा केला आहे. तसेच पूरपरिस्थितीत कशाप्रकारे मदत करावी याबाबतची माहिती डिजिटल फलकांच्या माध्यमातून देण्यात आली आहे. याबरोबरच शिवाजी पेठ, मंगळवार पेठ, शाहूपुरी येथील मंडळांनी फलकांच्या माध्यमातून पुराची दाहकता मांडण्याचा प्रयत्न केला आहे. आपत्ती व्यवस्थापन, मदत कार्य, मानवी अतिक्रमणे, निसर्गाचा असमतोल, ग्लोबल वॉर्मिंग, आरोग्याचे प्रश्न, भ्रष्टाचार, महिला सबलीकरण, वाढती गुन्हेगारी अशा विविध विषयांवर देखावे उभारून मंडळांनी प्रबोधनाचा वारसा जपला आहे.

फोटो

म. टा. प्रतिनिधी, कोल्हापूर

महापुरातील प्रलयाच्या कटू आठवणीनंतर शहरवासिय गणेशोत्सव साजरा करत असताना सलग दोन दिवस सुरु असलेल्या संततधार पावसाने नागरिकांत महापुराच्या आठवणीने पुन्हा भितीचे सावट पसरले आहे. प्रशासनाने नदीकाठच्या गावांना सतर्कतेचा इशारा दिला असतानाच शहरातील जयंती नाल्याची पाणी पातळी वाढल्याने सुतारवाडा, शाहूपुरी कुंभार गल्लीत नागरिकांकडून खबरदारी घेण्यात येत आहे. गुरुवारी रात्री नऊ वाजता राजाराम बंधाऱ्यावर पाण्याची पातळी ३० फूट ५ इंच इतकी होती. या बंधाऱ्याची इशारा पातळी ३९ फूट असून धोका पातळी ४२ फूट आहे.

गणेश चतुर्थीपासून पंधरा दिवसांच्या विश्रांतीनंतर पुन्हा दमदार पावसास सुरु झाली असून सलग तीन दिवस पावसाची संततधार सुरू आहे. त्यामुळे जनजीवन विस्कळीत झाले आहे. मंगळवारी रात्रीपासून पावसाने जोर धरला असून धरणातून पाण्याचा विसर्ग सुरु झाला आहे. बुधवारी राधानगरी धरणाचे दोन स्वयंचलित दरवाजे सुरु झाल्यानंतर शहरवासियांकडून काळजी व्यक्त होऊ लागली. गुरुवारी दिवसभर पावसाची संततधार कायम होती. दुपारनंतर पावसाच्या दमदार सरी कोसळू लागल्या. त्यातच राधानगरी धरणाचे पाच दरवाजे उघडल्याने आठ हजार ४०० क्युसेक पाण्याचा विसर्ग सुरु झाला. धरणक्षेत्रात अतिवृष्टी झाल्याने पंचगंगा नदी पाणी पातळीत झपाट्याने वाढ झाली. दुपारी एक वाजण्याच्या सुमारास पाणी सलग तिसऱ्यांदा पात्राबाहेर पडले.

ऑगस्ट महिन्यात महापुराचा सर्वाधिक फटका शहरातील शाहूपुरी कुंभार गल्ली आणि सुतारवाड्याला बसला होता. जयंती नाल्याच्या पाण्याची पातळी वाढल्याने शाहूपुरी कुंभार गल्लीतील नागरिकांना चिंता सतावू लागली आहे. चिखली, आंबेवाडी गावातही भितीचे वातावरण पसरले आहे. त्यातच जिल्हा प्रशासनाने नदीकाठच्या गावांना सतर्कतेचा इशारा दिला असून पाणी पातळी वाढली तर नागरिकांना सुरक्षितस्थळी नेण्यासंदर्भात जिल्हाधिकारी दौलत देसाई यांनी सूचना दिल्या आहेत. मंगळवारी नऊ तारखेपर्यंत पाऊस कायम राहण्याचा इशारा हवामान खात्याने दिला आहे.

पावसाच्या रिपरिपीमुळे शहरातील गौरी गणपती सणावर चांगल्याच मर्यादा आल्या. एरव्ही भरजरी साड्या आणि नटून थटून गौरी नेण्यासाठी आलेल्या महिलांची गर्दी पंचगंगेवर कमी जाणवली. वाजतगाजत गौरी आगमनाच्या मिरवणुकाही आवरत्या घेण्यात आल्या. सार्वजनिक मंडळाकडून प्रतिष्ठापना करण्यात आलेल्या गणेश मूर्तींच्या सुरक्षिततेसाठी मंडळांकडून प्लास्टिक कागद, पत्रे लावण्यात आले. पंचगंगेचे पाणी पात्राबाहेर गेल्याने शनिवारी होणाऱ्या घरगुती गणपती गौरी विसर्जनावर परिणाम होण्याची शक्यता आहे.

...

धरणक्षेत्र पडलेला पाऊस मि.मी.

राधानगरी १३८

तुळशी ९३

कासारी १६६

कडवी ८२

कुंभी १७१

पाटगाव १४०

चित्री ९५

घटप्रभा १३२

कोदे १५६

म. टा. प्रतिनिधी, पुणे

शहर आणि परिसरात गुरुवारी पावसाच्या हलक्या किंवा तुरळक सरींनी हजेरी लावली. दिवसभर वातावरण ढगाळ राहिले असले तरी शहरात जोरदार पाऊस झाला नाही. पुढील दोन दिवस पुण्यात हलक्या ते मध्यम पावसाची शक्यता वर्तविण्यात आली आहे. तर राज्यात सर्वत्र पावसाची शक्यता आहे.

शहरात गुरुवारी रात्री साडेआठपर्यंत ०.७ मिलिमीटर पावसाची नोंद झाली. बुधवारी रात्रीपासूनच पावसाचा जोर कमी झाला होता. गुरुवारी हवामान ढगाळ होते. मात्र, काही ठिकाणी झालेला हलका शिडकावा वगळता कोठेही जोरदार पाऊस झाला नाही. रात्री साडेनऊनंतर पुन्हा पावसाच्या हलक्या सरींनी हजेरी लावली.

गुरुवारी सकाळी साडेआठ ते सायंकाळी साडेपाच या वेळेत राज्यातील सर्वाधिक पावसाची नोंद महाबळेश्वर येथे (५१ मिमी) झाली. विदर्भातील अमरावती येथे २६ मिमी, रत्नागिरी येथे २४ मिमी, मुंबई येथे ८, कोल्हापूर येथे ७, सातारा येथे एक मिमी पावसाची नोंद झाली.

पुढील दोन दिवसात राज्यात कोकण विदर्भात बहुतांश ठिकाणी पावसाची शक्यता आहे. तर मध्य महाराष्ट्र व मराठवाड्यात बऱ्याच ठिकाणी पावसाची शक्यता आहे. मुंबईत अधूनमधून पावसाच्या सरींची तर मधूनच मुसळधार पावसाची शक्यताही वर्तविण्यात आली आहे.

कोल्हापूर टाइम्स टीम

एकीकडे प्लास्टिक बंदीसाठी केंद्र आणि राज्य सरकारकडून जोरदार घोषणाबाजी होत असताना ऐन गणेशोत्सव काळात घराघरांत १५ ते २० छोट्या-मोठ्या प्लास्टिक बॅगचे घरात आगमन झाले आहे. त्यामुळे ओल्याबरोबर सुक्या कचऱ्याचे प्रमाण घरोघरी वाढले आहे.

घरोघरी गणेशोत्सवाची धामधूम सुरू असून, बाजारपेठेत खरेदीची धूम सुरू आहे. प्रसाद, फुले, पूजेचे साहित्य खरेदी केल्यानंतर प्रत्येक घरात प्लास्टिकच्या १५ ते २० पिशव्या आल्या आहेत. या पिशव्या कमी मायक्रॉनच्या असल्याने धोका वाढला आहे. काही उत्पादकांनी जास्त मायक्रॉनच्या पिशव्या उपलब्ध करून दिल्या असल्या तरी घरोघरी प्लास्टिक कचऱ्याचे ढीग साचू लागले आहेत. कापूस, वाती, पौते या वस्तू कमी मायक्रॉनच्या पिशव्यांतून विक्री होत आहे. उदबत्ती, धूपबत्तीसाठी कमी मायक्रॉनची तर कापरासाठी जाड प्लास्टिक पिशवीचा वापर केला जात आहे. फूल आणि फळे विक्रेत्यांकडून थेट कमी मायक्रॉनच्या कॅरिबॅग्जचा वापर होत आहे. जर्बेरा फुलाच्या विक्रीसाठी फूल आणि देठाच्यामध्ये प्लास्टिकची छोटी बॅग्ज लावली जात आहे. हळद-कुंकू, अष्टगंध, बुक्का, गुलाल यासाठी कमी मायक्रॉनच्या प्लास्टिक पिशव्यांचा सर्रास वापर होत आहे. हल्ली अत्तराच्या फायावरही छोटी प्लास्टिक पिशवी गुंडाळून दिल्याचे चित्र बाजारात पाहायला मिळाले.

त्याचबरोबर प्लास्टिक प्लेट, प्लास्टिक कव्हरच्या पत्रावळ्या, द्रोण, प्लास्टिक ग्लासची विक्री जोरात सुरू आहे. सार्वजनिक मंडळांकडून महाप्रसाद आणि प्रसादासाठी या वस्तूंचा वापर सुरू आहे. वस्तू खरेदी केल्यानंतर ग्राहकांकडून कॅरिबॅग्जची मागणी होत असल्याने दुकानदारांकडून कॅरिबॅग्ज उपलब्ध करुन दिल्या जात आहेत. गणेशचतुर्थीच्या आदल्या दिवशी महापालिकेच्या आरोग्य विभागाकडून बाजारगेट परिसरातील दुकानदारांवर दंडात्मक कारवाई करण्यात आली. या कारवाईच्या फार्सनंतर पुन्हा प्लास्टिक बॅग्ज आणि बंदी असलेल्या वस्तूंची विक्री सुरू आहे. त्याचा फटका प्लास्टिक बंदीच्या घोषणेला होत आहे.

०००००

कचऱ्याच्या वर्गीकरणाला हरताळ

महापालिकेकडून घरोघरी टिपर आणि घंटागाडीतून कचरा गोळा केला जातो. टिपरमध्ये ओला आणि सुका कचरा वेगळा करण्याचे विभाग वेगळे असतानाही महापालिकेकडून ओला आणि सुका कचरा एकत्र गोळा केला जात आहे. महापालिकेची होणारी कृती म्हणजे कचरा वर्गीकरणाच्या घोषणेला हरताळ फासणारी ठरली आहे.

०००

फोटो

म. टा. प्रतिनिधी, कोल्हापूर

शहर, परिसर आणि जिल्ह्यात शुक्रवारी दिवसभर पावसाची संततधार कायम राहिली. त्यामुळे जनजीवन विस्कळित झाले. गेल्या महिन्यात याच दिवशी मुसळधार पाऊस आणि महापुराच्या रौद्र रूपाच्या आठवणीने अनेकांच्या ह्रदयात धडकी भरली. तळकोकण आणि सर्वच धरणक्षेत्रांत अतीवृष्टी असल्याने दिवसभरात राजाराम बंधाऱ्यावर तब्बल चार फुट पाणी वाढले. सायंकाळी सात वाजेपर्यंत ३४ फुट ७ इंच पाणी राहिले. यामुळे महिन्यानंतर पुन्हा पुराचा धोका निर्माण झाला आहे.

दोन दिवसांपासून पावसाचा जोर वाढला आहे. सकाळपासून जोरदार सरींवर सरी कोसळत आहेत. यामुळे शहरातील सर्वच सखल भागात पाणी तुंबून राहिले आहे. गेल्या महिन्यात महापुराचे पाणी आलेल्या रमणमळा, नाईक मळा, पुंगावकर मळा, माळी मळा, शाहूपुरी कुंभार गल्ली, गवत मंडई, बुद्ध गार्डननजीकचा परिसर, रिलायन्स मॉल, गाडी अड्डा, जिल्हाधिकारी कार्यालय परिसर, केव्हीजी पार्क परिसर, सुतार वाडा, कोंडाओळ, महावीर कॉलेज, डायमंड हॉस्पिटल, विन्स हॉस्पिटल, नागाळा पार्क परिसर, खानविलकर पेट्रोल पंप परिसर, सिध्दार्थनगर, सीता कॉलनी, जुना बुधवार पेठ, शुक्रवार पेठ, पंचगंगा तालीम, मस्कुती तलाव, दुधाळी मैदान परिसर, उत्तरेश्वर गवत मंडई, लक्षतीर्थ वसाहत, लक्षतीर्थ वसाहत परिसर, कसबा बावडा परिसरात प्रचंड दलदल निर्माण झाली आहे. यासह महापुराचे पाणी आलेल्या सर्वच अपार्टमेंटमधील कुटुंबांच्या नजरा दिवसभर पंचगंगा नदीच्या पाणी पातळीकडे लागून राहिल्या. पावसामुळे सार्वजनिक गणेश मंडळाच्या कार्यकर्त्यांची तारांबळ उडाली. पाऊस आणि हवेतील गारव्यामुळे गणेश दर्शनाकडे भक्तांनी पाठ फिरवल्याचे दिसत होते.

राधानगरी धरणाच्या चार स्वयंचलित दरवाज्यांमधून ७११२ क्युसेक पाण्याचा विसर्ग सुरु आहे. यामुळे पंचगंगा नदीच्या पाणी पातळीत वाढच होत आहे. येथील घाटाजवळील रस्त्यावर नदीतील पाणी आले. यामुळे शनिवारी येथे गणेश विसर्जन करणे धोकायदायक आहे. विसर्जन किंवा मूर्ती दान करतानाही गणेशभक्तांची अडचण होणार आहे. जिल्ह्यातील सर्वच नद्यांचे पाणी पात्राबाहेर पडले आहे. एकूण ५३ बंधारे पाण्याखाली गेले आहेत. पंचगंगा नदीवरील राजाराम, सुर्वे, रूई, इचलकरंजी, तेरवाड, शिरोळ, शिंगणापूर तर भोगावती नदीवरील राशिवडे, हळदी, सरकारी कोगे, खडक कोगे, शिरगाव आणि तुळशी नदीवरील बीड, आरे, बाचणी, कुंभी नदीवरील कातळी, सांगशी, शेणवडे, कळे, मांडुकली, वतवडे तर कासारी नदीवरील यवलूज, ठाणे आवळे, पुनाळ, तिरपण, वालोली, बाजारभोगाव व करंजफेण, धामणी नदीवरील सुळे, आंबर्डे, वारणा नदीवरील चिंचोली, माणगांव, दानोळी, मांगले सावर्डे, कोडोली, चावरे, तांदूळवाडी, शिरगाव, खोची, दुधगंगा नदीवरील दत्तवाड, सिंध्दनेर्ली, सुळकुड, बाचणी, सुळंबी, तुरंबे, वाळवा, वेदगंगा नदीवरील गारगोटी, म्हसवे, निळपण, वाघापूर, शेळोली, कुरणी, बस्तवडे, सुरुपली बंधारे पाण्याखाली आहेत. बंधाऱ्यावरील वाहतूक पर्यायी मार्गाने सुरू आहे. चंदगड तालुक्यातील तिलारी घाटामध्ये ३० मीटर लांबीचा रस्ता खचून वाहून गेला आहे. हा रस्ता वाहतुकीस बंद आहे. या मार्गावरील वाहतूक आजरा, अंबोली, सावंतवाडी मार्गे सुरु आहे. इचलकरंजी जुन्या पुलावर पाणी आल्याने या मार्गावरील वाहतूक पंचगंगा नदीवरील मोठ्या पुलावरून सुरू आहे.

...

चौकट

सायंकाळी चारपर्यंत

मूर्तीदान करण्याचे आवाहन

हवामान विभागाने कोल्हापूर जिल्ह्यात आज, शनिवारी अतिवृष्टीचा इशारा दिला आहे. पावसाची संततधार कायम आहे. नदीकाठावरील पाण्यात रात्री उशिरापर्यंत गणेश मूर्ती विसर्जन करणे धोकादायक आहे. यामुळे पंचगंगा नदी, कळंबा, रंकाळा, कोटीतीर्थ तलाव येथे सायंकाळी चार वाजेपर्यंत घरगुती गणेश मूर्ती दान करावे, असे आवाहन महानगरपालिका, पोलिस प्रशासन, जिल्हा प्रशासनाने प्रसिध्दी पत्रकातून केले.

...

प्रमुख धरणांतील विसर्ग क्युसेकमध्ये असा :

राधानगरी : ७११२, वारणा : १४८५१, तुळसी : १५२१, कुंभी : १५५०, कासारी : ९५०, दुधगंगा : १३२००, कोयना : ४१५१४, वारणा- १४८५१, तुळसी- १५२१, कुंभी-१५५०, दूधगंगा-१३२००, कोयना- ४१५१४, अलमट्टी : १८५०००

...

कोल्हापूर - गगनबावडा रस्ता बंद

मांडुकली बंधाऱ्यावर पाणी आल्याने कोल्हापूर - गगनबावडा रस्ता वाहतुकीस बंद करण्यात आला आहे. यामुळे गगनबावडा मार्गे कोकणातील वाहतूक बंद झाली आहे. यासह जिल्ह्यातील ४ राज्य आणि १३ प्रमुख जिल्हा मार्ग बंद झाले आहेत, अशी माहिती सार्वजनिक बांधकाम विभागाचे अधीक्षक अभियंता संभाजी माने यांनी दिली.

कोयनेतून विसर्ग कमी झाला

कराड

कोयना धरणाच्या पाणलोट क्षेत्रात शुक्रवारी पावसाचा जोर काहीसा कमी झाला होता. त्यामुळे कोयना धरणाचे सहाही वक्र दरवाजे आठ फुटांवरून साडेचार फुटांवर आणण्यात आले. धरणात येणाऱ्या पाण्याचे प्रमाणही कमी झाले आहे.या शिवाय पाणीसाठ्यातही अपेक्षित घट झाल्याने दरवाजे शुक्रवारी दुपारी कमी करून पूर्वेकडे कोयना नदीपात्रात सोडण्यात येणारा विसर्ग ७० हजार क्युसेकवरून ४१ हजार क्युसेकपर्यंत कमी करण्यात आला आहे. सध्या सहाही वक्र दरवाजांतून विनावापर ३९ हजार ४१४ तर पायथा वीजगृहातून वीजनिर्मिती करून २१००, असे एकूण ४१ हजार ५१४ क्युसेकने विसर्ग कोयना नदीपात्रात सोडण्यात येत आहे. धरणांत ६१ हजार ५७६ क्युसेकने पाण्याची आवक होत आहे.

..............

महसूल कर्मचाऱ्यांचा संप सुरूच

सांगली

सांगली, मिरज, कराड आणि साताऱ्यात महसूल विभागाच्या कर्मचाऱ्यांचा बेमुदत संप सुरू आहे. राज्यातील महसूल कर्मचाऱ्यांच्या मागण्या अंशत: मंजूर होऊनही अद्याप सरकारने आदेश काढला नाही. सरकारने दिलेल्या अश्वासनांची पूर्तता न केल्याने महसूल अधिकारी व कर्मचाऱ्यांनी बेमुदत संप पुकारला आहे. कराड तहसीलदार कार्यालयात कर्मचाऱ्यांविना शुकशुकाट आहे.

सातारा भूषण पुरस्कार

'क्विक हील'च्या संस्थापकांना जाहीर

सातारा :

रा. ना. गोडबोले सार्वजनिक ट्रस्ट व सातारकर नागरिकांच्या वतीने दर वर्षी दिला जाणारा मानाचा सन २०१९चा सातारा भूषण पुरस्कार 'क्विक हील' कंपनीचे संस्थापक डॉ. कैलाश व डॉ. संजय काटकर या बंधूंना जाहीर झाला आहे.

काटकर यांचे मूळ गाव सातारा जिल्ह्याच्या खटाव तालुक्यातील ललगुण असून, ज्येष्ठ कैलाश बंधू यांनी पुण्यात शालेय शिक्षण घेतानाच जिद्दीने स्वता:चे छोटे इलेक्ट्रिक वर्कशॉप सुरू केले. चिकाटीच्या जोरावर आयटी सिक्युरिटी क्षेत्रात पदार्पण केले. दरम्यान, संगणक क्षेत्रातील पदव्युत्तर शिक्षण पूर्ण करून धाकटे बंधू डॉ. संजय यांनी ही त्यांना मदत केली. १९९५साली कंपनीने आपले उत्पादन करून मार्केटिंगला प्रारंभ केला. आज १२०० हून जास्त स्टाफ, भारतातभर पसरलेल्या अनेक शाखा, अमेरिका, दुबई, जपान, आफ्रिका या देशांतील शाखा व अभियंते यांच्या माध्यमातून क्विक हील टेक्नोलोजी कोट्यवधी ग्राहकांची आणि मोठ्या कंपन्यांची सेवा करीत आहे. या कार्याची दखल घेऊन त्यांना सातारा भूषण पुरस्कार जाहीर करण्यात आला आहे.

२५००० हजार रुपये रोख व सन्मानपत्र, असे या पुरस्काराचे स्वरूप असून, पुरस्कार दिवाळी नंतर समारंभपूर्वक प्रदान केला जाणार आहे, अशी माहिती ट्रस्टचे अध्यक्ष अरुण गोडबोले यांनी दिली आहे.

Gurubal.Mali@timesgroup.com

@gurubalmaliMT

कोल्हापूर : सातत्याने पाठपुरावा आणि इशारा देऊनही महाराष्ट्र सरकारने औद्योगिक वीज बिलाबाबत दुर्लक्ष करण्याचीच भूमिका घेतल्याने अखेर पश्चिम महाराष्ट्रातील उद्योजकांनी कर्नाटकात विस्तार करण्याचा निर्णय घेतला. शंभरावर बडे उद्योजक कर्नाटकची ही ऑफर स्वीकारून बुधवारी बेळगावला जाणार आहेत. येथे त्यांच्यात व कर्नाटक सरकारमध्ये करार होणार आहे. एका महिन्यात उद्योजकांना जागेचा ताबा देण्यात येणार आहे. उद्योग प्रक्रियेचा श्रीगणेशा दिवाळीलाच करण्यासाठी तातडीने हालचाली सुरू करण्यात आल्या आहेत.

राज्यातील औद्योगिक वीज दर कमी करावेत, यासाठी गेले सहा ते सात वर्षे उद्योजक प्रयत्नशील आहेत. मागेल त्याला प्लॉट, सुविधा द्याव्यात यासाठी लढा सुरू आहे. पण सरकार बदलले तरी धोरण बदलले नाही. त्यामुळे विजेचे दर कमी करा अन्यथा कर्नाटकात स्थलांतर करू, असा इशाराही उद्योजकांनी अनेकदा दिला. तरीही सरकारने गांभीर्य दाखवले नाही. त्यामुळे स्थलांतराचा निर्णय घेऊन गेले काही महिने हालचाली सुरू केल्या. त्याला आता मुहूर्त सापडला. कर्नाटक सरकारकडे 'गोशिमा'चे पदाधिकारी पाठपुरावा करत होते. त्याला यश मिळाले. राष्ट्रीय महामार्गावरील कणंगला इंडस्ट्रीयल इस्टेटमध्ये या उद्योजकांना स्वस्तात प्लॉट, कमी दरात वीज आणि केवळ चार टक्के दराने कर्ज देण्यास कर्नाटकने मान्यता दिली आहे. काही दिवसांपूर्वी कर्नाटक सरकारच्या प्रतिनिधीने कोल्हापुरात येऊन उद्योजकांशी चर्चा केली. त्याने दिलेल्या प्रस्तावास सरकारने मान्यता दिल्यानंतर पुढील प्रक्रियेला वेग आला.

येत्या ११ सप्टेंबरला बेळगावात उद्योगमंत्री जगदीश शेट्टर यांच्यासमवेत महाराष्ट्रातील उद्योजकांची बैठक होणार आहे. त्यासाठी कोल्हापूर, सांगली, साताऱ्यासह नाशिकमधील शंभरावर बडे उद्योजक जाणार आहेत. मागेल त्याला आणि हवी तेवढी जागा देण्याचा शब्द सरकारने दिला आहे. यासाठी तवंदी घाट परिसरातील कणंगला येथे अठशे एकर जागा संपादित केली आहे. प्लॉटचा आराखडा तयार आहे. ही जागा कोल्हापूर व सांगलीतील उद्योजकांसाठी अतिशय सोयीची आहे. त्यामुळे तातडीने जागा ताब्यात देण्यासंदर्भात कार्यवाही करण्यात येणार आहे. त्यासाठी संबंधित सर्व अधिकाऱ्यांना बैठकीस उपस्थित राहण्याच्या सूचना दिल्या आहेत. यामुळे या बैठकीनंतर महिनाभरातच सर्व प्रक्रिया पूर्ण करण्यात येणार आहे. दिवाळीनंतर उद्योग विस्तारीकरणाला गती येणार आहे.

. . . . . . . .

दोन हजार कोटींचा फटका

मुख्यमंत्री, ऊर्जामंत्री यांना भेटूनही विजेचे दर कमी करण्याऐवजी ते वाढवण्यात आले. यामुळे सरकारच्या धोरणाला कंटाळून कर्नाटकात उद्योग विस्तार करण्याचा निर्णय घेतला. यामुळे महाराष्ट्रातील दोन हजार कोटींच्या गुंतवणुकीवर पाणी पडणार आहे. यामध्ये इचलकरंजी परिसरातील सहाशे कोटींची गुंतवणूक कर्नाटकात जाणार आहे.

.........

कर्नाटक देणार सुविधा

महाराष्ट्रापेक्षा कमी दरात वीज

कमी किमतीत जागा हवी तेवढी

उद्योग उभारणीला चार टक्के दराने कर्ज

विजेचे दर दहा वर्षे स्थिर ठेवणार

परवाना मिळवण्यासाठी 'एक खिडकी'

. .. .. .

उद्योग हा राज्याच्या विकासाचा कणा आहे. तरीही मुख्यमंत्र्यांसह राज्य सरकारच्या सर्वच प्रतिनिधींनी उद्योजकांकडे दुर्लक्ष केले. अनेकदा मागणी, आंदोलन करूनही साधी बैठकही घेतली नाही. सरकार बदलले पण, धोरण बदलले नाही. यामुळे नाइलाज म्हणून कर्नाटकात विस्तार करावा लागत आहे.

उदय दुधाणे, उद्योजक

.. .. . ...

औद्योगिक वसाहती ७

सहकारी औद्योगिक वसाहती १४

क्लस्टर ८

उद्योगांची संख्या ४५ हजार

कामगार संख्या ४ लाख

. .. . . .

औद्योगिक वसाहतींमधील भूखंड

आरेखित भूखंड ३२५९

वाटप झालेले भूखंड २९८२

शिल्लक भूखंड २७७

. .. . ..

सहकारी उद्योग

औद्योगिक वसाहतींची संख्या १४

गुंतवणूक ४ हजार कोटी रुपये

रोजगार निर्मिती ६५ हजार

.. ... ..

वस्त्रोद्योग

उद्योग १५०००

साधे यंत्रमाग १,२५०००

अत्याधुनिक यंत्रमाग ३०,०००

कामगार ४०,०००

०० ०० ०० ०० ०० ००

म. टा. प्रतिनिधी, कोल्हापूर

सरकारी कर्मचाऱ्यांना जुनी पेन्शन योजना लागू करावी, यासह विविध मागण्यांकडे लक्ष वेधण्यासाठी शुक्रवारी दुसऱ्या दिवशाही जिल्हाधिकारी कार्यालयासह जिल्ह्यातील तहसील कार्यालयांतील ६०० हून अधिक महसूल कर्मचाऱ्यांनी काम बंद आंदोलन सुरूच ठेवले. यामुळे महसूल प्रशासन थंडावले. पूरग्रस्तांना मदत वाटप, पंचनामे यासह सर्वच महसूलचे कामकाज विस्कळfत झाले. त्याची गांभीर्याने दखल घेत जिल्हाधिकारी दौलत देसाई यांनी आंदोलनात सहभागी झालेल्या कर्मचाऱ्यांचा तात्पुरता कार्यभार देण्यासाठी इतर सरकारी विभागातील कर्मचाऱ्यांना घ्यावे, अशी सूचना अस्थापन विभागाच्या तहसीलदार शीतल मुळे यांना दिल्या.

राज्य महसूल कर्मचारी संघटनेच्या येथील जिल्हा शाखेच्या नेतृत्वाखाली गुरुवारपासून सुरू असलेल्या आंदोलनात महसूल प्रशासनातील अव्वल कारकून, पदोन्नतीचे नायब तहसीलदार, शिपाई, वाहनचालक, काही मंडल अधिकारी सहभागी आहेत. जिल्हाधिकारी कार्यालयाच्या मुख्य प्रवेशव्दाराजवळ मंडप उभारून आंदोलनातील कर्मचाऱ्यांनी दुपारपर्यंत ठिय्या मारला. निवडणूक शाखेतील कर्मचारीही आंदोलनात सहभागी झाल्याने निवडणूक आयोगाकडे तातडीची माहिती पाठविण्यात अडचणी येत आहेत. जमीन, महसूलसह सर्वच विभागाचे कामकाज बंद सदृश्य राहिले. अधिकारी कक्षात आणि कार्यालय कर्मचारीविना असे चित्र दिसत आहे.

०००

तहसीलदारांना आदेश

प्रांताधिकारी, तहसीलदार कार्यालयातीलही कर्मचारी काम बंद आंदोलनात सहभागी झाल्याने तालुका पातळीवरही महसूल प्रशासन ठप्प झाले आहे. विधानसभा निवडणुकीची तयारी सुरू आहे. महापूरग्रस्तांना मदत वाटपाचे काम केले जात आहे. अशा टप्प्यात प्रशासन अधिककाळ विस्कळित राहू नये, यासाठी जिल्हाधिकारी देसाई यांनी सर्व प्रांताधिकारी, तहसीलदार यांना पर्यायी कर्मचारी घेण्याच्या सूचना दिल्या आहेत.

००००

अपार्टमेंटधारकांना मदत वाटपास ब्रेक

शहरातील पूरग्रस्त अपार्टमेंटमधील सर्व कुटुंबांना प्रत्येकी पाच हजार रुपये रोख वाटप करण्यासाठी जिल्हा प्रशासनाने तातडीने यादी तयार केली आहे. मात्र, कर्मचारी काम आंदोलनात असल्याने मदत वाटप थांबले आहे. राज्यस्तरीय आंदोलन असल्याने कामावर हजर होण्याचे आदेश अधिकाऱ्यांना देता येत नसल्याचे चित्र आहे. आंदोलन लवकर न मिटल्यास पूरग्रस्तांची मदत वाटप आचारसंहितेच्या कचाट्यात सापडण्याची शक्यता आहे.

००००

महसूलमंत्र्यांच्या जिल्ह्यातच तीव्र

गेल्या महिन्यातील महापुरामुळे शहर, करवीर, शिरोळ, कोवाड येथील अनेक कुटुंबे उघड्यावर पडली आहेत. त्यांना तातडीने अधिकाधिक सरकारी मदत मिळणे आवश्यक आहेत. मदत मिळण्यात आंदोलनामुळे व्यत्यय आला आहे. जिल्ह्याचे पालकमंत्री चंद्रकांत पाटील हेच महसूलमंत्री आहेत. त्यांच्या जिल्ह्यातील महसूल कर्मचारीच आक्रमकपणे काम बंद आंदोलन करत असल्याने महापूरग्रस्तांना आर्थिक मदत मिळण्यास विलंब होत आहे.

००००