म. टा. वृत्तसेवा, कराड
'राज्य सरकारच्या निष्काळजीपणामुळे सातारा, सांगली, कोल्हापूर जिल्ह्यात पूरस्थिती निर्माण झाली आहे. अलमट्टी धरणातून वेळीच पाणी सोडण्याची सूचना कर्नाटक सरकारला केली असती, तर मोठे नुकसान टळले असते. त्यामुळे पूरस्थितीला राज्य सरकारच जबाबदार असून, ही पूरस्थिती राष्ट्रीय आपत्ती जाहीर करावी. पूरग्रस्तांचे तातडीने पंचनामे करून त्यांना त्वरित मदत करावी,' अशी मागणी राष्ट्रवादी काँग्रेसचे नेते माजी उपमुख्यमंत्री अजित पवार यांनी शुक्रवारी केली.
अजित पवार यांनी कराड येथे पूरस्थितीची पाहणी केल्यानंतर पत्रकारांशी संवाद साधला. या वेळी आमदार बाळासाहेब पाटील, राष्ट्रवादीचे जिल्हाध्यक्ष सुनील माने, देवराज पाटील, मानसिंगराव जगदाळे आदी उपस्थित होते. मुख्यमंत्री देवेंद्र फडणवीस यांच्यावर टीका करत अजित पवार म्हणाले, 'कर्नाटकमधील कुमारस्वामींचे सरकार पाडण्यासाठी आमदारांना मुंबईमधे ठेवून त्यांच्यावर लक्ष ठेवण्यात आले. मात्र, पूरस्थिती टाळण्यासाठी कर्नाटकातील त्यांच्याच पक्षाचे मुख्यमंत्री येडीयुरप्पा यांना सूचना करून अलमट्टी धरणातून पाणी सोडण्याचे मुख्यमंत्री फडवणीस यांना का सुचले नाही? लोकांना पूरस्थितीतून बाहेर काढण्याची राजकीय इच्छाशक्ती सरकारने दाखवावी. सातारा, सांगली, कोल्हापूर जिल्ह्यात निर्माण झालेल्या पूरस्थितीबाबत राज्य सरकार गंभीर नाही. त्यांनी प्रशासनाला योग्यरितीने कामाला लावले पाहिजे. अलमट्टी धरणाच्या फुगवट्यामुळे पूरस्थिती निर्माण झाली आहे. केंद्रात, महाराष्ट्र व कर्नाटकात त्यांचे सरकार असतानाही कर्नाटकच्या मुख्यमंत्र्यांना अलमट्टी धरणातून पाणी सोडण्याबाबतच्या सूचना वेळीच झाल्या नाहीत. पूरग्रस्तांना बाहेर काढण्यासाठी 'एनडीआरएफ'ची टीम काम करत असली, तरी आणखी टीमची आवश्यकता आहे. वेळ पडल्यास सैन्य दलासही पाचारण करणे गरजेचे आहे.'
'अशा आणीबाणीच्या काळात प्रशासनाला आणखी गतीने कामाला लावण्याची जबाबदारी सरकारची आहे. पूरस्थितीमुळे पेट्रोल, डिझेल, दुध तसेच मुलभूत गरजांचा तुटवडा जाणवत आहे. पूर ओसरल्यानंतर दुर्गंधीमुळे आजार पसरण्याची जास्त शक्यता असते. त्यावर उपाययोजना म्हणून संबंधित वैद्यकीय अधिकाऱ्यांकडून, औषध कंपन्यांकडून उपचारासाठीची प्रभावी यंत्रणा उभी करणे गरजेचे आहे. यासाठी आमची राष्ट्रवादी काँग्रेसची डॉक्टर सेलची टीम काम करत आहे. सरकारने सर्व पूरग्रस्त विभागांना बोटी व लाईफ जॅकेट दिली पाहिजेत,' अशी मागणी पवार यांनी केली. तसेच, 'कराड शहरावर पुन्हा पुराचे संकट येऊ नये यासाठी दैत्यनिवारणी मंदिरापासून नवीन पुलापर्यंत गॅबियान ऐवजी आरसीसी संरक्षक भिंतीचे काम व्हावे. कराड उत्तरमधील भैरवगड येथील टाळेवाडीला दरडीचा धोका असल्याने याची तज्ञांकडून पाहून करून त्यांचे पुनर्वसन अथवा सुरक्षेबाबत उपाययोजना राज्य सरकारने करावी,' असेही ते म्हणाले.
---
राष्ट्रवादीकडून ५० लाखांची मदत
महाराष्ट्रावर पुराचे आलेले नैसर्गिक संकट नसून राज्य सरकारच्या निष्काळजीपणामुळे आले आहे. तरी पूरग्रस्तांना मदतीसाठी राष्ट्रवादी काँग्रेसकडून ५० लाखांची आर्थिक मदत जाहीर केली असून, मुख्यमंत्री सहाय्यता निधीकडे याचा धनादेश दिला जाणार आहे, असेही अजित पवार यांनी सांगितले.
.....................................................................................
जिल्हा प्रशासनाकडून मदतीचा हात
कराड : सांगली येथे पूरस्थिती बिकट असल्यामुळे सातारा जिल्हा प्रशासनाकडून सांगलीसाठी दहा बोटी देण्यात आलेल्या आहेत. तसेच, पूरग्रस्तांच्या मदतीसाठी आणखी पाच बोटी व एक 'एनडीआरएफ'ची टीमसुद्धा सांगलीला पाठविण्यात आलेली आहे. सातारा जिल्हा प्रशासनाकडून आणखी मदत देण्याचा प्रयत्न करू, अशी माहिती जिल्हाधिकारी श्वेता सिंघल यांनी दिली. 'एनडीआरएफ'ची टीम गुजरातहून पूरग्रस्तांच्या मदतीसाठी आली होती. त्यांचे वाहन बोरगाव पोलिस स्टेशन येथे बंद पडले. त्यांना एसटी बसची सुविधा उपलब्ध करून आपत्ती व्यवस्थापनासाठी जाणाऱ्या सर्व गाड्यांना जिल्हा प्रशासनाने व पोलिस विभागाने सातारा जिल्ह्यातून बाहेर पडण्यासाठी मार्ग निर्माण करून दिला असल्याचेही त्यांनी सांगितले.
-----
मदतीचे आवाहन
सातारा जिल्ह्यातील काही तालुक्यांतील पूरग्रस्तांना जिल्हा प्रशासनामार्फत दोन वेळचे जेवण, पिण्याच्या पाण्याचा पुरवठा व आरोग्य सेवेसाठी वैद्यकीय पथक तैनात करण्यात आले आहे. या पूरग्रस्तांना जिल्हावासीयांनी ब्लँकेट, धान्य, बिस्किटे यांसह जीवनावश्यक वस्तूंची मदत करावी. ग्रामपंचायत, तहसील कार्यालय, पोलिस स्टेशनमध्ये मदत जमा करावी, असे आवाहन जिल्हाधिकारी श्वेता सिंघल यांनी केले आहे. तसेच, धनादेश देऊन मदत करावयाचे असल्यास मुख्यमंत्री सहाय्यता निधी (पूर) या नावाने धनादेश द्यावा. या मदतीसाठी जिल्हा पुरवठा अधिकारी स्नेहा किसवे यांची नोडल अधिकारी म्हणून नियुक्ती करण्यात आली असून, त्यांच्याशी ०२१६२-२३४८४० या क्रमांकावर संपर्क साधावा, असेही सिंघल यांनी सांगितले.
----
तात्पुरत्या निवाऱ्याची सोय
सातारा : सातारा जिल्ह्यात ऑगस्टमध्ये झालेल्या वृष्टीमुळे पूरस्थिती, दरड कोसळणे, घरामध्ये पाणी शिरणे, घर पडणे इत्यादी कारणांमुळे जिल्ह्यातील सातारा, जावली, महाबळेश्वर व पाटण तालुक्यातील सात हजार पूरग्रस्त लोकांचे स्थलांतर करून त्यांची तात्पुरत्या निवाऱ्याची सोय करण्यात आली आहे. सातारा जिल्ह्यातील पूरग्रस्तांच्या काही अडचणी असतील, तर जिल्हा आपत्ती व्यवस्थापनाच्या ०२१६२-२३२३४९ या क्रमांकावर संपर्क साधावा. तसेच, आरोग्याच्या काही समस्या असल्यास कराड येथील नागरिकांनी ०२१६४-२२२४५९, ९८२२२७४९१५, ९४२१२६६४५४ तसेच पाटण येथील नागरिकांनी ०२३७२-२८३२६८ किंवा ९८२२४६११८८, ७७४१०९०८३७ या क्रमांकावर संपर्क साधावा, असे आवाहन करण्यात आले आहे.
