म. टा. प्रतिनिधी, कोल्हापूर

अंबाबाई तीर्थक्षेत्र विकास आराखड्यातील दर्शन मंडपाचा तिसरा प्रस्ताव करण्याच्या सूचना प्राप्त झाल्यानंतर आराखडा तयार करण्यास महापालिका प्रशासनाकडून सुरुवात झाली. सोमवारी अलंकार हॉटेल शेजारच्या जागेची मोजमापे घेण्यात आली. दोन दिवसांत मंडपाचा नवा आराखडा तयार करण्यात येणार आहे.

तीर्थक्षेत्र विकास आराखड्यातील दर्शन मंडपासाठी राज्य सरकारकडून निधी मिळाला आहे. सुरुवातीस विद्यापीठ हायस्कूल व त्यानंतर शिंदे यांच्या मालकीच्या जागेवर दर्शन मंडप करण्याचा प्रस्ताव तयार करण्यात आला. विद्यापीठ हायस्कूलसमोरील मंडपामुळे मंदिराचे शिखर दिसणार नसल्याने प्रस्तावाबाबत अनिश्चितता निर्माण झाली. त्याचवेळी हायस्कूलसमोरील शिंदे यांच्या जागेत करण्याचा प्रस्तावही समोर आला. आराखड्यात बदल होणार असल्याने खुद्द पालकमंत्री चंद्रकांत पाटील यांनी जिल्हाधिकारी कार्यालयात झालेल्या बैठकीत नाराजी व्यक्त केली होती. बैठकीतच त्यांनी नव्या जागांची पाहणी करण्याच्या सूचना दिल्या होत्या.

रविवारी पालकमंत्री पाटील यांच्यासह जिल्हाधिकारी दौलत देसाई, आयुक्त डॉ. मल्लिनाथ कलशेट्टी, पश्चिम महाराष्ट्र देवस्थान समितीचे अध्यक्ष महेश जाधव यांच्या उपस्थितीत तिनही जागांची पाहणी केली. पूर्वीच्या दोन्ही प्रस्तावांना होणारा विरोध आणि तांत्रिक अडचणींमुळे नवीन प्रस्ताव तयार करण्याच्या सूचना पालकमंत्र्यांनी महापालिका प्रशासनाला केल्या होत्या. त्यानुसार शहर अभियंता नेत्रदीप सरनोबत यांनी दर्शन मंडपाला लागणाऱ्या जागेची मोजमापे घेतली. दोन दिवसांत दर्शन मंडपाचा आराखडा तयार करण्यात येणार आहे. जिल्हाधिकारी, आयुक्त व पश्चिम महाराष्ट्र देवस्थान समितीला आराखडा दाखवला जाईल. त्यानंतरच दर्शन मंडपाच्या आराखड्यावर शिक्कामोर्तब होईल.

म. टा. प्रतिनिधी, कोल्हापूर

भारतीय जनता पक्षाचे प्रदेशाध्यक्ष म्हणून चंद्रकांत पाटील यांनी सूत्रे स्वीकारल्यानंतर अन्य पक्षांतील नेत्यांच्या भाजप प्रवेशाला वेग आला आहे. माजी मंत्री भरमू सुबराव पाटील यांच्यानंतर येत्या दहा दिवसात जिल्ह्यातील अनेक तालुका पातळीवरील नेते भाजपमध्ये प्रवेश करणार आहेत. दरम्यान, २८ ऑगस्टला मुख्यमंत्र्यांच्या उपस्थितीत माजी खासदार धनंजय महाडिक यांचा प्रवेश होण्याची शक्यता आहे.

रविवारी प्रदेशाध्यक्ष पाटील यांच्या उपस्थितीत भरमू पाटील यांच्यासह अनेकांनी भाजपमध्ये प्रवेश केला. यावेळी दर दहा दिवसाला प्रवेशाचे कार्यक्रम होत राहतील, असे पाटील यांनी स्पष्ट केले. आगामी प्रवेशाचा कार्यक्रम येत्या १३ ऑगस्टला होणार असल्याचेही त्यांनी सांगितले. यावेळी तालुका पातळीवरील काही नेते हातात 'कमळ' घेणार आहेत. विविध समाजांचे स्थानिक पातळीवरील नेते, कार्यकर्ते पक्षप्रवेश करणार आहेत. दुसऱ्या फळीतील कार्यकर्ते भाजपमध्ये यावेत, यासाठी सध्या प्रयत्न सुरू आहेत.

येत्या २८ ऑगस्टला मुख्यमंत्री देवेंद्र फडणवीस कोल्हापुरात येणार आहेत. त्यांच्या उपस्थितीत माजी खासदार महाडिक भाजपमध्ये प्रवेश करण्याची शक्यता आहे. त्या दृष्टीने हालचाली सुरू झाल्या आहेत. भरमू पाटील हे महाडिक गटाचेच आहेत. आणखी काही महाडिक समर्थक त्या दिवशी हातात 'कमळ' घेणार असल्याचे कळते. तशी यादीच तयार करण्यात येत आहे. त्यांच्याशी भाजप नेते प्राथमिक चर्चा करत आहेत.

म. टा. प्रतिनिधी, कोल्हापूर

दोन दिवसांपासून सुरू असलेला पावसाचा जोर सोमवारीही कायम होता. जिल्ह्यात अनेक ठिकाणी पावसाने झोडपून काढल्याने नद्यांचे पाणी इशारा पातळी ओलांडून धोका पातळीकडे जात आहे. अनेक नद्या, ओहळांना पूर आल्याने पूल पाण्याखाली गेल्याने मार्ग बंद झाले आहेत.

भोगावती, तुळशी पात्राबाहेर

कुडित्रे: करवीर तालुक्यात संततधार सुरू असल्यामुळे नद्यांच्या पाणीपातळीत झपाट्याने वाढ होत आहे. भोगावती आणि तुळशी नद्या दुसऱ्यांदा पात्राबाहेर पडल्या आहेत. दिवसभराच्या पावसामुळे शेतीची कामे थंडावली होती. राधानगरी, तुळशी धरण क्षेत्रात जोरदार पाऊस पडत आहे. तालुक्यातील कोगे, बहिरेश्वर, सांगरुळ, हळदी, आरे, शिंगणापूर, राजाराम असे सात बंधारे पाण्याखाली गेले आहेत. त्यामुळे या मार्गावरील वाहतूक बंद आहे. या मार्गावरील लोकांना वाहतुकीसाठी अन्य पर्यायी मार्गांचा वापर करावा लागत आहे.

भिंत कोसळून म्हैस ठार

शाहूवाडी: गोगवे (ता. शाहूवाडी) येथे घराची भिंत जनावरांच्या शेडवर कोसळून ढिगाऱ्याखाली सापडलेल्या एका गाभण म्हैशीचा जागीच मृत्यू झाला, तर अन्य एक गाय किरकोळ जखमी झाल्याची दुर्दैवी घटना सोमवारी पहाटे तीनच्या सुमारास घडली. दोन्ही जनावरे श्रीमती नीता रामदास पाटील यांच्या मालकीची असून या दुर्घटनेत त्यांचे सुमारे दोन लाख रुपये तर घरमालक छाया वसंत पाटील यांचे ५० हजार रुपये मिळून अडीच लाख रुपयांचे नुकसान झाले आहे. तहसील कार्यालयातील आपत्ती व्यवस्थापन कक्षात घटनेची नोंद झाली आहे. अतिवृष्टीमुळे सोमवारी पहाटे तीनच्या सुमारास छाया वसंत पाटील यांच्या राहत्या घराची भिंत लगतच्या जनावरांच्या शेडवर कोसळली.

चंदगडमध्ये नद्या दुथडी

चंदगड: शहरासह परिसरात आज दिवसभर पावसाचा जोर कायम आहे. सकाळपासून पावसाच्या जोरदार सरी कोसळत आहेत. त्यामुळे जनजीवन विस्कळीत झाले आहे. संततधार सुरू असलेल्या पावसामुळे तालुक्यातील दोन ताम्रपर्णी व घटप्रभा या दोन नद्या दुथडी भरून वाहत आहेत. पावसाचा जोर असाच राहिला तर उद्या सकाळपर्यंत पूरपरिस्थिती निर्माण होण्याची शक्यता नाकारता येत नाही. सकाळी आठ वाजेपर्यंत झालेल्या २४ तासांत तालुक्यात सरासरी २९.८३ मिमी पावसाची नोंद झाली.

आजऱ्यात नद्यांच्या पाणीपातळीत झपाट्याने वाढ

आजरा: तालुक्यात सोमवारी सकाळपासून जोरदार पर्जन्यवृष्टी सुरू आहे. त्यामुळे हिरण्यकेशी नदीवरील साळगाव बंधारा दुपारी दुसऱ्यांदा पाण्याखाली गेला. चित्री प्रकल्प पाणलोट क्षेत्रात देखील पावसाचा जोर वाढल्याने प्रकल्प ७५ टक्के भरला आहे. तालुक्यातील नद्या व ओढ्यांमधील पाण्याची पातळी झपाट्याने वाढत आहे. सकाळपर्यंत तालुक्यात २२.७५ मिमी पाऊस झाला आहे. आजरा परिसरातील मुलांसाठी शाळा व महाविद्यालयांना सुटी देण्यात आली. साळगाव धरणावर पाणी आल्याने साळगाव, पेरणोली, देवकांडगाव, हरपवडेकडील वाहतूक सोहाळेमार्गे वळविण्यात आली.

भुदरगडमध्ये पावसाची संततधार

गारगोटी: गेल्या चार पाच दिवसांपासून सुरू असलेली पावसाची संततधार आजही सुरूच आहे. तालुक्याच्या सर्व भागात मुसळधार पाऊस सुरू असल्याने वेदगंगा नदीसह ओढे, नाले तुडुंब भरून वाहत आहेत. संततधार पावसामुळे आदमापूर येथील संभाजी मानसिंग सरनोबत यांची विहीर पडून अंदाजे ४० हजारांचे नुकसान तर मिणचे बुद्रुकपैकी मोरस्करवाडी पांडुरंग शंकर मोरस्कर यांच्या राहत्या घराची भिंत पडून अंदाजे २० हजार रुपयांचे नुकसान झाले. तालुक्याच्या पश्चिमेकडील कडगांव, पाटगांव या जास्त पावसाच्या भागात तर पावसाने थैमान घातले आहे.

शाहूवाडीत पूरपरिस्थिती

शाहूवाडी: तालुक्यात पावसाचा जोर ओसरला असे वाटत असतानाच रविवारी रात्रभर तसेच सोमवारी दिवसभर संततधार पावसाने पुन्हा उचल खाल्ली. तालुक्यात २४ तासात ६३.३३ मिलिमीटर तर कडवी धरणाच्या पाणलोट क्षेत्रात ११४ मिलिमीटर पावसाची नोंद झाली. या धरणातील पाणीसाठा २.३७ टीएमसी (९४ टक्के) असा अंतिम टप्प्याजवळ पोहचला आहे. वारणा, कडवी, कानसा, कासारी या सर्व नद्यांच्या पुराचे पाणी किनाऱ्यापासून दूरवर पसरल्याने पूर परिस्थिती बिकट वळणावर पोहचली आहे. कडवी नदीवरील पाटणे, सौते-सावर्डे, शिरगांव सह सातही बंधारे पाण्याखाली गेले आहेत. कानसा नदीवरील विरळे-जांबूर पूल पहिल्यांदाच पाण्याखाली गेला असून वारणा नदीवरील रेठरे-कोकरूड दरम्यानचा बंधारा तसेच कासारी नदीवरील कांटे-बर्की, करंजफेण-पाली, पेंडाखळे-बांद्रेवाडी हे बंधारे दुसऱ्यांदा पाण्याखाली गेले आहेत.

राधानगरी धरण ९० टक्के भरले

राधानगरी: राधानगरी तालुक्यात पुन्हा पावसाचा जोर धरण क्षेत्रात वाढत असून लक्ष्मी जलाशय ९० टक्के भरला आहे. दुपारपर्यंत जलाशयात ७.५४ टी.एम.सी.पाणी साठा(८७ टक्के) झाला होता, जोरदार पावसामुळे पाणीपातळी झपाट्याने वाढत आहे. जलाशयातून वीज गृहातून १४०० क्युसेस पाण्याचा विसर्ग भोगावती नदीपात्रात सुरू आहे. दुधगंगा,तुळशी,धामणी या नद्यांनाही पूर आला आहे. राशिवडे, हळदी येथील भोगावती नदीवरील बंधारे पाण्याखाली गेले आहेत.

नदी, नाले पात्राबाहेर

कागल : गेल्या चार दिवसांपासून सुरू असलेल्या पावसाने जिल्ह्यात सर्वत्र अक्षरश: झोडपून काढले आहे. धरण क्षेत्रात संततधार सुरू असल्याने पाणीपातळीत झपाट्याने वाढ होत आहे. तर नदी नाल्याचे पाणी पात्राबाहेर आले आहे. वेदगंगा नदीवरील कागल तालुक्यातील चारही बंधारे पाण्याखाली गेले आहेत. दरम्यान यापैकी बस्तवडे बंधाऱ्यावरून काही वेळ धोकादायक स्थितीत वाहतूक सुरूच होती. दूधगंगा नदी पात्राबाहेर पडली आहे. वेदगंगा नदीवरील कुरणी, मळगे खुर्द, बस्तवडे, नाणीबाई चिखली हे चारही बंधारे पाण्याखाली गेले आहेत.

पुराचा धोका

पन्हाळा: तालुक्यात एक दिवस उसंत दिल्यानंतर रविवारी रात्रीपासून मोठ्या पावसाला सुरुवात झाली. सोमवारी दिवसभर पावसाचा जोर कायम होता. रविवारी कमी होऊ लागलेली नद्यांची पाणीपातळी संततधार पावसामुळे पुन्हा वाढत आहे. कुंभी, कासारी आणि वारणेच्या काठी पुरामुळे हजारो एकर ऊस पाण्याखाली जाण्याची भीती आहे. त्यामुळे या भागातील शेतकरी चिंताग्रस्त झाला आहे.

उशिरापर्यंत संततधार

हातकणंगले : तालुक्याला शनिवारी दिवसभर पावसाने अक्षरशः झोडपून काढले. पहाटेपासून सुरू झालेला पाऊस रात्री उशिरापर्यंत संततधार सुरू होता. हुपरीसह पेठवडगाव, किणी, घुणकी, हेरले, कुंभोज, रुकडी, शिरोली, पट्टणकोडोली, रांगोळी, रेंदाळ आदी परिसरात पावसाने जोरदारपणे हजेरी लावल्याने सर्वत्र पाणीच-पाणी झाले. यामुळे पंचगंगा व वारणा नदीच्या पाणी पातळीत झपाट्याने वाढ होत आहे.

वारणा नदी वरील खोची-दुधगाव बंधारा शनिवारी पाण्याखाली गेला.

म. टा. प्रतिनिधी, कोल्हापूर

शाहूवाडीतील शाळांमध्ये शिक्षकांची नियुक्ती करा, अशी मागणी घेऊन जिल्हा परिषदेत धाव घेतलेल्या पालक व विद्यार्थ्यांनी सीईओ अमन मित्तल यांच्या दालनाबाहेर ठिय्या आंदोलन केले. विद्यार्थ्यांचा मोर्चा जिल्हा परिषदेत घेऊन आल्याचे समजताच सीईओंचा पारा वाढला. विद्यार्थ्यांसमोरच त्यांनी या प्रश्नावरुन एका ग्रामपंचायत सदस्याला बाहेरचा रस्ता दाखवला तर उपस्थित एका शिक्षक उमेदवारालाही सुनावले.

विद्यार्थ्यांचा मोर्चा आणून तुम्ही त्यांचे शैक्षणिक नुकसान का करता? अशा सवाल पालकांना केला. त्यावर पालकांनी 'शाळेत शिक्षकच नाहीत, मुले शिकणार कशी?' असा प्रतिप्रश्न केला. याप्रश्नी जिल्हा परिषद सदस्य आणि मित्तल यांच्यात खडाजंगी झाली. या साऱ्या प्रकारावरून विद्यार्थी पुरते गोंधळून गेले.

शाहूवाडी तालुक्यातील सावर्डी, भैरी धनगरवाडा, गवळेवाडी, धुमकवाडी, गेळवडे या शाळेत एकही शिक्षक नाही. शाळा सुरू होऊन दीड महिन्यांचा कालावधी उलटला. शिक्षकांच्या नेमणुका कराव्यात, या मागणीसाठी कासारी खोरा शिक्षण बचाव समितीतर्फे सोमवारी मोर्चाचे आयोजन केले होते. म्हणून दुपारी तीन वाजता गेळवडे येथील पालक व विद्यार्थी मिळून जवळपास २० जणांचा मोर्चा जिल्हा परिषदेत आला. विद्यार्थी,पालकासहित जिल्हा परिषद सदस्यांनी सीईओंच्या कार्यालयाबाहेर शिक्षक नियुक्तीसाठी १० ते १५ मिनिटे ठिय्या मारला. विद्यार्थ्यांचा मोर्चा, ठिय्या आंदोलन व त्यानंतर घडलेला प्रकार याबद्दल अनेक सदस्यांनी नाराजी व्यक्त केली.

त्यामध्ये बचाव समितीचे संजय पोवार, अशोक पाटील, सुरेश कांबळे, युवराज पाटील, सर्जेराव पाटील आदींचा समावेश होता. सीईओ मित्तल हे शिक्षण समिती सभागृहात अधिकाऱ्यांसमवेत बैठकीत होते. पालक व विद्यार्थ्यांनी त्यांच्या कार्यालयाबाहेर ठिय्या मारून घोषणाबाजी केली. सीईओ बैठक संपवून त्यांच्या कार्यालयात जात असताना पुन्हा एकदा घोषणाबाजी झाली. विद्यार्थ्यांना मोर्चात का आणला, गुन्हे का दाखल करू नयेत? अशी विचारणा करत सीईओंनी एकेकाला फैलावर घेण्यास सुरुवात केली. 'शिक्षक नसतील तर पंचायत समिती सदस्यांनी येऊन भेट घ्यायची होती, ती सदस्यांची चूक आहे' असे फटकारले.

\Bभरतीसाठी आलेल्या

उमेदवाराला तंबी

\Bयाप्रसंगी जि. प. सदस्य हंबीरराव पाटील, आकांक्षा पाटील यांचे पती अमर, पंचायत समिती सदस्य दिलीप पाटील यांनी मध्यस्थीचा प्रयत्न केला. हंबीरराव पाटील यांनी 'शिक्षक नेमणुकीचा मूळ विषय बाजूला पडत आहे. तालुक्यात मोठ्या संख्येने शिक्षक पदे रिक्त आहेत' असे निदर्शनास आणले. याप्रश्नी एका ग्रामपंचायत सदस्याचे पद रद्द करण्याचे आदेश दिले. शिक्षक भरती प्रक्रियेसाठी आलेला एक तरुण आंदोलकांसमवेत बसला होता. 'भरतीसाठी आलात तर मोर्चात का, त्याला प्रक्रियेतून बाद करा' अशा सूचना त्यांनी अधिकाऱ्यांना दिल्या. यानंतर त्यांच्या कार्यालयात सदस्यासोबत झालेल्या बैठकीत त्यांनी, ' शिक्षक बदलीप्रकरणी ३१ जुलै रोजी सुनावणी आहे. सुनावणीची प्रक्रिया पूर्ण झाली की लगेच शिक्षकांच्या नेमणुका केल्या जातील.'असे शिष्टमंडळाला सांगितले. याप्रसंगी सदस्य विजय बोरगे उपस्थित होते.

एका शिक्षकांवर १५ शाळा

करंजफेण, अणुस्कुरा, मांजरे, येळवणजुगाई या केंद्रातील १५ शाळांसाठी एक शिक्षक आहे. सहावी व सातवीपर्यत वर्ग असलेल्या शाळांमध्ये विषय शिक्षकांची पदे रिक्त आहेत. त्यामध्ये करंजफेण, पेंडाखळे, कांटे, कुंभवडे, बुरंबाळ, गेळवडे, अणुस्कुरा, शेंबवणे, मांजरे, गिरगाव धनगरवाडा या शाळांचा समावेश असल्याचे समितीने म्हटले.

'शिक्षक द्या, शिक्षक द्या'

'शिक्षण आमच्या हक्काचे, नाही कुणाच्या बापाचे, शिक्षक द्या शिक्षक द्या'अशा घोषणा देत विद्यार्थ्यांनी प्रशासनाचे लक्ष वेधले. 'आमच्या मागण्या मान्य करा, नाही तर खुर्च्या खाली करा'अशी घोषणा पालकांनी दिली.

विधानसभा न लढविण्याची

गणपतराव देशमुखांची घोषणा

म. टा. वृत्तसेवा, सोलापूर

तब्बल अकरा वेळा सांगोला विधानसभा मतदारसंघातून विजयी झालेले आणि ५४ वर्षे विधानसभेत आपल्या कामाची छाप उमटविणारे आमदार गणपतराव देशमुख यांनी प्रकृती अस्वस्थाच्या कारणामुळे आगामी विधानसभा निवडणूक लढविणार नसल्याचे जाहीर केले आहे.

सांगोला तालुक्यातील कोळा येथील कार्यकर्ता मेळाव्यात त्यांनी ही घोषणा केली. मी निवडणूक लढविणार नसलो तरी शेतकरी कामगार पक्षाचा सांगोल्यातील बाल्लेकिल्ला अभेद्य ठेवण्यासाठी प्रयत्न करणार असल्याचे ही त्यांनी स्पष्ट केले आहे. गेल्या विधानसभा निवडणुकीत त्यांनी ९४३७४ मते मिळवून शिवसेनेचे उमेदवार शहाजी पाटील यांचा पराभव केला होता. शेतकरी कामगार पक्षाचा झेंडा खांद्यावर घेतलेले गणपतराव देशमुख आपल्या साध्या राहणीसाठी प्रसिद्ध आहेत.

वयाची ९२ वर्षे पूर्ण केलेल्या गणपतराव देशमुख यांचा जन्म १० ऑगस्ट १९२७ रोजी झाला. १९६२ला त्यांनी सांगोल्यातून सर्वप्रथम निवडणूक लढली होती. त्या नंतर १९७२ आणि १९९५चा अपवाद वगळता प्रत्येक निवडणुकीत सांगोल्यातील मतदारांनी त्यांना भरभरून मतांनी विजयी केले. विशेष म्हणजे २०१२मध्ये आमदार म्हणून विधानसभेतील त्यांच्या सदस्यत्वाला ५० वर्षे पूर्ण झाल्याबद्दल सभागृहासह सरकारनेही त्यांचा गौरव केला होता. महाराष्ट्रातील सर्वांत वयस्कर आमदार म्हणूनही गणपतराव देशमुख यांची ओळख आहे. अकरा वेळा विधानसभेवर निवडून जाण्याचा विक्रमाची ही देशमुख यांच्या नावे नोंद आहे.

नेहमीच विरोधी बाकावर

गणपतराव देशमुख बहुतांश काळ विरोधी बाकांवरच राहिले. मात्र १९७८मध्ये शरद पवार यांच्या 'पुलोद' सरकारमध्ये ते ऊर्जामंत्री होते. १९९९मध्ये शेकापने काँग्रेस आघाडी सरकारला पाठिंबा दिला तेव्हाही गणपतराव देशमुख यांचा मंत्रिमंडळात पणनमंत्री म्हणून समावेश झाला होता.

शहर मध्य मतदारसंघातूनच लढणार : प्रणिती शिंदे

सोलापूर :

'आगामी विधानसभा निवडणूक मी दहा वर्षे प्रतिनिधीत्व करीत असलेल्या सोलापूर शहर मध्य मतदारसंघातूनच लढविणार आहे,' अशी माहिती आमदार प्रणिती शिंदे यांनी सोमवारी पत्रकारांशी बोलताना दिली.

शहर मध्य मतदारसंघावर मुस्लिम आणि मोची समाजाने दावा केला आहे. मोची समाजाने बैठक घेऊन तर ज्येष्ठ काँग्रेस नेते नगरसेवक उमरखा बेरिया यांनी पत्रकार परिषद घेऊन हा मतदारसंघ सोडून आमदार प्रणिती शिंदे यांनी मोठ्या मनाने मोहोळ मतदारसंघात जावे, असे म्हटले होते. या बाबत प्रतिक्रिया देताना आमदार प्रणिती शिंदे यांनी मी तिसऱ्यांदा शहर मध्य मतदारसंघातून निवडणूक लढवून विकासकामांच्या जोरावर हॅटट्रिक साधणार आहे, असा दावा केला. मोची आणि मुस्लिम समाजातील ज्येष्ठांशी माझी चर्चा झाली आहे, असेही ते म्हणाले.

शिवेंद्रराजेंच्या भाजप प्रवेशाला

कार्यकर्त्यांचे बळ

सातारा :

सातारा शहराच्या विकासाचा मुद्दा पुढे करून पक्षांतर करण्याच्या आमदार शिवेंद्रराजे यांच्या भूमिकेला प्रमुख पदाधिकारी, आजी-माजी नगरसेवकांनी पाठिंबा दर्शविला आहे. 'तुम्ही म्हणाल तसं,' असे एका वाक्यात कार्यकर्त्यांनी शिवेंद्रराजेंच्या भूमिकेसोबत राहण्याचे जाहीर केले आहे. त्यामुळे आता शिवेंद्रराजेंच्या भाजप प्रवेशाची केवळ घोषणाच शिल्लक राहिल्याचे मानले जात आहे.

आमदार शिवेंद्रराजे यांनी नगर विकास आघाडीच्या आजी-माजी नगरसेवकांची तातडीची बैठक बोलावली होती. या बैठकीत मतदान वाढविण्याबाबत प्राथमिक बोलणी झाल्यानंतर शिवेंद्रराजे यांनी उपस्थितांना भाजपच्या वरिष्ठ नेत्यांशी संपर्क झाल्याचे सांगून पक्षांतर करण्याचा मुद्दा उपस्थित केला.

शिवेंद्रराजे म्हणाले, 'कोणावरही रूसून, रागावून किंवा वाद आहेत म्हणून पक्ष सोडण्याचा विचार नाही. गेल्या पाच वर्षांत सत्तेपासून लांब राहिल्यामुळे अनेक विकासकामांवर त्याचा विपरीत परिणाम झाला आहे. विकासकामांसाठी निधी उपलब्ध होण्याबरोबरच अनेक अडचणी येतात. त्यामुळे सत्तेत असलेल्या भाजपसोबत राहणे हिताचे आहे.' या बैठकीला अ‍ॅड. दिलावर मुल्ला, निळकंठ पालेकर, प्रकाश गवळी, व्यंकटराव मोरे आदींसह आजी-माजी नगरसेवक उपस्थित होते.

...........

साताऱ्याचा आमदार मीच : दीपक पवार

सातारा :

'भाजपमध्ये राहून चांगली मशागत करून मी पीकही चांगले आणले आहे. आता पक्षात येणाऱ्यांना हे पीक मी काढू देईन काय?,' असे सूचक वक्तव्य पश्चिम महाराष्ट्र विकास महामंडळाचे अध्यक्ष दीपक पवार यांनी आमदार शिवेंद्रराजेंच्या भाजप पक्ष प्रवेशाबाबत केले आहे. 'सातारा मतदारसंघातून भावी आमदार मीच असणार आहे, त्यासाठीच पक्षाने मला पद देऊन ताकद दिली आहे,' असेही त्यांनी म्हटले आहे.

पवार म्हणाले, 'भाजपमध्ये चांगले काम करणाऱ्यांना ताकद देण्याचे काम होते. तेच काम मुख्यमंत्री देवेंद्र फडणवीस आणि प्रदेशाध्यक्ष चंद्रकांत पाटील यांनी केले आहे. सातारा विधानसभा मतदारसंघात पक्ष संघटना, बुथ बांधणी चांगली केली आहे. त्यामुळेच अभ्यास करून हे पद दिले आहे. विधानसभा निवडणुकीत ताकद मिळेल हेच यातून पाहिले आहे.' आमदार शिवेंद्रराजे भोसले यांच्या भाजप प्रवेशाविषयी तुमचे मत काय? असा प्रश्न पत्रकारांनी केल्यावर पवार म्हणाले, 'अजून शिवेंद्रसिंहराजे भाजपात आले नाहीत. त्यामुळे त्यांच्याविषयी काय बोलणार? सध्यातरी विधानसभेचा उमेदवार म्हणून मीच आहे. राष्ट्रवादी काँग्रेसचे अध्यक्ष शरद पवार सांगतात शिवेंद्रराजे आमच्याबरोबर आहेत.'

भारत भालके, सिद्धाराम म्हेत्रेंची

मुलाखतीला दांडी

सोलापूर :

राष्ट्रवादी कॉंग्रेस पाठोपाठ कॉंग्रेसच्या दोन आमदारांनी ही इच्छुकांच्या मुलाखतीला दांडी मारली आहे. पंढरपूरचे आमदार भारत भालके आणि अक्कलकोटचे आमदार सिद्धाराम म्हेत्रे हे दोघेही या मुलाखतीला अनुपस्थितीत राहिले. आमदार शरद रणपिसे यांच्या उपस्थितीत विधानसभेसाठी इच्छुकांची मुलाखती सुरू आहेत. मागील काही दिवसांपासून आमदार भारत भालके आणि सिद्धाराम म्हेत्रे भाजपच्या वाटेवर असल्याची चर्चा सुरू आहे. त्यांनी मुलाखतींकडे पाठ फिरवल्याने या चर्चेत अधिक भर पडली आहे.

आमदार म्हेत्रे यांना पराभूत करण्यासाठी अक्कलकोटमध्ये एका महाराजांना उभे करण्याच्या हालचाली सुरू आहेत. त्यामुळे म्हेत्रे यांनी सावध पवित्रा घेतला असून, म्हेत्रे यांच्या भाजप प्रवेशाची शक्यता वाढली आहे. पालकमंत्री विजयकुमार देशमुख यांच्यामार्फत म्हेत्रे प्रयत्नशील आहेत. काही दिवसांपूर्वी त्यांनी प्रदेशाध्यक्ष चंद्रकांत पाटील यांची मुंबईत भेट घेतल्यानंतर त्यांच्या भाजप प्रवेशावर शिक्कामोर्तब झाल्याचे सांगण्यात येत आहे. अक्कलकोट येथे आयोजित मेळाव्यात ही कार्यकर्त्यांनी भाजपमध्ये प्रवेश करण्याचा आग्रह धरला आहे.

पंढरपूर-मंगळवेढा मतदारसंघाचे आमदार भारत भालके यांनी ही चाचपणी सुरू केली आहे. भालके यांनी काँग्रेस न सोडल्यास भाजप त्यांच्या समोर तगडा उमेदवार देऊ शकतो, त्यामुळे भालके द्विधा मनःस्थितीत आहेत. सोमवारच्या मुलाखतीला गैरहजर राहिलेले आमदार म्हेत्रे यांनी परगावी असल्याचे सांगितले आहे, तर आमदार भालके यांचा फोन नंबर बंद असल्याने संशय वाढला आहे. आमदार प्रणिती शिंदे यांनी मुलाखत दिली आहे.

धोम-बलकवडी धरणाच्या

पाणीसाट्यात झपाट्याने वाढ

सातारा :

दोन आठवड्यांच्या विश्रांतीनंतर धोम-बलकवडी धरणाच्या पाणलोट क्षेत्रात धो-धो पाऊस पडत आहे. मुसळधार पावसामुळे धरणाची पाणी पातळी वेगाने वाढत आहे. सोमवारी दुपारी चार वाजेपर्यंत बलकवडी धरण ६५ टक्के भरले आहे. धोम धरण पाणलोट क्षेत्रातही मुसळधार पाऊस पडत असून, धरण ३५ टक्के भरले आहे. वाई शहर-परिसरासह तालुक्याच्या पूर्व भागालाही पावसाने अक्षरशः झोडपून काढले आहे, कृष्णा नदीला पूर आला असून, वाईतील लहान पूल पाण्याखाली गेला होता.

कोल्हापूर

'गेल्या चार दिवसांपासून जिल्ह्यात सुरू असलेल्या संततधार पावसांमुळे नद्या इशारापातळीकडे आगेकूच करु लागल्या आहेत. पंचगंगा पात्राबाहेर पडून पूर परिस्थिती उद्भवल्यास निर्माण होणाऱ्या परिस्थितीचा सामना करण्यासाठी आपत्ती व्यवस्थापन सज्ज ठेवा,' अशी सूचना आयुक्त डॉ. मल्लिनाथ कलशेट्टी यांनी सर्व विभागप्रमुखांना दिल्या. महापालिकेच्या आपत्ती व्यवस्थापन यंत्रणेचा आढावा घेण्यासाठी सोमवारी त्यांनी बैठक घेतली. पावसाच्या संततधारेमुळे जिल्ह्यातील सर्वच धरणांतील पाणीसाठा ९० टक्क्यांपर्यंत पोहोचला आहे. राधानगरी धरणातून विसर्ग सुरू होऊन पूरस्थिती निर्माण झाल्यास नागरिकांना स्थलांतर करण्यासाठी यंत्रणा सज्ज ठेवा, पूरबाधित क्षेत्राची पाहणी करुन आवश्यक उपाययोजना करण्याची सूचना सर्व विभागप्रमुखांना त्यांनी केली.

म. टा. प्रतिनिधी, कोल्हापूर

महापालिकेच्या बालिंगा पंपिंग स्टेशनमधील बिघाड रविवारी रात्री उशीरा काढण्यात यश आले. दुरुस्तीनंतर त्वरीत उपसा सुरु झाला. पण दोन दिवसांचा बॅकलॉग असल्याने शहराच्या अनेक भागात अपुरा पाणीपुरवठा झाला. त्यामुळे ए, बी, सी, डी व 'ई' वॉर्डातील नागरिकांना टँकरचा आधार घ्यावा लागला. कसबा बावडा व कळंबा फिल्टर हाऊस येथून दिवसभरात टँकरच्या १२ फेऱ्यांद्वारे पाणीपुरवठा केला. सायंकाळच्या सत्रात मात्र पाणीपुरवठा सुरळीत झाला.

सोमवार (ता.२२) पासून निम्म्या शहरातील पाणीपुरवठ्याचा बोजवारा उडाला आहे. विद्युत यंत्रणामध्ये वारंवार बिघाड झाल्याने ऐन पावसाळ्यात नागरिकांना पाण्यासाठी धावाधाव करावी लागत होती. दुरुस्ती होऊन पाणी उपसा सुरु झाल्यानंतर पुन्हा अन्यत्र समस्या निर्माण होत असल्याने महापालिकेच्या शहर पाणीपुरवठा विभागाचीही डोकेदुखी वाढली होती. शुक्रवारी रात्री डीओ फ्यूज व विद्युत वाहिनीमध्ये बिघाड निर्माण होऊन शनिवारी मध्यरात्रीपासून पाणीउपसा बंद राहिला. त्यामुळे बालिंगा येथून पाणीपुरवठा होणाऱ्या संपूर्ण सी व डी वॉर्डात तर ए, बी व 'ई' वॉर्डातील काही प्रभागात होऊ शकला नाही. आठवडाभर अशी स्थिती असल्याने नागरिक प्रशासनाच्या कारभाराविरोधात संताप व्यक्त करत होते. रविवारी पाणी न आलेल्या भागात ३० टँकरच्या फेऱ्याद्वारे पाणीपुरवठा केला. रविवारी मध्यरात्री मात्र पंपिंग स्टेशनमध्ये झालेला बिघाड काढण्यास यश आले. त्यानंतर त्वरीत बालिंगा येथून उपसा करण्यास सुरुवात झाली. जलशुद्धीकरण केंद्रात पाणीपुरवठा होऊन नागरिकांच्या घरापर्यंत पाणी पोहोचण्यास दुपार झाली. कमी दाबाने पाणीपुरवठा होत असला, तरी पाणी आल्याने नागरिकांनी सुटकेचा नि:श्वास सोडला. सायंकळानंतर मात्र नेहमीप्रमाणे पाणीपुरवठा सुरू झाला.

कोल्हापूर

मंगळवार पेठ कोळेकर तिकटी ते साई मंदिरपर्यंतचा रस्ता सोमवारपासून मोटारसायकल वाहनधारकांसाठी खुला झाला. सोमवार (ता. १५) पासून क्रॉस ड्रेन कामासाठी हा रस्ता सर्व वाहनांसाठी बंद ठेवला होता. क्रॉस ड्रेनचे काम पूर्ण झाल्यानंतर दुपारपासून मोटारसायकल वाहनधारकांसाठी रस्ता खुला झाला. दोन दिवसांनतर रस्ता केएमटी व अवजड वाहनांना खुला होईल.

कोळेकर तिकटी ते शाहू बँकपर्यंतच्या गटर्सचे काम मे महिन्यात करण्यात आले. त्यानंतर म्हादू गवंडी तालीम जवळ क्रॉस ड्रेन घेवून सांडपाणी सिद्धाला गार्डनकडे वळवण्याच्या कामाला सुरुवात झाली. पंधरा दिवसांत काम करण्यास महापालिका यंत्रणेला यश आले. क्रॉस ड्रेन कामामुळे मिरजकर तिकटी ते नंगीवली चौकांपर्यंत वाहतूक बंद ठेवण्यात आली होती. दक्षिण उपनगराकडे जाणारी वाहने मिरजकर तिकटी येथून पद्माराजे हायस्कूलमार्गे वळवण्यात आली होती. त्यामुळे अनेकदा वाहनधारकांना वाहतूक कोंडीचा सामना करावा लागला. मात्र हा रस्ता पुन्हा एकदा सुरू झाल्याने वाहनधारकांना काहीसा दिलासा मिळाला आहे.

म. टा. प्रतिनिधी, कोल्हापूर

जिल्हा परिषदेतील शिक्षण विभागातर्फे २०१३-१४ मधील दोन कोटी रुपयांच्या किंमतीच्या बेंच खरेदी प्रकरणात अनियमतता आढळल्याने दहा अधिकाऱ्यांना कारवाई का करू नये, अशा नोटिसा काढण्यात आल्या. वित्त व शिक्षण विभागातील मोठ्या अधिकाऱ्यांचा समावेश आहे. दहापैकी तीन अधिकारी हे सेवानिवृत्त आहेत. संबंधितांना खुलासा करण्यासाठी दहा दिवसांची मुदत दिली आहे. खुलासा समाधानकारक नसल्यास अधिकाऱ्यांची खातेनिहाय चौकशी होणार आहे.

तत्कालिन मुख्य लेखा व वित्त अधिकारी गणेश पाटील, मुख्य वित्त व लेखा अधिकारी संजय राजमाने, लेखाधिकारी राजेंद्र नागणे, तत्कालिन कनिष्ठ लेखाधिकारी संतोष ओतारी, तत्कालिन सहायक लेखाधिकारी प्रकाश काटकर, तत्कालिन शिक्षणाधिकारी आर. वाय. अघम, तत्कालिन उपशिक्षणाधिकारी दिनकर हरी पाटील, तत्कालिन वरिष्ठ लेखाधिकारी संभाजी हंकारे, तत्कालिन वरिष्ठ सहायक अरुण पोवार, तत्कालिन कनिष्ठ सहायक नामदेव गावडे यांना नोटीसा काढल्या आहेत.

शिक्षण विभागातर्फे सहा वर्षांपूर्वी दोन कोटी रुपयांच्या किंमतीचे बेंच खरेदी केले. बेंच खरेदी प्रकरणात वित्त व शिक्षण विभागांनी वित्तीय छाननी केली नाही. साहित्याची चाचणी व गुणवत्ता न तपासता बेंच खरेदीसाठीची शंभर टक्के रक्कम कंपनीला दिली. वास्तविक दहा टक्के रक्कम शिल्लक ही बेंचच्या तपासणीनंतर द्यावयाची होती. मात्र अधिकाऱ्यांनी सक्षम यंत्रणेकडून चाचणीची कुठलीच प्रक्रिया पूर्ण केली नाही.

\B

एकाचवेळी दहा अधिकारी

चौकशीच्या फेऱ्यात

\Bबेंच खरेदी प्रक्रियेदरम्यान नियम व अटी पाळल्या नाहीत, असा आक्षेप अधिकाऱ्यांवर आहे. स्थानिक निधी लेखा विभागाच्या अहवालानंतर हा प्रकार समोर आला. पंचायत राज समितीने बेंच खरेदी प्रकरणावर ताशेरे ओढले होते. तसेच चौकशी अहवाल सादर करण्याच्या सूचना केल्या होत्या. विभागीय आयुक्त दीपक म्हैसेकर यांनी याप्रश्नी चौकशी करून कारवाई करण्याचे आदेश मुख्य कार्यकारी अधिकारी अमन मित्तल यांना दिले होते. मित्तल यांच्या सहीने, संबंधित अधिकाऱ्यांना कारवाई का करू नये, म्हणून कारणे दाखवा नोटिसा काढल्या. दहा जणांपैकी तत्कालिन शिक्षणाधिकारी अघम, तत्कालिन उपशिक्षणाधिकारी पाटील, तत्कालिन वरिष्ठ सहायक पोवार हे सेवानिवृत्त आहेत. सोमवारी सायंकाळीपर्यंत नोटिसा काढण्याची प्रक्रिया सुरू होती. मंगळवारी संबंधितांना नोटिसा लागू होतील. एकाच वेळी दहा अधिकाऱ्यांना कारणे दाखवा नोटीस व चौकशीचा फेरा यामुळे जिल्हा परिषदेत खळबळ उडाली आहे.

म. टा. प्रतिनिधी, कोल्हापूर

महाराष्ट्र जीवन प्राधिकरणने थकीत पाणीपट्टीसाठी नऊ गावांचा पाणीपुरवठा एक ऑगस्टपासून बंद करण्याचा इशाऱ्यामुळे ग्रामपंचायत यंत्रणा हादरली. प्राधिकरणच्या इशाऱ्यानंतर याप्रश्नी तोडगा काढण्यासाठी मंगळवारी (ता.३०) जीवन प्राधिकरणच्या कार्यालयात आमदार अमल महाडिक, जिल्हा परिषद अध्यक्षा शौमिका महाडिक, संबंधित गावांचे सरपंच आदींची बैठक होणार आहे. दुपारी चार वाजता ही बैठक होणार आहे. दरम्यान, जि.प.अध्यक्षा महाडिक यांनी सोमवारी प्राधिकरणच्या कार्यालयात जाऊन अधिकाऱ्यांसमवेत चर्चा केली. पाणी पुरवठा खंडीत करू नये, यासंदर्भात ही चर्चा केली.

गावकऱ्यांकडून पाणी बिलाची वसुली करुन संबंधित रक्कम जीवन प्राधिकरणकडे न भरल्यामुळे गावपातळीवर ग्रामपंचायत पदाधिकाऱ्यांना नागरिकांना उत्तरे द्यावी लागत आहेत. उजळाईवाडी, गोकुळ शिरगाव, सरनोबतवाडी, उचगाव, गडमुडशिंगी, गांधीनगर, वळीवडे कणेरी, पाचगाव या गावांचा मिळून पाच कोटी ९० लाख रुपयांची थकबाकी आहे. संबंधित गावांनी गेल्या पाच, सहा वर्षापासून पाणीपट्टी भरली नाही. पाचगाव ग्रामपंचायतीने पाणीबिलात १०० रुपयांनी वाढ केली आहे. पाचगावात आठवड्यातून दोन दिवस पाणी पुरवठा होतो. मात्र पाणीबिलात भरमसाठ वाढ केल्यामुळे नागरिकांत नाराजी आहे.

तारळी ओसंडून वाहू लागले

कराड :

पाटण, तालुक्यातील तारळे विभागात गेल्या चार दिवसांपासून सुरू असलेल्या संततधार पावसामुळे या विभागाला वरदान ठरलेले तारळी धरण ओव्हरफ्लो झाले आहे. सध्या धरणात तीन हजार क्युसेकहून अधिक पाण्याची आवक होत आहे. त्यामुळे धरणाचे पाचही वक्र दरवाजे या पूर्वीच उघडलेले असून, सांडव्यावरून थोड्या प्रमाणात पाणी ओसांडून वाहू लागले आहे.

दरम्यान, पावसाचे कमी-अधिक प्रमाण पाहता व धरणात येणाऱ्या पाण्याची आवक पाहता केव्हाही धरणातून दोन हजार क्युसेक पाण्याचा विसर्ग तारळी नदीपात्रात सुरू करण्याची शक्यता निर्माण झाली आहे. त्यामुळे तारळी नदीकाठावरील १८ गावांना अतिदक्षतेचा इशारा धरण व्यवस्थापन व प्रशासनाकडून देण्यात आला आहे.

.........

वीर धरणातून नीरा नदीत विसर्ग

सातारा :

नीरा खोऱ्यातील नीरा-देवघर, भाटघर धरणाच्या पाणलोट क्षेत्रात झालेल्या पावसामुळे वीर धरण रविवारी ९३ टक्के भरल्यामुळे सायंकाळी साडेसहाच्या सुमारास धरणाच्या एका दरवाजातून ४५०० क्युसेक पाणी नीरा नदीपात्रात सोडण्यात येत आहे. नीरा खोऱ्यातील नीरा-देवघर, भाटघर धरणाच्या पाणलोट क्षेत्रात गेल्या तीन-चार दिवसांपासून सतत पाऊस पडत असल्याने १५ हजार क्युसेकने पाण्याची आवक वीर धरणामध्ये होत असल्याने वीर धरण ९३ टक्के भरले. त्यामुळे वीर धरणातील पाच नंबरचा दरवाजा चार फुटाने उचलून ४५०० क्युसेक पाण्याचा विसर्ग नीरा नदीपात्रात करण्यात आला असल्याची माहिती वीर धरण उपविभागाचे सहाय्यक अभियंता विजय नलवडे यांनी दिली.

फोटो आहे

म. टा. प्रतिनिधी, कोल्हापूर

महापालिकेच्या अतिक्रमण निर्मूलन विभागाच्यावतीने संकपाळ नगर (कसबा बावडा) येथील अनधिकृत पाच पत्र्यांची शेड उतरवण्यात आली. तर चार मिळकतदारांनी शेड उतरवून घेत असल्याचे लिखित पत्र पथकाला दिले. नंगीवली चौकात वाहतुकीला अडथळा ठरणाऱ्या भाजी विक्रेत्यांच्यावर कारवाई करत त्यांचा भाजीपाला व अन्य साहित्य पथकाने जप्त केले.

संकपाळ नगर येधील झोपडपट्टीमधील पॅसेजमध्ये अनेक झोपडपट्टीधारकांनी अनधिकृत पत्र्याची शेड उभा केली होती. त्याबाबतच्या तक्रारी महापालिका प्रशासनाकडे दाखल झाल्या होत्या. तक्रारींची दखल घेत सोमवारी ताराराणी मार्केट विभागीय कार्यालय व अतिक्रमण विभागाच्यावतीने संयुक्त कारवाई केली. कारवाईत पादचाऱ्यांना अडथळा ठरणारी पाच पत्र्यांची शेड काढून टाकण्यात आली. तर अन्य चार अतिक्रमणधारकांनी दोन दिवसांत शेड उतरवून घेण्याचे लिखित पत्र दिले. त्यानंतर गांधी मैदान विभागीय कार्यालयाच्यावतीने नंगीवली चौकात अतिक्रमणविरोधी कारवाई केली. भूमिअभिलेख कार्यालय ते नंगीवली चौकात रस्त्यावर बसलेल्या भाजीविक्रेत्यांवर कारवाई करताना त्यांचा भाजीपाला व अन्य साहित्य जप्त करण्यात आले.

...

चौकट

धोकादायक भिंत उतरवली

चार दिवसांच्या सततच्या पावसामुळे महापालिका परिसरातील बावडेकर बोळातील एका घराची भिंत धोकादायक बनली होती. संपूर्ण भिंत ओलसर झाल्याने कोणत्याही क्षणी कोसळण्याची स्थिती होती. त्यामुळे अग्निशमन विभागाने ही धोकादायक भिंत उतरवून घेतली.

वृक्षतोडप्रकरणी

फौजदारी दाखल करा

इचलकरंजी : जलशुद्धीकरण केंद्र परिसर आणि नगरपरिषदेपासून हाकेच्या अंतरावरील डेरेदार वृक्षाची कत्तल करणाऱ्यांवर फौजदारी गुन्हा दाखल करण्यासह नगरपरिषदेची तरु कमिटी बरखास्त करावी, या मागणीसाठी नवीन युवक सेनेच्यावतीने प्रांताधिकारी कार्यालयात लाक्षणिक उपोषण करण्यात आले. आठवडाभरात कारवाई न झाल्यास नगरपरिषदेत कडकलक्ष्मी आंदोलन छेडण्याचा इशारा देण्यात आला आहे.

मध्यवर्ती चौकातील जलशुद्धीकरण केंद्र परिसरातील वृक्ष तोडणाऱ्यांवर अद्यापही फौजदारी दाखल करण्यात आलेली नाही. हे प्रकरण ताजे असतानाच नगरपरिषदेपासून हाकेच्या अंतरावरील विकासनगरातील एका डॉक्टरने नगरपरिषदेची कोणतीही परवानगी न घेता घरासमोरील वृक्ष दारात कचरा पडत असल्याचे कारण सांगत तोडून टाकला. ही बाब लक्षात आणून देऊनही नगरपरिषद प्रशासनाने काहीच कारवाई केली नाही. शिवाय तोडलेल्या वृक्षांच्या फांद्या पंचनामा न करताच परस्पर विकल्याचा संशय व्यक्त होत आहे. या दोन्ही प्रकरणी कारवाई करावी, यासाठी संतोष कांदेकर यांच्या नेतृत्त्वाखाली सोमवारी लक्षवेधी उपोषण करण्यात आले.

या दोन्ही प्रकरणी नगरपरिषदेने तातडीने कारवाई न केल्यास नगरपरिषदेत कडकलक्ष्मी आंदोलन करण्याचा इशारा देण्यात आला. आंदोलनात योगेश चव्हाण, मारुती दाईंगडे, आनंदा कमलाकर, अमोल काळे, राहुल कारंडे, महेश गोंधळी आदी उपस्थित होते.

म. टा. वृत्तसेवा, इस्लामपूर

लोकनेते राजारामबापू पाटील यांच्या जन्मशताब्दी प्रारंभानिमित्त त्यांनी केलेले काम युवा पिढीला माहित व्हावे म्हणून विविध उपक्रम राबविण्यात येणार आहेत. बापूंनी स्वातंत्र्य प्राप्तीसाठी दिलेले योगदान, त्यांनी लोकल बोर्डाचे अध्यक्ष, मंत्री म्हणून दिलेले योगदानाला उजाळा देण्यात येणार आहे. वर्षभर विकासाला पूरक असे विविध उपक्रम राबवून त्यांचे जयंती वर्ष साजरे करण्यात येणार असल्याची माहिती जन्मशताब्दी समितीचे अध्यक्ष प्रा. शामराव पाटील यांनी पत्रकार परिषदेत दिली.

प्रा. पाटील म्हणाले, 'राजारामबापूंनी वयाच्या २५व्या वर्षी १९४५साली कासेगाव शिक्षण संस्थेची स्थापना करून सामाजिक कार्याला सुरुवात केली. सातारा जिल्हा लोकल बोर्डाचे आणि सांगली जिल्हा लोकल बोर्डाचे अध्यक्ष असताना त्यांनी अनेक गावात आड बांधले, गाव तिथे शाळा संकल्पना राबविली. ते वाळवा विधानसभा मतदारसंघातून सर्व प्रथम १९६२ साली आमदार झाले. पहिल्याच मंत्रिमंडळात महसूल खात्याचे मंत्रिपद मिळाले. त्यांनी वीज, उद्योग, ग्रामविकास, महसूल, अर्थ व नियोजन अशा अनेक खात्यांची जबाबदारी सांभाळली. त्यांचा १९७२च्या मंत्रिमंडळात समावेश झाला नाही. अंतर्गत विरोधामुळे ते कॉँग्रेसमधून बाहेर पडले. राजारामबापू पाटील पदयात्री म्हणून राज्याला परिचित आहेत. विनोबा भावे, माजी पंतप्रधान चंद्रशेखर यांच्या पदयात्रेत ते सहभागी होते. सांगली जिल्ह्याच्या दुष्काळी भागाचे प्रश्न समजून घेण्यासाठी त्यांनी सांगली ते उमदी, अशी पदयात्रा काढली. वाळवा तालुका सुजलाम सुफलाम करण्यासाठी त्यांनी पदयात्रा काढली. त्यांनी शेती, सहकार, शिक्षण, उद्योग अशा विविध क्षेत्रात आपल्या कामाचा ठसा उमटविला आहे. त्यांच्या १००व्या जयंतीनिमित्त विकासाला पूरक असे विविध उपक्रम राबवून हे वर्ष साजरे करणार आहोत. जयंती प्रारंभाप्रमाणेच १ ऑगस्ट २०२०ला जन्मशताब्दीचा सांगता समारंभाचा कार्यक्रम ही भव्य होणार आहे.'

दरम्यान, जन्मशताब्दी समितीचे अध्यक्ष तथा माजी मंत्री अण्णासाहेब डांगे आणि कोषाध्यक्ष दिलीप पाटील यांनी ही सोमवारी सांगलीत पत्रकार परिषद घेऊन माहिती दिली.

म. टा. वृत्तसेवा, राधानगरी

राधानगरी येथील राऊतवाडी धबधब्यावर सुटीचा आनंद लुटण्यासाठी आलेल्या १२१ हुल्लडबाजांवर पोलिसांनी कारवाई केली. शनिवार आणि रविवार या दोन दिवशी धबधब्यावर मोठी गर्दी झाली होती. यातील ९८ जणांकडून १८ हजाराचा दंड वसूल केला तर २६ हुल्लडबाजांवर किरकोळ कारवाई करून सोडण्यात आले.

शनिवारी, रविवार व सुट्टीच्या दिवसांत राऊतवाडी धबधब्यावर हजारो पर्यटक भेट देतात. बेशिस्त आणि गैरप्रकारांमुळे सुट्टीच्या दिवशी राऊतवाडी धबधब्यावर पोलिस प्रशासनावर प्रचंड ताण निर्माण होत आहे. येथे मद्यपान करून हुल्लडबाजी करणाऱ्या तरुणांची मोठी गर्दी होत असल्याने पोलिसांनी कडक कारवाईचे धोरण अवलंबले आहे. वाहन परवाना नसणे, वाहनांची कागदपत्रे नसणे, वाहतुकीच्या नियमांचे उल्लंघन करणाऱ्या ९८ जणांवर मोटर वाहन कायद्यान्वये कारवाई करण्यात आले आहे. त्यांच्याकडून सुमारे १८ हजार रुपयांचा दंड वसूल करण्यात आला.

नांदेड : राष्ट्रवादी काँग्रेसचे अध्यक्ष शरद पवार यांचे कट्टर समर्थक अशी ओळख असलेल्या माजी आमदार आणि जिल्हाध्यक्ष बापूसाहेब देशमुख गोरठेकर यांनी सोमवारी राष्ट्रवादी काँग्रेस पक्षाला रामराम ठोकला. गोरठेकर कोणत्या पक्षात जाणार हे अद्याप स्पष्ट नसले तरी ते माजी मुख्यमंत्री अशोक चव्हाण यांच्याविरोधात भोकर विधानसभा मतदारसंघातून निवडणूक लढविणार आहेत.

विधानसभा निवडणुकीच्या पार्श्वभूमीवर राज्यातील दोन्ही काँग्रेसमध्ये पडझड सुरू आहे. अनेक दिग्गज नेते युतीच्या तंबुत स्थिरावत आहेत. नांदेड लोकसभा निवडणूक निकालानंतर जिल्ह्यातील राजकारणही बऱ्यापैकी बदलत चालले आहे. राष्ट्रवादी काँग्रेसचे जिल्हाध्यक्ष गोरठेकर यांनी आपल्या समर्थकांसह सोमवारी राष्ट्रवादी काँग्रेसला अखेरचा सलाम केला. जिल्हा परिषदेचे कृषी सभापती दत्तात्रय रेड्डी यांच्या निवासस्थानी गोरठेकर समर्थकांची बैठक झाली. या बैठकीत सर्व कार्यकर्त्यांनी 'अभी नही तो कभी नही'चा नारा देत पक्षाला रामराम केला.