साताऱ्यात मेडिकल कॉलेज
सुरू करण्यासाठी मान्यता
सातारा :
साताऱ्यात मेडिकल कॉलेज सुरू करण्यासाठी तीन वर्षांकरिता क्रांतिसिंह नाना पाटील जिल्हा रुग्णालय हस्तांतर करण्याच्या निर्णयाला सरकारने मान्यता दिली आहे. या संदर्भातील सरकारी अध्यादेश १५ जुलै २०१९ रोजी जाहीर करण्यात आला आहे. मेडिकल कॉलेजच्या कामाला सरकारी स्तरावर हालचाली सुरू झाल्याने त्या बद्दल सर्वस्तरातून समाधान व्यक्त होत आहे.
तीनशे खाटांचे रुग्णालय आवश्यक सुविधांसह उपलब्ध करण्यासाठी सार्वजनिक आरोग्य विभागाच्या अखत्यारितील सातारा जिल्हा रुग्णालय हे वैद्यकीय शिक्षण व औषधी द्रव्य विभागास तीन वर्षांसाठी हस्तांतरित करण्याच्या आदेशाला राज्य सरकारने हिरवा कंदिल दिला आहे.
जिल्हा रुग्णालय हस्तांतरणाच्या तब्बल २३ अटी घालण्यात आल्या आहेत. जिल्हा रुग्णालयाच्या हस्तांतरणाचा आदेश पारित झाल्यानंतर औषधी द्रव्य विभाग व सार्वजनिक आरोग्य सेवा विभागाची तातडीची बैठक मुंबईत पार पडली. वैद्यकीय शिक्षण तथा जलसंपदा मंत्री गिरीश महाजन यांच्या दालनात सार्वजनिक आरोग्य व द्रव्य औषधी विभागाचे अवर सचिव व जिल्हा शल्यचिकित्सक सातारा, नोडल ऑफिसर व वैद्यकीय अधिष्ठाता मेडिकल कॉलेज यांची मॅरेथॉन बैठक झाली.
.........
अल्पवयीन मुलीचा विनयभंग
सातारा :
रहिमतपूर परिसरातील एका गावात इयत्ता दहावीत शिकत असणाऱ्या चौदा वर्षांय अल्पवयीन मुलीचा गावातीलच एका युवकाने विनयभंग केल्याची फिर्याद संबंधित मुलीच्या आईने रहिमतपूर पोलिस ठाण्यात नोंदविली आहे. १६ जुलै रोजी दुपारी दोन वाजता संबंधित मुलगी शाळेतून जेवण करण्यासाठी घरी येत असताना संबंधित युवकने तिचा पाठलाग केला. पुन्हा शाळेत जाताना तो पाठलाग करताना आढळून आला. मुलीच्या आईने त्याला जाब विचारला असता, तो तेथून पळून गेला. काही दिवसांपासून शाळेत जाता- येता वारंवार आपल्या मुलीचा वाईट हेतूने पाठलाग करीत, लज्जा उत्पन्न होईल, असे वर्तन करणाऱ्या त्या युवकाविरूद्ध अखेर मुलीच्या आईने पोलिस ठाण्यात फिर्याद दाखल केली आहे.
...........
जिल्हा परिषदेच्या 2019-20 आर्थिक वर्षासाठी 100 कोटी रूपयांच्या अर्थसंकल्पाला मंजुरी.
जिल्हा परिषदेच्या 2019-20 आर्थिक वर्षासाठी 100 कोटी रूपयांच्या अर्थसंकल्पाला मंजुरी देण्यात आली. जिल्हा परिषदेच्या इतिहासात प्रथमच अर्थसंकल्पात मोठी वाढ झाली आहे. अर्थसंकल्पाच्या वाढीसाठी आवश्यक उत्पन्नामध्ये अनुदानावरील व्याज ही बाब केंद्रस्थानी राहिली आहे. दरम्यान, अर्थसंकल्पामध्ये बांधकाम विभागासाठी सर्वाधिक 25 कोटी रूपयांची तरतूद करण्यात आली आहे.
जिल्हा परिषदेच्या सर्वसाधारण सभेचे आयोजन छ. शिवाजी महाराज सभागृहात करण्यात आले होते. यावेळी शिक्षण व अर्थ सभापती राजेश पवार यांनी सादर केलेल्या अर्थसंकल्पाला मंजुरी देण्यात आली. यावेळी जिल्हा परिदेचे अध्यक्ष संजीवराजे नाईक निंबाळकर, उपाध्यक्ष वसंतराव मानकुमरे, मुख्य कार्यकारी अधिकारी कैलास शिंदे, अतिरिक्त मुख्य कार्यकारी अधिकारी संतोष धोत्रे, कृषी सभापती मनोज पवार, समाजकल्याण सभापती शिवाजी सर्वगौड यांच्यासह खातेप्रमुख उपस्थित होते. 2019-20 च्या अर्थसंकल्पामध्ये अनुदान, कर, इमारती भाडे आणि ठेवीवरील व्याजाच्या माध्यमातून 101 कोटी 25 लाख रूपयांचे उत्पन्न अपेक्षित ठेवण्यात आले आहे.
त्यापैकी 99 कोटी 88 लाख 90 हजार रूपये खर्चाच्या अर्थसंकल्पाला मंजुरी देण्यात आली. त्यामध्ये सर्वाधिक तरतूद बांधकामसाठी 25 कोटी 65 लाख, सदस्यांच्या मानधनासाठी 87 लाख 40 हजार, सामान्य प्रशासनसाठी 23 लाख, शिक्षणसाठी नऊ कोटी 25 लाख, लघुपाटबंधारेसाठी सहा कोटी 25 लाख, आरोग्यसाठी दहा कोटी, कृषीसाठी पाच कोटी 80 लाख, समाजकल्याणसाठी पाच कोटी 94 लाख, महिला व बालविकाससाठी दोन कोटी 53 लाख, अपंग कल्याणसाठी दोन कोटी 55 लाख रूपयांची तरतूद करण्यात आली आहे. विविध विभागांसाठी करण्यात आलेल्या निधीच्या माध्यमातून योजनांची अंमलबजावणी व सदस्यांना सेस फंडाचा निधी वितरित करण्यात येणार आहे.
दरम्यान, यंदा अर्थसंकल्पात करण्यात आलेल्या वाढीचे सदस्यांनी स्वागत केले. तर प्रदीप विधाते यांनी कटगुण (ता. खटाव) येथे साजऱ्या होणाऱ्या महात्मा फुले जयंती महोत्सवासाठी निधीची तरतूद वाढविण्याची मागणी केली. महिला व बालकल्याण विभागातून देण्यात येणाऱ्या प्रशिक्षणाचा कितपत लाभ मिळतो, याची पाहणी करणे आवश्यक असल्याची मागणी सुरेंद्र गुदगे यांनी केली.
============================
जि.प.अध्यक्ष निवासस्थान परिसरात होणार कॉम्प्लेक्‍स.
सातारा - जिल्हा परिषद मालकीच्या जागेतून उत्पन्न सुरू होण्याचा मार्ग मोकळा होत आहे. त्या मार्गाची सुरुवात खुद्द जिल्हा परिषद अध्यक्षांच्या निवासस्थानापासून होणार आहे. निवासस्थान परिसरात तीन मजली व्यावसायिक इमारत उभारण्याच्या आराखड्याला मंजुरी देण्यात आली. त्याचबरोबर जिल्हा परिषदेच्या बांधकाम दक्षिण व उत्तर विभागातील काम पेपरलेस करण्याच्या दृष्टीने सॉफ्टवेअर तयार करण्यात आले असून आता अंदाजपत्रकाच्या मंजुरीपासून ते कंत्राटदाराला बिले जमा करण्याचे काम ऑनलाइन पद्धतीने होणार आहे.
जिल्हा परिषदेच्या सर्वसाधारण सभेत दोन्ही विषयांचे प्रोजेक्‍टरव्दारे सादरीकरण करण्यात आले. सादरीकरणानंतर सदस्यांच्या शंका व प्रश्‍नांची उत्तरे अधिकारी आणि पदाधिकाऱ्यांनी दिल्यानंतर दोन्ही विषयांना मंजुरी देण्यात आली. सातारा-कोरेगाव मार्गावरील विसावानाका परिसरातील 10 हजार 400 चौ.मी. क्षेत्रात जिल्हा परिषद अध्यक्षांचे निवासस्थान आहे. त्यापैकी 415 चौ.मी.जागेत निवासस्थान आहे तर उर्वरित 9 हजार 985 चौ.मी.जागेचा परिसर रिकामा आहे.परिसरात व्यावसायिक इमारत उभारण्यासाठी वास्तूविशारदाची नेमणूक दि. 14 ऑगस्ट 2018 रोजी करण्यात आली होती. वास्तूविशारदांनी तयार केलेल्या तीन मजली इमारतीच्या आराखड्याचे सादरीकरण मंगळवारी झालेल्या सर्वसाधारण सभेत करण्यात आले. आराखड्यानुसार दोन फेजमध्ये इमारत तयार होणार आहे. एका फेजमध्ये तीन मजल्यांवर प्रत्येकी 37 प्रमाणे 111 गाळे बांधण्यात येणार आहेत. तर दुसऱ्या फेजमधील इमारतीमध्ये देखील तीन मजले असून त्यामध्ये प्रत्येकी 31 प्रमाणे 93 गाळे बांधण्यात येणार आहेत.
एकूण 204 गाळ्यांच्या बांधकामसाठी 24 कोटी 26 लाख 33 लाख रूपये खर्च अपेक्षित आहे. सर्व गाळे भाडेतत्त्वावर देण्यात येणार असून प्रति चौरसफुटासाठी 2 हजार रूपये प्रमाणे अनामत रक्कम जमा करून घेण्यात येणार असून त्याची संख्या 15 कोटी 92 लाख 558 रूपये इतकी होत आहे. एकूण 79 हजार 627 चौरस फुट जागेचे भाडे शासकीय दरानुसार प्रति चौरस फुट 112 रूपये प्रमाणे प्रति महिना उत्पन्न मिळणार आहे. सद्यःस्थितीत संपूर्ण कामासाठी 24 कोटी 26 लाख 33 हजार रूपये खर्च होणार आहे. त्यासाठी जिल्हापरिषदेच्या अंदाजपत्रकात तूर्त 5 कोटी रूपयांची तरतूद करण्यात आली आहे.
=======================
पुणे-बेंगलोर महामार्गावर दुचाकी घसरुन दुचाकीवरील दोघांचा मृत्यू
पुणे-बेंगलोर महामार्गावर दुचाकी घसरुन दुभाजकावर आदळली. या भीषण अपघातात दुचाकीवरील दोघांची मृत्यू झाला आहे. अशोक दत्ताराम गावकर (वय 50, रा. कोळीवाडी, मुंबई) व आनंद दिवाकृष्ण जाधव महाराज (वय 42, रा. प्रभादेवी, मुंबई) अशी अपघातातील मृतांची नावे आहेत. अधिक माहिती अशी, अशोक गावकर आणि आनंद जाधव हे गुरुपौर्णिमेसाठी कराडला जाण्यासाठी रात्री दहा वाजता मुंबईहून दुचाकीवरुन निघाले होते. सकाळी साडेसहा वाजण्याच्या सुमारास ते शिरवळ गावच्या हद्दीमध्ये आले असताना त्यांची दुचाकी महामार्गावरुन घसरली आणि दुभाजकावर जाऊन आदळली.यावेळी पाठीमागून आलेल्या एका खाजगी बसचालकाने बस थांबवून तात्काळ रुग्णवाहिकेला पाचरण केले. मात्र दुचाकी चालक अशोक गावकर यांचा जागीच मृत्यू झाला तर आनंद जाधव यांना शिरवळ येथील खाजगी रुग्णालयामध्ये दाखल करण्यात आले. परंतु उपचारादरम्यान त्यांचाही मृत्यू झाला. या घटनेची फिर्याद बसचालक रुमीद विनायक जाधव (रा.सारोळा जि. पुणे) यांनी शिरवळ पोलीस ठाण्यात दिली असून अधिक तपास सहाय्यक पोलीस उपनिरीक्षक बी. एच. भोईटे व पोलीस हवालदार धीरज यादव हे करीत आहे.
==================
नवीन मुख्य कार्यकारी अधिकारी संजय भागवत
सातारा - जिल्हा परिषदचे मुख्य कार्यकारी अधिकारी डॉ. कैलास शिंदे यांची पालघरच्या जिल्हाधिकारीपदी पदोन्‍नती झाली आहे. त्यांच्या जागी एमएमआरडीएचे अतिरिक्त जिल्हाधिकारी संजय भागवत यांची नियुक्ती झाली आहे.
डॉ. शिंदे यांचा स्वच्छता दर्पण 2017, स्वच्छता सर्वेक्षण 2018, स्वच्छ सुंदर शौचालय स्पर्धा हे केंद्रस्तरावरील महत्त्वाचे पुरस्कार मिळवून देण्यात महत्त्वाचा वाटा आहे.जिल्ह्यातील 137 गावांमध्ये कचरा वर्गीकरण व गांडूळ खत निर्मितीचे प्रकल्प उभारून राज्याला दिशादर्शक काम केले आहे. या प्रकल्पांना राज्यातील व राज्याबाहेरील किमान 5 हजार ग्रामपंचायत व 24 जिल्हा परिषद पदाधिकार्‍यांनी भेटी दिल्या आहेत. जिल्ह्यातील प्रत्येक गावातील शाळा, ग्रामपंचायत, अंगणवाडीमध्ये प्लास्टिक संकलन केंद्र स्थापन केले.तसेच जिल्ह्यातील यात्रा स्थळ, बाजारपेठ, मोठ्या ग्रामपंचायती, पर्यटन स्थळावर प्लास्टिक बंदीची धडक मोहीम राबविली. स्वच्छ भारत मिशनच्या दुसर्‍या टप्प्यात घनकचरा व सांडपाणी व्यवस्थापनाबाबत जनजागृती केली.
समाजकल्याण विभागामार्फत जिल्ह्यातील वंचित वस्त्यांना 10 ते 15 वर्षांपासून विकास निधी मिळाला नव्हता, त्यांना निधी देऊन विकासकामे करण्यास यश मिळाले. शालेय मुलींना सायकल वाटप, पिण्याच्या पाण्यासाठी निधी, सातारा जिल्ह्यात ड्रोनमार्फत सर्व्हे, शाळा बांधकाम व दुरुस्तीसाठी निधी, पुणे विभागात शिक्षणासाठी समृद्धी पर्व हा कार्यक्रम राबवण्यासाठी पुढाकार घेतला.
आरोग्य विभागामार्फत प्राथमिक आरोग्य केंद्रात माहेर वाशिण योजना राबवण्यासाठी प्रयत्न केले. अर्थ विभागासह विविध विभागातील कामात सुधारणा व्हावी यासाठी वर्क अ‍ॅन्ड अकौटंट मॅनेजमेंट सिस्टिम ही प्रणाली विकसीत केली. तसेच विविध विभागात नाविन्यपूर्ण योजना राबविण्यासाठी प्रयत्न केले.
नवीन मुख्य कार्यकारी अधिकारी संजय भागवत यांच्या संपर्क साधला असता ते म्हणाले, पश्‍चिम महाराष्ट्रात प्रथमच बदली झाली आहे. यापूर्वी रत्नागिरी, चंद्रपूर, लातूर, वर्धा, सिडको, म्हाडा, सिध्दीविनायक मंदिर ट्रस्ट या ठिकाणी विविध पदांवर काम केले आहे. डॉ. राजेश देशमुख, डॉ. कैलास शिंदे यांनी जिल्हा परिषदेमध्ये जे उपक्रम राबवले ते उपक्रम पुढे चालूच ठेवणार आहे. पदाधिकारी व अधिकार्‍यांना बरोबर घेवून काम करणार आहे. येत्या आठवड्याभरात पदाचा कार्यभार स्वीकाणार असल्याचे त्यांनी सांगितले
====================
