लिंगमळा धबधबा वाहू लागला
सातारा :
धुवाँधार पावसाने महाबळेश्‍वरमधील वेण्णा लेक पाठोपाठ लिंगमळा धबधबाही ओसंडून वाहू लागला आहे. येथील निसर्गसौंदर्याचा आनंद लुटण्यासाठी महाबळेश्‍वरमध्ये वीकएंडला चांगलीच गर्दी झाली होती. संततधार पावसाने वेण्णालेकच्या पाणीपातळीत वाढ झाली आहे. शनिवार व रविवार या वीकएंडला असंख्य हौशी पर्यटक मुसळधार पावसात महाबळेश्‍वरमध्ये पर्यटनास आले होते. पर्यटनास आलेले पर्यटक वेण्णालेक परिसरात धुके, धुवाँधार पावसात भिजण्याचा आनंद लुटताना पाहावयास मिळत आहेत.
..........
गोंदवलेकर महाराजांच्या दिंडीचे प्रस्थान
सातारा :
श्री ब्रम्हचैतन्य महाराज गोंदवलेकर यांच्या पायी दिंडीचे सोमवारी सकाळी आषाढी वारीसाठी पंढरपुरकडे प्रस्थान झाले. महाराज आषाढी वारी करीत होते. श्रींच्या पश्चात आजही हा पायी दिंडी सोहळा अविरतपणे सुरू आहे. समाधी मंदिर समिती व समस्त वारकरी मंडळाच्या वतीने दर वर्षी या दिंडी सोहळ्याचे आयोजन केले जाते. सकाळी नऊच्या सुमारास श्रींच्या समाधी मंदिरात आरतीनंतर श्रींच्या पादुका व प्रतिमेचे विधिवत पूजन करण्यात आले. दिंडीचा म्हसवड, पिलीव, भाळवणी व वाखरी येथे मुक्काम करून वारी दशमीला इसबावी येथील श्री गोंदवलेकर महाराज मठात जाईल. द्वादशीला दिंडी परतीचा प्रवास करेल.
........
पावसाचा जोर वाढला;
जनजीवन विस्कळित
सातारा :
जिल्ह्याच्या पश्‍चिमेकडील महाबळेश्‍वर, वाई, जावली, सातारा या तालुक्यात धुवाँधार पाऊस कोसळत आहे. दरड कोसळणे, झाडे उन्मळून पडणे, घरांची पडझड, पूल खचणे असे प्रकार घडत आहेत. जनजीवन कोलमडून पडले आहे. साताऱ्यात शाहुपुरीमध्ये शिवसमर्थ कॉलनीमधील अनेक घरांमध्ये पाणी घुसले आहे.
भांबवली रस्त्यावर दरड कोसळली असून, सातारा व साबळेवाडीत घरांच्या भिंती पडल्या. या पावसाने डोंगरदऱ्यातील नागरिकांना बेहाल केले असून, अनेक ठिकाणची वाहतूक विस्कळीत झाली आहे.
जिल्ह्याच्या पश्‍चिमेकडील महाबळेश्‍वर, वाई, जावली, सातारा या तालुक्यात पावसाचा जोर वाढला असून, जनजीवनावर विपरीत परिणाम झाला आहे. साताऱ्यात जोरदार सरी कोसळत असून, माची पेठेतील एका घराचा पाया ढासळला आहे. सदर बझारमधील कूपर कॉलनीनजीकही पूल धोकादायक बनल्याने वाहतूक वळवण्यात आली आहे.
कास, बामणोली खोऱ्यात पावसाने हाहाकार उडवून दिला आहे. भांबवली-तांबी रस्त्यावर दरड कोसळल्यामुळे वाहतूक ठप्प झाली आहे. परिणामी पुणे येथील पर्यटकांचा ग्रुप अडकून पडला. या परिसरात रस्ते खचण्याचे प्रकारही घडले. त्यामुळे तांबी, भांबवली, धावली, जुंगटी, जळकेवाडी या गावांचा संपर्क तुटला आहे. कास परिसरातील पूल पाण्याखाली गेला असून, पुलाच्या पलिकडील अंधारी, मुनावळे, उंबरी, म्हावशी, तेटली, बामणोली, शेंबडी, कारगाव या गावांकडे जाणारी वाहतूक विस्कळित झाली आहे. जावलीत कुसुंबी-कोळघर मार्गावरही दरड कोसळली. तालुक्यातील पावसाचा जोर वाढला आहे.
