म. टा. प्रतिनिधी, कोल्हापूर

राधानगरी विधानसभा मतदारसंघातून राष्ट्रवादीच्या तिकिटावर लढण्यासाठी माजी आमदार के. पी. पाटील यांच्यासह पक्षाचे जिल्हाध्यक्ष ए. वाय. पाटीलही इच्छुक आहेत. नव्या चेहऱ्याला संधी द्या, असे ए. वाय. म्हणत असताना अचानक रणजित व विकास या के.पीं.च्या मुलांनी पक्षाकडे अर्ज भरल्याने मेहुण्या-पाहुण्यांत वाद वाढण्याची शक्यता निर्माण झाली आहे.

राधानगरी मतदारसंघातून के.पी. पाटील यांनी पाचवेळा विधानसभा लढवली. त्यामध्ये ते दोनवेळा निवडून आले. गेल्या चार वर्षांपासून ए.वाय. यांनीसुद्धा विधानसभेची तयारी सुरू केली आहे. जिल्हा बँक, जिल्हा परिषद, बिद्री साखर कारखान्याच्या माध्यमातून संपर्क मोहीम राबवत त्यांनी जोरदार तयारी केली आहे. के.पी. देखील पुन्हा लढण्यासाठी इच्छुक आहेत. त्यामुळे दोघांपैकी पक्ष कुणाला उमेदवारी देणार याकडे मतदारसंघाचे लक्ष लागले आहे.

यावेळी नव्या चेहऱ्याला संधी द्या, अशी मागणी करत ए.वाय. प्रचाराला लागले आहेत. आपली भूमिका त्यांनी पक्षाध्यक्ष शरद पवार यांच्यापर्यंत पोहोचवली आहे. नव्या चेहऱ्याला संधी देण्याचा निर्णय झाल्यास रणजित अथवा विकास यांपैकी एकाला ती मिळावी यासाठी के.पी.नी फिल्डिंग लावली आहे. यामुळे ए.वाय. समर्थकांत नाराजी पसरली आहे. ११ वेळा भुदरगडला संधी मिळाली आहे, आता राधानगरीला द्या, अशी मागणी करत ए.वाय. यांचे नाव पुढे केले जात आहे. यामुळे या दोन पक्षांत तिकीटासाठी चुरस निर्माण झाली आहे.

०००

कोट...

वीस वर्षे पक्षाचे काम निष्ठेने केले आहे. चार वर्षे विधानसभेची तयारी केल्याने पक्षाने आपल्यालाच उमेदवारी द्यावी, अशी मागणी केली आहे. पक्ष घेईल तो निर्णय मान्य आहे. उमेदवारी दिली अथवा नाही दिली तरी पक्षासोबतच राहू.

ए. वाय. पाटील, जिल्हाध्यक्ष राष्ट्रवादी काँग्रेस

००००

कोल्हापूर

सोयीच्या ठिकाणच्या बदलीसाठी चुकीची माहिती भरल्याप्रकरणी जिल्हा परिषदेने कारवाई केलेल्या ६८ शिक्षकांनी हायकोर्टात याचिका दाखल केली आहे. जिल्हा परिषदेच्या कारवाईच्या विरोधात दाखल याचिकेवर बुधवारी सुनावणी झाली. जि.प. प्रशासनाने त्यांच्यावर कायमस्वरुपी एक वेतनवाढ रोखण्याची व बदलीची कारवाई केली आहे. यापूर्वी कोर्टाने प्रशासन आणि शिक्षकांचे म्हणणे ऐकून घेतले आहे. याप्रश्नी पुढील सुनावणी आता नऊ जुलै रोजी होईल, असे बुधवारच्या सुनावणीप्रसंगी कोर्टाने म्हटले आहे.

फोटो आहे...

म. टा. प्रतिनिधी, कोल्हापूर

'कोल्हापूर महापालिका व इचलकरंजी नगरपालिकेने मे २०२० पर्यंत पंचगंगा नदीचे प्रदूषण रोखण्याबाबत उपाययोजना कराव्यात, अन्यथा कारवाई केली जाईल,' असा इशारा पर्यावरण मंत्री रामदास कदम यांनी दिला. राज्यातील महापालिका, जिल्हा परिषदा व नगरपालिका क्षेत्रातील पाणी प्रदूषणाबाबत मुंबई येथे बुधवारी बैठक झाली. यावेळी त्यांनी हा इशारा दिला.

नोव्हेंबर महिन्यात पर्यावरण मंत्री कदम यांनी जयंती नाला, एसटीपी प्लांट आणि पंचगंगा नदीची पाहणी केली होती. त्या अनुषंगाने त्यांनी आयुक्त डॉ. मल्लिनाथ कलशेट्टी व सीईओ अमन मित्तल यांना कोल्हापूर व इचलकरंजी शहरातून होणारे पाणी प्रदूषण रोखण्यासाठी प्रयत्न करण्याच्या सूचना मंत्री कदम यांनी दिल्या. यावेळी आयुक्तांनी पंचगंगा प्रदूषण रोखण्यासाठी केलेल्या उपाययोजनांची माहिती दिली. तसेच शहरातील १२ नाल्यांतून होणारे सांडपाणी रोखण्यासाठी लवकरच कामाला सुरुवात होणार असल्याचे सांगितले. मे महिन्यापासून शहरातील श्रमदानातून करण्यात येत असलेल्या नालेसफाईची माहिती दिली. महापालिकेच्या या कामाबद्दल मंत्री कदम यांनी त्यांचा गौरव केला. पंचगंगा प्रदूषणमुक्त करण्यासाठी उर्वरित नाले अडविणे व वळविणे यांचे काम लवकरच पूर्ण करण्यात येणार असल्याचे सांगितले.

बैठकीस जिल्हा परिषदेचे सीईओ अमन मित्तल, सहसंचालक वाय. डी. सोनटक्के, उपप्रादेशिक अधिकारी प्रशांत गायकवाड, जलअभियंता सुरेश कुलकर्णी, आदी उपस्थित होते.

०००००

मालट्रक पलटी झाल्याने वाहतूक विस्कळीत

सातारा :

पुणे-बेंगळूरू राष्ट्रीय महामार्गावरील उडतरे (ता. वाई) या गावानजीक मालट्रक महामार्गावरतीच पलटी झाल्याने एका मार्गिकेवरील वाहतूक विस्कळीत झाली. सुदैवाने जीवितहानी झाली नाही, मात्र केवळ दैव बलवत्तर म्हणूनच चालक व क्लिनरचे प्राण वाचले असले तरी ते जखमी आहेत.

बुधवारी सकाळी आठ वाजता पुणे बाजूकडून कराडच्या दिशेने निघालेल्या माल ट्रक क्रमांक एम एच ०९ सीयू ३८४ च्या चालकाचा ट्रकवरील ताबा सुटल्याने तो बाजूच्या भुयारी मार्गाच्या पुलाच्या कठड्यावरती जावून धडकला. मात्र ट्रकचा वेग जास्त असल्याने कठड्याला धडकून पलटी झाला. त्यामुळे पुण्याहून सातारा बाजूकडे जाणारा मार्ग बंद होऊन अपघातग्रस्त ट्रक व त्यातील प्लास्टिक साहित्य, अन्य कच्च्या मालाची पोती फुटून माल रस्त्यावर पसरला होता. सकाळी अपघात झाल्याने उडतरे ग्रामस्थांनी भुईंज पोलीस ठाण्यात कळविले. भुयारी मार्गाचा पुलाचा कठडा तोडून जर ट्रक सेवा रस्त्यावरती पडला असता मोठी जीवितहानी झाली असती.

............

डॉ. इंद्रजित मोहितेंची

साखर आयुक्तांकडे धाव

कराड :

कृष्णा सहकारी साखर कारखान्याच्या विद्यमान संचालक मंडळाने सुमारे ४५०० सभासदांवर अक्रियाशील करण्याची प्रक्रिया गेल्या २२ एप्रिलच्या ठरावाने अंमलात आणली आहे. सदरच्या सभासदांना सहकारी कायदा १९६०च्या कलम २३ प्रमाणे खुले सभासदत्व देण्यात आले असताना त्या कलमामध्ये अशा प्रकारच्या अक्रियाशील सभासदत्वाची वर्गवारीची तरतूदही नाही. तरी देखील विद्यमान संचालक मंडळाने सुमारे ४५०० सभासदांना अक्रियाशील ठरविण्याची कार्यवाही हाती घेतली आहे. या विरोधात कृष्णा कारखान्याचे माजी चेअरमन डॉ. इंद्रजित यांनी संबंधित सभासदांना बरोबर घेत साखर आयुक्तांकडे दाद मागितली होती. त्यांच्या या अपिलास दखल करून घेत बुधवारी साखर आयुक्तांनी म्हणणे मांडण्याचे आदेश दिले आहेत. येत्या महिन्यांमध्ये आपले म्हणणे सादर करण्याचे आदेश दिले आहेत.

...........

अतुल देशपांडे, सातारा

संतश्रेष्ठ ज्ञानेश्वर महाराजांच्या भक्तांनी स्वयंस्फूर्तीने लावलेली शिस्तबद्ध उभी रांग.., माउलींच्या अश्वांनी घेतलेली दौड.., दिंडीतील वारकऱ्यांच्या पायांनी धरलेला ठेका.., टाळ-मृदंगांच्या गजरात रंगलेल्या फुगड्या अन् हरिनामाचा गजर करीत विठ्ठलाला आळवीत भारावलेल्या वातावरणात ज्ञानेश्वर महाराजांच्या पालखी सोहळ्यातील वारीच्या वाटेवरच्या पहिल्या उभ्या रिंगणाचा नेत्रदीपक सोहळा चांदोबाचा लिंब येथे उत्साहात पार पडला.

हरी नामाच्या गजरात दुमदुमते आसमान व वरुणराजाचा हलका शिडकावा या अल्हाददायी वातावरणात लाखो नेत्रांनी हा सोहळा याची देही याची डोळा अनुभवला. आज, गुरुवारी पालखी सोहळा फलटण नगरीत प्रवेश करणार आहे. दरम्यान, या रिंगण सोहळ्यात स्थानिक कार्यकर्त्यांमुळे चेंगराचेंगरी झाल्याची घटना घडली. या चेंगराचेंगरीत काही भाविक जखमी झाले आहेत.

संतश्रेष्ठ श्री ज्ञानेश्वर महाराजांचा पालखी सोहळा लोणंद येथील मध्यान्ह आरती झाल्यानंतर बुधवारी दुपारी दीड दिवसाच्या मुकक्कामानंतर हरिनामाच्या गजरात तरडगाव मुक्कामाकडे मार्गस्थ झाला. माउलींचा लाखो वैष्णवजनांसह खंडाळा तालुक्यातून फलटण तालुक्यात प्रवेश झाला. फलटणच्या कापडगाव येथील सरदेचा ओढा येथे माउलींचे स्वागत फलटण तालुक्याच्या वतीने जिल्हा परिषद अध्यक्ष संजीवराजे नाईक-निंबाळकर, कृषी उत्पन्न बाजार समितीचे सभापती रघुनाथराजे नाईक-निंबाळकर आदी मान्यवरांनी स्वागत केले. पालखी सोहळ्याने फलटण तालुक्यात प्रवेश केल्यानंतर विठ्ठलभक्तांना वेध लागले होते ते या सोहळ्यातील पहिल्या उभ्या रिंगणाचे. संपूर्ण पालखी सोहळ्यातील वारकऱ्यांची व भाविकांची पावले लगबगीने चांदोबाच्या लिंब या दिशेने पडत होती. हा सोहळा जसा पुढे पुढे सरकत होता, तस तसे रस्त्यांच्या दुतर्फा असणाऱ्या स्थानिक नागरिकांच्या चेहऱ्यावरून आनंद ओसांडून वाहत होता. रस्त्याकडील शेतामध्ये ठिकठिकाणी भारुडे, भजने रंगली होती. भारुडात रंगत येत असतानच सोहळा पुढे सरकत चांदोबाचा येथे आला. या ठिकाणी पंचक्रोशीतील भाविक भक्त व वारकऱ्यांनी सोहळ्यातील पहिले उभे रिंगण पाहण्यासाठी मोठ्या प्रमाणात गर्दी केली होती.

दरम्यान, माउलींचा रथ चांदोबाचा लिंब येथे आला तेव्हा गर्दी असल्याने रिंगण लावताना त्रास होत होता. अखेर पालखी सोहळ्यातील बाळासाहेब चोपदार, राजाभाऊ चोपदार, रामभाऊ चोपदार यांनी चोप आकाशाकडे धरताच सर्वत्र शांतता पसरली. कोणतीही सूचना न देता वारकऱ्यांच्या गर्दीतील लाखो वारकरी दुतर्फा झाले व मध्ये अश्व धावत येण्यासाठी जागा ठेवण्यात आली. रिंगण लावून घेतल्यानंतर २७ दिंड्यांमधून माउलींचा अश्‍व पुजाऱ्यांनी दौडत आणला. माउलींच्या पादुकांचे दर्शन घेऊन अश्‍व मागील दिंड्यापर्यंत नेल्यांनतर पुन्हा परत माघारी पळत आला. माउलींच्या रथाजवळ अश्‍व आल्यांनतर सोहळा प्रमुखांनी अश्वास पुष्पहार घालून खारीक-खोबऱ्याचा नैवद्य दाखविला. या नंतर अश्वाने दौड घेतली. पुढे माउलींचा अश्व व मागे स्वारीचा अश्व, अशी दौड पूर्ण झाली. अश्वास प्रत्यक्ष माउलींचा आशिर्वाद असतो, या भावनेने अश्व ज्या ठिकाणाहून गेला आहे, तेथील त्याच्या पाया खालची माती कपाळी लावण्यासाठी भाविकांची एकच झुंबड उडाली होती. अशा प्रकारे पालखी सोहळ्यातील पहिले उभे रिंगण उत्साहात पार पडले. यानंतर पालखी सोहळा तालुक्यातील पहिल्या मुक्कामासाठी तरडगाव येथील पालखी तळावर एकदिवसाच्या मुक्कामाकरिता विसावला.

.......

कोल्हापूर टाइम्स टीम

पालकमंत्री चंदकांत पाटील यांनी हनिनमाळ (ता. गडहिंग्लज ) गावात वाचन संस्कृती रुजावी, यासाठी गावातील ओमसाई सार्वजनिक वाचनालयास २०० पुस्तके प्रदान केली. पालकमंत्र्यांनी आमदार आदर्श ग्राम योजनेअंतर्गत हनिनमाळ गाव दत्तक असून गावाच्या भौतिक विकासाबरोबर आर्थिक, सामाजिक, आरोग्यदायी, पर्यावरण आणि शैक्षणिक विकासासाठी विविध उपक्रम गावामध्ये राबवले जात आहेत.

तहसीलदार रामलिंग चव्हाण यांच्या उपस्थितीत पुस्तके भेट देण्यात आली. त्यांनी वाचन संस्कृतीचे महत्व उपस्थित लोकांना सांगितले. यावेळी गडहिंग्लज तालुका, योजनेचे समन्वयक विजयसिंह पाटील, सरपंच राजेंद्र चव्हाण, उपसरपंच वंदना कुरळे, ग्रामसेवक विनायक कांबळे, तलाठी गीता पाटील, ओमसाई वाचनालयाचे अध्यक्ष महादेव नलवडे आदी उपस्थित होते. तुकाराम जाधव यांनी प्रास्ताविक केले तर महादेव नलवडे यांनी आभार मानले.

कोल्हापूर टाइम्स टीम

'राजकीय नेत्यांमध्ये उठबस करून पदे मिळवणारे, पद मिळाल्यानंतर त्यांनाच निरोप देऊन प्रसंगी त्यांच्याविरोध निवडणूक लढवणारे आणि काहीवेळा निवडणुकांत खो घारणारे महापालिकेतील कारभारी म्हणजे चहा पेक्षा किटली गरम, असा प्रकार आहे,' अशी टीका राष्ट्रवादी सेवादलाचे प्रदेश संघटक अनिल घाटगे यांनी प्रसिद्धी पत्रकांद्वारे लगावला आहे.

नुकत्याच झालेल्या महापौर निवडीच्या पार्श्वभूमीवर कारभारी नगरसेवकांनी केलेल्या राजकारणावर त्यांनी पत्रकाद्वारे टीका केली. पत्रकात म्हटले आहे, 'एका कारभाऱ्यांने महापालिकेतील निवडणूक लढवली. अर्थ आणि काम नसल्यामुळे त्यांचा पराभव झाला. माजी आमदार महादेवराव महाडिक यांच्या गोटात शिरकाव करत स्वीकृत सदस्यपद मिळवले. नंतर त्यांचीही साथ सोडली. मनपामध्ये पदांची खांडोळी करत त्यांनी शहर विकासाचा बट्ट्याबोळ केला. श्रीपतराव बोंद्रे, उदयसिंगराव गायकवाड, रत्नाप्पाण्णा कुंभार यांनी सर्वांना सोबत घेवून महापालिकेला मोठे केले. मात्र या कारभाऱ्यांमुळे महापालिका दिवसेंदिवस गाळात रूतत चालली आहे. पैस वाटून जोडण्या लावण्यात काय मोठी अक्कल लागत नाही,' अशी टीकाही त्यांनी केली आहे.

पायाभूत सुविधांना निधी हवा

शहराला अमृत योजनेतंर्गत निधी मिळाला. या निधीचा योग्य विनियोग झाला पाहिजे. योजना झाल्यानंतर अर्थसंकल्पामध्ये तरतूद केली जाते. पण त्यानंतर प्रकल्प खर्चात वाढ होऊन प्रकल्प रेंगाळण्याची शक्यता आहे. सुरू असलेले प्रकल्प पूर्ण करण्यासाठी वाढीव खर्चाची अर्थसंकल्पामध्ये तरतूद केली पाहिजे. थेट पाइपलाइन योजना सुरू आहे. पण प्रकल्प खर्चामध्ये वाढ होत आहे, त्यासाठी तरतूद करुन निधीचा प्रश्न मार्गी लावला पाहिजे. शहर विकासाचा आराखडा जाहीर झाल्या आहे. त्यासाठी लागणाऱ्या निधीसाठी केवळ जिल्हा नियोजन मंडळावर विसंबून न राहता केंद्राने स्वतंत्र बजेट दिले पाहिजे. कोल्हापूर विमानसेवा सुरू झालेली असली, तरी विस्तारीकरणाचा प्रश्न सोडवावा लागेल. त्यासाठी पुनर्वसनासाठी अर्थसंकल्पामध्ये तरतूद करावी लागेल.

शशिकांत फडतारे, माजी उपसंचलाक, नगररचना (पुणे विभाग)

पर्यटनासाठी तरतूद अपेक्षित

पुण्यानंतर सर्वात वेगाने विकसित होणारे शहर म्हणून कोल्हापूरची ओळख. मात्र शहराकडे मोठे खेडे यादृष्टीने पाहिले जाते. परिणामी येथील प्रकल्पांना पुरेसा निधी मिळत नसल्याने कामे प्रलंबित राहत आहेत. त्यासाठी सकारात्मकदृष्टीने शहर विकासाच्या योजना मार्गी लावण्यासाठी केंद्राने अर्थसंकल्पामध्ये तरतूद करण्याची आवश्यकता आहे. शहरासह जिल्ह्यात पर्यटकांना आकर्षित करणारी अनेक स्थळे आहेत. या स्थळांच्या विकासाठी मास्टर प्लॅन तयार करून केंद्राने विशेष निधीची तरतूद केली पाहिजे. पर्यटनवाढीला चालना मिळाल्यास शहराचा विकास झपाट्याने वाढेल. राधानगरी, काळम्मावाडी धरणामुळे येथे विपुल प्रमाणात पाणीसाठा आहे. मात्र धरणातून सोडलेले पाणी प्रदूषित होणार नाही, याची काळजी घेताना पंचगंगा नदी प्रदूषण रोखण्यासाठी अर्थसंकल्पामध्ये निधीची घोषणा करावी.

वैशाली डकरे, माजी महापौर

केंद्राच्या विशेष निधी गरजेचा

पाणीपुरवठा व सांडपाणी वाहून नेण्यासाठी ड्रेनेजपाइपलाइन सक्षम करण्याची आवश्यकता आहे. जुन्या पाइपलाइनवर शहर अवलंबून असल्याने त्या बदलण्यासाठी केंद्र सरकारने निधी दिली पाहिजे. शहराचे नागरीकरण वेगाने होत असताना अरुंद रस्त्यांमुळे वाहतूक कोंडीची समस्या निर्माण होत आहे. त्यासाठी पार्किंग स्लॉट तयार करण्याबरोबर बहुमजली पार्किंग सुविधा वाहनधारकांना दिली पाहिजे. त्यासाठी महापालिका निधी अपुरा पडणार असल्याने केंद्रसरकारने विशेष निधी देण्याची आवश्यकता आहे. करवीर निवासनी अंबाबाई दर्शनासाठी देशभरातून भाविक येतात. भाविकांना सुविधा देण्यासाठी तीर्थक्षेत्र आराखडा मार्गी लावण्याची गरज आहे. तीर्थक्षेत्र विकास आराखडा आणि पर्यटनाला चालना देण्यासाठी येथील ऐतिहासिक स्थळांचा विकास करण्यासाठी अर्थसंकल्पामध्ये निधीची तरतूद केंद्र सरकारने करावी.

शिरीष कणेरकर, माजी महापौर

कोल्हापूर टाइम्स टीम

'मुंबई हायकोर्टाप्रमाणे सुप्रीम कोर्टातही मराठा समाजाची बाजू मांडण्यासाठी सर्वोत्तम वकिलांची फौज उभी करा,' अशी मागणी खासदार संभाजीराजे छत्रपती यांनी मुख्यमंत्री देवेंद्र फडणवीस यांच्याकडे केली आहे. त्यांनी नुकतीच मुंबईत मुख्यमंत्र्याची भेट घेऊन आरक्षण प्रश्नांवर चर्चा केली.

'आरक्षण मागणीसाठी राज्यात अनेक ठिकाणी आंदोलने झाली. आंदोलनात तरुणांची मोठी संख्या होती. त्यांच्यावर गुन्हे दाखल झाल्याने शिक्षण व नोकरीमध्ये अडचणी निर्माण होत असल्याने त्यांच्यावरील गुन्हे मागे घ्यावेत,' अशी मागणीही संभाजीराजेंनी केली. ते म्हणाले, 'मराठा समाजाला आरक्षण द्यावे, ही समाजाची मागणी रास्त होती. गेल्या चार दशकांपासून मराठा समाज लढा देत आहे. या लढ्याला आता खऱ्या अर्थाने यश आले आहे. मख्यमंत्री या नात्याने तुम्ही प्रत्येक गोष्ट गांभीर्याने घेत मराठ्यांच्या मागण्यांना सकारात्मक प्रतिसाद दिला.'

सुप्रिम कोर्टात मराठा आरक्षण टिकवणे हे राज्य सरकारसमोर मोठे आव्हान आहे याकडे संभाजीराजेंनी मुख्यमंत्र्याचे लक्ष वेधले. 'मुंबई हायकोर्टात ज्याप्रमाणे वकिलांची फौज उभारली तशीच दिल्लीत उभी करावी, असे ते म्हणाले. दिल्लीतही कुठल्या प्रकारची कमतरता राहणार नाही, असे आश्वासन देत सुप्रीम कोर्टातही वकिलांची फौज उभा केली जाईल, असे आश्वासन मुख्यमंत्री फडणवीस यांनी दिले.

कोल्हापूर: राज्य सरकारच्या ३३ कोटी वृक्ष लागवड मोहिमेसंदर्भातील आवाहनाला प्रतिसाद देत शिवाजी विद्यापीठ प्रशासनाच्यावतीने परिसरात वृक्ष लागवड मोहिमेस प्र-कुलगुरू डॉ. डी. टी. शिर्के यांच्या हस्ते प्रारंभ झाला. या मोहिमेअंतर्गत विद्यापीठ आवारात ४०० रोपे लावण्यात येणार आहेत.

यावेळी डॉ. शिर्के म्हणाले, 'राज्य सरकारने गेल्या चार वर्षांपासून वृक्षारोपण मोहिमेचा परीघ टप्प्याटप्प्याने वाढविला आहे. वृक्षारोपणाबद्दल नागरिकांमध्ये मोठ्या प्रमाणात जनजागृती होऊन या मोहिमेला दरवर्षी वाढता आणि उत्साही प्रतिसाद लाभत आहे. वृक्षारोपणाबरोबरच वृक्षसंपदेचे संरक्षण व संवर्धन करण्याच्या बाबतीतही नागरिकांत मोठी जागृती झाली आहे. शिवाजी विद्यापीठानेही सुरवातीपासून या मोहिमेला प्रतिसाद देताना आपल्या परिसरामध्ये वृक्षलागवड, त्यांचे संरक्षण व संवर्धन या बाबींकडे जाणीवपूर्वक लक्ष पुरविले आहे. दरवर्षी विद्यापीठ परिसराच्या निरनिराळ्या भागांमध्ये वेगवेगळ्या प्रकारचे वृक्ष लावून संपूर्ण परिसरामधील हिरवे क्षेत्र वाढविण्याकडे विद्यापीठ प्रशासनाने लक्ष पुरविले आहे.

यंदाही विद्यापीठाने वृक्षारोपण मोहिमेअंतर्गत सोमवारी सकाळी आठ वाजता विद्यापीठाच्या नागेशकर क्रीडा संकुल परिसरात कडुलिंब रोप लावून शुभारंभ केला. यावेळी कुलसचिव डॉ. विलास नांदवडेकर, आंतरविद्याशाखीय अधिष्ठाता डॉ. पी. डी. राऊत, क्रीडा अधिविभाग प्रमुख डॉ. पी. टी. गायकवाड, राष्ट्रीय सेवा योजना समन्वयक डॉ. डी. के. गायकवाड, उद्यान विभागाचे उपकुलसचिव डॉ. व्ही. एन. शिंदे, अधीक्षक ए. के. जाधव यांच्यासह अधिकारी, कर्मचारी, विद्यार्थी, विद्यार्थिनी तसेच नागरिकांनीही वृक्षारोपण मोहिमेत सहभाग घेतला.

अतुल देशपांडे, सातारा

पांडुरंगाच्या दर्शनाची लागलेली ओढ, ज्ञानोबा माऊली तुकाराम व विठुरायाचा जयघोष आणि टाळ मृदुंगाच्या गजरात पंढरीकडे निघालेला लाखो वैष्णवांचा मेळा गुरुवारी ऐतिहासिक फलटण नगरीत मुक्कामासाठी विसावला. या वेळी फलटणकरांनी भक्तिमय वातावरणात लाडक्या ज्ञानेश्वर माऊली भक्तांचे स्वागत केले. शुक्रवारी हा पालखी सोहळा सातारा जिल्ह्यातील शेवटच्या मुक्कामाकरिता बरड येथे विसावणार आहे.

तरडगाव येथील पालखी तळावरून सकाळी ६ वाजता सोहळ्याच्या प्रस्थानानंतर हा सोहळा सुरवडी येथे न्याहरी, निंभोरे येथे दुपारचे जेवण व वडजल येथे विसावा घेऊन व पालखी मार्गावरील गावोगावी झालेल्या स्वागताचा स्वीकार करून श्री संतश्रेष्ठ ज्ञानेश्वर महाराजांचा पालखी सोहळा लाखो विठ्ठल भक्तांसमवेत सायंकाळी फलटण शहरात दाखल झाला. या वेळी फलटण शहराच्या हद्दीवर नगराध्यक्ष नीता नेवसे, उपनगराध्यक्ष नंदकुमार भोईटे, मुख्याधिकारी प्रसाद काटकर, नगरसेवक आणि अधिकाऱ्यांनी स्वागत केले. तरडगावकरांनी जड अंतकरणाने आपल्या लाडक्या माऊलींना व लाखो वारकऱ्यांना निरोप दिल्यानंतर सोहळ्याचे सुरवडी येथे साळुंखे पाटील परिवाराच्या वतीने स्वागत करण्यात आले. या वेळी सरपंच जितेंद्र साळुंखे पाटील, उपसरपंच व सर्व सदस्य, ग्रामस्थ उपस्थित होते. तर, निंभोरे येथे खा. रणजितसिंह नाईक निंबाळकर मित्रमंडळ व सरपंच, उपसरपंच, सर्व सदस्य ग्रामस्थ यांनी स्वागत केले. वडजल येथे ग्रामस्थांनी स्वागत केले.

माउलींचा सोहळा शहरात दाखल झाल्यानंतर तो सगुणामातानगर (मलठण) सदगुरू हरीबुवा मंदिर, पाचबत्ती चौक या मार्गे ऐतिहासिक राम मंदिराजवळ आला. या वेळी नाईक निंबाळकर देवस्थान ट्रस्टतर्फे जि. प. अध्यक्ष संजीवराजे नाईक निंबाळकर यांच्यासह मान्यवरांनी स्वागत केले. त्यानंतर पालखी सोहळा गजानन चौक, महात्मा फुले चौक, सफाई कॉलनी, गिरवी नाकामार्गे फलटण येथील विमानतळावर मुक्कामासाठी विसावला. सर्वत्र टाळ मृदुंगाचा गजर व हरी नामाचा जयघोष व भगव्या पताका यामुळे अवघे फलटण शहर विठ्ठलमय झाल्याचे दृष्य दिसून येत होते.

दरम्यान, शुक्रवारी सकाळी फलटण येथून सकाळी सहा वाजता पालखी सोहळ्याचे प्रस्थान होणार आहे. सकाळी विडणी येथे न्याहरी, पिंप्रद येथे दुपारचे भोजन, वाजेगाव येथे विसावा घेऊन हा सोहळा सातारा जिल्ह्यातील शेवटच्या मुक्कामाला बरड येथे संध्याकाळी पाच वाजता दाखल होणार आहे. शनिवारी हा वैष्णवांचा मेळा दुपारी सोलापूर जिल्ह्यात प्रवेश करणार आहे.

म. टा. प्रतिनिधी, कोल्हापूर

बेळगाव जिल्ह्यातील पंत बाळेकुंद्री महाराजांनी रचलेल्या 'आरती अवधुता' या आरतीला १२५ वर्षे पूर्ण झाल्यानिमित्त रविवारी (ता. ७) करवीरनिवासिनी अंबाबाई मंदिर परिसरात महाआरतीचे आयोजन केल्याची माहिती ज्ञानदेव पुंगावकर यांनी पत्रकार परिषेदत दिली.

दत्त संप्रदायातील बाळेकुंद्री महाराजांनी १८५५ ते १९०५ या कालावधीत अवधूत संप्रदायाचा प्रचार व प्रसार केला. महाराजांनी ३८ व्या जन्मदिनी १८९३ मध्ये समता, बंधुता, विश्वशांतीचा संदेश देणारी 'आरती अवधुता' ही आरती लिहिली होती. या आरतीला यावर्षी तीन सप्टेंबर रोजी १२५ वर्षे पूर्ण होत आहेत. बाळेकुंद्री महाराजांनी २७३० पदे, ८४ आरत्या, धावे, पाळणे, कानडी पदे संकलित केली असून, ती 'श्री दत्तप्रेमलहरी' या भजनगाथा रूपात प्रसिद्ध केली आहे. बाळेकुंद्री महाराजांचे रामानंद महाराज (रामानंदनगर), गजानन महाराज (अवधूत गल्ली) हे कोल्हापुरातील त्यांचे शिष्य हेते.

महाराजांनी लिहिलेल्या 'आरती अवधुता' या आरतीस सव्वाशे वर्षे पूर्ण झाल्यानिमित्त राज्यभर या आरतीचे सामूहिक कार्यक्रम सुरू आहेत. कोल्हापुरात आरती अवधुता वर्ष साजरे करण्यासाठी रविवारी विविध कार्यक्रमांचे आयोजन केले आहे. सकाळी नऊ ते दुपारी चारपर्यंत कावळा नाका येथील गीता मंदिरमध्ये महाराजांच्या विचारांचे वाचन, प्रवचन, भजनाचा कार्यक्रम होणार आहे. तसेच महाप्रसादाचे वाटप होणार आहे. सायंकाळी पाच वाजता अंबाबाई मंदिरात महाआरती होणार आहे. यावेळी बाळेकुंद्री महाराजांनी लिहिलेली अंबाबाईची आरतीही म्हटली जाणार आहे.

पत्रकार परिषदेला आप्पासाहेब दड्डीकर, सचिन पंतबाळेकुंद्री, अशोक देसाई, संभाजी कोगेकर, सुबोध खाडे उपस्थित होते.

००००

कोल्हापूर टाइम्स टीम

'मुंबई हायकोर्टाप्रमाणे सुप्रीम कोर्टातही मराठा समाजाची बाजू मांडण्यासाठी सर्वोत्तम वकिलांची फौज उभी करा,' अशी मागणी खासदार संभाजीराजे छत्रपती यांनी मुख्यमंत्री देवेंद्र फडणवीस यांच्याकडे केली आहे. त्यांनी नुकतीच मुंबईत मुख्यमंत्र्याची भेट घेऊन आरक्षण प्रश्नांवर चर्चा केली.

'आरक्षण मागणीसाठी राज्यात अनेक ठिकाणी आंदोलने झाली. आंदोलनात तरुणांची मोठी संख्या होती. त्यांच्यावर गुन्हे दाखल झाल्याने शिक्षण व नोकरीमध्ये अडचणी निर्माण होत असल्याने त्यांच्यावरील गुन्हे मागे घ्यावेत,' अशी मागणीही संभाजीराजेंनी केली. ते म्हणाले, 'मराठा समाजाला आरक्षण द्यावे, ही समाजाची मागणी रास्त होती. गेल्या चार दशकांपासून मराठा समाज लढा देत आहे. या लढ्याला आता खऱ्या अर्थाने यश आले आहे. मख्यमंत्री या नात्याने तुम्ही प्रत्येक गोष्ट गांभीर्याने घेत मराठ्यांच्या मागण्यांना सकारात्मक प्रतिसाद दिला.'

सुप्रिम कोर्टात मराठा आरक्षण टिकवणे हे राज्य सरकारसमोर मोठे आव्हान आहे याकडे संभाजीराजेंनी मुख्यमंत्र्याचे लक्ष वेधले. 'मुंबई हायकोर्टात ज्याप्रमाणे वकिलांची फौज उभारली तशीच दिल्लीत उभी करावी, असे ते म्हणाले. दिल्लीतही कुठल्या प्रकारची कमतरता राहणार नाही, असे आश्वासन देत सुप्रीम कोर्टातही वकिलांची फौज उभा केली जाईल, असे आश्वासन मुख्यमंत्री फडणवीस यांनी दिले.

कोल्हापूर : ज्येष्ठ नागरिकांना स्मार्ट कार्डची सक्ती न करता त्यांच्याकडील उपलब्ध ओळखपत्राच्या आधारे त्यांना एसटी तिकीटात ५० टक्के सवलत मिळावी अशी मागणी राजर्षी शाहू ज्येष्ठ नागरिक सेवा संघाने केली आहे. सेवा संघाचे अध्यक्ष प्राचार्य मानसिंग जगताप यांनी पत्रक प्रसिद्धीस दिले आहे.ज्येष्ठ नागरिकांकडे निवडणूक ओळखपत्र, लायसन्स, आधार कार्ड, पॅन कार्ड आहेत. या ओळखपत्राच्या आधारे तिकीट सवलत मिळावे असे म्हटले आहे. ज्येष्ठ नागरिकांना वाढत्या वयोमानामुळे एसटी कार्यालयात जाणे शक्य होत नाही. असे पत्रकांत म्हटले आहे.

चुकीच्या कारभाराचा करणार पर्दाफाश

समितीतील आठ सदस्यापैकी पाच सदस्यांच्या गेले दोन दिवस चर्चा झाली आहे. समिती सदस्यांनी यापूर्वी, काही गोष्टीकडे कारभाऱ्यांचे लक्ष वेधले होते. मात्र कारभाऱ्यांनी, सदस्यांचे म्हणणे दुर्लक्षित केले आहे. शिक्षण विभागात सध्या बदली व इतर प्रक्रियेवरुन ज्या घडामोडी सुरू आहेत, त्याचा लवकरच पर्दाफाश केला जाईल असा इशारा काही सदस्यांनी दिला आहे. दरम्यान तीन सदस्य हे सध्या सुरू असलेल्या घडामोडीबाबत अनभिज्ञ आहेत.

.. .. .

Appasaheb.mali@timesgroup.com

Tweet:Appasaheb_MT

कोल्हापूर

सार्वजनिक समारंभ असो की सरकारी कार्यक्रम, कोल्हापूर म्हणजे सिनेमांचे माहेरघर असा गाजावाजा करायचा. पण या शहरातील सिनेइंडस्ट्रीच्या विकासासाठी आवश्यक सुविधा द्यायच्या नाहीत. निधीची तरतूद करायची नाही, या राज्यकर्त्यांच्या विचित्र मानसिक कोंडीत चित्रनगरीसह कोल्हापूरच्या सिनेसृष्टी रखडली आहे. शहराचे सांस्कृतिक वैभव टिकवण्यासाठी भरीव प्रयत्न होताना दिसत नाहीत. बारा कोटी रुपये खर्चून चित्रनगरीत ज्या सुविधा केल्या, त्याचे उद्घाटन करण्याची सवडही मंत्र्यांना नाही. नूतनीकरणाच्या वर्षभरानंतरही चित्रनगरी उद्घाटनला मुहूर्त लाभला नाही. आणि दुसरा टप्प्यातील विकास आराखड्याला सुरुवात नाही.

'उद्घाटन लांबले तरी, कोल्हापूरच्या चित्रनगरीचे अन्य मोठ्या शहरात मार्केटिग करण्याची सुबुध्दी सांस्कृतिक विभागाला सुचली नाही. येथील सुविधा, कोल्हापुरातील आवश्यक तांत्रिक बळ, विमानसेवा, पंचतारांकित हॉटेल्स सुविधांची अन्यत्र प्रसिद्धी केली असती तर वर्षभरात चित्रनगरी 'लाइट, कॅमेरा, अॅक्शन'चा नारा घुमला असता' अशा प्रतिक्रिया सिने व्यावसायिकांतून उमटत आहेत. चांगल्या सुविधांच्या प्रसिद्धीऐवजी चित्रनगरीतील जादा भाडे व उपयुक्त लोकेशन्सचा अभाव यामुळे चित्रनगरी चित्रीकरणाविना उभी आहे. चित्रनगरी विकासाचा दुसरा टप्पा विकसित करताना सिनेमा व्यावसायिकांची मते जाणून घ्यावीत, अशी आग्रही मागणी आहे.

मुंबईसारख्या मोठ्या शहरात जी लोकेशन्स उपलब्ध नाहीत, ती कोल्हापूरच्या चित्रनगरीत विकसित करावीत, जेणेकरुन सिनेमा आणि मालिका निर्मिती करणाऱ्या मोठ्या संस्था कोल्हापूरला पसंती देतील. दरम्यान, चित्रनगरी विकासाच्या दुसऱ्या टप्प्यात आवश्यक लोकेशन्स तयार करताना सिनेमा क्षेत्रातील प्रतिनिधींचे मत विचारात घ्यावे, अशी अपेक्षा महामंडळाचे संचालक सतीश बीडकर, रणजित जाधव यांनी व्यक्त केली. दुसऱ्या टप्प्यातील लोकेशन निर्मितीसाठी त्यांनी काही लोकेशनचे डिझाइन सादर केले आहेत. यामध्ये बदलते ग्रामजीवन, चौसोफी वाडा अशा विविध प्रकारच्या डिझाइनचा समावेश आहे. मात्र सरकारी पातळीवर दुसऱ्या टप्प्यासाठी कसल्याही हालचाली दिसत नाहीत.

............

सुकाणू समितीच्या शिफारशींकडे दुर्लक्ष

चित्रनगरीत आवश्यक सुविधा, नव्याने करावयाची लोकेशन्स याविषयी सर्वांनुमते निर्णय झाला पाहिजे. चित्रनगरी विकसित करताना सिनेमा क्षेत्रातील प्रतिनिधींचे म्हणणे विचारात घेऊन नवा आराखडा बनावा यासाठी सुकाणू समितीची स्थापना केली आहे. चित्रनगरीचे व्यवस्थापकीय संचालक संजय पाटील, अभिनेत्री मृणाल कुलकर्णी, महामंडळाचे संचालक सतीश बीडकर, रणजित जाधव, मिलिंद लेले आणि चित्रपट दिग्दर्शक यशवंत भालकर यांचा समावेश आहे. भालकर यांच्या निधनाने एक जागा रिक्त झाली आहे. सव्वा वर्षापूर्वी स्थापन केलेल्या या सुकाणू समितीच्या प्रारंभीच्या कालावधीत दोन बैठका झाल्या. समितीतील सदस्यांनी चित्रनगरीचे भाडे, लोकेशन्समधील आवश्यक सुधारणा याविषयी काही शिफारशी केल्या आहेत. समिती सदस्यांच्या शिफारसीकडे डोळेझाक केल्याचे सदस्यांचे म्हणणे आहे. गेल्या सहा महिन्यात सुकाणू समितीची बैठकही झाली नाही.

...........

पालकमंत्री कधी लक्ष देणार ?

पालकमंत्री चंद्रकांत पाटील यांच्या पुढाकारातून कोल्हापूरच्या पर्यटन क्षेत्राला वाव देण्यासाठी 'आडवाटेवरचं कोल्हापूर', 'नवऊर्जा महोत्सव' सारख्या उपक्रमांची अंमलबजावणी झाली. या दोन्ही उपक्रमांचा राज्यभर गाजवाजा झाला. त्याच भूमिकेतून पालकमंत्री पाटील यांनी चित्रनगरीतील आवश्यक सुविधा, दुसऱ्या टप्प्यातील कामासंदर्भातील आराखडा बनविण्याच्या यंत्रणेला गतिमान केले, निधी उपलब्ध करुन दिला तर अनेक गोष्टी साध्य होणार आहेत. सरकारी पातळीवरुन चित्रनगरीच्या उद्घाटनला सिनेमाक्षेत्रातील बड्या संस्था, कलाकारांना आमंत्रित केले, येथील आवश्यक सुविधांची माहिती दिली तर चित्रीकरण वाढू शकते. सांस्कृतिक कार्य विभागाने यासाठी विशेष प्रयत्न केले आणि पालकमंत्र्यांनी लक्ष घातले तर या गोष्टी होवू शकतात. सांस्कृतिक मंत्री विनोद तावडे यांनी कोल्हापूरच्या चित्रपटसृष्टीचे महत्व ओळखून, व्यापक दृष्टीकोन ठेवून येथील इंडस्ट्रीजला बळ दिले तर संपूर्ण सिनेमा क्षेत्रासाठी फायदेशीर ठरेल.

...................

उत्तरार्ध

म. टा. प्रतिनिधी, कोल्हापूर

'भारत सरकारनेही आपली अर्थव्यवस्था पाच ट्रिलीयन अमेरिकन डॉलर्सपर्यंत वाढविण्याचा निर्धार केला आहे. या पार्श्वभूमीवर भारत आणि थायलंड या दोन देशात व्यापार, उद्योगाचा सेतू बांधण्यासाठी प्रयत्न करणार असल्याची माहिती, थायलंड सरकारचे वाणिज्य विषयक सल्लागार चेतन नरके यांनी पत्रकार परिषदेत दिली. आपल्याला मिळालेल्या संधीचा कोल्हापूरला लाभ होण्यासाठी प्रयत्न करणार असल्याचेही त्यांनी सांगितले.

जानेवारी २०१९ मध्ये थायलंडमध्ये सरकार नियुक्त झाल्यानंतर नुकतीच २३ आणि २४ जूनला बँकाक शहरात कंबोडिया, लाओस, मॅनमार्क, व्हिएतनाम, थायलंड या पाच देशांची वाणिज्यविषयक परिषद झाली. या परिषदेला थायलंडचे पंतप्रधान छान ओ छा, लाओसचे वाणिज्य मंत्री खेमानी एकोलयसेना, मॅनमार्कचे वाणिज्यमंत्री डॉ. थाम मियंत, व्हिएतनामचे वाणिज्यमंत्री ट्रॅन टुआन यांच्यासह पाच देशातील उद्योगपती, व्यापारी, राजकारणी, अर्थतज्ज्ञ, कायदे आणि वाणिज्य सल्लागार उपस्थित होते. अमेरिका व चीन देशातील व्यापार युद्धाचा फायदा कसा घेता येईल हा परिषदेचा हेतू होता. भारताची लोकसंख्या, स्थिर सरकार या गोष्टींचा विचार करता भारताबरोबर व्यापार संबध वाढवण्यासाठी प्रयत्न करता येईल.

थायलंड देशाकडून सल्लागार म्हणून काम करताना महाराष्ट्र, कर्नाटक, गुजरात, गोवा, मध्य प्रदेश या राज्यांवर लक्ष केंद्रीत केले जाणार आहे. राज्याचे मुख्यमंत्री देवेंद्र फडणवीस, उद्योगमंत्री सुभाष देसाई यांच्याशी बैठक होणार आहे.

वाणिज्य सल्लागार म्हणून काम करण्यापूर्वी नरके यांनी २५ देशांमधील बाजारपेठेचा अभ्यास केला असल्याची माहिती पत्रकार परिषदेत बाळ पाटणकर यांनी दिली. नरके यांनी केआयटीमधून बी.ई. प्रॉडक्शन ही पदवी संपादन केली आहे. तसेच शिकागो येथून एम.एस. कम्प्युटर सायन्स, न्यूयॉर्कच्या राँचेस्टर युनिव्हर्सिटीमधून बी.ए. फायनान्स, लंडन बिझनेस स्कूलमधून एमबीएची पदवी घेतली आहे. मार्स इन्कॉर्पोरेशन (अमेरिका), मेड जान्सस न्यूट्रिशियन्स (अमेरिका), रॅकेट बेनकिझन (ब्रिटन) या कंपन्यांचे प्रतिनिधीत्व बाजारपेठेत केले आहे.

.....

चौकट

कोल्हापुरातील शेतीमाल आणि जागतिक बाजारपेठ

दोन्ही देशांतील चित्रपट, शेती, पायाभूत सुविधा, दळणवळण, अॅनिमेशन, अॅटोमोबाईल, शिक्षण, आंतरराष्ट्रीय जर्नालिझम, हिरे, सोन्याचे दागिने, दुग्ध उत्पादनाबाबत थायलंड सरकारशी व्यापार वाढवता येणे शक्य आहे. भारतात निर्माण होणारी आयुर्वेदिक औषधे, कुशल कारागीर, ऑटोमोबाईलमधील उत्पादने, शेती उत्पादनातील गूळ, हळद, डाळींब, आंबा द्राक्षे यासह अन्न प्रक्रिया उद्योगासंबधी परिषदेत विस्ताराने माहिती मांडण्यात आली. भारतासह कोल्हापुरातील शेतीमालाला जागतिक बाजारपेठ मिळवून देण्याचा प्रयत्न राहणार आहे.

फोटो तारखेत टाकले आहेत.