कोल्हापूर: महापालिकेच्या प्राथमिक शिक्षण मंडळाच्या सदस्यांच्या कार्यकाळ संपल्याने रिक्त झालेल्या नऊ पदावर बुधवारी नवनियुक्त सदस्यांची निवड करण्यात आली. मंडळाच्या सभापतिपदाचा कार्यकाळ तीन जुलै रोजी संपुष्टात येणार असून जुलै अखेर सभापती निवड होण्याची शक्यता आहे. पुढील वर्षासाठी सभापतिपद राष्ट्रवादी काँग्रेसकडे असल्याने गटनेते सुनील पाटील किंवा सचिन पाटील यांची वर्णी लागणार आहे.

महापालिकेच्या शिक्षण मंडळाच्या नऊ सदस्यांचा कार्यकाळ संपुष्टात आला आहे. तर सभापती अशोक जाधव यांचा तीन जुलै रोजी कार्यकाळ संपुष्टात येणार आहे. सदस्यांच्या रिक्त झालेल्या जागेवर बुधवारी सभेत प्रत्येक पक्षाच्या गटनेत्यांनी सभा अध्यक्षांकडे यादी दिली. सभागृहातील संख्याबळानुसार काँग्रेसच्या तीन सदस्यांना शिक्षण मंडळावर संधी मिळाली असून त्यामध्ये प्रतापसिंह जाधव, श्रावण फडतारे, दीपा मगदूम यांचा समावेश आहे. राष्ट्रवादी काँग्रेसच्या सुनील पाटील व सचिन पाटील, ताराराणी आघाडीचे अर्चना पागर, रत्नेश शिरोळकर, भाजपकडून मनिषा कुंभार व विजयसिंह खाडे-पाटील यांची वर्णी लागली. काँग्रेस व राष्ट्रवादीमध्ये ठरलेल्या सत्तेच्या फॉर्म्युलानुसार सभापतिपद राष्ट्रवादीकडे येणार आहे. त्यामुळे मंडळावर नव्याने दाखल झालेले सुनील पाटील व सचिन पाटील यांच्यापैकी एका संधी मिळणार आहे.

म. टा. प्रतिनिधी, कोल्हापूर

क्रीडा कोट्यातून तहसीलदार म्हणून नोकरी लावण्यासाठी चार गुंठ्यांचा प्लॉट आणि ८५ लाख रुपये उकळण्याच्या प्रकरणातील संशयित प्रसाद प्रभाकर शिंदे (मूळ रा. गडहिंग्लज, सध्या रा. कोरेगाव पार्क, पुणे) हा पसार झाला आहे. त्याने मोबाइल बंद ठेवल्याने त्याचे लोकेशन मिळून येत नाही. त्याचा शोध सुरू असून चौकशी करून याप्रकरणी त्याच्यावर लक्ष्मीपुरी पोलिस ठाण्यात गुन्हा दाखल करण्यात येणार आहे, ही माहिती स्थानिक गुन्हे शाखेचे निरीक्षक तानाजी सावंत यांनी दिली.

याप्रकरणी तक्रारदार समृद्ध दिलीप मोरे (रा. बालशाही अपार्टमेंट, मंगळवार पेठ) यांनी फसवणूक झालेची तक्रार दिली आहे. या अर्जावरून स्थानिक गुन्हे अन्वेषण विभागामार्फत चौकशी सुरू आहे. भाजपचे तत्कालीन महानगराध्यक्ष संदीप देसाई यांचेही तक्रारीमध्ये नाव आहे. त्यामुळे शिंदेसह त्यांचीही चौकशी केली जाणार आहे. त्यांच्या कार्यालय परिसरात व्यवहार झाल्याचे तक्रारीत म्हटले आहे. काही साक्षीदारांच्या समोर हा प्रकार घडला आहे. त्यांचे जबाबही घेतले जाणार आहेत. मोरे यांनी काही रक्कम रोख स्वरुपात व काही धनादेशाद्वारे शिंदे याला दिली आहे. त्यामुळे शिंदेच्या विरोधात भक्कम पुरावे आहेत. त्याने कोणाच्या सांगण्यावरून पैसे घेतले. त्या पैशाचे काय केले, ते पुढे कोणाला दिले, याचा तपासही सुरू केला आहे. शिंदे ताब्यात मिळाल्यानंतर या फसवणूक प्रकरणाचे रॅकेट उघडकीस येईल, असेही तपास अधिकारी सावंत यांनी सांगितले.

म. टा. प्रतिनिधी, कोल्हापूर

लग्नाचे आमिष दाखवून अल्पवयीन मुलीला घरात डांबून अत्याचार केल्याप्रकरणी संशयित किरण शाहू काळे (वय २२ रा. विक्रमनगर) याला राजारामपुरी पोलिसांनी बुधवारी अटक केली. काळे याच्यासह संशयित रोहित काळे, शाहू काळे, गीता काळे, दीपाली काळे, श्रुती काळे (सर्व रा. विक्रमनगर) अशा एकूण सहा जणांवर गुन्हा दाखल झाला. पीडित मुलीची रवानगी सुधारगृहात केली आहे.

पोलिस उपनिरीक्षक मीनाक्षी माळी यांनी दिलेल्या माहितीनुसार, पीडीत मुलगी राजारामपुरी परिसरातील एका कॉलेजमध्ये शिक्षण घेत असताना तिची ओळख संशयित किरण काळे याच्यासोबत झाली. ओळखीचे रुपांतर प्रेमात झाले. या दोघांचे प्रेमप्रकरण मुलीच्या पालकांना समजल्यानंतर तिला शाहूवाडी तालुक्यातील गावी नेले. मात्र ती मुलगी कोल्हापुरात आजोबांकडे जाऊन येतो, असे सांगून ३० एप्रिल, २०१९ रोजी घरातून बाहेर पडली. ती आजोबांकडे न जात प्रियकर काळे याच्या घराकडे गेली. हा प्रकार मुलीच्या पालकांना समजल्यानंतर त्यांनी काळे याच्या घरातून मुलीला गावी नेण्याचा प्रयत्न केला. मात्र 'तिला घरी नेल्यास आत्महत्या करेल', असे काळे कुटुंबियांनी पालकांना सांगितले. काळे यांनी त्या मुलीला दोन महिने ठेवून घेतले. या कालावधीत संशयित काळे याने मुलीला डांबून तिच्यावर अत्याचार केला. या प्रकाराला काळे यांच्या कुटुंबियांनी साथ दिली. दोन महिन्यानंतर पीडित मुलीच्या पालकांनी हा प्रकार अंधश्रद्धा निर्मूलन समितीच्या कार्यकर्त्या गीता हासूरकर यांना सांगितला. त्यांनी हा प्रकार राजारामपुरी पोलिसांना सांगितल्यानंतर पीडित मुलीला बोलावून पालकांच्या ताब्यात दिले. मुलीने घरी जाण्यास नकार दिल्याने तिची रवानगी सुधारगृहात करण्यात आली.

शिवेंद्रराजेंना सातारा-जावलीत आमचा पाठिंबा

खासदार उदयनराजे यांची ग्वाही अन् इशाराही

म. टा. वृत्तसेवा, सातारा

'जैसी करनी वैसी भरणी, या न्यायातून कोणालाच सूट मिळत नाही. आमदार शिवेंद्रराजे आमचे बंधू असले तरी ही याला ते अपवाद नाहीत. लोकसभेला आमदार शिवेंद्रराजेंनी आमचे काम केले असल्याने, आमच्या दिलेल्या शब्दात फरक पडणार नाही. आमदार शिवेंद्रराजे भोसले यांना सातारा-जावली विधानसभा मतदारसंघात आमचे पाठबळ, पाठिंबा राहील. त्या भूमिकेत बदल होणार नाही. तथापि त्यांच्या करणीमुळे जर काही बरे-वाईट घडले तर त्यास सर्वस्वी तेच जबाबदार असतील. रोग रेड्याला आणि इलाज पखालीला असला त्यांचा सुरू असलेला प्रकार त्यांनी बंद करावा,' असा इशारा खासदार उदयनराजे भोसले यांनी दिला आहे.

उदयनराजे म्हणाले, आमदार शिवेंद्रराजे सध्या भलतेच सावध झाल्याचे त्यांच्या विधानांवरुन दिसत आहे. त्यांना सर्वत्र दगाबाजी, दगाफटका-धोका यांचेच चित्र डोळयासमोर येत आहे. लोकसभा निवडणुकीच्या आधीची तुमची वक्तव्ये एकदा तपासून पहा. पवारसाहेबांनी आमदारांना विश्‍वासात घ्यावे, पवारसाहेब देतील तो उमेदवार मान्य असेल, पवारसाहेबांनी तिकीट दिले तरी उदयनराजेंचे काम करणार नाही, लोकसभेला उदयनराजेंच कामच करणार, कार्यकर्ते ऐकण्याच्या मनस्थितीत नाहीत वगैरे तुमचे उद्गार तुम्ही विसरलेला नसणार, किंवा तुम्ही मिशीवाल्यासोबत खाल्लेल्या चविष्ट मिसळीचा काही दिवसानंतर आता तुम्हाला ठसका लागत असावा. म्हणूनच कदाचित आता आमच्या प्रत्येक हालचालीविषयी तुम्हाला शंका उत्पन्न होत असावी. शंका-संशय घेणे ही तुमची कुजकी सवय आहे किंबहुना तो तुम्हाला वारसा लाभला आहे. तथापि काहीही असले तरी आम्ही दिलेल्या शब्दाला जागणारे आहोत, तुमच्या विधानसभेला आमच्यापासून तरी काडीचाही धोका होणार नाही. उगाच साप समजून भुई थोपटण्याचा प्रकार टाळला पाहिजे.

...........

नीरा-देवघर प्रकल्प पूर्ण होईपर्यंत पाणी कायम ठेवा : श्रीमंत संजीवराजे

गेली दहा-बारा वर्षे नीरा उजवा कालव्याद्वारे उपलब्ध झालेल्या पाण्याने तालुक्याच्या ३६ गावांतील बागायती क्षेत्रात वाढ झाली आहे. १२ जून रोजी सरकारने दिलेल्या निर्देशानुसार नीरा-देवघरचे पाणी बंद झाल्याने बागायती क्षेत्रात वाढलेल्या ऊस व अन्य पीकांचे मोठे नुकसान होण्याचा धोका आहे. त्यामुळे नीरा-देवघरचे कालवे पूर्ण होईपर्यंत या भागाचे पाणी बंद करू नका, अशी मागणी सातारा जिल्हा परिषद अध्यक्ष श्रीमंत संजीवराजे नाईक निंबाळकर यांनी केली आहे.

..........

शेखर गोरेंची निर्दोष मुक्तता

सातारा

खोकडे (ता. माण) येथील महिलेने केलेल्या तक्रारीवरून दाखल खटल्यात माण-खटावचे नेते शेखर गोरे यांची वडूज येथील अतिरिक्त जिल्हा व सत्र न्यायालयाने निर्दोष मुक्तता. ७ जानेवारी २०१३ रोजी खोकडे येथील गट नं. १४७मध्ये पवनचक्की कंपनीमार्फत रस्त्याचे काम चालू होते. त्या वेळी विरोधकांनी कुटील कारस्थान करून त्या ठिकाणी कस्तुरबाई अंकुश घाडगे या महिलेस प्रोत्साहन देऊन शेखर गोरे व अन्य दोघांविरोधात दहिवडी पोलिस ठाण्यात बेकायदा डांबणे, शिवीगाळ करणे जीवे मारण्याची धमकी देणे, अशा प्रकारची फिर्याद दिली होती. या प्रकरणाची दहिवडी येथील न्यायालयात सुनावणी झाली. त्या वेळी दहिवडी न्यायालयाने गोरे यांना तीन वर्षांची शिक्षा सुनावली होती. या शिक्षेविरोधात गोरे यांनी वडूज येथील अतिरिक्त जिल्हा सत्र न्यायालयात अपील दाखल केले होते. या अपिलाची सुनावणी झाली त्यावेळी न्या. आर. के. मलाबादे यांनी शेखर गोरे तसेच अंकुश गोरे, बापूराव जगदाळे या तिघांची निर्दोष मुक्तता केली.

............

लोणंद येथे पालखीचा

दीड दिवसांचा मुक्काम

सातारा

श्री संत ज्ञानेश्वर माउलींच्या पालखी सोहळ्याचे मंगळवारी, २ जुलै रोजी सातारा जिल्ह्यात आगमन होत आहे. यंदाही लोणंद येथे दीड दिवसांचा मुक्काम असणार आहे. सोहळ्यातील वारकऱ्यांना सर्व प्रकारच्या सोयी-सुविधा पुरवण्यासाठी सर्वच यंत्रणांनी कंबर कसली आहे. सध्या सातारा बांधकाम विभागाची अनेक कामे उरकण्याची लगबग सुरू असल्याचे पाहायला मिळत आहे. नीरा-लोणंद या सात किलोमीटर अंतराच्या पालखी मार्गाचे पालखी महामार्ग विभागाकडून मुरूम टाकून रस्त्यांच्या दोन्ही बाजूकडील साईडपट्ट्या भरण्याचे काम सुरू आहे. पर्यायी रस्त्यांवरील खड्डे मुजवून वाहतुकीस अडथळा ठरणाऱ्या झाडांच्या फांद्या तोडण्यात येत आहेत.

.........

कोल्हापूर टाइम्स टीम

शहरातील ३३ ज्युनिअर कॉलेजमध्ये अकरावीतील प्रवेश क्षमता १४१४० आहे. अकरावी प्रवेशाच्या पहिल्या टप्प्यात बुधवारअखेर ११५६० विद्यार्थ्यांनी नोंदणी केली आहे. शुक्रवारी ता. २१ विद्यार्थ्यांना दहावीच्या गुणपत्रिका मिळणार आहेत. त्यानंतर प्रवेश प्रक्रियेला गती मिळणार आहे. दरम्यान शिक्षण उपसंचालक कार्यालयामार्फत अकरावी प्रवेशाच्या पुढील टप्प्याचे वेळापत्रक येत्या तीन, चार दिवसात जाहीर होणार आहे.

केंद्रीय प्रवेश प्रक्रियेंतर्गत चौदा जूनपासून पहिल्या टप्प्यात नाव नोंदणी सुरू आहे. विद्यार्थ्यांना ऑनलाइन नोंदणी करावी लागणार आहे. ऑनलाइन प्रवेश प्रक्रियेंतर्गत पहिल्या टप्प्यात विद्यार्थ्यांची नोंदणीचा समावेश आहे. दरम्यान शुक्रवारी, दुपारी तीन वाजता ज्या त्या शाळेमध्ये विद्यार्थ्यांना गुणपत्रिका मिळणार आहेत. गुणपत्रिकेसोबतच शाळा सोडल्याचा दाखला आणि कल चाचणीचे प्रमाणपत्र मिळणार आहे. विद्यार्थ्यांच्या हाती गुणपत्रिका मिळाल्यानंतर प्रवेश प्रक्रियेच्या दुसऱ्या टप्प्याला सुरुवात होईल. त्यावेळी विद्यार्थ्यांनी ऑनलाइन अर्जातील दुसरा भाग पूर्ण करावयाचा आहे. दरम्यान शिक्षण उपसंचालक कार्यालयाकडून तक्रार निवारण केंद्रे निश्चित केली आहेत. यामध्ये कला शाखेसंदर्भातील तक्रारी डी.डी.शिंदे सरकार कॉलेज येथे तर विज्ञान शाखेशी निगडीत तक्रारींच्या सोडवणुकीसाठी विवेकानंद कॉलेजमध्ये केंद्र आहे. न्यू कॉलेज येथे वाणिज्य शाखेच्या तक्रारींची सोडवणूक होईल. एखाद्या विद्यार्थ्याची तक्रार असल्यास ऑनलाइन पद्धतीने नोंदवायची आहे. त्याची प्रिंट काढून शाखानिहाय केंद्रात जमा करायची आहे.

कॉमर्ससाठी रस्सीखेच

प्रवेश प्रक्रियेदरम्यान कुठल्याही विद्यार्थ्यांना प्रवेशावरुन अडचणी उदभवणार नाहीत. शहरातील अकरावीच्या वर्गातील प्रवेश क्षमता आणि आतापर्यंत उपलब्ध नोंदणीची आकडेवारी यावर नजर टाकली तर ज्या त्या शाखेला प्रवेश मिळण्याचा मार्ग सुकर दिसतो. अपवाद फक्त वाणिज्य शाखेचा आहे. शहरातील नामांकित कॉलेजमधील वाणिज्य शाखेचा अभ्यासक्रम शिकण्याकडे विद्यार्थ्यांचा ओढा आहे. अशा कॉलेजमध्ये प्रवेश मिळवण्यासाठी झुंबड उडण्याची शक्यता आहे. विज्ञान शाखेकडेही विद्यार्थ्यांचा मोठा ओढा आहे.

वाढीव तुकड्यांचे अद्याप प्रस्ताव नाहीत

शहरातील कुठल्याही कॉलेजांकडून अद्याप वाढीव तुकड्यांच्या मान्यतेसाठीचे प्रस्ताव शिक्षण उपसंचालक कार्यालयाकडे आले नाहीत. संबंधित कॉलेजांनी प्रस्ताव पाठविल्यास शिक्षण उपसंचालक कार्यालयाकडून शिक्षण संचालक कार्यालयाकडे पाठविले जातील. शिक्षण संचालक कार्यालयाच्या सूचनेनुसार वाढीव तुकड्यांबाबत पुढील कार्यवाही होईल.

- सुरेश आवारी, शिक्षण उपसंचालक कोल्हापूर विभाग

१४१४०

एकूण प्रवेश क्षमता

३७२०

कला शाखा मराठी

१२०

कला शाखा इंग्रजी

३३००

वाणिज्य मराठी शाखा

१०४०

वाणिज्य इंग्रजी शाखा

५९६०

विज्ञान शाखा

Mahesh.patil@timesgroup.com

Tweet:@MaheshpMT

कोल्हापूर : कुठलेही टार्गेट नाही, फक्त ऑनलाइन जॉब आहे, फ्लिपकार्ट, अमेऑनसारखे डायरेक्ट प्रॉडक्ट सेल करायचे आहे, ऑनलाइन वर्क करायला टीम हवी आहे, असे सांगत दहावी-बारावी शिकलेल्या अथवा पदवीचे शिक्षण घेणाऱ्या तरुण-तरुणींना भुलवण्याचा फंडा काही कंपन्यांनी सुरू केला आहे. 'डायरेक्ट सेल'च्या नावाखाली गरीब घरातील तरुणाई 'चेन मार्केटिंग'च्या या जाळ्यात अडकली आहे. त्यातून अनेकांची ससेहोलपट सुरू आहे.

परराज्यातील आणि बाहेरच्या जिल्ह्यातील या कंपन्यांनी शहरात आणि लगतच्या ग्रामीण भागात आपले बस्तान बसवले आहे. व्हॉट्सअॅपवरून प्रायव्हेट लिमिटेड कंपनीची माहिती वेगवेगळ्या ग्रुप्समधून पाठविण्यात येते. आधार कार्ड, शैक्षणिक गुणपत्रकांच्या सत्यप्रती, फोटो अशा कागदपत्रांसह ट्रेनिंग सेशनला बोलावले जाते. कंपनीतर्फे दीड ते दोन हजार रुपयांत राहण्याची आणि जेवणाची सोय केली जाईल असेही सांगितले जाते. कंपनीत सलग चार दिवस ट्रेनिंग सेशन्समध्ये मोटिव्हेशनल व्याख्याने देऊन व्यवसायाला उद्युक्त केले जाते. इतर मल्टिलेव्हल मार्केटिंग कंपन्यांपेक्षा आपली कार्यपद्धती वेगळी आहे, यात कोणतेही बिझनेसचे, प्रॉडक्ट विक्रीचे टार्गेट नसल्याचे सांगितले जाते. प्रत्यक्षात कंपनीच्या कपडे व अन्य वस्तूंची साखळी पद्धतीने विक्री झाल्यास महिन्यात लाखो रुपयांचा नफा मिळेल अशी भुलवणूक केली जाते.

चेन मार्केटिंगच्या या पारंपरिक जाळ्यात अनेक अल्पशिक्षित तरुण-तरुणी अडकले आहेत. अनेकांनी दहा ते चाळीस हजार रुपये खर्च करून प्रॉडक्ट विकत घेतले. त्याचे कमिशन मिळाले. आता आपले गुंतवलेले पैसे परत मिळविण्यासाठी व्हॉट्सअॅपवरून आपल्या मित्र-मैत्रिणींना या जाळ्यात अडकवले जात आहे. कंपनीची, कार्यपद्धतीची माहिती कोणालाही द्यायची नाही अशी सक्त ताकीद यात गुंतलेल्यांना दिली गेली आहे. त्यामुळे आपल्या मित्र-मैत्रिणींना नोकरीची संधी आहे म्हणून बोलावले जाते, मात्र काम काय करायचे आहे हे सांगितले जात नाही. काम ऑनलाइन असल्याचे सांगितले गेले असले तरी अशा कंपन्यांच्या ऑफिसमध्ये एखादा कम्प्युटरही अस्तित्त्वात नसल्याचे दिसते. धक्कादायक म्हणजे भरपूर पगाराच्या आशेने बी.ए., बी.कॉम.चे शिक्षण घेणाऱ्या अनेक तरुण-तरुणींनी कॉलेज अर्धवट सोडून हेच काम स्वीकारले आहे. दिवसभर नव्या गुंतवणूकदारांचा शोध घेत फिरायचे, आपले गुंतवलेले पैसे कसे बाहेर येतील याची वाट बघायची एवढेच काम करणारी बेकारांची फौज अशा कंपन्यांच्या आवारात बघायला मिळते. अनेकांनी 'चेन मार्केटिंग'चा अर्थ समजून न घेता कुटुंबीयांकडून, नातेवाईक, मित्र-मैत्रिणींकडून पैसे घेऊन यात गुंतवले आहेत. दर्जाहीन असलेले प्रॉडक्ट या कंपन्यांनी तरुण-तरुणींच्या गळ्यात मारले आहेत. काहींनी तर घरातले सोने गहाण ठेवून पैसे भरले आहेत.

कागदोपत्री सेफ… पण...

कागदोपत्री या कंपन्यांमध्ये दोष नसला तरी चेन मार्केटिंगच्या, खोटी माहिती देऊन भूरळ पाडणाऱ्या या कंपन्यांच्या भुलभुलय्यातून तरुणाईला सोडविण्याचे आव्हान नातेवाईक, पालकांसमोर आहे. कंपनीत चौकशीला गेल्यावर नातेवाईकांना आत प्रवेशही दिला जात नाही. बाहेर कोठेही माहिती द्यायची नाही अशी ताकीद यात सहभागी तरूण-तरुणींना देण्यात आली आहे. त्यामुळे कंपनी अधिकृत नोंदणी केलेल्या असल्या तरी त्यांचे चालणारे व्यवहार फसवणुकीच्या मार्गाने जाणारे आहेत. नोकरीची गरज असलेले तरुण-तरुणी मानसिकदृष्ट्या यात गुरफटले गेले आहेत. त्यातून त्यांच्या आयुष्याची धुळदाण उडण्याची शक्यता आहे.

म. टा. प्रतिनिधी, कोल्हापूर

करवीर निवासिनी अंबाबाई मंदिराला राजेराजवाडे, संस्थानिक व भाविकांनी मौल्यवान दागिने अर्पण केले आहेत. देवीला भाविकांकडून देणगी स्वरुपात मिळालेल्या अलंकारांत मौल्यवान व दुर्मिळ दागिन्यांचा समावेश आहे. देवीचे हे मौल्यवान दागिने भाविकांना पाहता यावेत यासाठी ते दोन दिवस खुले करण्यात येणार आहेत. तसा प्रस्ताव पश्चिम महाराष्ट्र देवस्थान समितीच्या विचाराधीन असल्याची माहिती पश्चिम महाराष्ट्र देवस्थान व्यवस्थापन समितीचे अध्यक्ष महेश जाधव यांनी दिली.

दरम्यान, अंबाबाईचे दागिने भाविकांना पाहण्यासाठी कधी खुले करायचे याची तारीख अद्याप निश्चित नाही. नजीकच्या काळात देवस्थान समितीची बैठक होणार आहे, त्या बैठकीत दागिने भाविकांच्या दर्शनासाठी कधी मांडायचे यासंबंधी निर्णय होणार आहे. मंदिरातील गरुड मंडप येथे दागिने मांडण्यात येणार आहेत.

देवीच्या दागिन्यात रत्नजडित किरीट, सोळापदरी चंद्रहार, कवड्यांची माळ, मोहरांची माळ, रत्नजडित मयूर कुंडले अशा अनेक दुर्मिळ दागिन्यांचा समावेश आहे. भाविकांकडून देवीला मोठ्या प्रमाणात सोन्याची नाणी अर्पण केली आहेत. विविध राज्यवटीत देवीला मोठ्या प्रमाणात दागिने अर्पण केली आहेत. देवीचे दुर्मिळ दागिने भाविकांना पाहण्यासाठी उपलब्ध करण्याचा विचार देवस्थान समिती करत आहे.

मूल्यांकनचे काम आणखी दोन दिवस

देवस्थान समितीमार्फत सध्या गरुड मंडप येथे देवीच्या दागिन्यांचे मूल्यांकन सुरू आहे. एक एप्रिल २०१८ ते ३१ मार्च, २०१९ या कालावधीत भाविकांकडून देणगीदाखल मिळालेल्या दागिन्यांचे मूल्यांकन निश्चित होणार आहे. जानेवारी, फेब्रुवारी आणि मार्च २०१९ या तीन महिन्यात भाविकांनी दान केलेल्या दागिन्यांचे मूल्याकंन झाले. गुरुवारी जोतिबा देवस्थानला दान केलेल्या दागिन्यांचे मूल्यांकन केले जाईल. देवीला मिळालेल्या दागिन्यांच्या मूल्यांकनाची प्रक्रिया आणखी दोन दिवस चालेल अशी माहिती देवस्थान समितीच्या सदस्या संगीता खाडे यांनी सांगितले.

करवीर निवासिनी अंबाबाई मंदिरात दरवर्षी लाखो भाविक दर्शनासाठी येतात. भाविक देवीला सोने, चांदीचे दागिने अर्पण करतात. देवीच्या खजिन्यात ५०० वर्षांपासूनचे विविध राजवटीने अर्पण केलेले दागिने आहेत. देवीचे हे दागिने जवळून पाहण्याची संधी भाविकांना मिळणार आहे. समितीतर्फे लवकरच हे दागिने दर्शनासाठी उपलब्ध करण्यात येणार आहेत.

महेश जाधव, अध्यक्ष देवस्थान समिती

म. टा. प्रतिनिधी, कोल्हापूर

येथील मध्यवर्ती शासकीय इमारतीमधील संजय गांधी निराधार योजनेचे तहसीलदार दिनेश पारगे माहिती अधिकाराखालील नियमबाह्य शुल्क आकारणीचे समर्थन करत आहेत. त्यांना सरकारच्या दोन रुपयांची काळजी अधिक आहे. याउलट त्यांच्या कार्यालयाकडून दोन रुपयांच्या माहितीसाठी पाच रुपये खर्च केल्याच्या प्रकरणाकडे सोयीस्करपणे दुर्लक्ष केल्याचे 'महाराष्ट्र टाइम्स'शी बोलताना समोर आले.

माहिती अधिकार कायद्यात अर्जदारास दहा रुपयांपर्यंतच्या माहितीसाठी पत्रव्यवहार करून शुल्क भरून घेऊ नये, असे नमूद केले आहे. त्याच्या अंमलबजावणीसाठी सामान्य प्रशासन विभागाने ६ सप्टेंबर २००८ रोजी स्वतंत्र परिपत्रकही काढले. त्यात २, ३, ४ अशा पानांची म्हणजे दहा रुपयांपर्यंतच्या माहितीसाठी पत्रव्यवहार करू नये, असे सूचित केले आहे. यासंबंधीच्या आदेशाबाबतही शहर संजय गांधी योजना तहसीलदार कार्यालयातील प्रशासन अनभिज्ञ आहे. विशेष म्हणजे तहसीलदार पारगे यांनाही यासंबंधी माहिती नसल्याचे समोर आले. त्यांनी दोन रुपयांच्या माहितीसाठी पाच रुपये खर्च करण्याच्या पत्रव्यवहाराचे समर्थन केले.

०००

कोट...

मोठ्या संख्येने माहिती अधिकाराखाली अर्ज आल्यानंतर सर्वांना मोफत माहिती दिल्यास सरकारचे नुकसान होईल. सरकारी आदेशात दहा रुपयांपर्यंतची माहिती मोफत द्यावी, असे म्हटलेले नाही. यामुळे एका पानासाठी दोन रुपये भरणे आवश्यक आहे.

दिनेश पारगे, तहसीलदार

०००००

म. टा. प्रतिनिधी, कोल्हापूर दहावी, बारावीचा निकाल लागल्याने पुढील शैक्षणिक प्रवेशासाठी आवश्यक असलेले दाखले काढण्यासाठी पालकांसह विद्यार्थ्यांची सेतू, आपले सरकार व महा-ई-सेवा केंद्रावर गर्दी होत आहे. यामध्ये व्यावसायिक अभ्यासक्रमासाठी प्रवेश घेणाऱ्या विद्यार्थ्यांची संख्या मोठी आहे. काहीवेळा सर्व्हर डाउनच्या समस्यांना नागरिकांना सामोरे जावे लागत आहे. विद्यार्थ्यांच्या शैक्षणिक वाटचालीसाठी आवश्यक असणारे विविध प्रकारचे दाखले वेळेत मिळावेत यासाठी विद्यार्थी व पालकांकडून प्रयत्न केला जात आहे. यामध्ये सातबारा उतारा, रहिवासी प्रमाणपत्र, जात प्रमाणपत्र अशी महत्त्वपूर्ण कागदपत्रे महा ई सेवा केंद्राच्या माध्यमातून मिळवली जात आहेत. सर्व प्रक्रिया ऑनलाइन आहेत. बीए, बीकॉम, बीएस्सी या पारंपरिक अभ्यासक्रमांसह इंजिनीअरिंग, फार्मसी तर पदव्युत्तरसाठी एमए, एमटेक, एमबीए, एमसीए या व्यावसायिक अभ्यासक्रमांसाठी विद्यार्थ्यांना आवश्यकतेनुसार जातीचा दाखला, नॉन क्रिमिलेयर, डोमिसाईल, राष्ट्रीयत्वाचा दाखला, उत्पन्नाचा दाखला अशी विविध प्रमाणपत्रे वेळेत सादर करावी लागतात. प्रमाणपत्र सादर करण्यात विलंब झाल्यास विद्यार्थ्यांचा प्रवेश अडचणीत येण्याची शक्यता असते, त्यामुळे प्रवेश प्रक्रिया सुरू होण्याआधीच आवश्यक ती कागदपत्रे काढण्यासाठी पालक व विद्यार्थी प्राधान्य देत आहेत. सरकारनेही विविध प्रकारचे दाखले विद्यार्थ्यांना निर्धारित वेळेत मिळावेत यासाठी स्पष्ट सूचना संबंधित यंत्रणांना दिल्या आहेत. सरकारी नियमाप्रमाणे असलेल्या शुल्कापेक्षा जास्तीच्या शुल्काची मागणी झाल्यास तसेच पालकांची अडवणूक, अरेरावीपणा, आदी प्रकार घडल्यास त्याबाबतची तक्रारही उपविभागीय अधिकारी यांच्याकडे करता येणार आहे. याबाबतचे स्पष्ट निर्देशही देण्यात आले आहेत.

मारहाणीत पत्नीचा

जागीच मृत्यू

कराड :

'तुला मूल होत नाही, तू कुपोषित आहेस,' असे म्हणून पतीने पत्नीला केलेल्या बेदम मारहाणीत तिचा जागीच मृत्यू झाला. पत्नीच्या मृत्यू नंतर पती पोलिस ठाण्यात हजर झाला. ही घटना बनवडी (ता. कराड) येथे मंगळवारी रात्री दहाच्या सुमारास घडली. प्रतिभा उर्फ जयश्री जालिंदर प्रताप वाघमारे (वय ३४, रा. बनवडी, ता. कराड) असे खून झालेल्या पत्नीचे नाव आहे. मंगळवारी दुपारपासून रात्री दहा वाजेपर्यंत तिला पतीने बेदम मारहाण केली होती, त्यातच तिचा जागीच मृत्यू झाला.

जालिंदर प्रताप वाघमारे (वय ४०, रा. बनवडी, ता. कराड) असे पतीचे नाव असून, खून करून मंगळवारी रात्री अकरा वाजता तो पोलिसात हजर झाला. त्या वेळी त्याने पोलिसांना सांगितलेली हकीकत ऐकून पोलिसही आवाक झाले. जालिंदर वाघमारे याचा १४ वर्षांपूर्वी प्रतिभाशी विवाह झाला होता. त्यांना मूल होत नव्हते म्हणून त्यांच्यात नेहमी वाद होत होता. त्याच कारणावरून मंगळवारी दुपारपासून ते रात्री दहा वाजेपर्यंत जालिंदरने पत्नीला बेदम मारहाण केली, त्यातच तिचा जागीच मृत्यू झाला.

........

रेल्वे अपघाताला चालक जबाबदार

कराड : रेल्वे स्थानकात येणाऱ्या माल वाहतूक रेल्वे गाडीला पिवळा सिग्नल दिल्याने चालकाने रेल्वेचा वेग कमी करून रेड सिग्नल पाहून रेल्वे थांबवणे अपेक्षित होते. मात्र, चालकांनी पिवळ्या सिग्नल नंतर पुढे ९० मीटर अंतरावर असलेला रेड सिग्नल पाहिला नसल्याने रेल्वेचा अपघात झाल्याचे प्राथमिक तपासात समोर आल्याची माहिती रेल्वेचे अपर मंडल प्रबंधक प्रफुल्ल चंद्रा यांनी येथे दिली. चंद्रा यांनी या घटनेननंतर मंगळवारी सायंकाळी उशिरा घटनास्थळाची पाहणी करून माहिती घेतली असता या बाबत माहिती दिली.

रेल्वे स्थानकात मंगळवारी दुपारी चुकीचा सिग्नल मिळाल्याने पुण्याहून मिरजेकडे जाणारी मालगाडी स्थानकातील आपत्कालीन मार्गावरती जावून मातीच्या ढिगाऱ्यात घुसली होती. यामध्ये रेल्वेचे इंजिन व काही मालडबे रूळावरून घसरले होते. कराड रेल्वे स्थानकात एकूण चार पटऱ्या असून, या चारही पटऱ्यांवरून स्टेशनच्या दोन्ही बाजूला असलेल्या मुख्य पटरीवर रेल्वे नेण्याची सोय करण्यात आलेली आहे. मंगळवारी ज्यावेळी मालवाहतूक करणारी रेल्वे कराड रेल्वे स्टेशनवर आली होती, त्यावेळी दोन नंबरच्या पटरीवर एक रेल्वे इंजिन उभे होते तर अन्य तीन पटऱ्या मोकळ्या होत्या. रेल्वे स्टेशनच्या जवळ आल्यानंतर स्टेशन प्रशासनाने रेल्वेच्या चालकाला तीन नंबरच्या पटरीवर मालगाडी घेण्याच्या सूचना दिल्या होत्या, त्या नुसार रेल्वे रुळाचे शंटिंगही करण्यात आले व पिवळा सिग्नल दिला गेला होता. पिवळ्या सिग्नलनुसार रेल्वेचा वेग कमी करून रेल्वे हळूहळू पुढील सिग्नल मिळेपर्यंत पुढे नेणे अपेक्षित होते, तसा चालकांनी रेल्वे इंजिनचा वेग कमी केलाही, मात्र पुढे मुख्य पटरी मोकळी नसल्याने स्टेशन प्रशासनाला ही रेल्वे स्थानकातच थांबवणे अपेक्षित होते. त्यामुळे पुढचा सिग्नल लाल देण्यात आला होता. या सिग्नलच्या पुढे तीन नंबरची पटरी मुख्य पटरीला जोडण्याची सोय आहे. मात्र रेल्वे थांबवायची असल्याने स्टेशन प्रशासनाने लाल सिग्नल देऊन पटरी जोडली नाही.

या सिग्नलपासून अंदाजे १०० मीटर अंतरावर रुळ समाप्त होतात व त्यापुढे वाळू व खडी, मातीचा मोठा ढीग तयार करण्यात आला आहे. चालकाने हा रेड सिग्नल पाहिला नसल्याने पुन्हा रेल्वेचा वेग वाढवला. काही अंतरावर गेल्यानंतर चालकाचा रेल्वेच्या मार्गात मातीचा ढीग दिसल्यानंतर चालकाने अर्जंट ब्रेक लावला. मात्र, तोपर्यंत रेल्वेचे इंजिन रुळावरून खाली उतरून जवळपास ५० फूट लांब मातीच्या ढिगात घुसले, असे प्रफुल्ल चंद्रा यांनी स्पष्ट केले.

.........

४४ इमारती जीर्ण

कराड :

कराड नगर पालिकेला शहरात ४४ इमारती जीर्ण व मोडकळीला आल्याचे आढळून आल्या आहेत. त्यातील काही इमारती अखेरची घटका मोजत आहेत. त्यामुळे अशा इमारतींमध्ये राहणाऱ्या व आसपासच्या इमारतींमध्येही राहणाऱ्या रहिवाशांच्या डोक्यावरत मृत्यूची टांगती तलवार असल्याने पालिकेने या बाबत ठोस कारवाई करण्याची मागणी होत आहे. शहरात दिवसेंदिवस इमारतींची संख्या मोठ्या प्रमाणात वाढत आहे. तब्बल साठ-सत्तर वर्षांपूर्वी दगड माती आणि लाकडापासून बांधण्यात आलेल्या इमारतींची अवस्था आता गंभीर बनली आहे. काही इमारतींचे दरवाजे, भिंती खिळखिळ्या झाल्या आहेत. शहरातील दाट लोकवस्तीच्या ठिकाणी अशा धोकादायक इमारती पावसाळ्यात ढासळून जीवितहानी व वित्तहानी होण्याची जास्त शक्यता असते.

.........

शेणोलीला विकास निधी

कराड :

'शेणोली गावाचा सर्वांगीण विकास व्हावा, या उद्देशाने गावासाठी राज्य सरकारच्या सहकार्यातून विविध विकासकामांसाठी लवकरच २६ लाख रुपयांचा निधी देण्यात येणार असल्याची ग्वाही श्री विठ्ठल रुक्मिणी मंदिरे समितीचे अध्यक्ष डॉ. अतुल भोसले यांनी दिली. शेणोली (ता. कराड) येथे मंगळवारी सायंकाळी आयोजित विविध विकासकामांच्या उद्घाटनप्रसंगी ते बोलत होते.

अध्यक्षस्थानी दिलीप कणसे होते. कृष्णा सहकारी साखर कारखान्याचे चेअरमन डॉ. सुरेश भोसले आणि माजी चेअरमन मदनराव मोहिते यांच्या हस्ते व डॉ. अतुल भोसले यांच्या प्रमुख उपस्थितीत शेणोली येथील महादेव मंदिर सभामंडपाचे उद्घाटन आणि दहा लाख रुपये विकास निधीतून सुरू करण्यात येणाऱ्या अंतर्गत रस्ता कामांचे भूमिपूजन करण्यात आले.

राष्ट्रवादी काँग्रेस सेवादलाचे आयुक्तांना निवेदन

कोल्हापूर टाइम्स टीम 'शहराच्या विस्ताराबरोबर येथील सराफ व्यवसायाने स्वतंत्र ओळख निर्माण केली. दागिने बनवण्याबरोबर येथे अटणी व्यवसायाने चांगलीच भरारी घेतली. पण सोन्याची अटणी करताना वापरण्यात येणाऱ्या अॅसिड व केमिक्लसमुळे प्रदूषणाबरोबर मानवी आरोग्याला धोकादायक आहे. परिणामी हा व्यवसाय शहराबाहेर स्थलांतरीत करा' अशी मागणी राष्ट्रवादी काँग्रेस सेवादलाच्या शिष्टमंडळाने आयुक्त डॉ. मल्लीनाथ कलशेट्टी यांच्याकडे मंगळवारी केली. निवेदनात म्हटले आहे, 'कोल्हापुरात तयार होणाऱ्या दागिन्यांना देशासह परदेशात चांगली मागणी आहे. परिणामी सोने वितळवून पुन्हा दागिने करणारा अटणी व्यवसाय तेजीत आहे. मात्र अटणी करताना आरोग्याला घातक अशा केमिक्लसचा वापर केला जातो. सोने वितळवताना निर्माण होणाऱ्या धुरांमुळे लहान मुलांना खोकला, नाकात व घशात दुखणे आदी प्रकार होऊ लागले आहेत. मध्यवस्तीत सुरू असलेल्या व्यवसायामुळे मानवी आरोग्य धोक्यात आल्याने हा व्यवसाय शहराबाहेर स्थलांतरीत करावा.' शिष्टमंडळात फिरोज सरगूर, धनंजय चव्हाण, अमित भोसले, संजय पाटील, रोहित मोरे, प्रमोद ढोपे, आनंदा चव्हाण, सुहास मुदगल आदी उपस्थित होते.

म. टा. प्रतिनिधी, कोल्हापूर

जिल्हा परिषदेच्या महिला व बालकल्याण विभागामार्फत कोट्यवधी रुपयांची तरतूद करुनही आर्थिक वर्षात निधी खर्च पडला नाही. अधिकाऱ्यांत समन्वयाचा अभाव असल्यामुळे निधी शिल्लक राहिला. अखर्चित निधीप्रश्नी दोषी अधिकाऱ्यांवर कारवाई व्हायला हवी, असा आक्रमक पवित्रा समिती सदस्यांनी घेतला. उपमुख्य कार्यकारी अधिकारी सोमनाथ रसाळ यांच्यावर सदस्यांनी प्रश्नांचा भडिमार केला. तसेच शिल्लक निधीवरून त्यांच्यासह बाल विकास प्रकल्प अधिकाऱ्यांनाही धारेवर धरले.

'समितीत सगळ्या महिला आहेत, म्हणून निर्णय प्रकियेत, आराखडा तयार करताना विचारात घेत नाही का, असा प्रकार असेल तर खपवून घेणार नाही,' असा इशारा महिला सदस्यांनी अधिकारी रसाळ यांना दिला. तसेच त्यांच्या कामकाजाविषयी आक्षेप नोंदविले. समिती सभापती वंदना मगदूम यांच्या अध्यक्षतेखाली बैठक झाली. बैठकीच्या प्रारंभीच महिला सदस्यांनी अखर्चित निधीचा प्रश्न उपस्थित केला. सदस्या पद्माराणी पाटील, आकांक्षा पाटील, सुनीता रेडेकर, कल्पना चौगुले यांनी शिल्लक निधीच्या प्रश्नाला वाचा फोडली.

अधिकाऱ्यांकडे विविध योजनेची अंमलबजावणी, वैयक्तिक लाभार्थी योजनेची सद्य:स्थितीबाबत विचारणा केली. त्यावर रसाळ यांनी वैयक्तिक लाभार्थी योजनेचे प्रस्ताव बाल विकास प्रकल्प अधिकाऱ्यांकडून प्राप्त झाल्याचे सांगितले. त्यावर सदस्यांचे समाधान झाले नाही. चालू वर्षात सर्व निधी खर्च करण्याचा, सदस्यांना विचारात घेऊन निर्णय घेण्याचे आश्वासन रसाळ यांनी दिले. तसेच समितीची बैठक होण्यापूर्वी अधिकारी, सदस्यांची संयुक्त बैठक घेण्याबाबत चर्चा झाली. सभापती मगदूम यांनी अधिकाऱ्यांना सदस्यांची मते विचारात घेण्याच्या सूचना केल्या. बैठकीला वंदना पाटील, रेखा हत्तरकी, शिवानी भोसले आदी उपस्थित होते.

०००

आराखड्यात सभापतींचे गाव नाही

महिला व बालकल्याण विभागामार्फत नवीन अंगणवाड्या प्रस्तावित केल्या आहेत. मात्र, प्रशासनाने तयार केलेल्या आराखड्यात हेर्ले आणि माणगाव येथील अंगणवाड्यांचा समावेश नाही. सदस्यांना विचारात न घेता आराखडा कसा तयार केला यावरून सदस्या पद्मावती पाटील यांनी अधिकाऱ्यांना खडे बोल सुनावले. सभापती मगदूम यांनीही माणगाव येथील अंगणवाड्याच्या प्रस्तावात का समावेश केला नव्हता, असा सवाल अधिकाऱ्यांना केला. त्यावर अधिकाऱ्यांनी दुसऱ्या आराखड्यात हेर्ले आणि माणगाव येथे नव्या अंगणवाड्या प्रस्तावित केल्याचे सांगत सारवासारव करण्याचा प्रयत्न केला.

म. टा. प्रतिनिधी, कोल्हापूर

मुख्यमंत्री ग्रामीण पेयजल कार्यक्रमांतर्गत मंजूर नळ पाणीपुरवठा योजनांच्या अंमलबजावणीसाठी कोल्हापूर जिल्हा परिषदेला पाच कोटी २१ लाख ७० हजार रुपयांचा निधी मंजूर झाला आहे. जिल्हा परिषदेने हा निधी मंजुरी दिलेल्या नळ पाणीपुरवठा योजनांच्या अंमलबजावणीसाठी खर्च करावयाचा आहे.

येत्या आर्थिक वर्षातच हा निधी खर्च होणे आवश्यक आहे. कामाच्या प्रगतीचा व खर्चाचा अहवाल माहिती संचालक पाणी व स्वच्छता सहाय्य संस्था बेलापूर नवी मुंबई यांच्याकडे दर महिन्यास खर्चाचा अहवाल सादर करण्याच्या सूचना केल्या आहेत.

राज्य सरकारने, मुख्यमंत्री ग्रामीण पेयजल कार्यक्रमांतर्गत नव्याने घ्यावयाच्या पाणीपुरवठा योजनांच्या अंमलबजावणीसाठी २०१९-२० या आर्थिक वर्षासाठी ३०० कोटी रुपयांची अर्थसंकल्पीय तरतूद केली आहे. त्या अंतर्गत जालना जिल्हा परिषदेसाठी १२ कोटी रुपयांची निधी मंजूर केला आहे. सरकारने निधी मंजूर करताना काही अटी लागू केल्या आहेत. त्यामध्ये ज्या पाणीपुरवठा योजनांच्या निविदा जादा दराने स्वीकारल्या आहेत. अशा योजनांना सुधारित प्रशासकीय मंजुरी प्राप्त झाल्याशिवाय मूळ प्रशासकीय मंजुरीच्या किमतीपेक्षा जास्त खर्च करण्यात येऊ नये, असे आदेशात म्हटले आहे. विशेष म्हणजे जिल्हा परिषदेने या अनुदानातून केलेल्या खर्चाचे स्वतंत्र लेखे ठेवावेत अशा सूचना आहेत.

म. टा. प्रतिनिधी, कोल्हापूर

जैन धर्माच्या प्रचार आणि प्रसाराबरोबरच सर्व धर्मियांशी सौहार्दाचे संबध ठेवणारे शुक्रवार पेठेतील प्राचीन जैन मठाचे डॉ. लक्ष्मीसेन भट्टारक पट्टाचार्य महास्वामी (वय ७७) यांचे गुरुवारी पहाटे साडेतीन वाजण्याच्या सुमारास हृदयविकाराच्या तीव्र झटक्याने निधन झाले. शुक्रवारी (ता. २१) बेळगाव जिल्ह्यातील रायबाग येथे दुपारी त्यांच्या पार्थिवावर अंत्यसंस्कार होणार आहेत.

जैन समाजाच्या तत्वज्ञानाचा देशविदेशात प्रसार करणारे लक्ष्मीसेन महास्वामी गेले काही दिवस मधुमेहासह अन्य विकाराने आजारी होते. पण त्यांनी आपल्या दिनचर्येत कोणताही बदल केला नव्हता. धार्मिक विधी, प्रवचन, सार्वजनिक कार्यक्रमात ते सहभागी होत होते. बुधवारी मध्यरात्री त्यांना अस्वस्थ वाटू लागल्यावर त्यांनी त्यांचे पुतणे अजित नैनार आणि मठातील पंडीत राजोपाध्ये यांना बोलावले. मठाच्या परिसरातील डॉक्टरांना बोलावून घेण्यात आले. त्यांनी त्यांची तपासणी केल्यानंतर त्यांना हॉस्पिटलमध्ये उपचारासाठी दाखल करण्यास सांगितले. मात्र हॉस्पिटलमध्ये नेत असतानाच त्यांना हृदयविकाराचा तीव्र झटका आला, त्यातच त्यांचे निधन झाले.

निधनाचे वृत्त समजताच अॅड. के.ए. कापसे, अॅड महावीर बिंदगे, महावीर देसाई, सुरेश रोटे, चेंबर ऑफ कॉमर्सचे अध्यक्ष संजय शेटे, पद्माकर कापसे, संजय मगदूम, रवी चौगुले यांनी जैन मठात त्यांच्या पार्थिवाचे अंत्यदर्शन घेतले. त्यांच्या निधनाची माहिती कर्नाटकातील श्रवणबेळगोळ येथील चारुकिर्ती महाराजांना देण्यात आली. त्यांच्या सल्ल्यानुसार जैन धर्म आणि लक्ष्मीसेन मठाच्या प्रथेनुसार महास्वामींवर रायबाग येथील मठात शुक्रवारी अंत्यसंस्कार करण्याचा निर्णय घेण्यात आला. त्यानंतर स्वामींजीचे पार्थिव कदमवाडी येथील डॉ. डी.वाय. पाटील येथील शवागृहात ठेवण्यात आले. शुक्रवारी सकाळी सहा ते आठ वाजेदरम्यान त्यांचे पार्थिव अंत्यदर्शनासाठी ठेवण्यात येणार आहे. त्यानंतर वाहनाने पार्थिव रायबाग येथे नेण्यात येणार आहे. रक्षाविसर्जन सोमवारी (ता. २४) होणार आहे.

लक्ष्मीसेन महाराजांचे मूळ नाव कुमार बा.ब. चंद्रकिर्ती असे होते. तामिळनाडूतील गूडलूर येथे दोन ऑगस्ट १९४२ रोजी त्यांचा जन्म झाला. १९६५ मध्ये त्यांनी दीक्षा घेतली. त्यानंतर लक्ष्मीसेन जैन मठाचे महास्वामी म्हणून त्यांची नियुक्ती झाली. रायबाग, होसूर (जि. बेळगाव, कर्नाटक), पेनगोंडी (आंध्र प्रदेश), जिनकंची (तामिळनाडू) या मठांचे प्रमुख म्हणून ते कार्यरत होते. जैन तत्वज्ञानाचा प्रचार व प्रसार करण्याबरोबरच व्यसनमुक्ती, लहान मुले, तरुणांवर संस्काराचे कार्य त्यांनी अखेरपर्यंत केले. मराठी जैन साहित्य संमेलनाची सुरुवात त्यांनी २७ वर्षांपूर्वी सुरु केली होती.

म. टा. वृत्तसेवा, कसबा बावडा

'छत्रपती शिवाजी महाराज, संभाजी महाराज आणि राजर्षी शाहू महाराज हे उत्तर प्रदेशातील तरुणांचे आयकॉन आहेत. शाहू महाराजांना राजर्षी ही उपाधी आमच्या समाजाने दिली, ही आमच्या दृष्टीने अतिशय महत्त्वाची आणि अभिमानाची गोष्ट आहे,' असे प्रतिपादन उत्तर प्रदेशातील कानपूर येथील अखिल भारतीय कुर्मी क्षत्रिय महासभेचे अध्यक्ष एल. पी. पटेल यांनी केले. ते कसबा बावडा येथील राजर्षी शाहू जन्मस्थान येथे छत्रपती राजर्षी शाहूंच्या प्रतिमेस अभिवादन केल्यानंतर केल्यानंतर ते बोलत होते.

कोल्हापूरमध्ये मराठा महासंघ व राजर्षी शाहू सामाजिक सलोखा मंच यांच्या वतीने राजर्षी कृतज्ञता परिषदेचे आयोजन करण्यात आले आहे. या परिषदेसाठी उत्तर प्रदेशातून कुर्मी क्षत्रिय महासभेचे पदाधिकाऱ्यांचे आगमन गुरुवारी झाले. त्यांनी बावडा येथील राजर्षी शाहू जन्मस्थान व नवीन राजवाडा येथील संग्रहालयाला भेट दिली. इतिहास संशोधक इंद्रजित सावंत व डॉ. पद्मा पाटील यांची राजर्षी शाहू महाराजांची पुस्तके देऊन स्वागत केले.

यावेळी पटेल म्हणाले, 'एखाद्या राजाने सर्व समाजांचा विचार करून वंचित समाजासाठी आरक्षण देणे ही बाब खूप महत्त्वपूर्ण होती. या राजर्षींच्या नगरीत आम्हाला यायला मिळाले, हे आम्ही आमचे भाग्य समजतो.'

कुर्मी महासभेचे उपाध्यक्ष डॉ. राजकुमार सचान म्हणाले, 'शारीरिक व मानसिकदृष्ट्या सक्षम राहण्यासाठी स्वतःच्या वाड्यात त्यांनी कुस्तीचा आखाडा बांधून प्रेरणा देणार हा महान राजा होता. त्यांच्या भूमीत येणे हे रोमांचकारी आहे.'

यावेळी कानपूर जिल्हा उपाध्यक्ष संजेशकुमार कटियार, अॅड. शशिकांत सचान, मराठा महसंघाचे अध्यक्ष वसंतराव मुळीक, बबनराव रानगे, अवधूत पाटील, इंद्रजित माने, शरद साळुंखे, शंकरराव शेळके, अजित पोवार, किशोर पाटील आदी उपस्थित होते.

म. टा. प्रतिनिधी, कोल्हापूर

नव्या शैक्षणिक वर्षाला सुरुवात होऊनही शाहूवाडी तालुक्यातील अनेक शाळांमध्ये शिक्षकांच्या नियुक्त्या झाल्या नाहीत. गेल्या शैक्षणिक वर्षात १४१ शिक्षकांच्या जागा रिक्त होत्या. यावर्षी २०० जागा रिक्त असल्याने शून्य शिक्षकी शाळांच्या संख्येत वाढ होत आहे. ग्रामीण मुलांच्या शैक्षणिक प्रगतीवर परिणाम होणार असून जिल्हा परिषदेने तत्काळ शिक्षकांच्या नियुक्त्या कराव्यात, यासाठी ऑल इंडिया स्टुडंटस फेडरेशनने कार्यकर्त्यांनी एआयएसएफ प्रशासनाकडे केली आहे.

'शाळा सुरू झाल्यादिवशी शिक्षकांअभावी २० शाळा उघडल्या नाहीत. शाहूवाडी तालुक्यासारख्या दुर्गम भागात शिक्षक बदली करुन घेण्यास धजावत नाहीत. तालुक्यातील शेंबवणे, चौकेवाडी, धूमकेवाडी, परळे गावांमध्ये अद्याप एकही शिक्षक नाही. शिक्षकांअभावी शाळा बंद अशी स्थिती आहे. रिक्त जागा लवकर भराव्यात' अशी मागणी गिरीश फोंडे, हरीश कांबळे, प्रशांत आंबी, धीरज कठारे, योगेश कसबे, सुनील कोळी, हर्षवर्धन कांबळे यांच्या शिष्टमंडळाने केली.

याप्रश्नी सामान्य प्रशासन विभागाचे उपमुख्य कार्यकारी अधिकारी रविकांत आडसूळ यांच्याशी चर्चा केली. आडसूळ यांनी रिक्त शाळेत शिक्षक नियुक्ती लवकर केले जाईल, असे आश्वासन दिले.

००००

समुपदेशनाद्वारे शिक्षक बदल्या

जिल्हा परिषदेमार्फत समुपदेशनाद्वारे ४०० अधिक शिक्षकांच्या बदल्या होणार आहेत. यामध्ये पदवीधर, मुख्याध्यापक आणि शिक्षकांचा समावेश आहे. शनिवारी (ता. २२) समुपदेशनाद्वारे बदली कार्यक्रम आयोजित केला आहे. गुरुवारी रात्री कर्मचाऱ्यांना समुपदेशन बदली प्रक्रिया शनिवारी होणार असल्याचे कळविले. गुरुवारी दिवसभर मुख्य कार्यकारी अधिकारी अमन मित्तल व प्राथमिक शिक्षणाधिकारी आशा उबाळे गुरुवारी पुणे आणि मुंबई दौऱ्यावर होत्या. सायंकाळी ते कोल्हापुरात परतल्यानंतर समुपदेशन प्रक्रिया राबविण्याचा निर्णय झाला. दरम्यान विस्थापित, रँडम आणि आंतरजिल्हा बदली प्रक्रियेत यंदाही घोळ झाला आहे. शिरोळ तालुक्यातील दोघा शिक्षकांनी यामध्ये आर्थिक घडामोडी सुरू केल्याच्या तक्रारी वाढत आहेत.

००००

Sachin.patil1@timesgroup.com

Tweet@sachinpMT

कोल्हापूर : जागतिकीकरणाच्या जीवघेण्या स्पर्धेत समाजातील प्रत्येक घटकाला मानसिक आणि शारीरिक ताणतणावाला सामोरे जावे लागत आहे. त्यामुळे मन आणि शरीराच्या आरोग्यासाठी योग साधना फायदेशीर ठरत असल्याचे लक्षात येताच योग शिकण्याकडे कल वाढत आहे. गेल्या पाच वर्षांत योग शिक्षकांना मागणी वाढू लागली आहे. यातून रोजगाराच्या अमाप संधी उपलब्ध झाल्या आहेत. तज्ज्ञ प्रशिक्षकांच्या मागणीत ३५ टक्क्यांची वाढ झाल्याचे या क्षेत्रातील तज्ज्ञांचे म्हणणे आहे.

जिल्ह्यात दीड हजारांहून अधिक योग प्रशिक्षक कार्यरत आहेत. ठिकठिकाणी आयोजित केल्या जाणाऱ्या योग वर्गांचे दरमहा शुल्क पाचशे ते हजार रुपये असून शहर-जिल्ह्यात साधारणत: ३० ते ३५ योग वर्ग सुरू आहेत. योग वर्गांतून मिळणाऱ्या उत्पन्नाचे आकडे लाखांमध्ये आहेत. त्यामुळे परिपूर्ण आरोग्य टिकविण्याबरोबरच एक करिअर म्हणूनही या क्षेत्राकडे पाहिले जात आहे.

दैनंदिन धावपळीत आरोग्याबाबत जागरूकता वाढत असून तणावाचे व्यवस्थापन करताना योगाभ्यास फायदेशीर ठरत आहे. हृदयविकार, उच्च रक्तदाब, मधुमेह, नैराश्य असे विकार तिशीच्या उंबरठ्यावर आल्याने प्रत्येकजण स्वत:च्या आरोग्याकडे सजगतेने पाहू लागला आहे. व्यायामाचा अभाव आणि बदलती जीवनशैली यामुळे कमी वयात असाध्य आजार जडू लागल्याने तरुण योग शिबिरांकडे वळत आहेत. शहरात नागाळा पार्क, शिवाजी पार्क, ताराबाई पार्क, महावीर गार्डन, कसबा बावडा परिसर, रंकाळा परिसर, शिवाजी तरुण मंडळ, सानेगुरुजी वसाहत, आपटेनगर, रामानंदनगर, जरगनगर तसेच शिवाजी विद्यापीठ परिसरात नियमित योग वर्ग चालू आहेत.

योग वर्गांमध्ये आठवडा, दहा दिवस, महिना, तीन महिने असा कालावधी असतो. प्रशस्त व वातानुकूलित हॉल आणि निष्णात प्रशिक्षक असल्यास शुल्क वाढते. योगासनांचा शालेय स्तरावर मोठा प्रचार झाल्यामुळे नित्यनियमाने योगासने करणाऱ्यांच्या संख्येतही वाढ होत आहे. भविष्यात या क्षेत्रांत आर्थिक उलाढाल वाढणार आहे असे या क्षेत्रात कार्यरत असलेल्या तज्ज्ञांचे म्हणणे आहे.

तरुणाईचा पुढाकार

आजघडीला तरुणाईला सर्वाधिक ताणतणावाला सामोरे जावे लागते. त्यामुळे तरुणही योगाकडे वळत आहेत. योगा शिबिरे व योगा शिकवणाऱ्या संस्थांमध्येही तरुणांची उपस्थिती आवर्जून दिसते. शहरातील नामवंत जिम सेंटर्समध्ये खास प्रशिक्षकांच्या माध्यमातून योगा शिकवला जातो. आधुनिक पद्धतीने योग केंद्राचे रुप पालटल्याने त्याला कार्पोरेट 'टच' मिळत आहे.

तज्ज्ञ, अनुभवी प्रशिक्षकांना मागणी

योगाच्या वाढत्या लोकप्रियतेमुळे तज्ज्ञ व अभ्यासू योग प्रशिक्षकांना मागणी वाढत आहे. जिल्ह्यात दीड हजाराहून अधिक योग प्रशिक्षक आहेत. योग क्षेत्रात रोजगाराच्या संधी उपलब्ध होत असल्याने योगा अभ्यासक्रमाकडे वळण्याचा कल वाढू लागला आहे. मोठ्या शहरांमध्ये चांगल्या प्रशिक्षकांची गरज भासत असून योग प्रशिक्षण देणाऱ्या संस्था उदयाला येत आहेत. दिवसातून दोन सत्रात योग वर्ग घेतले जात आहेत. सरकारकडूनही योग प्रसाराकरिता अधिक जोमाने प्रयत्न होऊ लागल्याने 'योग' करिअरचा मार्ग ठरू लागला आहे.

योग शिक्षकाचा डिप्लोमा केल्यानंतर योग प्रशिक्षण वर्ग सुरू करता येतात. सध्या एका व्यक्तीला ५०० ते १ हजार रुपये इतकी फी आकारली जाते. योगा थेरपिस्टची पदवी घेतल्यानंतर रुग्णाला आवश्यक योगोपचार करता येतात. सरकारमान्य परीक्षा पास झाल्यानंतर देशांतर्गत तसेच देशाबाहेर नोकरीच्या संधी उपलब्ध आहेत. योगोपचारच्या शास्त्रशुद्ध शिक्षणानंतर स्वतःचे योगोपचार, निसर्गोपचार सेंटर चालू करता येते.

- डॉ. श्वेतलीना पाटील, योगा अभ्यासक

पॉइंटर

- जगभरातील योगविषयी उद्योगक्षेत्र पाच लाख कोटींच्या पुढे

- देशाची वेलनेस इंडस्ट्री ४९ हजार कोटींपर्यंत पोहोचली

- जागतिक योग क्षेत्र जवळपास ५.३२ लाख कोटींचे

- यात अमेरिकेची हिस्सेदारी १.७ लाख कोटी रुपयांपेक्षा अधिक

- २०२० पर्यंत वेलनेस इंडस्ट्रीतील उलाढाल दीड लाख कोटींपर्यंत जाण्याची अपेक्षा

कोल्हापूर टाइम्स टीम

सामाजिक न्याय विभागातर्फे मागासवर्गीय विद्यार्थी, विद्यार्थिनींसाठी चालवल्या जात असलेल्या ६४ वसतिगृहातील प्रवेश प्रक्रिया सुरू झाली आहे. यापैकी कोणत्याही वसतिगृहात प्रवेश मिळाणाऱ्यास मोफत निवास, भोजनाची सुविधा दिल्या जातील. सदर बाजार परिसरातील डॉ. पंजाबराव देशमुख वसतिगृहात खुल्या प्रवर्गातील विद्यार्थ्यांसाठीच्या प्रवेशासाठी पुढील महिन्यात प्रक्रिया राबवली जाणार आहे. येथे फक्त निवासाची सोय असेल.

सामाजिक न्याय विभागाची ४६ वसतिगृहे जिल्हा परिषदेच्या समाजकल्याण प्रशासनाकडून चालविली जातात. अनुसूचित जाती, जमाती, भटक्या जमाती, विशेष मागास प्रवर्ग, इतर मागासवर्गीय, आर्थिकदृष्या दुर्बल घटकातील पाचवी ते दहावीपर्यंतच्या विद्यार्थ्यांना प्रवेश दिला जातो. कमीत २४ ते ६० अशी विद्यार्थी क्षमता आहे. प्रत्येक वसतिगृहात रिक्त होणाऱ्या पाच ते दहा टक्के रिक्त जागांवर प्रवेश प्रक्रिया राबवली जात आहे. गुणवत्ता असलेल्या पात्र विद्यार्थ्यांना प्रवेश दिला जात आहे.

राज्य सरकारच्या समाजकल्याण प्रशासनाच्या नियंत्रणाखाली जिल्ह्यातील १८ वसतिगृहांचे कामकाज चालते. यामध्ये सातवी ते पदवी, पदव्युत्तर, पीएचडी करणाऱ्या अनाथ, दिव्यांग आणि खुल्या वगळता इतर प्रवर्गातील विद्यार्थ्यांना प्रवेश दिला जातो. येथील रिक्त १० ते २० टक्के जागांवर प्रवेश प्रक्रिया राबवली जात आहे. या वसतिगृहात प्रवेश मिळालेल्यांना मोफत निवास, भोजनासह प्रती विद्यार्थ्यास ६०० रुपये विद्यावेतन दिले जाते. रिक्त जागांपेक्षा अधिक अर्ज आल्यास गुणवत्तेनुसार प्रवेश दिला जातो. पुढील महिन्यापर्यंत प्रवेश प्रक्रिया चालणार आहे. प्रवेश घेऊ इच्छिणाऱ्या विद्यार्थ्यांनी संबंधीत वसतिगृहाच्या अधीक्षकांना भेटून अर्ज करणे आवश्यक आहे, असे आवाहन 'समाजकल्याण' प्रशासनाने केले आहे. दरम्यान, यातील अनेक वसतिगृहे जुनी आहेत. शहरातील मिस क्लार्क हॉस्टेल आणि श्री देवी इंदूमती विद्यार्थी वसतिगृह ही संस्थानकालीन, राजर्षी शाहू महाराजांच्या कालखंडातील आहेत.

खुल्या प्रवर्गातील वसतिगृह

मराठा समाजातर्फे राज्यभर निघालेल्या ठोक मोर्चानंतर गेल्यावर्षी येथे डॉ. पंजाबराव देशमुख वसतिगृह सुरू करण्यात आले. या वसतिगृहाची क्षमता ७४ आहे. येथे साडेआठ लाखांच्या आत उत्पन्न असलेल्या आणि केंद्रीय प्रवेश प्रक्रियेव्दारे प्रवेश मिळालेला खुल्या प्रवर्गातील कोणताही शाखेतील विद्यार्थी प्रवेशास पात्र आहे. पुढील महिन्यापासून याची प्रवेश प्रक्रिया राबवण्यात येणार आहे. प्रवेश मिळालेल्या विद्यार्थ्यांना मोफत निवासाची सुविधा मिळेल. त्यांच्या खात्यावर सरकार ८ हजार रुपये केल्यानंतर ते वसतिगृह चालवण्याचा ठेका घेतलेल्या संस्थेस द्यावयाचे आहेत. प्रवेशावेळी कोणतेही शुल्क आकारण्यात येणार नाही.

डॉ. पंजाबराव देशमुख वसतिगृहातील प्रवेश प्रक्रिया पुढील महिन्यापासून सुरू होईल. वसतिगृह चालवण्यासाठी ठेका देण्यारी निविदा लवकरच प्रसिद्ध केली जाईल. याचा ठेका मिळणाऱ्या संस्थेने निवासी विद्यार्थ्यांना मुलभूत सुविधा, सुरक्षा पुरवायची आहे.

- प्रशांत पट्टेलवार

प्राचार्य, शासकीय तंत्रनिकेतन आणि सचिव, डॉ. देशमुख वसतिगृह समिती

शहर व तालुकानिहास वसतिगृहे

१३

कोल्हापूर शहर

१०

हातकणंगले

७

चंदगड

५ (प्रत्येकी)

कागल, भुदरगड, गडहिंग्लज

४ (प्रत्येकी)

राधानगरी, आजरा

२ (प्रत्येकी)

शाहूवाडी, शिरोळ, करवीर, गारगोटी, शिरोळ

१ (प्रत्येकी)

पन्हाळा , गगनबावडा

वसतिगृहातील प्रवेश, सेवा सुविधासंबंधी अधिक माहितीसाठी सदर बाजार परिसरातील राज्य सरकारच्या समाज कल्याण कार्यालयातून कामकाज चालते. यासाठी ०२३१-२६५१३१८ हा संपर्क क्रमांक आहे. जिल्हा परिषदेच्या समाजकल्याण विभागाकडे ०२३१-२६५५४०३ या क्रमांकावर संपर्क साधणे आवश्यक आहे.