कोल्हापूर टाइम्स टीम शिवाजी विद्यापीठातील लोककला केंद्राचे नामकरण राष्ट्रमाता जिजाऊ असे करण्यात आले. अखिल भारतीय मराठा महासंघाच्यावतीने गेल्या तीन वर्षापासून सुरू असलेल्या या मागणीची दखल घेत सायंकाळी विद्यापीठ प्रशासनाच्यावतीने लोककला केंद्रात राजमाता जिजाऊ बहुउद्देशीय सभागृह नाव देण्यात आले. शिवाजी विद्यापीठात राष्ट्रमाता जिजाऊ यांच्या स्मृतीचे जतन व्हाव यासाठी विद्यापीठातील दीक्षांत समारंभाच्या लोककला केंद्राला राष्ट्रमाता जिजाऊ यांचे नाव द्यावे अशी मागणी अखिल भारतीय मराठा महासंघातर्फे गेल्या तीन वर्षापासून करण्यात येत होती. या मागणीची दखल घेत शिवाजी विद्यापीठाच्या अधिसभा विशेष समिती आणि व्यवस्थापन समितीमध्ये लोककला केंद्राला जिजाऊ यांचे नाव देण्यास मंजुरी मिळाली. मात्र विद्यापीठ प्रशासनाकडून लोककला केंद्रात जिजाऊ यांचे नाव देण्याची कार्यवाही करण्यात आली नव्हती. राजमाता जिजाऊ स्मृतिदिनानिमित्त सोमवारी मराठा महासंघाच्या महिला आघाडीकडून लोककला केंद्रात राष्ट्रमाता जिजाऊ यांचे नाव देऊन या निर्णयाची अंमलबजावणी करावी अशी मागणी कुलगुरू डॉ. शिंदे यांच्याकडे करण्यात आली. यावेळी लोककला केंद्राचे नामकरण राष्ट्रमाता जिजाऊ असे करण्याची कार्यवाही तत्काळ करण्यात येईल असे आश्वासन डॉ. शिंदे यांनी दिले. त्यानुसार सोमवारी सायंकाळी जिजाऊ यांच्या नावाचा फलक लोककला केंद्रावर लावण्यात आला. अखिल भारतीय मराठी मराठा महासंघ महिला आघाडीच्या जिल्हाध्यक्षा शैलजा भोसले, विशाल लोंढे, तेजस्विनी नलवडे, बिना देशमुख,, नेहा मुळीक, अश्विनी पाटील यांच्यासह महिला कार्यकर्त्या उपस्थित होत्या.
मोबाइल अॅप डाउनलोड करा आणि राहा अपडेट
