म. टा. प्रतिनिधी, कोल्हापूर

रिक्षाचालक वडिलांना किडनीचा आजार जडला. उदरनिर्वाहाचे साधनच थांबले. आईला चार घरची धुणीभांडी करण्याशिवाय पर्याय नव्हता. या स्थितीत घरातील काम आटोपून दोन लहान भावंडांचा सांभाळ करीत तिने दहावीचा अभ्यास केला. ९०.४० टक्के गुण मिळवून ती उषाराजे हायस्कूलमध्ये तिसऱ्या क्रमांकाने उत्तीर्ण झाली. कदमवाडीतील सिद्धी संजू हुंबे या विद्यार्थिनीच्या यशापुढे परिस्थितीही फिकी पडली.

सिद्धी हुंबे ही आई, वडील आणि दोन भावंडांसह कदमवाडी येथील शिवप्रसाद कॉलनीत राहते. रिक्षा चालवून वडील संजू हुंबे कुटुंबाचा उदरनिर्वाह करीत होते. अन्य कोणतेही उत्पन्नाचे साधन नसल्याने रिक्षा हाच त्यांच्या घराचा आधार होता. मात्र, गेल्यावर्षी अचानक संजू यांची तब्येत बिघडली. रुग्णालयात जाऊन तपासण्या केल्यानंतर घरात सर्वांना धक्का बसला. त्यांना किडनीचा विकार असल्याचे स्पष्ट झाले. रिक्षा चालवणे थांबले. औषधांचा खर्च वाढत गेल्याने सिद्धीच्या आईने परिसरातील घरांमध्ये धुणीभांडी करून परिस्थितीचा सामना सुरू केला. पतीचा दवाखाना आणि दोन मुलींसह एका मुलाच्या शिक्षणाचा खर्च करताना सिद्धीच्या आईची आजही दमछाक होते. याही स्थितीत सिद्धी डगमगली नाही. दोन्ही भावंडांचा रोजचा अभ्यास घेणे आणि घरातील स्वयंपाकासाठी आईला मदत करून तिने दहावीचा अभ्यास केला.

शिक्षणासह सिद्धीला अभिनयाचीही आवड आहे. 'ती फुलराणी' हा एकपात्री प्रयोग सादर करून तिने शाळेत शिक्षकांची वाहवा मिळवली. जिल्हास्तरीय शालेय स्पर्धेत तिच्या एकपात्री प्रयोगाला पहिल्या क्रमांकाचे बक्षीसही मिळाले. विशेष म्हणजे ऐन परीक्षेच्या तोंडावर तिला राज्यस्तरीय स्पर्धेत पुण्यात प्रयोगाचे सादरीकरण करण्यासाठी जावे लागले. यातही तिने उत्तम यश मिळवले. परिस्थितीची तक्रार करण्यापेक्षा परिस्थितीशी दोन हात करून तिने दहावीच्या परीक्षेत ९०.४० टक्के गुण मिळवले. दहावीचा निकाल समजताच डायलेसिसवर असलेल्या तिच्या वडिलांच्या आनंदाला पारावार उरला नाही. इतरांच्या घरात धुणीभांडी करण्यासाठी गेलेल्या आईला लेकीचा निकाल समजताच तिलाही आभाळ ठेंगणे झाले. सिद्धीला विज्ञान विषयाची आ‌वड आहे. स्पर्धा परीक्षांचा अभ्यास करून प्रशासकीय अधिकारी बनण्याचा तिचा निर्धार आहे. विज्ञात विषयातून बारावी पूर्ण केल्यानंतर पुढील शिक्षण कोणत्या शाखेतून घ्यायचे हे ती ठरवणार आहे.

Anuradha.kadam@timesgroup.com

Tweet@anuradhakadamMT

कोल्हापूर : गवंडी काम करणाऱ्या वडिलांना कधी मिळालं तर काम आणि नाहीतर कुठेही मजुरीवर दिवसाकाठी हातात येणारी अवघी शंभराची नोट. मोठ्या बहिणीची शिक्षणासोबत घराला हातभार लावण्यासाठी धडपड. धाकटा भाऊ दिव्यांग असल्याने त्याच्या सेवेत दिवसभर राबणारी आई. दौलतनगरातील एक खोलीच्या भाड्याच्या घरात राहणाऱ्या सोनू गोरल हिच्या कौटुंबिक परिस्थितीची ही चित्तरकहाणी. या गवंड्याच्या लेकीकडे होती फक्त जिद्द. त्या जिद्दीच्या जोरावर सोनूने ९१ टक्के गुण मिळवून प्रशासकीय अधिकारी होण्याच्या स्वप्नाला भक्कम दिशा दिली आहे. उषाराजे हायस्कूलची विद्यार्थिनी असलेल्या सोनू गोरलच्या या यशाने खडतर परिस्थितीलाही नमवण्याची किमया केली आहे.

पोटाची खळगी भरण्यासाठी कर्नाटकातून कोल्हापूरची वाट धरलेल्या गोरल कुटुंबाचं सारं काही हातावरच्या पोटावर. सोनूचे आईवडील अशिक्षित. दोन मुलींच्या पाठीवर झालेल्या मुलाच्या अपंगत्वाने सोनूचे वडील चंद्रकांत यांच्यावर नियतीने अजूनएक आघात केला. पाच जणांच्या कुटुंबाचा भार पेलण्यासाठी गवंडी कामाला सुरूवात केली. बांधकाम सुरू असेल तेथे गवंडी कामासाठी जायचे हेच त्यांचे उदरनिर्वाहाचे साधन. जेव्हा काम असेल तेव्हाच पैसे मिळणार असल्याने इतरवेळी पडेल ते काम करून त्यांनी घर चालवले. वडिलांची ही धडपड पाहतच सोनू शालेय प्रवास करत होती. दहावीच्या वर्षी तिने नव्वद टक्के पार करण्याचा चंग बांधला होता. दौलतनगरसारख्या संवेदनशील परिसरात राहणाऱ्या सोनूने केवळ अभ्यासावर लक्ष केंद्रीत केले. दिवसभर शाळा, त्याआधी घरी आईला कामात मदत, पुन्हा सायंकाळी घरकाम व त्यानंतर रात्री जागून अभ्यास करत सोनूने ध्येयापर्यंतचा प्रवास सुकर केला आहे. भविष्यात स्पर्धा परीक्षांच्या माध्यमातून सोनूला प्रशासकीय अधिकारी व्हायचं आहे.

सोनू सांगते, 'घरातील द्रारिद्र्य किती भीषण असू शकते याचा अनुभव आम्हा भावंडांना अनेकदा आला. भाऊ दिव्यांग असल्याने त्याचा सांभाळ करण्याशिवाय पर्याय नाही. अशा परिस्थितीत मी माझी मोठी बहिणच आईवडीलांचा आधार बनू शकतो याची मला जाणीव झाली. वडीलांकडे पैसा नसल्यामुळे खाजगी क्लासची चैन मला परवडणारी नव्हती. शाळेत जे काही शिकवतील त्याच्या आधारेच मी अभ्यास सुरू केला. स्वताच्या नोंदी काढल्या. सरावावर भर दिला. घरी बहिणीशिवाय मार्गदर्शन करण्यासाठी कुणी नव्हतं. अभ्यास करून यश मिळवलं तरच मी कुटुंबाची परिस्थिती बदलू शकेन हा एकमेव विश्वास मला बळ देत होता.'

म. टा. प्रतिनिधी, कोल्हापूर

कणेरीवाडीतील भैरवप्रसाद उर्फ सुनील पाटील याचा खून आर्थिक वादातून झाल्याचे प्राथमिक तपासात उघडकीस आले आहे. संशयित आरोपीने मृतदेह फेकलेली जागा दाखवली असून त्याला सोबत घेऊन वैभववाडी घाटात मृतदेहाच्या अवशेषाचा शोध पोलिसांनी दुसऱ्या दिवशीही घेतला.

करवीरचे सहायक निरीक्षक धनंजय पिंगळे यांनी दिलेल्या माहितीनुसार, यशवंत बँक बालिंगा-आपटेनगर शाखेतील लूटप्रकरणी अटक केलेल्या संशयित राजू नेताजी सातपुते (वय २८, रा. कळंबा), विजय रामचंद्र गौड (३६, रा. निकम गल्ली, कळंबा, ता. करवीर) व तिसरा पसार झालेला संशयित अक्षय ऊर्फ आकाश दाभाडे (३२, रा. कसबा बावडा) यांनी कणेरीवाडीतील भैरवप्रसाद पाटील याचा पाच वर्षांपूर्वी खून केल्याची कबुली दिली आहे. त्याचा मृतदेह वैभववाडी घाटातील खोल दरीत फेकून दिल्याचेही सांगितले. त्यामुळे गेली दोन दिवस पोलिसांचे पथक घाटात मृतदेहाच्या अवशेषाचा शोध घेत आहे. मात्र, अद्यापही त्याच्या हाती काहीही लागलेले नाही. मृत भैरवप्रसादची पत्नी प्रीती पाटील हिच्या संपर्कात संशयित विजय गौड होता. परंतु तिला पतीचा गौड याने खून केल्याची माहिती नव्हती. आर्थिक वादातून हा खून झाल्याचे तपासात निष्पन्न झाले आहे.

शिलादेवी शिंदे हायस्कूलचा निकाल ८०.७४

तपोवन परिसरातील शिलादेवी शिंदे सरकार हायस्कूलचा दहावीचा निकाल ८०.७४ टक्के लागला आहे. १३६ पैकी १०९ विद्यार्थी उत्तीर्ण झाले. गौरी रमेश मानेने ८९ टक्के गुण मिळवत शाळेत पहिला क्रमांक मिळवला. सुमित विलास पडळकर (८८.६०), मेधा हरिप्रसाद गुळवणी (८७.२०) गुण मिळवत अनुक्रमे द्वितीय व तृतीय क्रमांक पटकाविला. सोहम संदीप गाडेकर ८५ टक्के व निकिता भगवान फडतारे ८३.८० टक्के गुण मिळवले. त्यांना मुख्याध्यापक भिमराव ज्ञानू गोसावी या इतर शिक्षकांचे मार्गदर्शन लाभले.

देशभूषण हायस्कूलचा निकाल ७५ टक्के

देशभूषण हायस्कूलचा निकाल ७५ टक्के लागला. जुवेरिया रियाज गवंडी हीने ९१ टक्के गुण मिळवत हायस्कूलमध्ये प्रथम क्रमांक पटकावला. आयुब शब्बीर काझी (८७.८० टक्के), मल्लिका मन्सूर पठाण (८३.२०) गुणाद्वारे अनुक्रमे द्वितीय व तृतीय क्रमांकाने उत्तीर्ण झाले. मुख्याध्यापक रवींद्र गाठ, दहावी विभागप्रमुख एस. आर. भेंडे व इतर शिक्षकांचे मार्गदर्शन लाभले.

न्यू मॉडेल इंग्लिशचा निकाल ९८.६० टक्के

ताराबाई पार्कातील न्यू मॉडेल इंग्लिश स्कूल अँड ज्युनीअर कॉलेजचा दहावीचा निकाल ९८.६० टक्के लागला आहे. १७५ विद्यार्थ्यांनी विशेष प्राविण्य मिळविले. १३० विद्यार्थी प्रथम तर ७७ विद्यार्थ्यांनी द्वितीय श्रेणी प्राप्त केली आहे. ईशा संतोषकुमार एकता ही ९८.६० टक्के गुण घेत शाळेत प्रथम आली. प्रेम रणजित चिकोडेने ९६ टक्के तर आर्या महेश ढवळेने ९५.६० टक्के गुण मिळवले. त्यांनी अनुक्रमे द्वितीय व तृतीय क्रमांक मिळवला. त्यांना संस्थेच्या सचिव व प्राचार्य शुभांगी गावडे, कार्याध्यक्ष अभयकुमार साळुंखे यांचे मार्गदर्शन लाभले.

मगदूम हायस्कूलचा निकाल ७३.५८ टक्के

दादासाहेब मगदूम हायस्कूलचा दहावीचा निकाल ७३.५८ टक्के लागला. अनन्या महादेव चव्हाणने ९० टक्के गुण मिळवत हायस्कूलमध्ये प्रथम क्रमांक पटकाविला. आतिष शेषेराव कांबळेने ८३.६०, मेघा मल्लिकार्जुन मंटूर हिने ७९.६० टक्के गुण मिळवले. या विद्यार्थ्यांना संस्थेचे चेअरमन अॅड. के. ए. कापसे, सचिव महावीर देसाई, कमिटी चेअरमन एम. बी. गरगटे, मुख्याध्यापक बसवराज वस्त्रद, विभागप्रमुख योगेश माणगावे यांचे मार्गदर्शन लाभले.

खडके हायस्कूलचा निकाल शंभर टक्के

बोरपाडळे येथील शर्विल खडके हायस्कूलचा निकाल सलग तिसऱ्या वर्षी शंभर टक्के लागला. हायस्कूलमधील आश्लेषा शशिकांत मोरे (८२.६०), विरेंद्र वसंत जगताप (७७.००) तर प्रणाली तुकाराम खडके (७०.२०) यांनी अनुक्रमे प्रथम, द्वितीय व तृतीय क्रमांक मिळवला. पन्हाळा व्हॅली इंग्लिश मिडीयम स्कूलमधील ओमकार खोपकरने ७५.८०, अक्ष बाजीराव पडवळने ७५.४० तर सत्यजित आनंदा पाटीलने ६८ टक्के गुण मिळवले. संस्थेचे अध्यक्ष अविनाश खडके, प्राचार्या क्रांती खडके, सत्यजित जाधव व शिक्षकांचे विद्यार्थ्यांना मार्गदर्शन लाभले.

म. टा. प्रतिनिधी, कोल्हापूर

आईची सोन्याच्या दागिन्याच्या दुकानात दिवसभर नोकरी तर वडिलांचे हॉटेलमध्ये काम. आई-वडील दिवसभर काबाडकष्ट करत असताना घरची आर्थिक स्थितीही बेताची. क्लासची फी हप्ताहप्त्याने भरली. पण आई-वडिलांचे स्वप्न लेकीने साकार केले. दहावीच्या परीक्षेत ८५ टक्के यश मिळवत देविका मोहन परदेशी हिने मिळवलेल्या बावनकशी यशाबद्दल तिच्यावर अभिनंदनाचा वर्षाव होत आहे.

लक्ष्मीपुरी कोंडाओळ येथे परेदशी कुटुंबाचे वास्तव्य आहे. राहते घर मालकीचे असले तरी घरची आर्थिक स्थितीशी मुकाबला करताना वडील मोहन आणि आई तेजश्री दोघेही नोकरी करतात. आई तेजश्री या एका सोनेचांदीच्या दागिन्यांच्या शोरुममध्ये सकाळी दहा ते रात्री नऊ वाजेपर्यंत नोकरी करतात तर वडील हॉटेलमध्ये शेफ म्हणून काम करतात. दोघेही बाहेर असल्याने देविकाने घरकाम सांभाळून अभ्यास केला. छोट्या भावाच्या अभ्यासाकडेही लक्ष दिले. मुलगी हुशार असल्याने तिला चांगल्या क्लासला प्रवेश द्या असा सल्ला अनेकांनी परदेशी कुटुंबाला दिला. पण फी भरायला पैसे नसल्याने परदेशी कुटुंबाला चिंता सतावत होती. शनिवार पेठेतील क्लासच्या एन. एम. निळपणकर यांनी देविकाची गुणवत्ता पाहून तिला फीमध्ये सवलत देत हप्ताने फी भरण्याची मुभा दिली.

सकाळी पाच वाजता उठून देविका सहा वाजता सकाळी क्लासला जायची. क्लासहून आठ वाजता घरी आल्यावर आईला मदत करत अभ्यास करायची. एमएलजी हायस्कूलमध्ये वर्गशिक्षिका स्नेहल टोणपे यांच्यासह शिक्षकांचे मार्गदर्शन मिळाले. शाळेतून घरी आल्यावर भावासह देविका अभ्यासाला बसायची. आई नोकरीहून घरी आल्यावर जेवण करुन पुन्हा अभ्यासाला बसायची. आई-वडिलांचे कष्ट पाहून देविकानेही क्लास आणि शाळेतील अभ्यास सोडून चार ते पाच तास अभ्यासाचे नियोजन केले. विज्ञान, गणितासह संस्कृत विषय स्कोअरिंग असल्याने त्यावर लक्ष दिले. देविकाने संस्कृत विषयात ९६, मराठीत ८६, सामाजिक शास्त्रमध्ये ९० तर इंग्रजी विषयात ७० गुण मिळाले. दहावीनंतर बारावी सायन्सचे देविका शिक्षण घेणार असून एअर होस्टेस म्हणून तिला करिअर करायचे आहे.

Appasaheb.mali@timesgroup.com

Tweet:Appasaheb_MT

कोल्हापूर : वडील बांधकाम साइटवर वॉचमन. कुटुंबाचा उदरनिर्वाह चालविण्यासाठी धुणीभांडी करणारी आई, रहायला पत्र्याचे शेड. अभ्यासाला ना गाइड, ना प्रश्नसंच. अशा स्थितीमध्ये आतिश शेषेराव कांबळे या विद्यार्थ्यांने दहावीच्या परीक्षेत ८३.६० टक्के गुण मिळवत यशाचा इमला बांधला. दुसऱ्यांच्या मोबाइलवर गुरुवारी दुपारी निकाल पाहिला आणि मुलाच्या लख्ख कामगिरीने आतिषच्या आई-वडिलांना गगन ठेंगणे झाल्याची अनुभूती आली. एकीकडे मुलाच्या यशाचा आनंद दुसरीकडे परिस्थितीमुळे त्याच्या भवितव्याची चिंता पालकांना सतावत आहे.

कांबळे कुटुंबीय मूळचे उस्मानाबाद जिल्ह्यातील काणेगाव येथील. गावाकडे शेती नाही. हा परिसर कायमस्वरुपी दुष्काळी भागात मोडणारा. पोटापाण्यासाठी पाच वर्षापूर्वी त्यांनी कोल्हापूर गाठले. बांधकाम साइटवर मजूर म्हणून काम स्वीकारले. शेषेराव कांबळे यांचे शिक्षण दहावीपर्यंत तर त्यांची पत्नी लतिका यांनी सातवीपर्यंत शिक्षण घेतलेले. प्रतिकूल परिस्थितीमुळे शिक्षण अर्ध्यावर सोडावे लागल्याचे शल्य दोघांच्याही मनात आहे. त्यांना एक मुलगा आणि मुलगी आहे. शिक्षणाअभावी जे दु:ख आपल्या वाट्याला आले, ज्या हालअपेष्टा सोसाव्या लागल्या ते मुलांच्या नशिबी येऊ नये म्हणून या दाम्पत्याने मुलांना शिकवायचे ठरविले. आतिषने येथील दादासाहेब मगदूम हायस्कूलमध्ये दहावीचे शिक्षण घेतले.

विवेकांनद कॉलेजसमोरील बांधकाम साइटवर हे कुटुंब पत्र्याच्या शेडमध्ये वास्तव्यास आहे. पत्र्याच्या शेड मारुन दोन खोल्या उभारल्या. दोन खोल्यांतच स्वयंपाकगृह, बेडरुम, अभ्यासिका सगळे काही. इतर मुलांना मिळतात त्या सुविधा त्याच्यापासून कोसो दूर. आर्थिक परिस्थिती अभावी गाइड आणि प्रश्नसंच विकत घेता आले नाहीत. खासगी शिकवणीचा विचारही मनाला शिवला नाही. शाळेतील शिक्षकांची शिकवणी आणि पाठ्युपस्तकाचे वाचन यावर सारा भर होता. शिक्षकांनी सातत्याने प्रोत्साहित केले. शिक्षक योगेश माणगावे, महावीर तेरदाळ यांची मदत झाल्याचे त्याने सांगितले.

'रोज पहाटे चार वाजता उठायचे. सकाळी सात वाजेपर्यंत अभ्यास, दहा ते पाच शाळा आणि रात्री पुन्हा अभ्यास असा दिनक्रम ठरलेला. वाचन, लिखाणावर फोकस ठेवला. दहावीची परीक्षा तोंडावर असताना दोन प्रश्नसंच इतरांनी दिले. दहावीच्या परीक्षेत ८० टक्क्यापर्यंत गुण अपेक्षित होते. ८३ टक्के मिळाले. सायन्स शाखेत प्रवेश घ्यायचे आहे, खूप शिकायचे आहे' असे आतिषने सांगितले. 'मुलांच्या शिक्षणासाठी कष्ट उपसण्याची तयारी आहे. आणखी चार-पाच घरातील धुणीभांडी करू. पण मुलांना शिकवणार' हे त्याच्या आईचे बोल उमेद वाढविणारे आहेत. बांधकाम व्यावसायिक प्रसाद कुलकर्णी, ठेकेदार समाधान भालेराव यांची मदत होत असल्याचे शेषेराव कांबळे यांनी सांगितले.

तर दुष्काळी भागातील मुलांचे करिअर घडू शकेल

मुलाने, आतिश मोठ्या कष्टाने यश मिळविले. पण गरिबीमुळे त्याच्या शैक्षणिक भवितव्याची चिंता पालकांच्या डोळ्यात आहे. दुष्काळी भागातील, बांधकाम मजूराच्या मुलाला समाजाचे सहकार्य लाभले तर उच्च शिक्षण घेऊन करिअर घडविण्याचे त्याचे स्वप्न साकार होऊ शकते. विज्ञान शाखेतून उच्च शिक्षण घ्यायचे, करिअर घडवायचे आणि कुटुबीयांचा आधारवड बनायचे ही त्याची आंतरिक ईच्छा आहे.

म. टा. प्रतिनिधी, कोल्हापूर

कोल्हापूर शहरातील मान्यताप्राप्त ३३ कनिष्ठ महाविद्यालयांमध्ये स्थानिक पातळीवर अकरावीसाठी केंद्रीय ऑनलाइन प्रवेशप्रक्रियेला १४ जूनपासून सुरूवात होणार आहे. कला, वाणिज्य व विज्ञान या तीन शाखांसाठी १४ हजार १४० जागा उपलब्ध आहेत. ऑनलाइन अर्ज भरणे व प्रवेश निश्चिती करणे या दोन टप्प्यात होणाऱ्या प्रक्रियेअंतर्गत विद्यार्थी व पालकांच्या सुविधेसाठी अर्ज संकलन केंद्रांसह तक्रार निवारण केंद्र कार्यान्वित करण्यात आली आहेत अशी माहिती शिक्षण उपसंचालक सुरेश आवारी यांनी पत्रकार परिषदेत दिली. केंद्रीय प्रवेश प्रक्रिया समितीच्या कार्यकारिणी बैठकीत शनिवारी हा निर्णय घेण्यात आला.

शनिवारी दहावीचा निकाल जाहीर झाल्यानंतर अकरावी प्रवेश प्रक्रियेचे नियोजन करण्यात आले आहे. उत्तीर्ण झालेल्या विद्यार्थ्यांपैकी कुणीही विद्यार्थी प्रवेशापासून वंचित राहणार नाही यासाठी गुणवत्तेनुसार प्रवेश प्रक्रिया राबवण्यात येणार आहे.

१४ जूनपासून मूळ गुणपत्रक मिळेपर्यंत विद्यार्थ्यांनी ऑनलाइन रजिस्ट्रेशन करायचे आहे. यासाठी www.dydekop.org या अधिकृत संकेतस्थळावर ऑनलाइन प्रवेश प्रक्रियेसाठी विद्यार्थ्यांनी लॉगीन करणे आवश्यक आहे. दहावीचे गुणपत्रक मिळाल्यानंतर पुढच्या पाच दिवसात प्रवेश प्रक्रियेच्या दुसऱ्या फेरीला सुरूवात होणार आहे. या फेरीमध्ये ऑनलाइन अर्जाची प्रत आवश्यक त्या कागदपत्रांच्या छायांकित प्रतींसह कोणत्याही ११ संकलन केंद्रापैकी कोणत्याही एका संकलन केंद्रावर प्रत्यक्ष भरणे आवश्यक आहे. यावेळी ८० रुपये शुल्क ऑनलाइन किंवा रोख स्वरुपात भरल्यानंतरच अर्ज दुसऱ्या फेरीत स्वीकारला जाणार आहे. पहिल्या फेरीत कॉलेज पसंती क्रम व गुणवत्ता यादी यानुसार प्रवेश यादी जाहीर झाल्यानंतर विद्यार्थ्यांनी दुसऱ्या फेरीतील प्रक्रिया पूर्ण करून प्रवेश निश्चित करणे बंधनकारक आहे. बदलीधारक अधिकारी, कर्मचारी, सैनिकांचे पाल्य, आंतरराष्ट्रीय स्तरावरील खेळाडू यांनी आपले ऑनलाइन अर्ज मुख्य केंद्र असलेल्या मेन राजाराम हायस्कूल केंद्रावर जमा करणे आवश्यक आहे.

तक्रार निवारण केंद्र

गुणवत्ता यादी जाहीर झाल्यानंतर प्रवेशाबाबत तक्रार व शंका निरसन करण्यासाठी शाखानिहाय तक्रार निवारण केंद्र स्थापन करण्यात आले आहेत. कला शाखेसााठी डी. डी. शिंदे सरकार कॉलेज, वाणिज्य शाखेसाठी न्यू कॉलेज तर विज्ञान शाखेसाठी विवेकानंद कॉलेज येथे तक्रार निवारण केंद्र असेल. ज्या विद्यार्थ्यांची तक्रार असेल त्यांनी ऑनलाइन तक्रार केल्यानंतर त्या अर्जाची प्रत तक्रारनिवारण केंद्रामध्ये जमा करायची आहे.

मंगळवापासून उदबोधन वर्ग

अकरावीसाठी केंद्रीय पद्धतीने राबवण्यात येणाऱ्या ऑनलाइन प्रवेश प्रक्रियेला कशा प्रकारे सामोरे जावे याचे मार्गदर्शन करण्यासाठी शिक्षण उपसंचालक कार्यालयाच्यावतीने उदबोधन वर्गांचे आयोजन केले आहे. मंगळवारपासून (ता. ११) ते गुरूवारपर्यंत (१३ जून) हे वर्ग घेण्यात येणार आहेत. विद्यार्थी, पालकांसह शिक्षक, प्रवेश प्रकियेतील कर्मचाऱ्यांना मार्गदर्शन करण्यात येणार आहे. मंगळवारी रामगणेश गडकरी हॉल, पेटाळा येथे सकाळी साडेदहा ते दुपारी साडेबारा व दुपारी तीन ते पाच यावेळेत पालक व विद्यार्थ्यांसाठी मार्गदर्शन वर्ग होईल. बुधवारी (ता. १२) विवेकानंद कॉलेजच्या साळुंखे स्मृतीभवन येथे सकाळी साडेदहा ते दुपारी साडेबारा व दुपारी तीन ते पाच यावेळेत हा वर्ग होणार आहे. गुरुवारी (ता. १३) भवानी मंडप येथील मेन राजाराम हायस्कूल येथे सकाळी साडेदहा ते दुपारी साडेबारा व दुपारी तीन ते पाच यावेळेत मुख्याध्यापक, शिक्षक, संकलन केंद्रातील कर्मचाऱ्यांसाठी उद्बोधन वर्ग होईल.

प्रवेश अर्ज संकलन केंद्रे

कॉलेज संपर्क

मुख्य केंद्र मेन राजाराम हायस्कूल, भवानी मंडप २५४२७५०

महाराष्ट्र हायस्कूल, शिवाजी पेठ २६२६९८२

पद्माराजे हायस्कूल, पेटाळा २६२५४४०

केएमसी कॉलेज, गंगावेश २५४२०८५

गोखले कॉलेज, रविवार पेठ २६४२५४०

शाहू कॉलेज, कदमवाडी २६५४६५८

न्यू मॉडेल इंग्लिश स्कूल, ताराबाई पार्क २६५७०६३

एमएलजी हायस्कूल, शाहू मैदान २५४७०६५

कॉमर्स कॉलेज, रविवार पेठ २६४१२२४

शहाजी कॉलेज, दसरा चौक २६४४२०४

शाहू हायस्कूल, जुना बुधवार पेठ २५४२७५०

कमला कॉलेज, राजारामपुरी २५२२२१६

३३

कनिष्ठ महाविद्यालयांची संख्या

१४,१४०

प्रवेश क्षमता

३७२०

कला शाखा मराठी माध्यम क्षमता

१२०

कला शाखा इंग्रजी माध्यम प्रवेश क्षमता

३३००

वाणिज्य शाखा मराठी माध्यम प्रवेश क्षमता

१०४०

वाणिज्य शाखा इंग्रजी माध्यम प्रवेश क्षमता

५९६०

विज्ञान शाखा

म. टा. प्रतिनिधी, कोल्हापूर

गृहप्रकल्पातील कामाच्या हिशोबावरून उद्योजकाने मारहाण केल्याने जखमी झालेल्या सिव्हिल इंजिनीअर अतिश रवींद्र गिरीबुवा (वय २४, रा. सावर्डे तर्फे असंडोली, ता. पन्हाळा) याचा उपचार सुरू असताना शनिवारी सकाळी एका खासगी दवाखान्यात मृत्यू झाला. त्याच्या मृत्यूला कारणीभूत असलेला उद्योजक गिरीष शहा (रा. रुईकर कॉलनी) याला अटक करण्याच्या मागणीसाठी नातेवाईकांनी सहा तास मृतदेह ताब्यात घेतला नाही. पोलिसांनी शहा यांना अटकेचे आश्वासन दिल्यानंतर सायंकाळी चार वाजता मृतदेह ताब्यात घेतला. दरम्यान, उद्योजक शहा फरार आहेत.

जुना राजवाडा पोलिसांनी सांगितले की, गृहप्रकल्पाच्या कामाच्या हिशोबावरुन संशयित शहा याने स्टीकने मारहाण करून विष पिण्यास प्रवृत्त केले होते. याप्रकरणी त्याच्या विरोधात नातेवाईकांनी गुन्हा दाखल केला होता. त्याच्यावर एका खासगी रुग्णालयात उपचार सुरू होते. उपचारादरम्यान सकाळी दहा वाजता त्याचा मृत्यू झाला. त्याचा मृतदेह शवविच्छेदनासाठी सीपीआरच्या शवागृहात आणला. मात्र जोपर्यंत संशयिताला अटक होत नाही, तोपर्यंत मृतदेह ताब्यात घेणार नसल्याचा पवित्रा नातेवाईकांनी घेतला. त्यामुळे सुमारे चार तास तणाव निर्माण झाला. अखेर जुना राजवाडा पोलिस ठाण्याचे निरीक्षक प्रमोद जाधव यांनी संशयितावर कारवाईचे आश्वासन दिल्यानंतर मृतदेह ताब्यात घेतला. कामावरील हिशोबात एक लाख रुपयांची तफावत असल्याच्या कारणावरुन शहा याने त्याला ६ जून रोजी बिंदू चौकातील कार्यालयात मारहाण केली होती. आतिश या गृह प्रकल्पावर दोन महिन्यांपासून कामावर होता. शहा यांनी कुटुंबियांना मारण्याची धमकी दिल्याने बॅगेतील तणनाशक प्यायल्याने अत्यवस्थ झाला होता. दरम्यान त्या उद्योजकाच्या शोधासाठी पोलिस पथके रवाना झाली असल्याचे पोलिसांनी सांगितले.

म. टा. प्रतिनिधी, कोल्हापूर आईची सोन्याच्या दागिन्याच्या दुकानात दिवसभर नोकरी तर वडिलांचे हॉटेलमध्ये काम. आई-वडील दिवसभर काबाडकष्ट करत असताना घरची आर्थिक स्थितीही बेताची. क्लासची फी हप्ताहप्त्याने भरली. पण आई-वडिलांचे स्वप्न लेकीने साकार केले. दहावीच्या परीक्षेत ८५ टक्के यश मिळवत देविका मोहन परदेशी हिने मिळवलेल्या बावनकशी यशाबद्दल तिच्यावर अभिनंदनाचा वर्षाव होत आहे. लक्ष्मीपुरी कोंडाओळ येथे परेदशी कुटुंबाचे वास्तव्य आहे. राहते घर मालकीचे असले तरी घरची आर्थिक स्थितीशी मुकाबला करताना वडील मोहन आणि आई तेजश्री दोघेही नोकरी करतात. आई तेजश्री या एका सोनेचांदीच्या दागिन्यांच्या शोरुममध्ये सकाळी दहा ते रात्री नऊ वाजेपर्यंत नोकरी करतात तर वडील हॉटेलमध्ये शेफ म्हणून काम करतात. दोघेही बाहेर असल्याने देविकाने घरकाम सांभाळून अभ्यास केला. छोट्या भावाच्या अभ्यासाकडेही लक्ष दिले. मुलगी हुशार असल्याने तिला चांगल्या क्लासला प्रवेश द्या असा सल्ला अनेकांनी परदेशी कुटुंबाला दिला. पण फी भरायला पैसे नसल्याने परदेशी कुटुंबाला चिंता सतावत होती. शनिवार पेठेतील क्लासच्या एन. एम. निळपणकर यांनी देविकाची गुणवत्ता पाहून तिला फीमध्ये सवलत देत हप्ताने फी भरण्याची मुभा दिली. सकाळी पाच वाजता उठून देविका सहा वाजता सकाळी क्लासला जायची. क्लासहून आठ वाजता घरी आल्यावर आईला मदत करत अभ्यास करायची. एमएलजी हायस्कूलमध्ये वर्गशिक्षिका स्नेहल टोणपे यांच्यासह शिक्षकांचे मार्गदर्शन मिळाले. शाळेतून घरी आल्यावर भावासह देविका अभ्यासाला बसायची. आई नोकरीहून घरी आल्यावर जेवण करुन पुन्हा अभ्यासाला बसायची. आई-वडिलांचे कष्ट पाहून देविकानेही क्लास आणि शाळेतील अभ्यास सोडून चार ते पाच तास अभ्यासाचे नियोजन केले. विज्ञान, गणितासह संस्कृत विषय स्कोअरिंग असल्याने त्यावर लक्ष दिले. देविकाने संस्कृत विषयात ९६, मराठीत ८६, सामाजिक शास्त्रमध्ये ९० तर इंग्रजी विषयात ७० गुण मिळाले. दहावीनंतर बारावी सायन्सचे देविका शिक्षण घेणार असून एअर होस्टेस म्हणून तिला करिअर करायचे आहे.

म. टा. प्रतिनिधी, कोल्हापूर

ऑनलाइन निकाल उपलब्ध होण्यापर्यंत दुपारी एक वाजेपर्यंतची हुरहूर, निकालपत्र मिळाल्यानंतर पास झालेल्या विद्यार्थ्यांचा आनंदोत्सव तर नापास किंवा अपेक्षाभंग झालेल्या विद्यार्थ्यांच्या चेहऱ्यावरील नाराजीच्या छटा अशा संमिश्र वातावरणात दहावीच्या निकालाचा दिवस ढळला. यशस्वी झालेल्या विद्यार्थ्यांनी कुटुंबीय, मित्रपरिवार व नातेवाईकांसोबत जल्लोष करत आनंद साजरा केला. शहरात दिवसभर अनेक ठिकाणी फटाक्याची आतषबाजी करत आनंदोत्सव सुरू होता. यशस्वी विद्यार्थ्यांवर दिवसभर फोन, मेसेज व प्रत्यक्ष भेटीतून अभिनंदनाचा वर्षाव झाला तर अपयशी विद्यार्थ्यांना धीराचा आधार दिला.

दहावीचा निकाल शनिवारी दुपारी जाहीर होणार असल्याचे एसएससी बोर्डाने शुक्रवारी जाहीर केल्यापासूनच दहावीची परीक्षा दिलेले विद्यार्थी व पालकांमध्ये निकालाबाबत उत्सुकता होती. सकाळपासून शहरात दहावीच्या निकालाची चर्चा सुरू होती. दुपारी एक वाजता निकाल ऑनलाइन उपलब्ध झाल्यानंतर मोबाइल फोनद्वारे मेसेजवर निकाल पाहण्यात आला. मात्र निकालाची प्रिंट काढण्यासाठी सायबर कॅफेवर विद्यार्थ्यांनी गर्दी केली. त्यामुळे शहरातील विविध परिसरातील कॅफे, कॉम्प्युटर सेंटर विद्यार्थ्यांच्या गर्दीने गजबजून गेले. निकाल घेतल्यानंतर अनेक विद्यार्थ्यांनी शाळेत एकत्र येत आनंद साजरा केला. शिक्षकांना भेटण्यासाठीही विद्यार्थ्यांनी शाळा गाठली. निकालादिवशी दुसरा शनिवार असल्यामुळे ज्या विद्यार्थ्यांचे पालक नोकरीमध्ये आहेत त्यांना सुटी होती. निकालानंतर घराघरात कौटुंबिक वातावरणात हा आनंद साजरा करण्यात सेकंड सॅटर्डे मूडने आणखी रंगत आणली. नातेवाईक, मित्रपरिवार, शेजारी यांच्याकडून यशस्वी विद्यार्थ्यांचे दिवसभर अभिनंदन होत होते.

नापासांना धीराचे बोल

जे विद्यार्थी नापास झाले किंवा ज्यांना अपेक्षेपेक्षा कमी गुण मिळाले अशा विद्यार्थ्यांची नाराजी दूर करण्यासाठी अनेक नातेवाईक, कुटुंबीयांनी धीराची भूमिका बजावली. अपयशी विद्यार्थ्यांना मानसिक धीर देणारे वातावरणही अनेक घरी दिसून आले. काही शिक्षकांनी नापास विद्यार्थ्यांच्या घरी जाऊन त्यांना पुन्हा प्रयत्न करण्याचा सल्ला देत आधार दिला.

पर्यटनासोबत यशाचा आनंद

अहमदनगर येथून कोल्हापूरच्या पर्यटनासाठी आलेल्या श्रेणिक सोनटक्के याने कोल्हापुरातील एका सेंटरवर दहावीच्या निकालाची प्रत घेतली. त्याला ९३ टक्के मार्क मिळाल्याचे समजताच त्याच्या कुटुंबीयांनी पर्यटनासोबत मुलाच्या यशाचा आनंद साजरा केला. शुक्रवारी श्रेणिकने अंबाबाईचे दर्शन घेतले होते तर शनिवारी तो कुटुंबासोबत पन्हाळा येथे जात असताना निकालाची प्रत घेतली. निकाल पाहून आनंदित झालेल्या श्रेणिकने कुटुंबीयांसोबत पुन्हा अंबाबाईचे दर्शन घेतले व त्यानंतर तो पन्हाळ्याला गेला.

म. टा. प्रतिनिधी, कोल्हापूर

जुना बुधवार पेठेत दोन छोट्या खोल्या. वडिलांची सरकारी नोकरी असली तरी कर्जाच्या विळख्यामुळे आर्थिक परिस्थिती आवासून उभी रहायची. आई विनाअनुदान तत्त्वावरील शाळेत शिक्षिका. पण, श्रीतेज चंद्रकांत सूर्यवंशीची जिद्द मोठी. अनेकांनी ट्यूशन लावण्याचा सल्ला डावलून त्याने शाळेतील शिक्षकांच्या मार्गदर्शनानुसार वर्षभर अभ्यासाचे नियोजन केले. दहावीच्या परीक्षेत ९६ टक्के गुण मिळवत संघर्षमय यशावर मोहोर चढवली. सर्व विषयात नव्वदी पार करणाऱ्या श्रीतेजला कम्प्युटर सायन्समध्ये करिअर करायचे आहे.

श्रीतेजचे वडील एनसीसी कार्यालयात नोकरी करतात. पण घर खरेदी करण्यासाठी काढलेल्या कर्जाच्या विळख्यात सापडले. आई आशा तोरस्कर चौकातील दीपक साळुंखे विद्यामंदिरात विनाअनुदान तत्त्वावरील शाळेत नोकरी करतात. रोस्टर प्रॉब्लेममुळे कायम नोकरी न मिळाल्याचे दु:ख न

मानता संघर्ष करत मुलांना शिकवण्याचा ध्यास त्यांनी घेतला आहे. सूर्यवंशी यांना दोन मुले. श्रीतेजने घरची परिस्थिती बेताची असूनही लख्ख यश मिळवले.

दीपकने स्वामी विवेकानंद शिक्षण संस्थेच्या राजर्षी शाहू हायस्कूलमध्ये प्रथम क्रमांक पटकावत ९६ टक्के गुण मिळवले. संस्कृत विषयात शंभर गुण मिळाले. पण बाकीच्या सर्व विषयात नव्वदच्या पुढे गुण मिळवले. मराठीत ९१, इंग्रजीत ९३, गणितात ९४, सायन्समध्ये ९४, सोशल सायन्समध्ये ९६ गुण मिळवले. दहावीमध्ये आई-वडिलांनी श्रीतेजला ट्यूशन लावण्याबाबत विचारणा केली. पण स्वत:वर विश्वास असल्याने त्याने ट्यूशन न लावता अभ्यास केला. गेल्यावर्षी शाळा झाल्यावर वर्षभरातील अभ्यासाचे वेळापत्रक घरच्या भिंतीवर लावले. शाळेत शिकताना एकादा विषय समजला नाही तर शिक्षकांच्या घरी जाऊन शंका समाधान करुन घेत असे. अभ्यासाची सातत्याने उजळणी करुन घेतली. नवीन अभ्यासक्रम असल्याने कोणते प्रश्न विचारले जाऊ शकतात याचाही अंदाज घेतला. घरी छोटी लहान खोली असल्याने शाळेत व मित्रांच्या घरी अभ्यास केला. त्याची गुणवत्ता लक्षात घेऊन शाळेनेही मदत केली. शिक्षकांनी पुस्तके, वह्या विकत घेऊन दिल्या. प्रश्नपत्रिका सोडवण्यासाठी उत्तर पत्रिकेचे संच एस. एस. कवठेकर यांनी खरेदी करुन दिल्या. परीक्षा सुरू होण्यापूर्वी शेवटच्या महिन्यात प्रश्नपत्रिका सोडवण्यावर भर दिला. एकही गुण जाता कामा नये याचे तंतोतंत नियोजन करण्याचा प्रयत्न केला. सेल्फ स्टडीमुळे श्रीतेजला दणदणीत यश मिळाले.

श्रीतेज विज्ञात शाखेत प्रवेश घेणार असून जेईईवर लक्ष केंद्रीत करणार आहे. त्याला आयआयटीमध्ये प्रवेश घेऊन कम्प्युटर सायन्समध्ये इंजिनीअरींगची पदवी घ्यायची आहे. दहावीच्या यशावर समाधान न मानता बारावीत यश मिळावायचे यासाठी त्यांनी अभ्यासाचे नियोजनही सुरू केले आहे.

दहावीचा निकाल ८६.५८ टक्के

गेल्यावर्षीपेक्षा ७ टक्क्यांनी घट

यंदाही मुलींच्या उत्तीर्णतेचे प्रमाण मुलांपेक्षा ८ टक्क्यांनी अधिक

सोमवारपासून गुणपडताळणी सुरू

.. .. . .. .. .. .. . ..

म. टा. प्रतिनिधी, कोल्हापूर

महाराष्ट्र राज्य माध्यमिक व उच्च माध्यमिक शिक्षण मंडळातर्फे मार्च २०१९ मध्ये घेण्यात आलेल्या दहावीच्या परीक्षेचा निकाल शनिवारी जाहीर झाला. कोल्हापूर विभागाचा निकाल ८६.५८ टक्के लागला. राज्यात कोल्हापूर विभागाने द्वितीय स्थान पटकावले. गतवर्षीपेक्षा यंदा कोल्हापूर विभागाच्या निकालात ७.३० टक्क्यांनी घट झाली असून, गेल्यावर्षी निकालाची टक्केवारी ९३.८८ इतकी होती. दरम्यान यंदाही कोल्हापूर विभागात मुलींनीच बाजी मारली. विभागात कोल्हापूरसह सांगली व सातारा या जिल्ह्यांचा समावेश आहे.

राज्यात कोकण विभागाचा सर्वाधिक ८८.३८ टक्के, तर सर्वांत कमी नागपूर विभागाचा ६७.२७ टक्के निकाल लागल्याची माहिती कोल्हापूर विभागीय मंडळाचे सचिव एस. एम. आवारी यांनी पत्रकार परिषदेत दिली.

दहावीच्या बदललेल्या अभ्यासक्रमानुसार हा पहिला निकाल आहे. जिल्ह्यातून ४९ हजार ६९, सांगली जिल्ह्यातून ३४ हजार १४६ तर सातारा जिल्ह्यातून उत्तीर्ण झालेल्या विद्यार्थ्यांची संख्या ३६ हजार ७६१ आहे. यंदाच्या परीक्षेत उत्तीर्ण झालेल्या मुलांची टक्केवारी टक्के ८२.६७ तर मुलींचे उत्तीर्णतेचे प्रमाण ९१.२५ टक्के आहे. यावर्षी मुलांपेक्षा मुली ८.५८ टक्के अधिक उत्तीर्ण झाल्या आहेत.

सोमवारपासून विद्यार्थ्यांना गुणपडताळणी आणि उत्तरपत्रिकेच्या छायाप्रतीसाठी अर्ज करता येईल. अर्जाचा नमुना www.maharesult.nic.in या संकेतस्थळावर आहे. गुणपडताळणीसाठी व छायांकित प्रतीसाठी १९ जूनपर्यंत अर्ज करता येईल. उत्तरपत्रिकेच्या पुनर्मूल्यांकनाच्या अर्जासोबत उत्तरपत्रिकेची छायांकित प्रत घेणे बंधनकारक आहे. ही प्रत मिळाल्यानंतर पाच दिवसांत विद्यार्थ्यांनी पुनर्मूल्यांकनासाठी अर्ज करावा, असे आवारी यांनी सांगितले.

०० ०० ०० ००

सोमवारपासून गुणपडताळणी

गुणपडताळणीसाठी १० ते १९ जूनपर्यंत तर छायाप्रतीसाठी १० ते २९ जूनपर्यंत अर्ज करता येईल. उत्तीर्ण झालेल्या विद्यार्थ्यांना त्यांची श्रेणी सुधारण्यासाठी गुण सुधार योजनेंतर्गत पुढील दोनच परीक्षांमध्ये पुन्हा परीक्षेस बसता येईल. उत्तरपत्रिकेचे पुनर्मूल्यांकन करण्यासाठी प्रथम उत्तरपत्रिकेची छायाप्रत घेणे आवश्यक आहे. ज्या विद्यार्थ्यांना उत्तरपत्रिकेचे पुनर्मूल्यांकन करायचे असेल त्यांनी शाळा किंवा विभागीय मंडळाकडे संपर्क साधावा. अनुत्तीर्ण विद्यार्थ्यांचे शैक्षणिक वर्ष वाया जाऊ नये यासाठी पुरवणी परीक्षा जुलै-ऑगस्ट मध्ये घेण्यात येणार आहे.

०० ०० ०० ००

अकरावी प्रवेश प्रक्रिया शुक्रवारपासून

शहरातील मान्यताप्राप्त ३३ कनिष्ठ महाविद्यालयांमध्ये स्थानिक पातळीवर अकरावीसाठी केंद्रीय ऑनलाइन प्रवेशप्रक्रियेला १४ जूनपासून सुरूवात होणार आहे. कला, वाणिज्य व विज्ञान या तीन शाखांसाठी १४ हजार १४० जागा उपलब्ध आहेत. ऑनलाइन अर्ज भरणे व प्रवेश निश्चिती करणे या दोन टप्प्यात होणाऱ्या प्रक्रियेअंतर्गत विद्यार्थी व पालकांच्या सुविधेसाठी अर्ज संकलन केंद्रांसह तक्रार निवारण केंद्र कार्यान्वित करण्यात आली आहेत.

.. . . . .

सहा महिन्यांपूर्वी पत्नी आंबुताई हिने अशाच प्रकारे चहात विष घालून आत्महत्या करण्याचा प्रयत्न केला होता, परंतु तो फसल्याने पुन्हा शनिवारी मध्यरात्री अन्नात विष कालवून पत्नीने पतीसह आपली जीवनयात्रा संपविली. अजनाळे येथील संदिपान मारुती खांडेकर पत्नी आंबुताईसह येथील खांडेकर येड्रावकर वस्ती येथे राहतात. त्यांना एक मुलगा व एक मुलगी असून, दोघेही विवाहित आहेत. घरची शेतजमीन नसल्याने मुलगा मुंबई येथे पिठाची गिरणी चालवून कुटुंबाचा उदरनिर्वाह चालवितो. दरम्यान आंबुताई हिने रात्री नऊच्या सुमारास जेवण बनविताना भाजीत विषारी औषध कालवून पती संदिपान खांडेकर यांच्यासह स्वतः जेवण केले मध्यरात्रीच्या सुमारास दोघांनाही उलट्यांचा त्रास सुरू झाला म्हणून सुट्टीनिमित्त आजी-आजोबांकडे आलेली नात गुड्डी विष्णू माने हिने शेजारील चुलत मामा सुदाम विठ्ठल खांडेकर यांना हा प्रकार सांगितला. सुदाम खांडेकर यांनी तत्काळ खासगी वाहनातून पती-पत्नींना उपचाराकरिता सांगोला येथील ग्रामीण रुग्णालयात घेऊन आले असता उपचारापूर्वीच आंबुताई हिचा मृत्यू झाला तर पती संदिपान खांडेकर यांची प्रकृती गंभीर असल्याने डॉक्टरांनी त्यांना सोलापूरला घेऊन जाण्यास सांगितले, मात्र उपचारापूर्वीच संदिपान खांडेकर यांचाही दुर्दैवी मृत्यू झाला. पत्नी आंबुताई हिचे ग्रामीण रुग्णालयात शवविच्छेदन केले असून, संदिपान यांचे सोलापूर येथील सरकारी रुग्णालयात शवविच्छेदन करून दोघांचेही मृतदेह अजनाळे गावी नेण्यात आले. रात्री उशिरा शोकाकूल वातावरणात दोघांवर अंत्यसंस्कार करण्यात आले. या बाबत प्रभारी वैद्यकीय अधीक्षक डॉ. पूजा साळे यांनी पोलिसात खबर दिली आहे. म्हणून नातीचे वाचले प्राण अंबुताईने आमटीत विषारी औषध कालविल्याने जेवणापूर्वी नात गुड्डीला दमदाटी व मारहाण करून जेवण करण्यापासून रोखले होते, म्हणून रागाने आजीवर रुसून गुड्डी उपाशीपोटीच झोपली होती. विषारी औषध असलेली आमटी खाण्यापासून रोखल्याने नात गुड्डी हिचे प्राण वाचले.

राहुल मगदूम, कसबा बावडा

जिल्हा पोलिस अधीक्षक कार्यालयत ते भगवा चौक या मार्गावर विविध सरकारी कार्यालये आहेत. या कार्यालयांत येणाऱ्या नागरिकांनी रस्त्यावर लावलेल्या गाड्यांमुळे तसेच या रस्त्यावरून जाणाऱ्या लहान-मोठ्या वाहनांचा पादचाऱ्यांना त्रास होत आहे. एस. पी. ऑफिस आणि चार नंबर गेटसमोर काही ठराविक वेळी आणि मोठ्या वाहनांमुळे कोंडी होऊ लागली आहे.

जिल्हा पोलिस अधीक्षक कार्यालयातून जिल्ह्याचा पोलिस यंत्रणेचा कारभार चालतो. त्यालगत जिल्हाधिकाऱ्यांचे निवासस्थान आहे. तेथेच राज्य राखीव पोलिस दलाचे कार्यालय आहे. शेजारी मध्यवर्ती प्रशासकीय इमारत असून येथे पंचवीसहून अधिक सरकारी कार्यालये आहेत. तेथेच विक्रीकर भवन आहे. या कार्यालयातून जिल्ह्याचा जीएसटीचा कारभार चालतो. पुढे जिल्हा न्यायालयाची मोठी इमारत असून येथे पन्नासहून अधिक न्यायालये आहेत. न्यायालयाची इमारत संपताच कसबा बावड्याचा रहिवासी परिसर सुरू होतो. भगव्या चौकात डाव्या बाजूस राजर्षी शाहू जन्मस्थान तसेच जुन्या एसआरपी खात्याची इमारत आणि त्यासमोर कृषी खात्याचे कार्यालय आहे.

या परिसरातच दररोज हजारो नागरिक कार्यालयीन कामकाजासाठी येतात. येथील कर्मचारी व नागरिकांची चारचाकी वाहने व दुचाकी हजारो वाहने या परिसरात ये-जा करीत असतात. राष्ट्रीय महामार्गावरून शियेपासून थेट भवानी मंडप तसेच शहरातील आजुबाजूच्या भागात जाण्यासाठी हा मुख्य रस्ता आहे. केएमटी बस व टोप, शिरोली भागातून येणारे डंपर या रस्त्यावरून जातात. हा भाग कार्यालयीन वेळेत कायम मोठ्या वर्दळीचा आहे.

रिक्षास्टॉपमुळे कोंडी

चार नंबर गेट चौकातील महापालिकेच्या महागावकर विद्यामंदिरसमोरील रिक्षा स्टॉप अनधिकृत आहे. येथे थांबलेल्या रिक्षांमुळे मध्यवर्ती प्रशासकीय कार्यालयातून बाहेर पडणाऱ्या वाहनधारकांना वळून शहरात जाण्यास अडचणी निर्माण होतात. या भागात दोन्ही बाजूस दोन बस स्टॉप व रिक्षा स्टॉप आहेत. या रस्त्यावर होणारी कोंडी त्रासदायक ठरत आहे. न्यायाधीशांच्या निवासस्थानासमोर दररोज सकाळी वाहतूक पोलिसही काही काळ नियोजनासाठी उपस्थित असतात. मात्र, हा अर्ध्या तासांचा काळ वगळला तर इतर गर्दीच्या वेळी वाहनधारकांना अडचणींना समोरे जावे लागते.

हे व्हायला हवे

- वाहतूक कोंडी फोडण्यासाठी जिल्हा पोलिसप्रमुख कार्यालयाच्या दारातील बसस्टॉप हा मध्यवर्ती कार्यालयाच्या इमारतीसमोर नेणे. जिल्हा पोलिस प्रमुखांच्या कार्यालयाची प्रवेशद्वाराची रचना बदलणे, आत येणारी वाहने उत्तर प्रवेशद्वाराने आणि दक्षिण प्रवेशद्वारातून बाहेर जाणारी वाहने अशी रचना आवश्यक आहे. तरच ती थेट चौकातून बाहेर उजवीकडे अथवा डावीकडे जातील अशा उपाययोजनांची गरज आहे.

- मध्यवर्ती प्रशासकीय इमारतीमधील पहिल्या प्रवेशद्वाराचा उपयोग आतमधे येण्यासाठी तसेच जीएसटी भवनच्या बाजूकडील प्रवेशद्वाराकडून बाहेर जाण्यासाठी वापर करणे तसेच जिल्हा न्यायालयात जाण्यासाठी उत्तर बाजूच्या, बावड्याकडील प्रवेशद्वारातून प्रवेश आणि दक्षिण बाजूच्या चौकातून जाणाऱ्या बाजूने बाहेर जाण्यासाठी प्रवेशद्वाराचा वापर करण्याची गरज आहे.

कोल्हापूर टाइम्स टीम

अवघ्या सातव्या वर्षी, खेळण्या-बागडण्याच्या वयात त्याला मस्क्यूलर डिसऑनर या दुर्धर आजाराने गाठले. या आजाराशी संघर्ष करत सांगलीच्या प्रथमेश आंबेकरने आपल्या कुंचल्यातून शेकडो चित्रे रंगवली. आजाराने त्याचे जगणे हिरावले मात्र, चित्रांच्या माध्यमातून तो आजही जिवंत आहे. रोटरी क्लब ऑफ कोल्हापूर सेंट्रल आणि आंबेकर कुटुंबीयीांच्यावतीने प्रथमेशच्या 'ऊर्जा निसर्गाची' या चित्रांचे प्रदर्शन राजर्षी शाहू स्मारक भवन येथे सुरू आहे. उद्योजक संग्राम पाटील, मराठा महासंघाचे जिल्हाध्यक्ष वसंतराव मुळीक यांच्या उपस्थितीत प्रदर्शनाचे उद्घाटन झाले. प्रदर्शन शनिवारपर्यंत (ता. १५) सकाळी १० ते रात्री ८ वाजेपर्यंत कला रसिकांसाठी खुले राहणार आहे.

प्रथमेशची चित्रे पाहताना 'मरावे परी कीर्तिरुपे उरावे' या ओळींची प्रकर्षाने आठवण होते. माणसाचं निसर्गाशी असलेलं उत्कट नातं चित्रांच्या माध्यमातून त्याने समर्थपणे मांडले आहे. निसर्ग माणसाच्या जगण्याला आणखीन समृद्ध करतो. माणसाच्या मनातील द्वेष विसरून अधिक प्रेम करण्याचा संदेश निसर्ग देतो. प्रथमेशची चित्रे निसर्गाच्या उत्कट भावमुद्रा स्पष्टपणे मांडतात. दोन्ही हात, पाय सक्षम नसतानादेखील केवळ दोन बोटांनी चारशेहून अधिक निसर्गचित्रे त्याने रंगवली. शरीरावर मर्यादा असतानाही निसर्गातील बारीकसारीक बारकावे त्यातील वैविध्यपूर्ण छटा, पक्ष्यांची विलोभनीय चित्रे त्याने मोठ्या उत्कटतेने कॅनव्हासवर रेखाटली आहेत. त्या चित्रांमध्ये निसर्गाच्या वेगवेगळ्या रूपाबरोबरच मावळती संध्याकाळ, ग्रामीण जीवनाचा साज आणि बाज प्रत्यक्ष अनुभवता येतो. अगदी निखळपणे वाहणारा झरा, झाडावर बसणाऱ्या पक्षांचा समूहभाव अशा कितीतरी गोष्टींचे प्रचिती प्रथमेशची चित्रे पाहताना येते. कार्यक्रमाच्या उद्घाटनप्रसंगी रोटरी क्लबचे अध्यक्ष आर. वाय. पाटील, प्रेस क्लबचे अध्यक्ष विजय पाटील, दादासाहेब पाटील, अनिकेत खाडे, मोहनराव पाटील आदी उपस्थित होते.