कोल्हापूर टाइम्स टीम

छत्रपती शिवाजी महाराजांच्या शिवराज्याभिषेक सोहळ्यास ३४६वे वर्ष सुरू होत आहे. याचे औचित्य साधून अखिल भारतीय मराठा महासंघातर्फे व्याख्यानमाला, व शोभायात्रेचे आयोजन केले आहे. एक जूनपासून या कार्यक्रमांना सुरुवात होणार असल्याची माहिती महासंघाचे जिल्हाध्यक्ष वसंतराव मुळीक यांनी बुधवारी पत्रकार परिषदेत दिली.

जिल्हाध्यक्ष मुळीक म्हणाले, 'छत्रपती शिवाजी महाराजंचा राज्याभिषेक सोहळा ही स्वराज्य निर्मितीमधील अतिशय महत्त्वाची घटना आहे. यंदा या घटनेस ३४५ वर्षे पूर्ण होत आहेत. शिवाजी महाराजांचे चरित्र आणि कार्य सर्वदूर पोहोचवण्यासाठी अखिल भारतीय मराठा महासंघामार्फत विविध कार्यक्रमांचे आयोजन केले आहे. एक जूनपासून व्याख्यानमाला सुरू होणार असून, पहिल्या दिवशी नाबार्डचे माजी अध्यक्ष यशवंतराव थोरात यांचे 'शुन्यातून स्वराज्य व साम्राज्यातून शून्य' या विषयावर व्याख्यान होणार आहे. दोन जून रोजी ज्येष्ठ विचारवंत बाबा भांड यांचे 'सयाजी महाराजांच्या नजरेतून छत्रपती शिवराय' या विषयावर व्याख्यान होणार आहे. तीन जून रोजी इतिहास संशोधक डॉ. नीरज साळुंखे यांचे 'छत्रपती शिवरायांचे साम्राज्य गुजरात ते श्रीलंका' या विषयावर व्याख्यान होईल. सर्व व्याख्याने दसरा चौकातील राजर्षी शाहू स्मारक भवन येथे रोज सायंकाळी साडेपाच वाजता सुरू होणार आहेत.'

पाच जून रोजी शहरासह जिल्ह्यातील विविध शाखांमध्ये वृक्षारोपण होणार आहे. सहा जून रोजी मंगळवार पेठ येथील मराठा महासंघाच्या कार्यालयापासून दुपारी साडेचार वाजता शोभायत्रा सुरू होणार आहे. शोभायात्रेत जिल्ह्यातील शेकडो वारकरी पारंपरिक वेशभूषेत सहभागी होणार आहेत. तुकाराम महाराज यांचा जिवंत देखावा, तसेच महिला आघाडीचे लेझिम पथक विशेष आकर्षण असेल. शिवकालीन देखाव्यांसह मर्दानी खेळांचीही प्रात्यक्षिके सादर केली जाणार आहेत. बारा बलुतेदारांसह ९० विविध समाजातील लोक या कार्यक्रमात सहभागी होणार आहेत. शिवप्रेमींनी सर्व कार्यक्रमांमध्ये सहभागी व्हावे, असे आवाहन अखिल भारतीय मराठा महासंघाने केले आहे.

पत्रकार परिषदेला महासंघाच्या जिल्हा महिला अध्यक्षा शैलजा भोसले यांच्यासह शिवप्रसाद झगडे, कादर मलबारी, अवधूत पाटील, शशिकांत पाटील आदी उपस्थित होते.

मटा इम्पॅक्ट ... लोगो

.......

म. टा. प्रतिनिधी, कोल्हापूर

महाराष्ट्र अग्निप्रतिबंधक व जीवसंरक्षक उपाययोजना अधिनियमानुसार शहरातील इमारतींना फायर ऑडिट बंधनकारक आहे. फायर ऑडिट केल्याचे प्रमाणपत्र मान्यप्राप्त संस्थेकडून सादर करण्याचे आदेश महापालिका प्रशासनाने दिले आहेत. प्रमाणपत्र सादर न केल्यास पाणी व वीजपुरवठा खंडीत करण्याबरोबर पोलिस बंदोबस्तात इमारती सील करण्यात येणार आहेत.

औद्योगिक आणि व्यावसायिक इमारतींसह १५ मीटर पेक्षा जास्त उंची असलेल्या इमारतींचे वर्षातून दोनवेळा फायर ऑडिट करुन 'ए' व 'बी' प्रमाणपत्र मान्यताप्राप्त संस्थेकडून सादर करणे बंधनकारक आहे. त्याबाबत महाराष्ट्र अग्निप्रतिबंधक व जीवसंरक्षक अपाययोजना अधिनियम २००६ च्या कलम (३) ३ नुसार अग्निप्रतिबंधक उपाययोजना करणे बंधनकारक आहे. मात्र ज्यांना अधिनियमानुसार प्रमाणपत्र बंधनकारक आहे, ते फायर ऑडिट करत नसल्याचे समोर आले आहे.

शहरातील मध्यवस्ती आणि रहदारीच्या ठिकाणी असलेल्या कॉम्प्लेक्समध्ये अग्निप्रतिबंधक उपाययोजना केलेली दिसत नाही. तर अनेकठिकाणी धोकादायकपणे उघड्यावर विद्युत मीटर, मेन स्वीच व लोंबकळणारे वायरिंग दिसत आहे. नागरिकांच्या जीविताशी हा खेळ करण्याचा प्रकार असून त्याकडे महापालिका प्रशासनाचेही दुर्लक्ष होत आहे. विशेषत: अग्निशमन विभागाचे याकडे संपूर्ण दुर्लक्ष झाले आहे. मात्र सुरत येथे झालेल्या अग्नितांडवामध्ये तब्बल वीस विद्यार्थ्यांना प्राणाला मुकावे लागले. आणि शहरातील अशा इमारतींच्या फायर ऑडिटचा प्रश्न ऐरणीवर आला.

त्यानंतर महापालिकेच्या अग्निशमन विभागाला जाग आली असून फायर ऑडिटबाबत आवश्यक असणारे 'ए' व 'बी' प्रमाणपत्र सादर करण्याचे आदेश दिले आहे. जानेवारी व जुलै असे वर्षातून दोनवेळा प्रमाणपत्र सादर करणे बंधनकारक असताना केवळ हातावर मोजण्याइतपत मिळकतदार प्रमाणपत्र सादर करतात. त्याची गंभीर दखल घेत प्रमाणपत्र सादर न केल्यास पाणी व वीजपुरवठा खंडीत करण्याचा इशारा दिला आहे. केवळ अत्यावश्यक सुविधा बंद न करता पोलिस बंदोबस्तात इमारती सील करण्यात येणार असून त्याचा खर्च संबंधित मिळकतदार व भोगवटादार यांच्याकडून वसूल करण्यात येणार आहे.

.............

चौकट

'मटा' चा पाठपुरावा

सुरत येथील कॉम्प्लेक्स मध्ये झालेल्या दुर्दैवी घटनेनंतर 'महाराष्ट्र टाइम्स'ने रविवारी व सोमवारी शहरातील कॉम्प्लेक्समध्ये अग्निप्रतिबंधक उपाययोजना आहेत का? याची पाहणी केली. बुहतांशी इमारतींचे फायर ऑडिट केले नसल्याचे 'ऑन दि स्पॉट'मध्ये वास्तव समोर आले. याबाबत महापालिका कोणती उपाययोजना करणार असाही प्रश्न उपस्थित केला होता. 'मटा'च्या वृत्ताची दखल घेत प्रशासनाने फायर ऑडिट संदर्भात 'बी' प्रमाणपत्र सादर करण्याचे आदेश शुक्रवारी दिले.

.........................

चौकट

फायर ऑडिट बंधनकारक असणारे घटक

सरकारी कार्यालये, हॉटेल्स, लॉज, रेस्टॉरंट, हॉस्पिटल्स, बहुमजली शैक्षणिक संस्था, व्यावसायिक व औद्योगिक इमारती, नाट्य व चित्रपटगृहे, १५ मीटर पेक्षा जास्त उंचीच्या रहिवाशी इमारती.

फोटो आहेत.

Maruti.Patil

@timesgroup.com

tweet: @MarutipatilMT

कोल्हापूर

आपला पाल्य सर्वच पातळीवर सर्वोच्च स्थानी असावा, अशी पालकांची सर्वसाधारण अपेक्षा असते. अनेकवेळा या अपेक्षांचे ओझे त्यांना सहन होत नाही. अपेक्षा बाळगताना पाल्याची क्षमता लक्षात घेतली जात नाही. पालकांच्या अट्टहास आणि अपेक्षांच्या ओझ्याखाली दबून मुलांची घुसमट होते आणि काहीवेळा त्यांच्या जीवावरही बेतते. असाच प्रसंग देवकर पाणंद येथील सूर्यवंशी कुटुंबावर ओढवला आणि फार मोठी किमंत मोजावी लागली. असा दुर्दैवी प्रसंग कोणावर येवून नये, यासाठी समृद्धीच्या आईने फलकाद्वारे मुलांची क्षमता ओळखून अपेक्षा बाळगण्याची आर्त साद पालकांना घातली आहे. या फलकातून आईची करुण कहाणी व्यक्त होत असली, अन्य पालकांच्या डोळ्यात अंजन घालणारी आहे.

सूर्यवंशी कुटुंबीय माधवप्रेम अपार्टमेंट, मोहिते मळा, देवकर पाणंद परिसरात राहतात. अमित सूर्यवंशी एका फायनान्स कंपनीत नोकरी करतात तर पत्नी संयोगिता गृहिणी आहे. सूर्यवंशी दाम्पत्याला दोन मुली. समृद्धी सर्वात लहान. पोहण्याची आवड असल्याने वडील व अन्य नातेवाईकांसोबत ती पोहायला जात होती. चौथीमध्ये शिक्षण घेणारी समृद्धी रंकाळा खणीमध्ये पोहोयला पटकन शिकली. त्यामुळे तिचे कौतुकही होत राहिले. पण १६ मे रोजी सकाळी तिच्यावर काळाने घाला घातला. पोहत असताना दम लागल्याने तिच्या नाकातोंडात आणि फुप्फुसात पाणी गेले व ती बेशुद्ध पडली. त्याच अवस्थेत तिला हॉस्पिटलमध्ये दाखल केले. पण उपचारादरम्यान तिचा दुर्दैवी मृत्यू झाला. समृद्धीच्या मृत्यूने सूर्यवंशी कुटुंबियावर दु:खाचा डोंगर कोसळला.पण असा दुर्दैवी प्रसंग कोणावर येऊ नये, यासाठी रंकाळा खणीवर त्यांनी प्रबोधनपर फलक लावून मोठया दु:खातही पालकांचे प्रबोधन केले आहे.

पालक आपल्या इच्छा आकांक्षा मुलांवर लादत असतात. स्वत:च्या अट्टहासासाठी त्यांच्याकडून सर्वच बाबतीत चमकदार कामगिरीची अपेक्षा ठेवतात. अशावेळी अनेकदा त्यांची क्षमता, मानसिक स्थिती याचा कोणताही विचार केला जात नाही. त्यांच्यावर सर्वच बाबतीत जबरदस्ती केली जाते. पालकांच्या अपेक्षांच्या ओझ्याखाली अनेकदा दुर्दैवी प्रसंगही घडतात. त्यामुळे संपूर्ण कुटुंबाची वाताहत होते. असा प्रसंग इतरांवर येवू नये आणि पालकांनी सामंजस्यपणा बाळगावा यासाठी समृद्धीच्या आईने खणीवर एक फलकच लावून आवाहन केले आहे. फलकात म्हटले आहे, 'आपल्या मुलांना पोहोण्यास शिकवताना त्याच्या क्षमतेचा विचार करा. मुले सांगतात त्याचा विचार करा. त्यांच्यावर जबरदस्ती करु नका, त्यांना पुरेसा वेळ द्या- समृद्धीची दुर्दैवी आई '

एका आईची ही करुण कहाणी असली, तरी रंकाळा खणीवर लावलेला हा फलक बरेच काही सांगून जातो. समृद्धीच्या आईने लावलेल्या या फलकातून इतर पालकांनी बोध घ्यावा एवढीच अपेक्षा व्यक्त होत आहे.

.......

नेत्रदानातून समृद्धीच्या आठवणी कायम

शालेय वक्तृत्व स्पर्धेत समृद्धी नेहमीच प्रथम क्रमांक मिळवायची. इतर स्पर्धेतही तिची कामगिरी नेहमीच उजवी राहिली. त्यामुळे शाळेत सर्वांचीच ती आवडती विद्यार्थींनी होती. सर्वांना हवीहवीशी वाटणाऱ्या समृद्धीची आठवण कायम राहावी, यासाठी तिच्या पालकांनी मरणोत्तर नेत्रदान केले. समृद्धी अकाली निघून गेली तरी, तिचे डोळे नेहमीच आठवण करुन देतील, अशी भावना त्यांनी व्यक्त केली.

.................

कोट

'अनेक पालक मुलांची क्षमता ओळखत नाहीत. स्वत:च्या अट्टहासासाठी त्यांच्यावर अपेक्षांचे ओझे लादतात. परिणामी मुलांची प्रचंड घुसमट होते. मुलांना त्यांच्या कलाने आणि त्यांच्या ‌आवडीनुसार भरारी घेण्याची संधी द्या.

संयोगिता सूर्यवंशी, समृद्धीची आई

म. टा. प्रतिनिधी, कोल्हापूर

दुर्मिळ वनसंपदा, प्राचीन वस्तूंचा समावेश असलेले कोल्हापूर वास्तुसंग्राहालय असलेल्या टाऊन हॉल उद्यानाच्या सुरक्षितेचे तीन तेरा वाजले आहे. सार्वजनिक बांधकाम विभाग, वन व उपवने विभाग आणि पुरातत्व विभागातील समन्वयाच्या अभावामुळे इथली सुरक्षा वाऱ्यावर सोडल्याचे चित्र पहायला मिळत आहे.

टाऊन हॉल उद्यान येथे पुरातत्व विभागाच्या कोल्हापूर वस्तू संग्रहालयात ब्रह्मपुरी येथील उत्खतनात सापडलेल्या वस्तू, दुर्मिळ भांडी, शस्त्रे, दगडी व संगमरवरी मूर्ती, ज्येष्ठ चित्रकारांची चित्रे मांडण्यात आली आहेत. उद्यानाच्या पूर्व बाजूला असलेला महाकाय रेन ट्री मोठ्या प्रमाणात विस्तारला होता. या वृक्षाच्या फांद्या मार्च आणि एप्रिल महिन्यात छाटण्यात आल्या. फांद्या छाटण्यासाठी सरंक्षक भिंतीवर लोखंडी ग्रील काढण्यात आले होते. पण गेले दोन महिने सार्वजनिक बांधकाम विभागाच्या वन विभागाने ग्रील न लावल्याने उद्यान आणि वस्तू संग्राहालयाची सुरक्षितता धोक्यात आली आहे. दिवसा व रात्री भुरटे चोर, हुल्लडबाज थेट उद्यानात प्रवेश करत आहेत. उद्यानाच्या सुरक्षिततेसाठी सुरक्षारक्षक असले तरी त्यामध्ये गांभीर्य असल्याचे दिसत नाही. प्रशासनाने लोखंडी ग्रील सरंक्षक भिंतीला बसवून उद्यानाची सुरक्षितता बळकट करावी, अशी मागणी पुढे येत आहे.

संग्रहालयाच्या सुरक्षिततेसाठी इमारतीच्या चारही दिशेला सीसीटीव्ही लावण्यात आले आहेत. पण इमारतीच्या समोर असलेल्या कारंज्याजवळ स्वच्छता करण्यासाठी वस्तू संग्रहालयातील कर्मचारी दुर्लक्ष करत आहेत. टाऊन हॉलच्या प्रवेशाद्वारापासून इमारतीभोवती काळ्या पाषाणापासून रस्ता तयार केला आहे. पाणी वाहून जाण्यासाठी गटरवर लोखंडी जाळ्या टाकण्यात आल्या आहेत. उत्तर बाजूची एक जाळी निखळली असून ती चोरीला जाण्याची शक्यता व्यक्त केली जात आहे. तसेच दगडीवर कठड्यावरील पडलेली वटवाघळांची विष्ठा स्वच्छ केली जात नसल्याने सुभोभिकरणासाठी खर्च केलेला पैसा वाया जाण्याची भिती व्यक्त केली जात आहे.

..........

विरंगुळा केंद्रात मद्याच्या बाटल्या

उद्यानात आमदार राजेश क्षीरसागर यांच्या निधीतून ज्येष्ठ नागरिकांसाठी साकारलेल्या हिंदू हृदयसम्राट बाळासाहेब ठाकरे विरंगुळा केंद्राकडे दुर्लक्ष झाले आहे. सरंक्षक भिंतीचे ग्रील काढलेले असल्याने मद्यपान करणारी मंडळी थेट बागेत येतात. विरंगुळा केंद्रात दारुच्या बाटल्या, पाण्याच्या बाटल्या पडलेल्या दिसतात. केंद्रांची देखभाल करण्याचे आदेशच नसल्याने बाटल्या पडलेल्या पहायला मिळतात. केंद्राच्या छतावर पानाचा खच पडला असून स्वच्छता आणि सुरक्षिततेच्या अभावी विरुंगळा केंद्राचे पावित्र्य नष्ट होत आहे.

......

कोट

'बागेत ओपन जीम बसवली जात आहे. नवीन खेळणीही बसवली जाणार आहेत. पण उद्यानाची सुरक्षितता आणि स्वच्छतेकडे दुर्लक्ष होत आहे. सार्वजनिक बांधकाम विभाग आणि पुरातत्व विभागाने समन्वयाने लक्ष देऊन बागेचे वैभव जपावे.

सुकुमार काकडे, शनिवार पेठ

'मठाधिपतींच्या एकाधिकारशाहीमुळे वाद'

कराड :

सुमारे दीडशे वर्षांची परंपरा असलेल्या येथील श्री मारुतीबुवा कराडकर मठातील मठाधिपती व विश्वस्त यांच्यातील वाद काही मिटता मिटत नसल्याचे नाव घेत नाही. मंदिराच्या मठाधिपतींच्या एकाधिकारशाहीमुळेच हा वाद ओढावल्याचा आरोप या मंदिराच्या विश्वस्त मंडळाच्या वतीने करण्यात आला आहे. या बाबत मठाचे विश्वस्त मोहनराव चव्हाण व अ‍ॅड. मधुकर पिसाळ यांनी शनिवारी एक पत्रक प्रसिद्धीस दिले आहे.

म. टा. प्रतिनिधी, कोल्हापूर

राजर्षी छत्रपती शाहू महाराज यांच्या समाधी स्मारकाच्या संरक्षक भिंतीबाबत निर्माण झालेल्या वाद शनिवारी पुन्हा उफाळून आला. बांधकामाला विरोध कायम ठेवल्यामुळे पोलिस बंदोबस्तात काम सुरू करण्याच्या तयारीत असलेल्या महापालिका प्रशासनाला सिद्धार्थनगरातील नागरिकांनी पुन्हा रोखले. मात्र शाहूप्रेमी आणि मनपा पदाधिकाऱ्यांनी ठिय्या मारत संरक्षक भिंतीचे काम पूर्ण केले. यावेळी घोषणा-प्रतिघोषणांनी वातावरण तणावपूर्ण बनले.

यावेळी कोणताही अनुचित प्रकार घडू नये, यासाठी पोलिसांनी नंतर जादा कुमक मागवली. तब्बल साडेतीन तासांनतर कामाला सुरुवात झाली.

नर्सरी बागेतील राजर्षी शाहू महाराज समाधीस्थळाच्या सिद्धार्थनगरकडील बाजूस प्रवेशद्वार ठेवावे, अशी मागणी तेथील नागरिकांनी केली. यासाठी काम बंद पाडल्याने संघर्षाची चिन्हे निर्माण झाली होती. शुक्रवारी जिल्हाधिकारी कार्यालयात झालेल्या बैठकीत याबाबतचा तोडगा निघाला आणि जिल्हाधिकाऱ्यांनी काम सुरू करण्याचे आदेश दिले. त्यानुसार सकाळी महापौर सरिता मोरे, उपमहापौर भूपाल शेटे, श्रीधर पाटणकर, नेत्रदीप सरनोबत यांच्यासह कर्मचारी समाधीस्थळी पोहोचले. कामाला सुरुवात होण्यापूर्वीच त्यांच्यात आणि शहाजी कांबळे, संजय माळी, वसंत लिंगनूरकर यांच्यात पुन्हा वाद झाला. यावेळी सामाजिक कार्यकर्ते दिलीप देसाई यांनी मध्यस्थीचा प्रयत्न केला परंतु नागरिक आक्रमक झाले. काम पुन्हा बंद पाडल्याची माहिती समजताच शाहूप्रेमी स्मारकस्थळी येऊ लागले. त्यामुळे अर्धवट भिंतीच्या दोन्ही बाजूला मोठा जमाव जमा झाला.

सिद्धार्थनगरातील नागरिकांची समजूत काढण्यासाठी करवीरचे पोलिस उपअधीक्षक डॉ. प्रशांत अमृतकर यांनी समाजमंदिरात घेतलेली बैठक निष्फळ ठरल्याने काम सुरू करण्यासाठी पदाधिकारी व शाहूप्रेमी सरसावले. परिस्थीती स्फोटक बनत असल्याने शीघ्र कृती दलाची तुकडी घटनास्थळी दाखल झाली. त्याचवेळी आमदार राजेश क्षीरसागर, माजी उपमहापौर दिगबंर फराकटे, नागेश घोरपडे यांच्यासह नागरिक दाखल झाले. आमदार आणि अमृतकर यांच्याशी चर्चा सुरू असताना सिद्धार्थनगरातील जमाव त्याच्या दिशेने जावू लागला. यावेळी प्रचंड गोंधळ निर्माण होऊन तणाव अधिकच वाढला.

या गोंधळातच महापौर मोरे, आमदार क्षीरसागर, माजी महापौर हसीना फरास यांच्या हस्ते शाहू महाराजांचा जयजयकार करत बांधकामाला सुरुवात झाली. सिद्धार्थनगरातील महिला व युवकांनी प्रशासनाचा निषेधाच्या घोषणा देण्यास सुरुवात केली. घोषणा आणि प्रतिघोषणांनी वातावरण तणावपूर्ण बनले.

यावेळी सभागृह नेते दिलीप पोवार, विरोधी पक्षनेते विलास वास्कर, परिवहन सभापती अभिजित चव्हाण, माजी नगरसेवक अदिल फरास, संभाजीराव जगदाळे, वसंतराव मुळीक, इंद्रजीत सावंत, अशोक पोवार यांच्यासह महापालिकेचे अधिकारी उपस्थित होते.

पदाधिकाऱ्यांच्या स्मारकस्थळी ठिय्या

पोलिस बंदोबस्तात संरक्षक भिंतीच्या कामाला सुरुवात झाल्यानंतर सर्वच पदाधिकाऱ्यांनी समाधीस्थळी ठिय्या मारला. कोणत्याही परिस्थितीत काम संपवल्यानंतर येथून जाण्याचा निर्णय सर्वांनी घेतला. सकाळी दहा वाजता आलेले पदाधिकारी दुपारी तीनपर्यंत थांबून होते. सायंकाळी सहा वाजता पुन्हा स्मारकाच्या कामाची पाहणी केली.

झारीतील शुक्राचार्य

रखडलेल्या शाहू समाधीस्थळाचा प्रश्न मार्गी लागल्यानंतर संरक्षक भिंतीचा प्रश्न ऐरणीवर आला. वास्तविक ही भिंत विनासायास पूर्ण व्हायला हवी होती. मात्र तसे झाले नाही. या कामावरून झालेला गोंधळ दुर्दैवी आहे. सिद्धार्थनगरातील नागरिक आक्रमक होण्यामागे झारीतील शुक्राचार्याने भूमिका बजावल्याची चर्चा शहरात आहे

संरक्षण आणि पावित्र्य महत्त्वाचे

अंबाबाई मंदिराच्या सुरक्षेच्या कारणावरुन मंदिरात चप्पल बंदी करण्यात आली. त्याचे भाविकांनी स्वागतच केले. त्याचबरोबर भवानी मंडप येथील केएमटी बसस्थानक अन्यत्र हलवले. कोणत्याही ऐतिहासिक स्थानांची सुरक्षा महत्त्वाची असते. त्यासाठी संरक्षक भिंत व अन्य उपाययोजना करण्याची आवश्यकता उपस्थितांनी व्यक्त केली.

पर्यायी प्रवेशद्वाराच्या कामाला त्वरित सुरुवात

सद्य:स्थितीत असलेल्या प्रवेशद्वाराच्या अवघा दहा फुटाच्या अंतरावर सिद्धार्थनगराकडे जाणारे प्रवेशद्वार निश्चित केले आहे. जुन्या प्रवेशद्वाराच्या ठिकाणी भिंतीच्या कामाला सुरुवात झाल्यानंतर पर्यायी प्रवेशद्वाराचा कामाला त्वरित सुरुवात केली. त्यासाठी उद्यानाची असलेली भिंत जेसीबीच्या सहाय्याने काढून घेतली.

परिसरात मद्याच्या बाटल्या

शाहू समाधीस्थळ परिसरात अन्य राजघराण्यातील व्यक्तींच्या समाधी आहेत. या समाधीस्थळांच्या परिसरात प्लास्टिकचे ग्लास, मद्याच्या रिकाम्या बाटल्या पडल्या आहेत. येथे रात्रीच्यावेळी अंधार असल्याने मद्यपिंचा अड्डाच असल्याचे चित्र आहे.

आईच्या जबड्यातून गोळी आरपार

सातारा : नातेवाईकाचा काटा काढण्यासाठी पिस्तूलातून गोळी झाडण्याचा सराव करीत असताना अचानक आईमध्ये आल्याने गोळी आईच्या जबड्यातून आरपार गेल्याची खळबळजनक घटना खटाव तालुक्यातील पळसगाव येथे घडली.

या बाबत पोलिसांनी दिलेली माहिती अशी, संगीता फडतरे (रा. पळसगाव, ता. खटाव) या गुरुवारी गोळी लागून जखमी झाल्याची माहिती स्थानिक गुन्हे शाखेचे पोलिस उपनिरीक्षक प्रसन्न जऱ्हाड यांना मिळाली. त्या नुसार त्यांनी आपल्या टीमसह पळसगाव गाठले. पोलिसांनी त्यांचा मुलगा अभिषेक फडतरे याच्याकडे चौकशी केली. त्या वेळी त्याने माळ्यावर साफसफाई करीत असताना आईने बॅगेतून पिस्टल बाहेर काढले. तेव्हा चुकून गोळी सुटून आई जखमी झाली, अशी माहिती दिली.

पोलिसांनी त्याच्या आईकडे चौकशी केली. त्या वेळी तिनेही मुलगा सांगत असलेली कहाणी सांगितली. मात्र, पोलिसांना दोघांच्या बोलण्यातील तफावतीमुळे संशय अधिक बळावला. पोलिसांनी अधीक तपास केल्यानंतर धक्कादायक माहिती समोर आली.

अभिषेक उच्चशिक्षित असून, पुणे येथे महाराष्ट्र लोकसेवा आयोगाच्या परीक्षेची तयारी करीत होता. त्या वेळी त्याने पुण्यातील मित्राच्या मदतीने धुळे शिरपूर येथून ५० हजार रुपयांना पिस्तूल विकत घेतले. अभिषेकच्या कुटुंबीयांचे पूर्वीपासून जवळच्या नातेवाईकासोबत जमिनीचे आणि घरगुती कारणातून वाद आहेत. त्यामुळे संबंधित नातेवाईकाचा काटा काढण्यासाठी त्याने टोकाचे पाऊल उचलून पिस्तूल विकत घेतले होते. खुनाचा सराव तो घरातच करीत होता. गुरुवारी सायंकाळी अशाच प्रकारे सराव करीत असताना पिस्तूलातून गोळी झाडल्यानंतर अचानक आईमध्ये आली. त्याने झाडलेली गोळी आईच्या जबड्यातून आरपार गेली.

जखमी अवस्थेत आईला त्याने खासगी दवाखान्यात नेले.

फोटो...

म. टा. प्रतिनिधी, कोल्हापूर

जिल्हा परिषदेच्या कर्मचाऱ्यांच्या अंशदायी पेन्शन योजनेच्या विवरणपत्रासाठी कर्मचाऱ्यांना शनिवारी काम बंद आंदोलनाचे शस्त्र उपसावे लागले. दुपारी दोनच्या सुमारास मुख्यालयातील कर्मचारी जिल्हा परिषदेच्या मुख्य प्रवेशद्वारासमोर जमले. त्यांनी काम बंद आंदोलन करत असल्याचे जाहीर करत प्रवेशद्वारासमोरच ठिय्या मारला. प्रशासनाने तातडीने पावले उचलून मुख्य कार्यकारी अधिकारी अमन मित्तल यांच्या हस्ते प्रातिनिधिक स्वरुपात पाच कर्मचाऱ्यांना विवरणपत्रे दिली. तसेच खातेप्रमुखांना पावती वितरित करण्याबाबत पत्र दिले.

जिल्हा परिषदेकडे एक नोव्हेंबर २००५ नंतर रुजू झालेल्या कर्मचाऱ्यांना अंशदायी पेन्शन योजना लागू झाली आहे. पण या योजनेंतर्गत वेतनातून कपात केलेल्या रकमेच्या पावत्या कर्मचाऱ्यांना मिळालेल्या नाहीत. या विवरणपत्रासाठी कर्मचाऱ्यांनी प्रशासनाला ३१ मेपर्यंत अल्टिमेटम दिला होता. जिल्हा परिषद कर्मचारी महासंघाच्या नेतृत्वाखालील शिष्टमंडळाने शुक्रवारी सीईओ मित्तल यांची भेट घेऊन आंदोलनाचा इशारा दिला होता. शनिवारी दुपारपर्यंत पावत्या मिळाल्या नाहीत तर काम बंद आंदोलनचा निर्णय घेतला. दुसरीकडे प्रशासनाने, आंदोलन होऊ नये म्हणून कर्मचाऱ्यांना पावत्या वितरित करण्यासाठी प्रयत्न सुरू होते. दुपारी दोनपर्यंत पावत्या न मिळाल्याने कर्मचाऱ्यांनी आंदोलनाचा निर्णय घेतला.

जिल्हा परिषद कर्मचारी महासंघाचे अध्यक्ष सचिन जाधव, कार्याध्यक्ष स्वप्निल घस्ते, अजित मगदूम, फिरोजखान फरास, दीपक साठे, अतुल कारंडे, शैलेश पाटणकर, किरण निकम यांच्या प्रमुख उपस्थितीत कर्मचाऱ्यांनी आंदोलन केले.

००००

म. टा. प्रतिनिधी, कोल्हापूर

नर्सरी बागेतील राजर्षी शाहू समाधीस्मारक संरक्षक भिंतीचे काम शनिवारी प्रचंड पोलिस बंदोबस्तात करण्यात आले. महापालिका पदाधिकारी आणि सिद्धार्थनगरातील नागरिकांत शेवटपर्यंत एकमत न झाल्याने प्रचंड तणाव निर्माण झाला होता. या तणावातच दुपारी बांधकामाला सुरुवात झाली. यावेळी दोन्ही बाजूने प्रचंड घोषणाबाजी करण्यात आली. भिंतीचे काम सायंकाळी सातच्या सुमारास पूर्ण झाले. दरम्यान, तणावाच्या पार्श्वभूमीवर येथे पंधरा दिवस बंदोबस्त ठेवण्याची मागणी महापालिकेने पोलिस प्रशासनाकडे केली आहे.

स्मारकाजवळील नेहमीच्या वहिवाटीच्या जागेतूनच प्रवेशद्वार करावे, या मागणीसाठी सिद्धार्थनगरातील नागरिकांनी पाच मे रोजी बांधकाम पाडले होते. यावर तोडगा काढण्यासाठी महापालिका प्रशासनाबरोबर दोनदा बैठका झाल्या. नागरिकांनी प्रवेशद्वाराची मागणी लावून धरल्याने तोडगा निघाला नव्हता. शुक्रवारी जिल्हाधिकारी कार्यालयात झालेल्या बैठकीत तोडगा निघाल्याचे जाहीर करण्यात आले.

जिल्हाधिकाऱ्यांच्या आदेशानुसार शनिवारी सकाळी महापालिकेने सिद्धार्थनगरकडील संरक्षक भिंतीच्या कामाला सुरुवात करण्याचा प्रयत्न केला. पण नागरिकांनी विरोध केला. याबाबतची माहिती मिळताच महापालिकेचे सर्व पदाधिकारी स्मारकस्थळी आले. जिल्हाधिकाऱ्यांच्या आदेशानुसार बांधकाम करण्यावर पदाधिकारी ठाम राहिले. दरम्यान तणाव निर्माण झाल्याने करवीरचे उपअधीक्षक डॉ. प्रशांत अमृतकर फौजफाट्यासह दाखल झाले. नागरिकांशी चर्चा करण्यात आली. मात्र ती निष्फळ ठरली. बांधकामाला विरोध होत असल्याची माहिती मिळताच आमदार राजेश क्षीरसागर यांच्यासह मोठ्या संख्येने नागरिक दाखल झाले. आमदार क्षीरसागर अमृतकर यांच्याशी चर्चा करत असताना एका कार्यकर्त्याच्या वक्तव्याने तणावात भर पाडली. परिणामी आक्रमक झालेल्या पदाधिकाऱ्यांनी काम करण्याचा निर्धार करत कामाला सुरुवातही केली. दोन्ही बाजूंनी घोषणाबाजी वाढल्याने पोलिस बंदोबस्त वाढवण्यात आला. शेवटी बंदोबस्तातच संरक्षक भिंत आणि पर्यायी प्रवेशद्वाराचे काम करण्यात आले.

. .. ..

संरक्षक भिंतीच्या कामाला धक्का लागू नये, याची खबरदारी जिल्हा आणि पोलिस प्रशासनाने घ्यावी. कामाला विरोध करणाऱ्यांना ताब्यात घ्यावे. एखादी अप्रिय घटना घडल्यास त्यांना जबाबदार धरावे.

आमदार राजेश क्षीरसागर

. .. .

स्मारकाच्या ठिकाणी येण्यासाठी केवळ दहा फुटाच्या अंतरावर पर्यायी प्रवेशद्वार ठेवले आहे. वहिवाटीप्रमाणे प्रवेशद्वार ठेवण्याची मागणी चुकीची होती. जिल्हाधिकाऱ्यांच्या आदेशानुसार प्रशासनाने संरक्षक भिंतीचे काम केले आहे.

सरिता मोरे, महापौर

.. .. .

सकारात्मकता, आत्मविश्वास

आणि वेळेचे नियोजन आवश्यक

डॉ. ए. एम. गुरव यांच्या व्याख्यानातून उमगले मुलाखतीचे तंत्र

म. टा. प्रतिनिधी, कोल्हापूर

'मुलाखत ही व्यक्तिमत्व विकासाची परीक्षा असते. त्या माध्यमातून शिक्षणासहित व्यक्तिमत्त्व उलगडत असते. आयुष्यात कुठल्याही प्रकारच्या मुलाखतीला सामोरे जाताना, सकारात्मक वृत्ती, वेळेचे नियोजन आणि मुलाखती दरम्यान उत्कृष्ट सादरीकरण या त्रिसूत्रीची सांगड घातल्यास नक्कीच यशस्वी ठराल,' असा मंत्र शिवाजी विद्यापीठातील कॉमर्स अँड मॅनेजमेंट डिपार्टमेंटचे विभागप्रमुख डॉ. ए. एम. गुरव यांनी दिला.

'महाराष्ट्र टाइम्स'आणि 'टाइम्स ऑफ इंडिया'तर्फे आयोजित 'मटा एज्युफेस्ट २०१९'मध्ये ते बोलत होते. 'प्रशासकीय स्पर्धा परीक्षा व मुलाखतीचे तंत्र' हा त्यांच्या व्याख्यानाचा विषय होता. विद्यार्थ्यांना मार्गदर्शन करताना डॉ. गुरव यांनी मुलाखतीला जाताना पुरुष व महिला उमेदवारांनी कोणता पेहराव करावा, संभाषण कौशल्य, केशरचना ते प्रत्यक्ष मुलाखत देताना घ्यावयाची काळजी यासंबंधी मार्गदर्शन केले.

डॉ. गुरव म्हणाले, 'करिअरच्या वेगवेगळ्या क्षेत्रात प्रत्येकाला मुलाखत प्रक्रियेला सामोरे जावे लागते. मुलाखतीचे प्रत्यक्ष मुलाखत (फेस टू फेस) आणि टेलिफोनिक असे दोन प्रकार आहेत. अभ्यासक्रमासाठी मुलाखत असो की नोकरीसाठी उमेदवारांनी काही संकेत पाळावेत. पूर्ण अभ्यास करून मुलाखतीला सामोरे जावे. मुलाखत देताना सकारात्मकता, आत्मविश्वास असावा. मुलाखतीच्या वेळे अगोदर तीस मिनिटे अगोदर संबंधित केंद्रावर उपस्थित राहा. भडक रंगाचा पेहराव करू नये. मुलाखत प्रक्रिया ही ३० मिनिटांपासून तीन दिवस चालणारी असते. या कालावधीत उमेदवारांनी कधीही मनामध्ये नकारात्मक विचार आणू नयेत. आत्मविश्वास ढळू देऊ नये, मुलाखतीद्वारे उमेदवाराचे व्यक्तिमत्त्वाची तपासणी होते.'

पदवीसोबत ज्ञान, कौशल्ये आवश्यक

म. टा. प्रतिनिधी, कोल्हापूर

'केवळ पदवी प्राप्त केली म्हणजे करिअर होत नाही. करिअरसाठी पदवीसोबतच ज्ञान आणि कौशल्ये आवश्यक आहेत, असे प्रतिपादन अजिंक्य डी. वाय. पाटील विद्यापीठाचे (पुणे) विभागीय व्यवस्थापक प्रद्युम्न ठाकरे यांनी केले. 'मटा एज्युफेस्ट'मध्ये ते 'फ्युचर प्रूफ करिअर'या विषयावर त्यांनी उपस्थित विद्यार्थ्यांशी संवाद साधला.

ठाकरे यांनी भाषणाच्या ओघात अजिंक्य डी. वाय. पाटील विद्यापीठातील विविध अभ्यासक्रमांची माहिती दिली. ते म्हणाले, 'विद्यापीठाने बदलत्या काळानुसार अभ्यासक्रमांची रचना केली आहे. डिझाइन आणि एमबीएमध्ये विविध अभ्यासक्रम सुरू केले आहेत. यामध्ये प्रॉडक्ट डिझाइन, अॅटोमोबाइल डिझाइन, फॅशन डिझाइन आदी अभ्यासक्रमाचा समाावेश आहे. तर एमबीएमध्ये मीडिया अँड कम्युनिकेनशन, बँकिग अँड फायनान्स सर्व्हिसेस, बिझनेस इनोव्हेशन अशा नवनवीन अभ्यासक्रमांचा समावेश आहे. विद्यार्थ्यांच्या आवडीनिवड, इंडस्ट्रीज क्षेत्रातील घडामोडी, अपेक्षा आणि भविष्यकालीन संधी या साऱ्या बाबींचा विचार करून अभ्यासक्रम तयार केला.

ठाकरे म्हणाले, 'आज उद्योग क्षेत्र विस्तारत आहे. मात्र नवनवीन तंत्रज्ञान आणि मशिनरीच्या अधिकाधिक वापरामुळे मनुष्यबळावर मर्यादा आल्या आहेत. यामुळे उमेदवारांच्या जबाबदाऱ्या वाढल्या आहेत. उत्पादन निर्मितीचे शिक्षण घेताना त्याच्या मार्केटिंगचे कौशल्यही विद्यार्थ्यांनी शिकले पाहिजे. महत्त्वाचे म्हणजे विद्यार्थ्यांना नेहमी नाविन्याचा ध्यास असावा. केवळ पदवी प्राप्त केली म्हणजे करिअर घडेल असे नाही. करिअरसाठी नवनवीन ज्ञान आणि कौशल्ये अंगिकृत केली पाहिजेत. नवीन समस्येवर जुने पर्याय उपयुक्त ठरू शकत नाहीत. शिवाय सध्याच्या गतिमान आणि तंत्रज्ञानाच्या युगात जुन्या अभ्यासक्रमावरही विसंबून राहता येणार नाही.'

मटा एज्युफेस्ट : महाराष्ट्र टाइम्स व टाइम्स ऑफ इंडियाच्या वतीने विद्यार्थ्यांना करिअरची अचूक दिशा दाखवणारा 'मटा एज्युफेस्ट २०१९', स्थळ : हॉटेल सयाजी, वेळ : सकाळी ११ ते सायंकाळी ७ पर्यंत.

सायक्लोथॉन : डेक्कन स्पोर्टस क्लबच्या वतीने सायक्लोथॉन, उद्घाटक : माजी आमदार मालोजीराजे छत्रपती, वेळ : सकाळी ६ वा.

चर्चासत्र : प्रायव्हेट हॉस्पिटल आणि नर्सिंग होम असोसिएशन व जिल्हा पोलिस दलातर्फे चर्चासत्र, विषय : हॉस्पिटलवरील हल्ले, वास्तव आणि ते रोखण्यासाठी प्रयत्न, स्थळ : रेसिडेन्सी क्लब, वेळ : सकाळी ९ ते १ वा.

रक्तदान शिबिर : चित्पावन संघातर्फे रक्तदान शिबिर, स्थळ : ब्राह्मण सभा, करवीर मंगलधाम, वेळ : सकाळी ९ वा.

व्याख्यान : इन्स्टिट्युशन ऑफ इंजिनीअर्स व तंत्रज्ञान विभाग शिवाजी विद्यापीठ यांच्यावतीने व्याख्यान, विषय : अभियांत्रिकी शिक्षणातील संधी आणि केंद्रीय प्रवेश प्रक्रिया, वक्ते : डॉ. जयदीप बागी, स्थळ : केशवराव भोसले नाट्यगृह, वेळ : सकाळी ९.३० वा.

सत्कार : भोगावती शिक्षण प्रसारक मंडळाच्या वतीने मुख्याध्यापक जी. ए. पाटील यांचा सेवानिवृत्तीनिमित्त सत्कार, स्थळ : लॉन मंगल कार्यालय, नवीन वाशी नाका, वेळ : सकाळी १० वा.

कार्यशाळा : महाराष्ट्र टाइम्स कल्चर क्लब व कलर १० आर्टच्या वतीने अम्ब्रेला पेंटिंग कार्यशाळा, स्थळ : कलर १० आर्ट गॅलरी, राजारामपुरी दुसरी गल्ली, वेळ : सकाळी ११ वा.

सत्कार : विद्या प्रबोधिनी स्पर्धा परीक्षा मार्गदर्शन केंद्राच्या वतीने यशस्वी विद्यार्थ्यांचा सत्कार, हस्ते : पोलिस प्रमुख डॉ. अभिनव देशमुख, स्थळ : विद्या प्रबोधिनी, अरहंम प्लाझा, राजारामपुरी, वेळ : सकाळी १० वा.

अक्षरगप्पा : राष्ट्रध्वज व राष्ट्रगीताची माहिती, सादरकर्ते : मिलिंद सबनीस, स्थळ : अक्षरगप्पा, कोळेकर तिकटी, वेळ : सायं. ५.३० वा.

व्याख्यान : अखिल भारतीय मराठा महासंघाच्या वतीने शिवराज्याभिषेक दिनानिमित्त व्याख्यान, विषय : सयाजीराव गायकवाड महाराज यांच्या नजरेतून छत्रपती शिवराय, वक्ते : बाबा भांड, स्थळ : शाहू स्मारक, दसरा चौक, वेळ : सायं. ५.३० वा.

००००

म. टा. प्रतिनिधी, कोल्हापूर

लग्नाचे आमिष दाखवून तरुणीवर अत्याचार केल्याप्रकरणी संशयित अमर मनोहर निकम (वय २७), शकुंतला मनोहर निकम (वय ४५, रा. केर्ले ता. करवीर) या दोघांवर करवीर पोलिसांत गुन्हा दाखल झाला. पोलिसांनी सांगितले की, पीडित तरुणी एका खासगी ठिकाणी नोकरी करते. कामाच्या ठिकाणी तिची संशयित अमरशी ओळख झाली. त्याने तिला लग्नाचे आमिष दाखवून वेळोवेळी अत्याचार केले. पीडित तरुणीने लग्नाची मागणी केल्यानंतर टाळाटाळ केली. अमरची आई शकुंतलाने पीडित तरुणीला जातिवाचक शिवीगाळ केली. आपली फसवणूक झाल्याचे लक्षात आल्यानंतर तरुणीने दोघांविरोधात फिर्याद दिली. त्यांच्यावर अनुसूचित जाती प्रतिबंधक कायद्यानुसार गुन्हा दाखल करण्यात आला.

Satish.ghatage@timesgroup.com

Tweet:satishgMT

कोल्हापूर : आंतरराष्ट्रीय बाजारपेठेत घसरलेले साखरेचे दर, एकरकमी एफआरपीचे केलेले तुकडे, दुष्काळाचे सावट असतानाही जिल्ह्यातील शेतकऱ्यांनी ऊसशेतीला प्राधान्य दिले आहे. गतवर्षीपेक्षा यंदा ऊसपिकाचे क्षेत्र ६२०८ हेक्टरने वाढले आहे. गडहिंग्लज तालुक्यात गतवर्षीएवढेच क्षेत्र असून चंदगड, गगनबावडा तालुक्यांत थोडीशी घट झाली आहे.

मोठी व मध्यम धरणे, लघुपाटबंधारे आणि बारमाही वाहणाऱ्या नद्यांमुळे जिल्ह्यात सर्वांत जास्त उसाचे क्षेत्र आहे. जिल्ह्यात २२ साखर कारखाने असून, यंदा मार्चअखेर साखर हंगाम लांबला होता. आंतरराष्ट्रीय बाजारपेठेत साखरेचे दर घसरल्याने एकरकमी एफआरपी देण्यास कारखान्यांनी असमर्थता दर्शविली. कारखान्यांनी उसाला प्रतिटन पहिला हप्ता २३०० रुपये देऊन एफआरपी कायदा मोडीत काढला. एप्रिल व मेअखेर बहुतांश कारखान्यांनी एफआरपीप्रमाणे ऊस उत्पादकांना दर दिला.

एफआरपीचे तुकडे पाडले असले तरीही ऊस पिकाला हमीभाव असल्याने शेतकऱ्यांनी ऊस लागवडीला प्राधान्य दिले आहे. गतवर्षीपेक्षा ६२०८ हेक्टर लागवडीचे क्षेत्र वाढले आहे. राधानगरी, भुदरगड या दोन्ही तालुक्यांत ऊसलागवडीचे क्षेत्र वाढले आहे. गतवर्षी राधानगरी तालुक्यात १० हजार ६७ हेक्टर लागवड झाली होता. यंदा १७५३ हेक्टरची वाढ होऊन तालुक्याचे क्षेत्र विस्तारले आहे. ११ हजार ८२० हेक्टरवर ऊस लागवड झाली आहे. राधानगरीप्रमाणेच भुदरगड तालुक्यात १५२७ हेक्टरने क्षेत्र वाढले आहे. गतवर्षी भुदरगड तालुक्यात ५३५० हेक्टरवर लागवड झाली होती. यंदा हे प्रमाण ६८४७ हेक्टरवर पोहोचले आहे.

हातकणंगले, शिरोळ, पन्हाळा, शाहूवाडी, गगनबावडा, करवीर, कागल, आजरा तालक्यांतही उसाचे क्षेत्र वाढले आहे. गडहिंग्लज तालुक्यात ९१७२ हेक्टर क्षेत्रावर लागवड झाली आहे. गतवर्षी हेच प्रमाण होते. चंदगड तालुक्यात फक्त ६४ हेक्टर, गगनबावडा तालुक्यात १०० हेक्टर क्षेत्र घटले आहे.

उसाचे क्षेत्र जरी वाढले असली तरी कडक उन्हाळा आणि वळीव पडला नसल्याने उसाची वाढ खुंटल्याचे चित्र अनेक तालुक्यांत पाहायला मिळत आहे. यंदा उसाचे वजन घटण्याची शक्यता व्यक्त केली जात आहे. आडसाली, पूर्वहंगामी, सुरू, खोडवा लागवडीच्या क्षेत्रात वाढ झाली असली तरी येत्या साखर हंगामात उसाला दर किती मिळणार याची काळजी शेतकऱ्यांना सतावत आहे.

०००००

उसाचे क्षेत्र (हेक्टरमध्ये)

तालुका २०१८ २०१९

हातकणंगले २१,३६६ २१,९१८

शिरोळ २३,५८७ २३,८८९

पन्हाळा ११,००० ११,२८४

शाहूवाडी ४६५४ ५२६१

राधानगरी १०,०६७ ११,२८४

करवीर २३,३८७ २३,५०२

गडहिंग्लज ९१७२ ९१७२

भुदरगड ५३५० ६८४७

आजरा ४७०० ५४१६

चंदगड १०,६७५ १०,६११

गगनबावडा ३६२४ ३५१४

कागल २१,३८७ २२,३५०

०००००

म. टा. प्रतिनिधी, कोल्हापूर

कुडित्रे (ता. करवीर) येथील यशवंत सहकारी बँकेच्या आपटेनगर रिंग रोडवरील शाखेवरील दरोडाप्रकरणी पोलिसांनी सुमारे दोन हजार वाहने आणि २५० संशयितांची चौकशी केली. आपटेनगर, कळंबा, पोद्दार इंटरनॅशनल स्कूलसह परिसरातील सर्व सीसीटीव्हीचे फुटेज तपासले. चार पथकांकडून या बँक लुटीचा तपास सुरू आहे.

करवीरचे सहायक पोलिस निरीक्षक धनंजय पिंगळे यांनी दिलेल्या माहितीनुसार, आपटेनगर रिंगरोडवरील यशवंत बँकेच्या शाखेत गुरुवारी भरदुपारी तीन वाजता दोघा दरोडेखोरांनी लिपिकाला पिस्तूल आणि कोयत्याचा धाक दाखवून पाऊण लाखाची रोकड लंपास केली. याप्रकरणी बँकेतील सीसीटीव्ही फुटेजसह परिरातील दहा कॅमेऱ्यांचे फुटेज तपासले आहे. यामध्ये या मार्गावरील दोन हजार वाहने तपासली आहेत. बँकेच्या आवारातील दोन कॅमेऱ्यात दोघेही मोपेडवरुन आल्याचे दिसत आहे. या मोपेडच्या क्रमांकाचा शोध घेण्याचे काम सुरू आहे. चोरट्यांनी चेहरे रुमालाने बांधून डोक्याला हेल्मेट घातले आहे. फुटेजमधील त्यांच्या वर्णनानुसार संशयितांचा शोध सुरू केला आहे. टीप देऊन लूट झाल्याचा संशय असल्याने बँकेचे कर्मचारी, शाखाधिकाऱ्यांसह सराईत गुन्हेगारांची चौकशी सुरू आहे. दरोडेखोरांच्या शोधासाठी सांगली, सातारा आणि कर्नाटकात चार पथके रवाना झाली आहेत.

म. टा. प्रतिनिधी, कोल्हापूर

जिल्ह्यातील महसूल विभागातील १४२ कर्मचाऱ्यांच्या बदल्या करण्यात आल्या. बदली प्रक्रियेत पारदर्शकता आणण्यासाठी जिल्हाधिकाऱ्यांनी मुलाखती घेत शनिवारी पहाटे साडेपाच वाजेपर्यंत बदली प्रक्रिया राबविली. पुढील आठवड्यात कर्मचारी बदलीच्या ठिकाणी रुजू होणार आहेत.

एकाच कार्यालयात तीन वर्षे आणि तालुक्यात सहा वर्षे काम करणाऱ्या कर्मचाऱ्यांच्या बदल्या करण्यात आल्या. यापूर्वी निवासी उपजिल्हाधिकारी पातळीवर बदली प्रक्रिया राबवण्यात येत होती. यावेळी बदलीसाठी पात्र असलेल्या कर्मचाऱ्यांच्या मुलाखती घेऊन बदल्या करण्यात आल्या. २२ मंडल अधिकारी, ५४ अव्वल कारकून, ७४ लिपिक टंकलेखकांची बदली प्रक्रिया राबवण्यात आली. आठ कर्मचारी दिव्यांग असल्याने त्यांची बदली करण्यात आली नाही. जिल्हाधिकारी दौलत देसाई, निवासी उपजिल्हाधिकारी संजय शिंदे यांनी बदलीसाठी पात्र असलेल्या कर्मचाऱ्यांच्या मुलाखती घेतल्या. महिला कर्मचाऱ्यांना त्यांच्या सोयीने शेजारील तालुक्यात बदली करण्यात आली. ज्या कर्मचाऱ्याबद्दल तक्रारी होत्या त्यांच्या जबाबदाऱ्या बदलण्यात आल्या. शनिवारी दुपारी बदली झालेल्या कर्मचाऱ्यांची यादी जाहीर करण्यात आली.

म. टा. प्रतिनिधी, कोल्हापूर

सहायक पोलिस निरीक्षक अश्विनी बिद्रे हत्याकांडप्रकरणी अलिबाग कोर्टात चौघा संशयित आरोपींवर सरकारी वकील प्रदीप घरत यांनी शनिवारी दोषारोपत्र दाखल केले. अपहरण, कटकारस्थान, खून करून पुरावा नष्ट करणे, खोटी कागदपत्रे सादर करणे आदी आरोप वकिलांनी दोषारोपपत्रात केला आहे. सरकारी वकिलांनी ६५० पानांचे दोषारोपपत्र सादर केले आहे. दरम्यान कोर्टाने आरोपींच्या वकिलांना तीन जून रोजीची युक्तिवाद मांडण्याची मुदत दिली आहे.

बिद्रे हत्याकांड प्रकरणात मे महिन्यात झालेल्या सुनावणीला चौघेही संशयित गैरहजर राहिले होते. याप्रकरणी सरकारी वकील अॅड. घरत यांनी मुंबई पोलिस सहकार्य करीत नसल्याचा आरोप करून नवी मुंबई पोलिस आयुक्त संजीवकुमार यांना पत्र पाठवून नाराजी व्यक्त केली होती. पोलिसांचे सहकार्य मिळाले नसल्यास त्यांनी हा खटला सोडण्याचा इशारा दिला होता. दरम्यान या खटल्याची सुनावणी शनिवारी सुरू झाली. अलिबाग कोर्टात सकाळी मुख्य सूत्रधार अभय शामसुंदर कुरुंदकर (रा. भाईंदर पूर्व, जि. ठाणे), माजी मंत्री एकनाथ खडसे यांचा भाचा ज्ञानदेव दत्तात्रय पाटील उर्फ राजू पाटील (रा. तळवेल, ता. भुसावळ, जि. जळगाव), कुरुंदकरचा कारचालक कुंदन भंडारी, कुरुंदकरचा बालपणीचा मित्र महेश पळणीकर (रा. आजरा) चौघांनाही हजर करण्यात आले. अॅड. घरत यांनी दिलेल्या माहितीनुसार, या प्रकरणाची सुनावणी सकाळी साडेअकरा वाजता कोर्टात सुरू झाली. अश्विनी ब्रिदे यांची हत्या या चौघांनी कट रचून केली आहे. त्याचे अपहरण करुन खूनाचा कट रचला. बिद्रे यांचा खून करून त्यांचा मृतदेह खाडीत फेकला. पुरावा नष्ट करण्यासाठी जाणीवपूर्वक प्रयत्न केले. खोटी कागदपत्रे सादर करून दिशाभूल करण्याचा प्रयत्न केल्याचा आरोप युक्तिवादात केला आहे. त्यामुळे संशयितांना कठोर शिक्षा करावी, अशी मागणी केली. दरम्यान आरोपींच्या वकिलांनी युक्तिवाद मांडण्यासाठी ६ जूनची मुदत मागितली होती. मात्र कोर्टाने त्यांना ३ जून रोजीची मुदत दिली आहे.

अखेर मुंबई पोलिस हजर झाले

यापूर्वी आलिबाग कोर्टात झालेल्या सुनावणीच्या वेळी तपास अधिकारी गैरहजर होते. त्यावरून पोलिसांकडून अप्रत्यक्ष आरोपींना मदत होत असल्याचाही संशय अश्विनी बिद्रे यांचे पती राजू गोरे यांनी व्यक्त केला आहे. शनिवारी झालेल्या सुनावणीस तपास अधिकारी हजर राहिले.

म. टा. प्रतिनिधी, कोल्हापूर

महापालिकेच्या वतीने शहरातील प्रभागनिहाय स्वच्छता मोहीम रविवारी (ता. २) राबविण्यात येणार आहे. जयंती नाला व उपनाल्यांसह प्रभागात स्वच्छता मोहीम राबविण्यासाठी विविध अधिकाऱ्यांवर जबाबदारी सोपविण्यात आली आहे. स्वच्छता मोहिमेत शहरातील सर्व सेवाभावी संस्था, एनजीओ, तरुण मंडळे, बचतगट व पर्यावरण प्रेमी यांनी सहभागी व्हावे असे, आवाहन महापौर सरिता मोरे व आयुक्त डॉ. मल्लिनाथ कलशेट्टी यांनी केले आहे. संपूर्ण स्वच्छता मोहीम अतिरिक्त आयुक्त श्रीधर पाटणकर, उपायुक्त मंगेश शिंदे, शहर अभियंता नेत्रदीप सरनोबत, आरोग्य अधिकारी डॉ. दिलीप पाटील व जल अभियंता सुरेश कुलकर्णी यांच्या नियंत्रणाखाली राबविण्यात येईल.

दरम्यान भारतीय जन संविधान मंचच्या वतीने 'चांगुलपणाची चळवळ' हाती घेतली आहे. याचाच भाग म्हणून महापालिकेच्यावतीने रविवारी (ता.२) होणाऱ्या स्वच्छता मोहिमेत सहभागी होण्याचा निर्णय बैठकीत घेतला. यावेळी रघुवीरसिंह राठोड, पारस ओसवाल आदी उपस्थित होते.