कोल्हापूर: 'नर्सरी बागेतील राजर्षी शाहू महाराज समाधीस्मारक उभारण्याचे काम सुरू आहे. आंतरराष्ट्रीय दर्जाच्या समाधीस्थळाचे काम अंतिम टप्प्यात असताना संरक्षण भिंतीचे काम बंद पाडले आहे. समाधीस्थळाचे पावित्र राखण्यासाठी चारही बाजूने बंदिस्त असणे आवश्यक आहे. वहिवाट, व्यायमशाळा, उद्यान आदी मुद्दे चर्चेत आले असून हे मुद्दे निकालात काढून समाधीस्थल बंदिस्त करावे,' असे आवाहन सामाजिक कार्यकर्त्यांनी प्रसिद्धी पत्रकाद्वारे केली आहे.

पत्रकात म्हटले आहे, 'समाधीस्थळाचे पावित्र, संरक्षण व देखभालीसाठी संरक्षक भिंत असणे गरजेचे आहे. सध्या संरक्षक भिंतीला विरोध होत आहे. बांधकामाला विरोध म्हणजे छत्रपती शाहूंच्या इच्छेला विरोध केल्यासारखे होते. हा चुकीचा संदेश संपूर्ण देशभर जाईल. ही बाब म्हणजे समाजसुधारक व बहुजनांचे कैवारी असणाऱ्या लोकराजाबद्दल कोल्हापूरच्या दृष्टीने लाजीरवाणी आहे. एखाद्या देवाच्या दर्शनासाठी देवाच्या भक्तीने भाविक शेकडो मैल पायपीट करतात. मग शाहू महाराजांच्या समाधी दर्शनास ५-२५ फूट फेऱ्या मारून जाण्यास काय अडचण आहे. वहिवाट, व्यायमशाळा, उद्यान या मुद्याबाबत संबंधितांनी चर्चेतून मार्ग काढावा प्रशासनाला मदत करुन सामाजिक ऐक्याचा संदेश कायम राहण्यासाठी सहकार्य करावे.'

पत्रकावर अशोक पोवार, अजित सासणे, रमेश मोरे, सतीशचंद्र कांबळे, संभाजीराव जगदाळे, गणी आजरेकर, अॅड. पंडितराव सडोलीकर, चंद्रकांत यादव, भगवान काटे, माणिक मंडलिक, मदन चोडणकर, बाबा जामदार, अॅड. विवेक घाटगे, अॅड. शिवाजीराव राणे, बाबासाहेब देवकर यांची नावे आहेत.

म. टा. प्रतिनिधी, कोल्हापूर

'एसएस गँग'चा म्होरक्या संशयित सूरज साखरे आणि संशयित अभी ऊर्फ युवराज मोहन महाडिक यांच्या देवकर पाणंद येथील कश्यप हाईट अपार्टमेंट आणि मंगळवार पेठेतील घरावर आर्थिक गुन्हे शाखेने शनिवारी छापा टाकला. त्यातून संशयितांनी बेकायदेशीर सावकारी करून बेहिशेबी मालमत्तेच्या खरेदी दस्ताच्या फायली, बँक पासबुके जप्त केली.

आर्थिक गुन्हे शाखेचे उपअधीक्षक आर. बी. शेडे यांनी दिलेल्या माहितीनुसार, साखरे आणि महाडिक यांनी तिप्पट-चौप्पट व्याज आकारून ग्राहकांची फसवणूक केली आहे. त्यांनी दहशत माजवून अनेक मिळकती तसेच खंडणी मागून रोकड मिळविली आहे. मोटार वाहन गहाणवट ठेवण्यासह अनेक बेकायदेशीर कृत्ये केली आहेत. शनिवारी दुपारी त्यांच्या घरावर छापे टाकले. त्यांनी अनेकांना कर्ज दिलेली कागदपत्रे आणि स्टॅम्प जप्त केले. त्यांनी बेहिशेबी मिळविलेल्या पैशातून जमीन खरेदी केल्याचे समजते. त्याची चौकशी सुरू केली आहे. दरम्यान या साखरे, महाडिकसह त्यांच्या साथीदारांविरोधात नागरिकांनी निर्भयपणे तक्रारी द्याव्यात, त्यांचे नाव गोपनीय ठेवले जाईल. या टोळीला शिक्षा होण्यासाठी भक्कम पुराव्याचे दोषारोपपत्र पुणे विशेष मोक्का कोर्टात सादर केले जाणार आहे. त्यासाठी अन्याय झालेल्या नागरिकांनी पुढे यावे, असे आवाहन तपास अधिकाऱ्यांनी केले आहे.

म. टा. प्रतिनिधी, कोल्हापूर

शिवाजी विद्यापीठातील पदव्युत्तर विभागांतर्गत विविध अभ्यासक्रमांच्या प्रथम वर्षाच्या प्रवेशासाठी शनिवारपासून आनलाइन अर्ज भरण्याच्या प्रक्रियेला प्रारंभ झाला. यामध्ये मराठी, हिंदी, इंग्रजी, इतिहास, अर्थशास्त्र, राज्यशास्त्र, समाजशास्त्र, मानसशास्त्र विषयांचा समावेश आहे. तसेच एम कॉम व एलएलएमच्या प्रथम वर्ष अभ्यासक्रमाच्या प्रवेशासाठी ऑनलाइन अर्ज भरण्यास सुरुवात झाली आहे. विद्यापीठाच्या संकेतस्थळावर ऑनलाइन अर्ज भरण्याची सुविधा उपलब्ध केली आहे. या तीनही अभ्यासक्रमांच्या प्रवेश अर्ज भरण्याची मुदत २० जूनपर्यंत आहे.

प्रवेश प्रक्रियेच्या पहिल्या फेरीअंतर्गत तीन जुलैला उपलब्ध जागांची माहिती जाहीर करण्यात येणार आहे. चार जुलैला प्रत्यक्ष प्रवेश प्रक्रियेला सुरुवात होईल. दुसऱ्या फेरीतील जागांची माहिती सहा जुलैला जाहीर होईल. आठ जुलैला प्रत्यक्ष प्रवेश घेता येणार आहे. तिसरी प्रवेश फेरी १० जुलैला होणार आहे.

मराठी मुलखात : दक्षिण महाराष्ट्र : विजय जाधव

०००

जयप्रभा वाचवा !

००००

जयप्रभा अखेरच्या घटका मोजतो आहे. चित्रपटसृष्टीचे वैभव उभे करणारा हा स्टुडिओ नामशेष होण्यापासून वाचवायचा असेल तर त्यासाठी नव्याने ठोस प्रयत्न करण्याची गरज आहे. कोल्हापूरकरांच्या प्रेमाची ही मागणी लता मंगेशकर यांनाही अव्हेरता येणार नाही. सांस्कृतिक चळवळीने आता आणखी एक पाऊल टाकावे, संवादाची हाक मंगेशकरांना द्यावी.

०००००

…चित्रपटसृष्टीचे वैभव आणि सांस्कृतिक वारसा समजल्या जाणाऱ्या कोल्हापुरातील जयप्रभा स्टुडिओचा वाद न्यायालयाच्या दरबारात संपला असला तरी त्यातून तो वाचण्याऐवजी किंवा वाचविण्याऐवजी नामशेष होण्याचीच शक्यता निर्माण झाली आहे. हे वैभव कायम राहावे यासाठी प्रयत्न करणाऱ्या संस्था आणि त्यासोबत भावनात्मक गुंतवणूक असणाऱ्या शहरवासीयांना त्याचा मोठा धक्का बसला. तो बसणेही साहजिक आहे, कारण एकूणच भारतीय चित्रपटाच्या इतिहासातील हे मानाचे पान आता कायमचेच इतिहासजमा होण्याची शक्यता निर्माण झाली आहे. सध्या तो गाणसम्राज्ञी लता मंगेशकर यांच्या ताब्यात आहे. न्यायालयाने त्यांची मालकी आणि त्यात फेरबदल करण्याचा किंवा त्याची विल्हेवाट लावण्याचा त्यांचा हक्क अबाधित ठेवला आहे. स्टुडिओच्या जमिनीपैकी काही भाग आधीच विकल्याने आता उर्वरित मूळ जमीन आणि त्यावरील चित्रपटसृष्टीचे मूक साक्षीदारही आता तेथून हाकलून लावले जातील, अशी भीती सर्वांना वाटते आहे. न्यायालयाने निवाडा दिला असला तरी त्या जागेच्या व्यापारीकरणाला आव्हान देणारे आणि जागेचे मालक ही माणसेच आहेत. ती कोल्हापूरबद्दलच्या, चित्रतपस्वी भालजी पेंढारकर आणि चित्रपटसृष्टीच्या तेथे घडलेल्या, मोठ्या मेहनतीने, कष्टाने, कल्पकतेने घडविलेल्या इतिहासाशी त्यांचे प्रेम वजा करता येणार नाही. लता मंगेशकर यांनीही आपले उमेदीचे दिवस येथे घालवले आहेत. जयप्रभा स्टुडिओच्या परिसरातील मंगळवार पेठेतच त्या राहिल्या आणि भावंडांसोबत लपंडावही खेळल्या. भालजी आणि मंगेशकरांनी जपलेला जिव्हाळाही सर्वपरिचित. गायनक्षेत्रात त्यांनी घेतलेल्या भरारीला पंखात बळही कोल्हापूरच्या मातीनेच दिले होते. असा खूपसा संदर्भ आणि त्याचे धागेदोरे जयप्रभाच्या जाण्या-राहण्यामागे आहेत. ते कसे वजा करणार? मध्यंतरी स्टुडिओसाठी आंदोलन झाले, मंगेशकरांना कोल्हापुरात येऊ न देण्याची भाषा केली गेली. त्यातून झाले असेल तर इतकेच की, जो काही आपुलकीचा धागा होता तो आणखी ताणला गेला. मंगेशकरांनी न्यायालयीन लढाईचा निर्णय घेतला.

या घडामोडींनंतर न्यायालयाच्या ताज्या निकालाने कोल्हापूरच्या सांस्कृतिक चळवळीत अस्वस्थतेचे वातावरण आहे. मुळातच त्या सांस्कृतिक वैभवाच्या बोटावर मोजता येतील इतक्याच खुणा शिल्लक आहेत. त्यातही आता हा बुरूजही कोसळणार, ही भीती आहे. त्यातूनच अखिल भारतीय चित्रपट महामंडळ आणि शहरातील चित्रपट व्यावसायिकांनी न्यायाचे दरवाजे ठोठावले होते. आता पुढे काय? हा प्रश्न सर्वांनाच सतावतो आहे. या स्थितीत वास्तव स्वीकारून पुन्हा संवादाचा हात पुढे करणे गरजेचे वाटते आहे. कोल्हापूरकरांनी मनाचा मोठेपणा दाखवत आणि झाल्या न झालेल्या चुका मान्य करून आता पर्यायांवर विचार करण्याची गरज आहे. या पार्श्वभूमीवर 'समंजस संवादाची गरज' व्यक्त करून कोल्हापूरच्या सांस्कृतिक चळवळीतील ज्येष्ठ कार्यकर्ते उदय कुलकर्णी यांनी हा वारसा जपण्याच्या अंधुकशा आशा आजही जिवंत आहेत, असाच संदेश द्यायचा प्रयत्न केला आहे. तो महाराष्ट्राच्या सांस्कृतिक विश्वाला आणि कलारसिकांना नवी आशा दाखविणारा आहे. लता मंगेशकर यांच्याशी संवादाची प्रक्रिया सुरू करून एक पाऊल पुढे टाकण्याची गरज निर्माण झाली आहे. ही भूमिका स्वागतार्ह म्हणावी लागेल.

\B

संवादाचा पूल \B

जयप्रभा स्टुडिओ, लता मंगेशकर आणि कोल्हापूरच्या नात्याला अनेक पदर आहेत. मराठी चित्रपटसृष्टीचा जन्म, उभारणी आणि वैभवाचा काळ या शहराने अनुभवला. साऱ्या मंगेशकर कुटुंबानेच इथे राहून सांस्कृतिक क्षेत्रातले पहिले पाऊल ठेवले, ग म भ न गिरवले त्या शहराच्या आजच्या त्यांच्याकडूनच्या अपेक्षा अवास्तव नसल्या तरी त्या आपलेपणाच्या भावनेने ओतप्रोत आहेत. यामुळेच कोल्हापूरकरांचा एकट्या लता मंगेशकर यांच्यावरच नव्हे तर सर्व मंगेशकर कुटुंबीयांवरच त्यांचा आपुलकीचा हक्क आहे. मंगेशकर बंधू आणि भगिनींनीही तो कधी दडवला नाही. संधी मिळेल तेव्हा प्रसंगानुरूप त्यांनी तो उघड केला. कदाचित या प्रेमापोटीच कोल्हापूरच्या जनतेने त्यांनी हा स्टुडिओ चालवावा, त्याची विक्री करू नये अशी आशा बाळगली. न्यायालयाने या प्रकरणातील मंगेशकरांचे हक्क अबाधित ठेवल्याने आता जयप्रभाचे पुढे काय करायचे, हे ठरविण्याची जबाबदारी मंगेशकरांवरच येऊन पडली आहे, तर कोल्हापूरकरांना आशेवरच राहावे लागणार आहे. व्यवहार आणि या भावनांची सांगड कशी घातली जाणार, त्यांच्याशी संवादाचे पूल बांधले जाणार काय, हे पाहावे लागेल.

जयप्रभाच्या जागेवर डोळा असणाऱ्यांना कला-संस्कृती कशाशी खातात हे माहिती असायचे कारण नाही. त्यांना केवळ मोक्याच्या जागेवर टोलेजंग इमारती उभारणे आणि त्यातून अर्थ कमावणे एवढेच त्यांना ठाऊक असते. त्यात त्यांचाही काही दोष नाही. अशावेळी शहराचे सांस्कृतिक मानस झोपले आहे की जागे, स्थानिक जनता, तिचे प्रतिनिधी, सरकार आणि महाराष्ट्राचे एकूणच सांस्कृतिक विश्व या घटनेकडे आणि बदलाकडे कसे पाहते हे महत्त्वाचे ठरते. दुर्दैवाने काही अपवाद सोडता या सर्वच पातळ्यांवर फारसे आशादायक चित्र नाही. चित्रपटांचा मूकपटांचा आणि बोलपटांचा कालखंड ज्या शहराने बघितला, भारतीय चित्रपटसृष्टीची मुहूर्तमेढच जिथे रोवली गेली त्या शहराची आणि तिथल्या या स्टुडिओची ही बिकट अवस्था पाहून स्वर्गीय भालजी पेंढारकरांना काय वेदना होत असाव्यात? चित्रपटसृष्टीची ही कार्यशाळा आता मोडकळीस आली आहे. चित्रनिर्मितीचे बदललेले तंत्र आणि तंत्रज्ञान हाताशी आहे. मात्र, ती तळमळ कोठून आणणार? तिच्या अभावानेच एकापाठोपाठ एक स्टुडिओ वाढत्या नागरीकरणाने गिळंकृत केले. ना त्यांच्या स्मृती ना स्मारके!

\B

ठोस योजना द्या\B

उदय कुलकर्णी म्हणतात त्याप्रमाणे, लता मंगेशकर यांना जयप्रभा प्रकरणात सातत्याने खलनायक ठरविण्याचा प्रयत्न केला हे खरे असले तरी या ताण-तणावाच्या काळात हे समज-गैरसमज दूर करण्याचे पुरेसे प्रयत्न झाले नाहीत, ज्यांनी या प्रश्नात लक्ष घालावे, अशी कोल्हापूरकरांची अपेक्षा होती त्यांनीही दुर्लक्ष केले किंवा वाद वाढून तो न्यायालयाच्या दारात जाईपर्यंत मूक भूमिका घेतली हे खरे आहे. यातूनच केवळ पोकळ चर्चेपलीकडे हा विषय पुढे सरकला नाही. सर्वजण आपापली संस्थाने सांभाळत बसले. इतिहास केवळ चघळण्यापुरताच उरला आहे. त्याची ना कुणाला कदर ना कोणाला प्रेम. जो आहे तो केवळ तोंडदेखलेपणा! फुकाचा आव आणि खोट्या अस्मितांचा खेळ! कोल्हापूरच्या चित्रपटसृष्टीचा इतिहास सांगणाऱ्यांनी आणि तो मिरवणाऱ्यांनी ते आता सांगणे तरी बंद करावे किंवा कोषातून बाहेर येत नव्याने प्रयत्नांची मोट बांधावी. ज्या शहराला आपली शक्तिस्थळेच कळाली नाहीत, ते या बदलाच्या रेट्यात पुढे कसे जाणार? आम्ही चित्रनगरी उभारली, असे उत्तर त्यावर दिले जाईल. त्याकडे तरी कोणाचे लक्ष आहे? किती चित्रपटांचे चित्रीकरण तिथे झाले? मुंबई, दक्षिण आणि उत्तरेकडचे किती निर्माते आले? ही अनास्थाच आपला वारसा हळूहळू संपवत चालली आहे.

हा स्टुडिओ महापालिका, चित्रपट महामंडळ, शिवाजी विद्यापीठाचा ललित कला विभाग, राज्य सरकारचे सांस्कृतिक कार्य संचालनालय यापैकी कोणी ताब्यात घ्यावा, त्यासाठी लागणारी रक्कम राज्य सरकार आणि लोकवर्गणीतून उभारली जावी, शहरातील धनिकांनी, या शहराकडून भरभरून घेणाऱ्यांनी सढळ हाताने मदत करावी, यांसारखे ठोस प्रस्ताव मंगेशकर यांना द्यावेत, अशी कल्पना नव्याने पुढे येते आहे. लोकप्रतिनिधी, उद्योजक, व्यावसायिकांनी, बांधकाम क्षेत्राने पुढे यावे. ओळख पुसली जाण्याआधीच जयप्रभाच्या पुनरुज्जीवनाची ठोस भूमिका घ्यावी. पालकमंत्री चंद्रकांत पाटील यात संवादकाची भूमिका बजावू शकतील, राजकीय चष्मे बाजूला ठेवले आणि लोकभावना समंजसपणे पोहोचवली, ठोस योजना दिली तर आणि तरच जयप्रभा वाचविता येईल. लोकसभेच्या निवडणुका झाल्यात, आता वेळ आहे, या शहराची अस्मिता आणि अभिमानस्थळे जपण्याची, ती समृद्ध करण्याची! लतादीदी नाही म्हणणार नाहीत!

०००००००००००

म. टा. प्रतिनिधी, कोल्हापूर

जिल्ह्यातील ४५ शिक्षकेतर कर्मचाऱ्यांना लाभ देण्याच्या आदेशाचा भंग केल्याप्रकरणी येथील माध्यमिक शिक्षणाधिकारी किरण लोहार यांच्याविरोधात मुंबई हायकोर्टात याचिका दाखल केली आहे. त्याची सुनावणी ३ जून रोजी होणार असल्याची माहिती विजयसिंह शिंदे, लहू गुजर यांनी प्रसिद्धी पत्रकातून दिली.

पत्रकात म्हटले आहे की, आश्वासित प्रगती योजनेतून ४५ शिक्षकेतर कर्मचाऱ्यांना दुसऱ्या टप्यातील लाभ मिळालेला नाही. यातील दत्तात्रय जाधव यांनी लाभासाठी हायकोर्टात याचिका दाखल केली. कोर्टाने २६ ऑक्टोबर २०१८ रोजी याचिकाकर्त्यांना आठ आठवड्यांत सर्व फायदे देण्याचे आदेश दिले होते. मात्र, यावर कार्यवाही न केल्याने शिक्षणाधिकारी लोहार यांच्याविरोधात याचिकर्त्यातर्फे अॅड. चेतन पाटील यांनी अवमान याचिका दाखल केली.

कोल्हापूर : पुणे येथील अखिल भारतीय छावा संघटनेतर्फे राज्यस्तरीय छावा गौरव पुरस्कार येथील शिक्षक सुजय देसाई यांना देण्यात आला. खासदार संभाजीराजे छत्रपती यांच्या हस्ते छत्रपती संभाजी महाराज यांच्या जयंतीनिमित्त पुणे येथे झालेल्या कार्यक्रमात हा पुरस्कार देण्यात आला. यावेळी प्रवीण गायकवाड यांच्यासह मान्यवर उपस्थित होते. दरम्यान, देसाई म. दु. श्रेष्ठी समता हायस्कूलमध्ये शिक्षक आहेत. त्यांनी स्वलिखीत 'शंभू जागर ' असे काव्यरूपी चारोळीतून छत्रपती संभाजी महाराज यांच्या कार्यावर प्रकाशझोत टाकला आहे.

म. टा. प्रतिनिधी, कोल्हापूर

गुजरी परिसरात सशस्त्र दरोडा टाकण्याच्या कट रचून आलेल्या तिघा दरोडेखोरांचा शोध शाहूपुरी पोलिसांनी सुरू केला आहे. त्याच्या जप्त केलेल्या कारमध्ये सापडलेली पिस्तूल स्पेन बनावटी असल्याचे तपासात उघड झाले आहे. ही पिस्तूल त्यांच्याकडे कशी आली, त्याचा वापर खूनासाठी केला होता का? याचा तपास सुरू केला आहे.

शाहूपुरी पोलिस ठाण्याचे सहायक पोलिस निरीक्षक शहाजी निकम यांनी दिलेल्या माहितीनुसार, सोमवारी (ता. २०) मध्यरात्री रेल्वेस्थानक परिसरात दोन कार थांबल्या होत्या. त्या वेळी रात्रीच्या पोलिसांच्या गस्ती पथकाने कारमध्ये बसलेले संशयित मकरंद जोंधळे (कदमवाडी), सुशांत पोवार (मंगळवार पेठ) आणि अमित कांबळे (मुक्त सैनिक वसाहत) यांच्याकडे चौकशी केली. त्यावेळी अंधाराचा फायदा घेऊन संशयित तिघेही पळून गेले. त्यांच्या दोन्ही कार जप्त केल्या असून त्यामधून एक पिस्तूल, सहा जिवंत काडतुसे, कोयता, कटावणी या हत्यांरासह १२०० रुपयांची रोकड जप्त केली होती. जप्त केलेली पिस्तूल स्पेन बनावटीची असल्याचे उघड झाले आहे. पसार झालेल्या या तिघांचा शोध सुरू आहे.

ट्रक-ट्रॅव्हल्सच्या अपघातात

एक जागीच ठार

म. टा. वृत्तसेवा, कराड

वाठार स्टेशन (ता. कोरेगाव) गावाच्या हद्दीतील निष्णाई पेट्रोल पंपाजवळ रविवारी सकाळी ट्रक आणि ट्रॅव्हल्सची समोरासमोर धडक होऊन झालेल्या भीषण अपघातात एक जण जागीच ठार झाला, तर दोन जण गंभीर जखमी झाले आहेत. जखमींवर प्राथमिक उपचार करून त्यांना साताऱ्याच्या जिल्हा सरकारी रूग्णालयात दाखल केले आहे.

कोल्हापूरहून खासगी ट्रॅव्हल्स् कंपनीची एम. एच. ०४ जी. पी. ९५७० ही बस एक महिन्याच्या तीर्थयात्रेसाठी निघाली असता पुण्याहून कोल्हापूरकडे जाणारा माल ट्रक एम. एच. १२ एल. टी. ९९६२ यांची रविवारी सकाळी सहा वाजण्या सुमारास वाठार स्टेशनच्या हद्दीतील निष्णाई पेट्रोल पंपाजवळ समोरासमोर जोरदार धडक झाली. या भीषण अपघातात ट्रॅव्हल्समधील एक जण जागीच ठार झाला तर अन्य दोन जण गंभीर जखमी झाले. या भीषण धडकेत ट्रकची केबिन लक्झरी बसच्या केबिनमध्ये शिरून ड्रायव्हरच्या वरील बाजूस बाल्कनी सीटवर झोपलेला सागर भरत कमाने (वय २१, रा. उंब्रज) याच्या डोक्यात ट्रकचा अँगल घुसल्यामुळे डोक्यास गंभीर दुखापत झाली होती. त्याला तातडीने उपचारासाठी सातारा येथील सरकारी रुग्णालयात हलविण्यात आले. परंतु, उपचारापूर्वीच मृत झाला होता. या भीषण धडकेत स्टेरिंग व बोनेटमध्ये अडकलेला ट्रक ड्रायव्हर विजय बाबुराव वैरागर (रा. केडगाव, चौफुला) याच्याही उजव्या पायाला गंभीर दुखापत झाली असून, त्यालाही मोठ्या कसरतीने पोलिस व ग्रामस्थांच्या सहकार्याने जेसीबी व ट्रॅक्टरद्वारे बाहेर काढण्यात आले. पुढील उपचारासाठी सातारा येथील यशवंत रुग्णालयात पाठवण्यात आले. या अपघातात सूर्यकांत जगन्नाथ जाधव (रा. उंब्रज) आणि पांडुरंग शंकर घाडगे (रा. बोरगाव) गंभीर जखमी झाले आहेत.

.......

एक ठार

कराड

येणपे (ता. कराड) येथे दगडाची डबर ओढत असताना ट्रॅक्टर पलटी होऊन झालेल्या अपघातात युवक जागीच ठार झाल्याची घटना रविवारी दुपारी साडेबाराच्या सुमारास घडली. मृत पावलेल्या युवकाचे नाव बाळासो राजाराम शेवाळे (वय ४३, रा. येणपे) असे आहे. ट्रॅक्टरवरील ताबा सुटल्याने ट्रक्टरने शेताच्या बांधावरून दोन पलटी घेतल्या. यामध्ये मृत चालक बाळासो शेवाळे ट्रॅक्टरचे स्टेरिंग व ट्रॅक्टरचे छत यांच्यामध्ये अडकल्याने जागीच ठार झाले.

........

माजी सरपंचाचा मृत्यू

कराड :

जुजारवाडी (ता. कराड) येथे शुक्रवारी पाण्याविषयी चांगली चर्चा करीत नाहीस, असा गैरसमज करून घेऊन सहा जणांनी माजी सरपंच व विद्यमान ग्रामपंचायत सदस्यास लाकडी दांडक्याने मारहाण केली होती. या मारहाणीत त्यांच्या डोक्यास गंभीर जखम झाल्याने त्यांच्यावर खासगी रूग्णालयात उपचार सुरू होते. शनिवारी सायंकाळी उपचारांदरम्यान त्यांचा मृत्यू झाला. या प्रकरणी सहा जणांवर कराड ग्रामीण पोलिसात खुनाचा गुन्हा नोंद करण्यात आला आहे. बाळकृष्ण महादेव जुजार, असे मृत झालेल्या माजी सरपंचाचे नाव आहे.

म. टा. प्रतिनिधी, कोल्हापूर

येथील जिल्हाधिकारी कार्यालयातील निवडणूक विभाग लोकसभा निवडणूक प्रक्रिया संपल्यानंतरही गोंधळलेलाच राहिला. परिणामी या विभागातील अधिकाऱ्यांच्या कार्यक्षमतेवरच प्रश्न उपस्थित होत आहे. मतमोजणीनंतरची आकडेवारी, निवडणूक खर्च, भत्ता कमी देण्याचे प्रकरण, निवडणूक प्रक्रियापूर्व मतदार यादीच्या घोळासंबंधी काँग्रेस पक्षाने केलेल्या तक्रारींसंबंधी माहिती देण्यापासून पळपुटेपणाचे धोरण हा विभाग घेताना दिसत आहे. विभागातील कामकाजाचा त्रास निवडणूक निर्णय अधिकारी, सहायक निवडणूक अधिकारी, प्रमुख पक्षांचे प्रतिनिधी, कार्यकर्त्यांनाही झाला.

निवडणूक विभागातील अधिकारी ते शिपायांपर्यंत प्रत्येकाने गतिमान कामकाज करणे अपेक्षित असते. मात्र, अपवाद वगळता तेथे असे चित्र दिसले नाही. याउलट तेथील मूळ कर्मचारी आणि निवडणूक कामासाठी तात्पुरत्या स्वरूपात नियुक्त केलेल्या कर्मचाऱ्यांत सुप्त संघर्ष राहिला. काम करूनही न केल्याचा ठपका बाहेरून आलेल्या कर्मचाऱ्यांवर ठेवण्यात आला. यामुळे प्रशासनातील गलथानपणा, समन्वयाचा अभाव वारंवार चव्हाट्यावर आला. यातूनच निवडणुकीसंबंधी वेळेत माहिती देण्यात अपयश आल्याचा आरोप होत आहे.

मतदान प्रक्रिया सुरू होण्याआधीच काँग्रेसने मतदार यादीसंबंधी काही आक्षेप नोंदवले होते. त्याचे पुढे काय झाले, याबद्दल प्रशासनाने शेवटपर्यंत अनभिज्ञता कायम राखली. मतदान झालेल्या दुसऱ्या दिवशी गडहिंग्लजला मतदान कर्मचाऱ्यांना कमी भत्ता दिल्याचे प्रकरण गाजले. निवडणूक खर्चासाठी कोट्यवधींचा निधी आला आहे. त्यासंबंधीची सविस्तर माहिती देण्यास निवडणूक प्रशासन टाळाटाळ करण्यामागचा हेतू काय, असाही प्रश्न उपस्थित होत आहे. दरम्यान, येत्या काही दिवसांत विधानसभेच्या निवडणुकीची प्रक्रिया सुरू होईल. त्यापूर्वीच निवडणूक विभागाने निष्क्रियता झटकून गतिमान, पारदर्शक कामकाज करावे, अशी मागणी होत आहे.

०००

अधिकारी दुसऱ्या प्रवेशद्वारातून

२३ मे रोजी मतमोजणी झाली. त्यानंतर दुसऱ्या दिवशी कोल्हापूर लोकसभा मतदारसंघातील विधानसभा आणि केंद्रनिहाय झालेल्या मतदानसंबंधीच्या माहितीसाठी 'महाराष्ट्र टाइम्स'ने जिल्हाधिकारी दौलत देसाई यांच्याशी संपर्क साधला. त्यांनी जिल्हाधिकारी कार्यालयातील लिपिकाकडे माहिती मिळेल, असे सांगितले. मात्र, त्यांनी ज्या लिपिकाचे नाव सांगितले तो लिपिक दिवसभर कार्यालयाकडे फिरकला नसल्याचे सांगण्यात आले. त्यानंतर निवडणूक विभागातील उपजिल्हाधिकारी सतीश धुमाळ यांची भेट घेऊन माहिती घेण्याचा प्रयत्न केला. मात्र, ते माहिती देण्यासंबंधी प्रयत्न करण्याऐवजी कार्यालयातील मागच्या प्रवेशद्वारातून निघून जाणे पसंत केले.

००००

साहेब कोण ‌?

निवडणूक विभागात उपजिल्हाधिकारी प्रमुख असतात. मात्र, तेथील एक लिपिकच कारभारी बनल्याचे पाहायला मिळाले. तोच पत्रकांराना आणि सामान्य जनतेला माहिती द्यायची किंवा नाही, हे साहेबांना मार्गदर्शन करत राहिला. त्याला साहेबांचेही 'अभय' मिळाल्यामुळे तो माझं कोणी काहीही करू शकत नाही, अशा मानसिकतेत वावरताना दिसतो.

००००

जिल्हाधिकाऱ्यांनाही आला अनुभव

मतदार, उमेदवारांपर्यंत व्यापक माहिती पोहोचण्यासाठी निवडणूक आयोगाच्या आदेशानुसार निवडणूक निर्णय अधिकाऱ्यांच्या पाच आणि मतदानपूर्व माहिती देण्यासाठी एक अशा सहा पत्रकार परिषद झाल्या. यातील एकाही पत्रकार परिषदेत निवडणूक उपजिल्हाधिकारी सतीश धुमाळ यांनी पूर्ण माहितीनिशी प्रेसनोट दिली नाही. शेवटच्या पत्रकार परिषदेच्या ठिकाणी प्रेसनोट आणण्यासाठी तब्बल अर्धा तास विलंब केला. परिणामी जिल्हाधिकारी देसाई यांनाही तब्बल अर्धा तास प्रेसनोटसाठी प्रतीक्षा करावी लागली.

फोटो

बाजारभाव ... लोगो

म. टा. प्रतिनिधी, कोल्हापूर

किराणा मार्केटमध्ये रमजान महिन्याच्या पार्श्वभूमीवर खजूर, ड्रायफ्रुटस् आणि बिर्याणी तयार करण्यास लागणाऱ्या साहित्याची मागणी वाढली आहे. खजूरचा दर प्रतिकिलो १०० ते ४०० रुपये इतका आहे. दरम्यान, तूरडाळ आणि कडधान्याचे दरही वाढू लागले असून पुढील आठवड्यात तूरडाळीचा दर प्रतिकिलो १०० रुपये होण्याची शक्यता वर्तवली जात आहे.

रमजान महिन्यात उपवास सोडण्यासाठी मुस्लीमबांधव खजूर खातात. त्यामुळे बाजारात खजूरला मोठी मागणी आहे. ओली व सुकी खजूर असे दोन प्रकार असून परदेशातील महाग किंमतीच्या खजूरची ग्राहकांकडून विचारण होत आहे. रमजान ईदला दहा दिवस शिल्लक असून मुस्लीम बांधवांकडून खिरीचे साहित्य खरेदी केले जात आहे. काजू, बेदाणे, काळे मणुके, बदाम, चारोळे, अक्रोड, पिस्ता, खसखसला मागणी वाढली आहे. मशिनमेड शेवयांनाही मोठी मागणी आहे. बारीक शेवयांचा प्रतिकिलो दर १०० ते १४० रुपये आहे. बिर्याणीसाठी खास तांदळाची मागणी वाढली आहे. त्यामध्ये दावत, इंडिया गेट, कोहिनूर, श्रीराम कोलम या तांदळांच्या प्रकारांना मागणी आहे. बिर्याणी मसाल्यांचाही खप वाढला आहे.

............

किराणा मालाचे दर (प्रतिकिलो रुपयांत)

पोहे : ४४

साखर : ३६

शेंगदाणा : ९० ते ११०

मैदा : ३२

आटा : ३२ ते ३५

रवा : ३२

गूळ : ४४ ते ५०

साबुदाणा : ८४

वरी : ८० ते ८८

.........

डाळींचे दर (प्रतिकिलो रु.)

तूरडाळ : ९२ ते ९६

मूगडाळ : ८८ ते ९६

उडीद डाळ : ६८ ते ७२

हरभरा डाळ : ६४ ते ६८

मसूर डाळ : ६०

मसूर : ७० ते १२०

चवळी : ७२ ते ८०

हिरवा वाटाणा : ९६

काळा वाटाणा : ६४ ते ६८

मूग ७६ ते ८०

मटकी : ७५ ते १२०

छोले : ८० १००

..........

धान्याचे दर (प्रतिकिलो रु.)

बार्शी शाळू : ४० ते ५०

गहू : २६ ते ३४

हायब्रीड ज्वारी : २४ ते २८

बाजरी : २८ ते ३२

नाचणी : ३६ ते ४०

...........

तेलाचे दर (प्रतिकलो रु.)

शेंगतेल : १२५

सरकी तेल : ८६

खोबरेल : २४०

सूर्यफूल : ९० ते १०५

............

मसाले दर (प्रतिकलो रु.)

तीळ : १८०

जिरे : २६०

खसखस : ७०० ९००

खोबरे : १९० ते २००

वेलदोडे : ३५००

.............

खिरीच्या पदार्थासाठी लागणारे साहित्य (प्रतिकलो रु.)

खजूर : १०० ते ४००

काजू : ८०० ते ९००

बेदाणे : ३०० ते ४००

काळे मणुके : ४०० ते ६००

चारोळे : १००० ते १२००

अक्रोड : १००० ते १२००

शेवया : १०० ते १४०

केसर : २००

...............

बिर्याणी तांदूळ (प्रतिकलो रु.)

दावत : १०० ते १६०

इंडिया गेट : १२० ते २००

कोहिनूर : १२० ते २००

श्रीराम कोलम : ६० ते ६८

म. टा. प्रतिनिधी, कोल्हापूर

'एसएस गँग'चा म्होरक्या संशयित सूरज साखरे याच्या टोळीतील पसार असलेला संशयित अभी ऊर्फ युवराज मोहन महाडिक याच्या शोधासाठी पोलिसांची चार पथके रविवारी रवाना झाली. त्याचा पुणे, मुंबई, सोलापूर आणि बेळगाव येथे शोध सुरू केला आहे. या दोघांची बँक खाती गोठविण्याचे पत्र पोलिसांनी शहरातील चार बँकांना पाठविली आहेत.

पोलिसांनी संशयित साखरेच्या 'एसएस गँगवर मोक्का अंतर्गत कारवाई झाली आहे. सावकारीतून दिलेले कर्ज व व्याजाची वसुली करण्यासाठी सूरज साखरे याच्या मदतीने महाडिक आणि त्याच्या साथीदारांनी अणदूर (ता. गगनबावडा) येथील एका शेतकऱ्याचे अपहरण करून त्याच्याकडे २५ लाखांची खंडणी मागितली. त्यासह एका मटण व्यावसायिकांकडे ७० हजाराच्या कर्जासाठी १० लाखांची खंडणी मागितली. याप्रकरणी या टोळीवर जुना राजवाडा पोलिसांत गुन्हा दाखल झाला. संशयित साखरे याला अटक झाली असून महाडिक याच्यासह अन्य साथीदार पसार झाले आहेत. त्याच्या शोधासाठी पथके रवाना झाली आहेत. देवकर पाणंद येथील कश्यप हाईट अपार्टमेंट आणि मंगळवार पेठेतील घरावर आर्थिक गुन्हे शाखेने शनिवारी छापा टाकला. त्यातून संशयितांनी बेकायदेशीर सावकारी करून बेहिशेबी मालमत्तेच्या खरेदी दस्ताच्या फायली, बँक पासबुके जप्त केली. त्यांनी बेहिशेबी मिळविलेल्या पैशातून मालमत्ता खरेदी केल्याची चौकशी सुरू केली आहे. या प्रकरणाचा तपास आर्थिक गुन्हे अन्वेषणचे पोलिस उपअधीक्षक आर. बी. शेडे तपास करीत आहेत.

फोटो आहे

म. टा. प्रतिनिधी, कोल्हापूर

पावसाळ्याच्या पार्श्वभूमीवर महापालिकेच्यावतीने स्वच्छता मोहीम हाती घेतली आहे. मे महिन्याच्या शेवटच्या रविवारी राबविण्यात आलेल्या महास्वच्छता मोहिमेला श्रमदानाची जोड मिळाली. शहरवासियांनी अभूतपूर्व दिलेल्या प्रतिसादामुळे नाल्यातील सात डंपर प्लास्टिक कचरा व गाळ काढून टाकण्यात आला. विविध नाले आणि रंकाळा आणि पदपथ उद्यानांमध्येही स्वच्छता मोहीम राबवली.

मे महिन्याच्या पहिल्या रविवारपासून राबविलेल्या स्वच्छता मोहिमेला शहरवासीयांनी चांगला प्रतिसाद दिला. यातूनच शंभर डंपर गाळ व कचरा नाला पात्रातून काढण्यात आला. रविवारची महास्वच्छता मोहीम सिद्धार्थ नगर, जयंती नाला पंपिंग हाउस ते गाडी अड्डा, रिलायन्स मॉल ते ओढ्यावरील गणपती, बुद्धगार्डन ते अॅस्टर आधार हॉस्पिटल आणि रंकाळा पदपथ उद्यान व संध्यामठ परिसरात श्रमदानातून स्वच्छता केली. या सर्वठिकाणी जेसीबी व पोकलॅन मशिनच्या मदतीने पात्रातील गाळ व कचरा काढून टाकण्यात आला. केवळ कचरा उठाव न करता आवश्यक ठिकाणी पात्राची खोली व रुंदी वाढविण्यात आली. गेल्या तीन रविवारी जयंती नाल्यातील गाळ व कचरा नाल्याच्या काठावर टाकला होता. रविवारी तो कसबा बावडा येथील सरवळीत टाकण्यात आला.

महापौर सरिता मोरे व आयुक्त डॉ. कलशेट्टी यांच्यासह उपस्थितांनी परिसर स्वच्छतेची शपथ घेतली. यावेळी प्रथामिक शिक्षण समिती सभापती अशोक जाधव, नगरसेवक सचिन पाटील, शेखर कुसाळे, अतिरिक्त आयुक्त श्रीधर पाटणकर, आरोग्याधिकारी डॉ. दिलीप पाटील, आदींसह गार्डन, ड्रेनेज, घरफाळा, विभागीय कार्यालयाकडील कर्मचारी, आरोग्य विभागाकडील ३०० कर्मचाऱ्यांनी स्वच्छता मोहिमेत सहभाग घेतला. मोहिमेदरम्यान आमदार अमल महाडिक यांनी भेट देऊन आयुक्त कलशेट्टी यांच्याशी चर्चा केली.

००००

स्वच्छता मोहिमेत सहभागी संस्था

क्रिडाई

स्वरा फाउंडेशन

जिल्हा बार असोसिएशन

असोसिएशन ऑफ आर्किटेक्ट इंजिनीअरिंग

वृक्षप्रेमी ग्रु्प

टोलविरोधी कृती समिती

केएमटी कर्मचारी

०००

केएमटी सेवेवर परिणाम

स्वच्छता मोहिमेत केएमटीचे ५० चालक व वाहक सहभागी झाले. परिणामी सकाळी सुमारे २५ ते ३० केएमटी बसेस मार्गस्थ होऊ शकल्या नाहीत. त्यामुळे प्रवाशांना बसची प्रतीक्षा करावी लागली. मात्र, दुपारनंतर सेवा सुरळीत झाली. पण अशी स्थिती पुन्हा उद्भवू नये, यासाठी पुढील रविवारी संध्यामठ येथे राबविण्यात येणाऱ्या स्वच्छता मोहिमेत वर्कशॉपमधील कर्मचारी पाठविण्याचा निर्णय केएमटी व्यवस्थापनाने घेतला.

कोल्हापूर: महापालिकेच्या पद्माराजे उद्यान प्रभागामध्ये होणाऱ्या पोटनिवडणुकीमध्ये शेतकरी कामगार पक्षाचा उमेदवार उभा करण्याचा निर्णय शनिवारी पक्षाच्या शहर कार्यकारणीच्या बैठकीत घेण्यात आला. प्रभागातून स्वप्नील पाटोळे यांच्या नावावर शिक्कामोर्तब करण्यात आले. अध्यक्षस्थानी शहर चिटणीस बाबुराव कदम होते. महापालिकेच्या पंचवार्षिक निवडणुकीमध्ये पाटोळे यांनी निवडणूक लढवली होती. त्यानंतर त्यांनी शहरात विविध सामाजिक उपक्रम राबवत पक्षाची बांधणी करत आहे. त्यांच्या कार्याची दखल घेऊन या प्रभागातून पुन्हा उमेदवारी देण्याचा निर्णय बैठकीत घेतला. यावेळी सहचिटणीस संभाजीराव जगदाळे, कुमार जाधव, मधुकर हरेल, राजेंद्र कोतमिरे, सुभाष सावंत, शिवाजी पाटील, नामदेव निपाणीकर, मोहन पाटील, सुशांत बोरगे, राजश्री सावंत, वैशाली खाडे, अॅड. उज्ज्वला कदम उपस्थित होते.

आराम बस पलटी

झाल्याने ३० जखमी

पंढरपूर

साखरपुड्यासाठी पंढरपूरवरून अहमदनगरकडे निघालेली खासगी प्रवासी बस गुरसाळे जवळ पलटी झाल्याने ३० जण जखमी झाल्याची घटना रविवारी घडली. पंढरपूर टेंभूर्णी रस्त्याचे काम सुरू असताना समोरून येणाऱ्या वाहनाला धोकादायक पद्धतीने ओलांडून जाताना बस रस्त्याच्या कडेला असलेल्या शेतात घसरून पलटी झाली. बस पलटी होऊन विजेच्या खांबाला अडकल्याने थांबली. मात्र, जर विजेची तार तुटली असती तर फार मोठी दुर्घटना घडली असती. या घटनेनंतर तातडीने जखमींना गाडीतून बाहेर काढून पंढरपूरमधील उपजिल्हा रुग्णालयात हलविण्यात आले आहे. दरम्यान, या घटनेनंतर चालक पळून गेला आहे. चालकावर गुन्हा दाखल करायचे काम सुरू आहे.