म. टा. प्रतिनिधी, कोल्हापूर प्राथमिक शिक्षक बदलीची प्रक्रिया यंदाही सुगम, दुर्गम पद्धतीने ऑनलाइन प्रक्रियेद्वारेच होणार आहे. बदलीपात्र शिक्षकांची यादी तयार करण्याचे काम अंतिम टप्यात आहे. बदलीसाठी २१ मेपर्यंत अर्ज करण्याचे आवाहन शिक्षण प्रशासनाने केले आहेत. अर्ज केलेले शिक्षक आणि बदली पात्र शिक्षकांची यादी पुढील आठवड्यात प्रसिध्द होणार आहे. यादीवर हरकती घेऊन अंतिम यादी तयार करण्यात येणार आहे. बदलीसाठी ऑनलाइन अर्ज भरण्यासाठी २३ मेनंतर पोर्टल सुरू होणार आहे. गेल्यावर्षापासून सूगम, दुर्गम निकषानुसार ऑनलाइन बदल्यांची प्रक्रिया राबवली जात आहे. त्यानुसार दहा वर्ष सुगम ठिकाणच्या शाळेत काम केलेल्या शिक्षकास दुर्गम तर सलग तीन वर्षे दुर्गम ठिकाणी कार्यरत असलेल्या शिक्षकाची बदली सुगम ठिकाणच्या शाळेत होणार आहे. या प्रक्रियेस शिक्षक संघटनांनी विरोध केला असला तरीही यंदा ऑनलाइनच प्रक्रिया राबवण्यात येणार आहे. गावाजवळ, सुगम भागातील बदलीपात्र शिक्षकांना दुर्गम भागातील शाळेत जावे लागणार आहेत. हे टाळण्यासाठी बहुतांशी शिक्षक संघटना, पदाधिकाऱ्यांच्या माध्यमातून मोर्चेबांधणी करत आहेत. दुसऱ्या बाजूला प्रशासन बदलीपूर्व तयारी करत आहे. नियुक्त तारखेनुसार झालेली सेवा, दुर्गम, सुगम शाळेतील शिक्षकांची माहिती संकलित केली जात आहे. शिक्षकांकडूनही बदलीसाठी अर्ज घेतले जात आहेत. त्यानंतर प्रशासन यादी प्रसिद्ध करणार आहे. शाळा सुरू होण्यापूर्वी बदलीची प्रक्रिया पूर्ण होण्यासाठी प्रशासनाने मार्च महिन्यात तयारी केली होती. मात्र लोकसभा निवडणूक आचारसंहितेमुळे त्यास ब्रेक लागला. २३ मे रोजी निकाल लागल्यानंतर पुन्हा प्रक्रिया गतिमान होणार आहे. बदलीपात्र शिक्षकांना सरकारच्या पोर्टलवर अचूक अर्ज भरावे लागणार आहे. २००२ एकूण प्राथमिक शाळा ५ हजार ७६२ शिक्षक ४३८ मुख्याध्यापक १५७२ पदवीधर शिक्षक चौकट रिक्त जागांची समस्या कायम अध्यापकाच्या ४२५, मुख्याध्यापक ८०, पदवीधर २३१ जागा रिक्त आहेत. इतक्या मोठ्या संख्येने जागा रिक्त असल्याने विद्यार्थ्यांचे शैक्षणिक नुकसान होत आहे. सरकारकडून नवीन शिक्षक भरती नसल्याने जिल्हा शिक्षण प्रशासनासमोर शिक्षक कुठून द्यायचा असा प्रश्न निर्माण झाला आहे.
मोबाइल अॅप डाउनलोड करा आणि राहा अपडेट