म. टा. प्रतिनिधी, कोल्हापूर

आंबा बाजारात देवगड, रत्नागिरी हापूसची धूम सुरू असताना शेती उत्पन्न बाजार समितीत लाल रंगाचा आंबा आणि सफरचंदासारखी चव असलेला वॉशिंग्टन आंबा बाजारात दाखल झाला आहे. एक हजार रुपये डझन असा त्याचा दर आहे.

देवगड, रत्नागिरी, मद्रास हापूसबरोबर मार्केट यार्डमधील आंबा दलालांकडे गुजरातचा केशर, मद्रास हापूस, पायरी, रत्ना, बिटकी, माणपुरा, लाल बाग या आंब्यांची आवक झाली आहे. सफरचंदासारख्या लाल रंगाच्या वॉशिंग्टन आंब्याची मुंबईतील वाशी बाजारात आवक झाली आहे. कोल्हापुरातील ग्राहकांच्या मागणीनुसार येथील व्यापारी नंदकुमार वळंजू, प्रसाद वळंजू यांनी वॉशिंग्टन आंब्याच्या वाशीहून दहा पेट्या मागविण्यात आल्या आहेत. लाल रंगाच्या गोल सफरंचदासारख्या दिसणाऱ्या या आंब्याचा गर पिवळा असून, त्याला ग्राहकांकडून चांगला प्रतिसाद मिळत आहे. आंबा सुरुवातीला पिवळा असतो. जसजसा पिकत जातो तसा सफरचंदासारखा लाल होतो.

एका बॉक्समध्ये सहा आंबे असून, चारशे ते साडेचारशे ग्रॅम वजनाचा आंबा आहे. सफरचंद आणि आंबा अशी एकत्रित चव वॉशिंग्टन आंब्यात अनुभवायला मिळते. या संदर्भात व्यापारी वळंजू म्हणाले, 'ग्राहकांकडून हापूसबरोबर अन्य जातीच्या आंब्याची मागणी होते. आमच्याकडे हापूसबरोबर पायरी केशर, रत्ना, बिटकी, माणपुरा जातीचे आंबे आहेत. ग्राहकांना देशी आंब्यांबरोबर परदेशातील आंब्यांची चवही कळावी यासाठी मुंबईहून वॉशिंग्टन आंब्याची मागणी केली आहे.'

म. टा. प्रतिनिधी, कोल्हापूर

तंजावर (तमिळनाडू) येथील तमिळ विद्यापीठ आणि सरस्वती महाल ग्रंथालय यांच्यासमवेत तंजावर पेपर्स आणि तंजावरी मराठी भाषा अभ्यासासंदर्भात सामंजस्य करार करण्याबाबत तमिळ विद्यापीठाचे कुलगुरू डॉ. सी. बालसुब्रम्हण्यम् यांच्याशी शिवाजी विद्यापीठाचे कुलगुरू डॉ. देवानंद शिंदे यांची यशस्वी चर्चा झाली. कुलगुरू डॉ. शिंदे यांनी या संदर्भात नुकतीच विद्यापीठाच्या अभ्यासकांसमवेत तंजावरला भेट दिली.

तंजावर येथील तमिळ विद्यापीठाने मराठा इतिहास आणि मराठी भाषेसंदर्भातील चाळीस हजारहून अधिक कागदपत्रे जतन करून ठेवलेली आहेत. हे विद्यापीठ भाषेला केंद्रस्थानी ठेवून स्थापन करण्यात आले असून या विद्यापीठाकडून मोडी कागदपत्रांचे भाषांतर कार्यही मोठ्या प्रमाणात झाले आहे. त्यामुळे या विद्यापीठाशी तंजावर पेपर्स आणि तंजावरी मराठी भाषा अभ्यासासंदर्भात सामंजस्य करार शिवाजी विद्यापीठाच्या विचाराधीन होता. त्याचबरोबर सरस्वती महल ग्रंथालयात मोडी कागदपत्रांसह हजारो मराठी ग्रंथांचे जतन केलेले असल्याने संशोधकांना अभ्यासासाठी ते सहज उपलब्ध व्हावे यासाठी ग्रंथालयाबरोबरही सामंजस्य करार करण्यात येणार आहे. त्या दृष्टीने तंजावर येथील सरस्वती महाल ग्रंथालयामध्ये बैठक झाली. बैठकीमध्ये तंजावरला मराठी अध्यासन आणि शिवाजी विद्यापीठात तमिळ अध्यासन स्थापन करण्यासंदर्भात विस्तृत चर्चा झाली.

शिवाजी विद्यापीठ नवे म्युझिअम साकारत असून या म्युझिअममध्ये तंजावर येथील मराठ्यांच्या इतिहासाशी संबंधित दालन उभारण्यासंदर्भातही सकारात्मक चर्चा यावेळी झाली. शिवाय, सरस्वती महल ग्रंथालयातील उपलब्ध अभ्यास साधनांसंदर्भात तंजावरचे जिल्हाधिकारी ए. अण्णादुराई यांच्यासमवेतही स्वतंत्र बैठक झाली. दोन्ही बैठका तंजावरचे राजे शिवाजीराजे भोसले यांच्या अध्यक्षतेखाली झाल्या. बैठकांना तमिळ विद्यापीठाचे कुलगुरू डॉ. सी. बालसुब्रम्हण्यम्, कुलसचिव मुथ्थूकुमार यांच्यासह तमिळ विद्यापीठातील डॉ. विवेकानंद गोपाळ, डॉ. जयकुमार, डॉ. कविता, डॉ. शीला, डॉ. नीलकंठ हे भारतीय भाषा आणि सामाजिक शास्त्रांचे प्राध्यापक उपस्थित होते; तर, शिवाजी विद्यापीठाच्या वतीने कुलगुरू डॉ. देवानंद शिंदे, समिती सदस्य डॉ. अवनिश पाटील, डॉ. नंदकुमार मोरे, डॉ. निलांबरी जगताप आणि गणेश नेर्लेकर-देसाई उपस्थित होते.

..........

मराठ्यांच्या इतिहासात तंजावरचे महत्व

तमिळनाडूतील तंजावर येथे साडेतीनशे वर्षांपूर्वी इ.स. १६७६ ला मराठ्यांनी आपले राज्य स्थापन केले. शहाजीराजेंचे पुत्र आणि छत्रपती शिवाजी महाराजांचे बंधू व्यंकोजी यांनी हे राज्य स्थापन केले. तेंव्हापासून ब्रिटीशांनी १८५५ ला संस्थान खालसा करेपर्यंत तेथे मराठा अंमल होता. या जवळजवळ दोनशे वर्षांमध्ये अकरा राजांनी राज्यकारभार केला. त्यांच्या कारकिर्दीत तेथे मराठी संस्कृती रुजली. मराठ्यांच्या इतिहासात तंजावरचे राज्य हा एक महत्त्वाचा भाग असून तंजावरच्या अभ्यासाशिवाय मराठ्यांचा इतिहास पूर्ण होत नाही. त्यामुळे तंजावर राजघराण्याचे हजारो पेपर्स, इतर ऐतिहासिक कागदपत्रे, वस्तू, शिल्पे, चित्र, शिलालेख, ग्रंथ अभ्यासणे हे मराठा इतिहासाच्या अभ्यासात महत्त्वाचे आहे.

कोल्हापूर टाइम्स टीम

पंचगंगा नदीवर बांधलेल्या पर्यायी पुलाच्या कामास पुरातत्त्व विभागाने ना हरकत दाखला (एनओसी) आणि परवानगी देताना ब्रह्मपुरी टेकडीच्या परिसरातील जागा ताब्यात देण्याची हमी जिल्हाधिकाऱ्यांकडून घेतली. मात्र प्रत्यक्षात टेकडीच्या परिसरात मोठ्या प्रमाणात अतिक्रमण झाले आहे. येथे पाचशेहून अधिक नागरिकांनी घरे बांधली आहेत. याशिवाय महापालिकेने बाग म्हणून विकसित केलेले पिकनिक पॉईंट आणि श्री गजेंद्रलक्ष्मी देवीचे मंदीरही अतिक्रमित असल्याचा दावा 'पुरातत्त्व' खात्याचा आहे. परिणामी ब्रह्मपुरी टेकडी वादात सापडली आहे. टेकडीवरील अतिक्रमणे काढून ही जमीन पुरातत्त्व विभागाच्या ताब्यात देणे हे जिल्हा महसूल प्रशासन आणि स्थानिक महानगरपालिकेच्या प्रशासनासमोरचे मोठे आव्हान ठरणार आहे.

ब्रह्मपुरी टेकडी प्राचीन आहे. टेकडीचा हा भाग पुरातत्त्व विभागाच्या अखत्यारित आहे. मात्र, टेकडीचे संवर्धन करण्यात पुरातत्त्व विभागाला अपयश आले. शहरालगत असल्याने आणि रिकामी जागा मिळाल्याने नागरिकांनी अतिक्रमणे करून घरे बांधली. त्याला महानगरपालिकेच्या तत्कालीन पदाधिकारी, अधिकाऱ्यांचे अभय मिळाले. नगरसेवक, आमदारांनी येथे पाणी, रस्ते, वीज अशा सुविधाही दिल्या. पुरातत्त्व खात्याच्या ताब्यातील या जागेची परस्पर विक्री करून काही लोकांनी पैसेही मिळवले. त्यामुळे टेकडी परिसराला दिवसेंदिवस अतिक्रमणाचा विळखा वाढत गेला.

शिवाजी पुलाली पर्यायी पूल बांधताना पुरातत्त्व विभागाने या कामाला आक्षेप घेतला. नंतर ब्रह्मपुरी टेकडी परिसरातील बांधकामे झाली, त्यावेळी पुरातत्त्व विभागाचे प्रशासन का गप्प राहिले का? असे प्रश्न उपस्थित होत आहेत.

सन १९४५ - ४६ मध्ये पुण्याच्या डेक्कन कॉलेजच्या तज्ज्ञांनी व विद्यार्थ्यांनी ब्रह्मपुरी टेकडीवर उत्खनन केले. त्यावेळी तेथे पुरातन गोष्टींचे भांडारच आढळले. त्यानंतर ब्रह्मपुरी टेकडी आणि त्या भागातील १०० मीटर परिसरात उत्खनन करण्यास आणि बांधकामास पुरातत्त्व कायद्याने निर्बंध घातले गेले. या कायद्यानुसार टेकडीजवळील १४८१ स्क्वेअर मीटरवरील पिकनिक पाँईट आणि २५७.५० स्क्वेअर मीटरवरील श्री गजेंद्रलक्ष्मी मंदिराचे बांधकामही अतिक्रमण ठरले आहे.

पिकनीक पाँइट या जागेवर महानगरपालिका प्रशासनाचे अतिक्रमण केले आहे. पिकनीक पॉईंटसह मंदिराचे अतिक्रमण काढणे हा भाग संवेदशील बनणार आहे. नागरिकांनी बांधलेल्या घरांचे अतिक्रमण काढतानाही त्यांच्या पुनर्वसनाचा प्रश्न निर्माण होणार आहे. पुरातत्त्व खात्याने उत्खनन केलेली १८९६.२० स्क्वेअर मीटरच्या खासगी जमिनीचीही मागणी केली आहे. या जागेची किंमत कोट्यवधी रुपये आहे. मग संबंधितांना इतकी रक्कम कोणी द्यायचा? हा मुद्दाही ऐरणीवर येणार आहे. पुरातत्त्व खात्याच्या प्रशासनाने इतके पैसे देण्यास यापूर्वीच नकार दिला आहे. संबंधितांना महसूल प्रशासनास पैसे द्यायचे झाल्यास सरकारी पातळीवर प्रस्ताव पाठवून निधीची तरतूद करून घ्यावी लागणार आहे.

तीन कर्मचारी तैनात

ब्रम्हपुरी टेकडीच्या परिसरात यापुढील काळात अतिक्रमण होऊ नये, रिकामी जागा कायम रहावी यासाठी येथे कायमस्वरूपी पुरातत्त्व विभागाचे तीन कर्मचारी तैनात करणार आहे. पन्हाळा येथील त्यांच्या कार्यालयातील कर्मचाऱ्यांची टेकडीवर नियुक्ती करण्यात येईल, असे विभागाच्या सूत्रांनी 'महाराष्ट्र टाइम्स'शी बोलताना सांगितले.

नोटिसीमुळे एनओसीला गती

राष्ट्रीय महामार्ग विभागाने पर्यायी पुलाच्या बांधकामास परवानगी आणि एनओसी देण्याचा प्रस्ताव एक वर्षापूर्वी मुंबईतील पुरातत्त्व विभागाकडे पाठविला. त्यावर एका महिन्यात निर्णय अपेक्षित होता. मात्र तो निर्णय झाला नाही. महामार्ग विभागानेही परवानगीसाठी ठोस पाठपुरावा केला नाही. प्रस्ताव पाठवला की परवाना मिळाला असे गृहीत धरून काम सुरू केले. जनरेटा वाढल्याने त्यांना काम करावे लागले. पुलाचे काम अंतिम टप्यात आल्यानंतर पुरातत्त्व खात्याने नोटीस दिली. त्यानंतर एनओसी, परवान्यांसाठी पाठपुरावा झाल्याने निर्णय झाला.

पुरातत्त्व खात्याने ब्रह्मपुरी टेकडीपासून शंभर मीटर अंतरावरील जमीन खुली करून मागितली आहे. त्यावरील अतिक्रमणे काढून द्यावीत, असे महसूल प्रशासनास सूचित केले आहे. जागा ताब्यात आल्यानंतर त्यावर काय करायचे यासंबंधी वरिष्ठ निर्णय घेतील.

- विजय चव्हाण, संरक्षक, सहायक

पुरातत्व विभागाने मागितलेल्या जागेचा प्रस्ताव तयार करून सरकारकडे पाठवला जाईल. सरकारकडून निर्णय घेतल्यानंतर पुढील कार्यवाही केली जाईल. टेकडीजवळील खासगी जमिनीची भरपाई देण्यासंबंधी सरकारी पातळीवरून आदेश आल्यानंतर पुढील अंमलबजावणी केली जाईल.

- सचीन इथापे, प्रांताधिकारी, करवीर

म. टा. प्रतिनिधी, कोल्हापूर

सामाजिक, शैक्षणिक, कला, क्रीडा क्षेत्रात उल्लेखनीय काम करणाऱ्या डॉ. तारा भवाळकर, रेणुताई गावस्कर, अभिनेत्री वर्षा उसगावकर, अॅड. समृद्धी पोरे, शिवछत्रपती पुरस्कार विजेती धावपटू मनीषा साळुंखे यांना यंदाचा भगिनी पुरस्कार जाहीर करण्यात आला. रोख ११ हजार रुपये, मानचित्र, भगवा फेटा, शाल, श्रीफळ असे पुरस्काराचे स्वरूप आहे. पालकमंत्री चंद्रकांत पाटील, महापौर सरिता मोरे यांच्या प्रमुख उपस्थितीत रविवारी सायंकाळी साडेपाच वाजता प्रायव्हेट हायस्कूलच्या मैदानावरील सभामंडपात कार्यक्रम होणार आहे.

भगिनी मंचच्या वैशाली क्षीरसागर यांनी पुरस्काराची माहिती पत्रकार परिषदेत दिली. शुक्रवारी (ता. १०) भगिनी महोत्सवास प्रारंभ होणार असून, त्यामध्ये महिला व युवतींसाठी विविध स्पर्धांचे आयोजन करण्यात आले आहे. तसेच सायंकाळच्या सत्रात सांस्कृतिक कार्यक्रम होणार असून त्यामध्ये मराठी कलाकार कला सादर करणार आहेत.

प्रख्यात लेखिका डॉ. तारा भवाळकर यांना पुरस्कार देण्यात येणार आहे. 'मराठी पौराणिक नाटकाची जडणघडण' या विषयावर त्यांनी पीएचडी केली असून, त्यांनी ३५ हून अधिक ग्रंथ लिहिले आहेत. लोकसंस्कृती, साहित्य, लेखन, दिग्दर्शन, समीक्षा, संशोधन यावर कार्य करणाऱ्या भवाळकर यांना अभिनयासाठी राज्यनाट्य स्पर्धेत ३० हून अधिक पुरस्कार मिळाले आहेत. ३५ वर्षे सामाजिक कार्यात कार्यरत राहणाऱ्या ज्येष्ठ सामाजिक कार्यकर्त्या रेणुताई गावस्कर यांना पुरस्कार देण्यात येणार आहे. एकलव्य बाल शिक्षण व आरोग्य न्यास संघटनेमार्फत समाजातील वंचित मुलांच्या सर्वांगीण विकासासाठी त्या प्रयत्नशील आहेत. त्या उत्तम लेखिका असून, त्यांनी पाश्चात्य वाङ्मयावर लेखमाला व पुस्तके लिहिली आहेत.

अभिनेत्री वर्षा उसगावकर यांनी ६८ मराठी आणि ४५ हिंदी चित्रपटांत काम केले आहे. मराठी चित्रपटातील लोकप्रिय अभिनेत्री आहेत. अॅड. समृद्धी पोरे गेली अनेक वर्षे मुंबई हायकोर्टात क्रिमिनल आणि फॅमिली कोर्टात काम करत आहेत. मराठी चित्रपटात ठसा उमटवताना त्यांनी 'मला आई व्हायचंय', 'डॉ. प्रकाश आमटे' या चित्रपटांचे दिग्दर्शन केले आहे. शिवछत्रपती पुरस्कार विजेत्या आंतरराष्ट्रीय धावपटू मनीषा साळुंखे यांनी राज्य व राष्ट्रीय स्पर्धेत ७० हून अधिक पदके पटकावली आहेत. पुणे, मुंबई, बेंगळुरू, दिल्ली, कोलकाता, भोपाळ मॅरेथॉन स्पर्धेत त्यांनी ठसा उमटवला आहे.

पत्रकार परिषदेला आमदार राजेश क्षीरसागर, शहरप्रमुख रविकिरण इंगवले, महिला शहरप्रमुख पूजा भोर यांच्यासह भगिनी मंचच्या पदाधिकारी उपस्थित होत्या.

Bhimgonda.Desai@timesgroup.com

Tweet : @bhimgondaMT

कोल्हापूर : वन्यप्राण्यांचा बंदोबस्त, बचाव, नियंत्रणासाठी येथील वनविभागाकडे अत्याधुनिक तीन अॅनिमल रेस्क्यू व्हॅन (वाहन) दाखल झाल्या आहेत. सुसज्ज आणि आवश्यक सुविधांसाठीची त्या वाहनांची अंतर्गत रचना येथील एका खासगी कंपनीत केली जात आहे. ते काम पूर्ण झाल्यानंतर लवकरच वाहने वन प्रशासनात कार्यरत होणार आहेत. त्यामध्ये हत्ती वगळता इतर प्राणी पकडणे, नियंत्रण ठेवण्यासाठीच्या साहित्यासह आठ कर्मचारी बसण्याची व्यवस्था असेल.

जिल्ह्यात अलीकडे हत्ती, गवे, डुकरे, माकड, मोर यांचा वावर मानवी वस्तीजवळ वाढला आहे. दोन महिन्यांपूर्वी शहराच्या वेशीलगत कसबा बावडा परिसरात एका गव्याने ठाण मांडले होते. अशा प्राण्यांच्या उपद्रवामुळे करवीर, शाहूवाडी, राधानगरी, गगनबावडा, आजरा, चंदगड तालुक्यांतील संबंधित शेतकरी हैराण झाले आहेत. याउलट वन प्रशासनाकडे प्राण्यांवर नियंत्रण ठेवण्यासाठीची यंत्रणा अपुरी आहे. पुरेशी वाहने नाहीत. उपलब्ध वाहनांत वन्य प्राण्यांच्या बंदोबस्तासाठीचे साहित्य ठेवता येत नाही. रात्रीच्यावेळी प्राण्यांवर वॉच ठेवता येत नाही. त्यामुळे येथील वन प्रशासनाने सरकारकडे अॅनिमल रेस्क्यू व्हॅनची मागणी केली.

सरकारने प्रत्येक वाहनास १४ लाखांप्रमाणे निधी मंजूर केला. वाहनांची खरेदी करण्यात आली आहे. मात्र, येथील भौगोलिक परिस्थिती, प्राणीनिहाय नियंत्रण, बंदोबस्तासाठीचे साहित्य ठेवण्याची जागा, कर्मचाऱ्यांसाठीची बैठक व्यवस्था, रात्रीच्यावेळी लांब अंतरावरील प्राणी दिसण्यासाठीची प्रखर लाईटची सुविधा, लहान प्राणी पकडण्यासाठी जाळी, पिंजरा ठेवण्यासाठीच्या आवश्यक वाहनांची रचना तयार केली जात आहे. अशी तीन वाहने कोल्हापूर विभागासाठी तैनात असतील. सांगली जिल्ह्यासाठी एक आणि आजरा, चंदगड, पाटणे तर करवीर, पन्हाळा, गगनबावडा या तालुक्यांसाठी प्रत्येकी एक वाहन कार्यरत असेल. वन्य प्राण्यासंबंधी शेतकऱ्यांकडून माहिती मिळताच त्या ठिकाणी वाहन सर्व यंत्रणेसह शक्य तितक्या लवकर दाखल होईल. वाहनातील साहित्याद्वारे प्राण्यांवर नियंत्रण ठेवण्याचे नियोजन केले आहे.

०००००

चौकट

हत्ती हुसकावण्यासाठी

हत्ती सहजपणे पकडणे अशक्य आहे. त्यामुळे नव्या वाहनात त्यांना हुसकावण्यासाठी मिरची पूड, ढोल, ताशा, मोठ्या आवाजाचे फटाके, रात्रीच्यावेळी उपयोगी पडतील असे टॉर्च असे साहित्य असेल. यामुळे हत्ती असलेल्या परिसरात स्थानिकांच्या मदतीविना मोहीम राबविणे शक्य होणार आहे. जिल्ह्यात पहिल्यांदाच अशी वाहने जंगल, वनहद्दीत धावणार आहेत.

००००

एका हत्तीचा वावर

पावसाळ्यानंतर जिल्ह्यात सात हत्तींच्या कळपाचा संचार होता. उष्णता वाढल्यानंतर सध्या सहापैकी दोडामार्ग, कोकणात तर काही हत्ती कर्नाटक गेले आहेत. सध्या एकाच हत्तीचा वावर चंदगड तालुक्यातील पाटणे, तिलारी, गवसे (ता. आजरा) परिसरात असल्याचे वनप्रशासनाकडून सांगण्यात आले. त्याच्याकडून उसासह उन्हाळी पिकांचे मोठे नुकसान होत आहे.

००००

म. टा. प्रतिनिधी, कोल्हापूर

दिवसभराच्या कडक उपवासानंतर रोजा सोडल्यानंतर खाद्य पदार्थांबरोबरच फळांना पसंती दिली जात आहे. पहाटे साडेचारपूर्वी मुस्लीम बांधव आहार घेतात. त्यानंतर दिवसभर कडक रोजा पाळला जातो. आहार व पाणी न पिता दिवसभर काम, व्यवसाय सांभाळून उपवास केला जातो. तसेच दिवसभर पाच वेळा नमाज पठणास उपस्थिती लावतात. महिनाभर कुराणचे पठण करण्यात येते. शहरातील सर्व मशिदींमध्ये नमाज पठणासाठी सुविधा उपलब्ध करुन दिल्या आहेत. बिंदू चौकातील बडी मशिदीजवळ पत्राचे शेड बांधण्यात आले आहे. सूर्यास्तावेळी साखर पाणी, खजूर खाऊन रोजा सोडला जातो. त्यानंतर आहार घेतला जातो.

कसाब मशिदीजवळ खाद्य पदार्थाचे स्टॉलही मांडण्यात आले आहेत. शाकाहारी व मासांहारी पदार्थांची मोठ्या प्रमाणावर विक्री होत आहे. उन्हामुळे कलिंगड, अननस, पपईबरोबर हापूस आंब्याचाही आहारात समावेश केला जात आहे. रात्री उशिरापर्यंत कसबा मशिदीजवळ मुस्लीम बांधवांची गर्दी असते.

....

फोटो कॅप्शन: मुस्लीम बांधवांकडून मिक्स फळांच्या डिशला पसंती दिली जात आहे.

म. टा. प्रतिनिधी, कोल्हापूर

साऊंड सिस्टीम आहे पण ऑपरेटर नाही, मेकअपरुम आहे पण संपूर्ण पेहराव दिसेल असे पूर्ण आकारातील आरसे नाहीत, एसी बंद पडल्यास थिएटरमध्ये पंख्यांची सुविधा नाही. थिएटर उत्तम, पण उणिवा भरपूर अशी स्थिती संगीतसूर्य केशवराव भोसले नाट्यगृहाची बनली आहे, अशा शब्दांत रंगकर्मी, हौशी नाट्य संस्था प्रतिनिधींनी व नाट्यपरिषदेच्या पदाधिकाऱ्यांनी आयुक्त मल्लिनाथ कलशेट्टी यांच्यासमोर पाढा वाचला.

आयुक्तांनी, 'थिएटरच्या सुविधेशी निगडीत काही कामे जलदगतीने करु, मात्र काही कामे धोरणात्मक निर्णयाशी निगडीत आहेत. कोल्हापूरचे वैभव असणाऱ्या या नाट्यगृहात आवश्यक सुविधा उपलब्ध करु. चांगले रिझल्ट देऊ, 'अशी ग्वाही उपस्थितांना दिली. केशवराव भोसले नाट्यगृहातील असुविधेवरुन गुरुवारी सायंकाळी नाट्यगृहाच्या कलादालनात बैठक झाली. ज्येष्ठ पत्रकार उदय कुलकर्णी यांनी बैठकीचा उद्देश विशद केल्यानंतर रंगकर्मी व आयुक्तांमध्ये थेट संवादाला सुरुवात झाली.

केशवराव भोसले यांचे नातू मोहन शिंदे यांनी थिएटर परिसरात केशवराव भोसले यांचा पुतळा व त्यांच्या नावांनी स्मृतिदालनाची उभारणी करावी, अशी सूचना केली. नाट्यलेखक सुनील माने, अभिनेता संजय मोहिते, मनोहर कुईंगडे, संतोष शिंदे, प्रसाद जमदग्नी, सीमा जोशी, अवधूत जोशी, पंडित कंदले यांनी नाट्यगृहातील गैरसोयी, तांत्रिक सुविधांची वानवा याविषयी पोटतिडकीने भावना मांडल्या. साऊंड ऑपरेटरची नियुक्ती, थिएटर भाड्यात सवलत, बैठक व्यवस्थेत सुधारणा या अनुषंगाने मुद्दे मांडले. नाट्य परिषदेचे अध्यक्ष आनंद कुलकर्णी यांनी थिएटरमध्ये आवश्यक सुविधांचे लेखी निवेदन दिले. प्रा. शशिकांत चौधरी यांनी नाट्य परिषदेच्या कार्यालयासाठी जागेची मागणी केली. मिलिंद अष्टेकर यांनी थिएटरमध्ये स्वीपर नाहीत, नियमित स्वच्छतेसाठी स्वीपरची कायमस्वरुपी नियुक्ती करावी, अशी सूचना केली. चर्चेत नरहर कुलकर्णी, उमेश बगाडे, विनय गोखले, किरणसिंह चव्हाण अजय शिंदे आदींनी सहभाग घेतला. याप्रसंगी नाट्य परिषदेच्या जयश्री नरके, हेमसुवर्णा मिरजकर, शिवकुमार हिरेमठ, शहर अभियंता नेत्रदीप सरनोबत आदी उपस्थित होते.

.......

हौशी रंगकर्मीना ५० टक्के सवलत

कोल्हापुरातील हौशी नाट्यसंस्था पदरमोड सोसून नाटकाची आवड जोपासत आहेत. नाटकाच्या निर्मितीसाठी ७० हजार रुपयांचा खर्च होतो. हौशी नाट्य संस्थांना हा खर्च परवडत नाही. शहरातील नाट्य चळवळीला बळकटी देण्यासाठी हौशी नाट्य संस्थेला थिएटर भाड्यामध्ये ५० टक्के सवलत द्यावी, अशी मागणी बहुतांश रंगकर्मीनी केली. नाट्यरसिक अशोक जाधव म्हणाले, '१००० रुपयांचे तिकीट काढून नाटक पाहण्यासाठी आल्यावर केवळ ३०० रुपयांची वसुली होते. थिएटरमधील असुविधेमुळे नाटकाचा पूर्ण आनंद घेऊ शकत नाही. ६०० रुपये बुडीत खात्यात जमा होतात.'

..........

परिसराची पाहणी, सोयी सुविधांची खातरजमा

बैठकीच्या पूर्वी आयुक्तांनी नाट्यगृहाची पाहणी केली. नाट्यगृह परिसराच्या भिंतीलगतच्या गटारीतून खाऊ गल्लीचे वाहणारे सांडपाणी, स्वच्छतागृहाची सुविधा, मेकअपरुम, रंगमंचाची पाहणी केली. पिण्याच्या पाण्याच्या सोयीची खातरजमा केली. रंगकर्मींनी, थिएटरच्या वैभवाला बाधा आणणाऱ्या काही गोष्टी त्यांच्या निदर्शनास आणल्या. त्यावर आयुक्तांनी, ' थिएटर परिसरातील असुविधा मनाला खटकणाऱ्या आहेत. वाईट वाटते. महापालिका ही कोल्हापूरकरांची आहे, आम्ही विश्वस्त या भावनेने काम करतो. थिएटरच्या वैभवासाठी नागरिकांनी सूचना करावी, निश्चित दुरुस्ती करु. पुन्हा बैठक घेऊन निश्चित आराखडा आखला जाईल' अशी हमी दिली.

कोल्हापूर टाइम्स टीम

असंख्य जलतरणपटू घडवण्यात महत्त्वाची भूमिका बजावलेल्या छत्रपती शिवाजी जलतरण तलावातील समस्यांची मालिका संपण्याचे नाव घेत नाही. नादुरुस्त फिल्टर यंत्रणा, मोडकळीला आलेले बांधकाम, अस्वच्छता व सरकारी अनास्थेमुळे जलतरण तलावाची रया गेल्याचे चित्र आहे. तलावातील अस्वच्छ पाण्यामुळे आरोग्याला धोका निर्माण झाला आहे.

जिल्हा क्रीडा कार्यालयांतर्गत येणाऱ्या या जलतरण तलावामध्ये शहरातील अनेक खेळाडूंसह शाळकरी मुले व महिला पोहण्यासाठी गर्दी करतात. इतर खाजगी तलावांच्या तुलनेत येथील पोहण्याचा खर्च सर्वसामान्यांच्या आवाक्यात आहे. त्यामुळे अनेक जलतरणपटूंना इथे सराव करता येतो. येथे पोहण्याचे धडे घेऊन अनेक खेळाडूंनी राष्ट्रीय स्तरावरील स्पर्धा गाजवल्या आहेत. मात्र सध्या तलावाची अवस्था दयनीय आहे.

तलावाचे प्रवेशद्वार गंजले आहे. बैठक व्यवस्थेलाही तडे गेले आहेत. पुरुष व महिलांच्या स्वच्छतागृहांची अवस्था वाईट आहे. पाण्याचे नळ नादुरुस्त असून स्वच्छतेचा अभाव आढळतो. महिला स्वच्छतागृहाचा दरवाजा सडला आहे. स्वच्छतागृहात अडगळीचे साहित्य ठेवण्यात आले आहे. तलावाची सद्यस्थिती पाहता जिल्हा क्रीडा प्रशासनाची अनास्था दिसून येते.

सध्या उन्हाळी सुट्टीचे दिवस असल्याने तलावावर मोठ्या संख्येने मुले, पालकांची पोहण्यासाठी गर्दी होते. सद्यस्थितीत तलावातील पाणी हिरवे झाले आहे. मध्यंतरी तलावातील विविध कामांच्या दुरुस्तीसाठी काही दिवस तलाव बंद ठेवण्यात आला. मात्र काम पूर्ण होण्याआधीच तलाव सुरू केला आहे. तलावाकडे विद्युत पुरवठा सुरळीत होत नाही. त्यामुळे वारंवार फिल्टर यंत्रणा बंद करावी लागते. फिल्टर यंत्रणाही वारंवार नादुरुस्त असते. पाण्याचा रंग हिरवा झाल्याने त्याचा पोहणाऱ्या डोळ्यावर, त्वचेवर परिणाम होण्याचे शक्यता उद्भवते. दरवाजांच्या कड्या तुटलेल्या अवस्थेत आहेत. तलावातील फरशा फुटल्या असून फरशांना टोकदार धार आली आहे. त्यामुळे किमान प्रत्येक बॅचमध्ये मुले जखमी होतात. फरशांना तात्पुरत्या सिमेंटची मलमपट्टी करून काम पुढे चालवण्याचे धोरण प्रशासनाने पत्करले आहे. तलावातील सर्व फरशा बदलण्याची गरज आहे. २५ वर्षांपूर्वीचे बांधकाम असल्याने दुरुस्ती गरजेची आहे.

फिल्टर नादुरुस्त

जलतरण तलावातील फिल्टर वारंवार दुरुस्त करावा लागतो. त्यामुळे तलावातील पाण्याच्या स्वच्छतेचा प्रश्न निर्माण होतो. गेल्याच आठवड्यात सक्शन मोटारची दुरुस्ती करण्यात आली. पण, वारंवार विद्युत पुरवठा सुरळीत होण्यात अडथळे येत असल्याने मोटर नादुरुस्त होण्याचे प्रमाण अधिक आहे. फिल्टरेशन पाइपलाइन खराब झाली आहे. दरम्यान क्लोरीन गॅस संपल्याने फिल्टर यंत्रणा काही काळ बंद करावी लागली. २००६ मध्ये तलावाचे नूतनीकरण झाले. नंतर मात्र येथील समस्यांकडे दुर्लक्ष होत आले आहे.

अपुरा कर्मचारी वर्ग

जलतरण तलावाचे व्यवस्थापन केवळ चार कर्मचाऱ्यांवर अवलंबून आहे. सुट्टीच्या काळात तलावावर सुमारे तीनशेजण पोहण्यासाठी येतात. त्यामुळे कर्मचारी वर्ग वाढविण्याची मागणी होत आहे. नवशिक्यांना पोहण्याचे प्रशिक्षण देण्यासाठी केवळ दोन लाइफगार्ड उपलब्ध आहेत. गर्दी झाल्यास त्यांना प्रत्येकाकडे लक्ष देणे शक्य होत नाही.

कोट

जलतरण तलावाच्या समस्येबाबत वारंवार आंदोलने करूनही प्रशासन याकडे गांभीर्याने पाहत नाही. दुरुस्तीची कामे पूर्ण न करताच जलतरण तलाव खुला करण्यात आला आहे. तलावातील पाणी खराब झाल्याने त्याचा आरोग्यावर गंभीर परिणाम होऊ शकतो. असुविधा दूर करण्यासाठी प्रशासनाने लक्ष देण्याची गरज आहे.

- रमेश मोरे, क्रीडा मार्गदर्शक

पॉइंटर

- पंचवीस वर्षांहून अधिक जुने बांधकाम

- तलावावर दररोज दोन सत्रात बॅचेस

- पोहण्यासाठी महिलांचाही उत्स्फूर्त सहभाग

- तीनशे जणांची दररोज उपस्थिती, ७० महिलांचा सहभाग

- लाईफ गार्ड वाढवण्याची मागणी

म. टा. वृत्तसेवा, गडहिंग्लज

प्रामाणिकपणा, कठोर परिश्रम, परिशुद्धता या गुणांमुळेच संस्था मोठी होते. माणसात स्वार्थी प्रवृत्ती आली तर संस्था छोटी होते. जर निस्वार्थी भाव असेल तर सहकार आणि समाज समृद्ध होतो. कल्लेश्वर दूध संस्थेने तसा समाज समृद्ध करण्याचा प्रयत्न केला ही मोलाची बाब आहे, असे प्रतिपादन कणेरी मठाचे स्वामी अदृश्य काडसिद्धेश्वर महास्वामी यांनी व्यक्त केले. भडगाव (ता. गडहिंग्लजझ) येथील श्री कल्लेश्वर दूध संस्थेच्या सुवर्णमहोत्सवी कार्यक्रमात ते बोलत होते. कार्यक्रमाच्या अध्यक्षस्थानी गोकुळचे अध्यक्ष रवींद्र आपटे होते.

अदृश्य काडसिद्धेश्वर महास्वामी म्हणाले, 'सरकार, सावकार, सहकार व सार्वजनिक कंपन्या या चार क्षेत्रांवर देश चालतो. सहकार म्हणजे दुधारी तलवार आहे. सहकारी संस्था चांगली चालल्यास सर्वकाही सुरळीत चालते. दूध व्यवसाय व शेती या एकाच नाण्याच्या बाजू आहेत. शेती क्षेत्र सर्व घटकांना रोजगार देते. मात्र, आजच्या परिस्थितीत त्याला सेंद्रीय पद्धतीची जोड हवी.

गोकुळचे अध्यक्ष आपटे म्हणाले, 'विविध अडचणींतून मार्ग काढत कल्लेश्वर दूध संस्थेने ५० वर्षे पूर्ण केली आहेत. वय वाढेल त्या पद्धतीने संस्था नव्या प्रगतीचे टप्पे पार करत आहे. राज्याबाहेरून येणाऱ्या दुधाशी स्पर्धा करण्यास गोकुळ सज्ज आहे.

यावेळी ऑडिटर एस. एम. पाटील, डॉ. शिवशंकर मरजके यांची भाषणे झाली. तज्ज्ञ संचालक रमेश यामी यांनी स्वागत केले. सुरेश पवार यांनी प्रास्ताविक केले. सचिन जाधव यांनी आभार मानले.

संस्थाध्यक्ष राजशेखर पाटील, उपाध्यक्ष राजेसाहेब नाईकवाडे, सर्व संचालक, सचिव सुरेश देसाई, सह. निबंधक गजेंद्र देशमुख, प्रकाश चव्हाण, रामाप्पा करीगार, राणी खमलेट्टी, अमर चव्हाण, सदानंद हत्तरकी, रवींद्र शेंडुरे, श्रीया कोणकेरी, सरपंच बसवराज हिरेमठ, अक्षय कित्तूरकर, डॉ. विराज वाघ, अरुण पाटील, उदय पुजारी, आदी उपस्थित होते.

म. टा. प्रतिनिधी, कोल्हापूर

'मला उमेदवारी मिळू नये यासाठी विरोधकांकडून षडयंत्र रचले जात आहे. विरोधकांनी माझा नादाला लागू नये. त्यांच्या भ्रष्टाचाराचे पुराव्यासहित एक हजार 'बॉम्ब' तयार आहेत', असा इशारा आमदार राजेश क्षीरसागर यांनी पत्रकारांशी बोलताना दिला.

कोल्हापूर उत्तर विधानसभा मतदारसंघातील शिवसेनेचा उमेदवार बदलावा, अशी मागणी भाजपच्या पदाधिकाऱ्यांनी केली आहे. आगामी विधानसभा निवडणुकीत भाजप शिवसेना यांच्यात युती होणार असून भाजपने जिल्ह्यात पाच जागांची मागणी केली आहे. या पार्श्वभूमीवर गुरूवारी भगिनी महोत्सवानिमित्त आयोजित केलेल्या पत्रकार परिषदेत आमदार क्षीरसागर यांनी आपली भूमिका स्पष्ट केली.

लोकसभा निवडणुकीत कोल्हापुरात शिवसेनेला मिळणाऱ्या मताधिक्याबाबत शंका व्यक्त केली जात आहे, या विरोधकांच्या आक्षेपावर बोलताना आमदार क्षीरसागर म्हणाले, '२००९ च्या लोकसभा निवडणुकीत शहर शिवसेना प्रमुख असताना कोल्हापूर उत्तरमधून तत्कालिन उमेदवार विजय देवणे यांना मताधिक्य मिळाले होते. गतवेळच्या २०१४ च्या निवडणुकीतही प्रा. संजय मंडलिकांना मताधिक्य दिले. यावेळच्या निवडणुकीतही प्रा. मंडलिकांना कोल्हापूर उत्तरमधून २५ हजार मताधिक्य मिळेल. त्यामध्ये शिवसेनेचे श्रेय असेल. विद्यमान खासदारांच्या विरोधात शिवसैनिकांनी जीवाचे रान केले आहे.'

आमदार क्षीरसागर पुढे म्हणाले, 'लोकप्रतिनिधी म्हणून काम करताना गेली दहा वर्षे जनतेत राहून काम केल्याने आपल्याला कोल्हापूरच्या मतदारांनी दोन वेळा निवडून दिले आहे. निवडून आल्यावरही रस्त्यांवर व सभागृहातही आवाज उठवला आहे. आगामी विधानसभा निवडणुकीत विजयी होऊन हॅटट्रीक साधणार आणि भाजप शिवसेना युतीच्या सरकारमध्ये मंत्री म्हणून काम करणार. माझ्यावर आरोप करणारे विरोधक गेल्या निवडणुकीत कितव्या क्रमांकावर होते हे त्यांनी लक्षात घ्यावे. माझे जे विरोधक आहेत त्यांच्यासंबधीचे एक हजारहून अधिक पुरावे आपल्याकडे आहेत. पक्षाच्या वरिष्ठ नेत्यांनी आदेश दिल्यानंतर त्यांच्यावर भ्रष्टाचाराचा भांडाफोड करण्यासाठी बॉम्ब टाकले जातील.' यावेळी शहर प्रमुख रविकिरण इंगवले, किशोर घाटगे, शहर महिला प्रमुख पूजा भोर, पद्माकर कापसे आदी उपस्थित होते.

'कृष्णा इथेनॉल

निर्मितीला प्राधान्य देणार

कराड : साखरेच्या भावातील चढ-उतारामुळे शेतकऱ्यांना दर देण्यामध्ये अनेक अडचणी निर्माण होत आहेत. कृष्णा कारखान्याने शेतकरी सभासदांना नेहमीच चांगला दर देण्याचा प्रयत्न केला आहे. येत्या काळात शेतकऱ्यांना अधिक चांगला दर देता यावा, यासाठी साखरेबरोबरच इथेनॉल निर्मितीलाही अधिक प्राधान्य देणार असल्याची माहिती यशवंतराव मोहिते कृष्णा सहकारी साखर कारखान्याचे अध्यक्ष डॉ. सुरेश भोसले यांनी दिली. कामेरी (ता. वाळवा) येथे आयोजित शेतकरी संवाद मेळाव्यात ते बोलत होते.

भोसले म्हणाले, 'आज महाराष्ट्रात अनेक कारखाने शेतकऱ्यांना योग्य दर, कामगारांचा पगार देऊ शकत नाहीत. पण आपण सुरुवातीपासूनच योग्य नियोजन केल्याने शेतकऱ्यांना चांगला भाव देणे शक्य झाले आहे. ऊस पीक फक्त साखर उत्पादनापुरते मर्यादित न ठेवता, त्याद्वारे इथेनॉल, वीज अशा उपपदार्थांच्या निर्मितीला मोठ्या प्रमाणावर चालना देण्याची गरज आहे. इथेनॉलला सरकारकडून चांगला भाव मिळत असून, भविष्यात इथेनॉल निर्मितीला अधिक प्राधान्य देण्याचा आमचा विचार आहे. दीर्घकाळाच्या नियोजनातून येत्या २-३ वर्षांत कृष्णा कारखान्याला स्थिरता प्राप्त करून देण्याचा आमचा प्रयत्न राहील.'

आमच्या संचालक मंडळाने केवळ 20 ते 25 कोटी रूपयांत कारखान्यासाठी लागणारी तोडणी यंत्रणा आणली असताना, त्याच यंत्रणेसाठी यापूर्वीच्या चेअरमननी 65 कोटी रूपयांची उधळपट्टी का केली? असा सवाल उपस्थित करत संचालक संजय पाटील यांनी माजी चेअरमन अविनाश मोहिते यांच्यावर नाव न घेता टीकास्त्र सोडले. सध्या कारखाना प्रगतीपथावर असून, आम्ही दिलेली सर्व आश्वासने वेळोवेळी पूर्ण केली असल्याने शेतकरी सभासद समाधानी आहे. शिवाय चांगला दर मिळत असल्याने आमच्या संचालक मंडळाच्या कामकाजावर शेतकरी खूश आहे. अशावेळी आमच्याविरोधात बोलायला कुठलाच मुद्दा नसल्याने विरोधक जाणीवपूर्वक कोणतेही मुद्दे काढून सभासदांची दिशाभूल करत आहेत. त्यामुळे सभासदांनी अशा प्रवृत्तींपासून सावध राहावे, असे आवाहन संजय पाटील यांनी केले.

ऊसविकास अधिकारी पंकज पाटील यांनी जयवंत आदर्श कृषी योजना व खोडवा व्यवस्थापनाबाबत शेतकर्‍यांना मार्गदर्शन केले. यावेळी कामेरी ग्रामपंचायत, शिवपुरी ग्रामपंचायत, भीमराव पाटील सोसायटी, जयभवानी सोसायटी इत्यादी संस्थांच्यावतीने आणि विठ्ठलवाडी येथील सभासदांच्यावतीने डॉ. सुरेश भोसले यांचा सत्कार करण्यात आला. कार्यक्रमाला भैरवनाथ ग्रामीण पतसंस्थेचे संस्थापक सुनील पाटील, भीमराव पाटील सोसायटीचे चेअरमन अनिल पाटील, जयभवानी सोसायटीचे चेअरमन दिलीप जाधव, रमेश पाटील, भगवान पाटील, बाळासो पाटील, अशोक पाटील, विजयकुमार पाटील, युवराज पाटील, सतीश गायकवाड, अधिक पाटील यांच्यासह ऊसउत्पादक शेतकरी सभासद मोठ्या संख्येने उपस्थित होते.

चौकट

माजी चेअरमनचा सहकाराचा अभ्यास कच्चा!

सहकार कायद्यात झालेल्या दुरूस्तीनुसार सर्वच सहकारी संस्थांमधील अक्रियाशील सभासदांना कायदेशीर प्रक्रियेनुसार नोटीसा पाठविल्या जात असून, केवळ साखर कारखान्यांनाच नव्हे तर सोसायट्यांनाही हा नियम लागू झाला आहे. पण माजी चेअरमनचा सहकाराविषयीचा अभ्यास जरा कच्चा असल्याने, ते नाहक प्रश्न उपस्थित करून सभासदांमध्ये संभ्रम निर्माण करत आहेत, अशी टीका भैरवनाथ ग्रामीण पतसंस्थेचे संस्थापक सुनील पाटील यांनी अविनाश मोहिते यांचे नाव न घेता केली.

फोटो ओळी :

कामेरी : यशवंतराव मोहिते कृष्णा सहकारी साखर कारखान्याच्यावतीने आयोजित शेतकरी संवाद मेळाव्यात बोलताना चेअरमन डॉ. सुरेश भोसले.

जिल्हाधिकारी देसाई यांच्या सूचना

म. टा. प्रतिनिधी, कोल्हापूर

'येथील विमानतळावर नियोजित नाईट लॅडिंगसाठी येणारे सर्व अडथळे दूर करावेत. रात्रीच्यावेळी विमानतळ दिसण्यासाठी ऑप्टिकल दिवे लावावेत. विस्तारीकरणाचे काम गतीने करावे', अशा सूचना जिल्हाधिकारी दौलत देसाई यांनी शुक्रवारी दिल्या.

विमानतळावरील मूलभूत सेवा, सुविधा, विस्तारीकरण कामाचा आढावा घेण्यासाठी आयोजित बैठकीत ते बोलत होते. जिल्हाधिकारी कार्यालयात बैठक झाली.

जिल्हाधिकारी देसाई म्हणाले, 'विमानतळ विस्तारीकरणावेळी नेर्ली तामगाव रस्ता बंद होणार आहे. पर्यायी रस्त्याचे काम मार्गी लावण्यासाठी मी स्वत: भेट देणार आहे. वीज वितरण कंपनी आणि उजळाईवाडी ग्रामपंचायतीने विमानतळाकडे येणाऱ्या रस्त्यांवर पथदिवे लावावेत. विमान लँडीग करताना अडथळा ठरणाऱ्या उच्च दाबाच्या विद्युत वाहिनीचे स्थलांतर करण्यासाठी निधीचा प्रस्ताव जिल्हा नियोजनाकडे सादर करावा. विस्तारीकरणावेळी दिलेल्या वनजमिनीची प्रशासकीय प्रक्रिया पूर्ण करावी. मुरूमची गरज असल्यास खासगी मालकांकडून घ्यावा, त्यासाठी काम थांबवू नये. विस्तारीकरणात ६० चिकूच्या झाडांची बाग जाणार आहे. त्यास नुकसानभरपाई देण्यासाठीचा प्रस्ताव करवीर प्रांताधिकाऱ्यांनी तयार करावा.'

मुख्य कार्यकारी अधिकारी अमन मित्तल यांनी विमानळ परिसराची स्वच्छता नियमित करण्याचे काम उजळाईवाडी ग्रामपंचायतीने करावे, त्यात हलगर्जीपणा करू नये, असे सांगितले.

विमानतळ व्यवस्थापक कमल कटारिया, सतीश गुप्ता म्हणाले, 'विमानतळाकडे जाणाऱ्या रस्त्यावर पथदिवे लावावेत. नाईट लॅडिंग सुरू झाल्यानंतर प्रवाशांना गैरसोयींना सामोरे जावे लागू नयेत, अशा सुविधा निर्माण कराव्यात. परिसरातील रस्त्यावर दिशादर्शक फलक लावावेत. विमानतळ परिसरातील कचरा वेळच्यावेळी उचलावा.'

यावेळी निवासी उपजिल्हाधिकारी संजय शिंदे, उजळाईवाडीच्या सरपंच सुवर्णा माने, उपसरपंच चंद्रकांत पंडीत, ग्रामसेविका व्ही. डी. कोळी, सार्वजनिक बांधकाम विभागाचे अभियंता डी. एन. लोहार आदी उपस्थित होते.

म. टा. प्रतिनिधी, कोल्हापूर

'कोल्हापुरात फुटबॉलबरोबर क्रिकेट खेळही लोकप्रिय आहे. शिवाजी स्टेडियमवर राष्ट्रीय, आंतरराष्ट्रीय क्रिकेटपटूंनी दमदार खेळीने नवोदित खेळाडूंना उत्तेजन दिले. सध्या मैदानाची दुरवस्था झाल्याने खेळाडूंसह कोल्हापूरच्या जनतेची अस्मिता जागी झाली आहे. आगामी काळात सरकारी निधी, सीएसआर फंडातून शिवाजी स्टेडियममध्ये पायाभूत सुविधा निर्माण करून मैदानाला गतवैभव प्राप्त करून देऊ,' अशी ग्वाही जिल्हाधिकारी दौलत देसाई यांनी दिली.

जिल्हा क्रिकेट संघटनेच्या सुवर्णमहोत्सवी वर्षानिमित्त स्मरणिका प्रकाशन आणि खेळाडूंच्या सत्कार समारंभात ते बोलत होते. महाराष्ट्र संघाचे माजी रणजीपटू शंतनू सुगवेकर प्रमुख उपस्थित होते.

सुगवेकर म्हणाले, 'खेळाडूंनी मनापासून क्रिकेट खेळले पाहिजे. खेळात कामगिरी केली की यश मिळतेच. खेळाडूंना चांगल्या सुविधा देण्यासाठी क्रिकेट अॅकॅडमी उभारणीची कल्पना स्तुत्य आहे. कोल्हापूरने यापूर्वी अनेक खेळाडू महाराष्ट्राला दिले असून, भविष्यातही चांगले खेळाडू मिळतील.'

चाटे शिक्षण समूहाचे संचालक भारत खराटे यांनी कात्यायनी येथे जिल्हा क्रिकेट संघटना आणि चाटे शिक्षण समूह एकत्रित क्रिकेट अॅकॅडमी सुरू करेल अशी घोषणा केली. ते म्हणाले, 'चाटे शिक्षण समूहाने यापूर्वी औरंगाबाद येथे झहीर खान, संजय बांगर, इकबाल सिद्दिकी यांच्यामार्फत क्रिकेट विकास योजनेसाठी योगदान दिले होते. औरंगाबादप्रमाणेच कोल्हापुरातही अॅकॅडमीमुळे क्रिकेटचा विकास होईल.'

यावेळी भारतीय महिला क्रिकेट संघातील खेळाडू अनुजा पाटील, शिवानी शिंदे, ऋतुजा देशमुख, आदिती गायकवाड, अनिता नलवडे, रणजित निकम, सुदर्शन कुंभार, अभिनंदन गायकवाड, हर्षवर्धन गायकवाड या खेळाडूंची राष्ट्रीय व राज्य पातळीवर स्पर्धेसाठी निवड झाल्याबद्दल सत्कार करण्यात आला. १६ वर्षांखालील महिला खेळाडू सौम्यलता बिराजदार हिला प्रोत्साहन देण्यासाठी १० हजार रुपयांचे बक्षीस देण्यात आले. क्रिकेट संघटनेतील कर्मचारी अशोक भापकर, सुबोध देसाई, पांडूरंग दळवी यांचाही सत्कार झाला. अध्यक्ष बाळ पाटणकर यांनी प्रास्ताविक केले. जॉनी यादव यांनी आभार मानले. केदार गयावळ यांनी सूत्रसंचालन केले. यावेळी अरुण नरके, सुरेश पाटणे, जगदीश भोसले, अमर गांधी, सुरेश दुग्गे, सुभाष कापसे, अमृता शिंदे, चेतन चौगुले, आदी उपस्थित होते.

००००

इंगळे कुटुंबीयांकडून बक्षिसे

डी. एन. ऊर्फ बाबा इंगळे यांच्या स्मरणार्थ ऋतुराज इंगळे यांनी रोख ८० हजार रुपयांची बक्षिसे देऊन उदयोन्मुख खेळाडूंचा सत्कार केला. अनुजा पाटीलला ३० हजार रुपयांचे बक्षिस दिले. शिवानी शिंदेला २० हजार, आदिती गायकवाडला २० हजार, तर वैभव पाटीलला १० हजार रुपये बक्षीस देण्यात आले.

०००००

म. टा. प्रतिनिधी, कोल्हापूर

वैद्यकीय अभ्यासक्रम प्रवेश प्रक्रियेत यंदा मराठा आरक्षण लागू होणार नाही, यासंदर्भात मुंबई हायकोर्टाच्या नागपूर खंडपीठाने दिलेला निकाल सुप्रीम कोर्टाने कायम ठेवला आहे. या निर्णयानंतर मराठा समाजातील विद्यार्थ्यांमध्ये नाराजी पसरली आहे. अखिल भारतीय मराठा महासंघाने वैद्यकीय प्रवेशात मराठा विद्यार्थ्यांचे खच्चीकरण थांबवा, अन्यथा मराठा समाजाच्या रोषास सामोरे जावे लागेल, असा इशारा मराठा महासंघाने पत्रकाद्वारे दिला आहे.

पत्रकात म्हटले आहे की, मराठा आरक्षण २०१८ मध्ये लागू झाले आहे. पूर्वलक्षी वैद्यकीय प्रवेशाच्या प्रक्रिया सुरू असताना मराठा विद्यार्थ्यांना आरक्षणाचा कोटा देऊ नये यासाठी काही विद्यार्थ्यांनी कोर्टात धाव घेतली. मराठा आरक्षणानंतर जानेवारी २०१९ मध्ये केंद्रात व राज्यात आर्थिकदृष्ट्या मागास आरक्षण लागू झाले आहे. मात्र, पूर्वलक्षी प्रभावाने आरक्षण लागू करता येत नाही हे याचिका करणाऱ्या विद्यार्थ्यांनी लक्षात घेतलेले नाही. याचिकाकर्त्या विद्यार्थ्यांकडून फक्त मराठाद्वेषाचे राजकारण केले जात आहे.

यापूर्वी मुंबई व नागपूर येथील याचिका फेटाळल्यानंतर मराठा विद्यार्थ्यांनी पैसे भरून प्रवेश घेतले आहेत. या मुलांचा कोणताही दोष नसताना सुप्रीम कोर्टाच्या निर्णयाने त्यांच्यावर गंभीर प्रश्न निर्माण झाला आहे. राज्य सरकारने एसईबीसी कायद्याचा अभ्यास करून कायदेतज्ज्ञांचा सल्ला घेऊन विद्यार्थ्यांचे प्रवेश संरक्षित कसे करता येतील याचा अभ्यास करावा. तमिळनाडूतही आयआयटी येथे प्रवेश प्रक्रियेत अशीच न्यायालयीन अडचण झाली होती. पण तेथील सरकारने इंडियन मेडिकल काउन्सिलच्या परवानगीने प्रवेश कोटा वाढवून प्रश्नाची निर्गत केली होती. सरकारने याप्रश्नी मार्ग काढावा, अन्यथा मराठा समाजाच्या रोषाला सामोरे जावे लागेल, असा इशारा दिला आहे.

राज्य सरकारने नव्याने वैद्यकीय अभ्यासक्रमाची प्रक्रिया राबवावी, अशी मागणी मराठा संघटनेच्या बैठकीत करण्यात आली. अध्यक्ष बाळ घाटगे यांनी यासंदर्भात पत्रक प्रसिद्धिस दिले आहे. मराठा समाजातील विद्यार्थ्यांना आरक्षणानुसार प्रवेश नाकारणे म्हणजे त्यांच्यावर अन्याय होणार आहे. त्यांचे एक वर्ष वाया जाण्याची भीती आहे. आरक्षणाची अंमलबजावणी व्हावी यासाठी राज्य सरकारने प्रयत्न करावेत, अन्यथा सरकारविरोधात तीव्र आंदोलन छेडावे लागेल, असा इशारा दिला आहे. बैठकीत नितीन शेळके, विजय पाटील, पंपू सूर्यवंशी, सुरेश जाधव, अविनाश मोरे यांच्यासह कार्यकर्ते उपस्थित होते.

००००००