कोल्हापूर टाइम्स टीम
सुट्ट्या सुरू होताच अनेक घरात पर्यटनाचे बेत आखले जातात. कोल्हापूरसह आसपासच्या जिल्ह्यातील पर्यटकांसाठी कोकण हे नेहमीच सुट्टीसाठी परफेक्ट डेस्टिनेशन असते. आंबा, फणस, करवंद, जांभूळ अशा कोकणच्या मेव्यासह समुद्रकिनारी साहसी खेळांची मजा लुटता येते. त्यामुळे अलिकडच्या काळात कोकणची सहल विशेष ठरते.
समुद्राची ओढ सगळ्यांनाच असते. उसळणाऱ्या लाटा, फेसाळलेले निळेशार पाणी, किनाऱ्यावरील सोनेरी वाळू, समुद्रातील साहसी खेळ, बोटिंग यामुळे कोकणात अगदी फॉरेन टूरचा फील येतो. यातच कोकणातील वळणदार रस्ते, उंच डोंगर आणि घनदाट झाडी यामुळे भर उन्हातही कोकण हवाहवासा वाटतो. महाराष्ट्राला ७२० किलोमीटरचा समुद्रकिनारा लाभला आहे. मुंबईपासून ते वेंगुर्ल्यापर्यंत पसरलेल्या या किनाऱ्यावर पर्यटकांना खिळवून ठेवणारी अनेक ठिकाणे आहेत. कोल्हापूरपासून ज‌वळ असलेले रत्नागिरी आणि सिंधुदुर्ग हे दोन जिल्हे म्हणजे तळकोकण आहे. गडकिल्ले, धार्मिक स्थळे, सागरी किनारे आणि थंड हवेची ठिकाणे पर्यटकांना नेहमीच साद घालतात.
धार्मिक पर्यटन करणाऱ्यांसाठी गणपतीपुळे, कुणकेश्वर मंदिर, सागरेश्वर मंदिर, परशुराम मंदिर असे अनेक पर्याय आहेत. गणपतीपुळे येथे राहण्यासाठी उत्तम व्यवस्था आहे. गडकिल्ले पाहणाऱ्यांसाठी सिंधुदुर्ग, जयगड, रत्नदुर्ग हे किल्ले साद घालतात, तर समुद्र किनाऱ्यावर मौजमजा करणाऱ्या पर्यटकांसाठी तारकर्ली, तोंडवली, चिवला, वेंगुर्ला, गणपतीपुळे, मालवण असे अनेक पर्याय उपलब्ध आहेत. वाढत्या उन्हापासून दिलासा मिळवण्यासाठी थंड हवेच्या ठिकाणांचाही पर्याय आहे. आंबोली येथील एक दिवसाची सहल पर्यटकांना थंडाव्याचा अनुभव देते. याशिवाय सर्वच गावांमधील मंदिरे, जुनी घरे, छोट्या वाड्या हे सारेच पाहण्यासारखे असते. कोल्हापुरातून कोकणात जाताजाता राधानगरीचे धरण, दाजीपूरचे अभयारण्यही पाहता येते.
कोकण म्हंटले की खाण्यापिण्याची चंगळच असते. सध्या तर आंबा, फणस, करवंदे, जांभूळ यांचा हंगामच सुरू आहे. रस्त्याकडेलाही विक्रेते आपले दुकान मांडून बसले आहेत. कोकणच्या मेव्याचा मनसोक्त आनंद घेता येतो. बहुतांश पर्यटक कोकणात जाऊन माशांवर यथेच्छ ताव मारतात. समुद्रकिनारी होणाऱ्या लिलावात स्वत: ताजी मासळी खरेदी करून त्याचा आस्वाद घेता येतो. घरगुती पद्धतीचे मासे तयार करून देणारी घरे समुद्र किनारी आहेत. याशिवाय खास कोकणी पद्धतीच्या जेवणाचा आस्वाद घेण्यासाठी अनेक हॉटेल्स पर्यटकांच्या स्वागतासाठी सज्ज असतात. कोकणची मिठाईदेखील चविष्ट आणि खास कोकणी पद्धतीची असते. आंबा पोळी, आंबा बर्फी, काजू बर्फी, गूळशेव, तांदळाचे मोदक, जांभूळ, फणस, करवंदाच्या फ्लेवरमधील चॉकलेट्स असे अनेक पदार्थ खवय्यांच्या जिभेचे चोचले पुरवतात.
साहसी खेळांचे आकर्षण
साहसवीरांसाठी मालवणच्या समुद्रकिनारी वॉटर स्पोर्टस् उपलब्ध आहेत. मोटरबोटिंग, स्कुबा डायव्हिंग यासह पॅराशूटचीही मजा लुटता येते. खोल पाण्यात जाऊन समुद्रातील जलचरही पाहता येतात. मालवणपासून तारकर्ली, देवबागपर्यंतचा सुमारे १२ किलोमीटर अंतराचा समुद्रकिनारा साहसी खेळांसाठी प्रसिद्ध आहे. या आकर्षक किनारपट्टीवर तंबुनिवासाचीही सोय आहे. सुट्ट्या सुरू होताच कोकणातील पर्यटकांची गर्दी वाढली आहे.
परदेशातील स्वच्छ आणि सुंदर बीचप्रमाणे कोकणातही अनेक आकर्षक बीच आहेत. इथे समुद्रात जलक्रीडा करण्यासह खाण्यासाठीही अनेक पर्याय आहेत. खास कोकणी पद्धतीचा पाहुणचार घेण्यासाठी दिवसेंदिवस पर्यटकांची संख्या वाढत आहे.
- संतोष पारकर, हॉटेल व्यावसायिक
मोबाइल अॅप डाउनलोड करा आणि राहा अपडेट
