म. टा. प्रतिनिधी, कोल्हापूर

लोकसभा निवडणूक आचारसंहितेसंबंधी सीव्हिजील अॅपवर आलेल्या ४९ तक्रारी १०० मिनिटांत निकालात काढण्यात आल्याची माहिती निवडणूक विभागाने दिली. मतदानाची तारीख जवळ येत असल्याने तक्रारींचा ओघ वाढत आहे. सर्वाधिक तक्रारी शहरातून येत आहेत. चंदगड, राधानगरी विधानसभा मतदारसंघातून अॅपवर आतापर्यंत एकही तक्रार दाखल झालेली नाही.

आचारसंहितेची काटेकोर अंमलबजावणी करण्यासाठी आयोगाने प्रथमच ऑनलाइन तक्रारींसाठी सीव्हिजील अॅप तयार केले. या अॅपवरील तक्रारी १०० मिनिटांत निकालात काढण्याची सक्ती केली आहे. यामुळे अतिशय सतर्क राहून प्रशासनाने १२ मार्चपासून अॅपवरील तक्रारी निकालात काढण्यासाठीची यंत्रणा कार्यन्वित केली. यासाठी जिल्हास्तरावर जिल्हा नियोजन समितीच्या इमारतीमध्ये स्वतंत्र कक्ष सुरू करण्यात आला आहे. या कक्षात दोन कर्मचारी तैनात आहेत. फोटो, व्हिडिओसह तक्रार करण्याची सुविधा आहे. अॅपवर उत्तर विधानसभा मतदारसंघात २६, दक्षिणमध्ये ११, चंदगड आणि राधानगरी शून्य, कागल, शाहूवाडीमध्ये प्रत्येकी एक, शिरोळमध्ये तीन, इचलकरंजीत चार तक्रारी आल्या आहेत.

अॅपवर निनावी आणि नावानिशी तक्रार करता येते. तक्रार दाखल झाल्याच्या दुसऱ्या क्षणाला कक्षातील कर्मचाऱ्याच्या लॅपटॉपवर कळते. ते कर्मचारी अॅपद्वारे जवळच्या पथकास कळवतात. तक्रारी निकालात काढण्यासाठी प्रत्येक विधानसभा मतदारसंघात ४ ते ५ पथके वाहनानिशी कार्यरत आहेत. आठवड्यात तक्रारींची संख्या वाढल्याने पथकाची दमछाक होत आहे. विविध पक्षाचे डिजिटल फलक, घरांच्या भिंती, दरवाजांवर काढण्यात आलेले कमळ चिन्ह, लोकप्रतिनिधींच्या नावानिशीचे उद्घाटन फलकासंबंधीच्या तक्रारी पहिल्या टप्यात येत होत्या. आता जेवणावळी, रात्री उशिरापर्यंत सुरू असलेले हॉटेल, बार, पान टपरींसंबंधी तक्रारी दाखल होत आहेत. अॅपवर दाखल झालेल्या प्रत्येक तक्रारीची गांभीर्याने दखल घेतली जात आहे. ज्या तक्रारी खोट्या आहेत, त्या पहिल्या टप्यातच निकालात काढण्यात येतात. तथ्य असलेल्या तक्रारीवर कार्यवाही करण्यासाठी पथकाकडे वर्ग केल्यानंतर नावानिशी तक्रार केलेल्या संबंधितास मेसेज जातो. कार्यवाही पूर्ण होईपर्यंतचे टप्पे कळवले जातात. अशाप्रकारे यंत्रणा कार्यरत आहे.

पैसे वाटपाच्याही तक्रारी

उमेदवार, समर्थकाकडून प्रचाराच्या शेवटच्या टप्यातील पैसे, साड्या व इतर वस्तूचे वाटप होण्याची शक्यता असते. त्याचेही चित्रीकरण, व्हिडिओ, फोटो काढून सीव्हिजीलवर तक्रार केल्यास त्वरित कारवाई होऊ शकते. त्यासाठी पथकांना अधिक सक्रिय राहण्याचे आदेश निवडणूक निर्णय अधिकाऱ्यांनी दिले आहेत. अॅपवरील प्रत्येक तक्रारीची माहिती निवडणूक आयोगाला एका क्लिकवर कळते.

पक्षांची भूमिका

स्वाभिमानी शेतकरी पक्ष

'स्वाभिमानी शेतकरी संघटनेचे अध्यक्ष खासदार राजू शेट्टी तिसऱ्यांदा हातकणंगले लोकसभा मतदारसंघातून निवडणूक लढवत आहेत. त्यांनी रस्त्यावरचा संघर्ष करून ऊस, दूधाला भाव मिळवून दिला. देशभरातील २०९ शेतकरी संघटनांना एकत्र करून शेती आणि शेतकऱ्यांसमोरील समस्या ऐरणीवर आणले. दिल्लीपर्यंत धडक दिली. त्यामुळे मोठ्या मताधिक्याने ते तिसऱ्यांदा खासदार होतील,' असा विश्वास स्वाभिमानी शेतकरी पक्षाचे जिल्हा अध्यक्ष प्रा.जालिंदर पाटील यांनी 'महाराष्ट्र टाइम्स'शी बोलताना व्यक्त केले.

प्रा. पाटील म्हणाले, 'शेतमालास दीडपट हमी भाव द्यावा, यासह विविध मागण्यांच्या मुद्यावर गेल्यावेळी भाजपप्रणित महायुतीत सहभागी झालो होतो. मात्र महायुती सत्तेवर आल्यानंतर शेतकरी विरोधी धोरणे राबवण्यास सुरूवात केली. पंतप्रधान नरेंद्र मोदी सरकारने रासायनिक खतांवरील अनुदान हटवले. शेतकऱ्यांना उद्ध्वस्त करणारा भूमी अधिग्रहणाचा घातक कायदा आणला, तूर, कांदा, साखर आयात केले. सर्वच शेतमालाचे भाव पडले. त्यातून शेतकऱ्यांसमोरची संकटे वाढली. त्यांच्यावरील कर्जाचा डोंगर वाढू लागला. त्याला कंटाळून अनेक शेतकऱ्यांनी आत्महत्या केली. आत्महत्तेची आकडेवारी दहा वर्षात साडेतीन लाखांवर पोहचली. कृषीप्रधान देश अशी ओळख असतानाही महाराष्ट्रात पूर्णवेळ कृषीमंत्र्याची निवड केलेली नाही. यावरून सरकारने शेतकऱ्यांना गृहीतच धरले नसल्याचे स्पष्ट होते. सातत्याने त्यांना उपरेपणाची वागणूक देण्यात आली. म्हणून यावेळी काँग्रेस, राष्ट्रवादी आघाडीसोबत गेलो. जाताना राजकारणापेक्षा शेतकऱ्यांचे प्रश्न सोडवण्याला प्राधान्य दिले. बळिराजाचा सातबारा कोरा झाला पाहिजे, स्वामिनाथन आयोगाच्या शिफारशी लागू कराव्यात, शेतमालास दीडपट हमी भाव द्यावा, या मागण्या आघाडीच्या जाहिरनाम्यात घेण्यास भाग पाडले. आघाडीचे उमेदवार शेट्टी यांना प्रचाराला सर्वत्र चांगला प्रतिसाद मिळत आहे. त्यांनी चळवळीच्या माध्यमातून सातत्याने शेतकऱ्यांना चार पैसे कसे जादा मिळतील, यासाठी लढा दिला. शोषण करणाऱ्या व्यवस्थेविरोधात वातावरण तयार केले. देशभरात भाजप विरोधी लाट तयार करण्यात त्यांचा मोठा वाटा आहे. यामुळे ते तिसऱ्यांदा विक्रमी मतांनी विजयी होतील. कोल्हापूर लोकसभा मतदारसंघाचे आघाडीचे उमदेवार धनंजय महाडिक यांचाही विजय होईल.'

कोल्हापूर टाइम्स टीम

'कोल्हापूरात मोठा उद्योगधंदा आणून प्रभू कृपा रहावी,' अशी विनंती कोल्हापुरातील उद्योजकांनी केंद्रीय उद्योग, वाणिज्य व नागरी उड्डाण मंत्री सुरेश प्रभू यांना केली. कोल्हापूर वैभववाडी रेल्वे मार्ग आणि उजळाईवाडी विमानतळाला चालना दिल्याबद्दल छत्रपती शिवाजी महाराज यांचा पुतळा आणि करवीर निवासिनी अंबाबाईची प्रतिमा देऊन सत्कार करण्यात आला. प्रभू नुकतेच कोल्हापूर दौऱ्यावर आले होते. त्यांनी कोल्हापूर बिझनेस क्लान्क्लेव्हमध्ये व्यापारी व उद्योजकांना मार्गदर्शन केले. नंतर त्यांनी अंबाबाईचे दर्शन घेऊन उद्योजक सुरेंद्र जैन यांच्या निवासस्थानी भेट दिली. त्याठिकाणी प्रभू यांनी शहरातील व्यापारी व उद्योजकांशी चर्चा केली.

फिक्कीचे संचालक ललित गांधी, जयेश ओसवाल, हरिश्चंद्र धोत्रे, वरुण गांधी यांनी कोल्हापूरच्या प्रश्नांवर त्यांनी चर्चा केली. यावेळी जैन म्हणाले, 'गेले बरीच वर्षे कोकण रेल्वे कोल्हापूरला जोडण्यासंदर्भात फक्त चर्चाच सुरू होत्या. पण मंत्री प्रभू यांनी कोल्हापूर कोकण रेल्वेला जोडण्यासंदर्भात पुढाकार घेऊन प्रश्न मार्गी लावला. उडाण योजनेअंतर्गत उजळाईवाडी विमानतळावरुन विमान वाहतूक सुरु करण्यासाठी चालना दिली. यापुढे प्रभू यांनी कोल्हापूरात मोठा उद्योग आणण्यासाठी पुढाकार घ्यावा.'

सत्काराला उत्तर देताना केंद्रीय मंत्री प्रभू म्हणाले, 'कोल्हापूरला अंबाबाईचा आशिर्वाद आहे. इथल्या व्यापारी व उद्योजकांचा कोल्हापूरच्या विकासात मोठा वाटा आहे. भविष्यातही कोल्हापूरच्या विकासासाठी मदत केली जाईल.'

स्मॅकचे अध्यक्ष राजू पाटील, गोशिमाचे अध्यक्ष लक्ष्मीकांत पटेल, कोल्हापूर क्रिडाईचे अध्यक्ष विद्यानंद बेडेकर, राज्य सचिव महेश यादव, केआयटी संस्थेचे अध्यक्ष भरत पाटील, कोल्हापूर चेंबर ऑफ कॉमर्सचे उपाध्यक्ष शिवाजीराव पोवार, चंद्रकांत जाधव, सराफ संघाचे अध्यक्ष प्रदीप कापडिया, श्रीकांत दुधाणे, डॉ. सचिन कुलकर्णी उपस्थित होते. वरुण जैन आणि डॉ. प्रियदर्शनी जैन यांनी स्वागत केले.

कोल्हापूर : शिवाजी विद्यापीठाचे जनसंपर्क अधिकारी आलोक जत्राटकर यांना वृत्तपत्रविद्या व संवादशास्त्र विषयामध्ये शिवाजी विद्यापीठाची पीएच.डी. जाहीर झाली आहे. त्यांनी 'दलितमुक्तीचा प्रश्न : ब्राह्मणेत्तर आणि दलित वृत्तपत्रांच्या भूमिकेचा तुलनात्मक अभ्यास' या विषयावर शोधप्रबंध सादर केला होता. त्यांना, वृत्तपत्रविद्या व संवादशास्त्र विभागाचे माजी प्रमुख डॉ. रत्नाकर पंडित यांचे मार्गदर्शन लाभले. जत्राटकर हे नेट व सेट परीक्षाही उत्तीर्ण आहेत. त्यांना, विद्यापीठाचे कुलगुरू देवानंद शिंदे, प्र कुलगुरू डी. टी. शिर्के, विभागप्रमुख डॉ. निशा मुडे-पवार, डॉ. अशोक चौसाळकर, डॉ. एन. डी. जत्राटकर यांचे प्रोत्साहन लाभले.

कोल्हापूर : भगवान महावीर स्वामी जन्म कल्याणक निमित्ताने कुंभोजगिरी येथे वर्षभरात २५०० रोपांची लागवड करण्यात येणार आहे. बुधवारी ता.१७ वृक्षारोपणाचा शुभारंभ करण्यात येणार असल्याची माहिती संयोजक विशा श्रीमाळी १०८ गोळ जैन समाज संघटनेचे राज्याध्यक्ष राजेंद्र शहा यांनी केली आहे. शिवाय जैन समाजाच्या २४ तीर्थंकरांनी वेगवेगळ्या ठिकाणी साधना केली होती अशा चोवीस रोपांची लागवड करण्यात येणार असल्याचे पत्रकांत म्हटले आहे.

म. टा. वृत्तसेवा, राधानगरी

राधानगरी तालुक्यातील राई येथे होणारा धामणी प्रकल्पाचे काम गेली १९ वर्षे रखडल्याने या परिसरातील गावे, वाड्या ,वस्त्यांमधील नागरिकांनी मतदानावर बहिष्कार टाकण्याचा निर्णय घेतला होता. त्यासंबंधीचा अर्ज जिल्हा अधिकारी कार्यालायात दिल्यानंतर जिल्हा प्रशासन खडबडून जागे झाले आहे. जिल्हाधिकारी दौलत देसाई यांनी तातडीने म्हासुर्ली येथे बैठक घेत धामणी परिसरातील नागरिकांना मतदानाचा हक्क बजावावा, असे आवाहन केले. मात्र, प्रकल्पग्रस्तांनी अद्याप निर्णयाचा पुनर्विचार केला नाही.

वनविभाग, जमीन हस्तांतर आणि स्थानिक समस्या अशा गर्तेत सापडलेला धामणी प्रकल्पाची अंतिम सुधारित निविदा आमदार प्रकाश आबिटकर यांनी मजूर करून घेतली. परंतु त्यामध्येही त्रुटी आल्याने काम ठप्प झाले आहे. वारंवार मागणी, मोर्चे काढूनसुद्धा प्रशासनाने दुर्लक्ष केले. या परिसरात गगनबावडा, राधानगरी, पन्हाळा अशा तीन तालुक्यांतील सुमारे ५० गावांचा समावेश आहे. ३.८४ टी.एम.सी. क्षमतेचा प्रकल्प गेली १९ वर्षे अनेक कारणांनी रखडला आहे. या परिसरातील नागरिकांनी याचा निषेध म्हणून लोकसभा निवडणुकीवर बहिष्कार टाकण्याचा निर्णय घेतला. त्यानंतर खडबडून जागे झालेल्या प्रशासनाने तातडीने बैठक घेतली. यावेळी जिल्हाधिकारी दौलत देसाई यांनी आवाहन केले, ते म्हणाले, 'धामणी परिसरातील शेतकऱ्यांनी मतदानावर बहिष्कार टाकू नये. पावसाळ्यानंतर प्रकल्पाचे काम मार्गी लागेल. येत्या उन्हाळ्यात किमान एक टी. एम. सी. पाणीसाठा करण्याचे नियोजन आहे. शेतकरी आणि ग्रामस्थानी मतदान हक्क बजावला पाहिजे.' बैठकीला जिल्हा पुनर्वसन अधिकारी वैभव नावडकर, एस. आर. पाटील, तहसीलदार मीना निंबाळकर आदी उपस्थित होते.

कोल्हापूर टाइम्स टीम

'गझल या काव्यप्रकाराला पाचशे वर्षांची फारसी, उर्दू भाषेपासूनची दीर्घ परंपरा आहे. मराठीमध्ये कविश्रेष्ठ सुरेश भट यांनी साठ वर्षांपूर्वी शास्रशुद्ध गझलेचा प्रारंभ केला. छंदोबद्धता,तंत्रशुद्धता आणि कमीतकमी शब्दात व्यापक आशयघनता आदी वैशिष्ट्यांसह गझल रसिकप्रिय ठरली.मराठी गझल लिहिणाऱ्या सलग तीन पिढ्या निर्माण करण्याची आणि पुढील सर्व पिढ्यांना गझलेची बाराखडी देण्याची मराठी कवितेच्या इतिहासातील ऐतिहासिक कामगिरी मराठी गझल विद्यापीठाचे संस्थापक कुलपती सुरेश भट यांनी केली आहे,' असे मत 'गझलसाद' समूहाच्यावतीने आयोजित 'गझल काव्य प्रकाराची वैशिष्ट्ये' या चर्चासत्रातून पुढे आले. भारतरत्न डॉ.बाबासाहेब आंबेडकर यांचा १२८ वा आणि सुरेश भट यांचा ८७ वा जन्मदिन आणि गझलसादचा प्रथम वर्धापनदिन यानिमित्ताने चर्चासत्र झाले.

सुभाष नागेशकर यांच्या हस्ते डॉ. आंबेडकर व सुरेश भट यांच्या प्रतिमांना पुष्पहार अर्पण करण्यात आला. सुरेश भट यांची 'भीमवंदना' ही कविता आणि भटांचीच 'फसवूनही जगाला फसवायचे किती?' ही प्रा. नरहर कुलकर्णी यांनी संगीतबद्ध करून सादर केलेल्या गझलेने आदरांजली वाहण्यात आली. पहिल्या सत्रातील चर्चासत्रात डॉ. दिलीप कुलकर्णी, डॉ. संजीवनी तोफखाने, हेमंत डांगे, डॉ. स्नेहल कुलकर्णी आणि ज्येष्ठ चित्रकार विश्रांत पोवार यांनी 'गझल काव्यप्रकाराची वैशिष्ट्ये' याविषयाची विविध अंगाने मांडणी केली. चर्चासत्राचा समारोप प्रसाद कुलकर्णी यांनी केला.

दुसऱ्या सत्रामध्ये 'मुशायरा' झाला. मराठी, हिंदी गझल सादरीकरणाने त्याला मोठी बहार आली. त्यात 'तुझ्या नित सहवासाची अवीट धुंदी अजून आहे' (विश्रांत पोवार), विस्मृतीच्या ढगात विरुनी जावे म्हणतो (शंकर पाटील), कुठे चाललो मी मलाही कळेना (डॉ. दिलीप कुलकर्णी), एक दिवस मी तुलाच दिधला (हेमंत डांगे), जेवले मी कितीदा जरी पोटभर (डॉ. स्नेहल कुलकर्णी), आठवांची दीर्घ पाने चाळते मी (डॉ. संजीवनी तोफखाने), तुला भेटलो जेंव्हा जेंव्हा मग्न तळ्याच्या काठावरती (प्रा. नरहर कुलकर्णी), मी माणसांप्रमाणे जगतो खुशाल कारण (जमीर शेरखान), कधीकधी वाटे मज सारे जग विसरुनी जावे (प्रवीण पुजारी), नेमके बोलून जाती नेमक्या खाणाखुणा (प्रताप पाटील), अभंग, ओवी, दोहा, गवळण, श्लोक म्हणाले (प्रसाद कुलकर्णी) आदींनी रचना सादर केल्या. कार्यक्रमाला सनत चेंदवणकर, केशव बागला, गौरव माळी, रवी सरदार, माया कुळकर्णी, सुश्रुत कुकडे, प्रेरणा सरदार, अजित कुलकर्णी, रागेश्री कुलकर्णी, अनंत घोटजाळकर, रघू जाधव, देवबा पाटील आदींसह रसिक उपस्थित होते.

म. टा. प्रतिनिधी, कोल्हापूर

कोल्हापूर लोकसभा मतदारसंघातील राष्ट्रवादी, काँग्रेससह मित्र पक्षाचे उमेदवार धनंजय महाडिक, भाजप, शिवसेनेसह मित्रपक्षाचे उमेदवार प्रा. संजय मंडलिक, हातकणंगले मतदासंघातील काँग्रेस, राष्ट्रवादी, स्वाभिमानी शेतकरी संघटनेचे अध्यक्ष खासदार राजू शेट्टी, शिवसेना, भाजप आघाडीचे उमेदवार धैर्यशील माने यांच्या निवडणूक खर्चात तिप्पटीने तफावत असल्याचे सोमवारी स्पष्ट झाले. खर्चातील तफावतीमुळे या चौघांना दुसऱ्यांदा आणि अपक्ष उमेदवार संदीप संकपाळ यांना पहिल्यांदाच मंगळवारी निवडणूक निर्णय अधिकारी नोटिसा काढणार आहेत.

लोकसभा निवडणूक रिंगणातील उमेदवारांनी तीन टप्यात खर्चाचा तपशील निवडणूक आयोगाच्या खर्च निरीक्षक शेरेने जोस, शैलेश बन्सल यांच्या निदर्शनास आणून देणे बंधनकारक आहे. त्यानुसार उमेदवारी अर्ज दाखल केल्यापासून १४ एप्रिलपर्यंत केलेल्या खर्चाची सविस्तर माहिती उमेदवारांच्या प्रतिनिधींनी आणून दिली. त्याची पडताळणी येथील शाासकीय विश्रामगृहात सकाळी १० ते सायंकाळी पाचपर्यंत करण्यात आली. त्यात निवडणूक प्रशासन आणि उमेदवारांनी दिलेल्या खर्चातील तफावत आढळलेल्या उमेदवारांची यादी तयार करण्यात आली. त्यामध्ये 'कोल्हापूर'मधील महाडिक यांच्या खर्चात २८ लाख, ९६ हजार, ६१५, प्रा. मंडलिक यांच्या खर्चात १९ लाख, ८१ हजार, २५५, संदीप संकपाळ यांच्या खर्चात २१ हजार, ३२० तर 'हातकणंगले'मधील शेट्टी यांच्या खर्चात ३१ लाख, २६ हजार, ७३९, माने यांच्या ३१ हजार, ६८९ हजार, ३८६ इतकी तफावत आढळली आहे.

खर्च न दिलेल्यांनाही नोटिसा

'कोल्हापूर'मधील अपक्ष उमेदवार दयानंद कांबळे, परेश भोसले, बाजीराव नाईक यांनी खर्च सादर करण्याकडे पाठ फिरवली. या तिघांनाही नोटीस बजावण्यात येणार आहे. नोटीस मिळाल्यापासून ४८ तासांत खर्चाची माहिती यांनी न दिल्यास कारवाईची पुढील प्रक्रिया सुरू होणार आहे.

पुरावे घेतले

पहिल्या टप्यातील खर्च पडताळणीत उमेदवार महाडिक, मंडलिक, शेट्टी, माने यांना खर्चातील तफावतीमुळे नोटीस दिली होती. यांनी त्यास उत्तर दिले. शिवाय निवडणूक प्रशासनाने कोणत्या आधारे जादा खर्च लावला त्याचे पुरावे मागितले आहेत.

नेत्यांचा हेलिकॉप्टर

प्रवास, वाहन खर्च

निवडणूक प्रशासनाने प्रचारासाठी हेलिकॉप्टरने नेते आले असतील तर त्यांचा खर्च उपस्थित असलेल्या उमेदवारांच्या नावावर टाकले आहे. हा खर्च उमेदवारांनी धरलेला नाही. वाहनांचा खर्च प्रशासनाने अधिक लावला आहे, तर उमेदवारांनी कमी खर्च दिला आहे. यामुळे खर्चात मोठी तफावत दिसत आहे.

दीड कोटींवर खर्च

'कोल्हापूर'साठी १५ आणि 'हातकणंगले'साठी १७ उमेदवार निवडणूक रिंगणात आहेत. यांनी आतापर्यंत एक कोटी, ५५ लाख, ३६ हजार, १६३ रूपये खर्च केल्याचा प्रशासनाचा दावा आहे. याउलट स्वत: उमेदवारांनी दिलेल्या माहितीनुसार ४३ लाख, ४१ हजार, ८४८ खर्च झाला आहे.

आतापर्यंतचा खर्च

उमेदवाराचे नाव प्रशासनाने नोंदवलेला खर्च उमेदवारांनी दिलेला खर्च तफावत खर्चाची रक्कम

धनंजय महाडिक ३७८६५८० ८८९९६५ २८९६६१५

संजय मंडलिक २६३४३९८ ६५३१४३ १९८१२५५

अरुणा माळी १५९४४५ १५९४४५ ००

राजू शेट्टी ४१६२०१३ १०३५२७४ ३१२६७३९

धैर्यशील माने ३७०८३१९ ५३९९३३ ३१६८३८६

अस्लम सय्यद ४४१४५ ४४१४५ ००

म. टा. वृत्तसेवा शिराळा

चांदोली धरणाच्या खाली वारणा नदीपात्रात शनिवारी वाहून गेलेल्या इस्लामपूर येथील डॉ. राहुल मगदूम (वय ३५) यांचा मृतदेह तिसऱ्या दिवशी शाहुवाडी तालुक्यातील उखळू जवळच्या पुलाजवळ सापडला.

डॉ. राहुल शनिवारी दुपारी आपल्या सात मित्रांसह पर्यटनासाठी चांदोली परिसरात आले होते. दुपारी जेवण आटोपून यातील तिघेजण वारणा नदीच्या पाण्यामध्ये उतरले. डॉ. राहुल पोहत असताना पाण्याच्या भोवऱ्यात अडकले. त्यांच्या इतर मित्रांनी झाडांच्या फांद्या तोडून राहुल यांना वाचवण्याचा प्रयत्न केला. मात्र पाण्याचा वेग प्रचंड असल्यामुळे ते पाण्यातून पुढे वाहून गेले. चांदोली धरणातून नदीपात्रात सोडण्यात आलेले पाणी रात्री बंद करून त्यांचा शोध घेण्यात आला.

रविवारी रात्री उशिरापर्यंत सांगली येथील जीवरक्षक दलामार्फत बोटीच्या साहाय्याने शोध सुरू होता, मात्र यश आले नाही. सोमवारी तिसऱ्या दिवशी सकाळपासून पुन्हा शोध सुरू करण्यात आला. कोल्हापूर येथील जीवन आधार रेस्क्यू फोर्सने चांदोली धरणापासून मराठेवाडीपर्यंत बोटीच्या साहय्याने शोध सुरू केला. यावेळी उखळू पुलाजवळ नदीपात्रात मृतदेह तरंगताना आढळून आला. गेले तीन दिवस मणदूरचे सरपंच वसंत पाटील, ग्रामस्थ आणि डॉ. राहुलचे मित्र व नातेवाईक शोध घेत होते. डॉ. राहुल हे इस्लामपूर येथील प्रकाश हॉस्पिटल येथे व्याख्याते म्हणून कार्यरत होते. सागर जगन्नाथ मुळीक यांनी कोकरूड पोलीस ठाण्यात वर्दी दिली असून अधिक तपास एच. जी. तांबेवाघ करीत आहेत.

कोल्हापूर टाइम्स टीम

महाराष्ट्रासह-कर्नाटकातील भाविकांचे आराध्य दैवत जोतिबा देवाच्या चैत्र पौर्णिमा यात्रेसाठी पश्चिम महाराष्ट्र देवस्थान समिती, पोलिस व जिल्हा प्रशासनाने जय्यत तयारी केली आहे. लाखोंच्या संख्येने येणाऱ्या भाविकांच्या वाहनांसाठी वाहतुकीचे नियोजन व पार्किंग व्यवस्था करण्यात आली आहे. यात्रा काळात १४०० पोलिसांचा ताफा बंदोबस्तासाठी नेमण्यात आला आहे. सुरक्षेच्या कारणास्तव शिवाजी पूल ते जोतिबा डोंगर मार्गावर पोलिसांचा खडा पहारा राहणार आहे.

चैत्र पोर्णिमा यात्रेसाठी महाराष्ट्र, कर्नाटक व गोवा राज्यातून लाखो भाविक वाडी रत्नागिरी तथा जोतिबा डोंगरावर येत असतात. सध्या उन्हाचा कडाका वाढला आहे. तरीही भाविक बैलगाडीने सासनकाठ्या घेऊन जोतिबा डोंगराकडे निघाले आहेत. १९ एप्रिल रोजी यात्रेचा मुख्य दिवस असल्याने पोलिसांचा कडेकोट बंदोबस्त ठेवण्यात येणार आहे. पोलिस अधीक्षक डॉ. अभिनव देशमुख, अप्पर अधीक्षक तिरुपती काकडे यांनी सोमवारी अधिकाऱ्यांची बैठक घेऊन सुरक्षेबाबत सूचना दिल्या.

शुक्रवारी (दि. १९) आणि शनिवारी (दि. २०) यात्रेच्या मुख्य दिवशी लाखो भाविक जमलेले असतात. सासनकाठ्या व पालखी सोहळ्यादरम्यान भाविकांची गर्दी मोठ्या प्रमाणात होते. मंदिर परिसर व सेंट्रल प्लाझा या दोन्ही स्थळांची पोलिसांनी पाहणी करून तबंदोबस्ताचे नियोजन केले. अशा वेळी दर्शनरांगेत चेंगराचेंगरी होऊ नये, याची खबरदारी घेण्यात आली आहे. त्यासाठी गर्दीवर नियंत्रण ठेवण्यासाठी जोतिबा परिसरात ३० सीसीटीव्ही कॅमेरे बसविण्यात आले आहेत. डोंगरावर येणाऱ्या प्रत्येक भाविकाच्या हालचालींवर पोलिसांची करडी नजर राहणार आहे.

यात्रेकरूंसाठी मार्ग

यात्रेसाठी सर्व वाहने केर्ली व कुशिरे फाटामार्गे जोतिबा डोंगरावर जातील. इतर सर्व मार्ग चारचाकी वाहनांसाठी बंद करण्यात आले आहेत. केर्ली-कुशिरे गावांवरून येणारी सर्व चारचाकी वाहने सामाजिक वनीकरण फाटा येथून गायमुखमार्गे जोतिबावर जातील. सर्व एस. टी. बस व अत्यावश्यक सेवेतील वाहने सामाजिक वनीकरण येथून दानेवाडीमार्गे जोतिबावर जातील. घाट उतरताना जोतिबा डोंगरावरील सर्व वाहने दानेवाडी फाट्याकडून वाघबीळकडे न जाता गायमुखमार्गे केर्लीकडे उतरतील. जोतिबा ते जुने आंब्याचे झाड या दरम्यानची वाहतूक दोन्ही मार्गांनी सुरू राहील. देवदर्शन घेऊन परत जाणाऱ्या वाहनचालकांनी गिरोली बाजूकडील एकदिशा मार्गाचा अवलंब करावा. वाघबीळ व शाहूवाडीकडून दानेवाडीमार्गे येणारी सर्व वाहने केर्लीमार्गे जोतिबावर जातील. माले, कोडोली, गिरोली, वाघबीळ हे मार्ग बाहेर जाण्यासाठी ठेवण्यात आले आहेत. यामार्गे वाहनांना जोतिबावर येण्यासाठी प्रवेशबंदी आहे. या मार्गावर दिशादर्शक व सूचना फलक लावले आहेत.

पार्किगची ठिकाणे

केर्ली फाटामार्गे येणाऱ्या वाहनांना ट्रक पार्किंग, नवीन एस. टी. स्टॅँड, चारचाकी, जुने एसटी स्टँड, यात्री निवास समोरील जागा, तळ्याभोवती, दोनवडे क्रॉसिंग, जुने आंब्याचे झाड परिसर, शेवताई मंदिर परिसर, केर्ली हायस्कूल, गिरोली फाटा येथे केले आहे. तर गिरोली फाटा मार्गे येणाऱ्या वाहनांना यमाई मंदिर परिसर, बुणे कॉर्नर पार्किंग, प्रेम लॉजिंग, निलगिरी बाग परिसर येथे दुचाकी व चारचाकी पार्किंग करता येणार आहे.

अवजड वाहनांना नो एन्ट्री

बुधवारपासून (ता. १७ एप्रिल) जोतिबा डोंगावर जाणाऱ्या अवजड वाहने, ट्रक, तीनचाकी प्रवासी व मालवाहतूक रिक्षा तसेच ट्रॅक्टर यांना यात्रा कालावधीत बंदी घालण्यात आली आहे. त्यामुळे व्यापाऱ्यांनी त्यापूर्वीच माल न्यावा असे प्रशासनाने कळवले आहे.

बंदोबस्त दृष्टीपथात

१

पोलिस अधीक्षक

२

अप्पर अधीक्षक

६

पोलिस उपअधीक्षक

१९

पोलिस निरीक्षक

७३

पोलिस उपनिरीक्षक

४०

वाहतूक पोलिस

८००

पोलिस शिपाई

२ तुकड्या

एसआयपीएफ

१०००

होमगार्ड

(याशिवाय डॉग स्कॉड पथक, क्रेन व्हॅन, व्हाइट आर्मी)

मदतीसाठी संपर्क

पोलिस नियंत्रण कक्ष ०२३१ २६६२३३३

पन्हाळा पोलिस ठाणे ०२३२८ २३५०२४

कोडोली पोलिस ठाणे ०२३२८ २२४११०

जोतिबा डोंगर पोलिस चौकी ०२३२८ २३९०४१

रूग्णवाहिका सेवा १०८

कोल्हापूर

राष्ट्रवादी काँग्रेसचे उमेदवार खासदार धनंजय महाडिक यांना पैलवान आणि वस्तांदानी पाठिंबा दिला. मेळाव्याच्या अध्यक्षस्थानी महान भारत केसरी दादू चौगुले होते.

दादू चौगुले म्हणाले, 'निरोगी युवक हा देशाचा आधारस्तंभ आहे. महाडिक यांना लहानपणापासून व्यायाम व कुस्तीची आवड असून त्यांनी शरीर कमावले आहे. मन, मनगट, मेंदू सक्षम ठेवणारे पैलवान महाडिक विरोधी उमेदवाराला लोकसभा निवडणूकीत चितपट करतील.' महाराष्ट्र केसरी विष्णू जोशीलकर म्हणाले, 'महाडिक हे कुस्तीपटू असून ते कुशल संघटक आहेत. सढळ हाताने मदत करुन त्यांनी कुस्तीला आश्रय दिला आहे. जिल्ह्यातील पैलवानांचे ते आधारस्तंभ असल्याने त्यांचा विजय निश्चित आहे.' खासदार महाडिक म्हणाले, 'मी नियमित व्यायाम करत असून निव्यर्सनी आहे. कोल्हापूर जिल्हाही निरोगी आणि निव्यर्सनी असला पाहिजे. त्यासाठी शालेय वयात क्रीडा संस्कार रुजवले पाहिजेत. कुस्तीबरोबर खूप वाचन, मनन चिंतन केल्याने मला संसदरत्न पुरस्कार मिळाला. यावरुनच पैलवान प्रचंड बुद्धिमान असतात हे सिद्ध होते.' यावेळी पैलवान अशोक माने, संभाजी वरुटे, राजाराम मगदूम, अमृत भोसले, यशवंत दोनवडेकर यांची भाषणे झाली. मेळाव्याला वस्ताद रसूल हनिफ, रंगा ठाणेकर, संतोष पाटील, सर्जेराव पाटील, विलास पाटील, रविंद्र पाटील, शाहू चव्हाण यांच्या जिल्ह्यातील विविध तालमींचे वस्ताद व पैलवान उपस्थित होते.

म. टा. प्रतिनिधी, कोल्हापूर

कोल्हापूर, हातकणंगले मतदारसंघातून मोठ्या उत्साहाने उमेदवारी अर्ज दाखल केलेले अपक्ष उमेदवार सक्रिय प्रचारापासून अजूनही लांब आहेत. अनेक उमेदवार मतदारसंघात फिरकलेलेही नाहीत. वंचित बहुजन आघाडीने निवडणुकीपूर्वी जी हवा तयार केली होती, ती प्रचारात दिसत नाही.

कोल्हापूर लोकसभा मतदारसंघातील काँग्रेस, राष्ट्रवादीचे उमेदवार धनंजय महाडिक, भाजप, शिवसेनेचे उमेदवार प्रा. संजय मंडलिक तर हातकणंगले मतदारसंघातून स्वाभिमानी शेतकरी संघटना, काँग्रेस, राष्ट्रवादीचे उमेदवार राजू शेट्टी आणि भाजप, शिवसेनेचे उमेदवार धैर्यशील माने यांच्यातच खरी लढत आहे. हे चारही उमेदवार सर्व यंत्रणेसह प्रचारात सक्रिय आहेत. यामुळे रिंगणातील उमेदवारांची संख्या पाहून निवडणूक बहुरंगी वाटत असली तरी दोन्ही मतदारसंघात दुरंगीच लढत आहे. इतर उमेदवारांनी व्यापक प्रचार करण्याकडे पाठ फिरवल्याचे दिसत आहे.

वंचित बहुजन आघाडीच्या उमेदवार डॉ. अरूणा माळी, बहुजन समाज पार्टीचे प्रा. डी. श्रीकांत, बळीराजा पार्टीचे किसन काटकर, बहुजन मुक्ती पार्टीचे सिध्दार्थ नागरत्न, अपक्ष परेश भोसले, संदीप संकपाळ यांची प्रचार वाहने फिरत आहेत. उर्वरित अपक्ष उमेदवार बाजीराव नाईक, अरविंद माने, मुश्ताक मुल्ला, युवराज देसाई, राजेंद्र कोळी यांचा प्रचार थंडच आहे. 'हातकणंगले'मधून अपक्ष उमेदवार रघुनाथ पाटील, अस्लम सय्यद, वंचित बहुजन आघाडीचे डॉ. नितीन भाट, आनंदराव सरनाईक, अजय कुरणे यांचा काही ठिकाणी प्रचार सुरू आहे. उर्वरित रिंगणातील उमेदवार विद्यासागर ऐतवडे, किशोर पन्हाळकर, संग्रामसिंह गायकवाड, डॉ. प्रशांत गंगावणे, विश्वास कांबळे, राजू मुजीकराव शेट्टी, महादेव जगदाळे यांचा प्रचार दिसत नाही. या मतदारसंघात तब्बल १७ उमेदवार रिंगणात असूनही हाताच्या बोटावर मोजण्याइतकेच उमेदवार प्रचारात आहेत. खासदार राजू शेट्टी यांच्या नामसाधर्म्याचे मुंबईचे राजू मुजीकराव शेट्टी यांना उमेदवार अर्ज भरेपर्यंत विरोधकांनी रसद पुरवली. मात्र ते प्रचारात कुठेच दिसत नाहीत.

.........

मग उद्देश काय ?

लोकसभा मतदारसंघ हा सहा विधानसभा मतदारसंघांचा असतो. नवख्या उमेदवाराला निवडणूक जाहीर झाल्यानंतर रोज एक गाव केले तरी शेवटी बहुतांशी गावे, वाड्या वस्त्या शिल्लकच राहतात. हे माहित असतानाही मोठ्या संख्येने अपक्ष उमेदवारांनी अर्ज का दाखल केले आहेत, रिंगणात राहिल्यानंतर प्रचार करीत नसलेल्या उमेदवारांचा खरा हेतू काय? कुणीतरी अखेरच्या टप्प्यात माघारीसाठी मनधरणी करावी, तडजोडीने 'मागणी' पूर्ण करून घ्यावी, मतविभागणी व्हावी, मतदान होईपर्यंत नाव चर्चेत राहावे, यासाठीच अर्ज दाखल केले होते, का असा संशय उपस्थित केला जात आहे.

म. टा. प्रतिनिधी, कोल्हापूर

'काहीजण निवडणुकीच्या तोंडावर उगवले आहेत. त्यांना विकासाच्या मुद्यावर बोलता येत नसल्याने नागरिकांची दिशाभूल करत आहेत. आपणच पुरोगामी विचारांचे आणि शिवाजी पेठेचे असल्याचा आव आणत आहेत. अशा उमेदवारांपेक्षा, विकासकार्यातून बोलणाऱ्या खासदार धनंजय महाडिक यांच्या पाठीशी शिवाजी पेठेतील नागरिक व मतदार आहेत,' अशी ग्वाही माजी नगरसेवक अजित राऊत यांनी दिली.

खासदार महाडिक यांच्या प्रचारासाठी शिवाजी पेठ परिसरात प्रचारफेरी काढण्यात आली. याप्रसंगी ते बोलत होते. काँग्रेस, राष्ट्रवादी काँग्रेस, स्वाभिमानी शेतकरी संघटना, शेकाप, रिपाई गट, कवाडे गट व मित्रपक्ष आघाडीतर्फे शिवाजी पेठेतून पदयात्रा काढण्यात आली. याप्रसंगी बोलताना राऊत म्हणाले, 'प्रचारफेरीला नागरिकांचा मिळालेला प्रतिसाद हा महाडिकांच्या विजयाची नांदी आहे. कोल्हापूरचा स्वाभिमान जपणाऱ्या आणि कोल्हापूरशी एकरुप झालेल्या महाडिकांना पुन्हा खासदार म्हणून निवडून देण्याचे पेठेने ठरविले आहे.'

दरम्यान राष्ट्रवादी काँग्रेसचे शहराध्यक्ष आर. के. पोवार, माजी महापौर बाजीराव चव्हाण, नगरसेवक महेश सावंत, माजी नगरसेवक बाबा पार्टे, उत्तम कोराणे व अजित राऊत यांच्या पुढाकारातून पदयात्रा काढण्यात आली. खासदार महाडिक यांनी नागरिकांशी संवाद साधला. तसेच विकासकामांवर आधारित सचित्र माहिती पुस्तिकेचे वाटप केले. शिवाजी पेठेतील विविध भागातून फेरी निघाली. यामध्ये महिलांचा लक्षणीय सहभाग होता. प्रचार फेरीत माजी उपमहापौर परीक्षित पन्हाळकर, सुनील देसाई, सुहास साळोखे, संजय कुराडे, संजय पडवळे, राजेंद्र चव्हाण, भानुदास इंगवले आदींचा समावेश होता.

लोगो : मटा ऑफ दि स्पॉट

कोल्हापूर टाइम्स टीम

उन्हाबरोबरच राजकीय वातावरण तापू लागले आहे. लोकसभेच्या मतदानाला सात दिवसांचा कालावधी शिल्लक असताना काँग्रेस राष्ट्रवादी काँग्रेस आघाडी व भाजप-शिवसेना युतीच्या उमेदवारांनी वडणगे, निगवे, भुये, भुयेवाडी या गावांत दौरे, बैठकांचा सपाटा लावल्याचे चित्र आहे. मतदारांच्या प्रत्यक्ष भेटीगाठींवर अधिक भर देण्यात येत आहे.

महायुतीचे उमेदवार संजय मंडलिक यांनी आमदार चंद्रदीप नरके यांच्या सोबतीने ग्रामीण भागातील संपर्क वाढवला आहे. आघाडीचे उमेदवार धनंजय महाडिक यांनीदेखील प्रचारात आघाडी घेतली आहे. दोन्ही उमेदवारांनी शेतकऱ्यांच्या भेटी घेत प्रचार चालविला आहे. तरुणांची टक्केवारी वाढल्याने युवा मतदारांकडे लक्ष केंद्रित केले आहे. तरुणांच्या हक्कांसाठी काम करण्याची आश्वासने दिली जात आहेत. युतीचे उमेदवार मंडलिक यांनी पडवळवाडी, केर्ले, केर्ली, रजपुतवाडी, नवीन चिखली, सोनतळी, सादळे, मादळे, जठारवाडी या भागात संयुक्त प्रचार दौरा काढून मतदारांच्या भेटी घेतल्या. गेल्या पाच वर्षांमध्ये केंद्रात आणि राज्यात एकच सरकार असल्याने कल्याणकारी योजना सुरू करण्यात आल्या आहेत. शेतकऱ्यांना कर्जमाफी देण्यात आली आहे. बेरोजगारांना रोजगार उपलब्धतेसाठी 'मनेरगा'सारखी योजना कार्यान्वित करण्यात आली आहे. महिलांसाठी उज्वला गॅस आणि बचत गटाच्या माध्यमातून महिला आर्थिक सक्षमीकरण करण्यात आले आहे. शासनाच्या योजना जनतेपर्यंत पोहोचवण्यासाठी शिवसैनिकांनी पुढाकार घ्यावा. त्यासाठी ग्रामीण भाग पिंजून काढण्याचे आवाहन मंडलिक यांनी प्रचार दौऱ्यात केले.

आघाडीचे उमेदवार महाडिक यांनी दळणवळणाची सेवा, विमानतळ, रेल्वे प्रकल्प, मतदारसंघात नागरिकांना उत्तम दर्जाचे रस्ते, औद्योगिक क्षेत्रात दिलेल्या सोयीसुविधा, गेल्या चाळीस वर्षापासून प्रलंबित कोल्हापूर-वैभववाडी रेल्वेमार्गाचा पुढे सरकलेला प्रश्न, त्याचबरोबर ग्रामीण भागात दळणवळणाच्या सुविधा सक्षमपणे पोहोचविल्या आहेत असे मुद्दे घेऊन मतदारांना साद घातली आहे.

आयपीएलची आडकाठी

सध्या आयपीएलचा जोर असल्याने उमेदवारांना तरुणांना भेटण्यासाठी मोठा आटापिटा करावा लागत आहे. तरुण कार्यकर्ते क्रिकेट सामन्यात दंग असल्याने नेते आल्यानंतर कार्यकर्ते जमा करण्यासाठी स्थानिक गटप्रमुखांना धावाधाव करावी लागत आहे. ग्रामीण भागातही स्थानिक क्रिकेट स्पर्धा सुरू आहेत. त्यामुळे स्थानिक नेत्यांनी प्रत्यक्ष मॅच सुरू असलेल्या ठिकाणी भेटींवर भर दिला आहे. आयपीएलचा हंगाम ऐन जोशात आहे. तरुणही गटागटाने मॅच पाहण्याचा आनंद घेत आहेत. अशावेळी नेत्यांना घेऊन तेथे भेटी देण्यावर भर देण्यात येत आहे.

उन्हाचा फटका

एप्रिल महिन्याच्या पहिल्या आठवड्यापासून उन्हाची तिव्रता वाढली आहे. कोल्हापूरचे तापमान चाळीस अंशांच्या वर गेले आहे. त्यामुळे निवडणूक रिंगणातील उमेदवारांना मतदारांना शोधताना अडचणी निर्माण होत आहेत. सकाळी सत्रात अकरा वाजेपर्यंत व सायंकाळी सहानंतर मतदारांच्या भेटी घेतल्या जातात. यासाठी स्थानिक कार्यकर्त्यांना सूचना देण्यात आल्या आहेत.

सोशल मीडियावर भर

ग्रामीण भागातील तरुणांच्या हाती अँड्रॉइड मोबाइल आहेत. त्यामुळे उमेदवारांनी हायटेक प्रचार तंत्राचा वापर करण्यावर भर दिला आहे. नेत्यांनी सोशल मीडियावर अधिक वावर वाढवला आहे. ग्रामीण भागातील तरुण उमेदवारांचे समर्थन सोशल मीडियाच्या माध्यमातून करत आहेत. खास नेत्यांच्या बनवलेल्या इमेज शेअर करणे, व्हाट्सअॅप स्टेटस ठेवणे, फेसबुकसारख्या सोशल माध्यमावर नेत्यांच्या विकासकामांची मांडणी करणे, वाद-प्रतिवाद अशा माध्यमांतून प्रचारावर जोर देण्यात येत आहे.

भावकीत जोडण्या

राजकीय नेते, पदाधिकारी, कार्यकर्त्यांनी ग्रामीण भागात प्रचार करत असताना नातेवाईकांच्या संपर्कावर मोठ्या प्रमाणात भर दिला आहे. कोण कोणाचे पाहुणे याची यादी काढली जात आहे. आवर्जून पाहुण्यांच्या भेटी घेण्यावर भर दिला जात आहे. त्याचबरोबर गावातील मोठा गोतावळा असलेल्या भावकीला आपल्याबरोबर जोडण्याचे आदेश नेत्यांनी दिले आहेत. त्यामुळे भावकीतील संपर्क वाढविण्यावर स्थानिक नेत्यांनी अधिक भर दिला आहे.

ग्रामीण भागातही निवडणुकीनिमित्त वातावरण तापू लागले आहे. मात्र उमेदवारांनी केलेली विकासकामे आणि त्याचा प्रत्यक्ष नागरीकांना झालेला वैयक्तिक फायदा यावरच ग्रामीण मतदार मतदान करतो. आपल्याला उपयोगी पडणारा उमेदवार कोण, याकडे अधिक लक्ष मतदार देतात. सर्वसामान्य नागरिकांशी नाळ जोडणारा नेता हवा आहे.

- विलास भोपळे, मतदार