मटा ऑफ दी स्पॉट ... लोगो
म. टा. प्रतिनिधी, कोल्हापूर
अठरापगड जाती आणि विविध जातीधर्मांच्या मतदारांच्या संख्या असलेल्या जुन्या कोल्हापुरातील गल्लीबोळात राजकारणावर चर्चा झडू लागली आहे. शिवसेनसेचे आमदार, भाजप महानगर अध्यक्ष आणि महापौरांचे वास्तव्य असलेल्या या भागात काँग्रेस, राष्ट्रवादी, ताराराणी आघाडीच्या नगरसेवकांचा वरचष्मा असला तरी युतीच्या कार्यकर्त्यांची भक्कम फळी प्रचारात राबत आहे.
जुना बुधवार, शुक्रवार, शनिवार, गुरुवार, उत्तरेश्वर, सोमवार पेठेसह सिद्धार्थनगरचा समावेश जुन्या कोल्हापुरात होतो. मराठा, मुस्लिम, ख्रिश्चन, जैन, लिंगायत धर्मियांसह दलित, चर्मकार, परीट, शिंपी, तेली, गवळी, जोशी, कुंभार, लोणार, राजपूत (घिसाडी) समाजाची वस्ती या परिसरात मोठ्या प्रमाणावर आहे. आमदार क्षीरसागर यांचे घर शनिवार पेठेत असल्याने शिवसेनेच्या प्रचाराची झलक परिसरात पहायला मिळते. दिवसभर शिवसैनिकांचा तिथे राबता असतो. शनिवार पेठेतील शिवसैनिक व मंडलिकप्रेमींनी प्रचाराचा जोर धरला आहे. सिद्धार्थनगरात डॉ. बाबासाहेब आंबेडकर जयंतीची जोरदार तयारी सुरु आहे. या परिसराचा कानोसा घेतला असता आंबेडकर जयंतीनंतर समाजाची बैठक होऊन मतदान कुणाला करायचे हा निर्णय होईल, असे परिसरातील नागरिकांनी सांगितले.
जुना बुधवार पेठ हा शिवसेनेचा बालेकिल्ला असला तरी इथे राष्ट्रवादी काँग्रेसचे नगरसेवक आहेत. महापौर सरिता मोरे आणि भाजप महानगर अध्यक्ष संदीप देसाई यांचे वास्तव्य याच भागात आहे. महायुतीने सामूहिक प्रचार सुरु केला असला तरी काँग्रेस व राष्ट्रवादीचे कार्यकर्ते कुठेच दिसत नाहीत. पण गल्लोगल्ली व तालमीच्या कठ्ठ्यावर खासदार धनंजय महाडिक की प्रा. संजय पाटील निवडून येणार यावर जोरदार चर्चा झडत आहेत. कोण निवडून येणार कोण पडणार यावर पैजा लागत आहेत. ख्रिश्चन वसाहत, फकीरवाडा येथील मतदान आघाडीला अनकूल राहण्याची शक्यता वर्तवली जात आहे.
शुक्रवार पेठ, शनिवार पेठ हा परिसर विविध जातीधर्मात विभागला असला तरी महायुतीने प्रचारात आघाडी घेतली आहे. इथे ताराराणी आघाडीचे नगरसेवक आघाडीचा किल्ला लढवत आहेत.
शिवाजी चौक, महानगरपालिका, ऋणमुक्तेश्वर, पापाची तिकटी या ठिकाणी व्यापारी वस्ती असल्याने दुकान, हॉटेल, उपहारगृहात केवळ राजकारणाचीच चर्चा सुरु आहे. कुठला उमेदवार चुकला, कोणता उमेदवार पक्षाशी एकनिष्ठ आहे, जिल्ह्यात काय हवा आहे, कोणता नेता उघड प्रचार करतोय, तर कोण छुपी मदत करतोय याच्या चर्चा झडू लागल्या आहेत. तरुणाईसह ज्येष्ठ नागरिकांच्या कट्ट्यावर चर्चेने जोर धरला आहे. जीएसटी, नोटाबंदी हे विषय मागे पडले असून महायुती, आघाडीबरोबर उमेदवाराचे चारित्र्य, देहबोली, पक्षनिष्ठेवर मतदान करणार असल्याची प्रतिक्रिया मतदारांकडून व्यक्त होऊ लागली आहे.
सोमवार पेठेत अकबर मोहल्ला, मटण मार्केट, शिवाजी चौकात नागरी वस्तीबरोबर व्यापारी वस्तीही मोठी आहे. महिला वर्गात उमेदवारांच्या पत्नींच्या समाजकार्याची चर्चा होत आहे. भेट वस्तू वाटपाला महिलांकडून विरोध होत असून चांगल्या उमेदवाराला मतदान करणार असल्याचे महिलांनी सांगितले.
......................
कोट
'उन्हामुळे प्रचारात जोर नाही. तसेच निवडणुकीत कुठलीही लाट नाही. पण स्थानिक उमेदवाराचे काम, चारित्र्य, पक्षनिष्ठा याचा विचार होत आहे. राफेल घोटाळा वृत्तपत्रात वाचतो. कोर्टाचे आदेशही होत आहेत. पण त्याचा परिणाम निवडणुकीवर होणार नाही.
जोतराम दोनवडेकर, मस्कुती तलाव
................
'नोटबंदी, जीएसटीचा फटका जरी बसला असला तरी निवडणुकीत या मुद्द्याचा परिणाम होण्याची शक्यता नाही. लोकसभेची निवडणूक असली तरी ती स्थानिक राजकारणावर पोचली आहे. मतदार जरी सुशिक्षित असला तरी स्थानिक राजकारणाचे पडसाद मतदानावर पडण्याची शक्यता आहे.
सुजीत शारबिद्रे, शनिवार पेठ
