म. टा. प्रतिनिधी, कोल्हापूर लोकसभा निवडणुकीच्या मतदानाची तारीख जवळ येऊ लागल्याने अधिकाधिक मतदारांपर्यंत पोहोचण्यासाठी उमेदवारांची अवस्था पायाला भिंगरी बांधल्यासारखी झाली आहे. प्रत्यक्ष मतदानाला पंधरा दिवसांचा कालावधी उरल्याने राष्ट्रवादी काँग्रेस आघाडी व शिवसेना-भाजपकडून प्रत्येक दिवसाचा 'इलेक्शन प्लॅन' तयार करण्यात आला आहे. विधानसभा मतदारसंघनिहाय दौरे, सभा, प्रचार फेऱ्यांवर भर दिला आहे. कोल्हापूर लोकसभा मतदारसंघात ९२७ गावांचा समावेश आहे. गगनबावडा, राधानगरी, भुदरगड, चंदगड, आजरा भागातील वाड्या, वस्त्यांतील मतदारांपर्यंत पोहोचणे हे आव्हानच आहे. यावेळची निवडणूक आघाडी आणि युतीने प्रतिष्ठेची बनविली आहे. राष्ट्रवादीचे उमेदवार व खासदार धनंजय महाडिक आणि शिवसेनेचे उमेदवार प्रा. संजय मंडलिक यांच्यात थेट लढत आहे. दोन्ही उमेदवार मतदारसंघ पिंजून काढत आहेत. रोज सतरा ते वीस गावांचा प्रचार दौरा पूर्ण करण्याचे नियोजन केले आहे. वाड्या-वस्त्यांचा दौरा असल्यास २८ ते ३० ठिकाणी पोहोचताना उमेदवारांना कसरत करावी लागत आहे. प्रचाराच्या पहिल्या टप्प्प्यात दोन्ही उमेदवारांनी प्रत्यक्ष गाठीभेटी, कार्यकर्त्यांशी चर्चा, मेळावे यावर भर दिला होता. महिला मतदारांना आकर्षित करून घेण्यासाठी महिला मेळावे घेतले. उमेदवारांनी मोटारसायकलीवरून संपर्क अभियान राबविले. या निवडणुकीत काँग्रेस, राष्ट्रवादी काँग्रेस, स्वाभिमानी शेतकरी संघटना, शेकाप, आरपीआय गवई गट, पीआरपीआय कवाडे गट यांच्यासह मित्रपक्षांची आघाडी आहे. आघाडीतील मित्रपक्षांतील प्रमुख पदाधिकारी प्रचारात सक्रिय झाले आहेत. शिवसेना, भारतीय जनता पक्ष व मित्रपक्षांची युती आहे. युतीचे नेते प्रचारात सक्रिय आहेत. तालुका नेत्यांसोबत दौरे आता प्रचाराला वेग आल्यामुळे विधानसभा मतदारसंघनिहाय मोठ्या लोकवस्तीच्या गावात सभा घेतल्या जात आहेत. महत्त्वाचे म्हणजे तालुक्यातील प्रमुख नेतेमंडळी, आमदार, माजी आमदारांसोबत प्रचार दौरे सुरू आहेत. कोल्हापूर उत्तर, दक्षिण मतदारसंघ, कागल, करवीर, राधानगरी, भुदरगड, गगनबावडा, आजरा, चंदगड तालुक्यांतील प्रमुख नेतेमंडळी प्रचारात उतरली आहेत. यामुळे ग्रामीण भागातील राजकारण ढवळून निघत आहे. सकाळी सात वाजता दौऱ्याला प्रारंभ मतदानासाठी पंधरा दिवसाचा कालावधी उरल्याने उमेदवार व त्यांच्या समर्थकांकडून प्रत्येक दिवसाच्या नियोजनाची काटेकोर अंमलबजावणी सुरू आहे. रोज सकाळी सात वाजण्याच्या सुमारास दौऱ्याला सुरुवात होते. पहिल्यांदा दिवसभरातील कार्यक्रमांच्या नियोजनासंदर्भात प्रमुख कार्यकर्त्यांसोबत चर्चा होते. ग्रामीण भागात दौरा असल्यास सकाळी नऊ वाजता प्रचाराचा श्रीफळ वाढविला जातो. प्रत्येक गावात अर्धा तास चर्चा, गाठीभेटी घेतल्या जातात. कार्यकर्त्यांच्या घरी नाष्टा करत पुढच्या गावातील प्रचाराचे नियोजन होते. सायंकाळी मोठ्या गावात सभा होतात. रात्री दहापर्यंत प्रचार करून पुन्हा संपर्क कार्यालय गाठतात. प्रमुख कार्यकर्त्यांसोबत दिवसभरातील प्रचाराचा आढावा घेतला जातो. ०००००००
मोबाइल अॅप डाउनलोड करा आणि राहा अपडेट
