म. टा. प्रतिनिधी, कोल्हापूर
साडेतीन महुर्तापैकी पहिल्या शुभ मुहूर्तावर ग्राहकांच्या उदंड प्रतिसादामुळे कोट्यवधी रुपयांची उलाढाल झाली. दागिन्यांच्या खरेदीसाठी हार्ट ऑफ सिटी समजल्या जाणाऱ्या गुजरीत सोने, चांदीची मोठ्या प्रमाणावर खरेदी झाली. पाडव्याचा मुहूर्त साधताना अनेकांचे घर खरेदीचे स्वप्न साकार झाले. इलेक्ट्रॉनिक वस्तू, दुचाकी, चारचाकी वाहनांच्या खरेदीमुळे अॅटोमोबाईल मार्केटमध्ये फिलगुडचे वातावरण होते. मोबाइल खरेदीला तरुणाईचा उदंड प्रतिसाद लाभला.
गुढीपाडव्याला सोने खरेदी करायची ही प्रथा अनेकांनी जपल्याने गुजरीत मोठी उलाढाल झाली. पारंपरिक दागिन्यांबरोबर एक ग्रॅम वजनाच्या डिझाइन दागिन्यांनाही ग्राहकांनी पसंती दिल्याचे सार्वत्रिक चित्र पहायला मिळाले. शहरातील नामांकित कंपन्याच्या दागिन्यांच्या शोरुममध्ये महिलांची गर्दी लक्षणीय होती. गुजरी, राजारामपुरी, व्हिनस टॉकीज, दसरा चौकातील शोरुम हाऊसफुल्ल होती. सोने-चांदीच्या दागिन्यांबरोबर हिऱ्यांच्या दागिन्यांनाही चांगला प्रतिसाद मिळाला. सोने, चांदीचे दर कमी झाल्याने लग्नसराईसाठी पाडव्याच्या मुहूर्तावर दागिने खरेदी झाली.
घरबांधणी उद्योगातील मंदीचे सावट कमी झाल्याचे चित्र आज पहायला मिळाले. शुभमुहूर्तावर अनेकांनी फ्लॅट, बंगले खरेदी केले तर अनेकांनी बुकिंग केले. रेरा कायदा, जीएसटीमुळे गेले दोन वर्षे मंदी होती. जीएसटीच्या दरात कपात झाल्याने त्याचा फायदा ग्राहकांनी घेतला. बंगले, फ्लॅट खरेदी केलेल्या ग्राहकांनी पाडव्याच्या मुहूर्तावर गृहप्रवेश केला. नवीन गृह प्रकल्पांच्या बुकिंगलाही चांगले ओपनिंग मिळाल्याची प्रतिक्रीया बांधकाम व्यावसायिकांकडून मिळाली.
इलेक्ट्रॉनिक वस्तू खरेदीसाठी व्यापाऱ्यांनी मोठ्या ऑफर दिल्याने एलइडी, फ्रीज, वॉशिंग मशिन, एसी, मोबाइल, ओव्हन, कॅमेरा या वस्तूंची मोठ्या प्रमाणात खरेदी झाली. कॅशबँक, एक्सचेंज, शून्य टक्के टक्कमेवर इएमआयवर वस्तू खरेदीच्या ऑफर दिल्याने ग्राहकांकडून उदंड प्रतिसाद लाभला, लक्ष्मीपुरी, उमा टॉकीज, टेंबे रोड, बिंदू चौक शिवाजी रोडवरील शोरुममध्ये ग्राहकांची मोठी गर्दी होती. मोबाइल खरेदीसाठी तरुणाईचा मोठा पुढाकार होता. विविध कंपन्यांचे नवीन मॉडेल, कॅशबॅक योजनेचा फायदा घेण्यात ग्राहकांनी रुची दाखवली. दिवसभर मोबाइलचे शोरुम हाऊसफुल्ल होते.
पाडव्याला नवीन गाडी दारात आणण्याचे बेत आज साकार झाले. बुकिंग केलेली वाहने ताब्यात घेण्यासाठी शोरुममध्ये गर्दी होती. रुईकर कॉलनी, तावडे हॉटेल, पुलाची शिरोली, गोकुळ शिरगाव येथून मोठ्या संख्येने वाहनांच्या चाव्या ग्राहकांना देण्यात आल्या. दुचाकीबरोबर यंदा चारचाकी वाहन खरेदीलाही चांगला प्रतिसाद लाभला. एकंदरीत गुढीपाडव्याच्या मुहूर्तावर व्यापारीपेठेत मोठ्या प्रमाणात आर्थिक उलाढाल झाल्याने समाधानाचे वातावरण होते.
सोन्याचे दर उतरल्याने ग्राहकांनी खरेदीसाठी पाडव्याचा मुहूर्त साधला. सराफ बाजारात अतिशय उत्साहाचे वातवरण आहे. अंगठी, टॉप्ससह हिऱ्यांच्या दागिन्यांनाही ग्राहकांनी पसंती दिली.
- भरत ओसवाल, अध्यक्ष सराफ संघ
पाडव्याच्या मुहूर्तावर गृहपयोगी वस्तूंना महिला ग्राहकांची चांगली पसंती लाभली. फ्रीज, वॉशिंग मशिन, एलइडीहीसह एसी खरेदीला प्रतिसाद लाभला. ऑफर्सचा लाभ ग्राहकांनी मोठ्या प्रमाणात घेतला.
- मुग्धा कुलकर्णी, इलेक्ट्रॉनिक वस्तू व्यापारी
जीएसटीमध्ये कपात केल्याने ग्राहकांना चांगला दिलासा मिळाला आहे. त्यामुळे प्रॉपर्टीमध्ये गुंतवणूक करण्याचा ट्रेंड दिसत आहे. पाडव्याच्या मुहुर्तावर आज चांगला प्रतिसाद मिळाला. गृहप्रकल्पांत बुकिंगकडे ग्राहकांनी लक्ष दिले.
- अतुल पोवार, बांधकाम व्यावसायिक