कोल्हापूर टाइम्स टीम लोकसभा निवडणुकीच्या आचारसंहितेचा धसका सर्वसामान्य नागरिकांनीही घेतला आहे. कारवाई करणाऱ्या पथकाच्या दहशतीमुळे खासगी, वैयक्तिक कार्यक्रमांवरही मर्यादा आल्या आहेत. पथकातील काहीजण अधिकाराचा गैरवापर करत 'चिरीमिरी' मागत असल्याच्या तक्रारी आहेत. रात्री साडेदहा वाजल्यानंतर मध्यवर्ती बसस्थानक, रेल्वे स्टेशनसह बाजारपेठेतील हॉटेल्स, किराणा दुकाने बंद करावी लागत आहेत. त्यामुळे प्रचंड गैरसोय होत आहे. परिणामी, 'आचारसंहिता पथक आले पळा पळा' असे चित्र ठिकठिकाणी दिसत आहे. कारवाईच्या नाहक बडग्याविरोधात संताप व्यक्त होत आहे. निवडणुकीच्या काळात एक लाख रुपांपेक्षा अधिक रक्कम काढणाऱ्या खातेदारांची माहिती खर्च नियंत्रण समितीकडे देण्याचे आदेश जिल्हाधिकाऱ्यांनी राष्ट्रीयीकृत बँकांना दिल्या आहेत. त्यामुळे लाखावरील व्यवहारांना ब्रेक लागला आहे. लग्नसमारंभ, बारसे, वाढदिवसांचे कार्यक्रम आणि घर, शेती खरेदीचे विक्रीचा व्यवहार लांबणीवर टाकणे अनेकांनी पसंत केले आहे. आवश्यक त्या ठिकाणी रोख पैसे घेऊन जाणे टाळले जात आहे. त्याचा परिणाम अप्रत्यक्षपणे बाजारपेठेवर जाणवत आहे. लग्न वा अन्य कार्यक्रमांसाठी सभागृह, साहित्याचे बुकिंग थांबले आहे. सामान्य माणूसही कधी एकदा आचारसंहिता संपेल, त्याची प्रतीक्षा करत आहे. आचारसंहितेच्या पथकाने नको तितकी दहशत निर्माण केल्याने बाजारपेठेतील मंदीत भर पडली आहे. रात्री साडेदहा वाजल्यानंतर शहरातील हॉटेल्स, बाजारपेठेतील सर्व दुकान बंद होत असल्याने शुकशुकाट जाणवत आहे. बाहेरून रात्री उशिरा येणाऱ्या पर्यटकांची गैरसोय होत आहे. मध्यवर्ती बसस्थानक, रेल्वे स्टेशन परिसरात जेवण शोधण्यासाठी त्यांना भटकंती करावी लागत आहे. त्यांना लांबवरच्या गल्लीबोळातील घरगुती खानावळींचा आधार घ्यावा लागत आहे. चौकाचौकांत, रस्त्याकडेला लावलेल्या गाड्यांवरील खाद्यपदार्थ खाण्याची वेळ त्यांच्यावर आली आहे. रात्री साडेदहानंतर जीवनावश्यक वस्तू, दुधही मिळत नाही. रात्री उशिरा पोहोचणारे काही पर्यटक ऑनलाइन जेवणाची ऑर्डर देत आहेत. त्यामुळे अशा ऑर्डर पोहोच करणाऱ्या कंपन्यांच्या दुचाकींची वर्दळ वाढली आहे. एक खिडकी कक्ष लोकसभा निवडणुकीच्या रिंगणातील राजकीय पक्ष, उमेदवारांना परवानगीसाठीच्या कागदपत्रांसाठी धावाधाव करायला लागू नये, यासाठी प्रत्येक तालुक्याच्या ठिकाणी एक खिडकी कक्ष सुरू करण्यात आला आहे. तेथून सुलभपणे परवाना मिळण्यासाठी आवश्यक कर्मचारी तैनात करण्यात आले आहेत. आचारसंहिता भंगाचा गुन्हा दाखल करण्याचे अधिकार संबंधित पोलिस ठाणे आणि भरारी पोलिस पथकांना दिले आहेत. त्याप्रमाणे कार्यवाही केली जात आहे असे सूत्रांनी सांगितले. सहा वाहनांना परवाना लोकसभा निवडणुकीसाठी अर्ज भरलेले उमेदवार, त्यांच्यासोबत असणाऱ्या कार्यकर्त्यांच्या वाहनांचीही परवानगी घेणे सक्तीचे आहे. परवाना देण्यासाठी जिल्हाधिकारी कार्यालयात सुविधा कक्ष कार्यरत आहे. तेथून आतापर्यंत कोल्हापूर आणि हातकणंगले मतदारसंघातून प्रत्येकी तीन याप्रमाणे सहा वाहनांचे परवाने घेण्यात आले आहेत. राष्ट्रवादीचे नेते माजी केंद्रीय कृषी मंत्री शरद पवार यांच्या दौऱ्यासाठी हेलिकॉप्टरचा परवाना घेण्यात आला होता. कारवाईच्या धाकाआडून लूट कर्नाटक, गोवा राज्यातून येणारी विनापरवाना दारू, पैसे रोखण्यासाठी ३३ चेकपोस्ट आहेत. त्यातील काही चेकपोस्टवर वाहन परवाना तपासणीच्या नावाखाली शेतकऱ्यांचा शेतमाल नेणारी वाहने अडवून त्रास दिला जात असल्याच्या तक्रारी आहेत. कारवाईच्या धाकाआडून 'चिरीमिरी'वर डल्ला मारला जात असल्याचा आरोप होत आहे. यामुळे चेकपोस्ट, आचारसंहिता पथकाच्या 'कारनाम्यां'वर कुणाचे नियंत्रण? असा प्रश्न उपस्थित होत आहे. निवडणूक आयोगाच्या सूचनेनुसार आचारसंहितेच्या काळात रात्री साडेदहा वाजल्यानंतर हॉटेल्स, बार, धाबे सुरू ठेऊ नये असे आदेश दिला आहे. प्रचारातील कार्यकर्त्यांचीही जेवणांची सोय व्हावी म्हणून साडेदहापर्यंत वेळ वाढवली आहे. ही वेळ न पाळणाऱ्यांवर कारवाई केली जात आहे. विनापरवाना प्रचार, सभा, बैठकांवरही नजर आहे. - दौलत देसाई, जिल्हाधिकारी आचारसंहितेमुळे दहशतीचे वातावरण निर्माण झाले आहे. निवडणुकीची आचारसंहिता म्हणजे आणिबाणी आहे की काय असे वाटू लागले आहे. दैनंदिन व्यवहारांचे पैसे बँकेत भरण्यासाठी जातानाही पथकाकडून पकडले जाईल, चौकशीचा ससेमिरा लागेल असे व्यापाऱ्यांना वाटू लागले आहे. त्याचा परिणाम उलाढालीवर झाला आहे. व्यापार, उद्योगाच्या मंदीत भर पडली आहे. - सदानंद कोरगावकर, अध्यक्ष, जिल्हा व्यापारी महासंघ
मोबाइल अॅप डाउनलोड करा आणि राहा अपडेट
